1, 2. 1) ¿Jesús imacunata rurashganta y wanuyninman yarparga öraga imanoraj sienticushwan? 2) ¿Imapitataj canan yachacushun?

 CUYASHGANCHI cajcuna wanuriptenga alapa wamayanchimi. Capaz galananlachoga alapa laquicunchi ichiclacho wanunanpaj cajta yarpar, y chayga masraj canman wanunanpaj alapa nacashganta ricar. Tiempuwan ichanga paycuna imalatapis yachachimashganchita, asichimashganchita o imano shacyächimashganchita yarparga cushicunchimi.

² Chaynolami ricacunchi Jesús nacashganman o wanushganman yarpachacuptinchi. Conmemoración wichancho Jesuspita Biblia wilacushganta leiptinchi y noganchiraycur wanunanpaj alapa nacashganpita yarpachacuptinchega alapami laquicunchi (1 Cor. 11:24, 25). Ichanga Pachacho caycar Jesús imacunata rurashganta y yachachicushganta musyarga cushicunchimi. Jina canan y shamoj tiempucho noganchiraycur Jesús imacunata rurananpaj cajta yarparga calpata gomanchi. Cay yachacuycho ricärishun Jesús cuyamashpanchi chay lapancunata rurashganta yarpar imano agradecido cashganchita ricächicunapaj.

3. ¿Imanirtaj agradecido caycashwan Jesús noganchiraycur wanushganpita?

³ Jesús cawaycar ima rurashgancunata y wanuyninman yarpar yanapämanchi agradecido canapaj. Pachacho caycar runacunata yachachicurgan Diospa Gobiernun imacunata rurananpaj. Noganchipäga chay yachachicuycunaga alapa valuryojmi. Jesuspa wanuyninga yanapämanchi Jehovawan y Jesuswanpis ali amigo capäcunapaj. Señorninchi  Jesusman yäracushganchita musyachicuptinchega imaycamapis cawayta chasquinapaj y cuyashganchi cajcuna cawarimunanpaj cajta shuyaraycanchi (Juan 5:28, 29; Rom. 6:23). Rasunpa cajchoga manami merecicunchichu chay bendiciuncunata chasquinapaj. Jehovawan Jesús noganchiraycur lapan rurashgantaga imaypis pagayta puedishwanchu (Rom. 5:8, 20, 21). Ichanga, ¿imacunata rurartaj agradecido cashganchita musyachicushwan? Ricärishun.

4. ¿Imatataj María Magdalena rurargan Jesús alchacächishganpita agradecicushpan? (Dibujucunata ricay).

⁴ Yarpachacushun María Magdalena judía warmi rurashganta. Payga alapa nacaycargan ganchis supaycunapa munaynincho caycaptin. Öraga yarpachacurganchi chaypita mana aliyarcunanpaj. Ichanga ¡mayrajchi cushicurgan paypita chay supaycunata Jesús garguriptin! Chaymi Jesuspa gatirajninman ticraycurgan y tiempuntapis, calpantapis y imaycancunatapis utilizargan Jesusta atiendinanpaj (Luc. 8:1-3). María alapa agradecida caycaptinpis Jesús alchacächishganpita, manami shumaj tantiarganrächu cargan ichiclacho Jesús lapan runacunaraycur imata ruramunanpaj cajta. Jesusga wanunmanmi cargan, chaynopa pipis payman yäracuptin imaycamapis cawayta tarinanpaj (Juan 3:16). Imano captinpis, Mariaga agradecida cashpan Jesusta gatir manami jaguirganchu. Jesús clavarashga caycaptinpis payga chaycho caycargan Jesusta y waquincunatapis yanapänanpaj (Juan 19:25). Jesusta pampananpaj caycaptin, Mariawan ishcay warmicuna ali asyaj jampita apargan Jesuspa cuerpunman winananpaj (Mar. 16:1, 2). María chay lapanta rurashganpita Jehová bendiciycurgan. Alapachi cushicurgan Jesús cawarimushganta ricar y paywan yapay parlar. Mariata pasashganga manami lapan discipulucunataga pasarganchu (Juan 20:11-18).

5. ¿Imacunata rurartaj agradecicunchi Jehovawan Jesús noganchiraycur lapan rurashganpita?

