1-2. (a) Sar osetinaja amen ked razmislinaja ando Isuseso životi hem andi olesi služba? (b) Sostar ka vaćera ko akava članko?

 KED merela amendar neko kas but mangljam, odija osoba but falini amenđe. Ki početka, osetinaja bari dukh ked razmislinaja ando olake poslednja dive, pogotovo ako but mučinđa pe angleder te merel. Ama, sar đala o vreme, ked god setinaja amen ko odova so odija osoba sikavđa amen, sar pomožinđa amen, sar ohrabrinđa amen ja sar asaćerđa amen, amen hijam but bahtale.

² Isto ađahar, amen hijam but tužna ked čitinaja kobor o Isus patinđa hem sar mulo. Ko period andi Spomen-svečanost, amen odvojinaja vreme te razmislina ando odova so ov ćerđa amenđe (1. Kor. 11:24, 25). Tegani, hijam but bahtale, sose ki godi avela amenđe sa odova so o Isus ćerđa hem phenđa ked hine ki phuv. Odova podstaknini amen te razmislina hem odolestar so o Isus akana ćerela hem so ka ćerel ki budućnost. Ked razmislinaja ando odola buća hem ando oleso mangipe, odova podstaknini amen te mothova lese zahvalnost, sar so ka dikha ko akava članko.

3. Kola razlogija isi amen te ova zahvalna e Jehovase hem e Isusese?

³ Ked razmislinaja ando Isuseso životi hem ando oleso meribe, amen osetinaja zahvalnost. Ked hine ki phuv, o Isus vaćerđa e manušenđe kola šukar buća ka oven amen ked ka avel e Devleso Kraljevsto. Amen but ceninaja odova so i Biblija sikavi amen andi otkupnina hem sa odova so isi amen sebepi i otkupnina. Oj phravđa o drumo te šaj te ova e Jehovase hem e Isusese amala. Okola so mothovena  vera ki Isusesi otkupno žrtva, isi len nada so ka živinen večno hem so palem ka dikhen pe manglen kola mulje (Jov. 5:28, 29; Rimlj. 6:23). Amen na ćerđam ništa sova bi zaslužinaja odola blagoslovija niti šaj te irina e Devlese hem e Isusese aso sa odova so ćerđe amenđe (Rimlj. 5:8, 20, 21). Ama, šaj te mothova kobor hijam zahvalna aso odova so ćerđe amenđe. Sar šaj te ćera odova?

4. Sar i Marija Magdalena mothovđa so hine zahvalno e Isusese? (Dikh i slika.)

⁴ Te dikha o primer andi jekh Jevrejka koja vićinđa pe Marija Magdalena. Oj but patinđa sose ano late hine efta demonija. Verovatno mislinđa so olaće niko našti te pomožini. Odolese šaj samo te zamisline kobor hine zahvalno ked o Isus phenđa odole demonenđe te ikljon olatar. Sebepi odova, oj ulji e Isuseso učeniko hem koristinđa po vreme, pi snaga hem pe materijalna buća te podupirini le ki služba (Luka 8:1-3). Iako i Marija but ceninđa odova so o Isus već ćerđa laće, oj pana na đanđa so o Isus ka ćerel laće ki budućnost. Ov dinđa po životi e manušenđe „te na ovel uništimo nijekh kova mothovi vera ano leste, nego te ovel le večno životi“ (Jov. 3:16). Ama, i Marija mothovđa soj tani zahvalno ađahar so aćhilji verno. Ked o Isus hine kovimo ko stubo, i Marija hine othe te podržini le hem te ohrabrini averen (Jov. 19:25). Palo odova so o Isus mulo, i Marija hem pana duj romnja anđe disavo mirisno ulje ko Isuseso grobo (Mar. 16:1, 2). O Jehova blagoslovinđa e Marija sose aćhilji verno e Isusese. Ked ov uskrsninđa, oj dikhlja le hem vaćerđa oleja, a đanaja so but ando olese učenikija na hine len odija čast (Jov. 20:11-18).

