1-2. a) D sã n tags a Zeezi vɩɩmã la a koe-moonegã yelle, wãn to la nafd tõndo? b) Bõe yell la d na n gom sõs-kãngã pʋgẽ?

 NED d sẽn nong sã n maan kaalem, d tʋlla ne d sũur fãa n le yã-a. Sɩngrẽ wã, d sã n tẽeg a sẽn wa n nan pa maan kaalmã yelle, d sũur sãamda wʋsgo, sẽn yɩɩd fãa sã n mikame t’a namsa wʋsg n yaool n na n maan kaalem. La kaoosg zugẽ, d sã n tẽeg bũmb a sẽn da zãms-do, wall a sẽn da yeel n keng d raood bɩ n kɩt tɩ d la, d sũurã lebgda noogo.

² Woto me, d sã n karem Biiblã sẽn gomd a Zeezi namsgã la a kũumã yelle, sãamda d sũur wʋsgo. Tẽegrã sã n kolgdẽ, la baa Tẽegrã poore, d tagsda a kũumã sẽn yɩ maoongã yõod sẽn ta zĩig ninga. (1 Kor. 11:24, 25) La d sã n tags bũmb nins fãa a Zeezi sẽn yeel la a maan a sẽn wa n be tẽngã zugã yelle, d sũur lebgda noog wʋsgo. Sẽn paase, d sã n tagsd bũmb nins a sẽn maand masã mengã, la a sẽn na n wa maan ka la bilf n kõ-dã yelle, kengda d raood wʋsgo. D sã n bʋgsd bõn-kãensã zugu, la a sẽn wilg t’a nong-d lame wã, na n kɩtame tɩ d maan bũmb n wilg tɩ d sũur nooma ne rẽ, wa d sẽn na n yã sõs-kãngã pʋgẽ wã.

3. Bõe yĩng tɩ d segd n wilg tɩ d sũur nooma ne a Zeezi kũumã sẽn yɩ maoongã?

³ D sã n tags a Zeezi vɩɩmã la a kũumã yelle, kɩtdame tɩ d rat n wilg a Zeova ne a Zeezi tɩ d yaa sõm-mitba. A Zeezi sẽn wa n moond koɛɛgã tẽngã zugã, a wilga nebã tɩ Wẽnnaam Rĩungã na n waa ne bark buud toor-toore. Woto noom-d-la wʋsgo. D sũur nooma ne a Zeezi kũumã sẽn  yɩ maoongã, bala sõng-d lame tɩ d tõe n paam zood sõma ne a Zeova la a Zeezi. Neb nins sẽn tẽed a Zeezi wã saagdame me n na n wa vɩɩmd wakat sẽn kõn sa, n le paam n yã b nin-nongds nins sẽn da maan kaalmã. (Zã 5:28, 29; Rom. 6:23) Tõnd pa maan baa fʋɩ sẽn kɩt tɩ d segd ne bark-kãensã ye. D pa tol n tõe n dol Wẽnnaam ne Kiristã, bũmb ning b sẽn maan n kõ-dã yĩng ye. (Rom. 5:8, 20, 21) La d tõe n maana bũmb n wilg tɩ d sũur nooma wʋsg ne b sẽn maan bũmb ningã. Bõe la d tõe n maane?

