1-2. (a) Ino kuyeeya pabuumi bwakwe Yesu anshaakacita ndyaakalinga pacishi capanshi inga kwatupa kulinyumfwa buyani? (b) Ino nshiinshi nsheshi tubandike mumutwi uyu?

 NA SHIKAMUKOWA nabi shicibusa wesu wafwa, tulamuyeeya abuumbi! Mpashi pakutaanguna inga catucisa abuumbi na twayeeya nshiku shikamukowa na shicibusa wesu kaatana kufwa. Alimwi cilacisa abuumbi bunene bunene na wakapenga abuumbi kaatana kufwa. Nacibi boobo, mukuya kwaciindi, inga twatalika kusangalala na twayeeya pacintu cimwi ncaakatwiisha, ncaakacita na ncaakaamba cakatuyuminisha na kutupa kunyumfwa kabotu.

² Ubu mbotulinyumfwa na twabelenga Yesu mbwaakapenshekwa akucaikwa. Nsondo bushiku bwa Ciibalusho kabutana kushika ansondo pesule lya Ciibalusho, tulacana ciindi ca kukutumana kuyeeya pa kuyandika kwa mulambu wakwe Yesu. (1 Koli. 11:24, 25) Nacibi boobo, tulasangalala abuumbi kuyeeya pashintu shoonse Yesu nshaakaamba akucita ndyaakalinga pacishi capanshi. Alimwi cilatuyuminisha akuyeeya nshaatoocita pacecino ciindi ansheshi akatucitile kunembo. Kukutumana kuyeeya pashintu ishi alimwi alusuno ndwakatutondesha inga kwatupa kucita shintu shitondesha ayi tulalumba, kweelana ambweshi tubandike mumutwi uyu.

3. Ino nceebonshi tulyeelete kulumba pacilubula?

³ Tulalumba na twakutumana akuyeeya pabuumi alufu lwakwe Yesu. Ndyaakalinga pacishi capanshi, Yesu wakaiisha bantu pashintu shibotu nsheshi Bwaami bwakwe Lesa bukacitile bantu. Tulishisuni Baibo nshoiisha pamakani acilubula ashintu shibotu sheshi shikakumanishikwe ceebo ca cilubula. Tulalumba kwaamba  ayi Yehova wakatupa cilubula mukwiinga cilatupa kwaamba ayi tucikoonshe kuba abushicibusa a Yehova alimwi a Yesu. Abo bacita shitondesha ayi balashoma muli Yesu balicite coolwe ca kukala buumi bwamuyayaya akubona beshikamukowa na beshicibusa baabo bakafwa ndyeshi bakabushikwe. (Joni 5:28, 29; Loma. 6:23) Ishi nshoolwe nshotuteeleli alimwi taakuwo nsheenga twapa Lesa a Klistu sheenga sheelana anshobakatucitila. (Loma. 5:8, 20, 21) Sombi inga twatondesha ayi tulalumba. Munshila nshi?

