1-2. (a) Mâ tsâsiga da a hōǃâ ǁkhā, Jesub ûib tsî ǁîb aoǁnâ sîsenni xa da ga ǂâi o? (b) Tae-e da nē ǁkhāǁkhāǃâs ǃnâ nî ǃhoaǃgao?

 ǁŌB ǃnâ da ga ǀnamsabe-e ǂoaǃnâ o. O da ge ǁnā khoe-e kaise ra ǁkhore. ǂGurose da ge tsûb ǀguiba nî tsâ, sida ǀnamsabe i ge noxoba ûitsama ī tsēdi xa da ga ǂâi o. Xawe ǁaeb ǀkha da ge ǃgâiaǂgaoba ra hōǃâ tsoatsoa. ǁNā khoe-i ge ǁkhāǁkhā da, dība tamas ka io ǂkhâǃnâs ǃaroma a mî xū-i. Tsî a ǀnom kai da xū-i xa da ga ǂâi oa o.

² ǁKhā ǀgaub ǃnâ i ge kaise ra tsûtsû da. Jesub ge mati a tsâ tsî a ǁō ǀgaub xa da ga khomai o. Jesub di ǁōb ǂâiǂâisens ǁaeb ǃnâ da ge ǁaeba ra ǁamaǂui. Î da xoremarib ǀō-aisasib xa ǂâi. (1Kor. 11:24, 25) Xawe da ge kai ǃgâiaǂgaoba ra hō, Jesub ge ǃhūbaib aib ge hâ io gere mî tsî dī xūn xa da ga ǂâi o. ǂKhâǃnâhes tsîna da ge ra di, nēsib sida ǃaroma ra dī xūn. Tsî hānîǁaeb ǃnâb nî dī xūn xa da ga ǂâi o. Nē xūn tsî ǁîb di ǀnammi xa ǂâiǃgâs ge nî ǂkhâǃnâ da, î da ǃgôaǃgâsiba dī da ra xūn ǃnâ ǁgau. Nē ǁkhāǁkhāǃâs ǃnâ da nî mû khami.

3. Mâ ǃaromade da ūhâ î da ǃgôaǃgâsiba xoremarib ǃaroma ǁgau?

³ Jesub di ûib tsî ǁōb xa da ga ǂâi, o da ge ǃgamǃgôasib di tsâsiba ra hō. ǃHūbaib aib ge hâ i ob ge Jesuba khoena, Elob Gaosib nî hau ǀkhaegu xa ge ǁkhāǁkhā. Nē Gaosib di amaba da ge ǃgamse ra ǃgôaǃgâ. Xoremarib ǃaroma  da ge kaise ra gangan. Daoba ī ra ǁkhowa-amba da amaga, î da Jehovab tsî Jesub ǀkha ǀgū ǀhōsagusisa ūhâ ǁkhā. ǁNān hîna Jesub ǃnâ ǂgomsa ra ǁgaun ge ǃâubasensa ūhâ. În ǀamosib kōse ûi tsî ǁîn di ǁōge ǀnamsabena ǁkhawa mû. (Jhn. 5:28, 29; Rom. 6:23) Sida ge xū-e nē ǀkhaega hōs ǃaroma dī tama hâ. Tamas ka io da ge Elob tsî Xristub tsîna sida kha ge dība xūn ǃaroma. Tātsē madawa-am hō ǁkhā tide. (Rom. 5:8, 20, 21) Xawe da ge sida di ǃgôaǃgâsiba a ǁgau ǁkhā. Mati?

