1-2. (a) Tunateli kutiya ñahi neyi tutoñojoka hachihandilu chaYesu nimudimu windi wakushimwina? (b) Yumanyi yitukuhanjekahu muchinu chibaaba?

 NEYI muntu itwakeña nafwi, twamwanukaña nankashi! Hakusambila chatukataña nankashi neyi tutoñojoka hayuma yahitilimu mumafuku akutwala kukufwa kwindi, sweje-e neyi wakabakeni henohu kanda afwi. Hela chochu, mukuhita kwampinji, tunateli kutachika kutiya muzañalu neyi tutoñojoka hayuma yatudizishiliyi, yeliliyi, yahosheliyi hakutukolesha hela hakutuzañalesha.

² Munjila yoyimu, chatuneñeshaña chitwataña hansañu yahosha hakukabakana kwaYesu nikufwa. Mumpinji yaChanukishu, twekalaña nampinji yakutoñojoka hakulema kwamulambu windi wefutu danyiloña. (1 Kor. 11:24, 25) Hela chochu, twazañalalaña chikupu chitwatoñojoka hayuma yejima yahosheliyi Yesu niyeliliyi hadiñayi hamaseki. Chatukoleshaña cheñi neyi tutoñojoka hayuma yinakwilayi chayinu mpinji niyakatwililayi kumbidi. Kutoñojoka chikupu haniyi yuma nihakukeña kwatumwekeshelayi, kukutusañumuna kumwekesha kusakilila munjila jashiyashana neyi chitukumona muchinu chibaaba.

3. Yumanyi yikuletesha tusakilileña hefutu danyiloña?

³ Twasakililaña chitwatoñojoka hachihandilu chaYesu nihakufwa kwindi. Yesu hadiñayi hamaseki, watañishileña antu hayuma yayiwahi yakela Wanta waNzambi. Twasakililaña chikupu hakwiluka ichi chalala chahosha haWanta. Twasakililaña hefutu danyiloña muloña datukwashaña kwikala nawubwambu wakola naYehova niYesu. Antu akuhwelela mudi Yesu, akweti cheñi kuchiñeja kwakushakama haya nyaaka nikwakumona  cheñi antaña jawu afwa dehi. (Yow. 5:28, 29; Rom. 6:23) Kwosi chuma chitwela chaletesha atwilili yumiyiku, nawa hitukutwesha kumufweta Nzambi niKristu hayuma yatwililawuku. (Rom. 5:8, 20, 21) Ilaña tunateli kumwekesha netu twasakililaña chikupu hayuma yatwililawu. Munjilanyi?

4. Mariya Mandaleni wamwekesheli ñahi kusakilila hachuma chamwilililiwu kudi Yesu? (Talenu mwevulu.)

⁴ Talenu chuma chamumwekeneni mumbanda kaYudeya wejina daMariya Mandaleni. Wakabakeni chikupu, amukabishileña kudi andemoni 7. Watela watoñojokeleña nindi kwosi wunateli kumukwasha. Fwikijenu chasakilililiyi chelili Yesu amufumishi ana andemoni adiñayi nawu! Iku kusakilila kwamuletesheli ekali mukakumulondela Yesu nawa wazatishileña mpinji yindi, ñovu niyuma yindi kumukwasha mumudimu windi. (Luka 8:1-3) Hela chakwila Mariya wasakililili chikupu hachuma chamwilililiwu kudi Yesu, welukili wanyi nindi Yesu wakamwilila chuma chasweja kulema kumbidi. Welukili wanyi nindi wakahana wumi windi kukoola antu, “kulonda muntu wejima wukumukuhwelela” akekali nawumi wahaya nyaaka. (Yow. 3:16) Hela chochu, Mariya wamwekesheli nindi wamusakililili Yesu kuhitila mukwikala washinshika. Yesu hakabakeneñayi hamutondu wakuyandishila, Mariya wemeni kwakwihi nakumukundeja Yesu niantu amakwawu. (Yow. 19:25) Yesu chafwiliyi, Mariya niakwawu ambanda ayedi aleteli yuma yevumba dadiwahi kwijamu yakumujiika nachu. (Maku 16:1, 2) Mariya amukiswilili chikupu muloña wakwikala washinshika. Wazañaleli hakudimona naYesu asañwiliwu nikuhanjika nindi, kukooleka kwabulili kwikala nawatumbanji amavulu.—Yow. 20:11-18.

