1-2. (a) Ko tingabve tani tikaganizira vose vomwe Yesu adachita pangachita utumiki wake? (b) Ko tipfunzire chani munkhani ino?

 TIKAFEREWA munthu wapamoyo, timusuwa maninge. Pakuyamba vitiwawa maninge tikambaganizira vomwe timbachita naye makamaka peno adashupika maninge akanati kufa. Koma nkuyenda kwa nthawe, tiyamba kubvako bwino tikaganizira vinthu vabwino vadachita, mawu yabwino yadatiuza pakutilimbikisa panango tunthabwala tomwe tudatichitisa kuti tiseke.

² Tikambawerenga momwe Yesu adabonerera mpakana kufa, vitiwawambo maninge. Chikumbuso chikanati chachitika na pomwe chapita, tinkufuna kudzaganizira maninge phindu yomwe tidzagumane ndawa yoferewa na Yesu. (1 Akor. 11:24, 25) Koma olo viri teno, tikhala okondwa tikaganzira vinthu vose vomwe Yesu adayankhula na kuchita ali pano padziko yapasi. Tilimbikisika pomwe tikaganizira vomwe iye ankuchita manjeuno na vomwe adzatichitire kutsogolo. Munkhani ino tiwone kuti kuganizira vinthu vimwevi na chikondi chadatiwonesa kungatithandize kuti timbakhale otembeja.

3. Ndawa chani titembeja maninge pa vomwe Yesu adachita pakutiwombola?

³ Tingakhale otembeja maninge tikambaganizira moyo wa Yesu na impfa yake. Panthawe yose yomwe iye angachita utumiki wake pano padziko yapasi, angafotokozera wanthu madaliso yomwe Ufumu wa Mulungu udzabwerese. Tikondwa  maninge tikaganizira vinthu vose vomwe Ufumu moyu udzabwerese. Tinkutembeja maninge ndawa yakuti tikwanisa kukhala pa ushamwali wabwino na Yahova na Yesu ndawa yakuti tidaferewa. Wanthu omwe akhulupirira Yesu, adzakhale na mwayi wokhala padziko pano na moyo wosapera na kudzatambira anzawo omwe adafa. (Yoh. 5:28, 29; Aro. 6:23) Moyo moyu ni wa fovolo ndipo tidzakwaniselini kubwezera Yahova na Yesu ndawa ya makonzedwe mwaya. (Aro. 5:8, 20, 21) Koma pali vomwe tingachite powonesa kuti tinkutembeja maninge. Ko tingachite chani?

4. Ko Mariya Magadala adaonesa tani kuti angatembeja pa vomwe Yesu adamuchitira? (Onani foto.)

⁴ Ganizirani chitsanzo cha mayi munango wachiyuda dzina yake Mariya Magadala. Iye wenze pabvuto ndawa yakuti viwanda 7 vimbandokhalira kumuboneresa. Venze vosashupa kuti iye ayambe kuganiza kuti moyo wake ukhale tene mpakana kalekale. Manje ganizani mwadabvera padachoserewa viwanda vose vimwevi na Yesu! Ndawa yotembeja, iye adakhaliratu wopfunzira wake ndipo adayamba kuphatisa basa nthawe yake, mphanvu zake na vose vewenze navo pothandizira utumiki. (Luka 8:1-3) Ni shuwadi kuti Mariya angatembeja maninge ndawa ya vomwe Yesu adamuchitira. Koma iye ambadziwalini kuti Yesu wakhala pang’ono kumuchitira vikulu maninge kuposha pamwapa. Viri teno ndawa yakuti patsogolo pake Yesu adapereka moyo wake nkuwombola wanthu wose ‘kuti aliyese yemwe angamukhulupirire’ adzagumane moyo wosapera. (Yoh. 3:16) Koma kukhulupirika kwa Mariya ndiko kudawonesa kuti wenzedi wotembeja. Panthawe yomwe Yesu angabonera pamuti wodzudzikirapo, Mariya adabwera kudzalirira pafupi pakuonesa kuti ambamukonda maninge Yesu ndipo ambafuna kulimbikisa anzake. (Yoh. 19:25) Yesu padafa, Mariya na azikazi anango awiri adatenga mafuta yonunkhira nkuyenda nayo kumanda kuti akadzoleke thupi ya Yesu. (Maliko 16:1, 2) Mariya adadalisiwa maninge ndawa ya kukhulupirika kwake. Iye adakhala na mwayi woonana na  Yesu padamukisiwa nkuyankhula naye ndipo ni wopfunzira ang’onong’ono omwe adakhalako na mwayi moyu.—Yoh. 20:11-18.