4. Maria Magdalenasa mati ǃgôaǃgâsiba ge ǁǀgau Jesub ge ǁîsa a dība xūn ǃaroma? (Ai-īsiba mû re.)

⁴ Jodeǁî kaikhoes, hîna Maria Magedalena ti ǀon hâs di aiǁgausa kō re. ǁÎs ge ǁgai mâsib ǃnâ ge hâ i, 7 demongu ge ǁîsa a ǁnāǂam amaga. ǀNîsis ge khoe-i xare i ǁîsa a hui ǁoase gere tsâ. ǂÂis ǀguisa dī re, ǁîs ge matikōse gere gangansa Jesub ge ǁîsa demonga xu a ǃnoraǃnora o. ǁÎs di ǃgôaǃgâsib ge ge ǃaroma, îs ǁîsa ǁîba sao. Tsî ǁîs di ǁaeb, ǀgaib tsî ūs hâ xūna sîsenū. ǁÎba aoǁnâ sîsenni ǃnâ ǂkhâǃnâs ǃaroma. (Luk. 8:1-3) Marias ge ǀnîsi Jesub ge dībasi xū-e ǃgam ǃgôasiba ge ūba hâ i. Xawes ge ge ǀū i, Jesub ga ǁnā-i xa ǃnāsa xu-e dībasi hâsa. ǁÎb ge ǁîb di ûiba khoesib ǃaroma ga mā hâ, î-i ‘ǁîb ǃnâ ra ǂgom na’ ǀamo ûiba hō ǁkhā. (Jhn. 3:16) ǁNās ǃnâ-ūs ge Mariasa, ǁîs di ǃgôaǃgâsiba ge ǁgau. Jesub ǃoagu ǂgomǂgomsase hâsa. Jesub ge tsûb ǃnâ ǃgâuhaib ai mā io, os ge Mariasa ǁîb xōǀkhā ge mā i. Îs ǁîb tsî naun tsîna ǂkhâǃnâ. (Jhn. 19:25) Tsî Jesub ge ǁō toa o, os ge Marias tsî ǀkhara ǂkham khoera. ǂKhau-ū xūna ǁîb ge ǁkhō-e ǃkhaisa ǃoa ge hau. (Mrk. 16:1, 2) Marias di ǂgomǂgomsasib ge ge ǀkhaehe. ǁÎs ge aiǂhanuba ge ūhâ i, khâisa ge māhe Jesub ǀkha ǀhao tsî ǃhoasa. Jesub di ǂgui ǁkhāǁkhāsabegu ge ǁnā aiǂhanuba ge ūhâ tama hâ i.—Jhn. 20:11-18.

5. Mati da Jehovab tsî Jesub tsîn ge dība da xūn ǃgao ǃgôaǃgâsiba a ǁgau ǁkhā?

 ⁵ Sida tsîn ge Jehovab tsî Jesub ge dība da xūna ǃgôaǃgâsiba a ǁgau ǁkhā. Sida di ǁaeb, ǀgaib tsî ūda hâ xūna sîsenūsa, Gaosib di sîsen-e ǂkhâǃnâs ǃaroma. Aiǁgause da ge ǀnîsi Gaosib omga oms ǀkha a hui ǁkhā. Tamas ka io ǁîga kōǃgâs ǀkha.

6. Tae-i ǃaroma da a mî ǁkhā, xoremarib sida ǃaroma ǀkhaeb ase īsa?

⁶ ǂÂi da ga o, Jehovab tsî Jesub matikōse a ǀnam dasa. O da ge ra ǂkhâǃnâhe î da ǁîkha tsîna ǀnam. (1Jhn. 4:10, 19) ǁÎkha da ge ǃnāsase ra ǀnam, mûǂan da ga o Jesub ge sida ǃaroma ǀō-aisase a ǁōsa. Apostel Paulub ge nēsa ge ǂanǃgâ tsîb ge ǁîb di ǃgôaǃgâsiba ge ǁgau. Galateǁîn ǃoab ge xoa o, mî rase: “Elob Ôab . . . ǁnāb tita ǀnam tsî ge ǁîb di ûiba ǁguiba teba.” (Gal. 2:20) Xoremarib ai ǃgaoǃgaohe hâseb ge Jehovaba, sado ǁîb ǃoa ge ǂgae. Î du ǁîb ǀhōsa kai. (Jhn. 6:44) Nēsa sadu di ǂgaoba tsâǀkhā tama hâ, ǂansa Jehovab ge sadu ǃnâ ǃgâi xū-e a mûsa? Tsîb ge kaise a mataresa î du sado ǁîb di ǀhōsa kai? Nēsa sado ǀnammi Jehovab tsî Jesub tsîna du ūba hâba ǀgaiǀgai tama hâ? Dîsen da ge nî, ‘Nē ǀnamma tae-e ra ǁgaride dīsa?’

