1-2. a) Wopo wɔkɔnge w’okokaso ndawoka winá w’ɔtɔnɔlaso lá lowiko edjinge l’olemo wɔ Yeso? b) Kɛkɔnge k’ɔkɔpaso nshishima lá djamba djɛnɛ?

 WINÁ w’ovusɛso onto ɔmɔtshi w’ɔkɔpaso iso ndjalaka la yɛnyi y’efula! Má bango, iso nkoka ndjala la yɛnyi efula winá w’okanelaso etsho wɛ sahetshɛ lande lá ntondo kɛ nyɔyi kɛnde, pekapeka ntsha onto wɔkɔ ɛnaka ndjolo efula lá ntondo kɛ nde mvɔ. Koko, m’ɔkɔngɔ w’etsho, tokoka ntateyɛ ndawoka ndambo wɔlɔ winá w’okanelaso nkambo mɔtshi djɛ ndatolakanyɛ kana nkambo mɔtshi djɛ ndananghe kana ndatepela djɛ ntokembɛ kana djɛ ntɔpɛyɛ ndambo k’osasa.

² Wopo w’ɔkɔmɔ ndeke, iso ndjokaka yɛnyi winá w’owalaso akambo walendana la ndjolo edjinge nyɔyi kɛ Yeso. Lá deko djɛ Bokfɔ, tɔngɔsake winá djɛ ntɔnɔla pekapeka lá nsakiso k’olambo wɔnde w’oshinga wɔ mbendo. (1 Kɔ. 11:24, 25) Koko, tongowake osasa efula winá w’ɔtɔnɔlaso lá kenkfumɔ kɛ Yeso ndatepela la ndananghe winá wɔ ndayalaka lá looko. Lonkina iso mbaka lokembo winá w’ɔtɔnɔlaso lá kɛnɛ k’onanghande winá wɔsɔ la kɛ ndongootonanghela l’etsho weyaye. Ntɔnɔla l’akambo wasɔ la lá ngandji k’otokande nkoka ntotshinda dj’iso nyɛnyɛ djedjɛ djɛso lá topo tɛnama papoo etengo ɔkɔpaso nyɛna lá djamba djɛnɛ.

3. Donga djɛkɔnge djetotshinda djɛ nyɛnyɛ djedjɛ djɛso t’oshinga wɔ mbendo?

³ Iso ndjalaka la djedjɛ efula winá w’ɔtɔnɔlaso lá lowiko edjinge  lá nyɔyi kɛ Yeso. Winá wɔ ndayalaka lanɛ lá looko, Yeso alakanyɛka anto ɛtshɔkɔ w’Onkfumi wɔ Ndjambe yongoyakala. Iso nkɔpaka akambo wa nsɔsɔlɔ walendana l’Onkfumi wasɔ. Tolekɔ la djedjɛ t’oshinga wɔ mbendo ladjikɛnde wɔtɔpɛyɛ mbamba kɛ ndjala la djokanelo djɛ wɔlɔ la djɛ ma ma la Yehova nya Yeso. Anto walekɔ́ la djawo te Yeso walekɔ lonkina la nkongi djɛ ndowika lotshinda lotshinda la djɛ ndɛnana lonkina l’anto wawɔ wa ngandji wavwisá. (Dj. 5:28, 29; Ɔrɔ. 6:23) Totananghá kaanga ekete djɛ mba ɛtshɔkɔ wɛsɔ, edjinge lako ekete k’okokaso nangha djɛ mfuta Ndjambe nya Kristo lá kɛnɛ kɛ yatonanghela. (Ɔrɔ. 5:8, 20, 21) Koko iso nkoka ndaawɛnyɛ djedjɛ djɛso. Ngetemo?

