1-2. a) Ngande wakokaso ndjaoka etena kakanaso yimba lo dikambo dia lɔsɛnɔ ndo olimu wa Yeso? b) Kakɔna kayotɔsɛdingola lo sawo nɛ?

 ETENA kavushaso lakiso ɔmɔtshi la ngandji, sho mongaka l’ɔkɛyi efula! Oma l’etatelo, sho koka monga la lɔkɔnyɔ l’efula etena kakanyiyaso kɛnɛ kakete nshi ngana la ntondo ka lakiso mvɔ, djekoleko naka lakiso ɔmɔtshi akasowe la ntondo ka nde mvɔ. Koko, l’edjedja ka wonya sho koka ntatɛ monga l’ɔngɛnɔngɛnɔ nto etena kakanyiyaso dui dimɔtshi diakandatetsha, diakandasale, diakandatotɛ diatokeketsha kana dia tɔdia.

² Woho akɔ waamɛ mbele, sho mongaka la lɔkɔnyɔ etena kadiaso awui wendana l’asui ndo la nyɔi ka Yeso. Lo nshi ya Eohwelo, sho mbɔsaka etena lo yoho ya laande dia nkana yimba lo nɛmɔ diele l’olambo wa Yeso w’oshinga w’etshungwelo. (1 Kɔr. 11:24, 25) Koko, sho mongaka l’ɔngɛnɔngɛnɔ w’efula etena kakanaso yimba l’akambo tshɛ wakate Yeso ndo wakandasale etena kakinde lanɛ la nkɛtɛ. Ndo nto dui sɔ tokeketshaka etena kakanaso yimba lo kɛnɛ kasalande kakianɛ ndo kɛnɛ kayondosala lo nshi yayaye lo dikambo diaso. Nkana yimba l’akambo asɔ ndo lo ngandji kande oya le so, koka totshutshuya dia mɛnya lowando laso lo toho tashikaa oko wayotodiɛna lo sawo nɛ.

3. Ɛkɔkɔ akɔna wele laso dia monga la lowando l’oshinga w’etshungwelo?

³ Sho mongaka la lowando etena kakanaso yimba lo lɔsɛnɔ ndo nyɔi ka Yeso. Lam’aki Yeso lanɛ la nkɛtɛ, nde aketsha anto awui w’amɛna wendana la kɛnɛ kayosala Diolelo dia Nzambi. Tekɔ la lowando l’efula l’akambo wa mɛtɛ wendana la Diolelo sɔ. Tekɔ la lowando l’oshinga w’etshungwelo nɛ dia vɔ todihwɛka  mboka dia sho monga la diɔtɔnganelo dia ma ma la Jehowa nde la Yeso. Wanɛ wele la mbetawɔ le Yeso vɔ wekɔ l’elongamelo ka nsɛna pondjo pondjo ndo mɛna wakiwɔ wa ngandji wakavu nto. (Jni. 5:28, 29; Rɔmɔ 6:23) Ndooko kɛnɛ kakatasale dia sho nkondja ɛtshɔkɔ ɛsɔ; ndooko kɛnɛ kakokaso mfuta Nzambi nde la Kristo lo kɛnɛ kakawatosalɛ. (Rɔmɔ 5:8, 20, 21) Koko, sho koka mbaɛnya woho weso la lowando l’efula otsha le wɔ. Lo woho akɔna?