7. Ai-īsib ǃnâ ī ra ǁgauhes ǃoagu da, mati Jehovab tsî Jesub tsîna da ūba hâ ǀnamma a ǁgau ǁkhā? (2 Korinteǁîn 5:14, 15; 6:1, 2)

⁷ Jehovab tsî Jesub tsîna da ūba hâ ǀnammi ge ra ǁgarida. Î da nauna ǀnamma ǁgau. (Khomai re 2 Korinteǁîn 5:14, 15; 6:1, 2 sa.) ǀGui ǀgaub hîna da ǁnā ǀnamma ra ǁgaub ge. ǁKhoaǂgaoxase aoǁnâ sîsenni ǃnâ ǁhaosa. ǀHao-ū da ra khoen hoan ǀkha da ge ra ǃhoa. Khoe-i xare-e da ge ǀgoraǃgâ tama hâ. ǁî-i di ǃhaos, khaoǃhūb, mariǁhogu. Tamas ka  io ǁî-i skole ūhâ tamas ǃnâ-ū. Nē ǀgaus ǃnâ da ge Jehovab di ǂâis ǀkha ǀguiba ra sîsenǀhao, “mâ khoe-i hoa-i nî ǃgâiǃō kaihe tsî amaba ǂan ǃkhaisab ra ǂgao amaga.”—1Tim. 2:4.

8. Mati da sida ǃgâsana ǀnamma a ǁgau ǁkhā?

⁸ Jehovab tsî Jesub tsîna da ūba hâ ǀnammi tsîna da ge ra ǁgau. Sida ǃgâsana ǀnamma ǁgaus ǃnâ-ū. (1Jhn. 4:21) ǁÎn ǀkha da ge nî ǁae tsî nî ǂkhâǃnâ nî tsî ǃgomsigan ga ūhâ o nî hui nî. ǁÎna da ge ra ǁkhaeǂgao, ǀnamsabe-en ga ǂoaǃnâ o ǁōb ǃnâ. Tsî ǀaesenan ga o, o da ge nî sari nî. Tsîn ga ǂkhabuǂâi o, o da ge nî ǁkhaeǂgao nî. (2Kor. 1:3-7; 1Tes. 5:11, 14) ǁÎna da ge ra ǀgoreba, sao ra-e ǂâis ǃnâ ūhâse, “ǀgores ǂhanu-ai khoe-i dis ge kai tsî ǀgaisa sîsenǂuiba ūhâ.”—Jak. 5:16.

9. Mâpa a ǀkhara ǀgau sada ǃgâsana da ǀnamma a ǁgau ǁkhāba?

⁹ Sida ǃgâsana da ge ǀnamma ra ǁgau. ǃGarise da ga sîsen o, î da ǁîn ǀkha ǂkhîba ūhâ. Jehovab nau khoena ra ǀûba ǀgauba da ge ra ǁgae. Jehovab ge ǁîb di ǀGôaba māsenxase sida di ǁoren ǃaroma a mā o. O da sida ǃgâsana māsenxase ǁîn di ǁōren ǃaroma ǀûba tide? Sida ge ǁnā ǁgai ǃgāb Jesub di aiǁgaus ǃnâ ge hâ îb khami ī ǂgao tama hâ. ǁÎb ǀhōnkhoeb ge, ǁîb di ǂgui surudena ge ǀari. Xaweb ge nē ǃgāba ǁîb horesab ǂkhari surudeba ge ǀûba ǁoa i. (Mat. 18:23-35) ǀHaohâb ǃnâ da ga khoe-i ǀkha ǁnâusāgusa ūhâ o, O da ǂgurose ǂkhîba sī a dī ǁkhā. Jesub di ǁōb ǂâiǂâisens aiǃâ? (Mat. 5:23, 24) ǁNāsa da ga dī o, o da ge Jehovab tsî Jesub tsîna da ūba hâ ǃgam ǀnamma ra ǁgau.

