1, 2. a) ¿Tyisɨ wɨap iga tanjaampa jesɨk tan̈kujɨɨspa jempɨk Jesús iwat y tyityam iñaskaʼ? b) ¿Tyi tan̈kɨʼpin̈taʼmpa yɨʼp kuyujijom?

 JESƗK kaʼaba algun i tsampɨk tantoyba, pɨɨmi tan̈yaʼkpa. Wɨapsɨ iga jesɨk dyanam waatyña jaama nɨki iga kaʼaneʼ, pɨɨmi tantoʼyan̈jaampa, maaj siiga pɨɨmi yaʼacha jesɨgam kaʼ. Pero wɨap iga eybɨk tamaymayaap jesɨk tan̈kujɨɨspa tyityam iwat jesɨgam jaʼy ityi, juʼuts akwiñkejoʼoyi, jempɨk tan̈kejay, jempɨk iwat o nɨm jesɨgam taanmajan̈chiʼ o iga taxiguiñ.

² Jeextyim tanan̈jaam iga Jesús yaʼacha y akkaʼata. Tsaam tatoʼyan̈jaampa jesɨk tammayba Bibliajom ityumpɨy jempɨk iñaskaʼ, juutypɨgam tan̈wattaʼmpa jesɨk dyam jaʼyñeʼ itypa jeʼm Jɨɨskimoʼoyi, jesɨk tantoppa maaj tiempo iga tan̈kujɨɨspa juʼtspɨy tawɨwadaʼyba jeʼm ikɨakpudoʼoyi (1 Cor. 11:24, 25). Pero, jesɨk tanjɨɨspa ityumpɨy jempɨk Jesús iwat y nɨm jesɨgam jaʼy ityi yɨʼp Naxyukmɨ, tsaam tamaymaywatpa. Taanmajan̈chiʼibatyim jesɨk tan̈kujɨɨspa jempɨk sɨʼ iwat yɨʼp jaama y jempɨk iwatpa por taɨchtyam jeʼm tannɨgɨyoʼoyijom. Yɨʼp kuyujijom, tan̈kɨʼpin̈taʼmpa iga jesɨk tan̈kujɨɨspa ityumpɨy jempɨk Jesús iwat y jeʼm toyoʼoyi takwiñkejaywɨʼɨp, tapɨɨmchiʼiba iga tanakwiñkejiñ juʼtspɨy tantsoowaixpa jempɨk iwat.

3. ¿Tyiʼiga tantsoowaixtyaʼmiñ jeʼm kɨakpudoʼoyi?

³ Jesɨk tan̈kujɨɨspa jeʼm Jesús iityi y juutypɨk kaʼ, tayooxpaʼtpa iga tantsoowaixiñ jempɨk jeʼ iwat. Jesɨgam jaʼy ityi yɨʼp Naxyukmɨ, in̈kejay tun̈gakyaj ityumpɨy jempɨk iwatpa jeʼm  Dios iAn̈jagoʼoyi. Taɨchtyam tsaam tantsoowaixtyaʼmpa yɨʼpyaj an̈kejayoʼoyiyaj. Y tantsoowaixpatyim jeʼm kɨakpudoʼoyi iga tayooxpaʼtpa tanamigoja Jehová y Jesús. Jempɨk tanaitytyaʼm fe en Jesús, tanaitytyaʼmtyim jeʼm an̈jogoʼoyi iga tampɨktson̈taʼmpa tuum ityi dyapɨk kuyajpa y jeʼm an̈jogoʼoyi iga aktsukumyajtaap jempɨk kaʼaneyajum (Juan 5:28, 29; Rom. 6:23). Taɨchtyam, dyaʼ tyi tan̈watnetaʼm iga wɨaiñ tampɨkston̈taʼm yɨʼpyaj kumaykedoʼoyiyaj. Ni keman wɨap tanyojay Dios y Cristo ityumpɨy jempɨk iwatneyaj por taɨchtyam (Rom. 5:8, 20, 21). Pero, ¿juutypɨk wɨap tanakwiñkejtaʼm iga tantsoowaixpa jempɨk iwatneyaj? Tanaʼmtaʼmiñ.

4. ¿Juutypɨk ikwiñkej María Magdalena iga ichoowaixpa idyɨk jempɨk Jesús iwat por jeʼ? (Aʼmɨ jeʼm dibujo).

