1-2. (a) Kal sentimentus ku no pudi tene ora ku no pensa na vida ku ministeriu di Jesus? (b) Ke ku no na fala del nes studu?

 ORA ku un algin ku no ama muri, no ta sinti ciu si falta! Na kumsada, no pudi sinti dur garandi ora ku no pensa na dias antis di muri, prinsipalmenti si algin ku no ama sufri antis di muri. Ma, ku tempu, no pudi kumsa ku tene mas kontentamentu ora ku no pensa na kusa ki nsinanu o na un kusa ki fasi o fala, pa nkoraẑanu o fasinu ri.

² Di mesmu manera, no ta sinti tristi ora ku lei aserka di sufrimentu ku mortu di Jesus. Semanas antis i dipus di Memorial, i bon pa no toma tempu pa pensa na kuma ku sakrifisiu di Jesus tene balur. (1 Kor 11:​24, 25) Ma, no ta tene kontentamentu garandi ora ku no pensa na tudu kusas ku Jesus fala i fasi ocalba na Tera. I ta nkoraẑanu tambi ora ku no pensa na ke ki sta na fasi gosi, i na ke ki na bin fasi na futuru. Medita nes kusas i na si amor pa nos ta pincanu mostra no gardisimentu di manera pratiku, suma ku no na bin oja nes studu.

3. Kal motivus ku no tene pa gardisi pa resgati?

³ Ora ku no pensa na vida ku mortu di Jesus, kila ta lebanu na gardisi. Oca Jesus staba na Tera, i nsina jintis aserka di bon kusas ku Renu di Deus na bin fasi. No gosta di ke ku Biblia nsina aserka di resgati ku bon kusas ki na pui pa i sedu pusivel. No ta gardisi pa resgati pabia i  pirmitinu tene amisadi intimu ku Jeova i ku Jesus. Kilis ku mostra fe na Jesus, tene tambi speransa di vivi pa sempri i oja mas kilis ke ama ku muri. (Jon 5:​28, 29; Rom 6:​23) No ka fasi nada pa mersi es bensons; i nunka no ka na pudi paga Deus ku Kristu pa ke ke fasi pa nos. (Rom 5:​8, 20, 21) Ma, no pudi mostra elis te kal pontu ku no da balur pa ke ke fasi. Kuma ku no pudi fasil?

4. Kuma ku Maria Madalena gardisi pa ke ki Jesus fasi pa rel? (Jubi diseñu.)

⁴ Jubi isemplu di un minjer judeu comadu Maria Madalena. I sta na sufri ciu pabia seti dimonius staba na kansal. I dibi di pensaba kuma ningin ka pudiba judal. Imaẑina kuma ki gardisi oca Jesus libertal di influensia di ki dimonius! Kila lebal na sedu si sigidur i usa si tempu, si inerẑia ku kusas ki tene pa apoia Jesus na ministeriu. (Luk 8:​1-3) Mesmu manera ku Maria kontentiba dimas pa ke ku Jesus fasi pa rel, talves i ka sibi di kuma Jesus na fasi inda mas pa rel na futuru. I na da si vida pa pekaduris, “pa tudu kil ku setal”, o mostra fe nel, pudi tene vida ku ka ta kaba. (Jon 3:​16) Ma, Maria sedu fiel, asin i mostra kuma i gardisi pa ke ku Jesus fasi. Oca Jesus staba na sufri na staka di tortura, Maria firmaba pertu, pabia i preokupaba ku Jesus, tambi i mistiba anima kilis ku staba la. (Jon 19:25) Dipus di Jesus muri, Maria ku dus utrus minjeris leba purfumu na koba pa unta kurpu di Jesus. (Mar 16:​1, 2) Jeova da Maria un pagamentu garandi pabia i seduba fiel pa Jesus. I teneba kontentamentu di papia ku Jesus ku lantandadu i di papia kel. Puku disipulus ku teneba es oportunidadi. — Jon 20:​11-​18.  