10-11. ǀHaohâb ǃûi-aoga mati a ǁgau ǁkhā ǁîgu Jesub tsî Jehovab tsîna a ǀnamsa? (1 Petrub 5:1, 2)

¹⁰ ǀHaohâb ǃûi-aoga mati a ǁgau ǁkhā, Jehovab tsî Jesub tsîna gu a ǀnam ǃkhaisa? ǀGui ǂhâǂhâsa ǀgaub ge, gūn di ǂhâsiba kōǃgâs ǃnâ-ū. (Khomai re 1 Petrub 5:1, 2 sa.) Jesub ge apostel Petruba ǁnāsa ge ǃgāsa kaiba. Jesubab ge ǀūxū toas khaoǃgâb ge Petruba ǀnîsi ǀgaisa turaba ge ūhâ i. ǁGausa ǁîb Jesuba a ǀnamsa. ǁÎb di khâis khaoǃgâb ge Jesuba Petruba ge dî: “Simon, Johaneb ôatse, ǀnam tets a?” ǂGomǃgâ da ge ra Petrub ga xū-i hoa-e dī hâsa îb ǁîb di ǀhonkhoeba mîba ǀnambib asa. Jesub ge Petruba ge mîba: ‘O, ti gūna ǂûmâ re.’ (Jhn. 21:15-17) Tsî ǁnāpaxūb ge Petruba ǁîb di ûib hoab ǃnâ, ǃKhūb di gūrona ge kōǃgâ. ǁGaurase ǁîb ge Jesuba ǀnam isa.

¹¹ ǀHaohâb ǃûi-aogo, Jesub di ǁōb ǂâiǂâisens ǁaeb ǃnâ mati a ǁgau ǁkhā. Jesub ge Petruba a mîba mîdi sago a ǂhâǂhâsabasa? ǁNāsa go ge a dī ǁkhā, ǁaeba go ga ǁamaǂui o î go gūna sī ǂkhâǃnâ. Tsî amab ǃnâ ǃkhai hâ ǃgâsana hui, în Jehovaba ǃoa oaǀkhī. (Ese. 34:11, 12) Elobmîsa ra ǁkhāǁkhāsen khoen tsî ǀasase go Jesub di ǁōb ǂâiǂâisensa a hâǃnâ khoen ǃnâs tsîna, gu ge ǃgâiǃgâibasensa a ǁgau ǁkhā. Tsî hoana nî dītsâ î gu ǁîna ǁkhoreǁhare, ǃâubasen hâse, ǁîn tsîn ǀguitsē nî Jesub saosabe kaisa.

12. Jesub ge ǁōb nîs aiǃâ a mî mîde, tae-i ǃaroma ǁkhoaǂgaosiba ra māda? (Johaneb 16:32, 33)

¹² ǁŌb nî ǃuis aiǃâb ge Jesuba, ǁÎb di ǁkhāǁkhāsabega ge mîba: “ǃHūbaib ǃnâ go ge ǂōǂōsiba nî ūhâ, xawe ǂgaoba ūhâ re, tita ge ǃhūbaiba dan xuige.” (Khomai  re Johaneb 16:32, 33 sa.) Tae-e Jesuba ge hui, îb ǁîb khākhoena ǁkhoaǂgaosib ǀkha mâǃoa? Tsî ǁōb kōse ǂgomǂgomsase hâ? ǁÎb ge Jehovab ai ge ǂgomaiǂnûi. Jesub ge ge ǂan-i ǁîb di saosaben ǁkhā ǃgomsiga nî hōǃâsa. ǁNā amagab ge Jehovaba ge ǂgan, îb ǁîna kōǃgâ. (Jhn. 17:11) Nēsa tae-i ǃaroma sida ǁkhoaǂgaosiba ra mā? Jehovab sida di khākhoen xa a ǀgaisa amaga. (1Jhn. 4:4) ǁÎb ge xūn hoana ra mû. ǂGomǃgâ da ge ra, Jehovab ai da ga ǂgomaiǂnûi o. Ob ge ǁîba nî huida, î da ǃao da ra xūna sîsenǂam tsî ǁkhoaǂgaosiba ǁgau.

