1-2. (a) Unfa u sa ta fii te u ta pakisei soni u di libi u Jesosi, ku di diniwooko fëën? (b) Fuun soni woo taki a di woto aki?

 TE WAN sëmbë di u lobi lasi libi, nöö u ta hangi ën seei! A kan taa bigibigi a o ta hati u seei te u ta pakisei unfa soni bi dë, dee daka ufö a dëdë, möönmöön ee a bi tja sitaafu ufö böö fëën koti. Ma baka wan pisiten u sa ko ta dë waiwai baka te u pakisei wan soni di a bi lei u, wan soni di a bi taki, nasö wan soni di a bi du u da u taanga, nasö u mbei u lafu.

² Sö nöö u ta tjali tu te u ta lesi soni u di sitaafu di Jesosi bi tja ufö a dëdë. A di pisiten di u ta mëni di dëdë u Jesosi, u lo’ u pakisei andi di lusupaima u Jesosi kë taki da u (1 Kol. 11:24, 25). A ta da u piizii seei te u ta pakisei hii dee soni dee Jesosi bi taki ku hii dee soni dee a bi du, di a bi dë a goonliba aki. U ta feni taanga tu, te u ta kai pakisei a dee soni dee a ta du nöunöu, söseei a dee soni dee a o du da u a di ten di ta ko. A di woto aki, woo si taa te u ta kai pakisei a dee soni aki, söseei te u ta kai pakisei a di fasi fa Jesosi lobi u tjika, nöö dee soni aki o da u taanga fuu du soni u lei taa u dë ku tangi a hati.

3. Faandi mbei u musu dë ku tangi a hati taa Jesosi ko paka di lusupaima da u?

³ U ta dë ku tangi a hati te u ta pakisei soni u di libi u Jesosi ku di dëdë fëën. Di Jesosi bi ta du di diniwooko fëën a goonliba aki, nöö a bi ta lei sëmbë un gaan bunu di Könuköndë u Gadu o mbei de feni. U lobi dee lei dë seei. U ta tei di  lusupaima u bigi, u di a ta jabi pasi da u fuu u ku Jehovah ku Jesosi sa ko dë gaan mati. Dee sëmbë dee ta biibi a Jesosi, ta biibi tu taa de o libi u teego, söseei taa dee o toona si dee sëmbë u de dee lasi libi (Joh. 5:28, 29; Lom. 6:23). Wa du na wan hojo soni u feni dee gaan bunu aki, söseei wa o sa paka Gadu ku Keesitu u dee soni di de du da u (Lom. 5:8, 20, 21). Ma u sa lei de unfa u dë ku tangi a hati tjika. Unfa u sa du di soni dë?

4. Unfa Malia u di köndë de kai Magidala bi lei taa a bi tei di soni di Jesosi bi du dëën u bigi? (Luku di peentje.)

⁴ Buta pakisei a di woto u wan Dju mujëë de kai Malia u di köndë de kai Magidala. A bi ta tja sitaafu gaanfa seei, u di seibi taku jeje bi dë nëën liba. A musu u dë sö taa a bi ta fii kuma na wan sëmbë bi o sa heepi ën. Wë nöö pakisei luku unfa a bi tei ën u bigi tjika di Jesosi bi puu ën a dee taku jeje dë basu. U di a bi tei di soni dë u bigi, mbei a bi ko dë wan bakama u Jesosi, söseei a bi tei di ten fëën, di kaakiti fëën, ku dee soni dee a bi abi, u heepi Jesosi faa bi sa du di peleikiwooko (Luk. 8:1-3). Hii fa Malia bi tei di soni di Jesosi bi du dëën u bigi seei, tökuseei an kan taa an bi sabi jeti taa Jesosi bi o du möön soni dëën a di ten di ta ko. Jesosi bi o dëdë paka paima da libisëmbë, ’sö taa di sëmbë di ta biibi ën’ sa feni di libi u teego (Joh. 3:16). Ma hii fa kandë Malia an bi sabi di soni dë, tökuseei a bi hoi hënseei a Jesosi u lei taa a ta tei di soni di Jesosi bi du dëën u bigi. Di Jesosi bi dë ta tja sitaafu a di posu, Malia bi ko sai a zuntu dë, u di a bi ta booko hën hedi ku Jesosi, söseei u di a bi kë da dee woto sëmbë dee bi sai dë taanga (Joh. 19:25). Di Jesosi dëdë, hën Malia ku tu woto mujëë bi tja sumëësuti soni go ka de bi butëën, sö taa de bi sa seeka di sinkii fëën (Maik. 16:1, 2). Jehovah bi mbei Malia feni gaan bunu u di a bi hoi hënseei a Jesosi. A bi feni pasi fan ku Jesosi baka di Gadu bi weki ën ko a libi baka. Sömëni u dee bakama u Jesosi an bi feni di lö gaandi dë.​—Joh. 20:11-18.

