1, 2. a) ¿Nénachi úpirini pʼikuarherani engachi eratsentajka na enga irekapka Jesúsi ka aianhpini? b) ¿Ambechi exea ini jorhenguarhikua jimbo?

 ENGACHI uarhiranchajka nemani engachi kánikua xéncheenga, kánikuachi jirinhantasïnga. Jamberi ueenani kánikuachi no sési pʼikuarherajka engachi miántajka imani jurhiatikuechani ante de ima uarhini, ka sánderia enga ima kʼuiripu kómu uarhika. Joperu jamberi tiempu jingoni miántaakachi ambe ma ima kʼuiripueri engajtsïni jarhuataaka sánderu sési pʼikuarherani, pori ejemplu, ambe ma engajtsïni jorhendapka, ambe ma enga úpka o uandani parajtsïni uinhaperantani o parajtsïni tsíperani.

² Ka májkuenchi no sési pʼikuarherasïnga engachi arhintajka na enga xáni kómu nitamakuarhipka ka uarhini Jesúsi. Imani mesiicha jimbo enga Miántskua úkuarhijka, arhutasïngachi tiempu parachi eratsentani na enga xáni jukaparhakueka Jesúsiiri uarhikua (1 Cor. 11:24, 25, TNM). Peru engachi eratsentajka imani ambe enga Jesúsi úpka ka ambe enga uandapka enga Echerirhu jámani japka, kánikuajtsïni sési pʼikuastantasïndi. Ka ístujtsïni uinhaperantasïndi eratsentani ambe enga ima úni jaka iásï ka ambe enga uaaka sánderu orhepatini juchantsïni jimbo. Ini jorhenguarhikua jimbo exenchi jauaka eska eratsentani iámindu ini ambe ka ístu na engajtsïni xáni xénchajka Jesúsi, úsïnga eskachi mámaru ambe uaaka parachi xarhatani eskachi agradesidu jarhaska.

3. ¿Ambe ka ambe jimbochi agradesidu jarhaski euajpintskua jimbo?

³ Eratsentani na enga irekapka Jesúsi ka na enga uarhika, úsïndi eskachi kánikua agradesidu pʼikuarheraaka. Enga ima Echerirhu jámani japka aianhpini, jorhendaaspti kʼuiripuechani ambakiti ambe Tata Diosïiri Reinueri. Para jucha i ambe kánikua jukaparhakua ambeesti. Kánikuachi agradesidu jarhaska euajpintskua jimbo, jimboka úsïnga eskachi uaaka sési pájperani Tata Diosï Jeoba jingoni ka Jesúsini  jingoni. Ka jucha engachi xarhatajka eskachi mintsikasïnga Jesúsini, ístuchi erokuarhixaka irekani para méntkisï ka ménderu exeantani imeechani engachi uarhiranchaakia ka engachi kánikua xénchauenga (Juanu 5:28, 29; Rom. 6:23). Ísïisti, juchachi no ma ambe úska parachi ini kóntperateechani jatsiani. Ístuchi no méni uaaka maiamuntani Tata Diosïni ka Kristuni iámindu imani ambe jimbo engaksï úka juchantsïni jimbo (Rom. 5:8, 20, 21). Peru, ¿nénachi uaa xarhatakuani eskachi kánikua agradesidu jarhaska? Ju je exeni.

4. ¿Ambe úspi María Magdalena para xarhatani eska agradesida jarhaspka imani ambe jimbo enga Jesúsi úpka imani jimbo? (Exe je dibujuni).

