1-2. (a) Isua nun leh rawngbâwlna kan ngaihtuah hian engtin nge kan awm mai theih? (b) He thuziakah hian eng nge kan sawiho vang?

 KAN hmangaih tak tuemawin min boralsan hian, ani chu kan ngai hle! A tîrah chuan, a thih hma nîte kan han ngaihtuah lêt hian kan rilru a na ngawih ngawih a, a bîk takin hrehawm tuara a thih hian a ni lehzual. Mahse, hunte a han liama a thil min zirtîr leh a thil min tihsakte emaw, min fuihna thu leh min tihlimtu a thusawite emaw kan han ngaihtuah hian hlimna kan nei ṭan leh a ni.

² Chutiang chiah chuan Isua hrehawm tawrhna leh thihna chungchâng chhiarna chuan min tilungchhia a. A bîk takin, Hriatrengna hun chhûng hian a tlanna inthawina pawimawhzia ngaihtuah nân hun kan hmang a ni. (1 Kor. 11:24, 25) Chutih rualin, leia a awm laia Isua thusawi leh thiltih zawng zawng ngaituahna aṭangin hlimna nasa tak kan nei a ni. Chu bâkah, tûna a thiltih mêkte leh nakina kan tâna a thiltih tûrte chungchâng ngaihtuahna chuan chakna min pe bawk. Chûng thilte leh min hmangaihna chhût ngunna chuan he thuziaka kan hmuh tûr angin, kawng ṭangkai taka kan lâwmzia lantîr tûrin min chêttîr thei a ni.

3. Tlanna avânga lâwm nachhan tûr eng nge kan neih?

³ Isua nun leh thihna chungchâng kan ngaihtuah hian kan  lâwm a. Leia a rawngbâwl chhûng zawngin, Isua chuan mite chu Pathian Ramin a rawn thlen tûr malsâwmnate chungchâng a zirtîr a ni. Hêng Lalram thutakte hi kan ngaihlu hle a. Pathian Jehova leh Isua nêna inṭhian ṭhatna kawng min hawnsaktu tlanna avângin kan lâwm hle bawk. Isuaa rinna lantîrtute chuan chatuana nun leh an hmangaih tak thi tawhte an hmu leh ang tih beiseina an nei bawk a ni. (Joh. 5:28, 29; Rom 6:23) Hêng malsâwmnate dawng tlâk ni tûr hian engmah tih kan nei lo va; Pathian leh Krista’n kan tâna an tihte hi kan rûl lêt thei ngai bawk hek lo vang. (Rom 5:8, 20, 21) Mahse, kan lâwmzia kan lantîr thei a ni. Engtin nge?

4. Engtin nge Mari Magdalini chuan Isua’n a thil tihsakte chunga a lâwmzia a lantîr? (Milem en rawh.)

⁴ Juda hmeichhia Mari Magdalini chungchâng lo ngaihtuah ta ila. Ani chu ramhuai pasarihin an nghaisak avângin hrehawm a tuar nasa hle a ni. Ṭanpui theitu nei lo angin a inngai ngei ang. Isua’n chûng ramhuaite thununna lak ata a chhuah zalên laia a lâwm dân tûr chu han mitthla teh! A lâwmna chuan a hnungzuitu ni tûr leh, a hun leh tha leh a thil neihte rawngbâwlnaa Isua ṭanpui nâna hmang tûrin a chêttîr a. (Lk. 8:1-3) Mari chuan Isua’n a mi mal taka thil a tihsak chu a ngaihlu hle a; mahse, nakina Isua’n thil nasa tak a la tihsak tûr chu a hre kher lo mai thei. ‘Amah chu tu pawh a ring apiangin’ chatuana nunna an neih theih nân a nun a pe dâwn si a. (Joh. 3:16) Chutichung pawhin, Mari chuan rinawm taka awmin Isua chunga a lâwmzia a lantîr tho a ni. Isua’n nghaisakna bana hrehawm a tawrh lai khân, Mari chu a bulah dingin Isua leh mi dangte thlamuan tûrin a awm ve a ni. (Joh. 19:25) Isua thih hnuah Mari leh hmeichhe dang pahnihin a thlânah englo rimtui an rawn keng a. (Mk. 16:1, 2) Mari rinawmna chu nasa taka malsâwm a ni a. Ani chuan tho leh Isua hmuh theihna leh biak theihna—zirtîr tam zâwkte’n an neih loh chanvo—chu a nei a ni.—Joh. 20:11-18.