⁴ Tanjɨɨstaʼmiñ tuum yoomoʼ judía iakwiñkejoʼoyi iñɨɨyipɨk María Magdalena. Tsaam idyɨk iyaʼachwatpa siete demonios iga ikutɨgɨyñeyaj. Wɨapsɨ iga ikujɨɨs iga dyaʼ idyɨk i wɨap iyooxpaʼt. ¿Wɨap tan̈kujɨɨs juʼuts mu in̈jaam jesɨk Jesús ityobay yɨʼpyaj demonios? Tsamsɨ pɨɨmi maymaya. Jeʼyukmɨ moj ityun̈ɨy Cristo y ipɨk jeʼm itiempo, ipɨɨmi y tyityam iniity iga wɨaiñ iyooxpaʼt (Luc. 8:1-3). Mex iga María ichoowaixpa jempɨk Jesús iwat, wɨapsɨ iga dyanam idyɨk ikutɨʼɨyɨyñeʼ iga dyaʼ jaʼyñeʼ chioʼyba idyɨk tuum mɨjpɨk xaaja. Jesús ikɨan̈kotpa idyɨk jeʼm iityi, iga ityumpɨyyaj jempɨk ikwiñkejyajpa fe ipɨktson̈yajiñ jeʼm ityi dyapɨk kuyajpa (Juan 3:16). Kun tyityam iwat, María ikwiñkej iga ichoowaixpa idyɨk ityumpɨy jempɨk Jesús iwat por jeʼ. Jesɨgam Jesús kunuʼnnetawum idyɨk kuyyukmɨ, María tsɨʼytyim jeem iga ianmajan̈chiʼiba Jesús y jeʼm tun̈gakyaj (Juan 19:25). Y jesɨk Jesús kaʼaneum idyɨk, María y tun̈gak yomtam ininɨgayyaj especia kɨɨnpaʼppɨk iga ikkaʼmayyaj jeʼm Jesús imɨjtaay (Mar. 16:1, 2). Jehová tsaam ikumayket María por jempɨk iwat. ¡Tsamsɨ maymaya jesɨgam iaʼm iga Jesús aktsukumnetawum y wɨa mu inimuru! Ipɨktson̈ tuum wɨbɨk xaaja (Juan 20:11-18).

5. ¿Juutypɨk wɨap tanakwiñkejtaʼm iga tantsoowaixpa ityumpɨy jempɨk Jehová y Jesús iwatneyaj por taɨchtyam?

 ⁵ Taɨchtyam wɨaptyim tanakwiñkejtaʼm iga tantsoowaixtyaʼmpa ityumpɨy jempɨk Jehová y Jesús iwatneyaj por taɨchtyam. ¿Juutypɨk? Jesɨk tampɨkpa jeʼm tantiempo, tampɨɨmi y tyityam tanaity iga tanyooxpadaʼyba jeʼm Dios iAn̈jagoʼoyi. Juʼuts akwiñkejoʼoyi, wɨap tanyooxpadoytyaʼm jesɨk itypa tuum construcción y jesɨk wɨtsakseetyajtaap jeʼm edificios iga pɨkyajtaap iga koosteñaytyaap Jehová.

6. ¿Tyiʼiga tanɨmpa iga jeʼm kɨakpudoʼoyi jeʼ tuum wɨbɨk xaaja iga tampɨktson̈netaʼm tumtum de taɨchtyam?

⁶ Jesɨk tan̈kujɨɨstaʼmpa juʼtspɨy tatoytyaʼmpa Jehová y Jesús, yɨʼp taanmajan̈chiʼiba iga tantoyyajiñtyim (1 Juan 4:10, 19). Y majtyim tantoyyajpa jesɨk tan̈kutɨʼɨyɨʼyba iga Jesús kaʼ por tumtum de taɨchtyam. Jeʼm apóstol Pablo tsaam idyɨk ichoowaixpa yɨʼp wɨbɨk xaaja. Jeʼyukmɨ jesɨgam ijaʼyay jeʼm carta a jeʼm Gálatas, nɨm: «Jém Dios iMa̱nɨc […] tsa̱mpɨc atoypa, jém iyaacpɨc nachiit́a̱ iga accaata̱ ɨch aŋcuyucmɨ» (Gál. 2:20). Iga Jesús ikɨan̈kot jeʼm iityi, jeʼyukmi wɨap iñamigoja Jehová (Juan 6:44). ¿Dyaʼ mimaymaywatpa iñjoodon̈a ityumpɨy jempɨk Jehová iwat iga wɨaiñ iñamigoja? ¿Dyaʼ mianmajan̈chiʼiba iga majtyim iñtyoʼyiñ Jehová y Jesús? Jeʼyukmɨ tantumpɨytyam tanakwaʼktamtaiñ: «¿Tyi wɨɨ iga an̈wadyiñ?».

