1-2. (a) Kansi tukumvwa tyani tikaganizila za moyo komasoti utumiki wa Yesu? (b) Kansi tikambilane chinji mu nkhani ino?

 MUNTHU watukonda akamwalila tumuyewa ngako! Poyamba tingamvwe ngako ululu tikaganizila vichitika akaliyemwalila, makamaka keno wokondewa wasu etamana ngako akaliyemwalila. M’kupita kwa nthawe, tingayambesoti kunkhala osangalala tikaganizila vinthu vechitiphunzisa, vechichita kuti atilimbikise, olo kuchita chinthu chiyakine kuti atikondweleshe.

² Molingana na vamene ivi, nase tukumvwa chisoni tikoŵelenga nkhani zokhuza mwechitamanila Yesu komasoti imfwa yake. Mu nyengo ya Chikumbukilo, tuganizila maka-maka kufunika kwa nsembe yake ya dipo. (1 Akor. 11:24, 25) Koma olo n’tetyo, tusangalala ngako kuganizila za vinthu vechinena Yesu olosoti vechichita penze pano pachalo. Tulimbikisiwasoti tikaganizila za vinthu vakuchita palipano na vati azatichitile kusogolo. Kuganizila pa vinthu vamene ivi komasoti chikondi chali nacho kuli sewo, kungatilimbikise kuti tikowonesha kutembeja kwasu kupitila pa vinthu vatuchita pa moyo wasu monga mwatikuti tiwonele mu nkhani ino.

3. Kansi tili na vifukwa votyani votembejela dipo?

³ Tutembeja ngako tikaganizila za moyo na imfwa ya Yesu. Pa utumiki wake wonse pano pachalo, Yesu ephunzisa ŵanthu za madaliso ŵaukuti uzalete Ufumu wa Mulungu. Tukondwela ngako na vayuphunzisa Baibolo vokhuza dipo komasoti vinthu viweme vikuti vizakwanishike chifukwa cha dipo yamene iyi. Chifukwa  yutipasa mwayi wonkhala pa ushamwali wotang’a ngako na Yehova komasoti Yesu. Ŵanthu okhulupilila Yesu alisoti na chiyembekezo cha kuzankhala na moyo wosasila na kuzawonanasoti na okondewa ŵawo amene emwalila. (Yoh. 5:28, 29; Aro. 6:23) Paliye kalikonse ketichita kuti tilondele madaliso amene aŵa; komasoti tingakwanishelini kumuwejela Mulungu na Khilisitu pa vinthu vechitichitila. (Aro. 5:8, 20, 21) Koma tingawoneshe kutembeja kwasu. Motyani?

4. Kansi Mariya Mmagadala ewonesha tyani kutembeja kwake pa vinthu vechimuchitila Yesu? (Onani chithunzi.)

⁴ Ganizilani chisanzo cha mwanakazi muyakine wa Chiyuda zina yake Mariya Mmagadala. Yove etamana ngako chifukwa cha viŵanda 7 vamene venzemuvutisha. Payakine yove enzewona kuti paliye aliyense angamuyavye. Tetyo, ganizilani mwechitembejela, Yesu pechimumasula ku viŵanda vamene ivo! Kutembeja kwake kwemuchitisha kunkhala wophunzila wa Yesu nokatishila ntchito nthawe yake, mphamvu zake, na chuma chake pomuchilikiza pa utumiki wake. (Lk. 8:1-3) Olo kuti Mariya etembeja ngako pa vinthu vechimuchitila Yesu, payakine yove enzeziŵalini kuti Yesu azamuchitile vinthu vinyinji kusogolo. Yesu enzeyembekezela kupeleka moyo wake kuti awombole ŵanthu, “kuti aliyense angakhulupilile yove” ankhale na moyo wosasila. (Yoh. 3:16) Koma olo n’tetyo, ewonesha kuti enzemutembeja Yesu mwa kunkhala wokhulupilika. Olo penzetamana Yesu pa chimuti chotamanilapo, Mariya epanama pafupi kuti alimbikise Yesu na ŵanthu ayakine. (Yoh. 19:25) Pavuli pakuti Yesu wamwalila, Mariya na anakazi ayakine aŵili etola vonunkhilisha noluta navo pa manda pechiikiwa Yesu. (Mk. 16:1, 2) Mariya edalisiwa ngako chifukwa cha kukhulupilika kwake. Yove enze na mwayi wokumana na Yesu nolaŵila naye pechiushiwa. Ni ophunzila tyala atontho a Yesu amene enkhala na mwayi wamene uyu.—Yoh. 20:11-18.