13. Josefi, Arimateaǁîba ǁkhoaǂgaosiba mati ge ǁgau?

¹³ Josefi, Arimateab aiǁgaus xa ǂâi re. ǁÎb ge Jodeǁî khoen xa kaise ge ǃgôahe hâ i. Tsî ge Sanhendrini ǁani ī, Jodeǁîn di ǀgapi ǁnâuǃgâ ǃkhaiba. Xawe Jesub di ǃhūbaisi aoǁnâ sîsenni ǁaeb aib ge Josefa kaise ge ǃaoǃnâ i. Johaneb ge ra mî, ǁîb ge ‘ǂganǃgâsasib ǃnâ Jesub di ǁkhāǁkhāsabes tsîna ge ī-i, Jodeǁînab gere ǃao amaga.’ (Jhn. 19:38) Josefi ge ǃgâiǃgâibasensa Gaosib haisi-ams ǃnâ ge ūhâ i xaweb ge Jesub ǃnâb ūhâ ǂgomsa nauna xu gere sâu. ǁÎb ge ǀnîsi gere ǂâi, khoen ǁîba ǃgôaǃgâsiba ūhâba tidesa. ǂAnǂuin ga o ǁîb Jesuba ra sao ǃkhaisa. Xawes ge Elobmîsa ra mîba da, Jesub ge ǁō toas khaoǃgâb ge Josefa. “Pilatub tawa sī tsî Jesub di sorosa ge ǂgan, ǁîb ǀguib ge ǁnā ǁkhoasiba ūhâ i xui-ao.” (Mrk. 15:42, 43) Josefi ge nēsi ǁîb a Jesub di saosabesa ge sâu tama hâ i.

14. Tae-e du nî dī khoena du ga ǃao o?

¹⁴ Josefi khami du sadu tsîna khoena ra ǃao? Skoli tamas ka io sîsenni tawa du ǀnî ǁaegu ai ra tao. Khoena ǂanǂansa Jehovab di ǃoaba-aon di ǀgui du a ǃkhaisa? ǁĀǁnâsa tama aoǁnâ-ao-i tamas ka io du ǁāǁnâ kaisensa ra mâiǂui. Naun tae-e nî mîs xa du ra ǂâiǂhansen amaga? A-ī ǁnāti ī tsâsiga tā ǁkhae du re, ǂhanu xū-e dīsa. Jehovaba ǃoa ǀgore tsî ǂgan bi re îb ǁkhoaǂgaosiba mā du, î du ǁîb di ǂâisa dī ǁkhā. Jehovab sadu ǀgorede ra ǃeream ǀgauba du ga mû, o du ge ǀgai tsî nî ǁkhoaǂgaoxa.—Jes. 41:10, 13.

