NKHANI YAKUPFUNZA 5
“Lufoyi la Kristu Limbaticitisa Kumubvera”
“Lufoyi la Kristu limbaticitisa kumubvera . . . Iye adafera wanthu wentse, kuti wale omwe ana moyo, aleke kukhala na moyo kuti ambacite bzakufuna bzawo bzokha basi.”—2 AKOLINTO 5:14, 15.
NYIMBO 13 Kristu ni Ciratizo Cathu
BZOMWE TIN’PFUNZA a
1-2. (a) Kodi timbabva tani tikakumbukira bza moyo na utumiki bwa Jezu? (b) Kodi tin’pfunza ciyani mu nkhani ino?
TIKAKHALA tafedwa bzimbatiwawa kwene-kwene! Ndipo kuwawako kumbathumizirika tikambakumbukira munthuyo na kubonera komwe adacita pomwe akhadasala pang’ono kufa. Tsono pakapita nthawe, timbayebwa. Ndipo tikakumbukira cinthu comwe munthu omwe adafayo adalewa kuti atilimbikise ayai kuti atisekese, timbadzayamba pomwe kukhala na mpfatso.
2 Mpsibodzi-bodzimbo na infa ya Jezu. Tikambawerenga bza kubonera kwa Jezu na kufa kwace, timbabva ntsisi kwene-kwene. Maka-maka pa nthawe ya Cikumbuso, timbakhala na nthawe yakukumbukira kufunika kwa ntsembe ya cakulombolera yomwe iye adapereka. (1 Akolinto 11:24, 25) Tsono, ifepano timbakomedwa kwene-kwene tikakumbukira bzinthu bzentse bzomwe Jezu adalewa na kucita pomwe akhali pantsi pano. Ndipo timbakomedwambo tikakumbukira bzomwe iye akucita na bzomwe an’dzaticitira kutsogolo. Kukumbukira bzimwebzi pabodzi na lufoyi lomwe adalilatiza kwa ifepano, kumbaticitisa kuti timbamutende kwene-kwene. Ndipo mu nkhani ino, tin’pfunza bzomwe tingacite kuti tilatize kutendako.
KUTENDA KUMBATICITISA KUTEWERA JEZU
3. Thangwe ranyi tin’funika kumbatenda ntsembe ya cakulombolera?
3 Timbakomedwa kwene-kwene tikakumbukira moyo wa Jezu na infa yace. Pomwe Jezu akhali pantsi pano, iye adapfunzisa wanthu bzomwe Umambo bwa Mulungu bun’dzacita. Ifepano timbakomedwa kwene-kwene kudziwa ntsembe ya cakulombolera na phindu lace. Timbatenda ntsembe ya cakulombolera thangwe idacitisa kuti tikhale axamwali wa Yahova na Jezu. Ndipo wanthu omwe ambakhulupira ntsembeyi ana cidikhiro cakudzakhala na moyo wakusaya kumala na kudzawona wanthu omwe adafa akulamusidwa. (Juwau 5:28, 29; Aroma 6:23) Palibe comwe ifepano tidacita kuti tithemere kutambira mabaibai yentseneya; ndipo tingakwanise lini kupagali Mulungu na Jezu pa bzomwe adaticitirabzi. (Aroma 5:8, 20, 21) Comwe tingacite ni kutenda basi. Tsono tingatende tani?
Kodi nkhani ya Mariya Madalena ingakuthandizeni tani kutenda bzomwe Jezu adakucitirani? (Onani ndime 4-5)