5. Tunateli kumwekesha ñahi kusakilila hayuma yejima yatwililawu kudi Yehova niYesu?

⁵ Ninetu tunateli kumwekesha kusakilila hayuma yejima yatwililawu kudi Yehova niYesu kuhitila mukuzatisha mpinji yetu, ñovu  nimaheta etu kukwasha mudimu waWanta. Chakutalilahu, tunateli kuya nakukwashaku mumudimu wakutuña nikuwahisha matala akudifukwila kwalala.

6. Tukuhosheladi netu ifutu danyiloña hichawaana chenkawu muntu-himuntu?

⁶ Neyi tutoñojoka hachatukeñawu kudi Yehova niYesu, chatuleteshaña ninetu kuyikeña. (1 Yow. 4:10, 19) Twaswejaña kuyikeña chitweluka netu Yesu watufwilili hamuntu-hamuntu. Kapostolu Pawulu welukili chumichi nawa wamwekesheli kusakilila chayisonekeleliyi aÑalija nindi: “Mwana kaNzambi, wankeñeli nawa wadihanini yomweni kukoola ami.” (Ñal. 2:20) Yehova wazatisha ifutu danyiloña, nakuyikokela kwakwihi nayena kulonda mwiikali ibwambu dindi. (Yow. 6:44) Komana mwazañalalaña wanyi hakwiluka nenu Yehova wamweni chuma chachiwahi mudi enu nawa nenu wafweteli wuseya weneni hakwila mwiikali ibwambu dindi? Chumichi hichayileteshaña musweji kumukeña Yehova niYesuku? Twatela kudihula netu, ‘Iku kukeña kukunsañumuna kwiladi?’

7. Neyi chitunamoni hamwevulu, wejima wetu tunateli kumwekesha ñahi netu twamukeña Yehova niYesu? (2 AKorinda 5:14, 15; 6:1, 2)

⁷ Kukeña kutwamukeña Nzambi niKristu kwatuleteshaña kuyikeña akwetu. (Tañenu 2 AKorinda 5:14, 15; 6:1, 2.) Njila yimu mutwamwekeshelaña iku kukeña hikuzata nañovu mumudimu wakushimwina. Twahanjekaña nawantu ejima itwawanaña. Hitwamwekeshaña chaambu kudi muntu wudi wejima muloña wekowa dindi, muchidi, mali akwetiyi hela nkulilu yindiku. Neyi twila mwenimu, dikwila nawu tunakuzata kwesekeja nankeñelu yaYehova yakwila nawu “wakeñaña nindi antu ejima ayamwini nawa eluki chalala chikupu.”—1 Tim. 2:4.

8. Tunateli kumwekesha ñahi netu twayikeña amanakwetu niahela?

 ⁸ Twamwekeshaña cheñi netu twamukeña Nzambi niKristu kuhitila mukuyimwekeshela amanakwetu niahela kukeña. (1 Yow. 4:21) Twayakamenaña nikuyikwasha mpinji yinakumonawu kukala. Twayikundejaña neyi anafwishi ntaña yawu, twayaña nakuyihempula neyi anakati nikuyikolesha neyi ananeñi. (2 Kor. 1:3-7; 1 Tes. 5:11, 14) Twatwalekañahu kuyilombelaku, nakwanuka netu “kulomba kwakulembelela kwamuntu waloña kwekala nañovu chikupu.”—Yak. 5:16.

9. Njilanyi yikwawu mutunateli kumwekeshela netu twayikeña amanakwetu niahela?

⁹ Twamwekeshaña cheñi netu twayikeña amanakwetu niahela kuhitila mukuzata nañovu kulonda tutwalekihu kwikala mukuwunda nawena. Twafwilaña kumwimbujola Yehova chanakenañayi. Neyi chakwila Yehova wetejeli Mwanindi kufwa kukoola nshidi jetu, komana etu kwila tuyanakena amanakwetu niahela chakufuma hamuchima neyi anatuvulumuni nehi? Hitunakukeña kwikala neyi nduñu watama ashimunawu muchishimu chaYesuku. Nihanyima yakumwanakena mukudi weneni kudi nkaaka yindi, ona nduñu wakañenyi kwanakena mukwawu nduñu wadiña namukudi wanyanya. (Mat. 18:23-35) Neyi kudi muntu imwaleka kutiyañana nindi muchipompelu, kwila musambila kuleta kuwunda henohu kanda muyi kuChanukishu nehi? (Mat. 5:23, 24) Neyi mwila mwenimu, mukumwekesha nenu mwamukeña chikupu Yehova niYesu.