5. Engtin nge Jehova leh Isua’n kan tâna min tihsak zawng zawngte avânga kan lâwmzia kan lantîr theih?

 ⁵ Keini pawhin kan hun leh tha leh thil neihte Lalram hmasâwnna atâna hmangin, Jehova leh Isua’n kan tâna min tihsak zawng zawngte avânga kan lâwmzia kan lantîr thei a. Entîr nân, biakna thianghlim atâna inte sak leh thawm ṭhatnaa ṭanpui tûrin kan inpe thei a ni.

6. Engvângin nge tlanna chu mi mal tinte tâna thilthlâwnpêk a ni kan tih theih?

⁶ Pathian Jehova leh Isua’n min hmangaih nasatzia kan ngaihtuah hian anmahni hmangaih lêt tûra chêttîrin kan awm a. (1 Joh. 4:10, 19) Isua chu kan tân liau liauva thi a ni tih kan hriat hian, anmahni kan hmangaih lehzual a ni. Tirhkoh Paula’n chu chu a hria a, Galatia mite hnêna a lehkha thawnah chumi a ngaihhlutzia chu heti hian a ziak a ni: “Pathian Fapa, mi hmangaiha ka aia inpetu,” tiin. (Gal. 2:20) Tlanna avângin Jehova chuan a ṭhian i nih theih nân a lamah a hîp che a. (Joh. 6:44) Jehova’n nangmahah thil ṭha engemaw a hmu a, a ṭhiana chhiar i nih theih nâna man hlu ber a pe tih i hriatna chuan i thinlung a tilâwm hle a ni lâwm ni? Chu chuan Jehova leh Isua i hmangaihna a tinghet a ni lâwm ni? Heti hian kan inzâwt tûr a ni, ‘Chu hmangaihna chuan engti tûrin nge min chêttîr ang?’ tiin.

7. Milema kan hmuh tawh angin, kan za hian Jehova leh Isua kan hmangaihna engtin nge kan lantîr ṭheuh theih? (2 Korinth 5:14, 15; 6:1, 2)

⁷ Pathian leh Krista kan hmangaihna chuan mi dangte chunga hmangaihna lantîr tûrin min chêttîr a. (2 Korinth 5:14, 15; 6:1, 2 chhiar rawh.) Kan hmangaihna kan lantîr theih dân kawng khat chu thu hrilh rawngbâwlnaa ṭhahnemngai taka tel hi a ni. Kan mi tawh apiangte kan bia a. Hnam te, chî te, sum  leh pai dinhmun te, leh khawtlânga an nihnate avângin tu mah kan thliar hrang lo. Hetiang kawng hian, Jehova thiltum “mi zawng zawng chhandama awmah leh thutak hriaah a duh,” tih nêna inmilin kan thawk a ni.—1 Tim. 2:4.

8. Engtin nge kan unaute chungah hmangaihna kan lantîr theih?

⁸ Kan unaute chunga hmangaihna lantîrin Pathian leh Krista kan hmangaihzia kan lantîr thei bawk a. (1 Joh. 4:21) An chungah mi mal ngaihsakna kan lantîr a, fiahnate an tawh laiin kan ṭanpui bawk. An hmangaih takte an boral laiin kan thlamuan a, an dam lohvin kan kan a, an lunghnual laiin fuih tûrin theih tâwp kan chhuah a ni. (2 Kor. 1:3-7; 1 Thes. 5:11, 14) “Mi fel ṭawngṭaina chuan thil nasa tak a ti ṭhîn,” tih hriain, kan ṭawngṭaisak ziah bawk.—Jak. 5:16.

9. Kan unaute chunga hmangaihna kan lantîr theih dân kawng dang chu eng nge ni?

⁹ Kan unaute nêna inrem taka awm tum tlatin, an chungah hmangaihna kan lantîr a. Ngaihdamna kawngah Jehova entawn kan tum tlat a ni. Pathian Jehova’n kan sualte avânga a Fapa thihtîr a phal a nih chuan, kan chunga an thil tihsual avânga kan unaute ngaihdam chu kan inhuam tûr a ni dâwn lâwm ni? Isua tehkhin thu pakhata bâwih sual ang nih chu kan duh lo. A puin a bâ tam tak a ngaihdamsak hnuah pawh, chu bâwih chuan a laka ba tlêmtê nei a bâwihpui chu a ngaidam duh lo a ni. (Mt. 18:23-35) Kohhrana tuemaw nên inhriat thiam lohna in nei a nih chuan, Hriatrengna inkhâwma i tel hmain remna siam tûrin hma i la hmasa thei ang em? (Mt. 5:23, 24) Chutianga i tih chuan, Jehova leh Isua i hmangaihna thûk tak i lantîr tihna a ni ang.