5. Kuma ku no pudi mostra di kuma no gardisi pa tudu ke ku Jeova ku Jesus fasi pa nos?

⁵ Anos tambi no pudi mostra di kuma  no gardisi pa tudu ke ku Jeova ku Jesus fasi pa nos, ora ku usa no tempu, no iner­ẑia ku kusas ku no tene pa sirbi Jeova. Pur isemplu, no pudi juda na kumpu kaus ku no ta usa pa adora Jeova i manti elis na un bon kondison.

6. Pabia ku no pudi fala di kuma resgati i un prenda pa kada un di nos?

⁶ Ora ku no pensa na amor garandi ku Jeova ku Jesus mostra pa nos, kila ta lebanu na ama elis tambi. (1 Jon 4:​10, 19) No ta ama inda elis mas, ora ku no ntindi di kuma Jesus muri pa kada un di nos. Apostolu Paulu ntindiba es, i mostra si gardisimentu oca i fala sin pa kristons di Galásia: “Fiju di Deus . . . aman, i ntrega si vida pa mi.” (Anos ku pui letras karegadu ku italiku; Gal 2:20) Pabia di resgati, Jeova atraiu pa bu pudi sedu si amigu. (Jon 6:​44) Sera ki i ka ta toka bu korson sibi di kuma, Jeova oja un kusa di bon na bo, i di kuma i paga pres garandi pa bu pudi sedu si amigu? Sera ki es ka ta aumenta bu amor pa Jeova ku Jesus? No dibi di punta no kabesa: ‘Ke ku es amor na leban fasi?’

7. Suma ki mostradu na foto, kuma ku anos tudu no pudi mostra no amor pa Jeova ku Jesus? (2 Koríntius 5:​14, 15; 6:​1, 2)

⁷ No amor pa Deus i pa Kristu ta lebanu na mostra amor pa utrus. (Lei 2 Koríntius 5:​14, 15; 6:​1, 2.) Un di manera ku no ta mostra no amor i ora ku no pega tesu na pregason. No ta papia ku tudu jintis ku no oja. No ka ta ivita papia ku un algin pabia di si rasa o etnia. Tambi no ta papia ku tudu jintis, i pudi sedu kilis ku riku i ku tene skola, o kilis ku koitadi i ku ka tene skola. Des manera, no ta sta na tarbaja di akordu ku ke ku Jeova  misti, ku sedu, “pa tudu jintis salba, pa e ciga di kunsi bardadi.” —  1 Tim 2:​4.

8. Kuma no pudi mostra amor pa no ermons ku irmas?

⁸ No ta mostra tambi no amor pa Deus ku Kristu ora ku no mostra amor pa no ermons ku irmas. (1 Jon 4:​21) No ta preokupa ciu ku ke ke pirsisa del, tambi no ta juda elis ora ke sta na pasa pa purblemas. No ta konsola elis ora ku algin ke ama muri, visita elis ora ke duensi i fasi no minjor pa nkoraẑa elis ora ke sta disanimadu. (2 Kor 1:​3-7; 1 Tes 5:​11, 14) No ta kontinua ora pa relis, pabia no sibi kuma “orason ku un algin justu fasi i ten puder; i ta da bon rusultadu.” — Tiagu 5:​16.

9. Kal ki utru manera ku no pudi mostra amor pa no ermons ku irmas?

⁹ No ta mostra tambi amor pa no ermons ku irmas, ora ku no na sforsa ciu pa manti pas ku elis. No ta sforsa pa kopia isemplu di Jeova na purda utrus. Si Jeova staba dispostu pa disa si Fiju muri pa no pekadus, sera ki no ka dibi di sta dispostu pa purda no ermons ku irmas ora ke peka kontra nos? No ka misti parsi ku tarbajadur malvadu ku Jesus fala del na si komparason. Mesmu dipus ku si patron purdal dibida garandi, ki tarbajadur nega purda si kolega ku dibil diñeru mas pikininu. (Mat 18:​23-​35) Si bu tene disintindimentu ku un algin na kongregason, sera ki bu pudi da purmeru pasu pa fasi pas antis di mati Memorial? (Mat 5:​23, 24) Si bu fasil, bu ta mostra di kuma bu tene amor garandi pa Jeova ku Jesus.