4. Ino Maliya waku Magadala wakatondesha buyani kulumba pasheesho Yesu nshaakamucitila? (Amubone cikope.)

⁴ Amuyeeye cakubonenaako ca mwanakashi mwine Juda waliina lya Maliya waku Magadala. Wakapenga abuumbi ceebo ca bashikaswa na madimoni 7 ngaakalinga kucite. Cilyeelete wakalinga kuyeeya ayi taakuwo muntu weenga wamucafwa. Aboobo amuyeeyebo mbwaakalumba Yesu ndyaakamwaangulula kubashikaswa! Ceebo ca kulumba Maliya wakaba shikwiiya wakwe Yesu. Alimwi wakasebensesha ciindi, nkusu, ashintu shakwe kucafwilisha muncito yakushimikila. (Luka 8:1-3) Nabi kwaamba ayi Maliya wakalumba abuumbi pasheesho Yesu nshaakamucitila, mpashi taakwe kushiba ayi Yesu alaakumucitila shiinji kunembo. Wakalinga kusa mukwaaba buumi bwakwe ceebo ca bantu, “kwaamba ayi uyo woonse umushoma” akabe abuumi butamaani. (Joni 3:16) Nacibi boobo, Maliya wakatondesha kulumba kwakwe kwiinda mukutolelela kushomeka. Yesu ndyaakalinga kupenga pacisamu ca kupenshesha, Maliya wakalinga kwiimfwi pafwiifwi, mukwiinga wakalinga kumubikila maano Yesu alimwi wakalinga kusuni kuyuminisha bamwi mbaakalingaabo. (Joni 19:25) Pesule lyakwaamba ayi Yesu wafwa, Maliya abanakashi bamwi bakaleta mafuta anunkila kabotu ku cuumbwe kwaamba ayi bananike mubili wakwe Yesu. (Maako 16:1, 2) Maliya wakatambula cilambu ceebo ca kushomeka kuli Yesu. Wakaba acoolwe cakukumanya Yesu akubandikaakwe ndyaakabushikwa. Coolwe citana kubaawo abashikwiiya bakwe Yesu baanji.​—Joni 20:11-18.

5. Ino inga twatondesha buyani ayi tulalumba pashintu shoonse Yehova a Yesu nshobakatucitila?

 ⁵ Aswebo inga twatondesha kulumba pashintu shoonse Yehova a Yesu nshobakatucitila. Inga twacita boobo kwiinda mukusebensesha ciindi, nkusu, amaali esu kucafwilisha muncito ya Bwaami. Kucakubonenaako, inga twalyaaba kucafwilisha muncito yakuyaka akubamba misena isebenseshekwa mukulambila kusalalite.

6. Ino nciinshi nceenga twaambila ayi cilubula ncipo Lesa ncaakapa muntu womwi awomwi?

⁶ Na twayeeya Yehova a Yesu mbobatusuni, aswebo tulayuminishikwa kubasuna. (1 Joni 4:10, 19) Tulabasuna abuumbi na twashiba kwaamba ayi Yesu wakafwa ceebo ca womwi awomwi wa ndiswe. Mutumwi Paulo wakasumina cancine ici akutondesha kulumba kwakwe ndyaakalembela Bene Galatiya ayi: “Mwanaakwe Lesa uyo wakansuna abuumbi akwaaba buumi bwakwe ceebo ca ndime.” (Gala. 2:20) Mukwiinga Yesu wakafwa ceebo ca ndiswe, Yehova inga wamusenya pafwiifwi anguwe kwaamba ayi mube shicibusa wakwe. (Joni 6:44) Cilayuminisha abuumbi kushiba kwaamba ayi kuli cibotu Yehova ncaakabona muli ndimwe alimwi ayi wakaaba buumi bwa Mwanaakwe kwaamba ayi mube shicibusa wakwe. Ici cilyeelete kutupa kutolelela kusuna Yehova a Yesu. Aboobo inga twaliipusha ayi, ‘Ino kusuna Yehova a Yesu kulyeelete kumpa kucita nshi?’

7. Ino inga twatondesha buyani ayi tulisuni Yehova a Yesu? (2 Bene Kolinto 5:14, 15; 6:1, 2)

⁷ Kusuna Lesa a Klistu kulyeelete kutupa kutondesha lusuno kubamwi. (Amubelenge 2 Bene Kolinto 5:14, 15; 6:1, 2.) Nshila yomwi mbweenga twatondesha lusuno lwesu nkwiinda mukusebensa cankusu muncito yakushimikila. Tulabandika amuntu uli woonse ngotwacana. Tatusalululi muntu uli woonse ceebo ca cikanda na mushobo. Alimwi tulabandika amuntu uli woonse, inga caba ayi ngumubile alimwi wakeeya abuumbi, na mukandu alimwi utana kwiiya.  Na twacita boobo nkokwaamba ayi tutosebensa kweelana aluyaando lwakwe Yehova lwa kwaamba ayi “bantu boonse bakapulushikwe akwishiba shalushinisho.”​—1 Timo. 2:4.