4. Wopo wɔkɔnge Mariya k’ose Magadala ndɛnyɛ djedjɛ lá kɛnɛ kɛ Yeso ndonanghela? (Lenda ntshango.)

⁴ Tokoshishima ndjɔmbɔmba kɛ omoto ɔmɔtshi w’ose Juda w’etawɔ Mariya k’ose Magadala. Nde ɛnaki ndjolo efula ladjikɛnde ayalaki la ɛdjɛngɛ esambele. Nde akokaka nkanela ante lako kaanga onto w’okoka ndokotshɛ́. Djɛkondeke kokanela efula kɛ djedjɛ djeyalisa lande winá wɔ Yeso ndotshungola má lofumbe l’ɛdjɛngɛ wɛsɔ! Djedjɛ djɛnde dj’otshindaka djɛ nkoma ombeki wɔnde edjinge nkamba la winá wɛnde, wolo wɔnde, la nkete djɛnde djɛ ndosuka l’olemo w’ipoposanyɛ. (Luka 8:1-3) Kaanga Mariya ndayale l’osasa efula lá kɛnɛ kɛ Yeso ndonanghela, mbala imɔtshi nde atewaki ante l’etsho weyaye Yeso angɔpɛyɛ opapɛyɛ onkina woleka ekekete. Nde ayalaka ladjɛ mpɛyɛ lowiko lɔnde lá wapɔ w’anto, ‘djɛ onto onkfumɔ woyala la djawo tende’ awa lowiko l’etshinda. (Dj. 3:16) Koko, Mariya ɛnyɛka djedjɛ djɛnde te Yeso má ntshikala la nkɔmano. Winá wɔ Yeso ndɛnaka ndjolo l’otamba wɔ ndjolo nde emalaka lá ntondo kɛnde djɛ ndosuka la nsuka anto ankina. (Dj. 19:25) M’ɔkɔngɔ wɔ Yeso mvɔ, Mariya nya amato ankina ape watɔlaka nkete djɛ nsolo mpimbo djɛ tovutela odjo wɔ Yeso. (Mar. 16:1, 2) Mariya afutamaka lombombe má nkɔmano djɛnde. Nde awaka mpeyi kɛ  ambeki efula yotawa, mpeyi kɛ nyɛnana nya Yeso kanga lokfundwisa edjinge nsawola nyande.​—Dj. 20:11-18.

5. Wopo wɔkɔnge w’okokaso nyɛnyɛ djedjɛ djɛso lá kenkfumɔ kɛ Yehova nya Yeso yombotonanghelá?

⁵ Ole iso tokoka nyɛnyɛ djedjɛ lá kenkfumɔ kɛ Yehova nya Yeso yatonanghela má nkamba la winá wɛso, la wolo wɔso, la nkete djelá demba dj’okotshɛso djɛ nsuka olemo w’Onkfumi. Ndjɔmbɔmba, iso nkoka ndapɛyɛ l’ɛkɔpa djɛ ntokotshɛ́ l’olemo w’opikelo la w’ɔwɔngɛlɔ wɔ djena dj’ɔtɛmwɛlɔ wɔ piyɔ.

6. Lamo okokaso ntepela ente oshinga wɔ mbendo alekɔ opapɛyɛ wɔ Yehova ndapɛyɛ onto l’onto wɔ l’anteyi kɛso?

⁶ Winá w’ɔtɔnɔlaso lá ngandji kɛ Yehova nya Yeso otokawɔ, iso ntshindamaka djɛ ndaakɔpa edjinge iso. (1 Dj. 4:10, 19) Iso ndekaka ndaakɔpa winá w’osipisoyɛso ente Yeso avɔka lá nkambo djɛ onto l’onto wɔ l’anteyi kɛso. Ɔpɔstɔlɔ Poolo ewaki nkambo djɛsɔ edjinge nde ɛnyɛka djɛdjɛ djɛnde winá wɔ ndafunela ase Ngalatiya ante: ‘Wɔna Ndjambe . . . andjokaka ngandji edjinge ayalambolaka lá nkambo djɛmi.’ (Nga. 2:20) Má olambo w’oshinga wɔ mbendo, Yehova akosepaka tende djɛ wɛ ndjala ilongo yɛnde. (Dj. 6:44) Ndjewa ente Yehova ɛnaka ekete kɛmɔtshi kɛ wɔlɔ lewɛ edjinge afutaka oshinga wɔ ntshina djɛ wɛ ndjala ilongo yɛnde apakote oloko wɔkɔ? Nkambo djɛsɔ mpakotshinde djɛ wɛ nkɔpa Yehova nya Yeso? Iso ladjɛ ndawopola isɔmɛlɛ ente: ‘Ngandji kɛsɔ ontshindawɔ djɛ nangha nge?’