4. Bõe la a Maari sẽn yit Magdala wã maan n wilg t’a sũur nooma ne bũmb nins a Zeezi sẽn maan n kõ-a wã? (Ges-y fotã.)

⁴ D gom a Maari sẽn da yaa Zʋɩf sẽn yit Magdala wã yelle. Ra pa nana ne-a baa bilfu, bala zĩn-dãmb a yopoe n da namsd-a. A tog n da tagsdame tɩ ned kae n tõe n yiis-a yellã pʋgẽ ye. La tags-y n ges-y a sũur sẽn yɩ noog to-to, a Zeezi sẽn wa n dig zĩn-dãmbã t’a paam a mengã. Sẽn na yɩl n wilg a Zeezi t’a yaa sõm-mita, a sakame n lebg a karen-biiga, n dɩk a sẽkã, a pãngã, la a paoongã n teel koe-moonegã. (Luk 8:1-3) Yaa sɩd t’a Maari sũur yɩɩ noog wʋsg ne a Zeezi sẽn maan bũmb ning n kõ-a wã, la a ra pa mi tɩ bũmb sẽn yaa kãseng n yɩɩd rẽ la a Zeezi ra na n wa maan kõ-a ye. A ra na n wa kõo a vɩɩmã tɩ yɩ maoong ãdem-biisã yĩnga, “sẽn na yɩl tɩ ned ning fãa sẽn tẽed bãmb” wa paam vɩɩm sẽn ka sɛta. (Zã 3:16) A Maari kell n maana sɩd ne a Zeezi, n wilg t’a sũur nooma ne a sẽn maan bũmb ning n kõ-a wã. Baa a Zeezi sẽn da wa n be ra-lukã zug n namsdẽ wã, a Maari ra bee beenẽ n teend a Zeezi ne neb a taabã sẽn da be be wã. (Zã 19:25) A Zeezi sẽn wa n ki wã, a Maari ne pagb a yiib baoo kaam toor-toor sẽn tar yũ-noog n tɩ ning a kũumã. (Mark 16:1, 2) A Maari sẽn kell n maan sɩd ne a Zeezi wã, a Zeova ning-a-la bark wʋsgo. A paam n yãa a Zeezi a vʋʋgrã poor n sõs ne-a. Woto yaa bũmb  tẽn-tʋmdbã wʋsg sẽn pa paam n maane.—Zã 20:11-18.

5. Bõe la d tõe n maan n wilg tɩ d sũur nooma ne bũmb nins a Zeova ne a Zeezi sẽn maan n kõ-dã?

⁵ Tõnd me tõe n dɩka d sẽkã, d pãngã la d paoongã n teel Rĩungã tʋʋmdã, n wilg tɩ d sũur nooma wʋsg ne bũmb nins a Zeova ne a Zeezi sẽn maan n kõ-dã. Wala makre, d tõe n baoo sẽk n sõngd n met tũudum hakɩɩkã roto, la d sõngd n get b yelle.

6. Bõe yĩng tɩ d tõe n yeel t’a Zeezi kũumã sẽn yɩ maoongã yaa kũun a Zeova sẽn kõ tõnd ned kam fãa?

⁶ D sã n tags a Zeova ne a Zeezi sẽn nong-d to-to wã zugu, kɩtdame tɩ d me rat n wilg tɩ d nong-b lame. (1 Zã 4:10, 19) D sẽn mi t’a Zeezi kii tõnd yĩngã kɩtdame tɩ d sẽn nong yẽ ne a Zeova to-to wã pãng paasdẽ. Tẽn-tʋmd a Poll sẽn yeel Galat kiris-nebã bũmb ningã wilgdame t’a ra mii rẽ, la t’a sũur nooma ne rẽ. A yeel-b lame yaa: “Mam vɩɩ mam sẽn tẽed Wẽnnaam Bi-riblã maasem yĩnga, soab ning sẽn nong maam n kõ b meng mam yĩngã.” (Gal. 2:20) Ne a Zeezi kũumã sẽn yɩ maoongã maasem, a Zeova taka yãmb n wa a nengẽ tɩ y lebg a zoa. (Zã 6:44) Y sẽn mi t’a Zeova yãa bũmb sẽn yaa sõma y sũurẽ wã, la t’a yaoo yaood sẽn yaa kãseng wʋsg sẽn na yɩl tɩ y paam a zoodã, y sũur pa noom sɩda? Rẽ pa kɩt tɩ y maneg n nong a Zeova ne a Zeezi sɩda? D segd n soka d mens yaa: ‘Nonglem-kãng kɩtame tɩ m segd n maan bõe?’

7. Wa fotã sẽn wilgdã, bõe la d fãa tõe n maan n wilg tɩ d nonga a Zeova ne a Zeezi? (2 Korẽnt rãmbã 5:14, 15; 6:1, 2)

⁷ D sẽn nong Wẽnnaam la Kiristã kɩtdame tɩ d wilgdẽ tɩ d nonga d taabã. (Karm-y 2 Korẽnt rãmb 5:14, 15; 6:1, 2.) Bũmb a ye d sẽn tõe n maan n wilg rẽ yaa d sẽn na n moond koɛɛgã ne  yẽesem. D taasda ned buud fãa koɛɛgã n pa get a yĩn-kõbgo, a buudu, a tarem, wall a sẽn yitẽ ye. D sẽn maand woto wã zemsa ne a Zeova raabã sẽn yaa tɩ “nebã buud fãa paam fãagre, la b paam bãngr hakɩɩk sɩdã zugu.”—1 Tɩm. 2:4.

