1, 2. 1) ¿Tuku nakinkamamakgkatsiniyan komo nalilakpuwanaw xlatamat chu xtaskujut Jesús? 2) ¿Tuku naʼakxilhaw kʼuma artículo?

 AKXNI niy tiku lu xpaxkiyaw, lu nitlan makgkatsiyaw. Max xapulana, akxni lilakpuwanaw la xlilhuwa patinalh akxni nina xniy, tlakg lilipuwanaw. Max chuna la natitaxtu kilhtamaku nalakapastakaw tuku xtlawa tiku nilh nema nakinkamakgtayayan napaxuwaparayaw. Akgtum liʼakxilhtit, max wi tuku kinkamasiyanin, wi tuku tlawalh o wi tuku wa nema kinkamakgpuwantinin o kinkamakgapaxuwan.

² Nachuna kitaxtu xlakata la patinalh chu nilh Jesús. Lu lilipuwanaw akxni likgalhtawakgayaw tuku wan Biblia, liwaka Akxni lakapastakkan akxni tinilh Cristo, xlakata uma kilhtamaku tlakg lilakpuwanaw xtamakamastan (1 Cor. 11:24, 25). Pero akxni lakapastakaw tuku wa chu tuku tlawalh Jesús akxni latamalh unu kKatiyatni, lu kinkamakgapaxuwayan. Na kinkamatliwakglhan nalilakpuwanaw tuku tlawama la uku chu tuku natlawa kimpalakatakan kkilhtamaku nema aku mima. Kʼuma artículo, naʼakxilhaw pi akxni lilakpuwanaw putum uma chu tapaxkit nema Jesús kinkakgalhiniyan kinkamakgpuwantiniyan nalimasiyayaw tapaxtikatsinit.

3. ¿Tuku xlakata kilipaxtikatsinitkan talakgmaxtut?

³ Akxni lilakpuwanaw xlatamat chu la Jesús nilh lu paxtikatsiniyaw. Akxni xlichuwinama Dios unu kKatiyatni, kamasiyanilh latamanin tuku tlan nalimin xTamapakgsin Dios. Akinin lu xtapalh akxilhaw umakgolh tamasiy xla Tamapakgsin. Lu paxtikatsiniyaw talakgmaxtut xlakata kinkamakgtayayan tlan natalalinaw  Jehová chu Jesús. Tiku kanajlaniyaw Jesús na kgalhiyaw takgalhkgalhin pi nalatamayaw putum kilhtamaku chu nakaʼakxilhparayaw kintalilakgapasnikan tiku nikgonita (Juan 5:28, 29; Rom. 6:23). Xlikana pi ni kinkalakgchanan namakgamakglhtinanaw putum umakgolh tasikulunalin. Nikxnila katikaxokgoniw Dios chu Cristo putum tuku tlawakgonit kimpalakatakan (Rom. 5:8, 20, 21). Pero ¿la tlan nakalimasiyaniyaw pi lu kapaxtikatsiniyaw? Kaʼakxilhwi.

4. ¿Tuku tlawalh María Magdalena xlakata xlimasiyalh pi xpaxtikatsini tuku Jesús xtlawanit xpalakata? (Kaʼakxilhti dibujo).

