1, 2. a) So simțosaras cana gândisaras-ame ca i viața hai o servicio le Isusosco? b) So va dichaia ande cado articolo?

 CANA merel amenghe varecon drago, iech baro doro astarel ande amaro ilo. Daștil-pe că sam zurales duchade cana gândisaras-ame ca le palutne ghiesa anda leschi viața, vi mai but cana codo jeno nachlea prin bare ducha angla so te merel. Tha, pala so mai nachel o timpo, daștil-pe că astaras te simțosaras pale iech țâra bucuria cana gândisaras-ame ca vareso cai vo sicadea-ame, ca vareso cai vo phendea sau cărdea caște zuriarel-ame sau caște cherel-ame te asas.

² Sa cadea, sam zurales duchade cana citisaras anda le ducha prin save nachlea o Isus hai anda lesco merimos. Ande le curche de angla hai pala i Comemorarea, cheras amenghe timpo te gândisaras-ame mai but ca so bari buchi cărdea o Isus anda amende, cana dea peschi viața sar răscumpărarea. (1 Corinteni 11:24, 25) Cu sea cadala, arachas vi iech bari bucuria cana gândisaras-ame ca le buchia cai cărdea-le hai phendea-le vo cana sas-lo pi phuv. Sa cadea, zuriarel-ame but te gândisaras-ame ca so cherel o Isus anda amende aghies hai so va cherela vi ando viitorii. Cadea sar va avela te dichas mai dur, cana gândisaras-ame ca sea cadal buchia hai ca leschi iubirea anda amende, va avaia zuriarde te sicavas amari recunoștința prin so cheras.

3. Sostar sam recunoscători anda i răscumpărarea?

³ Amaro ilo silo pherdo recunoștința, cana gândisaras-ame ca i viața hai o merimos le Isusosco. Cana sas-lo pi phuv, o Isus dea duma le manușența anda le miștimata cai va anela-le o Regato le Devlesco. Anda amende si zurales cuci cadal ciacimata. Sam zurales recunoscători că i răscumpărarea pâtărdea amenghe o  drom caște daisaras te bucurisaras-ame catar iech amalimos chidino amare Devleia, Iehova, hai lesche Șiaveia, Isus. Sa cadea, codola cai sicaven pachiamos ando Isus daștin te ajucăren-pe te train anda sea o timpo hai te dichen pale codolen drago lenghe cai mule. (Ioan 5:28, 29; Rom. 6:23) Amen ci cărdeam chanci caște meritisaras cadal miștimata hai nici ci va daisaraia vroiechdata te pochinas parpale le Devles hai le Cristosos anda sea so cărde von anda amende. (Rom. 5:8, 20, 21) Tha, amen daisaras te sicavas lenghe chichi de recunoscători sam. Sar?

4. Sar sicadea i Maria Magdalena peschi recunoștința caring so cărdea o Isus anda late? (Dich i imaginea.)

⁴ Te dichas o exemplo iecha jiuvleaco evreico po anav Maria Magdalena. Voi sas-li ande iech situația zurales phari, anda codoia că efta benga chinuinas-la. Daștil-pe că pachialas că ci va mai înclela anda cado baro pharimos. Cadea că te gândisaras-ame chichi de bucurime sas-li cana o Isus hastradea-la tela o zuralimos codole benghengo. Lachi recunoștința cărdea-la te avel iech anda lesche continuatori hai voi folosisardea pesco timpo, zuralimos hai buchia cai sas-la caște ajutil-les ande lesco servicio. (Luca 8:1-3) Chiar cana i Maria dichelas zurales cuci so cărdea o Isus anda late, daștil-pe că ci ajucărdea-pe ca i buchi but mai bari cai avelas te cherel-la vo ande laco miștimos. O Isus avelas te del peschi viața sar jertfa „ca oricon sicavel pachiamos ande leste” te daștil te bucuril-pe viațatar veșnico. (Ioan 3:16) I Maria sicadea peschi recunoștința caring o Isus vi prin peschi loialitatea. Cana o Isus sas-lo po stâlpo de tortură, i Maria așilea pașa leste anda codoia că duchalas-la lestar hai camelas te avel pașa o ilo codolengo cai sas-le duchade code. (Ioan 19:25) Pala so o Isus mulea, i Maria hai aver dui jiuvlea andine mirodenii anda lesco prahimos. (Mar. 16:1, 2) O Iehova dea la Maria iech baro pochinimos anda lachi loialitatea caring o Isus. La sas-la i bari bucuria te dichel le Isusos pala so sas-lo uștiado andal mule hai chiar te del duma leia. Bute discipolen ci sas-len cado baro privilegio. (Ioan 20:11-18)