8. Ino inga twatondesha buyani ayi tulibasuni bamakwesu abenankashi?

⁸ Nshila imwi mbweenga twatondesha ayi tulisuni Lesa a Klistu nkwiinda mukusuna bamakwesu abenankashi. (1 Joni 4:21) Tulabikila maano abuumbi kumakani anshebatoyandika alimwi akubacafwa paciindi ndyebali mumapensho. Tulabayuminisha na bafwitwa shikamukowa na shicibusa, tulabafwakashila na baciswa, alimwi tulacita nsheenga twacikonsha kwaamba ayi tubayuminishe na balinyumfwa kulefuka. (2 Koli. 1:3-7; 1 Tesa. 5:11, 14) Tulatolelela kubapaililaako mukwiinga tulishi kwaamba ayi “mupailo wa muntu ululeme ulicite nkusu abuumbi.”​—Jemu. 5:16.

9. Ino nciinshi cimwi nceenga twaciita kwaamba ayi tutondeshe ayi tulibasuni bamakwesu abenankashi?

⁹ Nshila imwi mbweenga twatondesha ayi tulibasuni bamakwesu abenankashi nkwiinda mukusebensa cankusu kuba muluumuno ambabo. Tuleelesha kukonkela cakubonenaako cakwe Yehova cakulekelela. Na Yehova wakasuminisha Mwanaakwe kufwa ceebo ca shibiibi shesu, nkokwaamba ayi aswebo tulyeelete kuba balibambite kulekelela bamakwesu abenankashi na batubishisha. Tulisuni kuleya shakacita musebenshi mubiibi Yesu ngwakaamba mucikoshanyo. Nabi kwaamba ayi mwaami wakwe wakamulekelela pa nkongole inene njaakalinga kucite, lakwe wakaalilwa kulekelela musebenshinyina wakalinga kucitebo nkongole iniini. (Mate. 18:23-35) Na kuli umwi ngomwakapusanaakwe mulibungano, sa inga mweelesha kutaanguna kucitawo comwi kwaamba ayi mube muluumuno amuntu uyo kamutana kuya ku Ciibalusho? (Mate. 5:23, 24) Kucita boobo kulaakutondesha kwaamba ayi mulimusuni abuumbi Yehova a Yesu.

10-11. Ino bamanene inga batondesha buyani ayi balisuni Yehova a Yesu? (1 Pita 5:1, 2)

¹⁰ Ino bamanene inga batondesha buyani ayi balisuni Yehova a Yesu? Nshila iyandika abuumbi mbweenga bacita boobo nkwiinda mukulama kabotu mbelele shakwe Yesu. (Amubelenge 1 Pita 5:1, 2.) Yesu wakacafwa mutumwi Pita kunyumfwishisha kulama kabotu mbelele mbokuyandika. Pesule lyakukaka Yesu mankanda otatwe, cilyeelete Pita wakalinga kusunishishi kutondesha Yesu ayi alimusuni. Pesule lyakubushikwa, Yesu wakeepusha Pita ayi: “Simoni omwanaakwe Joni, sa ulinsuni?” Inga twashoma kwaamba ayi cilyeelete Pita wakalinga kulibambite kucita cili coonse kwaamba ayi atondesha ayi alisuni Mwaami wakwe. Yesu wakalwiita Pita ayi: ‘Koembela twaana twambelele twangu.’ (Joni 21:15-17) Alimwi kwa buumi bwakwe boonse Pita wakatondesha ayi wakalinga kusuni Yesu kwiinda mukulama kabotu mbelele sha Mwaami wakwe.

¹¹ Nobamanene, ino inga mwatondesha buyani ayi maswi Yesu ngaakalwiita Pita alayandika kuli ndimwe, munsondo bushiku bwa Ciibalusho kabutana kushika alimwi ansondo pesule lya Ciibalusho? Inga mwatondesha ayi mulisuni Yehova a Yesu kwiinda mukucana ciindi lyoonse cakuyuminisha bamakwesu abenankashi akulyaaba kucita shiinji kwaamba ayi mucafwe baabo bakaboolela mwisule kuboolela kuli Yehova. (Esek. 34:11, 12) Alimwi inga mweelesha kuyuminisha beshikwiiya Baibo abapya besa ku Ciibalusho. Tulisuni kubatambula camaansa obilo mukwiinga tulalangila kwaamba ayi abalo balaakuba bashikwiiya bakwe Yesu.