15. Jesub ge ǁîb ǁkhāǁkhāsabegu aiǃâ a ǂhai o, ǁnā ǃgâiaǂgaoba tae-e ge ǂkhâǃnâ gu dīsa? (Lukab 24:52, 53)

¹⁵ ǁKhāǁkhāsabegu ge kaise ge tsûaǂgao hâ i, Jesub ge ǁō o. ǁÎgu mâsib ǃnâ mûnan-aisen re. ǁÎgu ǀhōsab ǀguiba gu ge  ge ǂoaǃnâ tama hâ i. Xawe gu ge ǁîgu ǃâubasens tsîna gu ge ǂoaǃnâ khami gere tsâ. (Luk. 24:17-21) Xawe Jesub ge ǁîgu aiǃâ a ǂhai, ob ge ǁaeba ū tsî ǁîga ge hui. Î gu ǁnâuǃā ǁîb Elobmîs kēbode ra dīǀoaǀoasa. ǁÎb ge ǂhâǂhâsa sîsenni, hîna gu nî dī-e ge mā gu. (Luk. 24:26, 27, 45-48) Jesub ge 40 tsēdi khaoǃgâ, ǀhomma ǃoa a oa ǁaeb ǃnâ. Î ge ǁkhāǁkhāsabegu di tsûaǂgaoba kai ǃgâiaǂgaob ǃnâ ge dawa. ǁÎgu ǀhōnkhoeb a ûitsâmasa gu ge ge ǂan i tsîb ǁîga ǀasa ǁgaumâisa dīǀoaǀoas ǃnâ nî huis ge kaise ge ǃgâiaǂgao kai gu. ǁÎgu ǃgâiaǂgaob ge ge ǂkhâǃnâ gu, î gu Jehovaba ǀûsen tamase ǃoaba ǀgara.—Khomai re Lukab 24:52, 53 sa; ǃNǃkh. 5:42.

16. Mati da Jesub ǁkhāǁkhāsabega a ǁgae ǁkhā?

¹⁶ Mati da Jesub ǁkhāǁkhāsabega a ǁgae ǁkhā? ǃGâiaǂgaoba da ge a hō ǁkhā, Jehovaba da ga Jesub di ǁōb ǂâiǂâisens ǁaeb ǃnâ ǀgui ǃoaba tama i. Tsî hoa kurib ǃnâ a ǃoaba o. Nēs ge ra ǂgaoǀkhā da, î da Elob Gaosiba ǂgurose sida ûib ǃnâ mâi. Aiǁgause, ǂguin ge ǁîn di sîsenni ǁaeba ge ǀkharaǀkhara. În aoǁnâ sîsenni ǃnâ ǁhao, ǀhaode hâǃnâ tsî hoaǁae omaris ǃoabasa dī. ǀNîn ge naun ǂhâǂhâsase ra mû xūn ōse hâ, în ǃnāsase ǀhaohâb ǃnâ sîsenūhe ǁkhā. Tamas ka ion ǂhâsib hâba sī a aoǁnâ ǁkhāse. Mâǀgaisa da ge ǂhâhâ Jehovaba ǃoaba ǀgaras ǃnâ. Xaweb ge ra mîmâiba da ǀkhaedab nîsa Gaosib ǂhâsiga da ga ǂgurose sida ûib ǃnâ a mâi o.—ǂKhm. 10:22; Mat. 6:32, 33.

17. Tae-e du ra mîǁgui, Jesub di ǁōb ǂâiǂâisens ǃnâ dīsa? (Ai-īsiba mû re.)

¹⁷ Mûǂui da ge ra Jesub di ǁōb ǂâiǂâisensa, Dinstaxtsēs Aprili 4 ai tsēdīsa. Xawe tā ǃâu re, ǁnā ǁaeb kōse Jesub di ûib, ǁōb tsî ǁîb tsî Jehovab ge ǁgauda ǀnammi xa ǂâisa. Hoaǁae māǃēs hoasa sîsenū re Jesub di ǁōb ǂâiǂâisens ǁaeb aiǃâ ǁnāsa dīsa. Aiǁgause, ǁaeba ǁamaǂui tsî Jesub ûib ǃnâ gere ī xūn xa khomai tsî ǂâiǂâisen re. Hîna “The Final Week of Jesus’ Life on Earth” Appendix B12 New World Translations ǃnâ ra hōhesa. ǁNā khomai ǃâde du, Elobmîs ǃnâ ra khomai hîna. Kō re, mati-i sadu di ǃgôaǃgâsib, ganganxasib, ǀnammi, ǁkhoaǂgaosib tsî ǃgâiaǂgaob tsîna ra ǀgaiǀgaihe ǀgausa. ǁNāpaxū ǀgauga ôa re hîna du sadu ǃgôaǃgâsiba a ǁgau ǁkhāga. ǂGomǃgâ ǁkhā du ge a, Jesub hoa xūn hîna du ǁîb ǁōb ǂâiǂâsens ǃaroma ra dīna ra ǃgôaǃgâsa.—J.ǂHa. 2:19.