1-2. (a) Tungayivwa wuli nga twelenganya pa wumi wa kwe Yesu na pa mulimo wakwe? (b) Avyani vino twandi tusambilile mwe co-o icipande?

 NGA cakuti wino twakunda wafwa, tukamufuluka nkaninye. Pakutalika, tungayivwa uwuwi nga cakuti twelenganya pe vino vyacitikanga pano umukundikwe witu walinji mupipi nukufwa, maka maka nga cakuti wacuzile nkaninye pano walinji mupipi nukufwa. Lelo nanti ciwe wo-o, ncepamwi tungatalika ukuyivwa icete naswinya. Tungakwivwa wo-o, nga twelenganya pe vino watusambilizizye, vino wacisile, vino walanzile pakutuwomelezya nanti vino vyalenzile tuseke.

² Wonye avino tukayivwa nga twelenganya pe vino e Yesu wacuzile nga na pamfwa yakwe. Mu mpindi ya Cizusyo apano tukakwelenganya sana pe vino inzuwi ya kwe Yesu yacindama. (1 Kor. 11:24, 25) Lelo nanti ciwe wo-o, tukakwivwa icete nga twelenganya pe vino walandanga nukucita pano walinji munsi. Cinji acakuti, cikatuwomelezya nkaninye nga twelenganya pe vino e Yesu akucita na vino alitucitila ku nkolelo. Ukwelenganya pe vyo-o ivintu nga na pevino watukunda, kungalenga twalanjizya ukusalifya ukupitila mwe vino tukacita, ndi vino twandi tusambilile na mwe co-o icipande.

3. Amilandu ci yino twawa nayo yino yizipizile ukulenga twasalifya pa nzuwi?

³ Tukasalifya nkaninye ngatwelenganya pa wumi wa kwe Yesu na pamfwa yakwe. Pano e Yesu walinji munsi wasambilizyanga awantu pa vizima vino Uwufumu wa kwe Leza wulicita. Twakunda nkaninye vino Baibolo yikasambilizya pa nzuwi, na pa vintu ivizima vino yikalenga cipepuke ukucitika. Amuno yikalenga twayitopwa wuciwuza uwuzima ne Yehova ne Yesu. Wano wasuwila Yesu, wawa ni suwilo lya kwikala umuyayaya  nilyakulola naswinya awakundikwe wawo wano wafwa. (Yoha. 5:28, 29; Roma. 6:23) Tutacitapo icili consinye pakuti tupocelele ya-a amapaalo. Swinya tutanga tulipile e Leza ne Klistu pe vino watucitila. (Roma. 5:8, 20, 21) Lelo tungalanjizya ukuti tukasalifya. Tungacita wuli wo-o?

4. Uzye e Mariya Magadala walanjizizye wuli ukuti wasalifyanga pevino e Yesu wamucitizile? (Lolani icikope.)

⁴ Lekani tulande pa mwanaci wumwi umuYuda uwizina lyakuti Mariya Magadala. Waculanga nkaninye, pamulandu wakuti imizimu miwipe 7 yamucuzyanga. Afwile wayivwanga vye ngati pasi uwili wensinye wino angamwavwa. Teyelenganyani vino afwile wasalifizye pano e Yesu wamufumizye vyo ivimizimu. Ko-o ukusalifya kwalenzile wawa amusambilizi wakwe swinya kwalenzile awawomvya ni mpindi, amaka navino walinji navyo kukutunjilila e Yesu mu mulimo wakwe. (Luk. 8:1-3) Nanti acakuti Mariya wasalifyanga pevino e Yesu wamucitizile, atamanyile ukuti kwalinji navinjinye ivikulu vino walinji nu kumucitila ku nkolelo. Akuli ukuti walinji nukufwila awantu wonsinye “alyakuti wensi wino akuwika insingo [akusuwila] mwakwe weliwe” ayize awe nuwumi wa muyayaya. (Yoha. 3:16) Lelo nanti ciwe wo-o e Mariya walanjizyanga ukuti wasalifyanga pevino e Yesu wamucitizile ukupitila mukuwa uwacisinka kwe weliwe. Pano e Yesu waculanga pacimuti cakuculilapo, e Mariya wimilile mupipi na weliwe pakuti awamusakamala nu kusansamusya wanji wano walinjipo. (Yoha. 19:25) Pansizi pano e Yesu wafwile, e Mariya nawanaci wanji wawili watwite ivinuncile ku nkungwe kuno wazisile e Yesu. (Mar. 16:1, 2) E Yehova walambuzile nkaninye Mariya pamulandu wakuti walinji ni cisinka kwe Yesu. Pano Yesu wazyulupusile vye waloline ne Mariya nukulanda nawe. Lo-o lwalinji alongo ulukulu luno awasambilizivye watici awano walinji nalo.​—Yoha. 20:11-18.