5. Ko tingawonese tani kuti tinkutembeja pa vose vomwe Yahova na Yesu adatichitira?

⁵ Isembo tingawonese kuti tinkutembeja pa vomwe Yahova na Yesu adatichitira tikambaphatisa basa nthawe, mphanvu na vinthu vathu pothandizira basa ya Ufumu. Mwakulinganiza, tingathandizire pa basa yokonza Nyumba za Ufumu na kukonza zodzongeka kuti abale wathu ambachitiremo misonkhano.

6. Ndawa chani tingalewe kuti Yesu adafera aliyese payekha?

⁶ Tikambaganizira momwe Yahova na Yesu adatikondera, tikhala na shungu yowawonesambo kuti tiwakonda. (1 Yoh. 4:10, 19) Tiyamba kuwakonda maninge makamaka tikazindikira kuti Yesu adatifera isepano patekha. Paulo angatsimikizambo kuti Yesu adafera iye payekha, ndipo potembeja adanembera Agalatiya kuti: ‘Mwana wa Mulungu . . . adanikonda ndipo adadzipereka yekha ndawa ya inepano.’ (Agal. 2:20) Yahova adakuwombolani pophatisa basa ntsembe ya Yesu ndipo adakutengani kuti mukhale shamwali wake. (Yoh. 6:44) Mbakondwani powona kuti Yahova adawona vabwino mumtima mwanu mpakana kukugulani pantengo wodula kuti mukwanise kukhala naye paushamwali. Vimwevi vikuchitiseni kuyamba kukonda maninge Yahova na Yesu. Tingachite bwino kudzibvunza kuti: ‘Ko nifunika kuchichimizika kuchita chani ndawa yodziwa kuti Yahova na Yesu anikonda?’

7. Ninga mwatinkuwonera pafoto, ko tingawonese tani kuti tikonda Yahova na Yesu? (2 Akorinto 5:14, 15; 6:1, 2)

⁷ Kudziwa kuti Mulungu na Yesu atikonda kutilimbikisa kukondambo anango. (Lewengani 2 Akorinto 5:14, 15; 6:1, 2.) Njira ibodzi  yoonesera kuti tikonda maninge anzathu ni kulalikira mwakhama. Timbalalikire aliyese watagumana naye. Osati timbaweruze wanthu ndawa ya khaindi yawo, dzinza, momwe adakulira, kusauka panango kulemera kwawo. Tikachita teno, ndiye kuti tinkubverana na cholinga cha Yahova chakuti ‘wanthu wakhaindi yose adziwe choonadi molondola kuti adzapulumuke.’—1 Tim. 2:4.

8. Ko tingawonese tani kuti tikonda abale na alongo wathu?

⁸ Tingawonese pomwe kuti tikonda maninge Yahova na Yesu tikambakonda abale na alongo wathu. (1 Yoh. 4:21) Timbayesese kuwaikhira nzeru na kuwathandiza akambagumana na mabvuto. Timbawalimbikise akaferewa, kuwazungira peno ankudwala na kuwalimbikisa akakhala okwinyirira. (2 Akor. 1:3-7; 1 Ates. 5:11, 14) Timbapitirize kuwapempherera uku tili otsimikiza kuti ‘pemphero yogwigwirira ya munthu wolungama ni yamphanvu maninge.’—Yak. 5:16.

9. Ko ni njira inango iponi yomwe tingawonesere kuti tikonda abale na alongo wathu?

⁹ Tingawonese pomwe kuti tikonda abale na alongo wathu tikambayesesa kukhala nawo mwantendere. Timbayesese kutewedzera chitsanzo cha Yahova nkuwakhululukira. Yahova adatumiza Mwana wake kuti adzatifere kuti machimo yathu yakhululukiriwe. Ndipomwapa timbakhalembo okonzeka kukhululukira abale na alongo wathu akatiphonyera. Tifunikalini kukhala ninge nyabasa wa mu fanizo ya Yesu. Abwana wake adamukhululukira chikwerete chikulu chewenze nacho, koma iye adakangira kukhululukira nyabasa mwanzake yemwe adamukwereta kobiri ing’onong’ono. (Mat. 18:23-35) Peno mudayambana na mwanzanu wa mumpingu, ko mungayesese kukambirana ikanati yafika ntsiku ya Chikumbuso? (Mat. 5:23, 24) Mukachita vimwevi, mudzawonese kuti mukonda maninge Yahova na Yesu.

