1-2. (a) Nitubaasa kwehurira tuta twateekateeka aha mbeera ezi Yesu yaarabiremu n’obuheereza bwe? (b) Nituza kushwijuma ki omu kicweka eki?

 TWAFEERWA omukundwa waitu nitumugirira orushusho rwingi munonga! Omu kubanza, nitushaasha munonga twateekateeka aha biro ebyahereerukireyo atakafiire, na munonga yaaba yaafiire omu busaasi. Kwonka bwanyima, nitubaasa kutandika kugira okushemererwa twaijuka eki yaatwegyeise, eki yaakozire nari eki yaatugambiire kutugumya nari kutureetera kumwenya.

² Nikyo kimwe, nitwehurira kubi twashoma aha ku Yesu yaabonaboine kandi akafa. Omu bwire bw’Ekiijutsyo, nitugira obwire bw’okuteekateeka aha bukuru bw’ekitambo kye. (1 Kor. 11:24, 25) Kwonka, nitushemererwa ku turikuteekateeka ahari byona ebi Yesu yaagambire n’ebi yaakozire obu yaabaire ari omu nsi. Kandi nikitugumya twamanya eki arikukora hati n’eki arikuraganisa kutukorera omu biro by’omumaisho. Okuteekateeka ahari ebi na rukundo ei atwiniire nikibaasa kutuhiga kworeka okusiima kwaitu omu miringo erikureebwa butunu, nk’oku turi kuza kureeba omu kicweka eki.

3. Ni nshonga ki ezirikutureetera kusiima ekitambo?

³ Okuteekateeka aha mbeera za Yesu n’okufa kwe nikitureetera kwenda kumusiima. Yesu omu buheereza bwe omu nsi, akeegyesa abantu aha migisha ei Obukama bwa Ruhanga buraareete.  Amazima agu yaayegyeise aha Bukama nitugatwara nk’ag’omuhendo munonga. Nitusiima ekitambo ahakuba nikitubaasisa kugira omukago guhami na Yehova hamwe na Yesu. Abarikwikiririza omuri Yesu baine amatsiko g’okutuuraho ebiro byona kandi bakagaruka kureeba abakundwa baabo abaafiire. (Yoh. 5:28, 29; Rom. 6:23) Tihaine eki tukozire kubaasa kuheebwa emigisha egi, kandi titurikubaasa kushumbuusha Ruhanga na Kristo ahabw’eki batukoreire. (Rom. 5:8, 20, 21) Kwonka nitubaasa kubooreka okusiima kwaitu. Tuta shi?

4. Mariamu Magadaleene akooreka ata ngu naasiima eki Yesu yaamukoreire? (Reeba ekishushani.)

⁴ Teekateeka aha byahikire aha mukazi Omuyudaaya orikwetwa Mariamu Magadaleene. Akabonabona munonga ahabw’okuteganisibwa daimoni mushanju. Aine kuba yaayehuriire ngu tihaine orikubaasa kumuhwera. N’ahabw’ekyo teekateeka aha kushemererwa oku yaagizire Yesu ku yaamubingireho baadaimoni abo! Ekyo kikamuhiga kumukuratira n’okukoresa obwire bwe, amaani ge, n’ebintu bye kumushagika omu buheereza. (Luk. 8:1-3) N’obu Mariamu yaabaire naasiima munonga eki Yesu yaamukoreire, naabaasa kuba yaabaire atarikwetegyereza ekiconco erikukirayo eki Yesu araahe abantu. Akaba naija kwehayo kufeera abantu, kugira ngu “omuntu weena orikumwikiriza” atungye amagara agatahwaho. (Yoh. 3:16) Kwonka nabwo, Mariamu akooreka okusiima kwe, arikuhamira ahari Yesu. Obu Yesu yaabaire ahanikirwe aha muti, Mariamu akaba amwemereire haihi kumushagika n’okuhuumuriza abandi. (Yoh. 19:25) Yesu ku yaafiire, Mariamu n’abandi bakazi babiri bakareeta eby’emigaju kutebeekanisa okuziikwa kwe. (Mak. 16:1, 2) Yehova akashumbuusha Mariamu ahabw’okuhamira ahari Yesu. Akatunga omugisha gw’omutaano ogw’okureeba Yesu kandi akagamba nawe bwanyima y’okuzooka kwe, ogu baingi aha beegi ba Yesu bataratungire.—Yoh. 20:11-18.