4. Ngande wakɛnya Mariya w’ose Mangadala lowando lo kɛnɛ kakosalɛ Yeso? (Enda osato.)

⁴ Tɔsɛdingole ɛnyɛlɔ k’ose Juda ɔmɔtshi lakawelɛka mariya w’ose Mangadala. Nde akasowaka efula l’ɔtɛ w’ɛdiɛngɛ esambele wakɔhɛnyahɛnyaka. Nde akafɔnya dia ndooko onto lakakoke mbookimanyiya. Laasɔ, ohokanyiya lowando laki lande etena kakotshungola Yeso oma lo shɛngiya y’ɛdiɛngɛ ɛsɔ! Lowando lande lakotshutshuya dia nkoma ombeki wa Yeso ndo nkamba la wenya ande, wolo ande ndo la diangɔ diaki lande dia mbosukɛ l’olimu ande. (Luka 8:1-3) Kaanga mbaki Mariya la lowando l’efula l’ɔtɛ wa kɛnɛ kakosalɛ Yeso, nde kombeyaka dia Yeso ayosala akambo efula lo dikambo dia nde lo nshi yayaye. Nde akahombe nkimɔ lɔsɛnɔ lande lo dikambo di’anto tshɛ, “dia onto tshɛ longa la mbetawɔ le nde” nkondja lɔsɛnɔ la pondjo. (Jni. 3:16) Koko, Mariya akɛnya lowando lande le Yeso lo monga la kɔlamelo. Etena kakasowaka Yeso l’otamba w’asui, Mariya akemala suke nɛ dia nde akayakiyanyaka dikambo dia Yeso ndo akalange nkeketsha anto akina waki lawɔ. (Jni. 19:25) L’ɔkɔngɔ wa nyɔi ka Yeso, Mariya nde la wamato akina ahende wakaye la diangɔ di’opumu dia totɛ lo diombo diande. (Makɔ 16:1, 2) Jehowa akasha Mariya difuto dia woke l’ɔtɛ wakinde la kɔlamelo otsha le Yeso. Nde aki l’ɔlɔ wa mpomana la Yeso l’ɔkɔngɔ wa eolwelo kande ndo ntɛkɛta la nde, mbuta ate diɛsɛ di’aki ambeki efula kokondja.​—Jni. 20:11-18.

5. Ngande wakokaso mɛnya lowando laso lo kɛnɛ tshɛ kakatosalɛ Jehowa nde la Yeso?

 ⁵ Sho lawɔ koka mɛnya lowando laso lo kɛnɛ kakatosalɛ Jehowa nde la Yeso lo nkamba la wenya aso, wolo aso ndo ekundji aso dia kambɛ Jehowa. Ɛnyɛlɔ, sho koka nkimanyiya dia mbika mvudu yakamba laso dia ntɛmɔla Jehowa ndo ndjilɔngɔsɔla.

6. Lande na kakokaso mbuta ɔnɛ oshinga w’etshungwelo ekɔ woshasha w’onto ndo l’onto?

⁶ Etena kasɛdingolaso polo lo yɛdikɔ yakɔna yatoka Jehowa nde la Yeso ngandji, sho tshutshuyamaka dia mbaoka ngandji ndo vɔ lawɔ. (1 Jni. 4:10, 19) Sho ndekaka mbaoka ngandji, etena kashihodiaso dia Yeso akavu lo dikambo di’ɔmɔmɔ la l’atei aso. Ɔpɔstɔlɔ Pɔɔlɔ akeyaka dui sɔ ndo nde akɛnya lowando lande etena kakandafundɛ ase Ngalatiya ate: “Ɔna Nzambi lakamboke ngandji ndo akayakimɔ dikambo diami.” (Ngal. 2:20) Lo tshimbo y’oshinga w’etshungwelo, Jehowa akakokotola otsha le nde dia wɛ monga ɔngɛnyi ande. (Jni. 6:44) Onde dui sɔ hananda otema ayɛ dia mbeya dia Jehowa akɛnyi ɛngɔ kɛmɔtshi k’ɔlɔlɔ le yɛ ndo dia nde akafute oshinga woleki tshɛ l’oyango wa wɛ nkoma ɔngɛnyi ande? Onde dui sɔ hafudia ngandji kayɛ otsha le Jehowa nde la Yeso? Sho pombaka ndjambola ɔnɛ: ‘Ngandji kɛsɔ kayotshutshuya dia nsala na?’

7. Oko wɛnyamidiɔ l’osato, ngande wakokaso sho tshɛ mɛnya ngandji kaso otsha le Jehowa nde la Yeso? (2 Kɔrɛtɔ 5:14, 15; 6:1, 2)

⁷ Ngandji kaso otsha le Nzambi ndo Yeso totshutshuyaka dia mboka anto akina ngandji. (Adia 2 Kɔrɛtɔ 5:14, 15; 6:1, 2.) Yoho mɔtshi yɛnyaso ngandji kaso ele lo monga l’ohetoheto l’olimu w’esambishelo. Sho sawolaka l’onto tshɛ la homana laso. Sho hatotone nsawola l’onto ɔmɔtshi l’ɔtɛ wende la lokoho la demba kana lo dioho diotshikitanyi laso ndo nto sho sawolaka l’anto tshɛ oyadi ase ɛngɔnyi ndo wanɛ wakɔtɔ kalasa kana ase woola  ndo wanɛ wahɔtwɛ kalasa. Lo yoho shɔ, sho kambaka lo woho wɔtɔnɛ la sangwelo dia Jehowa “dia weho w’anto tshɛ shimbamɛ ndo nkondja ewo k’oshika k’akambo wa mɛtɛ.”​—1 Tim. 2:4.