10-11. Akulumpi anateli kumwekesha ñahi nawu amukeña Yehova niYesu? (1 Petulu 5:1, 2)

¹⁰ Akulumpi anateli kumwekesha ñahi nawu amukeña Yehova niYesu? Chuma chimu chalema chatela kwilawu hikwakamena nyikoku yaYesu. (Tañenu 1 Petulu 5:1, 2.) Yesu wamukwashili kapostolu Petulu kwiluka kulema kwanichi chuma. Hanyima yakumukaana Yesu kasatu, hadaha Petulu wafwilileña chikupu kumwekesha nindi wamukeñeli Yesu. Hanyima yakumusañula, Yesu wamwihwili Petulu nindi: “Shimona mwana kaYowanu, komana wankeña?” Tuneluki chikupu netu Petulu wadi kwila chuma chidi chejima kulonda amwekeshi nindi wamukeña Nkaaka yindi. Yesu wamulejeli Petulu nindi: “Biñaña anyikoku ami anyanya.” (Yow. 21:15-17) Nawa mukuhanda kwindi kwejima, Petulu wakameneneña chiwahi anyikoku aMwanta, nakumwekesha nindi wadiña wamukeña Yesu.

11 Enu akulumpi, mumpinji yaChanukishu, munateli kumwekesha ñahi nenu mazu aYesu amulejeliyi Petulu alema? Munateli kumwekesha chimwamukeña Yehova niYesu kuhitila mukuzata mudimu wakubiña nikuzata nañovu kukwasha antu azeya kulonda afunti kudi Yehova. (Ezek. 34:11, 12) Mwatela cheñi kwikala nampinji yakuhanjeka nawatudizi aBayibolu niantu anenzi kuChanukishu. Zatenu nañovu kulonda mukwashi awa anakufwila kwikala atumbanji ekali akasunuka.

12. Muloñadi kutoñojoka hamazu ahosheliyi Yesu hawufuku wakutwala kukufwa kwindi chikwatukwashilaña kwikala ahamuka? (Yowanu 16:32, 33)

¹² Hawufuku wakutwala kukufwa kwindi, Yesu wayilejeli atumbanji twindi nindi: “Mukumonaña yihuñu mukaayi, ilaña kolenu! Muloña ami nakimiki kaayi mushindu.” (Tañenu Yowanu 16:32, 33.) Chumanyi chamukwashili Yesu kubula kutiya ayilumbu jindi woma hamuchiinishileñawu nikutwalekahu kwikala washinshika kushika nikukufwa? Wamushindameneni Yehova. Chineli welukili nindi akakumulondela akamonaña kweseka  kwokumu, Yesu wamulombeli Yehova nindi ayihembeña. (Yow. 17:11) Muloñadi iyi nsañu chiyatukwashilaña kwikala ahamuka? Muloña Yehova wukweti ñovu kubadika ayilumbu jetu. (1 Yow. 4:4) Wamonaña yuma yejima. Tuneluki chikupu netu neyi tumushindamena Yehova tukuleka kutiya woma nawa tukumwekeshaña kuhamuka.

13. Yosefu wakuAramateya wamwekesheli ñahi kuhamuka?

¹³ Talenu chuma chelili Yosefu wakuAramateya. Amulemesheli chikupu kudi aYudeya. Wadiña membala wamuSanihedirini, chota cheneni chawaYudeya. Hela chochu, hampinji yazatileñayi Yesu mudimu windi hanu hamaseki, Yosefu wadiña wahamuka wanyi. Yowanu wahosheli nindi ‘wadiña kambanji kaYesu ilaña wadiswekeleña muloña watiyileña aYudeya woma.’ (Yow. 19:38) Hela chakwila Yosefu wakeñeli nankashi nsañu yaWanta, wadiswekeleña kudi antu nakumwekesha nindi wamukuhweleleli Yesu wanyi. Chakadi nikujina, watiyileña woma nindi keña ajimbeshi chifulu chalema chamwinkeliwu muchituñilu. Ilaña, Bayibolu yatulejaña nawu chafwiliyi Yesu, hohenohu Yosefu “wamwekesheli wulobu nakuya kudi Pilatu nawa walombeli mujimba waYesu.” (Maku 15:42, 43) Haniyi mpinji Yosefu wamwekesheli hatooka nindi wadiña kambanji kaYesu.

