1-2. a) Mety hanao akory tsika lafa mametsivetsy ty fiainani-Jesosy noho ty fanompoany? b) Ino ty hodinihintsika amy lahatsoratsy toy ato?

 LAFA maty ty olo raiky teantsika, le malahelo marè azy tsika. Tena maharary ty aintsika amy voalohany lafa mieritseritsy ani-andro vitsivitsy talohani-nahafatesany rey, sirtò moa laha tena nijalijaly longontsika iny vo nimaty. Fe lafa mandeha ty fotoa, le manomboky falifaly ndraiky tsika lafa mandiniky ty raha nampianariny antsika, na ty raha nataony noho nivolaniny ka nampahery na nampihehy antsika.

² Manahaky ani-zay koa fa malahelo tsika lafa mandiniky ty fijaleani-Jesosy noho ty nahafatesany. Saky avy ty vanim-potoani-Fahatiarova, le manoka fotoa tsika mba hametsivetsea ani-soro lafovily nataoni-Jesosy iny. (1 Kor. 11:24, 25) Fe tena falifaly tsika lafa mandiniky ty raha iaby nivolanini-Jesosy noho nataony tamin’ie tan-tany etoy. Mampahery antsika koa ty mametsivetsy ty raha fa ataony ho antsika henanizao noho ty raha mbo hataony ho antsika amy hoavy. Lafa tsika mametsivetsy ani-raha reo noho ty fitiavany antsika le lasa voatosiky hankasitraky azy. Handiniky fomba vitsivitsy hanaovantsika ani-zay tsika amy lahatsoratsy toy ato.

3. Manino tsika ro mankasitraky ty vilim-panavota?

³ Lasa ta hankasitraky ani-Jesosy tsika lafa mandiniky ty fiainany noho ty nahafatesany. Tamy Jesosy tan-tany etoy, le nampianariny olo ty fitahia handesini-Fanjakà-Ndranahary. Tena teantsika ty raha ampianarini-Baiboly mikasiky ty vilim-panavota noho ty soa azo baka amy raha io. Mankasitraky ty vilim-panavota tsika satria io ro manampy antsika hifandramby  soa amy Jehovah noho Jesosy. Ze mampiseho finoa ani-Jesosy koa le afaky mitamà ho velo mandrakizay noho hahita ndraiky ani-longony fa nimaty rey. (Jaona 5:28, 29; Rom. 6:23) Laha ty marina, tena tsy maeva hahazo ani-raha soa iaby reo tsika. Tsy ho voavalintsika koa ty raha soa natao-Ndranahary noho Kristy tamintsika. (Rom. 5:8, 20, 21) Fe ndre zay, le afaky asehontsika hoe tena ankasitrahantsika rozy. Akory ty hanaovantsika ani-zay?

4. Ino ty nataoni-Maria Magdalena mba hampisehoa hoe nankasitrahany ty raha nataoni-Jesosy ho azy? (Henteo sary io.)

⁴ Diniho moa ty tantarani-ampela raiky jiosy mana anara Maria Magdalena toy. Tena nijaly ie satria nisy demonia fito nampijalijaly azy. Azo antoky fa nieritseritsy ampela io hoe tsy misy olo afaky hanampy azy. Ka mba eritsereto amy zay moa hoe nanao akory ty hafaleany lafa nafahini-Jesosy demonia rey! Tena nankasitraky ani-Jesosy ie ka lasa mpanori-dia azy. Nampiasa ty fotoany, ty heriny, noho ty fananany koa ie mba hanohana ani-Jesosy tamy fanompoa. (Lioka 8:1-3) Marina fa nankasitraky ty raha nataoni-Jesosy ho azy Maria, fe mety tsy nihainy hoe hanao raha soa maro ho azy ie amy hoavy. Hanome ty ainy ho ahi-ty olombelo ie, soa mba hahazo fiaina mandrakizay “ze mampiseho finoa azy.” (Jaona 3:16) Fe ndre zay, le nasehoni-Maria hoe nankasitraky ani-Jesosy ie ka tsy nivaliky taminy. Lafa Jesosy nijalijaly tamy hazo fijalea eo, le nijano narìny azy teo avao Maria, satria nidary ani-Jesosy ie sady ta hampahery an’olo teo rey. (Jaona 19:25) Lafa nimaty amy zay Jesosy, le nanday raha manitsy tamy fasana nisy ani-Jesosy iny tany Maria noho ampela roe namany rezay. (Mar. 16:1, 2) Nahazo valisoa baka amy Jehovah Maria satria tsy nivaliky tamy Jesosy. Nifalifaly ie nahita ani-Jesosy noho niresaky taminy tafarani-nameloma azy iny. Tena tombontsoa raha zay, satria vitsivitsy avao ty mpianatsini-Jesosy nana ani-zay.​—Jaona 20:11-18.