⁵ Noganchipis Jehovawan Jesús noganchiraycur lapan rurashganta agradecicushpanchi  imaycacunata rurayta puedinchi. Chayga canman lapan calpanchita, tiempunchita y charashganchicunatapis utilizaptinchi Jehovapa Gobiernunta puntaman churanapaj. Capazchi yanapacushwan Diosta aduranapaj localcunata sharcachiycho o cuidanapäpis.

6. ¿Imanirtaj ninchi Jesús wanushganga jucninchi jucninchipaj juc regalo cashganta?

⁶ Taytalanchi Jehová y Jesuspis alapa cuyamashganchita yarpar, waquincunatapis cuyananchipaj munayculanchi (1 Juan 4:10, 19). Jesús jucninchi jucninchipaj wanushganta tantiarga paycunata masraj cuyayculanchi. Apóstol Pablo Jesuspa wanuyninman yarpar agradecicushpan cayno escribergan Gálatas cristianucunata: “Paymi cuyamasha y noga raycu wañusha” nir (Gál. 2:20, AP). Jesús wanushganraycur, Jehová marcanman pushashushcanqui amigun canayquipaj (Juan 6:44). Y chayno cananpaj payga japalan cuyashga wamranta cachamurgan wanunanpaj, ¿manachu chayta musyarga cushichishunqui Jehová gamcho ali cajta ricashganpita? ¿Manachu Jehovatawan Jesusta mastaraj cuyanayquipaj yanapäshunqui? Chaymi cayno tapucunanchi: “Jehovatawan Jesusta cuyashpä, ¿imacunataraj ruräman?” nir.

7. Fotucho ricaycanganchino, ¿imata rurartaj Jehovatawan Jesusta cuyashganchita musyachicunchi? (2 Corintios 5:14, 15; 6:1, 2).

⁷ Jehovatawan Jesusta cuyashganchimi yanapämanchi waquincunatapis cuyanapaj (leiriy 2 Corintios 5:14, 15; 6:1, 2). Y chayga ricacämun pï maytapis Diospita cushi cushila parlapaptinchi. Tucuy marcacunapita, razacunapita, guellayyoj o mana guellayyoj cajcunatapis predicanchimi. Chaynopa Jehovapa mincancuna japuy caycanchi, “Payga munan llapan runacuna alli willacuyninta chasquicur salbacunantami” y Bibliapita rasunpa cajta yachacärinanpaj (1 Tim. 2:4).

8. ¿Imacunata rurartaj musyachicunchi hermanunchicunata cuyashganchita?

 ⁸ ¿Imano mastaj musyachicunchi Jehovatawan Jesusta cuyashganchita? Hermanunchicunata cuyaptinchimi (1 Juan 4:21). Tantiarinapaj, jucnin jucninpämi yarpachacunchi y sasacunapa pasaptenga listo caycanchi yanapänapaj. Wanupacushga captin shoganchi, gueshyawan nacaycaptin watucanchi y laquicuypaj pasaptin maquinchicho lapan caycashgancunata ruranchi shacyächinapaj (2 Cor. 1:3-7; 1 Tes. 5:11, 14). Jina paycunapaj mañacuptinchega musyanchimi “Tayta Dios munashanno goyaj runa mañacushantaga Tayta Dios” wiyashganta (Sant. 5:16).

9. ¿Ima masta rurartaj hermanunchicunata cuyashganchita musyachicunchi?

⁹ Hermanunchicunawan ali apanacunapaj calpachacuptinchega, ricächicunchi paycunata alapa cuyashganchita. Y Jehovano perdunaycunchi. Cayman yarpachacushun: juchanchiraycur Jehová wamranta wanunanpaj cachamushga captenga, ¿manachuraj hermanunchicuna contranchicho imalatapis ruraptenga jucla perdunaycushwan? Jesusga wilacurgan juc fiyu esclavo imata rurashganpita. Paypa jagan jatun caycaptinpis patrunninga perdunaycurgan, ichanga payga esclavo masinta perdunayta manami munarganchu jagan walcala caycaptinpis, y payno caytaga manami munanchichu (Mat. 18:23-35). Chauraga, maygan hermanulawanpis rabiachinacushga carga, ali canman quiquiqui payta ashinayquipaj Conmemoración manaraj chayamuptin amistanacunayquipaj (Mat. 5:23, 24). Chayta ruraptiquega Jehovatawan Jesusta alapa cuyashgayquita ricacämunga.