5. Tungalanjizya wuli ukuti tukasalifya pevyonsinye vino e Yehova ne Yesu watucitila?

⁵ Nasweswenye tungalanjizya ukuti tukasalifya pevyonsinye vino e Yehova ne Yesu  watucitila ukupitila mukuwomvya impindi, amaka nivyuuma vitu kukutunjilila umulimo wa Wufumu. Ku cakulolelako, tungawaya mukwavwilizyako ukuzenga nanti ukuzifya ivikulwa vyakupelapo.

6. Amulandu ci wuno tungalandila ukuti inzuwi acawila kwe wenga na wenga?

⁶ Nga twelenganya pe vino e Yehova ne Yesu watukunda, nasweswenye tukawakunda. (1 Yoh. 4:10, 19) Swinya tukawakundilako nkaninye nga twizuka ukuti e Yesu wafwizile swensinye wenga na wenga. Umutumwa Paulo wasinincisizye ukuti co-o acisinka swinya walanjizizye nukuti wasalifyanga pano walembezile awina Galatiya ukuti: “Umwanakwe Leza . . . wankunda wayifimile muno anene.” (Gal. 2:20) Pamulandu ni nzuwi, e Yehova wamipalamika kwe weliwe pakuti muwe mwe viwuza vyakwe. (Yoha. 6:44) Uzye cisimivwisya icete ukumanya ukuti e Yehova walola ivizima mwe mwemwe swinya walipila nu mutengo uwukulu pakutivye muwe mwe viwuza vyakwe? Uzye co-o cisilenga mukundileko e Yehova ne Yesu? Acino mwayikolowozya ukuti, ‘Avyani vino ulukundo lulilenga incite?’

7. Ndivino tuweni pacikope, uzye tungalanjizya wuli ukuti twakunda e Yehova ne Yesu? (2 Wakorinte 5:14, 15; 6:1, 2)

⁷ Vino twakunda e Yehova ne Yesu avino vikalenga twakunda wanji. (Wazyani 2 Wakorinte 5:14, 15; 6:1, 2.) Inzila yonga yino tukalanjizizyamo ukuti twawakunda akupitila mukuwombesya mu mulimo wakuwizya. Swinya tukawizizya awantu wonsinye wano twasunkanya. Tusisowolola wano tuzipizile ukulanzyanya nawo pa mulandu vye ni cikowa, umutundu, ivyuuma vino wakwata nanti inkulilo yawo. Nga tukucita wo-o, lyo tukuwomba ukulingana nukulonda kwa kwe Leza ukwa kuti “awantu wonsi wize watulwe wamanye ukusimichila.”​—1 Tim. 2:4.

8. Tungalanjizya wuli ukuti twakunda awanawitu na wankazi?

 ⁸ Tukalanjizya ukuti twakunda e Yehova ne Yesu ukupitila mu kukunda awanawitu na wankazi. (1 Yoh. 4:21) Tukawasakamala mwe vino wakulondekwa swinya tukawavwa pano wakupita mu ntazi. Tukawasansamusya nga cakuti wafwizilwe umukundikwa wawo, ukuwatandalila nga cakuti walwile nukuwombesya ukufika pano papelezile amaka yitu ukuwawomelezya nga wasakamisilwe. (2 Kor. 1:3-7; 1 Tes. 5:11, 14) Tukawapepelako amuno twamanya ukuti “ipepo lya muntu muzima likachita ivikalambane.”​—Jemu. 5:16.

9. Anzila ci yinji yino tungalanjizizyamo ukuti twakunda awanawitu na wankazi?

⁹ Cinji cino tukacita pakulanjizya ukuti twakunda awanawitu na wankazi, akuwombesya ukupanga umutende na woliwo. Tukakwelezya na maka ukukolanya e Yehova wino akatetela wanji. Nga cakuti e Yehova wayikundizile ukuti Umwana wakwe atufwile pa mulandu ni membu zitu, uzye na sweswenye tutazipizile ukuyikundila ukutetela awanawitu na wankazi nga watuluvyanya? Tusilonda nanti katicinye ukuwa ngati amuzya umuwipe wino walandwapo mu mulumbe wa kwe Yesu. Nanti acakuti e yisikulu wasuzileko vye ku nkongole zino weni wakongozile, we-e umuzya waposilwe ukutetela umuzya muwuye wino walinji ninkongolevye zitici. (Mat. 18:23-35) Nga cakuti mwapusana na wumwi mwi wungwe, uzye citanga cizipe ukuti mupange umutende pano mutani muzanwe ku Cizusyo? (Mat. 5:23, 24) Nga mwacita wo-o, mulilanjizya ukuti mwakunda nkaninye e Yehova ne Yesu.