8. Ngande wakokaso mɛnya ngandji kokaso anangɛso l’akadiyɛso?

⁸ Sho mɛnyaka nto ngandji kaso otsha le Nzambi ndo Kristo lo mboka anangɛso l’akadiyɛso ngandji. (1 Jni. 4:21) Sho ndjakiyanyaka efula dikambo di’ehomba awɔ ndo sho mbasukɛka etena kewɔ l’atei w’ekakatanu. Sho mbakeketshaka etena kavushawɔ lakiwɔ ɔmɔtshi la ngandji, mbaembolaka etena kewɔ la hemɔ ndo sho salaka tshɛ kakokaso nsala dia mbakeketsha etena kewɔ l’ɔkɔmwɛlɔ. (2 Kɔr. 1:3-7; 1 Tɛs. 5:11, 14) Sho tetemalaka nɔmba dikambo diawɔ nɛ dia sho mbeyaka dia “ɔsɛngɔsɛngɔ w’onto ɔlɔlɔ wekɔ la shɛngiya ya wolo.”​—Jak. 5:16.

9. Naa yoho kina yakokaso mɛnya anangɛso l’akadiyɛso ngandji?

⁹ Sho lawɔ mɛnyaka ngandji kokaso anangɛso l’akadiyɛso lo nsala la wolo dia nama wɔladi lam’asaso lawɔ. Sho salaka la wolo dia mbokoya woho wa dimanyiya Jehowa anto akina. Naka Jehowa aketawɔ la lolango tshɛ dia Ɔnande mvɔ lo dikambo dia pɛkato yaso, onde dui sɔ hahombe totshutshuya dia sho monga suke dia dimanyiya anangɛso l’akadiyɛso etena katosalɛwɔ kɔlɔ? Sho hatolange monga oko ose olimu wa kɔlɔ wakate Yeso lo wɛɛla ande ɔmɔtshi. Oyadi l’ɔkɔngɔ wa nkumɛnde mbodimanyiya dibasa dia woke efula, ose olimu ɔsɔ akatone dimanyiya osekande dibasa dia tshitshɛ. (Mat. 18:23-35) Naka wɛ ekɔ l’okakatanu l’onto ɔmɔtshi la l’etshumanelo, onde wɛ koka ntakola nna dia ntondo dia mbidja wɔladi la ntondo ka mbɔtɔ lo Eohwelo? (Mat. 5:23, 24) Lo nsala ngasɔ, wɛ ayɛnya dia wɛ mbokaka Jehowa nde la Yeso ngandji k’efula.

10-11. Ngande wakoka dikumanyi mɛnya ngandji kokawɔ Jehowa nde la Yeso? (1 Petero 5:1, 2)

¹⁰ Ngande wakoka dikumanyi mɛnya dia vɔ mbokaka Jehowa nde Yeso la ngandji? Yoho mɔtshi ya dimɛna ele lo nkotsha ehomba w’ɛkɔkɔ wa Yeso. (Adia 1 Petero 5:1, 2.) Yeso akɛnya dui sɔ hwe le ɔpɔstɔlɔ Petero. L’ɔkɔngɔ wa nde manguna Yeso mbala shato, Petero aki la nsaki k’efula ka mɛnya dia nde akalangaka Yeso. L’ɔkɔngɔ wa eolwelo ka nde, Yeso akambola Petero ate: “Simɔna ɔna Joani, onde wɛ mbokakami ngandji?” Sho koka monga l’eshikikelo dia Petero akakoke nsala tshɛ kakinde l’akoka dia mɛnya ngandji kande otsha le Nkumɛnde. Yeso akatɛ Petero ate: “Leshaka ɛkɔkɔ ami wa totshitshɛ.” (Jni. 21:15-17) Ndo lo nshi yakatshikala lo lɔsɛnɔ lande, la ngandji tshɛ Petero akakokɛ ɛkɔkɔ wa Nkumadiɔndjɔ dia mɛnya dia nde akokaka Yeso ngandji.

¹¹ Dikumanyi lee, lo nshi ya Eohwelo, ngande wakokanyu mɛnya di’ɛtɛkɛta wa Yeso otsha le Petero wekɔ ohomba le nyu? Nyu koka mɛnya polo lo yɛdikɔ yakɔna yokanyu Jehowa nde la Yeso ngandji lo mbɔsa etena ka keketshaka anangɛnyu l’akadiyɛnyu mbala la mbala ndo lo mbidja welo wa laande dia nkimanyiya wanɛ wambɔla lo nyuma dia vɔ kalolɛ Jehowa. (Ɛzɛk. 34:11, 12) Nyu koka nsala la wolo dia nkeketsha ambeki wa Bible ndo anto akina wakɛnya nsaki lo mbɔtɔ lo Eohwelo, sho nangaka dia vɔ ndjaoka dimɛna nɛ dia sho nongamɛka dia vɔ lawɔ wayokoma ambeki wa Yeso.