12. Ino nceebonshi kukutumana kuyeeya maswi Yesu ngakaamba mashiku kaatana kufwa kulatupa kuba bataloondi? (Joni 16:32, 33)

¹² Mashiku Yesu kaatana kufwa, wakalwiita bashikwiiya bakwe ayi: ‘Mucishi ca panshi  mulaakupenshekwa, sombi mutaloondi! Nebo ndacikoma cishi.’ (Amubelenge Joni 16:32, 33.) Ino nciinshi cakacafwa Yesu kutaloonda balwani bakwe akutolelela kushomeka kuli Yehova kushikila akulufu? Wakacinka manungo muli Yehova. Mukwiinga wakalinga kucishi ayi bashikwiiya bakwe abalo balaakwiinda mumapensho mbuli aayo ngakeendaamo, Yesu wakasenga Yehova ayi abalaame. (Joni 17:11) Ino nceebonshi kushiba cancine ici kulatupa kutaloonda? Nceebo cakwaamba ayi Yehova alicite nkusu kwiinda balwani besu. (1 Joni 4:4) Yehova alabona shintu shoonse. Tulishomete cakutatoonsha kwaamba ayi na twacinka manungo muli Yehova, inga twacikonsha kuba bantu batacite boowa.

13. Ino Josefu waku Alimateya wakatondesha buyani kutaloonda?

¹³ Amuyeeye cakubonenaako cakwe Josefu waku Alimateya. Wakalinga musankwa ulemekwa abuumbi pakati ka baJuda. Wakalinga womwi wa bamukooti inene ya baJuda ya Sanihedilini. Nacibi boobo, Yesu ndyaakalinga pacishi capanshi, Josefu wakalinga muntu uloonda. Joni wakaamba ayi wakalinga “shikwiiya wakwe Yesu wakalinga kulisisa ceebo cakuloonda baJuda.” (Joni 19:38, NWT) Nabi kwaamba ayi Josefu wakalinga kusuni makani a Bwaami, wakalinga kuyuba kubamwi kwaamba ayi wakalinga kushoma muli Yesu. Cilyeelete wakalinga kuloonda ayi bantu inga bacileka kumupa bulemu na bashiba ayi ngu shikwiiya wakwe Yesu. Nacibi boobo, Baibo ilaamba ayi Yesu ndyaakafwa, Josefu “wakaya kuli Pilato cakubula boowa mukusenga mutuntu wakwe Yesu.” (Maako 15:42, 43) Paciindi ici Josefu wakacileka kulisisa ayi ngu shikwiiya wakwe Yesu.

14. Ino nshiinshi nshomweelete kucita na mulicite lipenshi lya kuloonda bantu?

¹⁴ Sa amwebo mulaloonda bantu bweenka mbuli Josefu? Sa cimwi ciindi mulaalilwa kulwiita bamwi kucikolo na kuncito ayi muli Kamboni Wakwe Yehova? Sa mutowayawaya kuba shikushimikila na kubombekwa ceebo cakuyeeya bamwi mbweenga bamubona? Mutaalilwi kucita cintu ncomushi ayi nceciluleme ceebo cakuloonda bantu. Amupaile kuli Yehova kuswa panshi lya moyo. Amumusenge kwaamba ayi amucaafwe kutaloonda kucita kuyanda kwakwe. Lyalo na mukabone Yehova mbwatokumbula mipailo yanu, mulaakuyuma akuba bataloondi.​—Isa. 41:10, 13.