5. Nitubaasa kworeka tuta ngu nitusiima Yehova na Yesu ahabwa byona ebi batukoreire?

 ⁵ Naitwe nitubaasa kworeka okusiima kwaitu ahabwa byona ebi Yehova na Yesu batukoreire turikukoresa obwire bwaitu, amaani n’esente kushagika emirimo y’Obukama. Nk’eky’okureeberaho, nitubaasa kwehayo kuhwera omu kwombeka n’okuhunduuza ebyombeko ebirikukoresibwa omu kuramya okushemeire.

6. Ahabw’enki turikubaasa kugira ngu ekitambo kikaheebwayo ahabwa buri muntu?

⁶ Twateekateeka ahari rukundo mpango ei Yehova na Yesu batwiniire, nikituhiga kubakunda. (1 Yoh. 4:10, 19) Nitwongyera kubakunda twayetegyereza ngu Yesu akafa ahabwaitu. Entumwa Paulo akeetegyereza eki kandi akooreka kusiima kwe omu baruha ei yaahandiikiire Abagalatia, arikugira ati: ‘Omwana wa Ruhanga . . . akankunda yaayehayo ahabwangye.’ (Gal. 2:20) Yehova arikwihirira aha kitambo akweyiriize haihi kugira ngu obaase kuba munywani we. (Yoh. 6:44) Tikirikukushemeza kumanya ngu Yehova naakureebamu ebirungi kandi akeefeerereza ekintu ky’omuhendo kugira ngu obe munywani we? Ekyo tikirikukureetera kwongyera kukunda Yehova na Yesu? Ni kikuru kwebuuza tuti: ‘Rukundo egyo neija kutuhiga kukora ki?’

7. Nk’oku kirikworekwa omu kishushani, twena nitubaasa kworeka tuta ngu nitukunda Yehova na Yesu? (2 Abakorinso 5:14, 15; 6:1, 2)

⁷ Rukundo ei twiniire Ruhanga na Kristo neetuhiga kugirira abandi rukundo. (Shoma 2 Abakorinso 5:14, 15; 6:1, 2.) Nitworeka rukundo egyo turikwejumba omu murimo gw’okubuurira n’obweziriki. Nitubuurira buri omwe ou twabona. Titurikushoroora omuntu weena ahabw’erangi ye, oruganda rwe, entaatsya ye nari ahabw’obwegyese bwe. Twakora tutyo, nituba nituhikiiriza ekigyendererwa  kya Yehova, orikwenda “ngu abantu boona bajunwe, [kandi] bamanyire kimwe amazima.”—1 Tim. 2:4.

8. Nitubaasa kworeka tuta ngu nitukunda ab’eishe-emwe na banyaanyazi-itwe?

⁸ Nitworeka ngu nitukunda Ruhanga na Kristo turikugirira ab’eishe-emwe na banyaanyazi-itwe rukundo. (1 Yoh. 4:21) Ekyo nitukikora turikubafaho kandi turikubashagika baaba baine oburemeezi. Nitubahuumuriza baafeerwa omukundwa waabo, nitubataayaayira baarwara, kandi nituteeraho kubagumya baaba baine amaganya. (2 Kor. 1:3-7; 1 Tes. 5:11, 14) Butoosha nitubashabira, turikwijuka ngu “okushaba kw’ohikiriire kugira amaani maingi omu kukora kwakwo.”—Yak. 5:16.

9. Ni muringo ki ogundi ogu turikworeka ngu nitukunda ab’eishe-emwe na banyaanyazi-itwe?

⁹ Nitubaasa n’okworeka ngu nitukunda ab’eishe-emwe na banyaanyazi-itwe turikuteeraho munonga kuguma twine obusingye nabo. Nituteeraho kutooreza Yehova turikusaasira abandi. Yehova ku araabe yaabaasize kuhayo Omwana we kufeera ebibi byaitu, mbwenu shi naitwe titushemereire kusaasira ab’eishe-emwe na banyaanyazi-itwe batushagiza? Titurikwenda kutwaza nk’omuhuuku mubi orikugambwaho omu nfumu ya Yesu. N’obu mukama we araabe yaamusaasire eibanja rye, kwonka omuhuuku ogwo akanga kusaasira mugyenzi we eibanja rikye. (Mat. 18:23-35) Waaba oine obutaikirizana n’omuntu omu kibiina, noobaasa kubanza kugarukana nawe otakagiire aha Kiijutsyo? (Mat. 5:23, 24) Waakikora, nikyoreka rukundo mpango ei oiniire Yehova na Yesu.