7. Etengo ɛnaso lá ntshango, wopo wɔkɔnge isankfumɔ okokaso nyɛnyɛ ngandji k’okaso Yehova nya Yeso? (2 Kɔrɛtɔ 5:14, 15; 6:1, 2)

⁷ Ngandji k’okaso Ndjambe nya Kristo ntotshindaka djɛ ndjoka anto ankina ngandji. (Wala 2 Kɔrɛtɔ 5:14, 15; 6:1, 2.) Yopo imɔtshi yɛnyɛso ngandji kɛso nde, má ndjala l’entete l’olemo w’ipoposanyɛ. Iso nsawolaka l’onto onkfumɔ w’opomana laso. Iso topasɔnɛ  dongi, kana anto wa nsawola lawɔ m’ɔtɛ wɔ mposo yɛwɔ y’alemba kana tɔkɔlɛ tɔwɔ edjinge iso nsawolaka l’anto ankfumɔ ayale ase okfudji kana ase ɔvɔ, wanɛ w’ingelisa nkalasa kana lako. Má lɛdji lɔsɔ, iso nkambaka lá yopo y’okana l’ikanyi yɛ Yehova ‘yɛ wepo w’anto ankfumɔ mbika la mba balo djɛ djɔ dj’akambo wa nsɔsɔlɔ.’​—1 Ti. 2:4.

8. Wopo wɔkɔnge w’okokaso nyɛnyɛ ngandji kɛso te wananyɔ l’ankaana yɛso?

⁸ Iso nyɛnyɛka lonkina ngandji k’okaso Ndjambe nya Kristo má nkɔpa wananyɔ l’ankaana yɛso. (1 Dj. 4:21) Iso ndjakiyanyɛka lá nkambo djɛwɔ edjinge ndaakotshɛka winá w’opomanawɔ l’ehemba. Iso ndaakembɛka winá w’ovusɛwɔ onto wɔwɔ ɔmɔtshi wɔ ngandji, ndaawembolaka winá w’oyɛwɔ l’elando, edjinge nanghaka kenkfumɔ k’okokaso nangha djɛ ndaakembɛ winá w’ɔlɛmbawɔ. (2 Kɔ. 1:3-7; 1 Te. 5:11, 14) Iso nkindjɛka ndaalɔmbɛla, ladjikɛnde iso mvungɔka ente ‘ɔwɔndɔwɔndɔ w’onto wɔ wɔlɔ wolekɔ la nkfulu.’​—Dja. 5:16.

9. Yopo inkina yɛkɔnge y’okokaso nyɛnyɛ ente iso nkɔpaka wananyɔ l’ankaana yɛso?

⁹ Iso nyɛnyɛka ngandji kɛso lonkina te wananyɔ l’ankaana yɛso má nangha la wolo djɛ ndjila vu l’anteyi kɛso. Iso ndjilaka welo djɛ nkilika ndjɔmbɔmba kɛ Yehova kelendana la nyimeyana. Ntsha Yehova awolaka djɛ Wɔnande mvɔ m’ɔtɛ w’evunga wɛso, iya iso, topakoke ndjala entshupa djɛ nyimeyɛ wananyɔ l’ankaana yɛso winá w’otonanghelawɔ evunga? Topakombola ndjala etengo ose olemo wɔ nyɛtshi wɔ Yeso ndatepela lá ndjɔmbɔmba kɛnde kɛmɔtshi. Kaanga m’ɔkɔngɔ w’owandji wɔnde ndowimeyɛ basa dj’ekekete efula, ose olemo wɔsɔ atonaka nyimeyɛ winande basa djɛ daambi. (Mat. 18:23-35) Ntsha olekɔ l’okakasano nya onto ɔmɔtshi wɔ l’otshumano, opakoke ndjala onto wɔ ntondo wɔ ntapola djina djɛ ntila vu nyande lá ntondo kɛ nangha Bokfɔ? (Mat. 5:23, 24) Ntsha wɛ nangha nghɔsɔ, ɔngɛnyɛ ente, wɛ ndjokaka Yehova nya Yeso ngandji k’efula.