15. Ino lusangalalo ndobakalinga kucite bashikwiiya bakwe Yesu pesule lyakwaamba ayi Yesu wabonekela kuli mbabo lwakabapa kucita nshi? (Luka 24:52, 53)

¹⁵ Bashikwiiya bakwe Yesu bakalinyumfwa cibiibi abuumbi Yesu ndyaakafwa. Amuyeeyebo nimwakalinga ndimwe. Tabakwe kulinyumfwabo  ayi bafwitwa shicibusa ngobakalinga kusuni abuumbi, sombi bakalinyumfwa anga nshobakalinga kulangila teshi shikakumanishikwe. (Luka 24:17-21) Nacibi boobo, Yesu ndyaakabonekela kuli mbabo, wakabacafwa kunyumfwishisha lubasu ndwakalinga kucite mukukumanisha bushinshimi bwamu Baibo. Alimwi wakabapa anciito iyandika abuumbi. (Luka 24:26, 27, 45-48) Yesu ndyaakalinga kuboolela kwiculu pesule lya nshiku 40, bashikwiiya bakwe bakalinga kusangalete abuumbi. Bakalinga kusangalete mukwiinga bakalinga kucishi kwaamba ayi Mwaami wabo ngumuumi alimwi alilibambite kubacafwa kukumanisha ncito yabo ipya. Bakatolelela kulumbaisha Yehova ceebo ca lusangalalo ndobakalinga kucite.​—Amubelenge Luka 24:52, 53; Milimo 5:42.

16. Ino cakubonenaako ca bashikwiiya bakwe Yesu inga twacikonkela buyani?

¹⁶ Ino cakubonenaako ca bashikwiiya bakwe Yesu inga twacikonkela buyani? Inga twasangalala kulambila Yehova kuteshibo nsondo bushiku bwa Ciibalusho kabutana kushika ansondo pesule lya Ciibalusho, sombi mumwaaka woonse. Kwaamba ayi tucite boobo tulyeelete kubika Bwaami bwakwe Lesa panembo mubuumi bwesu. Kucakubonenaako, bamwi balaceeshako ciindi ncobasebensa ncito yakumubili kwaamba ayi banokwaabanamo lubasu muncito yakushimikila, kucanika kumabungano, akucita kulambila kwa mukwashi lyoonse. Bamwi kwaamba ayi bacikoonshe kucita shiinji mulibungano na kulongela kumusena kuli beshikushimikila baniini, balasalawo kuba ashintu shakumubili shiniini bamwi nshobabona anga shilayandika. Nabi kwaamba ayi kutolelela kusebensela Yehova kulayandika kuliyumya, Yehova watushomesha ayi alaakutupa shoolwe na katubika sha Bwaami panembo mubuumi bwesu.​—Tus. 10:22; Mate. 6:32, 33.

17. Ino nshiinshi nshomushinishite kucita munsondo bushiku bwa Ciibalusho kabutana kushika ansondo pesule lya Ciibalusho? (Amubone cikope.)

¹⁷ Tutolangila kucita Ciibalusho pa Cibili pa 4 April. Nacibi boobo, amutolelele lyoonse kukutumana kuyeeya pabuumi alufu lwakwe Yesu alimwi alusuno Yehova a Yesu ndobakatutondesha. Amucane ciindi cakuyeeya pashintu ishi nsondo bushiku bwa Ciibalusho kabutana kushika ansondo pesule lya Ciibalusho. Kucakubonenaako, amucane ciindi ca kubelenga akukutumana kuyeeya pashintu shakacitika isho shatondeshekwa mucaati njeenga mwacana mu Kabuku Kamabungano Abuumi Anciito kamu April 2019 pa peeji 4. Ndyemutobelenga pabuumi bwakwe Yesu, amulangoole makani amu Baibo amucafwa kuyumya lusuno lwanu, kulumba, kutaloonda, alusangalalo lwanu. Lyalo amweeleshe kuyeeya mbweenga mwatondesha kulumba kwanu kwa kuswa panshi lya moyo. Inga mwashoma cakutatoonsha ayi Yesu alaakulumba pashintu shoonse nshemwacita kwaamba ayi mumwiibaluke nsondo bushiku bwa Ciibalusho kabutana kushika ansondo pesule lya Ciibalusho.​—Ciyu. 2:19.