10-11. Engtin nge upate’n Jehova leh Isua an hmangaihzia an lantîr theih? (1 Petera 5:1, 2)

¹⁰ Engtin nge upate’n Pathian Jehova leh Isua an hmangaihna an lantîr theih? An lantîr theih dân kawng pawimawh tak pakhat chu Isua berâmte mamawh ngaihsak hi a ni. (1 Petera 5:1, 2 chhiar rawh.) Isua’n chumi chungchâng chu tirhkoh Petera hnênah chiang takin a sawi a. Petera chuan Isua vawi thum a phat hnuah, ani chu a hmangaih tih lantîr duhna nasa tak a nei ngei ang. A thawhleh hnuah Isua’n Petera chu: “Simon, Johana fapa, nangin kei mi hmangaih em?” tiin a zâwt a. Petera chuan a Pu a hmangaih tih lantîr tûrin eng thil pawh tih a duh ang tih kan chiang thei a ni. Isua’n ani chu: “Ka berâmte enkawl rawh,” tiin a hrilh a. (Joh. 21:15-17) Tichuan, a dam chhûng zawngin Petera chuan Isua a hmangaihzia lantîrin Lalpa berâmte chu duat takin a enkawl ta a ni.

¹¹ Upate u, Hriatrengna hun chhûngin Isua’n Petera hnêna a thusawite chu in tân a pawimawh tih engtin nge in lantîr theih ang? Berâm tlawhna nei ziahin leh rawngbâwlnaa tel tawh lote Jehova hnêna kîr leh tûra theih tâwp chhuaha ṭanpuiin, Jehova leh Isua in hmangaihzia in lantîr thei a ni. (Ezek. 34:11, 12) Bible zirlaite leh Hriatrengna inkhâwma rawn tel mi tharte chu in ngaihsak thei bawk a, hêng zirtîr la ni mai thei tûrte’n lawm nia inhriatna an neih theih nân, in tih theih apiang ti ang che u.

12. Engvângin nge a thih hma zâna Isua thusawite ngaihtuahna chuan huaisenna min pêk? (Johana 16:32, 33)

¹² A thih hma zânah, Isua chuan a zirtîrte chu: “Khawvêlah hian hrehawmin in awm ṭhîn. Nimahsela, thlamuang takin [“huai takin,” NWT] awm rawh u, keiin khawvêl ka ngam ta,” tiin a hrilh a. (Johana 16:32, 33 chhiar rawh.) Engin nge Isua chu  a hmêlmate huaisen taka hmachhawn tûr leh thih thlenga rinawm taka awm tûra ṭanpui? Ani chuan Jehova a rinchhan a ni. Isua chuan a hnungzuitute’n chutiang fiahna chu an hmachhawn dâwn tih hriain, anni chu hum tûrin Pathian Jehova hnênah a ngên a. (Joh. 17:11) Engvângin nge chu chuan huaisenna min pêk? Jehova chu kan hmêlma zawng zawngte aia a chak zâwk vâng a ni. (1 Joh. 4:4) Ani chuan engkim a hmu a. Amah kan rinchhan chuan kan hlauhnate hnehin huaisenna kan lantîr thei tih kan ring tlat a ni.

13. Arimathai khuaa mi Josefa chuan engtin nge huaisenna a lantîr?

¹³ Arimathai khuaa mi Josefa chungchâng hi i lo ngaihtuah ang u. Ani chu Judate zînga mi zahkai tak a ni a. Juda supreme court, Sanhedrin-ah rorêltu pakhat a ni bawk. Mahse, Isua’n leia rawng a bâwl laiin, Josefa chuan huaisenna a nei lo va. Johana’n a chungchângah, “Judate a hlauh avânga a rûka awm,” tiin a sawi a ni. (Joh. 19:38) Josefa chuan Lalram thuchah chu ngaihven mah se, Isua a ring tih mite lakah a thup a. Khawtlânga a nihna sâng tak chân a hlau tih a chiang hle. Mahse, Isua thih hnuah Bible chuan, Josefa chu “huai takin Pilata hnênah a lût a, Isua ruang chu a dîl ta a,” tiin min hrilh a ni. (Mk. 15:42, 43) Josefa chuan Isua zirtîr a ni tih chu tûnah chuan thup a tum tawh lo.