14. Chumanyi chimwatela kwila neyi mwatiyaña antu woma?

¹⁴ Mwatiyahu dehi antu woma neyi chatiyiliyi Yosefu? Neyi mudi kushikola hela kumudimu, komana mpinji jikwawu mwatiyaña nsonyi kuleja antu nenu mudi Chinsahu chaYehova? Komana mwashintajalaña kwikala mukakushimwina hela kupapatishewa muloña wakwakama chinateli kuyimonawu antu? Bayi mwiteja yitoñojoka yamuchidiwu yiyikañeshi kwila chuma chaloñaku. Mulombenu chikupu Yehova. Mulombenu ayikwashi kwikala ahamuka kulonda mwili nkeñelu yindi. Chimukumonaña Yehova chinakwakulayi kulomba kwenu, mukwikala akola nawa ahamuka chikupu.—Isa. 41:10, 13.

15. Chelili Yesu amwekani kudi atumbanji twindi, muzañalu watiyiliwu wayiletesheli kwiladi? (Luka 24:52, 53)

¹⁵ Atumbanji aneñeli nankashi hafwiliyi Yesu. Fwikijenu ninenu mudi mukukala kwokumu. Bayi neyi ajimbesheli hohu ibwambu dawuku, ilaña azeyeli nimuyitoñojoka. (Luka 24:17-21) Hela chochu, Yesu hamwekeniyi kudi wena, wekalili nampinji yeneni yakuyikwasha  kutiyishisha mudimu windi wakushikija wuprofwetu wamuBayibolu. Wayinkeli cheñi mudimu walema watela kuzatawu. (Luka 24:26, 27, 45-48) Chimwahitili mafuku 40 kufuma hafuntiliyi Yesu mwiwulu, atumbanji alekeli kuneña nawa adiña namuzañalu chikupu. Chelukiliwu nawu Mwanta wawu wadiña wamumi nawa wukuyikwashaña kuzata mudimu wayinkeliyi, azañaleli. Muzañalu watiyiliwu wayiletesheli kumushimeka Yehova chakadi kuleka.—Tañenu Luka 24:52, 53; Yilw. 5:42.

16. Tunateli kuyimbujola ñahi atumbanji twaYesu?

¹⁶ Tunateli kuyimbujola ñahi atumbanji twaYesu? Tunateli kwikala namuzañalu mpinji yejima yitunakudifukula kudi Yehova bayi mumpinji yaChanukishu hohuku, ilaña chaaka chejima. Chumichi chinakumwekesha nawu twatela kutwamijaku Wanta waNzambi muchihandilu chetu. Chakutalilahu, amavulu anahimpi ndandanda yawu yakumudimu kulonda azateñaku mumudimu wakushimwina, kuya nakupompa nikwikala nakudifukula kwachisaka mpinji yejima. Amakwawu anafuukulihu kubula kwikala namaheta akumujimba amonañawu akwawu nawu alema kulonda azateña nankashi muchipompelu hela atweshi kuya nakuzatila kudi kukaankila kwawakakushimwina aWanta. Hela chakwila twatela kuumika hakwila tutwalekihu kumukalakela Yehova, watukana nindi wakatukiswila chikupu neyi tutwamijaku Wanta muchihandilu.—Yish. 10:22; Mat. 6:32, 33.

17. Yumanyi yimunakufwila kwila muyinu mpinji yaChanukishu? (Talenu mwevulu.)

¹⁷ Tunakutalila kwikala naChanukishu Hachiyedi, April 4. Hela chochu, bayi muchiñilila sampu idi ifuku hakwila dinu mwakatoñojoki hachihandilu chaYesu nikufwa kwindi nihakukeña kwatumwekeshelayi yena niYehovaku. Toñojokenuña haniyi nsañu kakavulu mumpinji yaChanukishu. Chakutalilahu, ikalenuña nampinji yakutaña nikutoñojoka chikupu hayuma yamwekeni yashimunawu muchati yinakwila nawu “Mulungu Wakukumishaku Yesu Kwikala Hamaseki,” yidi muNsañu Jikwawu B12 muBayibolu yaKaayi Kakaha. Hampinji yimunakutaña, talenu nsañu yamuBayibolu yinateli kuyiletesha kwikala namuchima wakusakilila, kukeña, kuhamuka nimuzañalu. Kuhiñahu, toñojokenu hanjila mumunateli kumwekeshela kusakilila kwenu kwakufuma hamuchima. Mwatela kwiluka chikupu nenu Yesu walemesha yuma yejima yimwelaña hakumwanuka mumpinji yaChanukishu.—Chim. 2:19.