5. Unfa u sa lei taa u ta tei dee soni dee Jehovah ku Jesosi du da u u bigi?

 ⁵ Useei sa lei taa u ta tei dee soni dee Jehovah ku Jesosi du da u u bigi, te u ta tei di ten fuu, di kaakiti fuu, ku dee soni dee u abi, u mbei di wooko u di Könuköndë go a fesi. Wan soni di u sa du, hën da u sa seeka soni fuu sa heepi mbei kamian ka u ta dini Jehovah, nasö u sa heepi seeka dee kamian dë.

6. Faandi mbei u sa taki taa Jesosi ko dëdë da hiniwan fuu apaiti?

⁶ Te u ta buta pakisei a di fasi fa Jehovah ku Jesosi lobi u tjika, nöö woo ko lobi de tu (1 Joh. 4:10, 19). U ta ko möön lobi de te u ta biibi taa Jesosi dëdë da hiniwan fuu apaiti. Apösutu Paulosu bi lei taa a ta biibi di soni aki, di a bi sikifi di biifi manda da dee baaa ku dee sisa u Galasia. A bi taki taa: „Di Mii u Masa Gadu . . . lobi mi tee a tei di dëdë di mi bi o dëdë, dëdë da mi” (Gal. 2:20). U di Jesosi ko dëdë da u, mbei Jehovah hai i tja ko nëën fii ku ën sa dë mati (Joh. 6:44). An ta bigi da i taa Jehovah si i u sëmbë tjika, te a paka wan gaan paima, sö taa i ku ën bi sa ko dë mati ö? Di soni dë an ta mbei i ko möön lobi Jehovah ku Jesosi ö? A bunu fuu hakisi useei di soni aki: ’Andi di lobi di Jehovah ku Jesosi lobi mi musu da mi taanga u mi du?’

7. Unfa hiniwan fuu sa lei taa u lobi Jehovah ku Jesosi, te u luku di peentje? (2 Kolenti 5:14, 15; 6:1, 2)

⁷ Di lobi di u lobi Gadu ku Keesitu ta da u taanga fuu lobi wotowan. (Lesi 2 Kolenti 5:14, 15; 6:1, 2.) Wan fasi fa u sa lei taa u lobi wotowan, hën da te u ta du di peleikiwooko fajafaja. U ta peleiki da hiniwan sëmbë di u ta miti. Wa ta luku ee de dë u wan woto köndë, nasö u wan woto föluku. Söseei wa ta luku ee de gudu, ee de pooti, ee de go a siköö nasö ee de an go a siköö. A di lö fasi aki u ta wooko makandi ku Jehovah, u di a kë taa „hii  sëmbë u goonliba tuu musu feni tjubi, söseei u de ko sabi di tuutuu lei finifini”.​—1 Tim. 2:4.

8. Unfa u sa lei taa u lobi dee baaa ku dee sisa fuu?

⁸ U ta lei tu taa u lobi Gadu ku Keesitu te u ta lei taa u lobi dee baaa ku dee sisa fuu (1 Joh. 4:21). U ta booko u hedi ku de tuutuu, söseei u ta heepi de te tesi ta miti de. U ta da de kötöhati te wan sëmbë u de lasi libi, u nango luku de te de dë ku suwaki, söseei u ta mbei hii möiti u da de taanga te de ta fii bookosaka (2 Kol. 1:3-7; 1 Tes. 5:11, 14). U ta begi da de, u di u sabi taa ’te wan sëmbë ta libi bunu kumafa Gadu kë, nöö di begi fëën a ta begi Masa Gadu ta wooko gaan wooko’.​—Jak. 5:16.

9. Na un woto fasi u sa lei taa u lobi dee baaa ku dee sisa fuu?

⁹ Wan woto fasi fa u ta lei taa u lobi dee baaa ku dee sisa fuu, hën da te u ta mbei möiti fuu ku de ta libi fiifii ku useei. U ta mbei möiti u djeesi Jehovah a di da di a ta da sëmbë paadon. Ee Jehovah bi dë kabakaba u manda di Womi Mii fëën ko dëdë paka zöndu da u, nöö ja si kuma a bi o bunu fuu ta dë kabakaba u da dee baaa ku dee sisa fuu paadon te de du wan soni ku u ö? Wa kë du soni kuma di saafu di bi abi hogihati, di Jesosi bi taki soni fëën a wan woto di a bi konda. Hii fa di masa u di saafu aki bi piki ën taa an bi dë faa pakëën wan gaan paima di a bi abi u pakëën möön, tökuseei di saafu aki an bi kë da wan woto saafu paadon, di bi abi wan möön biti möni u dëën (Mat. 18:23-35). Ee i ku wan sëmbë u di kemeente an kaba fusutan unuseei a wan soni, nöö a bi o bunu fii go nëën go seeka di taki ufö i go mëni di dëdë u Jesosi (Mat. 5:23, 24). Ee i du di soni dë, nöö joo lei taa i lobi Jehovah ku Jesosi gaanfa seei.