10-11. Ko akulu angawonese tani kuti akonda Yahova na Yesu? (1 Petulo 5:1, 2)

¹⁰ Ko akulu angawonese tani kuti akonda Yahova na Yesu? Njira ibodzi ni kuyesesa kusamalira nkhosa za Yesu. (Lewengani 1 Petulo 5:1, 2.) Yesu adafotokozera Petulo nkhani mwiyi mobveka bwino. Petulo padalamba Yesu katatu, patsogolo pake adakhala na shungu yofuna kumuwonesa Yesu kuti amukonda maninge. Yesu padamukisiwa, ntsiku inango adabvunza Petulo kuti: ‘Simoni mwana wa Yohane, ko unikonda inepano?’ Tinashuwa kuti panthawe mwiyi Petulo adachita vose vangakwanise potsimikizira Yesu kuti amukonda. Ndipomwapa Yesu adamuuza kuti: ‘Dyesa wana wangu wa nkhosa.’ (Yoh. 21:15-17) Ndipo kwa moyo wake wose, Petulo angasamalira mwachikondi nkhosa powonesa kuti amukonda maninge Yesu.

¹¹ Akulu, ko Chikumbuso chikanati chachitika na pomwe chapita mungadzawonese tani kuti munkuyatengera siriyasi mawu yomwe Petulo adauziwa na Yesu? Mungawonese kuti mukonda maninge Yahova na Yesu mukambalimbikira kuchita ubusa na kuyesesa mwakhama kuthandiza ofoka kuti abwerere kwa Yahova. (Ezek. 34:11, 12) Mudzawatambire bwino opfunzira Baibolo na alendo omwe adzabwere ku Chikumbuso kuti adzakhale omasuka.

12. Ko kuganizira mawu yomwe Yesu adayankhula usiku wakuti mangwana yake afe, kungatithandize tani kukhala olimba ntima? (Yohane 16:32, 33)

¹² Usiku wakuti mangwana yake afe, Yesu adauza opfunzira wake kuti: ‘Mudziko umu mugumane na mabvuto, koma limbani ntima! Inepano naigonjesa dziko.’ (Lewengani Yohane 16:32, 33.) Ko nchani  chidathandiza Yesu kukhala wolimba ntima podzudziwa na adani wake na kupitiriza kukhala wokhulupirika mpakana impfa? Chomwe chidamuthandiza ni kuthemba Yahova. Manje pakudziwa kuti opfunzira wake adzagumanembo na mabvuto mwaya, iye adakumbira Yahova kuti ambawanyang’anire. (Yoh. 17:11) Ko kudziwa vimwivi kungatithandize tani kukhala olimba ntima? Kungatithandize ndawa Yahova ni wamphanvu kuposha adani wathu. (1 Yoh. 4:4) Iye akwanisa kuwona chilichose. Ndise otsimikiza kuti tikamuthemba Yahova, iye angatithandize kumalisa mantha yathu nkukhala olimba ntima.

13. Ko Yosefe wa ku Arimateya adawonesa tani kuti wenze wolimba ntima?

¹³ Ganizirani chitsanzo cha Yosefe wa ku Arimateya. Iye wenze wolemekezeka maninge pamaso pa Ayuda. Iye wenze mu khoti ikulu yachiyuda ya Senihedirini. Koma panthawe yomwe Yesu angachita utumiki wake, Yosefe wenzelini wolimba ntima. Yohane adalewa kuti Yosefe ‘wenze wopfunzira wa Yesu koma ambadzibisa ndawa yogopa Ayuda.’ (Yoh. 19:38) Podiya kuti Yosefe ambakomedzewa na ntontholo wa Ufumu, ambafunalini kuti anango adziwe kuti iye akhulupirira Yesu. Vinkuwoneka kuti ambachita mantha ndawa yoganizira kuti wanthu angaleke kumulemekeza akandomuzindikira. Koma Baibolo ilewa kuti Yesu padafa, Yosefe ‘adalimba ntima nkuyenda kukakumbira thupi ya Yesu.’ (Maliko 15:42, 43) Apa manje Yosefe ambadzibisalini pomwe kuti ni wopfunzira wa Yesu.