5. Sar šaj te mothova amari zahvalnost aso sa odova so ćerđe amenđe o Jehova hem o Isus?

⁵ Avdije, amen mothovaja so hijam zahvalna e Jehovase hem e Isusese ađahar  so koristinaja amaro vreme, snaga hem materijalna buća te podupirina o Kraljevstvo. Na primer, amen šaj te pomožina te gradinen pe amare objektija ja dvorane.

6. Sose šaj te phena so i otkupnina tani poklon kova tano dindo lično tuće?

⁶ Ked razmislinaja kobor o Jehova hem o Isus mangena amen, odova podstaknini amen hem amen te manga olen (1. Jov. 4:10, 19). Pana pobuter mangaja len ked haljovaja so o Isus mulo amenđe. O apostol Pavle haljilo odova hem ked pisinđa e hrišćanenđe ki Galatija mothovđa kobor tano zahvalno aso odova. Ov phenđa: „E Devleso Ćhavo... manglja man hem dinđa po đivdipe maje“ (Gal. 2:20). Sebepi so o Isus mulo, o Jehova šaj te privucini tut koro peste hem te ove oleso amal (Jov. 6:44). Sigurno hem tu hijan but bahtalo ked đaneja so o Jehova dikhlja odova soj tano šukar koro tute hem so platinđa bari cena te šaj te ove oleso amal. Akana pana pobuter mangeja e Jehova hem e Isuse. Odolese, šukar tano te puća amen: „So odova mangipe valjani te podstaknini man te ćerav?“

7. Sar so dikhaja ki slika, sar šaj te mothova amaro mangipe premalo Jehova hem o Isus? (2. Korinćanima 5:14, 15; 6:1, 2.)

⁷ Amaro mangipe premalo Devel hem o Isus podstaknini amen te mothova mangipe averenđe. (Čitin 2. Korinćanima 5:14, 15; 6:1, 2.) Jekh način sar šaj te ćera odova tano te da sa amendar ki služba. Amen vaćeraja sa e manušencar, na dikhaja savi boja kože isi len ja koja ćhib vaćerena, niti dikhaja da li tane barvale ja ćorore. Ađahar mothovaja so ćeraja e Jehovasi volja, sose ov „mangela te spasinen pe sa o manuša hem šukar te penđaren o ćaćipe“ (1. Tim. 2:4).

8. Sar šaj te mothova mangipe premalo amare phralja hem phenja?

 ⁸ Isto ađahar, amen mothovaja so mangaja e Jehova hem e Isuse ked mothovaja mangipe premalo amare phralja hem phenja (1. Jov. 4:21). Sar ćeraja odova? Brininaja amen olendar hem trudinaja amen te pomožina len ked isi len pharipa. Tešinaja len ked neko merela lendar, đaja koro lende ked tane naborme hem ohrabrinaja len ked tane obeshrabrime (2. Kor. 1:3-7; 1. Sol. 5:11, 14). Molinaja amen olenđe odolese so „e pravednikosi molitva koja avela ando vilo isi la bari snaga“ (Jak. 5:16).

9. Kova tano pana jekh način sar šaj te mothove so mangeja e Jehova hem e Isuse?

⁹ Amen mothovaja mangipe amare phralenđe hem phenjenđe hem ked daja sa amendar te ova ko mir olencar. Mangaja te oponašina e Jehova ađahar so spremno ka oprostina. Ako o Jehova hine spremno te del pe Ćhave te merel amenđe, tegani hem amen valjani spremno te oprostina amare phralese kova povredinđa amen. Amen na mangaja te ova sar o lošno robo ando Isuseso poređenje. Iako oleso gospodari oprostinđa lese o dugo kova hine but baro, ov na manglja te oprostini jekh but potikno dugo avere robose (Mat. 18:23-35). Odolese, ako isi tut disavo problemi te phraleja ja te phenjaja, da li bi šaj tu prvo te đa hem te vaćere te phraleja ja te phenjaja angleder i Spomen-svečanost? (Mat. 5:23, 24). Ađahar šaj te mothove kobor ćaće mangeja e Jehova hem e Isuse.