5. Kansi tingawoneshe tyani kuti tutembeja pa vonse vawatichitila Yehova na Yesu?

⁵ Nase tingawoneshesoti kutembeja pa vawatichitila Yehova na Yesu mwa kukatishila  ntchito nthawe yasu, mphamvu zasu, na ndalama zasu popitisha pasogolo ntchito ya Ufumu. Mwachisanzo, tingalipeleke kuti tiyavye pa ntchito yomanga na kukonzasoti ng’anda zatukatishila ntchito polambila Yehova kuti zipitilije kuwoneka luweme.

6. Ndaŵa yanji tinganene kuti dipo ni mphaso kuli aliyense wa sewo?

⁶ Kuganizila mwakutikondela Yehova na Yesu kutichitisha kuti nase tikoŵakonda. (1 Yoh. 4:10, 19) Tuŵakonda ngako tikaziŵa kuti Yesu etifwila sewo aliyense payeka. Ntumwi Paulo evomekeja vamene ivi, ndipo yove ewonesha kutembeja kwake pechilembela Akhilisitu aku Galatiya kuti: “Mwana wa Mulungu . . . enikonda nolipeleka yeka chifukwa cha newo.” (Aga. 2:20) Chifukwa chakuti Yesu etifwila, Yehova angakuleteni kuli yove ndipo mungankhale shamwali wake. (Yoh. 6:44) Kansi mumekelalini kuziŵa kuti Yehova ewona viweme muli mwewo ndipo elipila ntengo ukulu ngako kuti munkhale shamwali wake? Kansi vamene ivi vukuchitishani lini kuti mukokonda ngako Yehova na Yesu? Tingachite bwino kulikonsha kuti, ‘Kansi chikondi chamene ichi chunikakamija kuchita chinji?’

7. Monga mwatuwonela pa chithunzi, kansi aliyense wa sewo angawoneshe tyani kuti okonda Yehova na Yesu? (2 Akorinto 5:14, 15; 6:1, 2)

⁷ Kukonda kwasu Yehova na Khilisitu kutichitisha kuti tikokondasoti ayakine. (Ŵelengani 2 Akorinto 5:14, 15; 6:1, 2.) Njila imozi yatuwoneshela chikondi chasu ni kukata ntchito yolalikila mwakhama. Tulalikila uthenga uweme kuli aliyense watakumana naye. Tupewalini kulaŵila na ŵanthu chifukwa chosiyana nawo ntundu kapena chinkhalidwe. Mmalomwake, tulaŵila na aliyense viliye kanthu kuti ni wolemela, ni wosauka, ni wophunzila olo wosaphunzila. Mwa njila yamene iyi, tuchita vinthu mokatijana na cholinga cha Yehova chakuti “ŵanthu olo ankhale a ntundu wotyani apulumuke  nonkhala oziŵa choonadi molondola.”—1 Tim. 2:4.

8. Kansi tingawoneshe tyani kuti tukonda abale na alongo ŵasu?

⁸ Tuwoneshasoti kuti tukonda Mulungu na Khilisitu mwa kuwonesha chikondi kuli abale na alongo ŵasu. (1 Yoh. 4:21) Tuganizila ngako vinthu vakufunikila komasoti tuŵayavya pa nthawe ya mayeselo. Tuŵatonthoja akaluza munthu wakukonda mu imfwa, kuŵayendela akalwala, komasoti tuchita vonse vatingakwanishe kuti tiŵalimbikise akakumana na vinthu vokhumudwisa. (2 Akor. 1:3-7; 1 Ates. 5:11, 14) Tuŵapemphelela nthawe zonse, chifukwa tuziŵa kuti “pemphelo yopapatila ya munthu wolungama yukata ntchito mwamphamvu ngako.”—Yak. 5:16.

9. Kansi ni njila iyakine yotyani yatingawoneshele kuti tukonda abale na alongo ŵasu?

⁹ Tuwoneshasoti kuti tukonda abale na alongo ŵasu mwa kuyeja-yeja kunkhala nawo mwantendele. Tuyeja-yeja kukonkheja chisanzo cha Yehova pa nkhani yokhululukila ayakine. Keno Yehova elola kuti Mwana wake atifwile chifukwa cha machimo ŵasu, kansi nase tufunikalini kunkhala okonzeka kukhululukila abale na alongo ŵasu akatiphoniyela? Tufunalini kunkhala monga ni kapolo muyakine muipa wamene efotokozewa mu fanizo iyakine ya Yesu. Olo kuti abwana ŵake enze emukhululukila nkhongole yake ikulu, kapolo wamene uyu ekangiwa kukhululukila kapolo muyake wamene enze naye na nkhongole itontho. (Mt. 18:23-35) Keno mwaphoniyana maganizo na munthu muyakine mumpingo, kansi mungayambe ni mwewo kuchitapo kanthu kuti munkhazikishe ntendele Chikumbukilo chikaliye chitika? (Mt. 5:23, 24) Keno mungachite vamene ivi, mungawoneshe kuti mukonda ngako Yehova na Yesu.