5. Akory ty ampisehoantsika hoe ankasitrahantsika ty raha iaby nataoni-Jehovah noho Jesosy ho antsika?

 ⁵ Asehontsika koa hoe ankasitrahantsika ty raha iaby nataoni-Jehovah noho Jesosy ho antsika laha mampiasa ty fotoantsika, ty herintsika, noho ty hananantsika tsika mba hampandrosoa ty asani-Fanjakà iny. Azontsika atao, ohatsy, ty manampy amy fanamboara noho fikojakojà trano ampiasantsika amy fanompoa ani-Jehovah rey.

6. Manino tsika ro mivola fa fanomeza natao ho antsika kiraidraiky ty vilim-panavota?

⁶ Lasa ho tea ani-Jehovah noho Jesosy tsika laha mametsivetsy hoe tena tea antsika rozy. (1 Jaona 4:10, 19) Vomaiky ho tea an-drozy tsika lafa haintsika hoe nimaty ho antsika kiraidraiky mihintsy Jesosy. Nahay ani-zay apostoly Paoly ka nivola ty fankasitrahany ie lafa nanoratsy ho ani-Galatianina reo. Hoy ty asany: “Anaki-Ndranahary iny ... tea ahy ka nanolotsy ty vatany ho ahy.” (Gal. 2:20) Lafa nimaty Jesosy, le afaky nitao anao Jehovah amy zay iha mba ho lasa namany. (Jaona 6:44) Tsy midosiky ty fonao va ty mahay hoe nahita raha soa taminao tao Jehovah sady nahafoy raha lafovily ie mba hahavy anao ho lasa namany? Tsy vomaiky va raha zay mahavy anao ho tea marè ani-Jehovah noho Jesosy? Tokony hieritseritsy zany tsika hoe: ‘Mandrisiky ahy hanao ino fitiava zay?’

7. Laha hentea sary io, akory ty azontsika iaby ampisehoa hoe tea ani-Jehovah noho Jesosy tsika? (2 Korintianina 5:14, 15; 6:1, 2)

⁷ Lasa tea olo tsika lafa tea a Ndranahary noho Kristy. (Vakio 2 Korintianina 5:14, 15; 6:1, 2.) Asehontsika, ohatsy, hoe tea an-drozy tsika laha mazoto mandramby anjara amy asa fitoria. Iresahantsika iaby ze olo hitantsika. Tsy manavakavaky karaza na fiavia tsika. Iresahantsika iaby ndre mpanarivo ndre mahantra, na olo nianatsy na tsy nianatsy. Laha  manao ani-zay tsika, le manao ty sitraponi-Jehovah satria teany ‘havota ty karazan’olo iaby sady teany hana fahaiza marina soa ty fahamarina.’​—1 Tim. 2:4.

8. Akory ty ampisehoantsika hoe teantsika rahalahy noho anabavintsika reo?

⁸ Asehontsika koa hoe tea a Ndranahary noho Kristy tsika laha tea ani-rahalahy noho anabavintsika reo. (1 Jaona 4:21) Mikarakara ze raha ilàn-drozy tsika sady manampy an-drozy lafa miatriky raha sarotsy rozy. Mampionona an-drozy tsika lafa misy longon-drozy maty, vangintsika rozy lafa marary, le miezaky mampahery an-drozy tsika lafa rozy kivy. (2 Kor. 1:3-7; 1 Tes. 5:11, 14) Tsy mieny mivavaky ho an-drozy tsika, satria haintsika hoe “misy vokany bevata ty fisolohoan’olo marina.”​—Jak. 5:16.

9. Ino koa ty azontsika atao mba hampisehoa hoe teantsika rahalahy noho anabavintsika reo?

⁹ Asehontsika koa hoe teantsika rahalahy noho anabavintsika reo laha miezaky mafy tsika mba hilongo soa amin-drozy avao. Miezaky tsika mba hahay hanenga hadisoa manahaky ani-Jehovah. Laha Jehovah aza parè hanenga ani-Anakilahiny iny ho maty mba hisolo ty fahotantsika, tsy tokony ho parè hanenga ty hadisoani-rahalahy noho anabavintsika reo koa va tsika lafa manao raha tsy mety amintsika rozy? Tsy teantsika ty hanao manahaky ani-mpanompo raty fanahy tamy fanoharani-Jesosy iny. Nananani-tompony trosa be mpanompo io, fe nafoini-tompony io trosa iny. Fe tsy namindra fo tamy mpanompo hafa nananany trosa kelikely mpanompo io. (Mat. 18:23-35) Laha misy olo tsy mifankahazo aminao amy fiangona eo, afaky manao raha voalohany va iha mba hilongoa aminy alohani-hanatreha Fahatiarova? (Mat. 5:23, 24) Laha manao ani-zay iha, le asehonao hoe tena teanao Jehovah noho Jesosy.