10-11. Wopo wɔkɔnge tokokolo okokawɔ nyɛnyɛ ngandji kɛwɔ te Yehova la te Yeso? (1 Pɛtɛlɔ 5:1, 2)

¹⁰ Wopo wɔkɔnge tokokolo okokawɔ nyɛnyɛ ambɔ iwɔ nkɔpaka Yehova nya Yeso? Yopo imɔtshi yɛ djonyi nde, má nkotshɛ ehomba w’ɛnkɔkɔ wɛ Yeso. (Wala 1 Pɛtɛlɔ 5:1, 2.) Yeso asipisoyɛka ɔpɔstɔlɔ Pɛtɛlɔ nkambo djɛsɔ papoo. M’ɔkɔngɔ wɔ nde nyanghana Yeso mbala isato, Pɛtɛlɔ ayalaki la mposɛ efula kɛ nyɛnyɛ ante nde akɔpaki Yeso. M’ɔkɔngɔ w’ekfundwelo kɛnde, Yeso opolaka Pɛtɛlɔ ante: ‘Simɔna wɔna Djɔanɛ, wɛ ndjokaka lemi ngandji?’ Tokoka ndjala l’eshikikelo ente Pɛtɛlɔ akokaka nangha kenkfumɔ kɛ ndakoke nangha djɛ nyɛnyɛ ngandji kɛnde te Owandji wɔnde. Yeso ashimelaka Pɛtɛlɔ ante: ‘Lesɛka ɛnkɔkɔ wɛmi wɛ daambi.’ (Dj. 21:15-17) Edjinge l’ilá kɛ lowiko lɔnde l’otondo, la ngandji kenkfumɔ Pɛtɛlɔ alamaka ɛnkɔkɔ wɛ Nkfumi djɛ nyɛnyɛ ente nde akɔpaki Yeso.

¹¹ Tokokolo, wopo wɔkɔnge w’okokanyo nyɛnyɛ l’eleko kɛ Bokfɔ ente etepela wɛ Yeso ndashimela Pɛtɛlɔ welekɔ djonyi lenyo? Nyo nkoka nyɛnyɛ wopo wɔkɔpanyo Yehova nya Yeso má ndɔsaka winá djɛ nkembɛka wananyɔ l’ankaana yɛnyo mbala la mbala la má ndjila welo efula djɛ nkotshɛ́ waambɔhɔla lá nyuma dj’iwɔ nkalɔ te Yehova. (Ezk. 34:11, 12) Nyo nkoka lonkina nkeketshɛ ambeki wa Bible la anto ankina wɛnyisá mposɛ djɛ nsanghana lá Bokfɔ, má nangha kenkfumɔ k’okokanyo nangha dj’iwɔ ndawoka wɔlɔ.

12. Lamo ntɔnɔlaka l’etepela wɛ Yeso ndatepela l’otsho wɔ lá ntondo kɛ nyɔyi kɛnde yɔngɔtɔpɛyɛ oloko wolo? (Djɔanɛ 16:32, 33)

¹² L’otsho wɔ lá ntondo kɛ nde mvɔ, Yeso  ashimelaka ambeki wande ante: ‘L’andja wanɛ, nyɔnghɛnaka ndjolo, koko nyoyale l’oloko wolo! Lemi lambila andja wanɛ otshumba.’ (Wala Djɔanɛ 16:32, 33.) Kɛkɔnge kekotshisá Yeso djɛ ndjala l’oloko wolo winá w’antonyi wande yɔwɛnyɛka ndjolo ladjɛ ntshikala la nkɔmano tii tá nyɔyi? Nde ayawɛkɛki te Yehova. Ladjikɛnde nde ewaki ante ambeki wande wangopomana la wepo w’ehemba wɛkɔ ɛmɔ, Yeso alɔmbaka Yehova djɛ ndaalama. (Dj. 17:11) Lamo nkambo djɛsɔ ɔtɔpɛyɛwɔ oloko wolo? Ladjikɛnde Yehova alekɔ la nkfulu ndeka antonyi waso ankfumɔ. (1 Dj. 4:4) Lako ekete k’isama lá wiso wande. Tolekɔ l’eshikikelo ente ntsha iso ndawɛkɛ te Yehova, nde nkoka ntokotshɛ́ djɛ ndongela wɔma wɔso la ndjala l’oloko wolo.