10-11. Abareeberezi nimubaasa kworeka muta ngu nimukunda Yehova na Yesu? (1 Petero 5:1, 2)

¹⁰ Abareeberezi nibabaasa kworeka bata ngu nibakunda Yehova na Yesu? Omuringo mukuru n’okufayo aha byetengo by’entaama za Yesu. (Shoma 1 Petero 5:1, 2.) Ekyo Yesu akakyoreka gye omu bigambo ebi yaagambiire Petero. Bwanyima ya Petero kwehakana Yesu emirundi eshatu, naabaasa kuba yaabaire naayendera kimwe kworeka ngu naamukunda. N’ahabw’ekyo Yesu ku yaazookire, akabuuza Petero ati: ‘Simooni mwene Yohaana, noonkunda?’ Hatariho kubangaanisa Petero aine kuba yaakozire buri kimwe kworeka ngu naakunda Mukama we. Yesu akamugira ati: “Riisa abaana b’entaama zangye.” (Yoh. 21:15-17) Kandi omu buheereza bwa Petero bwona, akareeberera entaama za Mukama, ekirikworeka ngu akaba naakunda Yesu.

¹¹ Abareeberezi nimubaasa kworeka muta omu bwire bw’Ekiijutsyo, ngu ebi Yesu yaagambiire Petero ni bikuru ahariimwe? Nimubaasa kworeka rukundo ei mwiniire Yehova na Yesu murikugumya ab’eishe-emwe butoosha kandi mukateeraho kuhwera abatakibuurira kugarukira Yehova. (Ezk. 34:11, 12) Kandi nimubaasa kufayo aha abeegi ba Baibuli n’abasya baija aha Kiijutsyo, murikukora kyona eki murikubaasa kubareetera kuhurira baikaikaine.

12. Ahabw’enki nituba emanzi twateekateeka aha bi Yesu yaagambire aha kiro eki baamureebeizeho? (Yohaana 16:32, 33)

¹² Aha kiro eki Yesu baamureebeizeho, akagambira abeegi be ati: “Omu nsi mwine obusaasi, kwonka muhuumure, nyowe nsingwire ensi.” (Shoma Yohaana 16:32, 33.) Niki ekyahweraire Yesu kuba emanzi omu maisho g’abazigu be n’okuguma ari omwesigwa kuhika aha kufa? Akeesiga Yehova. Ku yaamanyire ngu abakuratsi be nibaija kuhikwaho oburemeezi nk’obwe, akashaba Yehova kubarinda.  (Yoh. 17:11) Ahabw’enki eki nikituhwera kuba emanzi? Ahakuba Yehova naakiza abazigu baitu amaani. (1 Yoh. 4:4) Naareeba buri kimwe. Nituhamiza kimwe ngu twayesiga Yehova, titurikwija kutiina kureka nitwija kuba emanzi.

13. Yosefu wa Arimasaaya akooreka ata obumanzi?

¹³ Teekateeka aha byahikire ahari Yosefu owa Arimasaaya. Abayudaaya bakaba nibamuha ekitiinisa. Akaba ari omwe aha b’Eishengyero, omu eicwero ry’emanja erikuru ery’Abayudaaya. Kwonka, obu Yesu yaabaire akiri omu nsi, Yosefu akaba atari emanzi. Yohaana akagira ngu akaba ari “omwegi wa Yesu, kwonka omu mubonano ahabw’okutiina Abayudaaya.” (Yoh. 19:38) N’obu Yosefu araabe yaabaire naasiima obutumwa bw’Obukama, akaba naatiina kugambira abandi ngu naikiririza omuri Yesu. Hatariho kubangaanisa akaba naatiina ngu naija kufeerwa omwanya gwe ogw’ekitiinisa. Kyona ekyamureeteire kutwaza atyo, Baibuli neeyoreka ngu Yesu ku yaaherize kufa, Yosefu ‘akatiinuuka, yaataaha owa Pilaato, yaashaba omutumbi gwa Yesu.’ (Mak. 15:42, 43) Yosefu akaba atakibaasa kushagika Yesu bwesherekye.