10-11. Akory ty ampisehoani-anti-panahy hoe tean-drozy Jehovah noho Jesosy? (1 Petera 5:1, 2)

¹⁰ Akory ty ampisehoani-anti-panahy hoe tean-drozy Jehovah noho Jesosy? Anisani-fomba raiky bevata azon-drozy anaova ani-zay ty fikarakarà ze raha ilàni-aondrini-Jesosy reo. (Vakio 1 Petera 5:1, 2.) Zay mihintsy ty raha nivolanini-Jesosy tamy apostoly Petera. Nisy fotoa Petera nandà ani-Jesosy intelo. Fe naneny ie ka teany haseho tafarani-zay hoe teany Jesosy. Lafa nivelomy tamy maty Jesosy, le nanontany azy hoe: “Nao Simona anakini-Jaona, tea ahy va iha?” Azo antoky fa hanao ze azony atao Petera mba hampisehoa hoe teany Tompony io. Nivola tamy Petera Jesosy hoe: “Araho ... anak’aondriko reo.” (Jaona 21:15-17) Nikarakaràni-Petera soa amy zay aondrini-Tompo rey tafarani-zay, mba hampisehoany hoe teany Jesosy.

¹¹ Nareo anti-panahy, akory ty azonareo ampisehoa hoe vatan-draha aminareo safàni-Jesosy tamy Petera iny lafa avy ty vanim-potoani-Fahatiarova? Asehonareo hoe tena tea ani-Jehovah noho Jesosy nareo laha mazoto mampahery ani-rahalahy noho anabavy reo, sady miezaky manampy ani-ze fa tsy mitory sasy mba hahavy an-drozy himpoly amy Jehovah. (Ezek. 34:11, 12) Azonareo atao koa ty miezaky mampirisiky ani-mpianatsy Baiboly rey noho ty olo hafa mba hanatriky Fahatiarova. Ataontsika ze hahavy an-drozy hahatsapa hoe voaramby soa rozy satria mitamà tsika fa ho lasa mpanori-dia ani-Jesosy koa rozy.

12. Manino ro ho be herim-po tsika laha mametsivetsy ty raha nivolanini-Jesosy tamy haly talohani-nahafatesany iny? (Jaona 16:32, 33)

¹² Nivola tamy mpianatsiny rey Jesosy tamy haly talohani-nahafatesany iny hoe: “Amy zao  tontolo zao ro hahitanareo fijalea, fe manana herim-po! Zaho fa naharesy ani-zao tontolo zao.” (Vakio Jaona 16:32, 33.) Ino ty nanampy ani-Jesosy ho be herim-po avao noho tsy hivaliky mihintsy lafa ie nampijalijalini-fahavalony rey? Niantehitsy tamy Jehovah ie. Haini-Jesosy hoe hiatriky raha sarotsy mitovy amy zay koa ty mpanori-dia azy, ka nangataky ani-Jehovah ie mba hiaro an-drozy. (Jaona 17:11) Manino raha zay ro mampahery antsika? Satria mbo mahery mandilatsy ani-fahavalontsika reo Jehovah. (1 Jaona 4:4) Tsy misy raha mivony aminy ndre raiky. Matoky tsika fa laha miantehitsy aminy tsika, le hampeany hana herim-po noho tsy hatahotsy.

13. Akory ty nampisehoani-Josefa baka a Arimatia any hoe nana herim-po ie?

¹³ Diniho ty ohatsini-Josefa baka a Arimatia. Olo tena nihajàni-Jiosy ie sady anisani-Fitsarà Anabo Jiosy. Fe tamy Jesosy mbo tan-tany etoy, le tsy nana herim-po ie. Nivola Jaona hoe “mpianatsini-Jesosy Josefa io fe tsy nivolambola ie satria natahotsy ty Jiosy.” (Jaona 19:38) Marina fa nahakinto ani-Josefa ty hafatsy mikasiky Fanjakà iny, fe navoniny amin’olo hoe nino ani-Jesosy ie. Azo antoky fa natahotsy ie hoe tsy no hafoiny pilasy anabo nananany iny. Fe mivola ty Baiboly hoe tafarani-nahafatesani-Jesosy, le “nisiky herim-po ie ka nandeha amy Pilato any, le nangataky ty fatini-Jesosy.” (Mar. 15:42, 43) Fa tsy navonivonini-Josefa sasy hoe mpianatsini-Jesosy ie.