⁴ Ju je exeni María Magdalenaeri ejempluni, uarhiiti ma enga Judea anapuepka. Ima kánikua no sési nitamakuarhixapti jimbokaksï siete demoniuecha incharhitixapti ka kánikuaksï no sési úkuxapti. Jamberi ima eratseendi eska no nema úpiringa jarhuatani. ¿Úsïntsï eratsentani na enga pʼikuarherapka ima enga Jesúsi petarhitantaapka demoniuechani? Seguru eska kánikua agradesida jarhaspka. Ísï jimbo, Jesúsiiri chúxapati úkuarhispti ka úraspti imeeri tiempuni, uinhapikua ka ambe enga jatsikuarhepka para Jesúsini jarhuatani enga aianhpini jámani japka (Luk. 8:1-3). Nájkiruka María kánikua jukaparhareenga ambe enga Jesúsi úpka imani jimbo, jamberi no mítepti ambe enga Jesúsi úpiringa sánderu orhepatini. Jesúsi íntspipirindi imeeri tsípikua iámindu kʼuiripuecha jimbo paraka “nákinterku nema enga imani jakajkuaka” intsïnhaaka tsípikua para méntkisï (Juanu 3:16). Nájkiruka María no iámindu ambe kurhanguenga, enga ísï no jurajkupka Jesúsini xarhataspti eska kánikua agradesida jarhaspka. Ka enga Jesúsi cháparhakata japka chkarirhu, María jima pakaraspti para uinhaperantani imani ka ístu máteruechani engaksï jima japka (Juanu 19:25). Ka ístu enga Jesúsi tumbarhu japka, María ka máteru tsimani uarhiitiichaksï pʼuntsumikua ambeksï páspti paraksï Jesúsiiri kuerpuni atarhini (Mar. 16:1, 2). Tata Diosï Jeoba kánikua kóndentaspti Maríani enga ísï no jurajkupka Jesúsini. ¡Na xáni sési pʼikuarherapi María enga exepka eska Jesúsi tsíntaspka ka enga úpka uandontskuarheni imani jingoni! I kʼéri kóntperata máespti engaksï no uánikua Jesúsiiri chúxapatiicha úpka jatsini (Juanu 20:11-18).

5. ¿Nénachi uaa xarhatani eskachi agradesidu jarhaska iámindu imani ambe jimbo enga Tata Diosï Jeoba ka Jesúsi úka juchantsïni jimbo?

⁵ Juchajtuchi uaaka xarhatani eskachi agradesidu jarhaska Tata Diosï Jeoba ka Jesúsi jingoni  iámindu imani ambe jimbo engaksï úka juchantsïni jimbo. ¿Néna? Úraparini juchaari tiempu, uinhapikua ka ambe engachi jatsikuarheka parachi jarhuajpeni Tata Diosïiri Reinueri ánchikuarhitani úni. Pori ejemplu, uaakachi aiakukuarheni parachi jarhuajpeni konstruksionirhu ka imani lugaricha jimbo engachi úraajka parachi kómarhini Tata Diosï Jeobani.

6. ¿Andichisï uandajki eska euajpintskua regalu máeska para mándani jucha?

⁶ Engachi eratsentajka na engajtsïni xáni xénchajka Tata Diosï Jeoba ka Jesúsi, juchajtuchi uékasïnga májkueni xénchaani imeechani (1 Juanu 4:10, 19). Ka útasïchi sánderu xénchaasïnga engachi kurhangujka eska Jesúsi uarhiska mándani juchantsïni jimbo. Apostoli Pablu kánikua agradesidu jarhaspti ini regaluni jimbo. Ísï jimbo, ini ambe karakuaspti Galasia anapuechani: Tata Diosïiri Uájpa “engareni xáni kánikua uékajka ka enga tsípikua íntspika jíndeni jimbo” (Gal. 2:20). Jesúsiiri uarhikua jimbo, Tata Diosï Jeoba ústi eskajtsï chá imani andarhierapiringa parajtsï úni imeeri amigueni (Juanu 6:44). ¿Nóksïni mintsitarhu niárachesïni míteni eskaksïni Tata Diosï Jeoba ambakiti ambe exechiska ka eska kánikua maianhpeska parajtsï chá úni imeeri amigueni? ¿No ísïiski eska i ambe úsïnga eskajtsï sánderu xénchaaka Tata Diosï Jeobani ka Jesúsini? Ísï jimbo, iáminduechachi uaaka kurhamarhikuarhini: “Na engani xáni xénchajka Tata Diosï Jeobani ka Jesúsini, ¿ambe úsïni eskani uaaka?”.

7. ¿Nénachi uaa xarhatani eskachi xénchasïnga Tata Diosï Jeobani ka Jesúsini? (2 Korintu 5:14, 15; 6:1, 2).

⁷ Inde uékperakua engachi pʼikuarherajka Tata Diosïni jimbo ka Jesúsini jimbo, jarhuatasïndijtsïni parachi xénchaani máteruechani (arhinta je 2 Korintu 5:14, 15; 6:1, 2). Ma ambe engachi uaaka úni parachi xarhatani eskachi xénchaasïnga máteruechani, jindeesti tsípikua jingoni aianguani iáminduechani Tata Diosïiri ambe. Ísï jimbo, aianguasïngachi iámindu kʼuiripuechani náki uéjki raseenksï, náki uéjki pʼindekuechanksï jatsiani ka no arhiparini sinksï jatsikuarheriiski  o nómbe. Engachi ísï újka, májku kʼérichi ánchikuarhini jarhasïnga Tata Diosï Jeoba jingoni, jimboka ima uékasïnga “eskaksï iámindu kʼuiripuecha pʼímutantskateuaka, ka andajkuarhinksï míteni ambe enga ísïika” (1 Tim. 2:4).