7. Juʼuts kejpa en jeʼm fotografía, ¿juutypɨk wɨap tanakwiñkejtaʼm iga tantoyyajpa Jehová y Jesús? (2 Corintios 5:14, 15; 6:1, 2).

⁷ Jeʼm toyoʼoyi tanjaampaʼap por Dios y por Cristo tayooxpaʼtpa iga tantoyyajiñ tun̈gakyaj (maayɨʼ 2 Corintios 5:14, 15; 6:1, 2). Wɨap tanakwiñkejtaʼm jesɨk tanan̈madayyajpa jeʼm Dios In̈maatyi ityumpɨyyaj. Tanan̈madaytyaʼmpa ikej, dyaʼ tyi ijoo juʼp an̈eymɨ ityyaj, siiga tumiñɨyyaj o dyaʼ. Jeempɨgam tanyooxpaʼtpa  Jehová, «porque ixunpa [...], iga cɨacputyajta̱iñ it́u̱mpɨy jém pɨxiñt́am y [...] acjo̱dóŋa̱yajta̱iñ jém nu̱mapɨc aŋquímayooyi» (1 Tim. 2:4).

8. ¿Juutypɨk tanakwiñkejtaʼmpa iga tantoyyajpa jeʼm tantɨwɨtam?

⁸ Tanakwiñkejtaʼmpa iga tantoyyajpa Dios y Cristo jesɨk tantoyyajpa jeʼm tantɨwɨtam (1 Juan 4:21). Juʼuts akwiñkejoʼoyi, tanteguedayajpa tumtum de jeʼeyaj y tanyooxpaʼtyajpa jesɨk yaʼachaap ixɨʼyaj. Tanakpoʼksyajpa jesɨk kaʼaneʼ algun i iga tsaam ityoyyajpa, tanjooyayyajpa jesɨk mɨmneyajpa y tan̈watpa juʼtspɨy tawɨap iga tananmajan̈chiʼiyajpa jesɨk an̈yaʼkneyajpa (2 Cor. 1:3-7; 1 Tes. 5:11, 14). Tanjɨykimayyajiñtyim iñɨɨyiyaj jesɨk tan̈watpa an̈wejpadoʼoyiyaj. Tanjoodon̈tam iga «cuando tu̱m wɨbɨc pɨ̱xiñ [...], iŋwejpátpa Dios con it́u̱mpɨy jém [ianmaj], Dios imatóŋáypa» (Sant. 5:16).

9. ¿Juutypɨknam wɨap tanakwiñkejtaʼm iga tantoyyajpa jeʼm tantɨwɨtam?

⁹ Tanakwiñkejpatyim iga tantoyyajpa jeʼm tantɨwɨtam jesɨk tan̈wɨnanɨgayyajpa. Tan̈wadayyajpatyim perdón juʼutstyim iwatpa Jehová. Tan̈kujɨɨstaʼmiñ yɨʼp: Jehová tayojaytyaʼm tantan̈kaʼ jesɨgam iaʼmchiʼ iga jeʼm iMaanɨk kaʼiñ por taɨchtyam, jesɨk, ¿dyaʼ wɨɨ iga taɨchtyam tan̈wadaytyaʼmiñtyim perdón jeʼm tantɨwɨtam? Dyaʼ tan̈watkiʼpstamtoʼoba jeʼm esclavo ijɨykimwɨʼɨp Jesús. Jeʼm iomi iwaday perdón mex iga tsaam idyɨk jaʼyan̈ ijaʼtsneʼ, pero jeʼ dyaʼ iwaday perdón tun̈gak esclavo mex iga dyaʼ idyɨk juʼchan̈ jaʼtsneta (Mat. 18:23-35). Jeʼyukmɨ, siiga mich immalwadayñeʼ o mimalwadayñeʼ tuum tɨɨwɨ, pɨɨkɨ iñjɨɨxi iga inimurupa y nawadaytyamtaajɨ perdón wiñtyi iga wattaiñ jeʼm Jɨɨskimoʼoyi (Mat. 5:23, 24). Siiga jeempɨgam in̈watpa inikwiñkejpa iga tsaam iñtyoyyajpa Jehová y Jesús.