10-11. Uzye waeluda wangalanjizya wuli ukuti wakunda e Yehova ne Yesu? (1 Peter 5:1, 2)

¹⁰ Uzye waeluda wangalanjizya wuli ukuti wakunda e Yehova ne Yesu? Icicindamisye cino wangacita, akusakamala ing’onzi zya kwe Yesu mwe vino zikulondekwa. (Wazyani 1 Peter 5:1, 2.) E Yesu walenzile co-o icisinka ukwivwika pano walandanga ne Peter. Pano e Peter wakanile Yesu imiku yitatu, afwile wavwambisyanga sana ukulanjizya ukuti wakunzile Yesu. Swinya pano e Yesu wazyulupusile wakolowozizye e Peter ukuti: “Simoni mwana Yohani uzye wankunda?” Ukwasowa nukuvwilika e Peter afwile walondanga ukucita icili consinye pakulanjizya ukuti wakunzile e Yisikulu. E Yesu wanenile e Peter ukuti: “Cemanga ing’onzi zyane.” (Yoha. 21:15-17) Swinya e Peter muwumi wakwe wonsinye, wasakamalanga ing’onzi zya kwe Yisikulu pakulanjizya ukuti wamukunzile.

¹¹ Waeluda, uzye mu mpindi ya Cizusyo, mungalanjizya wuli ukuti amazwi yano e Yesu wanenile e Peter yacindama kwe mwemwe? Mungalanjizya ukuti mwakunda e Yehova ne Yesu nga cakuti mukuwombako mu mulimo wa wucemi, swinya mukuwombesya ukufika pano papelezile amaka yinu ukwavwa wano watonta ukunyoka kwe Yehova. (Ezek. 34:11, 12) Cinji acakuti, mungawomelezyako na wasambi we Baibolo apano na wantu vye wanji wano wakuvwambisya ukusambilila wano wazanilwe ku Cizusyo. Tukalonda wonsinye wano wazanwa ku Cizusyo wayivwa ukuti wapocelezilwe, amuno nawonye wanda wumwi wangiza wawe awasambilizi wa kwe Yesu.

12. Amulandu ci wuno ukwelenganya pa mazwi yano e Yesu walanzile uwusiku pano atani afwe yakatwavwila ukuwa swe wasipe? (Yohani 16:32, 33)

¹² Uwusiku pano e Yesu atani afwe, wanenile awasambilizi wakwe ukuti: ‘awamunsi waliwamiyimvya. Ukuwa sipanji! Nachimvya awamunsi.’ (Wazyani Yohani 16:32, 33.) Acani cino cavwizye e Yesu ukuwa amusipe pano awalwani wakwe wamucuzyanga nukutwalilila ukuwa nicisinka mpaka nimfwa yakwe? Weyamizile pe Yehova. Swinya pamulandu wakuti wamanyile  kuno awasambilizi wakwe walinji nukuwapita mu ntazi izili zyonganye na zino weni wapisilemo, walenzile e Yehova ukuti awa wacinjilila. (Yoha. 17:11) Amulandu ci wuno ya-a amazwi yakatwavwila ukuwa swe wasipe? Amuno e Yehova wawa na maka ukucila awalwani witu. (1 Yoh. 4:4) Akalola vyonsinye vino vikacitika. Nga tweyamila pe weliwe, angatwavwa ukuleka ukwivwa intete nukuwa swe wasipe.

13. Uzye e Jozefu uwa ku Arimatiya walanjizizye wuli ukusipa?

¹³ Lekani tulande pe Jozefu uwa ku Arimatiya. We-e umonsi wacindisilwe nkaninye ku waYuda. Wawombelanga mucilye cikulu ica waYuda, ica Sanhedrin. Lelo pano e Yesu wawombanga umulimo wakwe munsi, e Jozefu walinji amuntu umusipe nkaninye. E Yohani watili “wakonkanga e Yesu munkama, amuno watinanga awaYuda.” (Yoha. 19:38) Nanti acakuti e Jozefu watemilwe ilyasi lya Wufumu, wavwamanga ku wantu pakuti watamanya ukuti wasuwizile e Yesu. Ukwasowa nukuvwilika, afwile welenganyanga ukuti awantu walileka ukumucindika nga wamanya ukuti walinji amusambi wa kwe Yesu. Nomba asamulandu ni vili vyonsinye vino vyalenzile awatina, e Baibolo yikatunena ukuti pano e Yesu wafwile e Jozefu wasifile ‘aya kwe Pilato afika amulenga ichala chamuwili wa kwe Yesu.’ (Mar. 15:42, 43) E Jozefu walesile ukuyifisa ukuti walinji amusambi wa kwe Yesu.