⁴ Kalilakpuwaw xliʼakxilhtit chatum puskat judía tiku xwanikan María Magdalena. Xla lu xpatinama, xlakata xlaktanumakgo kgalhtujun demonios. Max xla xlakpuwan pi ni xʼanan tiku tlan xmakgtayalh. Kalilakpuwanti la makgkatsilh akxni Jesús katamakxtulh demonios tiku xlaktanumakgo. Max lu xpaxtikatsini. Wa xlakata kstalanina Cristo litaxtulh chu maklakaskilh xkilhtamaku, xlitliwakga chu tuku xkgalhi xlakata xmakgtayalh Jesús akxni xlichuwinama Dios (Luc. 8:1-3). Maski María lu xpaxtikatsini tuku Jesús xtlawanit xpalakata, max ni liwana xʼakgatekgsa lanka tamaskiwin nema Jesús xʼama makamasta. Jesús xʼama masta xlatamat xlakata latamanin chu chuna putum tiku xkanajlanikgolh xmakglhtinankgolh latamat nema nikxni sputa (Juan 3:16). Maski chuna, María limasiyalh pi xpaxtikatsininan xlakata ni makgxtakgli Jesús. Akxni Jesús kxtokgowakakanit kkiwi, xla lakatsu tamakgxtakgli xlakata namatliwakglha Jesús chu amakgapitsi tiku na anta xwilakgo (Juan 19:25). Chu akxni Jesús xwi kputaknun, María chu achatiy lakpuskatin linkgolh xalakmuksun tuwan xlakata xlitlawakgolh xmakni Jesús (Mar. 16:1, 2). Jehová sikulunatlawalh María xlakata ni makgxtakgnalh. ¡María max lu paxuwalh akxni akxilhli pi Jesús xlakastakwananit chu tachuwinalh! Wa uma lanka talakgalhaman nema ni lhuwa xtamakgalhtawakgen Jesús kgalhikgolh (Juan 20:11-18).

5. ¿La nalimasiyayaw pi paxtikatsiniyaw putum tuku Jehová chu Jesús tlawakgonit kimpalakatakan?

 ⁵ Akinin na tlan nalimasiyayaw pi paxtikatsiniyaw putum tuku Jehová chu Jesús tlawakgonit kimpalakatakan. ¿La tlan chuna natlawayaw? Namaklakaskinaw kinkilhtamakujkan, kilitliwakgakan chu kintuminkan xlakata nalichuwinanaw xTamapakgsin Dios. Akgtum liʼakxilhtit, tlan namakgtayananaw niku katlawakan Pukgalhtawakga chu akxni kakaxtlawakan niku kakninaniyaw Jehová.

6. ¿Tuku xlakata wanaw pi talakgmaxtut akgtum tamaskiwin nema kinkamaxkikanitan chatunu akinin?

⁶ Akxni lilakpuwanaw la xlilhuwa kinkapaxkikgoyan Jehová chu Jesús, tlawa pi na lu nakapaxkiputunaw (1 Juan 4:10, 19). Chu tlakg kapaxkiyaw akxni akgatekgsaw pi Jesús nilh xlakata nakinkalakgmaxtuyan chatunu chatunu akinin. Apóstol Pablo lu xpaxtikatsini uma tamaskiwin. Wa xlakata, katsokgnanilh Gálatas: «Xkgawasa Dios, […] kimpaxkilh chu tamakamastalh kimpalakata» (Gál. 2:20). Xlakata xtamakamastan Jesús, tlan xʼamigo Jehová nawanaw (Juan 6:44). ¿La lakpuwana xlakata katsiya pi Jehová wi tuku tlan akxilhli mimpalakata chu lu lhuwa xokgolh xlakata tlan natalalipina? ¿Ni tlawa pi lu napaxkiya Jehová chu Jesús? Wa xlakata putum akinin kililakpuwanatkan: «¿Tuku kimatlawi uma tapaxkit?».

7. Chuna la tasiya kdibujo, ¿tuku tlan natlawayaw putum akinin xlakata nalimasiyayaw pi paxkiyaw Jehová chu Jesús? (2 Corintios 5:14, 15; 6:1, 2).

⁷ Tapaxkit nema kgalhiniyaw Dios chu Cristo tlawa pi na nakapaxkiyaw amakgapitsin (kalikgalhtawakga 2 Corintios 5:14, 15; 6:1, 2). Pulaktum la limasiyayaw uma tapaxkit wa akxni xatapaxuwan kalitachuwinanaw Dios putum latamanin. Kalitachuwinanaw Dios maski tanu xcolorkan, xtalismaninkan chu maski kgalhikgo tumin o ni. Akxni chuna tlawayaw taskujaw  Jehová, xlakata xla lakaskin «pi putum latamanin liwana kalakgapaskgolh xaxlikana chu kalakgtaxtukgolh» (1 Tim. 2:4).