14. Mihring hlauhna i nei a nih chuan eng nge i tih ang?

¹⁴ Josefa angin mihring hlauhna i nei ngai em? School-ah emaw, hnathawhnaah emaw Jehova Thuhretu i ni tih mite hrilh chu hreh châng i nei em? Mite’n an ngaih dân tûr che i dâwn avângin thuchhuahtu nih emaw, baptisma chan emaw chu i hreh em? Chutiang ngaih dân i neihte chu thil dik nia i hriatte ti lo tûrin indâltîr suh. Jehova hnênah tih tak zetin ṭawngṭai rawh. A duh zâwng ti tûra huaisenna pe tûr chein dîl la. I ṭawngṭainate a chhân dân i hmuh hunah, i chak lehzualin, i huaisen lehzual ang.—Is. 41:10, 13.

15. A zirtîrte hnêna Isua a inlâr hnuah, an hlimna chuan engti tûrin nge a chêttîr? (Luka 24:52, 53)

¹⁵ Isua a thih chuan a zirtîrte chu an lungngai hle a. An dinhmuna ding angin han inmitthla teh. An ṭhian hmangaih tak an chân bâkah, an beiseina pawh chân tel niin an inngai a. (Lk. 24:17-21) Mahse, Isua an hnêna a inlâr khân, Bible hrilh lâwknate a thlen famkimtîr dân hre thiam tûra anmahni ṭanpui nân hun a hmang a. An hnênah hnathawh tûr pawimawh tak a pe bawk a ni. (Lk. 24:26, 27,  45-48) Ni sawm li hnua vâna Isua a lâwn chuan, zirtîrte lungngaihna chu hlimna nasa takah a lo chang a. An Pu a nung leh tawh tih leh an mawhphurhna thar dawn hlen thei tûra ṭanpui a inpeih reng tih an hriatna chuan a tihlim hle. An hlimna chuan beidawng lova Jehova fak tûrin a chêttîr a ni.—Luka 24:52, 53 chhiar rawh; Tirh. 5:42.

16. Engtin nge Isua zirtîrte kan entawn theih?

¹⁶ Isua zirtîrte chu engtin nge kan entawn theih ang? Hriatrengna hun chhûng chauh ni lovin, kum tluanin Jehova biaknaah hlimna kan nei thei a. Chumi nei tûr chuan, kan nunah Pathian Ram kan dah hmasak a ngai a. Entîr nân, mi tam tak chuan rawngbâwlna, inkhâwmna, leh chhûngkuaa Pathian biakna an neih ziah theih nân, an hnathawhna hun duante chu an siamrem a ni. Ṭhenkhat chuan kohhrana an inhman tam lehzual theih nân emaw, Lalram thuchhuahtu mamawh zualna hmuna rawng an bâwl theih nân emaw, mi dangte’n neih ngai nia an hriat tisa lam thilte neih loh chu an thlang hial a ni. Rawngbâwl zawm zêl tûr chuan chhelna kan neih a ngai a; mahse, Jehova chuan kan nuna Lalram kan dah hmasak chuan nasa takin mal min sâwm ang tih min tiam a ni.—Thuf. 10:22; Mt. 6:32, 33.

17. He Hriatrengna hun chhûng hian eng nge tih i tum tlat? (Milem en rawh.)

¹⁷ Thawhlehni, April 4-a Hriatrengna hman chu kan nghâkhlel tawh hle a. Mahse, Isua nun leh thihna leh Pathian Jehova nêna kan chunga hmangaihna an lantîr chungchâng ngaihtuah nân chumi thlen hun chu nghâk kher suh. Chutianga tih nân Hriatrengna hun chhûnga hun remchâng awm apiangte chu hmang ṭangkai ang che. Entîr nân, New World Translation Appendix B12-a “The Final Week of Jesus’ Life on Earth,” tih chart-a târ lan thilthlengte chhiar nân leh ngun taka ngaihtuah nân hun insiam la. Chutianga i chhiar hunah, i lâwmna te, i hmangaihna te, i huaisenna te, leh i hlimnate tipungtu Bible thute hmuh tum ang che. Tichuan, thinlung taka i lâwmna i lantîr theih dân kawngte ngaihtuah tum bawk rawh. He Hriatrengna hun chhûnga amah hre reng tûra i thil tih zawng zawngte chu Isua’n a ngaihlu ang tih i chiang thei a ni.—Thup. 2:19.