14. Avyani vino mungacita nga cakuti mukatina awantu?

¹⁴ Uzye namwemwe mukatela amutinapo awantu ngati we Jozefu? Uzye mpindi zimwi pano muli ku ncito nanti pano muli ku sukulu, mukatina ukunenako wanji ukuti mwe Nte ya kwe Yehova? Uzye mukatina ukuwa mwe wakawizya nanti ukubatizwa pamulandu wakutina vino awantu wanji waliwamilola? Mutazipizile ukuleka amelenganyo ya musango wowo yalenge mupotwe ukucita cino mumanyile ukuti acizima. Mwapepa lyonsinye kwe Yehova. Mwamulenga ukuti amipe amaka yakucita ukulonda kwakwe. Nga mwalola vino Yehova akwasuka amapepo yinu, muliwoma swinya muliwa mwe wasipe.​—Ayize. 41:10, 13.

15. Pano e Yesu walolecezile ku wasambi, uzye ukusecelela kwawo kwalenzile wacite cani? (Luka 24:52, 53)

¹⁵ Awasambi wivwile uwuwi nkaninye pano e Yesu wafwile. Yelenganyani ukuti amwe wano ivya musango wo-o vyaciticizile. Awasambi watawenivye ukuti wafwilwa e ciwuza wawo, lelo waweni ngati nisuwilo lyawonye lyasila. (Luk. 24:17-21) Nomba pano e Yesu wazyulupusile nukulolecela kwe woliwo, wapawuzileko impindi iyakuwavwa ukwivwicisya vino waficilisizye  amasesemo. Swinya wawapile nu mulimo uwucindame uwakuwomba. (Luk. 24:26, 27, 45-48) Pano e Yesu wayile kwi yulu pa nsizi ya manda 40, uwulanda wuno awasambi wakweti wizile awusila swinya watalisile ukusecelela. Walinji ni nsansa amuno wamanyile ukuti e Yesu wazyulupusile ku wafwe swinya walinji nukuwavwa ukuwomba umulimo wuno wawapile. Ukusecelela kwawo kwalenzile walumbanya Yehova ukwasowa ukunenuka.​—Wazyani Luka 24:52, 53; Imili. 5:42.

16. Tungakolanya wuli awasambilizi wa kwe Yesu?

¹⁶ Tungakolanya wuli awasambilizi wa kwe Yesu? Asa mupindi ya Cizyusyo vye pano tungasecelela pano tukuwombela e Yehova, lelo tungasecelela amanda yonsinye. Co-o cikusula mukuti tuzipizile ukuwika ivya Wufumu inkolelo mu wumi witu. Ku cakulolelako, wamwi wapiluka mwevino watantisile impindi pakuti vye wawombako mu mulimo wakuwizya, ukuzanwa mu kulongana nukukwata amapepo ya lupwa lyonsinye. Ne wamwi wasolapo ukukana kwata ivyuuma ivivule pakuti vye wawomba imilimo imivule mwiwungwe nanti ukuya kuno wakawizya wa Wufumu wacepa, asamulandu nukuti awantu wakalola ukuti ukuwa ni vyuuma akuno kwacindama. Nanti acakuti pakalondeka ukusipa pakuti tutwalilile ukuwombela e Yehova, umweneco watulaya ukuti alitupaala nga twakolezya ivya Wufumu inkolelo mu wumi witu.​—Imilu. 10:22; Mat. 6:32, 33.

17. Avyani vino mukuvwambisya sana ukucita mu mpindi ya Cizusyo? (Lolani icikope.)

¹⁷ Tukuvwambisya sana ukwiza mukuzanwako ku Cizusyo cino ciliwako pe ciwili pa 4 April. Lelo nanti ciwe wo-o, tutazipizile ukulindilila ukuti, mpaka wo-o uwanda wize wufike apano twize tutalike ukwelenganya pe vino e Yesu walanjizya ukuti watukunda, pa wumi wakwe, pamfwa yakwe apano na pe vino Yehova walanjizya ukuti watukunda. Mwakwelenganyapo lyonsinye pe vyo-o ivintu pano Icizusyo citani cifike na pansizi ya Cizusyo nye. Ku cakulolelako mwapawulako impindi yakwelenganya pe vino vyawa pe chati yino yawa mu kalibuku ka Imikaliile ya Wina Klistu nu Mulimo Wuno Tukawomba, pa mutwe wakuti “Avyani Vino Mulicita pa Kuyipekanizizya ku Cizusyo”? aka mu April 2019 pifwa 4. Pano mukuwazya, mwalola amalyasi ya mu Baibolo yano yangamyavwa ukuwasalifya, ukuwa nulukundo, ukuwa mwe wasipe nukuwasecelela. Nga mwacita wo-o, mwakwelezya ukulola inzila zino zingamyavwa ukulanjizya ukusalifya ukufuma pansi ya mwezo. Ukwasowa nukuvwilika, e Yesu alisalifya nkaninye pe vyonsinye vino mulicita mu mpindi ya Cizusyo pakumwizuka.​—Ukuwu. 2:19.