10, 11. ¿Juutypɨk jeʼm ancianojyaj wɨap ikwiñkejyaj iga ityoyyajpa Jehová y Jesús? (1 Pedro 5:1, 2).

¹⁰ Jeʼm ancianojyaj wɨap iwɨakwiñkejyaj iga ityoyyajpa Jehová y Jesús: jesɨk ikuixyajpa kun toyoʼoyi jeʼm Jesús iovejajyaj (maayɨʼ 1 Pedro 5:1, 2). Yɨʼbam jempɨk an̈kejaytya jeʼm apóstol Pedro. Iga tukuteen veces in̈neʼk iga dyaʼ idyɨk iixpɨkpa Jesús, wɨapsɨ iga ikwiñkejaytyoʼoba idyɨk juʼtspɨy ityoyba. Okmɨ iga aktsukumta, Jesús ikwaʼk: «MiPeto, [...], ¿que tsa̱m antoypa?». Wɨapsɨ iga Pedro iwattoʼoba idyɨk tyiam nɨʼmaytyaap. Jeʼyukmɨ Jesús iñɨʼmay: «Wa̱tɨ cuenta jém amborregoyaj» (Juan 21:15-17). Y jeʼam iwat, Pedro ikuix kun toyoʼoyi jeʼm Jesús iovejajyaj, y yɨʼɨmpɨgam ikwiñkejay iga ityoyba idyɨk.

¹¹ Jesɨk dyam jaʼyñeʼ itypa jeʼm Jɨɨskimoʼoyi, ¿juutypɨk jeʼm ancianojyaj wɨap ikwiñkejyaj iga ikupɨkyajpa jeʼm an̈matyiyaj nɨʼmaytyawɨʼɨp Pedro? Wɨap ikwiñkejyaj iga ityoyyajpa Jehová y Jesús siiga iwɨwatyajpa iyooxakuy juʼuts pastores y siiga ityeguedayajpa iga iyooxpaʼtyajpa jeʼm tɨwɨtam jempɨk sɨɨ dyaʼ nɨkyajpa jeʼm an̈tuʼumaajiyaj y dyatyim putyajpa jeʼm an̈matkuyjom (Ezeq. 34:11, 12). Wɨaptyim ityeguedayaj jempɨk ikuyujkayajpa jeʼm Biblia y jempɨk yaguiñ mojpa nɨkiyaj jesɨk wattaap jeʼm Jɨɨskimoʼoyi. Ixunyajpa iga jeʼm kuyujkɨʼɨwiñyaj odoy tsaʼayajiñ iñuʼkyaj, y wɨapsɨ iga maaj okmɨ jeʼeyaj ikuyooxayajpatyim Jehová.

12. ¿Tyiʼiga tayooxpaʼtpa iga odoy takɨʼɨn̈iñ jempɨk Jesús iñɨʼmay jeʼm ikuyujkɨʼɨwiñyaj? (Juan 16:32, 33).

¹² Jeʼm tsuʼu wiñtyi iga kaʼaba, Jesús iñɨʼmay jeʼm ikuyujkɨʼɨwiñyaj: «Miyaachwattamta̱p yɨ́p naxyucmɨ, pero camamwa̱tɨ [iñanmaj] porque ɨch aŋcoñwɨyñeum it́u̱mpɨy jém Woccɨɨwiñ ipɨ̱mi jém it́wɨɨp yɨ́p naxyucmɨ» (maayɨʼ  Juan 16:32, 33). ¿Tyi iyooxpaʼt Jesús iga odoy kɨʼɨn̈iñ y juchixkej kupɨgoʼyiñ mex otyɨʼmaytya? Iyooxpaʼt jeʼm confianza iniidyaywɨʼɨp Jehová. Jesús ijoodon̈ idyɨk iga jeempɨktyim iñaskayajpa jeʼm ikuyujkɨʼɨwiñyaj, jeʼyukmɨ iwaʼgay Jehová iga ikuixiñ (Juan 17:11). ¿Juutypɨk tayooxpaʼttaʼmpa yɨʼp iga odoy takɨɨn̈taʼmiñ? Iga Jehová maaj pɨɨmiɨy que jeʼm tanenemigojyaj (1 Juan 4:4). Jeʼ juchixkej takuixñetaʼm. Y tan̈wɨkupɨknetaʼm iga Jehová tayooxpaʼttaʼmpa iga odoy takɨɨn̈taʼmiñ siiga tan̈kuaʼmaʼyba jeʼm iyooxpadoʼoyi.