10-11. Unfa dee gaanwomi sa lei taa de lobi Jehovah ku Jesosi? (1 Petuisi 5:1, 2)

¹⁰ Unfa dee gaanwomi sa lei taa de lobi Jehovah ku Jesosi? Wan fasi fa de sa du ën, hën da te de ta luku dee sikapu u Jesosi. (Lesi 1 Petuisi 5:1, 2). Jesosi bi heepi apösutu Petuisi faa ko fusutan di soni aki gbelingbelin. A kan taa u di Petuisi bi taki dii pasi taa an bi sabi Jesosi, mbei a bi kë lei Jesosi taa a lobi ën tuutuu. Di Gadu bi weki Jesosi ko a libi baka, hën Jesosi bi hakisi Petuisi taa: „Simon, ju di mii u Jonasi aki, i lobi mi nö?” U sa dë seiki taa Petuisi bi o kë du hii soni u lei unfa a lobi di Masa fëën tjika. Jesosi bi piki Petuisi taa: „I musu sölugu dee sikapu u mi da mi e” (Joh. 21:15-17). Petuisi bi lei hii hën libi longi taa a bi mbei möiti u luku dee sikapu u di Masa fëën, nöö a sö wan fasi a bi lei taa a lobi Jesosi.

¹¹ Un dee gaanwomi, unfa un sa lei a di pisiten di u ta mëni di dëdë u Jesosi taa un ta si di soni di Jesosi bi piki Petuisi kuma wan fanöudu soni? Wë un sa lei unfa un lobi Jehovah ku Jesosi tjika, te un nango ta luku dee baaa ku dee sisa fuunu u da de taanga, söseei te un ta mbei hii möiti u heepi dee baaa ku dee sisa de an ta peleiki möön u de toona ko a Jehovah baka (Eze. 34:11, 12). Un sa mbei möiti tu u da dee sëmbë dee u ta lei soni u Bëibel, ku dee sëmbë dee o ko mëni di dëdë u Jesosi u di fosu pasi taanga. Un mbei hii möiti u de sa si taa un tei de ku wai.

12. Faandi mbei u sa taki taa woo ko abi degihati, te u ta buta pakisei a dee soni dee Jesosi bi taki a di ndeti ufö a dëdë? (Johanisi 16:32, 33)

¹² Di ndeti ufö Jesosi dëdë, a bi piki dee bakama fëën taa: ’Fuka ku sitaafu dë a di goonliba aki. Ma wan lasi hati e, biga mi wini hii soni a di goonliba aki kaa.’ (Lesi Johanisi  16:32, 33.) Andi bi heepi Jesosi faa du soni ku degihati di dee felantima fëën bi ta du ku ën, söseei andi bi heepi ën faa hoi dou u te a dëdë? A bi ta futoou Jehovah. U di Jesosi bi sabi taa dee seei soni dë bi o miti dee bakama fëën, mbei a bi hakisi Jehovah faa tjubi de (Joh. 17:11). Faandi mbei di soni aki ta da u taanga? Wë u di Jehovah taanga möön hii dee felantima fuu (1 Joh. 4:4). Soni an dë di an ta si. U sa dë seiki taa ee u ta futoou Jehovah, nöö a o heepi u fuu sa du soni ku degihati, söseei fu wa ta fëëë.

13. Unfa Josëfu u di köndë de kai Alimatea bi lei taa a bi abi degihati?

¹³ Buta pakisei a di woto u Josëfu u di köndë de kai Alimatea. Dee Dju bi ta lesipeki ën gaanfa. A bi dë wan u dee sëmbë di bi ta koti kuutu a di kuutuwosu u dee Dju. Ma di Jesosi bi dë a goonliba aki Josëfu an bi abi degihati. Johanisi bi taki taa Josëfu bi dë „wan bakama u Masa Jesosi tu, ma a tjubitjubi fasi fu di a bi fëëë dee hedima u Dju” (Joh. 19:38). Hii fa Josëfu bi lobi di bosikopu u di Könuköndë, tökuseei a bi ta du soni a wan tjubitjubi fasi, u di an bi kë u sëmbë ko sabi taa a bi abi biibi a Jesosi. A kan taa a bi ta fëëë taa sëmbë an bi o ta lesipeki ën möön ee de bi ko sabi taa a bi dë wan bakama u Jesosi. Ma di Bëibel ta piki u taa baka di Jesosi dëdë, hën Josëfu „tei hati waka langalanga go a Gaama Pilati. Nöö hën a hakisi ën taa, gaantangi be a dëën di dëdë sinkii u Masa Jesosi faa tja go bei” (Maik. 15:42, 43). A bi ko dë gbelingbelin u si taa Josëfu bi dë wan bakama u Jesosi.

