1-2. (a) Hadia manö nirasoida na tangerönusi waʼauri hegöi halöwö fanuriaigö nifalua Yesu? (b) Hadia nitutunöda ba artikel daʼa?

 BA GINÖTÖ mate niha niʼomasiʼöda, tatu manö taʼamalösi sibai ia. Ba wamobörö, tola manö abu sibai dödöda börö me itörö-törö tödöda zalua khönia fatua lö mate ia, mendrua manö na no tefakao ia ba wökhö. Hizaʼi, ibörötaigö terara dödöda na ifuli itörö tödöda wehede mazui nifahaʼönia yaʼita hegöi nifaluania ba wangaʼaroʼö yaʼita.

² Ba migu fatua lö mufalua Wanörö Tödö hegöi na no aefa mufalua, omasi ita wameʼe inötöda ba woʼangerönusi höli sebua böli si no ibeʼe Yesu khöda. Tola manö abu dödöda na tabaso waö-waö wamakao hegöi faʼamate Yesu. (1 Ko. 11:24, 25) Hewaʼae simanö, tola terara dödöda na taʼangerönusi hadia niwaʼö Yesu hegöi nifaluania me so ia ba gulidanö. Tefarou göi dödöda na taʼengerönusi hadia nifaluania iadaʼa hegöi ba zi so miföna. Na taʼangerönusi fefu daʼö hegöi faʼomasinia khöda, tefarou dödöda ba wangoromaʼö fangandrö saohagölö khönia. Ba artikel daʼa, tatutunö hadia manö zi tola tafalua ba wangandrö saohagölö khönia.

3. Hana wa taʼandrö sibai saohagölö ba höli?

³ Taʼandrö sibai saohagölö na taʼangerönusi waö-waö waʼauri Yesu hegöi faʼamatenia. Sagötö halöwö fanuriaigö Yesu ba gulidanö, ifahaʼö niha sanandrösa ba howu-howu niʼasogö  Wamatörö Lowalangi. Taʼandrö sibai saohagölö börö me no aboto ba dödöda zindruhu sanandrösa ba Wamatörö andrö. Taʼandrö göi saohagölö ba höli börö me tola ifuli fahuwu ita khö Yehowa hegöi Yesu. Baero daʼö, na mamati ita khö Yesu, tola taʼokhögö dötönafö faʼauri si lö aetu ba ifuli falukha ita ba nösi nomoda hegöi si fahuwu khöda si no mate. (Yoh. 5:28, 29; Rom. 6:23) Sindruhunia, tenga sinangea tatema howu-howu andrö, ba tebai tasulöni hadia zi no ifalua khöda Lowalangi hegöi Keriso. (Rom. 5:8, 20, 21) Hewaʼae simanö, tola taforomaʼö wangandrö saohagölö soroi ba dödö. Hewisa lalania?

4. Hewisa wangoromaʼö Maria Magadala fangandrö saohagölö ba zi no ifalua khönia Yesu? (Faigi gambara.)

⁴ Nehehö duma-duma zi samösa ira alawe Yahudi sotöi Maria Magadala. Tefakao sibai ia börö zi dafitu malaʼika si lö sökhi. Tola manö so ba wangera-ngerania wa lö hadöi si tola manolo yaʼia. Hizaʼi, iʼefaʼö ia Yesu moroi ba malaʼika si lö sökhi andrö. Tatu iʼandrö sibai saohagölö. Börö me iʼandrö saohagölö, tefarou göi dödönia ba woloʼö Yesu ba iʼogunaʼö ginötönia, faʼabölö hegöi okhötania ba wotuhini Yesu ba halöwö fanuriaigö. (Luk. 8:1-3) Hewaʼae na iʼameʼegö tödö sibai hadia zi no ifalua khönia Yesu, tola manö lö aboto ba dödönia wa so zabölö ebua nasa nifalua Yesu. Itehegö nosonia Yesu salahi niha sato ”enaʼö dozi samati khönia” tola lasöndra waʼauri si lö aetu. (Yoh. 3:16) Hewaʼae na lö saboto ba dödö Maria daʼö, iforomaʼö wangandrö saohagölö khö Yesu me lö faröi ia. Me so Yesu ba döla geu famakao, no mosindro Maria ahatö ba daʼö ba wamarou tödö Yesu hegöi niha tanö böʼö si so ba daʼö. (Yoh. 19:25) Me no aefa mate Yesu, Maria hegöi si darua ira alawe tanö böʼö, laʼohe wangomuhua soguna ba wogoʼo Yesu. (Mrk. 16:1, 2) Börö me lö faröi Maria khö Yesu, ifahowuʼö ia Yehowa. Me no aefa tesusugi Yesu, tola falukha ba fahuhuo ira. Daʼö no inötö si sökhi sibai börö me lö fefu ndra nifahaʼö tola falukha ira khö Yesu.—Yoh. 20:11-18.