8. ¿La nalimasiyayaw pi kapaxkiyaw kinatalankan?

⁸ Atanu la nalimasiyayaw pi paxkiyaw Dios chu Cristo wa pi nakapaxkiyaw kinatalankan (1 Juan 4:21). Akgtum liʼakxilhtit, kalilakgaputsayaw chatunu chatunu chu kamakgtayayaw akxni titaxtukgo tuku tuwa. Tlan kamamakgkatsiniyaw akxni niy tiku lu xpaxkikgo, kalakgapaxialhnanaw akxni tatatlakgo chu tlawayaw putum tuku matlaniyaw xlakata nakamatliwakglhaw komo kgalhikgo tajatat xla talipuwan (2 Cor. 1:3-7; 1 Tes. 5:11, 14). Na tlawayaw oración xpalakatakan, xlakata katsiyaw pi «xʼoración chatum tiku akgstitum likatsi kgalhi lhuwa litliwakga chu tlan kamakgtaya latamanin» (Sant. 5:16).

9. ¿Tuku atanu tlan natlawayaw xlakata nalimasiyayaw pi kapaxkiyaw kinatalankan?

⁹ Atanu la nalimasiyayaw pi kapaxkiyaw kinatalankan wa pi naliskujaw xlakata tlan nakatalalinaw. Liskujaw natapatinanaw chuna la Jehová. Kalilakpuwaw uma: komo Jehová mastalh talakaskin pi xKgawasa xnilh xpalakata kintalakgalhinkan, ¿ni xlilat lakapala nakatapatiyaw kinatalankan akxni wi tuku nitlan kinkatlawanikgoyan? Ni litaxtuputunaw chuna la nixatlan skujni nema lichuwinalh Jesús kʼakgtum xparábola. Xmalana xtapatinit lhuwa tumin nema xlaklini, pero xla ni tapatiputulh achatum xtaskujni tiku ni lhuwa tumin xlaklini (Mat. 18:23-35). Wa xlakata, komo takgalhiya taʼakglhuwit chatum tala, wix kapit chu katalakkaxtlawa taʼakglhuwit akxni nina lakgchan nalakapastakkan akxni tinilh Cristo (Mat. 5:23, 24). Komo chuna natlawaya, nalimasiyaya pi lu kapaxkiya Jehová chu Jesús.

10, 11. ¿La nalimasiyakgo lakgkgolotsin pi paxkikgo Jehová chu Jesús? (1 Pedro 5:1, 2).

¹⁰ Lakgkgolotsin tlan nalimasiyakgo pi paxkikgo Jehová chu Jesús akxni xatapaxuwan nakakuentajtlawakgo xborregos Jesús (kalikgalhtawakga 1 Pedro 5:1, 2). Jesús liwana wanilh apóstol Pedro pi chuna xlitlawat xwanit. Xlakata Pedro makgtutu xwanit pi ni xlakgapasa Jesús, max lu xlimasiyaputun pi xlikana xpaxki. Akxni Jesús xlakastakwananita, kgalhskilh Pedro: «Simón xkgawasa Juan, ¿kimpaxkiya?». Max Pedro xtitlawalh kaxatukawa tuku xwanika xlakata xlimasiyalh pi xpaxki Jesús. Chu Jesús wanilh: «Kakakuentajtlawa laktsu kiborregos» (Juan 21:15-17). Lata uma kilhtamaku, Pedro xatapaxuwan kakuentajtlawalh xborregos Malana, chu chuna limasiyalh pi xpaxki.