14. Oine kukora ki waaba nootiina abantu?

¹⁴ Naiwe obumwe nootiina abantu nka Yosefu? Aha ishomero, nari aha murimo, obumwe nooshwara kwemanyisa nk’Omujurizi wa Yehova? Nooyeziringa kuba omubuurizi nari kubatizibwa ahabw’okutiina ebi abandi barikubaasa kukuteekateekaho? Ekyo kitakakuremesa kukora eki orikumanya ngu kihikire. Yeshengyereze Yehova omu kushaba. Mushabe kukuhwera kuba emanzi kubaasa kukora ebi arikukunda. Waareeba oku Yehova arikugarukamu okushaba kwawe, noija kweyongyera kuhama n’okuba emanzi.—Isa. 41:10, 13.

15. Okushemererwa oku abeegi baagizire Yesu ku yaabeeyorekire, kukabahiga kukora ki? (Luka 24:52, 53)

¹⁵ Abeegi bakagira obusaasi bwingi Yesu ku yaafiire. Teeraho kweta omu bigyere byabo. Bakaba bafeereirwe munywani waabo omukundwa kandi beehwaire amatsiko. (Luk. 24:17-21) Kwonka, Yesu ku yaabeeyorekire akateeraho kubahwera kwetegyereza oku yaahikiriize obunabi bwa Baibuli. Kandi akabaha omurimo mukuru gw’okukora. (Luk. 24:26, 27, 45-48) Yesu arikuza kugaruka omu iguru bwanyima y’ebiro 40 aherize kuzooka, abeegi be bakaba bashemereirwe batakiine busaasi. Ku baamanyire ngu Mukama waabo ahuriire kandi ngu ayeteekateekire kubahwera kuhikiiriza  obujunaanizibwa bwabo obusya bakagira okushemererwa. Kwabahiga kuhimbisa Yehova obutaruha.—Shoma Luka 24:52, 53; Byak. 5:42.

16. Nitubaasa kutooreza tuta abeegi ba Yesu?

¹⁶ Nitubaasa kutooreza tuta abeegi ba Yesu? Nitubaasa kutunga okushemererwa twaramya Yehova butari omu bwire bw’Ekiijutsyo bwonka beitu omwaka gwona. Eki nikyetengyesa kuta Obukama bwa Ruhanga omu mwanya gw’okubanza. Nk’eky’okureeberaho, baingi babaasize kuhindura omu ntebeekanisa yaabo y’okukora kugira ngu beejumbe omu buheereza, baze omu nteerane kandi bagire n’okuramya kw’eka butoosha. Nangwa bamwe bacwiremu kutagura ebintu ebi abandi barikureeba ngu nibyetengyesa kugira ngu boongyere kuhwera omu kibiina nari baze kuheereza ahu ababuurizi b’Obukama barikwendwa munonga. N’obu turaabe twine kugumisiriza kubaasa kugumizamu nituheereza Yehova, naaraganisa kutushumbuusha twayebembeza eby’Obukama.—Enf. 10:22; Mat. 6:32, 33.

17. Omariirire kukora ki omu bwire bw’Ekiijutsyo? (Reeba ekishushani.)

¹⁷ Twine ekihika ky’okuba aha Kiijutsyo Orwakabiri, Apuri 4. Kwonka, otakaategyereza kuhitsya aha eizooba eryo kuteekateeka aha bi Yesu yaarabiremu, okufa kwe, na rukundo ei we na Yehova batworekire. Teekateeka aha bintu ebyo obwire bwona obw’Ekiijutsyo. Nk’eky’okureeberaho, taho obwire bw’okushoma kandi oteekateekye aha byabaireho omu chati “The Final Week of Jesus’ Life on Earth,” omu Appendix B12 eya New World Translation. Waaba noobishoma, yetegyereze enshonga eziraakuhwere kwongyera kusiima, kugira rukundo, obumanzi n’okushemererwa. Kandi teeraho kuteekateeka oku orikubaasa kworeka ngu noosiima oyihire aha mutima. Noobaasa kugira obwesigye ngu Yesu naija kusiima byona ebi orikukora kumwijuka omu bwire bw’Ekiijutsyo.—Kush. 2:19.