4. Kodi Mariya Madalena adalatiza tani kuti akhatenda bzomwe Jezu adamucitira? (Onani cithunzi-thunzi.)
4 Kumbukirani bzomwe bzidacitikira mkazi m’bodzi wacidjuda wakucemeredwa Mariya Madalena. Iye akhabonera kwene-kwene na bziwanda bzakukwana 7, ndipo akhadasairatu muti wakuphata. Tsono Jezu adamucosa bziwandabzo. Mkaziyu adakomedwa kwene-kwene na bzomwe Jezu adamucitirabzi ndipo adakhaliratu mteweri wa Jezu. Iye adayamba kuphatisa basa nthawe yace na bzinthu bzomwe akhanabzo pakuthandiza Jezu mu upalizi. (Luka 8:1-3) Mariya adatenda kwene-kwene bzomwe Jezu adamucitira, tsono iye akhadziwa lini kuti Jezu angadadzamucitira pomwe bzinthu bzizinji kutsogolo. Jezu angadapereka moyo wace “kuti ali-wentse omwe [animukhulupira]” adzatambire moyo wakusaya kumala. (Juwau 3:16) Mariya adalatiza kutenda Jezu mwakupitiriza kukhala wakukhulupirika kwa iye. Pomwe Jezu akhabva kuwawa pa muti wakuzunzidwira, Mariya akhali pafupipo kuti atsangalaze Jezu na wanthu winango omwe akhali pamwepombo. (Juwau 19:25) Pomwe Jezu adafa, Mariya pabodzi na akazi anango awiri adayenda na bzakununtcirisa ku thenje. (Marko 16:1, 2) Yahova adabaira Mariya thangwe ra kukhulupirika kwace. Iye adakhala na mwayi wakuwona Jezu pomwe adalamusidwa na kulalewa naye. Ni anyakupfunza wakucepa okha omwe adakhala na mwayi umweyu. — Juwau 20:11-18.
5. Kodi tingacite ciyani kuti tilatize kuti tikutenda bzinthu bzomwe Yahova na Jezu adaticitira?
5 Ifepano tingatendembo Yahova na Jezu thangwe ra bzinthu bzomwe iwo adaticitira. Tingaphatise basa nthawe yathu, mphanvu zathu na kobiri zathu kuti tithandizire mabasa ya Umambo. Tingabzipereke kuti tithandizire basa lakumanga na kukonza nyumba za gulu lathu zomwe zadzongeka.
KUFUNA YAHOVA NA JEZU KUMBATICITISA KUFUNAMBO ANZATHU
6. Thangwe ranyi tingalewe kuti ntsembe ya cakulombolera idaperekedwa kwa m’bodzi na m’bodzi wa ifepano?
6 Kukumbukira kuti Yahova na Jezu ambatifuna kwene-kwene kumbacitisambo kuti ifepano tiwafune. (1 Juwau 4:10, 19) Tikakumbukira kuti Jezu adafera m’bodzi na m’bodzi wa ifepano kuti tidzapulumuke, timbamufuna kwene-kwene. Mpostolo Paulo akhadziwa bzimwebzi, ndipopa adauza Akristau wa ku Galatiya kuti: “Mwana wa Mulungu . . . adandifuna, acibzipereka thangwe ra ine.” (Agalatiya 2:20) Ntsembe ya cakulombolera ya Jezu imbacitisa kuti imwepo mukhale axamwali wa Yahova. (Juwau 6:44) Kodi imwepo mumbakomedwa lini thangwe ra kudziwa kuti Yahova adawona makhalidwe yanu yabwino ndipo adapagali pereso yakuumira kwene-kwene kuti mukhale xamwali wace? Ndipopa mpsabwino kubzibvunza kuti: ‘Kodi lufoyi langu kwa Yahova na Jezu likundicitisa kuti ndicite ciyani?’
Timbauza wanthu wentse mafala yabwino ya Umambo thangwe rakuti timbafuna Mulungu na Jezu (Onani ndime 7)
7. Ninga momwe tikuwonera pa cithunzi-thunzipa, kodi tingalatize tani kuti timbafuna Yahova na Jezu? (2 Akolinto 5:14, 15; 6:1, 2)
7 Tikambafuna Mulungu na Jezu tin’dzafunambo wanthu. (Werengani 2 Akolinto 5:14, 15; 6:1, 2.) Cinthu cibodzi comwe tingacite kuti tilatize kuti timbafuna wanthu ni kupalizira na nyongo. Tin’funika kumbapalizira wanthu wentse omwe tingagumane nawo, napo wale omwe ambalalewa cirewedwe cinango na omwe adacokera dziko linango. Ndipo timbapalizirambo wanthu wentse, napo penu adapfunza ayai alibe, adadala ayai adasauka. Tikacita bzimwebzi, timbakhala tikuteweza mafala yakuti Yahova an’funa kuti “wanthu wa mtundu uli-wentse apulumuke acifika pakukhala na cidziwiso caico cacadidi.” — 1 Timotio 2:4.