5. Sar daisaras te sicavas amari recunoștința anda sea so cărde o Iehova hai o Isus anda amende?

 ⁵ Vi amen daisaras te sicavas amari recunoștința anda sea so cărde o Iehova hai o Isus anda amende cana folosisaras amaro timpo, zuralimos hai love caște cheras amari buchi anda o Regato. Sar exemplo, daisaras te das iech vast caște ajutisaras cana vazden-pe sau cherel-pe buchi ca le thana folosime andi închinarea uji.

6. Sostar daisaras te phenas că i răscumpărarea si iech daro anda fiesavo anda amende?

⁶ Cana gândisaras-ame chichi de but iubin-ame o Iehova hai o Isus, cadaia cherel-ame te sicavas lenghe vi amen iubirea. (1 Ioan 4:10, 19) Amari iubirea anda lende bariol vi mai but cana hachiaras că o Isus mulea vi anda amende. O apostolo Pavel hachiardea cado ciacimos, cadea că pherdo recunoștința vo scriisardea caring le galateni: ‘O Șiav le Devlesco . . . iubisardea-ma hai dea-pe pes anda mande’. (Gal. 2:20) Anda codoia că o Isus mulea anda sea le manușa, o Iehova țârdea vi tut peste caște daștis te aves amal leia. (Ioan 6:44) Ci pherel-pe chio ilo bucuriatar cana jianes că o Iehova dichlea vareso lașio ande tute hai pochindea o mai baro prețo caște daștis te aves iech anda lesche amala? Ci bariol vi mai but chi iubirea anda o Iehova hai o Isus? Avelas zurales mișto ca fiesavo anda amende te pușel-pe: „So va oblighila-ma i iubirea te cherav?”.

7. Cadea sar dichas andi imaginea, sar daștil fiesavo anda amende te sicavel peschi iubirea anda o Iehova hai anda o Isus? (2 Corinteni 5:14, 15; 6:1, 2)

⁷ I iubirea anda o Del hai anda o Isus zuriarel-ame te sicavas vi amen amari iubirea caring le manușa. (Citisar 2 Corinteni 5:14, 15; 6:1, 2.) Daisaras te sicavas amari iubirea cana las partea pherde zelo ca i predicarea. Amen das duma anda i vestea lași savore manușența. Ci încăras-ame parpale te das duma le manușența cai sile anda iech rasa sau tribo diferime,  sile barvale sau ciore, sile sicade sau ci jianen lil. Cana cheras cadea, amen pheras o scopo le Iehovasco, cai camel ca „orisavo felo manușengo te aven hastrame hai te arăsăn ca iech prinjianimos exacto le ciacimasco”. (1 Tim. 2:4)

8. Sar daisaras te sicavas că iubisaras amare phralen hai pheian?

⁸ Sicavas că iubisaras le Devles hai le Isusos cana sicavas iubirea vi caring amare phrala hai pheia. (1 Ioan 4:21) Amen rodas-le te dichas so mai cheren, so silen nevoia hai ajutisaras-le cana nachen prin pharimata. Sam pașa lengo ilo cana merel lenghe varecon drago, jias te dichas-le cana sile nasfale hai cheras sea so daisaras caște zuriaras-le cana sile perade. (2 Cor. 1:3-7; 1 Tes. 5:11, 14) Sa cadea, mangas-ame mai dur anda lende anda codoia că jianas mișto so „baro zuralimos si le manglimas cai cherel-les iech manuș orta”. (Iac. 5:16)

9. Sar mai daisaras te sicavas amari iubirea caring amare phrala hai pheia?

⁹ Mai daisaras te sicavas amari iubirea caring amare phrala hai pheia cana cheras sea so daisaras caște așias andi pacea lența. Camas te das amari zor te iertisaras cadea sar o Iehova. Dacă o Iehova sas-lo gata te mechel pesche Șiaves te merel anda amare păcatea, ci trebulas te avas vi amen gata te iertisaras le phralen hai pheian cana păcătuin contra amenghe? Ci camas te avas sar o sclavo nasul anda savo dea duma o Isus ande iech anda lesche parabole. Chiar cana lesco stăpâno choslea lesco baro camimos, codo sclavo ci camlea te chosel o camimos but mai țâno ieche avere sclavosco. (Mat. 18:23-35) Dacă vi tut sas tut iech nehachiarimos varecasa andai congregația, daștias te cheres tu o iechto paso caște aves andi pacea codole jeneia angla so te jias ca i Comemorarea? (Mat. 5:23, 24) Cana cheres cadea sicaves chi bari iubirea anda o Iehova hai anda o Isus.