13. Wopo wɔkɔnge Yosɛfu y’ose Arimateya ndɛnyɛ oloko wolo?

¹³ Tokoshishima ndjɔmbɔmba kɛ Yosɛfu y’ose Arimateya. Nde alɛmɛyamaki efula me ase Juda. Nde ayalaki ose Tominanyi telá djiko t’ase Juda. Koko, l’ilá k’olemo wɔ Yeso lanɛ lá looko, Yosɛfu ayalaki la wekeka ankfumɔ nyimɛ ngo oloko wolo. Djɔanɛ atepelaka ante nde ayalaki ‘ombeki wɔ Yeso lá wisisa ladjikɛnde nde okaki ase Juda wɔma.’ (Dj. 19:38) Kaanga Yosɛfu ndakɔpaka losango l’Onkfumi, nde atakɔpaki anto ankina ndjewa ambɔ nde ayalaki la djawo te Yeso. Ape l’ehamo nde ayalaki la wɔma ante atotshutshɛ mpipo kɛ lomo keyalaki lande. Koko Bible ntoshimelaka ante m’ɔkɔngɔ wɔ Yeso mvɔ, Yosɛfu ‘atshɔka tɔlɔmba odjo wɔ Yeso le Pilatɛ l’oloko wolo onkfumɔ.’ (Mar. 15:42, 43) Yosɛfu atisa lonkina ante nde alekɔ ombeki wɔ Yeso.

14. Kɛkɔnge k’oyɛ ladjɛ nangha ntsha olekɔ la wɔma w’anto?

¹⁴ Ongoyalake la wɔma w’anto etengo Yosɛfu? Ongoyalake mbala imɔtshi la wɔma wɔ ndawewanyɛ etengo Owakɛ wɔ Yehova lá nkalasa kana l’olemo? Wɛ okakanda djɛ ntateyɛ mpoposanyɛ kana djɛ ndongola batisimo ladjikɛnde olekɔ la wɔma wɔ wopo wɔ anto ankina yɔngɔkɔsa? Tawolake djɛ tokanyi tɔ nghɔsɔ nkoshimba djɛ wɛ nangha kɛnɛ k’ewɛ ente kelekɔ wɔlɔ. Lɔmba Yehova l’oloko ɔmɔ. Lɔmbande akɔpɛyɛ oloko wolo wɔ nangha ɛkɔpa kɛnde. Winá wɛnɛ wopo wɔ Yehova okadjimolande lá alɔmbɛlɔ wako, ndeke ngongoleka nkemba la ndeka ndjala l’oloko wolo.—Iza. 41:10, 13.