8. ¿Nénachi uaa xarhatani eskachi xénchaasïnga juchaari erachiichani?

⁸ Máteru ambe engachi uaaka úni parachi xarhatani eskachi xénchasïnga Tata Diosïni ka Kristuni jindeesti, xénchaani juchaari erachiichani (1 Juanu 4:21). Pori ejemplu, uandanhiasïngachi imeechani jimbo ka jarhuataasïngachi engaksï no sési nitamakuarhini jarhajka. Uinhaperantaasïngachi engaksï imeecha uarhiranchajka nemani, nirasïngachi pʼorhembiani engaksï pʼamenchani jarhajka ka úsïngachi ambe engachi xáni uaaka parachi sési pʼikuastantaani engaksï kómu pʼikuarherani jarhajka (2 Kor. 1:3-7; 1 Tes. 5:11, 14). Ístuchi kómarhijpikuasïnga jimbokachi míteska eska “kánikuamindu marhuasïn[ga] enga ma ambakiti kʼuiripu kómarhijka Diosïni” (Sant. 5:16).

9. ¿Ambe máteru ambechi uaa úni parachi xarhatani eskachi xénchaasïnga juchaari erachiichani?

⁹ Máteru ambe engachi uaaka úni parachi xarhatani eskachi xénchaasïnga juchaari erachiichani, jindeesti jánguarhintani sési pájperani imeecha jingoni. Jánguarhintasïngachi ísï puátspentani eska Tata Diosï Jeoba na újka. Pori ejemplu, ju je eratsentani ini ambe: Enga Tata Diosï jurajkuka eska imeeri Uájpa uarhipiringa juchaari pekaduechani jimbo, ¿nóchi jatsipirini para sóntku puákuantani juchaari erachiichani engajtsïni úchiaka ambe ma? Juchachi no uékasïnga ísïini eska ima jántspiri enga xáni no noambakepka enga Jesúsi uandapka imeeri ejemplurhu ma. Imeeri patroni puákuntaspti enga ima kánikua sentabu kánguni japka, peru ima no puákuntaspti máteru jántspirini enga no xáni kánikua sentabu kánguni japka (Mat. 18:23-35). Jiájkani, enga chá arhirperaka erachi ma jingoni, ¿andijtsïsï no chá ueenajki úni ambe ma parajtsï sési pájperantani imani jingoni ante de Miántskua úkuarhini? (Mat. 5:23, 24). Engajtsï ísï úska, xarhatani jauakajtsï eskajtsï kánikua xénchasïnga Tata Diosï Jeobani ka Jesúsini.

10, 11. ¿Nénaksï uaa xarhatani orhejtsïkutiicha eskaksï xénchasïnga Tata Diosï Jeobani ka Jesúsini? (1 Pedru 5:1, 2).

¹⁰ Orhejtsïkutiichaksï uaati ambakiti ambe úni paraksï xarhatani eskaksï xénchasïnga Tata Diosï Jeobani ka Jesúsini: uaatiksï xénchperakua jingoni kuidariuani Jesúsiiri karichiichani (arhinta je 1 Pedru 5:1, 2). Tata Diosïiri Uájpa sési xarhatakuspti ini ambe apostoli Pedruni. Jimboka Pedru tanimu xanhari uandaspka eska no mítespka Jesúsini, jamberi uékani japti xarhatakuni eska xénchasïreenga. Enga Jesúsi na tsíntapkia, kurhamarhispti: “Simóni, Jonasi uájpa, ¿uékasïndini?”. Seguru eska Pedru úpiringa ambe uéjkini para xarhatakuni eska uékasïreenga. Ka tátsekua Jesúsi arhispti: “Kuidaria juchiiti karichiichani” (Juanu 21:15-17). Jima para orhepatini, Pedru xénchperakua jingoni kuidariuaspti Jesúsiiri karichiichani ka ísï xarhatakuspti eska xénchasïreenga.

¹¹ Imani mesiicha jimbo enga Miántskua úkuarhijka, ¿orhejtsïkutiichaksï néna uaa xarhatani eskaksï jukaparharasïnga ambe enga Jesúsi arhipka Pedruni? Orhejtsïkutiichaksï uaati xarhatani na engaksï xáni xénchajka Tata Diosï Jeobani ka Jesúsini engaksï jánguarhintaska kuidariuani ka uinhaperantaani erachiichani ka engaksï ístu jánguarhintaska jarhuataani imeechani engaksï jarharika kúnguarhikuani (Ezeq. 34:11, 12). Ístu, uaatiksï jarhuataani imeechani engaksï Bibliani jorhenguarhini jaka ka imeechani engaksï primeru xanhari niuaka Miántskuarhu. Orhejtsïkutiichaksï uékasïndi eskaksï imeecha sési pʼikuarheraaka, jimbokaksï erokuarhisïnga eskaksï imeechajtu ma jurhiani niáraaka Jesúsiiri chúxapatiini.