5. Hewisa wangoromaʼöda fangandrö saohagölö ba zi no ifalua khöda Yehowa hegöi Yesu?

 ⁵ Tola taforomaʼö wangandrö saohagölö ba zi no ifalua khöda Yehowa hegöi Yesu na taʼogunaʼö ginötö, faʼabölö hegöi okhötada ba wotuhini halöwö ba Wamatörö Lowalangi. Duma-dumania, fao ita ba wangotomosi hegöi ba wondrorogö tomosa niʼogunaʼö ba wamosumange Yehowa.

6. Hana wa tola tawaʼö höli andrö no buala khöda zamösana?

⁶ Na taʼangeragö hawaʼebua waʼomasi Yehowa hegöi Yesu khöda, tatu tefarou dödöda ba wangomasiʼö yaʼira. (1 Yo. 4:10, 19) Itugu taʼomasiʼö ira na tafahaʼö ita wa mate Yesu salahida zamösana. Aboto ba dödö zinenge sotöi Faulo daʼö, andrö wa iʼandrö saohagölö. Imane ba niha Galatia, ’Ono Lowalangi si no mangomasiʼö yaʼo ba sameʼe faʼaurinia ba khögu.’ (Gal. 2:20) Börö me so höli, tola idöni ndraʼugö Yehowa tobali si fahuwu khönia. (Yoh. 6:44) Khalaigö atö, iʼila Yehowa zi sökhi si so ba waʼaurimö, ba ebua sibai mböli nibeʼenia ba wangöhöli yaʼugö tobali si fahuwu khönia. Tatu toröi-röi ba dödömö na öʼangeragö zimane daʼö, ba tola itugu öʼomasiʼö Yehowa hegöi Yesu. Börö daʼö sofu khöu samösa: ’Hadia zi tola ufalua börö waʼomasigu khö Yehowa hegöi Yesu?’

7. Simane niʼilada ba gambara, hewisa wangoromaʼöda faʼomasi khö Yehowa hegöi Yesu? (2 Korindro 5:14, 15; 6:1, 2)

⁷ Faʼomasida khö Lowalangi hegöi Keriso zamarou yaʼita ba wangomasiʼö niha böʼö. (Baso 2 Korindro 5:14, 15; 6:1, 2.) Sambua lalada ba wangoromaʼö faʼomasi yaʼia daʼö na taturiaigö duria somuso dödö si fao faʼowölö-ölö. Tola manuriaigö ita ba niha si falukha khöda, ba lö tafaehu-faehusi soi hegöi mado, faʼebua gokhöta mazui faʼalawa sekola. Tefaudu daʼö ba gohitö dödö Yehowa ”enaʼö teʼorifi fefu  niha ba lasöndra waʼaboto ba dödö si tefaudu sanandrösa ba zindruhu”.—1 Ti. 2:4.

8. Hewisa wangoromaʼöda faʼomasi khö ndra talifusöda?

⁸ Omasi ita taforomaʼö waʼomasi khö Lowalangi hegöi Keriso, yaʼia daʼö na taʼomasiʼö ndra talifusöda. (1 Yo. 4:21) Taʼameʼegö tödö ba tatolo ira na alua khöra waʼabasaki. Tarara dödöra na mate niha niʼomasiʼöra, tafalukhaisi ira na mofökhö ira, ba taforege sibai ba wangabölöʼö yaʼira na so khöra waʼide-ide dödö. (2 Ko. 1:3-7; 1 Te. 5:11, 14) Böi tebulö mangandrö ita salahira börö me aboto ba dödöda wa ”mofaʼabölö wangandrö niha satulö”.—Yak. 5:16.

9. Hewisa nasa wangoromaʼöda faʼomasi khö ndra talifusöda?

⁹ Lala tanö böʼö ba wangoromaʼö faʼomasi khö ndra talifusöda yaʼia daʼö na taforege ba wondrorogö faʼatulö ba gotaluada. Omasi ita taʼoʼö Yehowa ba wangefaʼö sala niha böʼö. Itehegö mate Nononia ba wangefaʼö horöda. Simanö göi ita, omasi ita wangefaʼö sala ndra talifusöda, lö omasi ita tobali simane sawuyu si lö sökhi si so ba gamaedola Yesu. Me no aefa iʼefaʼö woʼömönia sokhö yaʼia, lö ifalua zimane daʼö ba nawönia sawuyu tanö böʼö side-ide foʼömö moroi khönia. (Mat. 18:23-35) Na fatiti ndraʼugö khö ndra talifusöda ba mbanua niha Keriso, hadia tola öʼatulöʼö ndraʼugö khönia fatua lö öʼondrasi Wanörö Tödö? (Mat. 5:23, 24) Na öfalua daʼö, no öforomaʼö wa öʼomasiʼö Yehowa hegöi Yesu.