15. M’ɔkɔngɔ wɔ Yeso nyɛnama le ambeki wande, kɛkɔnge k’osasa w’oyalaki lawɔ y’atshinde dj’iwɔ nangha? (Luka 24:52, 53)

¹⁵ Ambeki wa Yeso wayalaka la yɛnyi efula winá wɔ Yeso ndavu. Koyawila l’edjena  kɛwɔ. Apengo wambovusɛ ilongo yɛwɔ yɛ ngandji toko, koko wayawokaka lonkina etengo wambosamba nkongi. (Luka 24:17-21) Koko, winá wɔ Yeso ndɛɛnama lewɔ, nde ɔsaka winá djɛ ndaakotshɛ́ dj’iwɔ nsipisoyɛ odjito wolekɔ lande lá ekotshamelo kɛ prɔfɛsi yelá Bible. Nde aapɛyɛka lonkina olemo wɔ djonyi wɔ nangha. (Luka 24:26, 27, 45-48) Etsho 40 m’ɔkɔngɔ wɔ Yeso mpanda t’olongo, yɛnyi yeyalaki l’ambeki ikadjimɔka osasa w’efula. Ladjikɛnde wewaki ambɔ Owandji wɔwɔ alekɔ la lowiko edjinge alekɔ entshupa djɛ ndakotshɛ́ l’olemo wɔwɔ wɔ bango, kɛsɔ k’apɛyɛka osasa efula. Osasa wɔwɔ w’atshindaka dj’iwɔ numɛ Yehova ipa la mpekɔ.​—Wala Luka 24:52, 53; Ele. 5:42.

16. Wopo wɔkɔnge w’okokaso ndjokola ambeki wa Yeso?

¹⁶ Wopo wɔkɔnge w’okokaso ndjokola ambeki wa Yeso? Iso nkoka mba osasa wɔ ntɛmɔla Yehova apengo lá eleko kɛ Bokfɔ toko koko ɔnɔnyi w’otondo. Kɛsɔ ndɔmbaka iso ndjila Onkfumi wɔ Ndjambe l’edjena kɛ ntondo lá lowiko lɔso. Ndjɔmbɔmba, anto efula watshikitanyɛka nonghanyi kɛwɔ k’olemo djɛ ndapɛyɛka efula l’olemo w’ipoposanyɛ, ndjingelaka nsanghanyɛ, la nanghaka wekelo wɔ nkfumbo mbala la mbala. Wamɔtshi w’ɔsaka nkano dj’ipa ndjala la nkete efula djelá demba djɛ anto amɔtshi okanelawɔ ambɔ dekɔ djonyi efula ngo dj’iwɔ ndapɛyɛ efula l’elemo welá otshumano kana ntokamba lá djena dj’oyɛwɔ la djonyi efula dj’ansakodji y’Onkfumi. Kaanga oyɛwɔ nghɔso, tolekɔ la djonyi dj’okfumedji djɛ nkindjɛ nkambela Yehova, nde ndakaka djɛ ntɔtshɔkɔla ntsha tombila wapɔ w’Onkfumi l’edjena kɛ ntondo lá lowiko lɔso.​—Woo. 10:22; Mat. 6:32, 33.

17. Nkano djɛkɔnge djɛ ngɔmbɔsa djɛ nangha l’eleko kɛ Bokfɔ dj’ɔnɔnyi wɔnɛ? (Lenda ntshango.)

¹⁷ Tokongela l’eloko lukuluku djɛ nsanghana lá Bokfɔ lofu l’Ape, Ngɔndɔ k’anɛyi 4. Koko, topakoke nkonga ngo lofu lɔsɔ ko iso ndɔtɔnɔla lá lowiko edjinge lá nyɔyi kɛ Yeso la lá ngandji kɛ nde nya Yehova iyatɛnyɛ. Kamba la mbamba kenkfumɔ k’owɛ l’eleko k’otondo kɛ Bokfɔ djɛ nangha nkambo djɛsɔ. Ndjɔmbɔmba, yahonela winá wɔ mbalaka la ntɔnɔlaka lá akambo walekɔ lá kartɛ kelekɔ l’ɔtɛ wɔ djoyi ante: “Lobengo l’ekomo lɔ lowiko lɔ Yeso lanɛ lá looko” k’otanaso lá Apandisɛ B12A, B12B wa Bible Ekadimwelo k’andja w’oyoyo. Winá w’owalɛ akambo walendana la lowiko lɔ Yeso, hona avɛrse wa Bible wangofudjɛ djedjɛ, ngandji, oloko wolo, la osasa wɔko. Masɔ, kanela topo tɔ kɔɔ tokokɛ nyɛnyɛ djedjɛ djɛko dj’im’anse oloko. Okoka ndjashikikɛ ente Yeso angosasanga la welo enkfumɔ w’onanghɛ djɛ ndovungɔ l’eleko kɛ Bokfɔ djɛnɛ.​—Ndj. 2:19.