8. N’ciyani comwe tingacite kuti tilatize kuti timbafuna abale na mpfumakazi zathu?
8 Cinthu cinango comwe timbacita kuti tilatize kuti timbafuna Mulungu na Jezu ni kumbafunambo abale na mpfumakazi zathu. (1 Juwau 4:21) Tin’funika kumbacita nawo thupo na kuwathandiza akakhala akugumana na mabvuto. Timbawatsangalaza akakhala afedwa, timbayenda kukawawona akakhala akuduwala ndipo timbawalimbikisa akakhala agoboka m’mabondo. (2 Akolinto 1:3-7; 1 Atesalonika 5:11, 14) Timbapitiriza kuwapempherera ticimbakumbukira kuti “mpembo wakudandaulira wa munthu wakulungama una mphanvu kwene-kwene.” — Tiyago 5:16.
9. N’ciyani cinango comwe tingacite kuti tilatize kuti timbafuna abale na mpfumakazi zathu?
9 Cinthu cinango comwe tingacite kuti tilatize kuti timbafuna abale na mpfumakazi zathu ni kucita nyongo kuti timbakhale nawo bwino. Pa nkhani ya kulekerera, tin’funika kutewezera Yahova. Penu Yahova adabvuma kuti Mwana wace afe kuti ifepano tilekereredwe pikado zathu, ifepano tin’funikambo kulekerera abale wathu akatiphonyera. Tin’funika lini kukhala ninga kapolo omwe Jezu adamulewa ule. Iye adalekereredwa mangawa ya kobiri zizinji kwene-kwene. Tsono alibe kulekererambo mwanzace omwe akhamufiyali kobiri yakucepa kwene-kwene. (Mateu 18:23-35) Tikapitana na m’bale ayai mpfumakazi yathu, bzingakhale bwino kucezerana naye nkhaniyo ticibverana, pomwe ntsiku ya Cikumbuso ikanati kufika. (Mateu 5:23, 24) Tikacita bzimwebzi, tin’dzalatiza kuti timbafuna kwene-kwene Yahova na Jezu.
10-11. Kodi akulu angalatize tani kuti ambafuna Yahova na Jezu? (1 Pedru 5:1, 2)
10 Kodi n’ciyanimbo comwe akulu angacite kuti alatize kuti ambafuna Yahova na Jezu? Cinthu cakufunika kwene-kwene comwe angacite ni kudyesa mabira ya Jezu. (Werengani 1 Pedru 5:1, 2.) Jezu adabvekesa bwino nfundo imweyi pomwe akhaceza na Pedru. Pedru akhadalamba Jezu katatu-kentse, ndipopa iye adapasidwa mpata wakuti alatize kuti ambamufuna Jezuyo. Pomwe Jezu adalamusidwa, iye adabvunza Pedru kuti: “Simau mwana wa Juwau, kodi umbandifuna?” Kuti Pedru alatize kuti ambafuna Mbuya wace, iye akhafunikira kucita cinthu cinango. Jezu adamuuza kuti: “Dyesa wana wa mabira yangu.” (Juwau 21:15-17) Ndipo Pedru adacitadi bzimwebzi moyo wace wentse. Iye akhakonkhobza bwino mabira ya Mbuya, acilatiza kuti akhafuna kwene-kwene Jezu.
11 Akulu, kodi mungalatize tani kuti mafala yomwe Jezu adauza Pedru ngakufunika kwa imwepo pa nthawe ya Cikumbuso? Imwepo mungalatize kuti mumbafuna kwene-kwene Yahova mukambalimbikisa abale na mpfumakazi na kuthandizambo omwe adadjedjera mwauzimu kubwerera kwa Yahova. (Zakiyeri 34:11, 12) Mun’funikambo kumbalimbikisa anyakupfunza wa Bibliya na wanthu anovu omwe abwera pa Cikumbuso. Mukacita bzimwebzi, iwo an’dzabzibva kuti atambiridwa na manja mawiri, thangwe tikufuna kuti iwombo akhale anyakupfunza wa Jezu.