10, 11. ¿Imacunata rurartaj ancianucunaga Jehovatawan Jesusta cuyashganta musyachicun? (1 Pedro 5:1, 2).

¹⁰ ¿Imanotaj ancianucunaga Jehovatawan Jesusta cuyashganta musyachicunman? Jesuspa uyshancunata cuyacuywan cuidaptin (leiriy 1 Pedro 5:1, 2). Diospa Wamran apóstol Pedruta chayta rurananpaj nergan. Pedro quimsa cuti niegashganpita payga munarganchi Jesusta cuyashganta ricächicuyta. Chaymi Jesús cawarircamur Pedruta tapupargan: “Simón, ¿gam cuyamanquichu?” nir. Pedruga imatapis ruranmanchi cargan Jesusta rasunpa cuyashganta ricächicunanpaj. Jesusna nergan: “Uyshäcunata sumaj ricay” (Juan 21:15-17). Chaypita pacha Jesuspa uyshancunata Pedruga ali ricargan, chaynopa Jesusta cuyashganta musyachicurgan.

¹¹ ¿Imanotaj ancianucuna Jesús Pedruta nishganta casucärinman Conmemoración cashgan wichan? Paycunaga Jehovatawan Jesusta cuyashganta musyachicun calpachacuptin hermanucunata cada cadala watucaptin y gasacashga o carupacushga cajcunata yanapaptin cutimunanpaj (Ezeq. 34:11, 12). Jina Bibliapita yachacuycajcunawanpis parlapacärinmanmi y chaylaraj puntata Conmemoraciunman aywajcunawanpis. Paycuna Jesuspa discipuluncunaman ticrananpaj munapäcun, chaymi lapancunata ali chasquicärin.

12. Jesús wanunanpaj caycaptin ima nishganta yarparga, ¿imanirtaj yanapämanchi valurcharcunapaj? (Juan 16:32, 33).

¹² Jesús wanunanpaj chacaycho discipuluncunata nergan: “Cay pachachru nacapäcunquim. Ichanga valurchacäriy; cay pachata munayninchru chararag munayniyogcunata vincishcänam” (leiriy Juan 16:32, 33). Jehovaman yäracushganmi Jesusta yanapargan chiquejnincuna wanuchiyta munaptinpis, valurcharcunanpaj y wanunanyaj Taytanta mana cachaycunanpaj. Discipuluncunapis  sasa pruebacunapa pasananpaj cajta musyar, Jesusga Taytanta mañacurgan cuidananpaj (Juan 17:11). ¿Imanirtaj cayga yanapämanchi valurcharcunapaj? Jehovaga lapan chiquimajninchicunapita más poderyojmi (1 Juan 4:4). Y payga lapanpita altanto caycan. Chaura Jehovaman lapan shongunchiwan yäracuptinchega, ima manchacuyninchipis ilacanga; valiente cashun.

13. Arimatea marcapita José runa valurcharcur, ¿imataj rurargan?

¹³ Yarpachacushun Arimatea marcapita José runaman, payga judiucunapa jatun carguyoj autoridäcunapita juc mandajmi cargan. Chaymi runacuna payta respetaj. Chayno captinpis Jesús predicashgan wichan manchacoj runa cargan. Juanga nin: “Josëpis Jesuspa disïpulunmi caran. Ichanga mandaj Israelcunata manchacushpanmi mana musyachicuranchu” (Juan 19:38). Diospa Gobiernunpita yachacuyta munarpis, Jesustaga pacaylapa gatirgan. Runacuna manana respetananpaj manchacurchi chayta ruraj. Imano captinpis Bibliaga wilacun Jesús wanushgana captin José valurcharcur, “mana manchacuypa Pilatuman aywaran ‘Jesuspa cuerpunta pampachicushaj’ ninanpaj” (Mar. 15:42, 43). Jesusman yäracushganta mana pacarächergannachu.