10-11. Kuma ku ansions ta mostra amor pa Jeova ku Jesus? (1 Pedru 5:​1, 2)

¹⁰ Kuma ku ansions ta mostra amor pa Jeova ku Jesus? Un manera importanti di fasil i kuida di nesesidadis di karnelis di Jesus. (Lei 1 Pedru 5:​1, 2.) Jesus disa es asuntu di manera klaru pa apostolu Pedru. Dipus di nega Jesus tris bias, Pedru teneba diseẑu garandi di mostra kuma i amaba Jesus. Dipus di lantandadu, Jesus punta Pedru: “Simon, fiju di Jon, bu amam?” No pudi tene sertesa di kuma Pedru fasi tudu pa mostra amor pa si Mestri. Jesus fala Pedru: “Bakia ña karnel.” (Jon 21:​15-​17) Pa restu di si vida, Pedru kuida di karnelis di Siñor ku amor, i mostra asin di kuma i ama Jesus.

¹¹ Ansions, kuma ku bo pudi mostra di kuma palabras di Jesus pa Pedru i importanti pa bos, na semanas antis i dipus di Memorial? Bu pudi mostra te kal pontu ku bu ama Jeova ku Jesus, ora ku bu na partisipa sempri na visitas di pastoreiu i sforsa ciu pa juda inativus, pa e riba pa Jeova. (Eze 34:​11, 12) Bu pudi tambi tenta nkoraẑa studantis di Biblia ku utrus interesadus ku mati Memorial. No misti pa e sinti avontadi pabia no spera di kuma elis tambi e na sedu sigiduris di Jesus.

12. Pabia ku pensa na palabras di Jesus ki papia na noti antis di muri ta danu koraẑen? (Jon 16:​32, 33)

¹² Na noti antis di muri, Jesus fala si disipulus: “Na mundu bo na tene foronta, ma bo ten koraẑen; ami N ngaña mundu.” (Lei Jon 16:​32, 33.) Ke ku juda Jesus mostra koraẑen oca si inimigus ameasal i kontinua fiel te oca i muri? I konfia na Jeova. Suma i sibi kuma si sigiduris na pasa mesmu testi, Jesus pidi Jeova pa i jubi elis. (Jon 17:11) Pabia ku  es ta danu koraẑen? Pabia Jeova mas tene puder di ki kualker inimigu ku no tene. (1 Jon 4:​4) Jeova ta oja tudu. No sta konvensidu di kuma si no konfia na Jeova, i pudi judanu vensi no medu i mostra koraẑen.

13. Kuma ku José di Arimateia mostra koraẑen?

¹³ No jubi isemplu di José di Arimateia. I rispitadu ciu pa judeus. I seduba membru di Konseliu, ku sedu supremu tribunal di judeus. Ma, duranti ministeriu di Jesus na Tera, José ka seduba koraẑosu. Jon fala di kuma i “seduba disipulu di Jesus, ma sukundidu pabia i mediba judeus”. (Jon 19:38) José staba interesadu na mensaẑen di Renu, ma i sukundi utrus di kuma i teneba fe na Jesus. Talves i teneba medu di kuma jintis ka na rispital mas, se sibi di kuma i sedu disipulu di Jesus. Ma, Biblia fala kuma dipus di Jesus muri, José “mara koraẑen, i bai nunde Pilatus, i pidi kurpu di Jesus.” (Mar 15:​42, 43) José ka tenta mas sukundi ningin di kuma i sedu un disipulu di Jesus.