13. ¿Juutypɨk José de Arimatea ikwiñkej iga dyam idyɨk kɨɨn̈ba?

¹³ Tan̈kujɨɨstaʼmiñ jempɨk iñaskaʼ José de Arimatea, tuum pɨɨxiñ aguipɨk ixpɨktaap. Jeʼ iniity idyɨk tuum teguedɨʼɨyi en jeʼm Sanedrín. Pero kɨɨn̈ba idyɨk y dyaʼ nakwiñkejta iga ityun̈ɨʼyba Jesús. Juan nɨmpa iga «icupɨcnet́im Jesús, pero iŋyampa iga icupɨcpa porque tsa̱m icɨ̱ŋpa jém Israelpɨc aŋjagooyiyaj» (Juan 19:38). Mex iga ikusuʼnɨʼyba idyɨk ikumaton̈ jempɨk iwatpa jeʼm Dios iAn̈jagoʼoyi, in̈yam iga iniidyay idyɨk fe jeʼm Dios iMaanɨk. Wɨapsɨ iga kɨɨn̈ba idyɨk ipatstogoy jeʼm ityeguedɨʼɨyi. Pero jeʼm Biblia in̈matpa tyi iwat okmɨ iga kaʼ Jesús, José «icamamwat [ianmaj], nɨc iám jém Pilato, iwágáypa permiso iga icquedáypa jém Jesús imɨjta̱y» (Mar. 15:42, 43). José dyam in̈neʼk iga iniity idyɨk fe.

14. ¿Tyi wɨɨ iga tan̈wadyiñ siiga takkobakpijpa tyi ijɨɨsyajpa tun̈gakyaj?

¹⁴ ¿Mikkobakpijpatyim tyi ijɨɨsyajpa tun̈gakyaj juʼutstyim iñaskaʼ José de Arimatea? ¿Michaʼap inin̈mat iga miTestigo juuty mikuyujpa o juuty miyooxaap? ¿Jeʼyukmɨ dyanam impɨkneʼ iñjɨɨxi iga michɨʼyba juʼuts an̈matkɨʼɨwiñ o iga michin̈ba? Odoy aʼmchiɨʼ iga jeʼm kɨɨn̈i miktsaguiñ iga in̈watpa jempɨk Jehová ikusuʼnɨʼyba. Waʼgaʼayɨ jeʼm iyooxpadoʼoyi iga michiʼiñ jeʼm pɨɨmi iga wɨaiñ in̈wat. Jesɨk iñaʼmpa iga mikutson̈aʼyba jeʼm inin̈wejpadoʼoyiyaj, miyooxpaʼtpa iga odom maaj mikɨʼɨn̈iñ (Is. 41:10, 13).

15. ¿Juutypɨk iyooxpaʼtyaj jeʼm Jesús ikuyujkɨʼɨwiñyaj jesɨgam iaʼmyaj iga aktsukumnetawum idyɨk? (Lucas 24:52, 53).

¹⁵ Jesɨgam kaʼ Jesús, jeʼm ikuyujkɨʼɨwiñyaj tsaam an̈yaʼkyaj. ¿Juʼuts idyɨk inin̈jaam mich meʼega miity jeem? Jeʼeyaj ipatstogoyñeyaj idyɨk tuum amigo tsampɨk ityoyyajpa jeʼyukmɨ pɨɨmi idyɨk an̈yaʼkneyaj (Luc. 24:17-21). Pero okmɨ Jesús iwiñkejay jeʼm ikuyujkɨʼɨwiñyaj y in̈maday iga sɨʼ idyɨk ikkupak jɨychagoʼoyiyaj ityyajwɨʼɨp Bibliajom. Y chiʼiyajtatyim  tuum wɨbɨk yooxakuy (Luc. 24:26, 27, 45-48). Y 40 jaama okmɨ jesɨgam Jesús nɨk sɨn̈yukmɨ, jeʼm ikuyujkɨʼɨwiñyaj dyam idyɨk an̈yaʼkneyaj. Tsaam idyɨk maymayyaj iga Jesús aktsukumnetawum y yooxpaʼtyajtaptyim idyɨk iga wɨaiñ ikkupakyaj jeʼm yooxakuy chiʼiyajtawɨʼɨp. Yɨʼp maymayaaji iyooxpaʼtyaj iga ikujiʼpyajiñ Jehová juchixkej (maayɨʼ Lucas 24:52, 53; Hech. 5:42).