12. Lande na kele nkana yimba l’ɛtɛkɛta wakatɛkɛta Yeso l’otsho wa la ntondo ka nyɔi kande toshaka dihonga? (Jni. 16:32, 33)

¹² L’otsho wa la ntondo ka nyɔi ka nde, Yeso akatɛ ambeki ande ate: “L’andja ɔnɛ  nyayongaka l’asui, koko nyonge la dihonga! Dimi lambodja andja ɔnɛ otshumba.” (Adia Joani 16:32, 33.) Kakɔna kakakimanyiya Yeso dia monga la dihonga la ntondo k’atunyi ande ndo ntshikala la kɔlamelo polo lo nyɔi? Nde akayaɛkɛ le Jehowa. Lo mbeya di’ambeki ande wayohomana l’ehemba akɔ waamɛ, Yeso akalɔmbɛ Jehowa dia mbakokɛ. (Jni. 17:11) Lande na kele dui sɔ toshaka dihonga? Nɛ dia Jehowa ndeka atunyi aso tshɛ wolo la fwa. (1 Jni. 4:4) Jehowa mɛnaka awui tshɛ. Tekɔ l’eshikikelo dia naka sho ndjaɛkɛ le Jehowa, kete sho koka ntondoya wɛɔma aso ndo monga la dihonga.

13. Ngande wakɛnya Yɔsɛfu y’ose Arimateya dihonga?

¹³ Tɔsɛdingole ɛnyɛlɔ ka Yɔsɛfu y’ose Arimateya. Nde akalɛmiyamaka efula oma le ase Juda. Nde aki ɔmɔtshi l’atei w’ase tuminadi ta laadiko t’ase Juda. Koko l’edja k’olimu wa Yeso lanɛ la nkɛtɛ, Yɔsɛfu aki l’ɛngɔ tshɛ onyake dihonga. Joani akate dia nde aki “ombeki waki Yeso lo woshɛshɛ nɛ dia nde akokaka ase Juda wɔma.” (Jni. 19:38) Kaanga mbakayashaka Yɔsɛfu lo losango la Diolelo, nde konanga di’anto akina mbeya dia nde aki la mbetawɔ le Yeso. Aha la taamu nde aki la wɔma wa nshisha dihole diande dia lokumu lo tshunda. Kaanga mbakidiɔ ngasɔ, Bible mbutaka dia l’ɔkɔngɔ wa nyɔi ka Yeso, l’ekomelo a shimu, Yɔsɛfu “akatshu le Pilato la dihonga tshɛ ko akɔɔlɔmbɛ odo wa Yeso.” (Makɔ 15:42, 43) Yɔsɛfu kondjashɛ nto dia nde aki ombeki wa Yeso.

14. Kakɔna kahombayɛ nsala naka wɛ ekɔ lo ndɔshana la wɔma w’onto?

¹⁴ Onde wɛ ambongaka la wɔma w’onto oko Yɔsɛfu? Onde lo ntena dimɔtshi wɛ mbokaka wɔma wa ndjaeyanya oko Ɔmɛnyi wa Jehowa la kalasa kana l’olimu? Onde wɛ ekɔ lo mengenga dia ntatɛ nsambisha kana batizama nɛ dia wɛ ekɔ lo ndjakiyanya lo kɛnɛ kayɔfɔnya anto akina lo dikambo diayɛ? Tetawɔke dia tokanyi ta ngasɔ koshimba dia wɛ nsala kɛnɛ keyayɛ ɔnɛ kekɔ ɔlɔlɔ. Lɔmba Jehowa l’otema ɔtɔi. Lɔmbande dia kosha dihonga dia nsala lolango lande. Lam’ayoyɛna woho wakadimola Jehowa alɔmbɛlɔ ayɛ, mbayoyoleka monga nge ndo ndeka monga la dihonga.​—Isa. 41:10, 13.