10, 11. Sar daștin le phure te sicaven penghi iubirea anda o Iehova hai anda o Isus? (1 Petru 5:1, 2)

¹⁰ Le phure daștin te sicaven că iubin le Iehovas hai le Isusos, cana len sama pe le bacrea le Isusosche. (Citisar 1 Petru 5:1, 2.) O Isus sicadea cadai buchi cana dea duma le apostoloia Petru. Pala so o Petru phendea trin-var că ci prinjianel le Isusos, daștil-pe că o Petru camelas anda sea o ilo te sicavel le Isusosche că iubil-les. Pala so sas-lo uștiado andal mule, o Isus pușlea le Petros: „Simon, șiav le Ioanosco, iubis-ma?”. Daisaras te pachias ciaces că o Petru avileas te cherel oriso caște sicavel peschi iubirea caring lesco stăpâno. O Isus phendea caring o Petru: „Le sama pe mânre bacriorre!”. (Ioan 21:15-17) Sea leschi viața, o Petru lea sama pherdo grija pe le bacrea le Raiesche hai cadea sicadea că iubilas-les.

¹¹ Cuci phure, sar daștin te sicaven andel curche angla hai pala i Comemorarea, că hachiaren chichi de importanto si o sfato cai dea-les o Isus le Petrosche? Daștin te sicaven chichi de but iubin le Iehovas hai le Isusos cana cheren tumenghe timpo te zuriaren le phralen hai pheian andai congregația hai cana den sea tumari zor caște ajutin codolen inactivo te aven parpale co Iehova. (Ezec. 34:11, 12) Sa cadea, daștin te zuriaren codolen cai studiin i Biblia hai codolen cai aven anda i iechto data ca i Comemorarea. Cadea, cadala manușa cai daștin te arăsăn te aven discipoli le Isusosche va simțona-pe mișto primime.

12. Sostar den-ame tromai le dumes cai phendea-le o Isus andi riat angla so te merel? (Ioan 16:32, 33)

¹² Andi riat angla so te merel, o Isus phendea le discipolenghe: „Andi lumea va nachena prin bare pharimata, tha tromai! Me biruisardem i lumea”. (Citisar Ioan 16:32, 33.) So ajutisardea le Isusos te avel tromano cana le  dușmani darade-les hai sar așilea vo loialo ji co merimos? Vo șiutea pesco pachiamos ando Iehova. Anda codoia că o Isus jianglea că vi lesche discipoli avenas te nachen prin sa cadal pharimata, vo manglea pesche Dades te lel sama pe lende. (Ioan 17:11) Cadaia zuriarel vi amen hai del-ame tromai, că jianas că o Iehova silo but mai zuralo sar orisavo dușmano. (1 Ioan 4:4) Vo dichel sea le buchia. Cadea că, amen pachias anda sea o ilo că, cana șioas amaro pachiamos ando Iehova, daisaras te nachas părdal amare daraimata hai te sicavas tromai.

13. Sar sicadea tromai o Iosif anda Arimateea?

¹³ Te dichas o exemplo ieche evreosco po anav Iosif anda Arimateea. Vo sas-lo iech jeno mișto dichlo mașcar le manușa anda leschi vremea. Vo cherelas partea anda o Sanhedrino, i mai bari curtea iudaico. Tha, chichi timpo o Isus cărdea pesco servicio pi phuv, o Iosif ci sicadea tromai. O Ioan phendea că „sas iech discipolo le Isusosco – tha garades, anda codoia că daralas catar le iudei”. (Ioan 19:38) Cu sea cadala, vo camelas te prinjianel mai but anda o mesajo le Regatosco, tha garades, bi ca le coaver te jianen că sas-les pachiamos ando Isus. Daștil-pe că vo daralas te na hasarel peschi pachiv angla le manușa. Orisar așile le buchia, i Biblia phenel amenghe că pala so mulea o Isus, ji la urmă, o Iosif „cărdea pesche tromai hai gălea andre co Pilat caște manghel o corpo le Isusosco”. (Mar. 15:42, 43) O Iosif ci mai garadea că si iech discipolo le Isusosco.