16. ¿Juutypɨk wɨap tan̈watkiʼpsaytyaʼm jeʼm Jesús ikuyujkɨʼɨwiñyaj?

¹⁶ Y taɨchtyam, ¿juutypɨk wɨap tan̈watkiʼpsaytyaʼm jeʼm Jesús ikuyujkɨʼɨwiñyaj? Tan̈kuyooxaiñ Jehová tumtum jaama kun maymayaaji, dyaʼ numaaj jesɨk dyam jaʼyñeʼ wattaap jeʼm Jɨɨskimoʼoyi. Jeʼyukmɨ maaj tanteguedaiñ jeʼm tañityijom iga tanan̈kejaʼyba tun̈gakyaj jeʼm Dios iAn̈jagoʼoyi. Juʼuts akwiñkejoʼoyi, weeñiyaj ikukagayñeyaj jeʼm hora iga yooxayajpa iga wɨaiñ iputyaj jeʼm an̈matkuy, iñɨkyaj jeʼm an̈tuʼumaajiyaj y iwatyajiñ jeʼm kuyuuji en familia tumtum semana. Y weeñiyaj dyaʼ iniiyaj tyidyin̈kej iga majnam wɨaiñ iyooxpadoyyaj jeʼm kumunjom o iga nɨkpa in̈matyaj jeʼm Dios In̈maatyi tun̈gak an̈eymɨ. Jehová ijɨykamneʼ iga takumayketpa siiga tan̈watpa juʼtspɨyam tawɨap iga duroj tan̈kuyooxaiñ (Prov. 10:22; Mat. 6:32, 33).

17. ¿Tyi tan̈wattaʼmiñ sɨɨ iga dyam jaʼyñeʼ itypa jeʼm Jɨɨskimoʼoyi? (Aʼmɨ jeʼm fotografía).

¹⁷ Tanan̈joʼktaʼmpa iga nuʼguiñam jeʼm jaama martes 4 de abril jesɨk wattaap jeʼm Jɨɨskimoʼoyi. Pero wɨɨ iga dende sɨʼam tan̈kujɨɨstaʼmiñ ityumpɨy jempɨk Jesús iwat, y jeʼm toyoʼoyi iga ikwiñkejneyaj jeʼ y Jehová. Jeʼyukmɨ jesɨk dyam jaʼyñeʼ wattaap jeʼm Jɨɨskimoʼoyi, wɨpɨɨkɨ intiempo iga majnam in̈kujɨɨxiñ ityumpɨy jempɨk jeʼ iwatneyaj. Juʼuts akwiñkejoʼoyi, wɨap iwɨkɨʼpin̈ jeʼm nasɨyoʼoyiyaj kejpaʼap en jeʼm apéndice B12 de jeʼm Traducción del Nuevo Mundo, iñɨɨyipɨk «La última semana de Jesús en la tierra». Kuaʼmɨ textos iga miyooxpaʼdyiñ inikwiñkej jeʼm iñtyoyoʼoyi, immaymayaaji, juʼtspɨy iñchoowaixpa jempɨk Jesús iwat y inikwiñkejiñtyim iga dyaʼ mikɨɨn̈ba. Y kujɨɨsɨ juutypɨk wɨap inikwiñkej kun ityumpɨy iñanmaj. Odoy tan̈kujaʼamaytyaʼmiñ iga Jesús tsaam ichoowaixpa iga tanjɨɨsaytyaʼmiñ ityumpɨy jempɨk jeʼ iwat, sɨɨ iga dyam jaʼyñeʼ itypa jeʼm Jɨɨskimoʼoyi (Apoc. 2:19).