10-11. Kansi akulu angawoneshe tyani kuti okonda Yehova komasoti Yesu? (1 Petulo 5:1, 2)

¹⁰ Kansi akulu angawoneshe tyani kuti okonda Yehova na Yesu? Njila ikulu yangawoneshele vamene ivi ni kusamalila vosoŵa va mbelele za Yesu. (Ŵelengani 1 Petulo 5:1, 2.) Yesu efotokoza mfundo yamene iyi momvwika luweme kuli ntumwi Petulo. Pavuli pakuti wakana Yesu maulwendo atatu, Petulo enzefunishisha kuwonesha kuti omukonda Yesu. Yesu pechiushiwa, ekonsha Petulo kuti: “Simoni mwana wa Yohane, kansi newo unikonda?” Tingankhale osimikijila kuti Petulo enze echita chilichonse powonesha kuti oŵakonda Ambuye ŵake. Yesu euja Petulo kuti: “Lyesha tuŵana twangu twa mbelele.” (Yoh. 21:15-17) Ndipo kwa moyo wake wonse, Petulo enzesamalila mwachikondi mbelele za ambuye ŵake posimikijila kuti enzekonda Yesu.

¹¹ Akulu, kansi mu nyengo ya Chikumbukilo mungawoneshe tyani kuti muwona kufunika kwa mawu a Yesu ŵechiuja Petulo? Mungawoneshe kuti mukonda ngako Yehova na Yesu, mwa kupatula nthawe yolimbikisa abale na alongo komasoti kuchita vinyinji poyavya ŵanthu efoka kuti ajokele kwa Yehova. (Eze. 34:11, 12) Mungayejesoti kulimbikisa ophunzila Baibolo komasoti ŵanthu ayakine achidwi amene apezeka pa Chikumbukilo. Tufuna kuŵalondela luweme chifukwa tuyembekezela kuti nawo azankhalesoti ophunzila a Yesu.

12. Ndaŵa yanji kuganizila mawu ŵechilaŵila Yesu usiku wakuti apaiwe m’mawa mwake kutilimbikisa? (Yohane 16:32, 33)

¹² Usiku wakuti apaiwe m’mawa mwake, Yesu euja ophunzila ŵake kuti: “M’chalo umu mukumane na mavuto, koma tang’ani ntima. Newo nachigonjesa ichi chalo.” (Ŵelengani Yohane 16:32, 33.) Kansi n’chinji chiyavya Yesu kuti awoneshe kutang’a ntima adani ŵake pechimuukila, nopitilija kunkhala wokhulupilika mpaka kufwa? Yove enzedalila Yehova.  Poziŵa kuti ophunzila ŵake azakumane na mayeselo monga ni amene aŵa, Yesu esenga Yehova kuti akoŵalolela. (Yoh. 17:11) Ndaŵa yanji vamene ivi vutichitisha kunkhala otang’a ntima? Ndaŵa yakuti Yehova ni wamphamvu kupambana mdani aliyense. (1 Yoh. 4:4) Yehova owona chilichonse. Nise osimikijila kuti keno tudalila Yehova, yove angatiyavye kuti osati tinkhale na wowa nonkhala otang’a ntima.

13. Kansi Yosefe wa ku Arimateya ewonesha tyani kutang’a ntima?

¹³ Ganizilani chisanzo cha Yosefe wa ku Arimateya. Yove enzelemekezewa ngako na ŵanthu a Chiyuda. Yove enze mmozi mwa oweluza a Khoti Ikulu ya Ayuda yuitiwa kuti Sanihedirini. Koma olo n’tetyo, pa nthawe ya utumiki wa Yesu pano pachalo, Yosefe enze wosatang’a ntima. Yohane enena kuti yove enze “wophunzila wa Yesu koma mosaliwoneshela chifukwa enzeyopa Ayuda.” (Yoh. 19:38) Olo kuti Yosefe enzechita chidwi ngako na uthenga wa Ufumu, enzelifisa kuli ŵanthu ayakine kuti okhulupilila Yesu. Payakine enzeyopa kuti ŵanthu angaleke kumulemekeza akaziŵa kuti yove ni wophunzila wa Yesu. Koma Baibolo yutiuja kuti Yesu pechimwalila, Yosefe “eluta kwa Pilato motang’a ntima kuyasenga ntembo wa Yesu.” (Mk. 15:42, 43) Yosefe aliyeyejesoti kulifisa kuti ni wophunzila wa Yesu.