8. Wãn to la d tõe n wilg tɩ d nonga d tẽed-n-taasã?

⁸ D sã n wilgdẽ tɩ d nonga d tẽed-n-taasã, wilgdame me tɩ d nonga Wẽnnaam ne Kiristã. (1 Zã 4:21) D wilgda d tẽed-n-taasã tɩ b yell pak-d lame, la d sõngd-ba, b sã n wa maood ne zu-loeese. B nin-nongr sã n wa maan kaalem, d belsd-b lame. B sã n wa ka laafɩ, d kẽnd n get-b lame, la d maand d sẽn tõe fãa n kengd-b raoodo, b sũy sã n wa sãame. (2 Kor. 1:3-7; 1 Tes. 5:11, 14) D ket n pʋʋsda b yĩnga, n tẽegdẽ tɩ “nin-tɩrg se-yõkr tara pãng wʋsgo, n sɩd tõe n sõng neda.”—Zak 5:16.

9. Bõe me la d tõe n maan n wilg tɩ d nonga d tẽed-n-taasã?

⁹ D wilgdame me tɩ d nonga d tẽed-n-taasã, d sã n modgdẽ sẽn na yɩl tɩ laafɩ kell n zĩnd d sʋka. D maanda d sẽn tõe fãa n dɩkd a Zeova togs-n-taar sugrã kũun wɛɛngẽ. A Zeova sẽn sak t’a Bi-riblã wa ki tõnd yel-wẽnã yĩngã, rẽ yĩnga d pa segd n sakd n kõt d tẽed-n-taasã sugri, b sã n beeg-d sɩda? A Zeezi yel-bũnd a ye pʋgẽ, a goma tʋm-tʋmd-wẽng yelle. D pa rat n yɩ wa tʋm-tʋmd-kãng ye. Baa ne a zu-soabã sẽn sak n bas a samd-kẽeng taalã, a pa sak n bas a tʋm-tʋmd-taagã samd taale, baa ne a samdã sẽn da pa zem baa fʋɩ wã. (Mat. 18:23-35) Yãmb sã n tara mo-yõs ne ned tigingã pʋgẽ, y tõe n yɩɩ pipi n tɩ sõs ne a soabã, nand tɩ Tẽegrã daar ta bɩ? (Mat. 5:23, 24) Y sã n maan woto, wilgdame tɩ y nonga a Zeova ne a Zeezi wʋsgo.

10-11. Wãn to la kãsem-dãmbã tõe n wilg tɩ b nonga a Zeova ne a Zeezi? (1 Pɩyɛɛr 5:1, 2)

¹⁰ Wãn to la kãsem-dãmbã tõe n wilg tɩ b nonga a Zeova la a Zeezi? Bũmb a ye b sẽn tõe n maan tɩ tar yõod wʋsg yaa b sẽn na n get a Zeezi piisã yell neere. (Karm-y 1 Pɩyɛɛr 5:1, 2.) A Zeezi goma rẽ yell vẽeneg ne tẽn-tʋmd a Pɩyɛɛre. A Pɩyɛɛr sẽn kɩɩs naoor a tãab t’a pa mi a Zeezi wã poore, a tʋlla ne a sũur fãa n wilg t’a nonga a Zeezi. A Zeezi vʋʋgrã poore, a soka a Pɩyɛɛr yaa: “A Zã biig a Sɩmo, fo nonga maam bɩ?” D tõe n kɩsa sɩd t’a Pɩyɛɛr da na n maana a sẽn tõe fãa n wilg t’a nonga a Zu-soabã. A Zeezi yeela a Pɩyɛɛr yaa: “Rɩlg mam pe-bi wã.” (Zã 21:15-17) A Pɩyɛɛr kell n gesa Zu-soabã piisã yell hal n tãag a yõor tɛka, tɩ wilgdẽ t’a ra nonga a Zeezi.

¹¹ Kãsem-dãmba, Tẽegrã sã n wa kolge, la baa Tẽegrã loogr poore, bõe la y tõe n maan n wilg tɩ goam nins a Zeezi sẽn togs a Pɩyɛɛrã tara yõod ne-yã? Yaa y sẽn na n kẽnd n kaagd y tẽed-n-taasã wakat fãa n kengd b raoodo, la y maand y sẽn tõe fãa sẽn na yɩl n sõng sẽn bas-b tigissã kẽndã tɩ b lebg n wa a Zeova nengẽ. Woto, y wilgdame tɩ y nonga a Zeova ne a Zeezi wʋsgo. (Eze. 34:11, 12) Y tõe modgame me n keng Biibl karen-biisã la neb a taab sẽn wa Tẽegrã raoodo, tɩ sõng-b tɩ b wa sak n lebg a Zeezi karen-biisi.