14. Ino ty tokony hataonao laha matahotsy olo iha?

¹⁴ Fa nisy fotoa va iha natahotsy olo manahaky ani-Josefa? Nahamenatsy anao va kindraiky ty hivola amin’olo an-dakilasy any na am-piasà any hoe Vavolombeloni-Jehovah iha? Misalasala hitory na hatao batisa va iha satria matahotsy hoe hanao akory ty ho fahitan’olo anao? Ka engà hisaka anao ty raha manahaky ani-zay, fa anovo ze raha hitanao hoe tokony hatao. Mivavaha amy Jehovah. Angataho ie hanampy anao ho be herim-po mba hahafahanao hanao ty sitrapony. Lafa hitanao hoe mamaly ty vavaky ataonao Jehovah, le vomaiky iha hatanjaky noho ho be herim-po.​—Isaia 41:10, 13.

15. Lasa nifalifaly mpianatsy rey lafa baka niseho tamin-drozy Jesosy, nahavy an-drozy hanao ino raha zay? (Lioka 24:52, 53)

¹⁵ Nalahelo biby mpianatsy rey lafa nimaty Jesosy. Mba mipetraha amy pilasin-drozy moa iha. Tsy hoe namoy ani-naman-drozy tena tean-drozy io avao rozy fa nidiso fanantenà koa. (Lioka 24:17-21) Fe lafa niseho  tamin-drozy Jesosy, le nanoka fotoa ie mba hanampea an-drozy hahay hoe nitanteraky aminy ty faminaniani-Baiboly. Tsy vitani-zay fa mbo nameany asa bevata koa rozy. (Lioka 24:26, 27, 45-48) Lafa nampiakary an-danitsy any Jesosy 40 andro tafara atoy, le tsy nalahelo sasy mpianatsy rey fa lasa nifalifaly biby. Nifalifaly biby rozy satria hain-drozy hoe velo Jesosy ka hanampy an-drozy ie amy asa nampanaoviny an-drozy iny. Ino ty vokani-hafalean-drozy zay? Lasa tsy nieny nidera ani-Jehovah rozy.​—Vakio Lioka 24:52, 53; Asa. 5:42.

16. Akory ty anahafantsika ani-mpianatsini-Jesosy rey?

¹⁶ Akory ty anahafantsika ani-mpianatsini-Jesosy rey? Tokony ho falifaly avao tsika amy andro iaby anompoantsika ani-Jehovah fa tsy hoe amy vanim-potoani-Fahatiarova rey avao. Fe tsy ho vitantsika zay laha tsy manao voaloha lista ty Fanjakà-Ndranahary tsika. Maro amintsika, ohatsy, nandamy ty fotoa iasàny mba hahafahany hitory, hanatriky fivoria, noho hanao fotoam-pivavahani-fianakavia tsy tampaky. Niezaky nana fiaina tsotra ty sisany mba hahafahany hanao raha maro amy fiangona eo na hifindra amy faritany mila mpitory maro. Marina fa mila miaritsy tsika laha ta hanompo ani-Jehovah avao, fe mampitamà antsika ie hoe hameany fitahia maro tsika laha manao voaloha lista ani-Fanjakà iny.​—Ohab. 10:22; Mat. 6:32, 33.

17. Tapa-kevitsy hanao ino iha amy vanim-potoani-Fahatiarova zao? (Henteo sary io.)

¹⁷ Fa tsy linintsika ty hanatriky Fahatiarova amy Talata 4 Avrily. Fe ka mandiny amy fotoa zay iha vo hametsivetsy ty fiainani-Jesosy, ty nahafatesany, noho ty fitiava nasehoni-Jehovah noho Jesosy antsika. Eritsereto avao raha reo amy herinandro aloha noho afarani-Fahatiarova iny. Azonao atao, ohatsy, ty mamaky noho mametsivetsy ty raha niseho, amy tablò hoe “Herinandro Farany Niainani-Jesosy Tan-tany Etoy” amy Fanazavà Fanampiny B12, amy Fandikan-tenin’ny Tontolo Vaovao. Lafa mamaky ty tantaram-piainani-Jesosy iha, le milà andinin-teny hanampy anao hahay hankasitraky, ho be fitiava, ho be herim-po, noho ho falifaly. Bakeo milà fomba azonao ampisehoa ty fankasitrahanao. Matokisa fa tena ho lafovily amy Jesosy ze raha iaby ataonao mba hahatiarova azy amy vanim-potoani-Fahatiarova zao.​—Apok. 2:19.