14. Ko mungachite tani kuti osati mumbagope wanthu?

¹⁴ Ko imwepo mugopambo wanthu ninge mwangachitira Yosefe? Mukakhala kushikola panango kubasa, ko muchita manyazi kudzidziwikisa kuti ndimwe wa Mboni za Yahova? Ko muzeza kukhala wofalisa panango kubatizika ndawa yogopa kuti wanthu ambakuwoneni tani? Ayi kubvuma kuti mantha yatene yakukangiseni kuchita vinthu vomwe munkudziwiratu kuti ni vabwino. Muuzeni vose Yahova ndipo mukumbireni kuti akuthandizeni kukhala wolimba ntima kuti muchite chifuniro chake. Mukambawona momwe Yahova ankudawirira mapemphero yanu, mudzakhale wamphanvu na wolimba ntima maninge.—Yes. 41:10, 13.

15. Padati Yesu wawonekera kwa opfunzira wake, ko chimwemwe chawo chidawalimbikisa kuchita chani? (Luka 24:52, 53)

¹⁵ Yesu padafa, wopfunzira wake adakwinyirira maninge. Ko adakati mwenzepo sembe mudabvambo tani? Iwo ambakwinyirira ndawa  yakuti Yesu wafa ndipo ambawona pomwe kuti tsogolo yawo yamalira mwapo. (Luka 24:17-21) Koma Yesu padawonekera kwa iwo, adapatula nthawe yowathandiza kubvesa kuti vomwe vidachitika vidakwanirisa ulosi wa m’Baibolo. Panthawe mweyo adawapasa pomwe basa yofunika maninge. (Luka 24:26, 27, 45-48) Pazidapita ntsiku 40, Yesu adabwerera kudzulu ndipo wopfunzira wake alibe kukwinyirira, koma adakondwa maninge. Ambakondwa ndawa yodziwa kuti Yesu ali moyo ndipo ambawathandize pa basa yolalikira. Chimwemwe chawo chidathandiza kuti osati asiye kutumikira Yahova.—Lewengani Luka 24:52, 53; Mac. 5:42.

16. Ko tingawatewedzere tani opfunzira wa Yesu?

¹⁶ Ko tingawatewedzere tani opfunzira wa Yesu? Tingakhale okondwa osati panthawe ya Chikumbuso chabe, koma kwa gole yose. Koma kuti tikwanise kuchita vimwevi, tichadekana kuikha Ufumu wa Mulungu pamalo yoyamba. Mwakulinganiza, anango adakonza ndandanda yakuti ambalalikire, kugumanika pamisonkhano na kuchita pfunziro ya banja nthawe zose ndipo abvumalini kuti basa iwakangise kuchita vimwevi. Anango abvuma kukhala na vinthu vochepa pamoyo wawo kuti akwanise kuchita vizinji mumpingu panango kuyenda kukatumikira kudera yosowa. Podiya kuti tifunika kupirira mabvuto yazinji kuti tikwanise kutumikira Yahova, iye ankutipolomisa kuti adzatidalise tikapitiriza kuikha Ufumu pamalo yoyamba.—Miy. 10:22; Mat. 6:32, 33.

17. Ko ndimwe otsimikiza kuchita chani Chikumbuso chikambafendera na pomwe chapita? (Onani foto.)

¹⁷ Tinkudikhira mokondwa kuti tidzachite Chikumbuso pa Chiwiri, 4 Abril. Koma yambirantuni pakali pano kuganizira va moyo wa Yesu, impfa yake na chikondi chomwe iye na Yahova adatiwonesa. Yesesani kuchita vimwevi kudakali masondo yanganani Chikumbuso chikanati kuchitika na pomwe chapita. Mwakulinganiza, mungapatule nthawe yowerenga vochitika va pa bokosi yakuti “Ndandanda yolewenga Baibolo panthawe ya Chikumbuso cha 2022” mu Utumiki na moyo wathu wachikhrisitu wa Março-Abril 2022. Mukambachita vimwevi, onani mavesi yomwe yangakuthandizeni kukhala otembeja, wachikondi, olimba mtima na okondwa. Mukateno, onani njira zomwe mungawonesere pamwekha kuti munkutembeja. Khalani otsimikiza kuti Yesu adzakondwe maninge kukuwonani munkuchita vose vamungakwanise kuti mumukumbukire panthawe ya Chikumbuso.—Chiv. 2:19.