14. So trebulas te cheres dacă daras le manușendar?

¹⁴ Daras vi tu catar le manușa, cadea sar o Iosif? Si tuche lajiav poiechdata ca i școala sau ca i buchi te phenes că san iech Martoro le Iehovasco? Încăres-tu parpale te cărdios iech vestitoro sau te boles-tu anda codoia că daras so va pachiana le coaver anda tute? Na mech ca cadal buchia te așiaven-tu te cheres so si orta! Mang-tu anda sea o ilo le Iehovasche. Mang-les te del-tu tromai te cheres leschi voința. Cana va avela te diches sar del o Iehova răspunso ca che manglimata, va aveia mai zuralo hai mai tromano. (Is. 41:10, 13)

15. So cărdea i bucuria le discipolen te cheren, pala so o Isus sicadea-pe lenghe? (Luca 24:52, 53)

¹⁵ Cana o Isus mulea, le discipoli sas-le zurales duchade. Gândisar-tu so avelas ande chio ilo dacă avileanas ande lengo than. Von hasarde na numai iech cuci amal, tha pachiaie că hasarde vi penghi speranța. (Luca 24:17-21) Tha, cana o Isus sicadea-pe lenghe, vo cărdea pesche timpo te ajutil-le te hachiaren sar pherdea vo le profeții biblico. Sa cadea, vo dea-le te  cheren iech buchi importanto. (Luca 24:26, 27, 45-48) Pala 40 ghiesa, cana o Isus vazdea-pe co cerii, i duch le discipolenghi parudea-pe ande iech bari bucuria. Von sas-le zurales voime anda codoia că jianenas că o Isus sas-lo jiuvindo hai că avelas te ajutil-le te cheren i buchi cai dea-la lenghe. Lenghi bucuria cărdea-le te așaren le Iehovas sea o timpo. (Citisar Luca 24:52, 53; Fap. 5:42.)

16. Sar daisaras te las-ame pala le discipoli le Isusosche?

¹⁶ Sar daisaras te las-ame pala le discipoli le Isusosche? Vi amen daisaras te arachas bucuria cana slujisaras le Iehovasche na numai andel curche angla hai pala i Comemorarea, tha sea o bărș. Cadaia însemnol te șioas o Regato po iechto than ande amari viața. Sar exemplo, but jene parude pengo programo ca i buchi caște daștin te jian mai but andi predicarea hai ca le întruniri sau caște daștin te încăren i închinarea andi familia ande fiesavo curco. Chichiva alosarde te na aven-len anumime buchia materialo cai le coaver manușa pachian că trebulas lenghe, caște daștin te cheren mai but buchia andi congregația sau te slujin ande thana cai si mai but nevoia phralendar. Si ciaces, trebul amenghe zuralimos te na mechas-ame hai te slujisaras sea o timpo le Iehovasche. Tha, cana cheras cadea, o Iehova va dela-ame but miștimata. (Prov. 10:22; Mat. 6:32, 33)

17. So cames te cheres ande le curche angla hai pala i Comemorarea anda cado bărș?

¹⁷ Abia ajucăras te jias ca i Comemorarea, cai va încărela-pe marține, 4 aprilia. Tha ci trebul te ajucăras cado ghies caște gândisaras-ame ca i viața hai o merimos le Isusosco, hai vi ca i iubirea cai vo hai o Iehova sicade-la amenghe. Gândisar-tu chichi mai but cadale buchiande ande sea le curche angla hai pala i Comemorarea. Sar exemplo, cher tuche timpo te citis hai te gândis-tu ca le evenimentea sicade ando Apendice B12 anda I Traducerea la lumeachi nevi, cai bușiol „O palutno curco anda i viața le Isusoschi pi phuv”. Cana cheres cadaia, rode le versetea biblico cai bariaren chi recunoștința, iubirea, tromai hai bucuria. Pala codoia de chi zor te gândis-tu sar daștis te sicaves chi aprecierea anda sea o ilo. Cher sea so daștis ca ande cadal curche angla hai pala i Comemorarea te anes ande chi goghi sea so cărdea o Isus anda tute. Daștis te pachias ciaces că vo dichel che eforturi hai că sile zurales cuci anda leste.