14. Ke ku bu dibi di fasi si bu sta na luta kontra medu di omi?

¹⁴ Sera ki bu ciga di tene medu di omi suma José? Sera ki utrora bu ta burguñu konta utrus na skola o na kau di tarbaju di kuma abo i Tustumuña di Jeova? Sera ki bu sta na adia disison di kumsa prega o batisa, pabia bu preokupa ku ke ku utrus pudi pensa di bo? Ka bu disa pa es sentimentus pui pa bu para fasi ke ki bu sibi di kuma i sertu. Ora Jeova di tudu korson. Pidil pa i dau koraẑen di fasi si vontadi. Ora ku bu oja kuma ku Jeova na ruspundi bu orasons, kila na dau mas forsa i mas koraẑen. — Isa 41:​10, 13.

15. Dipus di Jesus parsi dianti di si disipulus, ke ku se kontentementu leba elis na fasi? (Lukas 24:​52, 53)

¹⁵ Disipulus staba tristi dimas oca Jesus muri. Imaẑina bu sta na pasa na mesmu situason. E ka pirdi so se amigu ke ama ciu, ma tambi e sinti di kuma e pirdi speransa. (Luk 24:​17-21) Ma, oca Jesus parsi dianti di si disipulus, i toma tempu pa juda elis ntindi kuma ki kumpri profesia di Biblia. I da elis tambi un tarbaju importanti pa fasi. (Luk 24:​26, 27, 45-​48) Ma oca Jesus bai pa seu 40 dia dipus, tristesa di disipulus torna na un alegria garandi. E staba kontenti  dimas pabia e sibi kuma Jesus staba bibu, tambi i na juda elis fasi tarbaju ki da elis. Se kontentamentu leba elis na ngaba Jeova sin para. — Lei Lukas 24:​52, 53; At 5:​42.

16. Kuma ku no pudi kopia isemplu di disipulus di Jesus?

¹⁶ Kuma ku no pudi kopia isemplu di disipulus di Jesus? No pudi tene kontentamentu na adora Jeova i ka so na semanas antis i dipus di Memorial, ma duranti tudu anu. Es ta iziẑi pa no pui Renu di Deus na purmeru lugar na no vida. Pur isemplu, manga delis muda se programa di tarbaju pa pudi prega, bai runions i fasi sempri adorason na familia. Alguns disidi ka buska kusas material ku utrus ta pensa kuma i pirsis, asin e pudi usadu mas na kongregason, o e pudi sirbi nunde ki ten mas nesesidadi di publikaduris di Renu. No pirsisa di kontinua sirbi Jeova, ma mesmu asin, Jeova purmiti di kuma i na bensuanu si no pui interesis di Renu na purmeru lugar na no vida. — Dit 10:22; Mat 6:​32, 33.

17. Ke ku bu sta disididu pa fasi na semanas antis i dipus di Memorial? (Jubi foto.)

¹⁷ No sta ku presa di fasi Memorial na tersa-fera, 4 di Abril. Ma, ka bu pera te ki tempu pa kumsa pensa na vida ku mortu di Jesus i na amor ku el ku Jeova mostra pa nos. Pensa nes kusas manga di bias na semanas antis i dipus di Memorial. Pur isemplu, ranja tempu pa lei i medita na kusas ku faladu del na tabela “Ultimu semana di Jesus na Tera” ku sta na parti 16 di broŝura Ajuda pa Studa Palabra di Deus. Ora ku bu na lei aserka di vida di Jesus, jubi versikulus di Biblia ku na aumenta bu amor, koraẑen, kontentamentu ku gardisimentu. Dipus, tenta pensa na maneras izatu ku bu pudi mostra bu gardisimentu di tudu korson. Bu pudi tene sertesa di kuma, Jesus na da balur pa tudu sforsu ku bu fasi pa lembra del na semanas antis i dipus di Memorial. — Apok 2:​19.