14. Waquincuna ima nishganta mana manchacunapaj, ¿imataj rurananchi?

¹⁴ Arimatea marcapita runata pasashganno, ¿gampis manchacunquicu waquincuna gampita ima ninanpaj? ¿Pengacunquicu escuelayquicho o trabajuyquicho Testigo cashgayquita ninayquipaj? ¿‘Nircur-raj predicayta galaycushaj o bautizacushaj’ nirmi yarpachacunqui? Waquincuna gampita ima ninanpaj manchacushgayquiraycur ama jaguiriychu ali cajta ruranayquipaj. Jehovata ruwacuy yanapäshunayquipaj y valurtapis goycushunayquipaj voluntäninta ruranayquipaj. Mañacamushgayquita contestashganta ricar masraj valurcharcunqui y sinchiman ticranqui (Is. 41:10, 13).

15. Jesús cawarimushganpita discipuluncuna cushishga caycar, ¿imataj rurapäcurgan? (Lucas 24:52, 53).

¹⁵ Jesús wanuriptin discipuluncunaga alapachi laquicärergan. Gam chaycho caycaptiquega, ¿imanoraj sienticunquiman cargan? Discipuluncunaga cuyashgan amigunta ograshga cargan y shuyarashgan cajcunapis ushacarganchi (Luc. 24:17-21). Pero Jesús cawarircamur paycunata yuripar tantiachergan payta wanuchishganga cargan Biblia wilacushgan cumplicunanpaj. Jina juc shumaj rurayta rurapäcunanpaj nergan (Luc. 24:26, 27, 45-48). Chaura  40 junajcunana pasariptin, Jesús cielupäna cuticuycaptin discipuluncunaga manami laquicurgannachu, lapancuna cushishga carcaycargan. Cushicärergan Jesús yapay cawaycashganta ricar y yanapänanpaj cajta musyar. Cushishga caycashganmi yanapargan Jehovata mana yamacaypa alabapäcunanpaj (leiriy Lucas 24:52, 53; Hech. 5:42).

16. Jesuspa discipuluncuna rurashganno, ¿imatataj noganchipis rurashwan?

¹⁶ Noganchipis Jesuspa discipuluncuna rurashganno Jehovata cushi cushilami sirvishwan y chayga manami canmanchu Conmemoración wichanlacho. Chayno cananpäga Diospa Gobiernunta imapitapis más puntaman churashwan. Tantiarinapaj, waquincunaga ichic cambiucunata rurargan aruynincunacho tiempun más caycänanpaj predicananpaj, reuniuncunaman aywananpaj y cada semana familianwan Diospita yachacunanpaj. Waquincunanami camacächergan charashgancunalawan cawapäcunanpaj, chaynopa congregaciuncho más yanapacunanpaj o Testigo mana cashgan sitiucunacho predicar aywananpaj. Rasunpa cajchoga calpachacushwanrämi Jehovata sirvir caycänapaj, y payga aunimanchi Gobiernunta puntaman churaptinchega imayca bendiciuncunata gomänanchipaj (Prov. 10:22; Mat. 6:32, 33).

17. ¿Imacunatataj rurashwan Conmemoración wichancho? (Fotuta ricay).

¹⁷ Mayna munaycunchinami martes 4 abril quilla chayamunanpaj Conmemoraciunta ruranapaj. Ichanga ama shuyarashwanrächu chay junajchoraj Jesús cawaycar imacunata rurashganta y wanuyninman yarpachacunapaj y Jehovawan Jesús cuyamashganchiraycur imata rurashgantapis. Alimi canman tiempuyquita camacächir apéndice B12 nishganta Traducción del Nuevo Mundo Bibliacho “La última semana de Jesús en la tierra” cajpita leiramunayquipaj. Nircur yanapäshunayquipaj textucunata acray, chaycunaga canman valurcharcunayquipaj, agradecido cashgayquita, cuyacuyniquita y cushish cashgayquita ricächicunayquipaj. Jina yarpachacuy imacunata rurartaj shongupita pacha agradecido cashgayquita musyachicunayquipaj. Chaycunata rurarga ama gongaychu: Jesús ali nawilanwan ricanga lapan rurashganchicuna Conmemoración wichancho wanuyninta yarpänapaj (Apoc. 2:19).