10-11. Hewisa wangoromaʼö ndra satua sokubaloi wa laʼomasiʼö Yehowa hegöi Yesu? (1 Fetero 5:1, 2)

¹⁰ Hewisa wangoromaʼö ndra satua sokubaloi wa laʼomasiʼö Yehowa hegöi Yesu? Sambua lala si tola lafalua yaʼia daʼö na laʼameʼegö tödö zoguna khö mbiri-biri Yesu. (Baso 1 Fetero 5:1, 2.) Ifatunö Yesu khö Wetero wa moguna sibai daʼö. Me no aefa iʼosilöʼögö Yesu tölu kali, tatu omasi sibai Wetero ba wangoromaʼö faʼomasinia khö Yesu. Me no aefa tesusugi Yesu, manofu ia khö Wetero, ”He Simoni ono Yohane, hadia öʼomasiʼö ndraʼo?” Tatu omasi sibai Wetero ba wamalua hadia ia ba wangoromaʼö faʼomasinia khö Zokhö yaʼia. Imane khönia Yesu, ”Kubaloi nono mbiri-birigu.” (Yoh. 21:15-17) Sindruhu sa, sagötö faʼauri Wetero lö tebulö irorogö mbiri-biri Yesu. Ifalua daʼö ba wangoromaʼö faʼomasinia khö Yesu.

¹¹ Ba migu fatua lö mufalua Wanörö Tödö hegöi na no aefa mufalua, hewisa wangoromaʼömi yaʼami satua sokubaloi wa omasi ami miʼoʼö mene-mene nibeʼe Yesu khö Wetero? Tola miforomaʼö wa miʼomasiʼö Yehowa hegöi Yesu na mifalua wokubaloi ba miforege ba wanolo niha si no ara mamöhöli wangai halöwö ba wamati, enaʼö mangawuli ira khö Yehowa. (Hez. 34:11, 12) Tola göi minehegö niha nifahaʼö ba Zura Niʼamoniʼö hegöi niha sawena mangondrasi Fanörö Tödö. Omasi ita na larasoi wa tatemaʼö ira, ba tatötöna wa samuza inötö tola tobali ira soloʼö khö Yesu.

12. Hana wa tola barani ita na taʼangerönusi wehede Yesu fatua lö mate ia? (Yohane 16:32, 33)

¹² Ba mbongi fatua lö mate Yesu, imane khö ndra nifahaʼönia, ”Tefakao ami ba gulidanö andre. Tobali, böi miʼataʼufi! No ukalaisi gulidanö.” (Baso Yohane 16:32, 33.) Hadia zanolo Yesu irege tola ilawa zi faʼudu khönia si fao faʼabarani ba lö faröi ia irugi waʼamate? Iʼodaligö Yehowa. Aboto ba dödö Yesu wa lataögö wanandraigö si fagölö göi ira nifahaʼönia, andrö wa iʼandrö khö Yehowa ba wondrorogö yaʼira. (Yoh. 17:11) Hana wa tola barani ita na taʼangerönusi wehede Yesu andre? Börö me abölö Yehowa moroi ba zi faʼudu khöda. (1 Yo. 4:4) Iʼila hadia zalua khöda fefu. Faduhu dödöda na taʼodaligö Yehowa, tola talawa waʼataʼu ba so khöda waʼabarani.

13. Hana wa ba gafuriata so waʼabarani khö Yosefo moroi ba Garimatea?

 ¹³ Nehegö zi no irai alua khö Yosefo moroi ba Garimatea. Yaʼia andrö sohalöwö ba gödo Zangetuʼö Huku niha Yahudi. Sagötö fanuriaigö Yesu ba gulidanö, lö faʼabarani khö Yosefo. Imane Yohane wa Yosefo andrö nifahaʼö Yesu, hizaʼi ”ibiniʼö wa nifahaʼö ia börö waʼataʼunia khö ndra niha Yahudi”. (Yoh. 19:38) Hewaʼae na adöni dödö Yosefo ba duria somuso dödö sanandrösa ba Wamatörö Lowalangi, lö omasi ia na so zangila wa mamati ia khö Yesu. Ataʼu ia na aheta ia ba dadaomania. Hizaʼi, ifatunö khöda Sura Niʼamoniʼö wa me no aefa mate Yesu ’lö ataʼu Yosefo wangondrasi Filato, iʼandrö mboto Yesu si no mate’. (Mrk. 15:42, 43) Ba gafuriata, iforomaʼö Yosefo wa yaʼia andrö nifahaʼö Yesu.