12. D sã n bʋgsd goam nins a Zeezi sẽn togs yʋng ning b sẽn yõk-a wã zugu, bõe yĩng tɩ kõt tõnd daado? (Zã 16:32, 33)

¹² Yʋng ning b sẽn yõk a Zeezi wã, a yeela a karen-biisã yaa: “Dũniyã pʋgẽ, yãmb na n paama toogo. La tall-y raoodo! Mam tõoga dũniyã.” (Karm-y  Zã 16:32, 33.) Bõe n sõng a Zeezi t’a tall raood a bɛɛbã taoore, la a kell n maan sɩd ne a Zeova n tãag a kũum? A teega a Zeova. A Zeezi kosa a Zeova t’a gũ a karen-biisã, a sẽn da mi tɩ bãmb me na n paama namsg a woto wã yĩnga. (Zã 17:11) Bõe yĩng tɩ rẽ kõt tõnd daoodo? Bala a Zeova pãng yɩɩda bɛ buud fãa. (1 Zã 4:4) A nee bũmb nins fãa sẽn maandã. D kɩsa sɩd tɩ d sã n teeg a Zeova, d na n tõoga d rabeemã, la d tall raoodo.

13. Wãn to la a Zozɛf sẽn yit Arimate wã wilg t’a tara raoodo?

¹³ D gom a Zozɛf sẽn da yit Arimate wã yelle. Ra yaa ned Zʋɩf-rãmbã sẽn da nand wʋsgo. A ra naaga Sãnedrẽ wã, sẽn da yaa Zʋɩf-rãmb bʋ-kaoodb sull ning sẽn tar noor n yɩɩdã. A Zeezi sẽn wa n moond koɛɛgã tẽngã zugu, a Zozɛf ra pa tar daood ye. A Zã yeelame t’a ra “yaa a Zeezi karen-biiga, la a sẽn zoet Zʋɩf-rãmbã yĩnga, a pa maan tɩ nebã bãng ye.” (Zã 19:38) Baa ne a Zozɛf sẽn da nong Rĩungã koɛɛgã, a pa sak n maan tɩ nebã bãng t’a tẽeda a Zeezi ye. Tõe t’a ra yɛɛsdame tɩ b sã n bãnge, b pa na n le nand-a ye. Sẽn yaa a soab fãa, Biiblã wilgame t’a Zeezi kũumã poore, a Zozɛf baas n “talla raoodo, n kẽng a Pɩlat nengẽ n tɩ kos a Zeezi kũumã.” (Mark 15:42, 43) A Zozɛf wilga vẽeneg masã t’a yaa a Zeezi karen-biiga, n pa solg nebã ye.

14. Yãmb sã n maooda ne ninsaal-zoeese, bõe la y tõe n maan tɩ sõng-yã?

¹⁴ Yãmb me mi n zoeta ninsaal wa a Zozɛf sẽn maanã bɩ? Lekollẽ wã wall tʋʋmã zĩigẽ, y mi n zoeta yãnd n pa rat n maan tɩ nebã bãng tɩ y yaa a Zeova Kaset soab bɩ? Y maanda laas-laas n pa rat n lebg koe-moonda, wall n deeg lisgu, y sẽn yɛɛsd neb a taabã sẽn na n yeel bũmb ningã yĩng bɩ? Ra bas-y tɩ rẽ kɩt tɩ y pa maan y sẽn mi tɩ yaa sõma ye. Pelg-y y pʋg n pʋʋs a Zeova. Kos-y-yã-a t’a kõ-y raood tɩ y tõog n maan a raabã. Y sã n ne a Zeova sẽn leokd y pʋʋsgã, y na n paama pãng la raood n paase.—Eza. 41:10, 13.