KUFUNA JEZU KUMBATICITISA KUKHALA WAKUKHWIMIKA
12. Kodi kukumbukira mafala yomwe Jezu adalewa pa Juwau 16:32, 33 kumbatithandiza tani kukhala wakukhwimika?
12 Usiku bwakuti Jezu angadaphedwa mangwana yace, iye adauza anyakupfunza wace kuti: “M’dzikomu mun’dzagumana na matsautso mazinji, tsono khwimikani! Ine ndalikunda dziko.” (Werengani Juwau 16:32, 33.) Kodi n’ciyani cidathandiza Jezu kukhala wakukhwimika na kupitiriza kukhala wakukhulupirika mpaka kufa? Comwe cidamuthandiza ni kuthemba Yahova. Iye akhadziwa kuti ateweri wace angadagumanambo na mabvuto ninga yomwe iye adagumana nayo, ndipopa adakumbira Yahova kuti awanyang’anire. (Juwau 17:11) Kodi kudziwa bzimwebzi kumbatithandiza tani kukhala wakukhwimika? Kumbatithandiza thangwe timbadziwa kuti Yahova ana mphanvu kuposa anyamadulanthaka wathu. (1 Juwau 4:4) Yahova ambadziwa bzentse. Ndipopa tikudziwa kuti tikamuthemba, iye an’dzatithandiza kukunda mantha ticikhala wakukhwimika.
13. Kodi Zuze wa ku Arimateya adalatiza tani kukhwimika?
13 Kumbukirani bzomwe Zuze wa ku Arimateya adacita. Iye akhalemekezedwa kwene-kwene na Adjuda. Ndipo akhali m’bodzi wa atongi wa nyumba ya mphala ya Adjuda yakucemeredwa Sinedriyo. Pa nthawe yomwe Jezu akhacita utumiki bwace, iye adakhala nyakupfunza wace, koma akhali lini wakukhwimika. Juwau adanemba kuti iye “akhabzilewa lini padeca kuti akhali nyakupfunza wace, thangwe akhagopa Adjuda.” (Juwau 19:38) Zuze akhafuna mafala yabwino ya Umambo, tsono iye akhabziwonesa lini padeca kuti akhakhulupira Jezu. Pinango iye akhagopa kuti akabziwonesera padeca, Adjuda angadasiya kumulemekeza. Tsono Bibliya limbatiuza kuti pomwe Jezu adafa, Zuze “adakhwimika kuyenda kwa Pirato kukakumbira mtembo wa Jezu.” (Marko 15:42, 43) Pa nthawe imweyi, iye adalatiza padeca kuti akhali nyakupfunza wa Jezu.
14. N’ciyani comwe mun’funika kucita mukakhala mukugopa wanthu?
14 Kodi imwepo mudabvambo kale mantha ninga Zuze? Mukakhala muli ku xikola ayai ku basa, kodi mumbabva manyazi kuuza anzanu kuti ndimwe Mboni ya Yahova? Kodi mumbazeza kukhala mpalizi wakusaya kubatizidwa ayai kubatizidwa thangwe ra kucita thupo kuti wanthu winango an’kuwonani tani? Penu bziri tenepo, lekani kubvuma kuti bzimwebzi bzikutaziseni kucita cinthu comwe mukudziwa kuti n’cabwino. Pembani kwa Yahova kuti akuthandizeni. Mukumbireni kuti akuthandizeni kukhala wakukhwimika kuti mucite bzomwe iye ambakomedwa nabzo. Mukacita bzimwebzi, mun’dzawona kuti Yahova akutawira mipembo yanu, ndipo mun’dzakhala wakukhwimika kwene-kwene. — Zaiya 41:10, 13.
MPFATSO UMBATITHANDIZA KUPITIRIZA KUTUMIKIRA YAHOVA
15. Kodi n’ciyani comwe anyakupfunza adacita pomwe Jezu adawonekera kwa iwo? (Luka 24:52, 53)
15 Pomwe Jezu adafa, anyakupfunza wace adabva ntsisi kwene-kwene. Kodi imwepo mungadacita ciyani mungadakhala kuti ndimwe nyakupfunza wace? Jezu, omwe akhali mtsogoleri wawo na xamwali wawo, akhadafa. Ndipo iwo akhakumbuka kuti bzentse bzomwe akhadacita bzire bzamalira pamwepale. (Luka 24:17-21) Tsono, pomwe Jezu adalamusidwa, iye adawathandiza kuwona kuti bzomwe bzikhadacitika bzire bzikhadanembedwa kale m’Bibliya, ndipo iye adawapasa basa lakufunika kuti acite. (Luka 24:26, 27, 45-48) Pomwe padapita ntsiku zakukwana 40, Jezu adabwerera kudzulu. Pa nthawe imweyi, anyakupfunza wace akhabva lini pomwe ntsisi, koma akhapfatsa kwene-kwene. Iwo akhapfatsa thangwe akhadziwa kuti Mbuya wawo akhana moyo ndipo angadawathandiza kucita basa lomwe adawapasa. Ndipopa iwo adatumbiza Yahova. — Werengani Luka 24:52, 53; Mabasa 5:42.