14. Hadia zinangea öfalua na ataʼu ndraʼugö simane Yosefo?

¹⁴ Hadia no irai ataʼu ndraʼugö simane Yosefo? Ba zekola mazui ba nahamö wohalöwö, hadia no irai aila ndraʼugö ba wangombakha wa yaʼugö andrö Samaduhuʼö Yehowa? Hadia so khöu waʼaombö dödö tobali sanuriaigö mazui öfabayagöʼö idanö, börö me aombö dödöu ba lala wangera-ngera niha sanandrösa khöu? Böi tehegö tobali fanaisimö wangera-ngera simane daʼö ba wamalua satulö. Angandrö khö Yehowa soroi ba dödö. Andrö khönia enaʼö ibeʼe khöu waʼabarani ba wamalua ohitö dödönia. Ba na örasoi hewisa wameʼe Yehowa fanema li ba wangandrömö, itugu abölö ndraʼugö ba so khöu waʼabarani.—Yes. 41:10, 13.

15. Hadia nifalua ndra nifahaʼö me so khöra waʼomuso dödö? (Luka 24:52, 53)

¹⁵ Ba ginötö mate Yesu, abu sibai dödö ndra nifahaʼönia. Khalaigö atö zalua khöra. Mate niha si fahuwu khöra niʼomasiʼöra, ba hulö zi taya tötönafö ira. (Luk. 24:17-21) Hizaʼi, me ifalukhaisi ira Yesu me no aefa tesusugi ia, itolo ira enaʼö aboto ba dödöra hewisa wa tola alua zi no mufaʼeleʼö ba Zura Niʼamoniʼö. Ibeʼe göi khöra halöwö si tohude sinangea lafalua. (Luk. 24:26, 27, 45-48) Me möi Yesu ba zorugo 40 hari me no aefa tesusugi ia, faʼabu dödö nirasoi nifahaʼönia tobali faʼomuso dödö sebua. Hadia mbörö? Börö me no ifuli auri Zoʼaya yaʼira ba tola itolo ira wamalua halöwö si bohou. Börö waʼomuso dödö, tola tefarou dödöra enaʼö lö tebulö lafosumange Yehowa.—Baso Luka 24:52, 53; Hal. 5:42.

16. Hewisa woloʼöda duma-duma ndra nifahaʼö Yesu?

¹⁶ Hewisa woloʼöda duma-duma ndra nifahaʼö Yesu? Tola tafosumange Yehowa si fao  faʼomuso dödö, tenga ha ba ginötö mufalua Wanörö Tödö, hizaʼi ero inötö. Börö daʼö, moguna taʼofönaiʼö Wamatörö Lowalangi ba waʼaurida. Ato ndra talifusöda si no mamalua daʼö. Duma-dumania, so zamaudugö inötöra wohalöwö enaʼö lö tebulö lafalua wanuriaigö, möi ira ba gangowuloa, ba lafalua wamahaʼö ba zi sambua omo. So göi zi lö omasi mangokhögö gama-gama sebua böli, hewaʼae na moguna sibai daʼö ba wamaigi niha böʼö. Hana wa lafalua daʼö? Enaʼö oya zi tola lafalua ba mbanua niha Keriso, mazui enaʼö tola manuriaigö ira ba mbanua si lö ato sanuriaigö. Sindruhu sa, moguna wamorege hegöi faʼanau gölö ba wamosumange Yehowa, ba ifabuʼu wa fahöna howu-howu nibeʼenia khöda na taʼofönaiʼö Wamatörönia ba waʼaurida.—Amd. 10:22; Mat. 6:32, 33.

17. Hadia zinangea tafalua ba migu fatua lö mufalua Wanörö Tödö hegöi na no aefa mufalua?

¹⁷ Tabalo-baloi ginötö Wanörö Tödö nifalua ba ngaluo Salasa 4 mbaŵa si Öfa. Hizaʼi, moguna taʼangerönusi waö-waö waʼauri hegöi faʼamate Yesu, faʼomasi niforomaʼönia hegöi niforomaʼö Yehowa khöda fatua lö mufalua Wanörö Tödö, tenga ha ba ginötö mufalua Wanörö Tödö. Tandraigö beʼe ginötöu ba wombaso hegöi ba woʼangerönusi salua si no musura ba tabel ”Migu Safuria Waʼauri Yesu ba Gulidanö,” ba Apendiks B12 Famoeluaha Gulidanö si Bohou. Ba ginötö öfalua daʼö, alui ayati si tola mondrouʼö fangandröu saohagölö, faʼomasi, faʼabarani hegöi faʼomuso dödö. Aefa daʼö, angerönusi hadia zinangea öfalua ba wangoromaʼöu fangandrö saohagölö. Ba yafaduhu dödöu wa hasambalö iʼameʼegö tödö Yesu wamorege si no öfalua ba wanörö tödö yaʼia.—Fam. 2:19.