14. Kansi mufunika kuchita chinji keno muyopa ŵanthu?

¹⁴ Kansi mwewo muchita wowa na ŵanthu molingana na Yosefe? Mukankhala ku sikulu olo kuntchito, kansi muchita nsoni kuuja ayakine kuti nimwe mmozi wa Mboni za Yehova? Kansi mwewo muwaya-waya kuyamba kulalikila olo kubatiziwa chifukwa chodela nkhaŵa vangaganize ayakine vokhuza mwewo? Osalola kuti maganizo amene aŵa akukangisheni kuchita vinthu vamuziŵa kuti n’viweme. Mukopemphela kwa Yehova mofumila pansi pa ntima. Mukomusenga kuti akuyavyeni kunkhala wotang’a ntima kuti muchite chifunilo chake. Mukawona mwakuyankhila mapemphelo ŵanu Yehova, muzankhale wamphamvu komasoti wotang’a ntima ngako.—Yes. 41:10, 13.

15. Yesu pechiwonekela kuli ophunzila ŵake, kansi chisangalalo chawo chiŵachitisha kuchita chinji? (Luka 24:52, 53)

¹⁵ Yesu pechimwalila, ophunzila ŵake enkhala na chisoni ngako. Yejani kuiganizila nkhani yamene iyi m’maganizo mwanu. Ove sikuti enze eluza wokondewa wawo tyala, koma enzeganiza kuti aluzasoti chiyembekezo. (Lk. 24:17-21) Koma olo n’tetyo, Yesu pechiwonekela kuli ove eŵayavya kumvwisha udindo wenze nawo pokwanilisha ulosi wa m’Baibolo. Yove eŵapasasoti ntchito yofunika ngako kuti aikate. (Lk.  24:26, 27, 45-48) Papita masiku 40 pavuli pakuti Yesu waluta kululu, ophunzila ŵake aliyenkhalesoti na chisoni, koma esangalala ngako. Ove esangalala ngako chifukwa enzeziŵa kuti Yesu ali moyo, komasoti kuti azaŵayavye kukata ntchito yechiŵapasa. Chisangalalo chawo chiŵachitisha kuti atamande Yehova mosalekeja.—Ŵelengani Luka 24:52, 53; Mac. 5:42.

16. Kansi tingaŵakonkheje tyani ophunzila a Yesu?

¹⁶ Kansi tingaŵakonkheje tyani ophunzila a Yesu? Sewo tingafwane chisangalalo polambila Yehova osati tyala mu nyengo ya Chikumbukilo, koma kwa chaka chonse. Vamene ivi vufuna kuti tikoika Ufumu wa Mulungu pasogolo pa moyo wasu. Mwachisanzo, anyinji achinja vinthu pa moyo wawo kuti akolalikila, akopezeka pamisonkhano, komasoti akonkhala na kulambila kwa pabanja nthawe zonse. Ayakine mpaka asankha kusankhala na vinthu viyakine vakuthupi vamene ayakine oviwona kunkhala vofunika ngako, kuti akokatishiliwa ntchito ngako mumpingo olo kufulukila kudela iyakine kwamene kuli abale na alongo atontho. Olo kuti tufunika kupitilija kutumikila Yehova mosalekeja, yove walonjeza kuti azatidalise ngako keno tuika vinthu vokhuza Ufumu pa malo oyamba pa moyo wasu.—Miy. 10:22; Mt. 6:32, 33.

17. Kansi nimwe osimikija ntima kuchita chinji mu nyengo ya Chikumbukilo? (Onani chithunzi)

¹⁷ Tuyembekezela mwachidwi nsiku ya Chikumbukilo chamene chikuti chizachitike Pa Chiŵili, pa 4 April. Koma olo n’tetyo, osayembekezela nthawe yamene iyo kuti muyambe kuganizila za moyo na imfwa ya Yesu komasoti chikondi chechitiwonesha yove na Yehova. Mukoganizila vamene ivi kanyinji-kanyinji Chikumbukilo chikaliyechitika komasoti pavuli pake. Mwachisanzo, mukopatula nthawe yoŵelenga noganizila pa vochitika vufotokozewa pa tchati yakuti “Wiki Yomaliza ya Moyo wa Yesu Padziko Lapansi,” mu Kabuku Kothandiza Kuphunzira Mawu a Mulungu, mutu 16. Pamuŵelenga vokhuza moyo wa Yesu, mukofufuza Malemba m’Baibolo amene angakuyavyeni kuti mukowonesha kutembeja kwanu, chikondi chanu, kutang’a ntima komasoti chisangalalo. Pavuli pake, yejani kuganizila njila zamungawoneshele kutembeja kwanu mofumila pansi pa ntima. Mungankhale osimikijila kuti Yesu azatembeje kuyeja-yeja kwanu pomukumbukila pa nyengo yamene iyi ya Chikumbukilo.—Chiv. 2:19.