12. ¿Andijtsïnisï jarhuatajki balori jukani eratsentani imani ambe enga Jesúsi uandapka ima chúrikua ante de uarhini?

¹² Ima chúrikua ante de Jesúsi uarhini, i ambe arhiaspti imeeri chúxapatiichani: “Chájtsï ini parhakpini jimbo sufririaka, peru mintsita jukanta je,  ji andaska parhakpinini” (arhinta je Juanu 16:32, 33). ¿Ambe jarhuataspi Jesúsini para balori jukani engaksï imeeri enemiguecha arhipka eskaksï no sési úkupiringa ka para no jurajkuni Tata Diosïni asta uarhikuarhu jamberi? Mintsikani Tata Diosï Jeobani. Ka jimboka Jesúsi mítespka eskaksï imeeri chúxapatiicha májkueni ambe nitamakuarhipiringa, kurhakuspti Tata Diosï Jeobani eska kuidariuapiringa (Juanu 17:11). ¿Andijtsïnisï jarhuatajki i ambe parachi balori jukani? Jimboka Tata Diosï Jeoba iauani sánderu uinhapitiiska eska náki uéjki juchaari enemigu ma (1 Juanu 4:4). Ka ima jingontku jarhasti iámindu ambe jimbo. Seguruchi jarhaska eska engachi imani jurajkukuska iámindu ambe, uaakachi orhepani uérakuni imani ambe engajtsïni chérajka ka balorichi jukaaka.

13. ¿Néna xarhataspi José Arimatea anapu eska balori jukaspka?

¹³ Ju je eratsentani Joséeri ejempluni, achamasï ma enga Arimatea anapuepka ka engaksï judiuecha kánikua janhanharhienga. Ima, Jerusaléni anapu juesiicha jingoni jarhaspti. Peru ima no káni balori xarhataspti enga Jesúsi aianhpini jámani japka. Juanu uandaspti eska José jindeespka “ma jorhenguarhiti Jesúsiiri peru enga no méni uékapka xarhatakuarhini eska jindeespka imeeri jorhenguarhiti jimboka chérhiasïreenga Israeli anapuechani” (Juanu 19:38). Nájkiruka uékeenga sánderu ambe míteni Reinueri ambe, no uékaspti eska mítenhapiringa eska ima jakajkusïreenga Tata Diosïiri Uájpani. Jamberi eratsendi eskaksï kʼuiripuecha nóteru janhanharhipiringia. Ambe uéjki jimboeni, Biblia uandantasïndi eska enga Jesúsi na uarhipkia, José “no sáni chéparini nirasp[ka] andarhierani Pilatuni ka kurhakuntaspti Jesúsiiri kuerpuni” (Mar. 15:42, 43). José nóteru jískasptia eska Jesúsiiri chúxapati máespka.

14. ¿Ambechi jatsiski para úni engachi chéjka ambe engaksï máteruecha uandaaka juchaari ambe?

¹⁴ ¿Chá chésïni ambe engaksï kʼuiripuecha uandaaka, ísï eska na úkuarhinchapka José Arimatea anapu? ¿Ménichantsï kʼuratsesïni uandantani eskuelarhu o ánchikuarhitarhu eskajtsï Jeobaeri testigueska? ¿Chésïntsï uérani aianhpini o itsï atakuarhini? Asï ché je imani ambe jimbo engaksï máteruecha uandaaka chaari ambe, jimboka inde ambeksïni no jurajkuati imani ambe úni enga sési jaka. Mintsita jingoni kurhaku je Tata Diosï Jeobani eskaksïni jarhuataaka ka eskaksïni íntskuaka balori parajtsï imani ambe úni enga ima uéjka. Ka engajtsï chá exeaka na engaksïni mókuchiantauaka chaari kómarhikuechani, sánderujtsï uinhapiti jauaka ka sánderujtsï balori jukaaka (Is. 41:10, 13).

15. ¿Ambeksï úspi Jesúsiiri chúxapatiicha jimbokaksï tsípixapka enga Jesúsi tsíntapka? (Lukasʌ 24:52, 53).