16. Kodi tingatewezere tani anyakupfunza wa Jezu?
16 Kodi tingatewezere tani anyakupfunza wa Jezu? Ifepano tin’dzakhala na mpfatso caiwo tikapitiriza kunamata Yahova pa moyo wathu wentse, sikuti pa nthawe ya Cikumbuso basi. Kuti tikwanise kucita bzimwebzi, tin’funika kuikha Umambo bwa Mulungu pa mbuto yakutoma pa moyo wathu. Abale wathu azinji akucita kale bzimwebzi. Anango ambaphata basa nthawe yakucepa kuti ambakhale na nthawe yakuyenda mu utumiki, kuyenda ku mitsonkhano na kucita kunamata kwa pa banja. Ndipo anango adacita kufuna kuleka kukhala na bzinthu bzizinji bzomwe wanthu ambabziwona kuti mpsakufunika kwene-kwene kuti acite mabasa mazinji ya m’gwere ayai kuti akatumikire komwe kukufunika apalizi azinji. Ifepano timbafunika kupirira kuti titumikire Yahova. Koma iye adalewa kuti an’dzatibaira tikaikha Umambo bwa Mulungu pa mbuto yakutoma. — Mimwani 10:22; Mateu 6:32, 33.
Pa nthawe ya Cikumbuso, mbakhalani na nthawe yakukumbukira bzomwe Yahova na Jezu adakucitirani (Onani ndime 17)
17. Kodi n’ciyani comwe mukufuna kucita pa nthawe ya Cikumbuso? (Onani cithunzi-thunzi.)
17 Tikudikhirira kudzacita Cikumbuso pa cipiri, 4 Abril. Tsono tin’funika lini kucita kudikhirira kuti ntsiku imweyi ifike kuti tidzakumbukire nkhani ya moyo wa Jezu, infa yace na lufoyi lomwe iye na Yahova adatilatiza. Tin’funika kumbakumbukira bzimwebzi pomwe tikudikhirira kuti ntsiku ya Cikumbuso ifike. Ndipo tingapitirize kucita bzimwebzi ntsiku imweyi ikapita. Kuti mukwanise kubvesesa bwino-bwino bzomwe bzidacitika pa nthawe imweyire, werengani makwadru yomwe yali mu nkhani yakuti “Kodi Mun’dzakonzekera Tani Cikumbuso?” mu Kabukhu ka Mitsonkhano ka Moyo na Utumiki ka Abril 2019. Pomwe mukuwerenga bzomwe bzidacitika pa moyo wa Jezu, onani nkhani zomwe zin’dzacitisa kuti mumbamutende, mumbamufune, mukhale wakukhwimika na kukhalambo na mpfatso. Mukamala onani bzomwe mungacite kuti mulatize kutenda kwanu. Dziwani kuti Jezu an’dzakomedwa kwene-kwene na bzentse bzomwe mun’dzacita kuti mumukumbukire pa nthawe ya Cikumbuso. — Apokalipse 2:19.
NYIMBO 17 ‘Ndin’funa’
a Pa nthawe ya Cikumbuso, ifepano timbauzidwa kuti timbakumbukire moyo wa Jezu, infa yace na lufoyi lomwe iye na Baba wace adatilatiza. Kucita bzimwebzi kun’dzaticitisa kuti timbawatende kwene-kwene. Nkhani ino in’fotokoza bzinthu bzinango bzomwe tingacite kuti tilatize kutenda ntsembe ya cakulombolera na lufoyi lomwe Yahova na Jezu adalilatiza kwa ifepano. Ndipo tin’pfunzambo bzomwe tingacite kuti timbafune abale na mpfumakazi zathu, tikhale wakukhwimika na kukhala wakukondwa pa kutumikira Yahova.