¹¹ ¿La nalimasiyakgo lakgkgolotsin Akxni lakapastakkan akxni tinilh Cristo pi lu xlakaskinka liʼakxilhkgo tachuwin nema Jesús wanilh Pedro? Tlan nalimasiyakgo la xlilhuwa paxkikgo Jehová chu Jesús komo lu naliskujkgo nakamakgtayakgo tiku nialh lichuwinankgo Dios (Ezeq. 34:11, 12). Nachuna, lu xlikuentajtlawatkan tiku kalimakgalhtawakgemaka Biblia chu tiku xlimakgtumku minkgo Akxni lakapastakkan akxni tinilh Cristo. Kaʼakxilhkgo umakgolh latamanin pi tlan kstalaninanin Cristo nalitaxtukgo chu lakaskinkgo pi tlan kamakgkatsikgolh.

12. ¿Tuku xlakata lu kinkamakgtayayan ni napekuanaw akxni lilakpuwanaw tuku wa Jesús katsisni akxni nina xmakgnikan? (Juan 16:32, 33).

¹² Katsisni akxni nina xmakgnikan, Jesús kawanilh kstalaninanin: «Kkakilhtamaku nakgalhiyatit takatsanajwat, pero ¡tliwakga kawantit!, akit kmakgatlajanit kakilhtamaku» (kalikgalhtawakga Juan 16:32, 33). ¿Tuku makgtayalh Jesús ni napekuan akxni xtalamakgasitsin wanikgolh pi namakgnikgo chu tuku makgtayalh ni namakgxtakga Dios asta  kkalinin? Xlakata xlipawan Jehová. Xlakata Jesús xkatsi pi kstalaninanin na xʼamakgo titaxtukgo watiya taputsan, skinilh Jehová pi xkakuentajtlawalh (Juan 17:11). ¿Tuku xlakata uma kinkamakgtayayan ni napekuanaw? Xlakata katsiyaw pi Jehová tlakg tliwakga nixawa tiku nakinkatalatlawaputunan (1 Juan 4:4). Chu xla putum akxilha. Liwana katsiyaw pi komo wa nalipawanaw Jehová, tlan ni napekuanaw.

13. ¿La limasiyalh José xalak Arimatea pi ni xpekuan?

¹³ Kalilakpuwaw José xalak Arimatea, chatum chixku tiku judíos lu xmaxkikgo kakni. Xla xmakgtapakgsi kSanedrín, tlakg xlakaskinka tribunal nema xkgalhikgo judíos. Pero akxni Jesús xlichuwinamajku Dios kKatiyatni, limasiyalh pi xpekuan. Juan lichuwinalh pi «na xtamakgalhtawakgen Jesús xwanit, pero niti xkatsi xlakata xkapekuani judíos» (Juan 19:38). Maski lu xlakgati tamakatsinin xla Tamapakgsin, ni limasiyalh pi xkanajlani xKgawasa Dios. Max xpekuan pi latamanin nialh xmaxkikgolh kakni. Maski chuna, Biblia wan pi akxni Jesús xninita, “José nialh pekualh, lakgalh Pilato chu skinilh xmakni Jesús” (Mar. 15:42, 43). José nialh matsekgli xtakanajla.

14. ¿Tuku kilitlawatkan komo lilakgaputsayaw tuku nawankan?

¹⁴ ¿Na lilakgaputsaya tuku nawankan chuna la akgspulalh José xalak Arimatea? ¿Limaxanana nawana pi wix xtatayana Jehová kmintaskujut o kʼescuela? ¿Mamakgapalipat xlakata publicador nalitaxtuya o xlakata natamunuya? Ni kamasta talakaskin pi tuku wankgo amakgapitsin natlawa pi ni natlawaya tuku xlilat. Katasaskini Jehová pi kamakgtayan chu kamaxkin litliwakga xlakata namakgantaxtiya xtalakaskin. Akxni naʼakxilha la xla kgalhti miʼoraciones, tlakg natatliwakglha chu nialh lu katipekuanti (Is. 41:10, 13).

15. ¿La kamakgtayalh xtamakgalhtawakgen Jesús tapaxuwan nema makgkatsikgolh akxni akxilhkgolh pi Jesús xlakastakwananita? (Lucas 24:52, 53).