10-11. Sar šaj o starešine te mothoven so mangena e Jehova hem e Isuse? (1. Petrova 5:1, 2)

¹⁰ Sar šaj o starešine te mothoven po mangipe e Jehovase hem e Isusese? Ađahar so ka brininen pe ando odova so valjani e Isusese bakrenđe. (Čitin 1. Petrova 5:1, 2.) O Isus istakninđa odova ked vaćerđa e Petareja. Palo odova so trin putija odrekninđa pe ando Isus, o Petar hine le bari želja te mothovi lese kobor mangela le. Palo odova so uskrsninđa, o Isus pućlja e Petare: „Simone, e Jovaneso ćhavo, da li mangeja man?“ Šaj te ova sigurna so bi o Petar ćerela sa so šaj te mothovi po mangipe pe Gospodese. O Isus phenđa lese: „Parvar me tikne bakren“ (Jov. 21:15-17). Palo odova, o Petar celo po životi brininđa pe ando pe Gospodese bakre hem ađahar mothovđa kobor manglja le.

¹¹ Phraljalen kola služinena sar starešine, sar šaj ko period andi Spomen-svečanost te mothoven so hem tumenđe tano važno odova so o Isus phenđa e Petarese? Tumen šaj te mothoven so mangena e Jehova hem e Isuse ađahar so redovno ka odvojinen vreme te ohrabrinen e phralen hem ađahar so ka pomožinen len kobor god šaj (Jezek. 34:11, 12). Isto ađahar, šaj te ohrabrinen okolen kola proučinena hem okolen kola prvo puti alje ki Spomen-svečanost. Amen mangaja on te osetinen pe šukar ked ka aven, sose nadinaja amen so hem on jekh dive ka oven e Isusese učenikija.

12. Sose šaj te ohrabrinen amen e Isusese lafija kola phenđa i rat angleder te merel? (Jovan 16:32, 33)

¹² I rat angleder te merel, o Isus phenđa pe učenikonenđe: „Ko sveto ka oven tumen pharipa, ama oven hrabra, me pobedinđum o sveto.“ (Čitin Jovan 16:32, 33.) So pomožinđa e Isusese te aćhol verno ked olese dušmanija pretinđe lese? Ov osloninđa pe upro Jehova. Ama, đanđa so hem  olese učenikija ka ovel len slična pharipa hem odolese molinđa e Jehova te pomožini lenđe (Jov. 17:11). Sose akava šaj te ohrabrini amen? Odolese so o Jehova tano but pozoralo ando bilo kova amaro dušmani (1. Jov. 4:4). O Jehova sa dikhela. Amen hijam uverime so ako ka oslonina amen upro leste, ov ka pomožini amenđe te na dara, već te mothova so hijam hrabra.

13. Sar o Josif andi Arimateja mothovđa soj tano hrabro?

¹³ Te dikha o primer ando Josif kotar Arimateja. Ole o Jevreja but poštujinđe. Ov hine član ando Sinedrion, kova hine jevrejsko vrhovno sudo. Ama, ked o Isus hine ki phuv, o Josif ki početka na hine odobor hrabro. O Jovan pisinđa so ov hine „e Isuseso učeniko, ama odova garavđa ando Judejcija sose darandilo“ (Jov. 19:38). Iako o Josif manglja te šunel odova sostar o Isus vaćerđa, ov ipak garavđa averendar so verujinđa ko odova so šunđa. Verovatno darandilo so o manuša više na ka poštujinen le ako ka šunen so hem ov ulo e Isuseso učeniko. Ama, ipak i Biblija phenela so ked o Isus mulo, o Josif ko krajo „ćedinđa hrabrost hem đelo ko Pilat te rodel lestar e Isuseso telo“ (Mar. 15:42, 43). Tegani, o Josif na manglja te garavi soj tano e Isuseso učenik.