14. Andi i musu du ee i ta fëëë libisëmbë?

¹⁴ I ta fëëë sëmbë kumafa Josëfu bi ta fëëë sëmbë u? A ta taanga da i so juu fii taki taa i da wan Jehovah Kotoigi te i dë a siköö nasö a wooko u? Ja kë ko dë wan peleikima, nasö ja kë dopu, u di i ta fëëë andi sëmbë o taki ö? Na mbei di fëëë dë tapa i fii du di soni di i sabi taa bunu. Begi Jehovah fajafaja, nöö i hakisi ën faa da i degihati fii sa du soni kumafa a kë. Te i si unfa Jehovah ta piki dee begi fii, nöö joo ko abi möön degihati.​—Jes. 41:10, 13.

15. Andi dee bakama u Jesosi bi du, u di de bi ta piizii di Jesosi bi ko fan ku de? (Lukasi 24:52, 53)

¹⁵ Dee bakama u Jesosi bi ta tjali seei di Jesosi dëdë. Pakisei unfa soni bi sa dë da de. Na lasi nöö de bi lasi di lobi mati u de, ma de bi ta fii tu kuma saanfa-u-du u de bi kaba (Luk. 24:17-21). Ma di Jesosi bi ko fan ku de baka  di Gadu weki ën ko a libi baka, hën a bi tei ten heepi de u de ko fusutan unfa a bi mbei di tjabukama woto u Bëibel pasa tuutuu. A bi da de wan gaan wooko u de du tu (Luk. 24:26, 27, 45-48). Di Jesosi bi toona hopo go a liba ala 40 daka baka di dë, nöö dee bakama fëën an bi dë tjalitjali möön, ma de bi ko dë ku gaan piizii. Di sabi di de bi sabi taa di Masa u de bi dë a libi, söseei taa a bi dë kabakaba u heepi de u de du di wooko di a bi da de u de du, bi mbei de dë ku piizii. Di piizii dë, bi da de taanga u de ta gafa Jehovah nöömö.​—Lesi Lukasi 24:52, 53; Tjab. 5:42.

16. Unfa u sa djeesi dee bakama u Jesosi a di fasi fa de bi du soni?

¹⁶ Unfa u sa djeesi dee bakama u Jesosi a di fasi fa de bi du soni? Woo ta dë waiwai te u ta dini Jehovah nöömö, te kisi a di pisiten di u ta mëni di dëdë u Jesosi. Sömëni sëmbë seeka wooko soni u de sö taa de sa ta du di peleikiwooko, nango a dee komakandi, ta hoi di Wosudendu Dini hiniwan wiki. So sëmbë buta taa de an o suku u de ko abi so soni di wotowan ta si kuma fanöudu soni, sö taa de sa du möön soni a di kemeente nasö u de sa go heepi ka möön peleikima dë fanöudu. U musu sa hoi dou fuu sa dini Jehovah nöömö. Ma Jehovah ta paamusi u taa a o mbei u feni gaan bunu ee u ta buta dee soni u di Könuköndë a di fosu kamian.​—Nöng. 10:22; Mat. 6:32, 33.

17. Andi i dë kabakaba u du a di pisiten di woo mëni di dëdë u Jesosi? (Luku di peentje.)

¹⁷ U ta wakiti u di daka dou seei fuu sa mëni di dëdë u Jesosi. Woo mëni ën a feifidaka 4 u piki-deewei-liba. Ma na wakiti u di daka dë dou ufö i kai pakisei a di libi ku di dëdë fëën, söseei a di fasi fa hën ku Jehovah lei taa de lobi u tjika. Mbei möiti fii du di soni dë ufö u mëni di dëdë fëën, söseei baka te u mëni ën. Wan soni di i sa du, hën da i sa seeka soni fii sa lesi pisi 1 ku pisi 2 u di woto „A lasti wiki fu Yesus en libi na grontapu”, nöö i kai pakisei a de. Di woto aki dë a di brochure Studeri Gado Wortu moro fini. Te i ta lesi dee pisi dë, nöö mbei möiti fii buta pakisei a dee soni dee sa heepi i fii ko abi möön lobi, fii ko abi möön degihati, fii ko ta möön piizii, söseei fii ko ta möön tei soni u bigi. Baka di dë, nöö luku andi i sa du u lei taa i ta tei di soni di Jehovah ku Jesosi du da i u bigi. I sa dë seiki taa Jesosi o tei ën u bigi tuutuu ee i du hii dee soni aki dëën a di pisiten di u ta mëni di dëdë fëën.​—Ako. 2:19.