¹⁵ Akxni Jesús nilh, xtamakgalhtawakgen lu lipuwankgolh. ¿La xmakgkatsi wix komo anta xtitawila? Xtamakgalhtawakgen Jesús xmakgatsankgakgonit chatum amigo tiku lu xpaxkikgo chu na xmakgatsankgakgonit xtakgalhkgalhinkan (Luc. 24:17-21). Pero alistalh Jesús katasiyanilh chu kalimaxtunilh kilhtamaku xlakata nakawani pi xla xmakgantaxtima tuku Biblia xlichuwinanit. Nachuna, kalakgayawalh akgtum lu xlakaskinka taskujut (Luc. 24:26, 27, 45-48). Chu 40 kilhtamaku alistalh, akxni Jesús alh kʼakgapun, xtamakgalhtawakgen nialhtu xlipuwamakgo. Lu xpaxuwakgo  xlakata Jesús xlakastakwananit chu xʼama kamakgtaya xlakata xmakgantaxtikgolh xtaskujutkan. Uma tapaxuwan kamakgpuwantinilh namalankikgo Jehová (kalikgalhtawakga Lucas 24:52, 53; Hech. 5:42).

16. ¿La tlan nastalaniyaw xliʼakxilhtitkan xtamakgalhtawakgen Jesús?

¹⁶ Chu akinin, ¿la tlan nastalaniyaw xliʼakxilhtitkan xtamakgalhtawakgen Jesús? Xatapaxuwan naskujnaniyaw Jehová chali chali, ni kajwatiya Akxni lakapastakkan akxni tinilh Cristo. Xlakata chuna natlawayaw, pulana kiliwilitkan xTamapakgsin Dios kkilatamatkan. Akgtum liʼakxilhtit, makgapitsi lakgpalikgonit hora akxni skujkgo xlakata tlakg nalichuwinankgo Dios, naʼankgo ktamakxtumit chu nakakninanikgo Dios kfamilia akgatunu semana. Makgapitsi asta makgxtakgkgonit tuku amakgapitsi xlakaskinka liʼakxilhkgo xlakata tlakg namakgtayanankgo kxcongregacioneskan o naʼankgo makgtayanankgo niku ni lhuwa anankgo xtatayananin Jehová. Xlikana pi lu talakaskin naliskujaw xlakata ni namakgxtakgaw Jehová, pero xla malaknu pi lu nakinkasikulunatlawayan komo pulana nawiliyaw xTamapakgsin (Prov. 10:22; Mat. 6:32, 33).

17. ¿Tuku kilitlawatkan Akxni lakapastakkan akxni tinilh Cristo? (Kaʼakxilhti dibujo).

¹⁷ Lu lakaskinaw pi kalakgchalha martes 4 xla abril xlakata nalakapastakaw akxni tinilh Cristo. Pero ni talakaskin nakgalhkgalhiyaw asta akxni nachan uma kilhtamaku xlakata nalilakpuwanaw xlatamat chu chuna la nilh Jesús, chu tapaxkit nema Jehová chu Jesús kinkalimasiyanikgonitan. Liwana kalimaklakaskinti kilhtamaku akxni talakatsuwima Akxni lakapastakkan akxni tinilh Cristo xlakata nalilakpuwana uma. Akgtum liʼakxilhtit, tlan nalimaxtuya kilhtamaku xlakata nalakputsananiya tuku min Xlatamat chu xtaskujut kstalanina Cristo xla abril kata 2019 páginas 4 chu 5, nema wanikan, «¿Tuku tlan natlawayaw akxni nina lakgchan natalakapastaka akxni tinilh Cristo?». Kalikgalhtawakga textos xalak Biblia nema natlawa pi ni napekuana chu napaxuwaya, chu nema natlawa pi tlakg nakapaxkiya chu nakapaxtikatsiniya Jehová chu Jesús. Chu kalilakpuwanti tuku tlan natlawaya xlakata nalimasiyaya pi paxtikatsiniya xliputum minaku. Liwana kakatsiw pi Jesús lu xtapalh naʼakxilha putum tuku natlawayaw xlakata nalakapastakaw akxni tinilh (Apoc. 2:19).