¹⁵ Enga Jesúsi uarhipka, imeeri chúxapatiichaksï kánikua kómu pʼikuarheraspti. ¿Nájtsï  pʼikuarherapirini chá engajtsï imeecheepiringa? Imeechaksï uarhiranchaspti amiguni ma engaksï kánikua xéncheenga ka ísïksï pʼikuarherasïreendi enajki nóteru nema úpirinia jarhuataani (Luk. 24:17-21). Peru tátsekua, Jesúsi xarhakuaspti ka jarhuataaspti kurhanguni eskaksï Biblieri profesiecha uandasïreenga eska ima jatsispka para ísï nitamakuarhini. Ístu arhiaspti eskaksï kʼéri ánchikuarhita ma jatsispka para úni (Luk. 24:26, 27, 45-48). Ka 40 jurhiatikua tátsekua Jesúsi karhanchentaspti auandarhu ka imeeri chúxapatiichaksï nóteru kómu pʼikuarheraxaptia, sinoksï kánikua tsípixapti. Imeechaksï kánikua sési pʼikuarheraxapti jimbokaksï mítespka eska Jesúsi tsípiti jarhaspka ka eska jarhuataapiringa paraksï úni imani kʼéri ánchikuarhitani. Engaksï ísï xáni sési pʼikuarherani japka, jarhuataaspti paraksï sánderu kʼéri ambe arhini Tata Diosï Jeobani (arhinta je Lukasʌ 24:52, 53; Uku. 5:42).

16. ¿Nénachi uaa májkueni úni eska Jesúsiiri chúxapatiicha?

¹⁶ ¿Ka ambechi uaa úni jucha parachi májkueni úni eska Jesúsiiri chúxapatiicha? Pauani pauani tsípikua jingoni marhuakuni Tata Diosï Jeobani ka no solu imani mesiicha jimbo enga Miántskua úkuarhijka. Ka parachi úni ísï úni, jatsiskachi para orheta peerani Tata Diosïiri Reinueri ambe. Pori ejemplu, máruksï nóteru xáni ánchikuarhisïndia paraksï úni sánderu aianhpini, tánguarhikuecharhu nirani ka paraksï mándani semana jatsini imeecheri familieri jorhenguarhikua. Ka máruksï no jatsisti imani ambe engaksï máteruecha uandajka eska kánikua uétarhisïnga ka ísïksï ústi jimbokaksï uékasïnga sánderu jarhuajpeni kúnguarhikuarhu o jimbokaksï uékasïnga jimeesïsï nirani aianhpini engaksï no uánikua Testiguecha jaka. Ísïisti eskachi jatsiska para jánguarhintani parachi seguiriini jarhani marhuakuani Tata Diosï Jeobani, peru imajtsïni aiachisïndi eskajtsïni kánikua kóndentaaka engachi orheta peeraska Reinueri ambe (Prov. 10:22; Mat. 6:32, 33).

17. ¿Ambechi jatsiski para úni imani mesiicha jimbo enga Miántskua úkuarhiaka?

¹⁷ Uékaxakachia eska niáraaka martesï 4 de abrili parachi Miántskuani úntani. Peruchi no jatsiska para erokuarhini asta ima jurhiatikua parachi eratsentani na enga irekapka Jesúsi ka imeeri uarhikueri ambe, ka na engajtsïni xarhatachejka ima ka Tata Diosï Jeoba eskajtsïni xénchasïnga. Jánguarhinta je xáni eskajtsï xáni uaaka ini ambe eratsentani imani mesiicha jimbo enga Miántskua úkuarhijka. Pori ejemplu, uaakajtsï arhutani tiempu parajtsï sési jorhenguarhini ambe enga uandajka Programa para ánchikuarhini tánguarhikuarhu Kristianuecheeri Irekua ka Aianhpikua enga uéraka abrilini de 2019 jimbo pájina 4, enga arhinhajka “Ambe enga Jesusi úka últimu semana ixú Echerirhu (parti 1 ka 2)”. Imani ambe arhinta je Bibliarhu engaksïni jarhuataaka sánderu agradesidu jarhani, sánderu xénchpeni, sánderu balori jukani ka parajtsï sánderu tsípikua jingoni marhuani. Eratsenta je ambe engajtsï uaaka úni parajtsï xarhatani eskajtsï mintsita jingoni agradesidu jarhaska. Ka ju je seguru jarhani iiri ambe: Jesúsi kánikua jukaparharaati ambe engachi xáni uaaka parachi imani miántani imani mesiicha jimbo enga Miántskua úkuarhiaka (Jaŋ. 2:19).