15. A Zeezi sẽn vẽneg a meng ne a karen-biisã poore, b sũ-noogã kɩtame tɩ b maan bõe? (Luk 24:52, 53)

¹⁵ A Zeezi sẽn wa n ki wã, a karen-biisã sũy sãama wʋsgo. Ning-y y meng b zĩigẽ. B konga b zo-nongre, la pa rẽ bal ye. Ra yaa wa b sẽn da saagd n na n wa paam bũmb ninsã fãa lebga zaalem. (Luk 24:17-21) La a Zeezi sẽn wa n vʋʋg n vẽneg a  meng ne-bã, a maaga a yĩng n sõng-b tɩ b bãng a sẽn pids Biiblã bãngr-gomd to-to. Sẽn paase, a kõ-b-la tʋʋmd sẽn tar yõod wʋsgo. (Luk 24:26, 27, 45-48) A Zeezi sẽn wa n leb saasẽ wã rasem 40 poore, a karen-biisã sũ-sãangã lebga sũ-no-kãsenga. B sũyã ra mooma wʋsgo, bala b ra miime t’a Zeezi vɩɩme, la t’a na n sõng-b lame tɩ b tõog n tʋm tʋʋmd ning a sẽn kõ-bã. Sũ-noogã kɩtame tɩ b ra pẽgd a Zeova n pa basdẽ ye.—Karm-y Luk 24:52, 53; Tʋʋ. 5:42.

16. Wãn to la d tõe n dɩk a Zeezi karen-biisã togs-n-taare?

¹⁶ Wãn to la d tõe n dɩk a Zeezi karen-biisã togs-n-taare? Tõnd me tõe n paama sũ-noog a Zeova tũubã pʋgẽ yʋʋmdã tõre, la pa a Zeezi kũumã tẽegr wakat bal ye. Woto baoodame tɩ d lʋɩɩs Wẽnnaam Rĩungã yɛl taoor d vɩɩmã pʋgẽ. Wala makre, neb wʋsg sigla b tʋʋmã sõma sẽn na yɩl n tõog n moond koɛɛgã, n kẽnd tigissã, la b maand b zak pʋgẽ Biiblã zãmsgã wakat fãa n pa vaandẽ ye. Sãnda yãka yam n pa na n bao teed kẽer nebã sẽn get tɩ tara yõod wʋsg vɩɩmã pʋgẽ, sẽn na yɩl n paam n tʋm tʋʋm wʋsg tigingã pʋgẽ, wall n yik n kẽng zĩig koe-moondb sẽn pa waoogẽ. Sẽn na yɩl n ket n tũud a Zeova, d segd n tõoga toogo. La a pʋlmame t’a na n ning-d-la bark wʋsgo, d sã n lʋɩɩs Rĩungã yɛl taoor d vɩɩmã pʋgẽ.—Yel. 10:22; Mat. 6:32, 33.

17. Bõe la y yãk yam n na n maan Tẽegrã sẽn watã sasa? (Ges-y fotã.)

¹⁷ D gũuda tʋʋl-nif kiuugã rasem a 4 sẽn yaa talaat daarã, n na n maan a Zeezi kũumã tẽegre. Ra gũ-y tɩ daar-n-kãng ta tɩ y yaool n tags a Zeezi vɩɩmã la a kũumã yelle, la yẽ ne a Zeova sẽn maan n wilg tɩ b nong-d lame wã yell ye. Modg-y n tags-y bõn-kãnsã yelle, Tẽegrã sã n wa kolgdẽ, la Tẽegrã loogr poore. Wala makre, y tõe n yãka wakat n karem yɛl nins sẽn maan sẽn wa n ket bilf tɩ b kʋ a Zeezi wã, la y bʋgs rẽ zugu. Ges-y yʋʋmd 2019, tʋʋl-nif kiuugã Kiris-nebã vɩɩm la b tʋʋma na-kẽndrã pʋgẽ, seb-neng a 4 zĩigẽ. Y sã n wa karemdẽ, bɩ y bʋgs vɛrse nins sẽn tõe n sõng-y tɩ y maneg n wilg tɩ y sũur nooma ne a Zeova la a Zeezi, tɩ y nonga y taabã, la sẽn tõe n sõng-y tɩ y paas y raoodã la y sũ-noogã. Rẽ poore, tags-y n ges-y bũmb takɩ y sẽn tõe n maane, n wilg tɩ y sũur nooma ne a Zeova la a Zeezi. Y tõe n basa y yam t’a Zeezi sũur na n yɩɩ noog wʋsg ne bũmb nins fãa y sẽn maand n na n tẽeg a yell Tẽegrã sasa wã.—Vẽn. 2:19.