14. So valjani te ćere ako daraja ando manuša?

¹⁴ Da li hem tu sar o Josif nekad daraja? Da li ki škola ja ki buti podijekh puti lađaja te phene so hijan e Jehovaso svedoko? Da li tano tuće pharo te odlučine te ove nekršteno objavitelj ja te krstine tut sose daraja so avera ka mislinen tutar? Ma mukh asavke buća te ćhinaven tut te ćere odova soj tano ispravno. Phrav to vilo e Jehovase. Molin le te del tut hrabrost te ćere olesi volja. Ked ka dikhe sar o Jehova odgovorini ko te molitve, odova ka pomožini tuće te ove hrabro (Is. 41:10, 13).

15. Palo odova so pojavinđa pe lenđe o Isus, ko so o bahtalipe podstakninđa e učenikonen? (Luka 24:52, 53)

¹⁵ Ked o Isus mulo, olese učenikija hine but tužna. Šaj li te ćhive tut ko olengo than? On našalđe pe mangle amale hem osetinđe pe soj tane bizi nada (Luka 24:17-21). Ama, ked pojavinđa pe lenđe, o Isus odvojinđa vreme te pomožini lenđe te haljon sar ov ispuninđa e biblijake proročanstvija. Isto ađahar, dinđa len te ćeren jekh but važno zadatko (Luka 24:26, 27, 45-48). Ked palo 40 dive o Isus  đelo ko nebo, on više na hine tužna već hine but bahtale. Sose? On đanđe so o Isus tano đivdo hem so ka pomožini lenđe te ćeren o zadatko kova dinđa len. O bahtalipe podstakninđa len hem ponodri te služinen e Jehovase. (Čitin Luka 24:52, 53; Dela 5:42.)

16. Sar šaj hem amen te ova sar e Isusese učenikija?

¹⁶ Sar šaj hem amen te ova sar e Isusese učenikija? Ađahar so radosno ka služina e Jehovase prekalo celo berš, a na samo ked tano o period andi Spomen-svečanost. Ama te šaj te ćera odova, amen valjani e Devleso Kraljevstvo te ćhiva ko prvo than ko amaro životi. Na primer, but amendar arakhlje buti sebepi koja isi len vreme pana pobuter te propovedinen, te đan ko sastankija hem te ovel len porodično proučibe. Disave odlučinđe te na ovel len but materijalna buća, kola avera mislinena soj tane neophodna. Sebepi odova, on šaj te ćeren pana pobuter buća ki skupština ja te đan ko than kaj valjani pana pobuter objaviteljija. Iako valjani amenđe istrajnost te šaj hem ponodri te služina e Jehovase, amen hijam sigurna so ov ka blagoslovini amen hem ka del amen odova so valjani amenđe ako ćhivaja o Kraljevstvo ko prvo than (Posl. 10:22; Mat. 6:32, 33).

17. So hijan odlučno te ćere ko period andi Spomen-svečanost? (Dikh i slika)

¹⁷ Amen jedva ađićeraja te ava ki Spomen-svečanost koja ka ićeri pe ko utorak 4. april. Ama, amen na ađićeraja te avel odova dive hem tegani te počmina te razmislina ando Isuseso životi hem ando mangipe kova ov hem oleso Dad mothovđe amenđe. Amen valjani te da sa amendar ko period andi Spomen-svečanost pana pobuter te razmislina ando akala buća. Na primer, šaj te odvojine vreme te čitine hem te razmisline ando odova so desinđa pe e Isusese ko oleso poslednjo kurko đi hine ki phuv, sar so šaj te dikha ko okvir ki Radno sveska kotar april 2019. berš. Đi ka čitine odova, trudin tut te arakhe disave stihija kola ka pomožinen tut te ove pana pobuter zahvalno, te ovel tut pana pobuter mangipe, hrabrost hem bahtalipe. Palo odova, razmislin sar šaj te mothove ti zahvalnost. Ov uverimo so o Isus but cenini so deja sa tutar te mothove kobor tano tuće važno i Spomen-svečanost (Otkr. 2:19).