15. L’ɔkɔngɔ wa Yeso mɛnama le ambeki ande, ɔngɛnɔngɛnɔ waki lawɔ akatshutshuya dia nsala na? (Luka 24:52, 53)

¹⁵ Ambeki waki la lɔkɔnyɔ l’efula etena kakavu Yeso. Ohoyadja lo dihole diawɔ. Vɔ koshisha tsho ɔngɛnyi awɔ la ngandji, koko  vɔ wakayaokaka nto dia wamboshisha elongamelo kawɔ. (Luka 24:17-21) Koko, etena kakɛnama Yeso le wɔ, nde akɔshi etena dia mbakimanyiya dia vɔ nshihodia woho wakandakotsha prɔfɛsiya ya lo Bible. Nde akawasha nto olimu ɔmɔtshi w’ohomba wa nsala. (Luka 24:26, 27, 45-48) L’ɔkɔngɔ wa nshi 40 wa Yeso mbidɛ l’olongo, ambeki ande kotetemala monga l’ɔkɛyi, koko wakonge l’ɔngɛnɔngɛnɔ w’efula. Vɔ waki l’ɔngɛnɔngɛnɔ w’efula nɛ dia vɔ wakeyaka dia Yeso aki la lɔsɛnɔ ndo ɔnɛ nde aki suke dia mbakimanyiya dia vɔ nkamba olimu wakandawasha. Ɔngɛnɔngɛnɔ waki lawɔ akakimanyiya dia vɔ ntombola Jehowa aha la mpekɔ.​—Adia Luka 24:52, 53; Ets. 5:42.

16. Ngande wakokaso mbokoya ambeki wa Yeso?

¹⁶ Ngande wakokaso mbokoya ambeki wa Yeso? Sho koka monga l’ɔngɛnɔngɛnɔ lo woho watɛmɔlaso Jehowa aha tsho lo nshi ya Eohwelo, koko l’edja k’ɔnɔnyi w’otondo. Dui sɔ nɔmbaka dia sho mbidja Diolelo dia Nzambi lo dihole dia ntondo lo lɔsɛnɔ laso. Ɛnyɛlɔ, efula wakalɔngɔsɔla dikongelo diawɔ l’oyango wa sambishaka, mbɔtɔka lo nsanganya ndo salaka ɔtɛmwɛlɔ wa lo nkumbo mbala la mbala. Amɔtshi wakayaɔsɛ yɛdikɔ diaha monga la diangɔ dia l’emunyi diɔsa anto akina ɔnɛ diekɔ ohomba dia monga ohomba efula l’etshumanelo kana dia vɔ ntshɔ tokamba lɛnɛ ewɔ l’ohomba efula w’apandjudi wa Diolelo. Kaanga mbediɔ ngasɔ, tekɔ l’ohomba w’ekikelo dia ntetemala kambɛ Jehowa, nde tolakaka dia tɔtshɔkɔla efula naka sho mbetsha wahɔ wa Diolelo lo dihole dia ntondo lo lɔsɛnɔ laso.​—Tok. 10:22; Mat. 6:32, 33.

17. Kakɔna kamboyoyashikikɛ dia nsala lo Eohwelo kɛnɛ? (Enda osato.)

¹⁷ Tekɔ lo nomɔlomɔ dia mbɔtɔ lo Eohwelo kayosalema lushi la hende, Ngɔndɔ ka nɛi nshi 4. Koko, hatokoke nkonga polo l’etena kɛsɔ dia ndjɛnya lowando laso lo lɔsɛnɔ ndo nyɔi ka Yeso ndo ngandji kakandɛnya nde la Jehowa lo dikambo diaso. Nkondja wahɔ lo nkamba la diaaso tshɛ lo nshi ya Eohwelo dia nsala dui sɔ. Ɛnyɛlɔ, yaombɛ etena ka mbadia ndo nkana yimba lo kɛnɛ kendana l’awui wɔtɛkɛtami lo dibaya diele l’ɔtɛ a dui ɔnɛ: “Lomingu l’ekomelo la lɔsɛnɔ laki Yeso la nkɛtɛ,” diatanema l’Apendisɛ B12 wa Bibe ekadimwelo k’andja w’oyoyo. Etena kadiayɛ awui wendana la lɔsɛnɔ la Yeso, yanga avɛsa wa lo Bible wakeketsha lowando, ngandji, dihonga ndo ɔngɛnɔngɛnɔ ayɛ. Oma laasɔ, yanga toho ta shikaa takokayɛ mɛnya lowando l’om’akɛse otema. Wɛ koka monga l’eshikikelo dia Yeso ayɔngɛnangɛna tshɛ kasalayɛ dia mboohɔ l’etena ka Eohwelo kɛnɛ.​—Ɛny. 2:19.