DILONGI 5
“Luzolo lu Klisto lu Tukindisanga”
“Luzolo lu Klisto lu tukindisanga . . . muingi batu banzinga babika kuzingila mu kibila ki baveka.”—2 KOLI. 5:14, 15.
NKUNGA 13 Klisto, Ntungulu’itu
MAMBU TUANLONGUKA a
1-2. (a) Mayindu mbi tulenda ba bo tunyindula luzingu ayi kisalu ki Yesu va ntoto? (b) Mbi tunkuiza longuka mu dilongi adidi?
BO TUMFUILU mutu tunzolanga, befu tu kunyindulanga beni! Ayi tunluta banga mu kiunda boti mutu tunzolanga wutovuka beni ava kafua. Ayi tumbanga mu mayangi bo tunyindula mambu ka tulonga, kavanga, katuba muingi ku tukindisa voti ma tuvanga kuseva.
2 Bobuawu mvandi, tumbanga mu kiunda bo tuntanga ayi tunyindula ziphasi ayi lufua lu Yesu. Ayi mu thangu Mbambukulu Moyo, tumbotulanga thangu muingi kuyindula tsundu yi khudulu’andi mu befu. (1 Koli. 11:24, 25) Vayi tumbanga mu mayangi, bo tunyindula mambu Yesu katuba ayi kavanga bo kaba va ntoto. Mvandi tumbanga mu mayangi, bo tunyindula mambu kadi mu kuvanga bubu ayi kala vanga kuntuala. Kuyindula mu mambu amomo ayi mu luzolo ba tumonisa, ma tuvanganga kuvutula matondo dedi bo tunkuiza muena mu dilongi adidi.
KUTONDA KU TUVANGANGA KULANDAKANA KIFUANI KI YESU
3. Bibila mbi tuidi muingi kuvutula matondo mu khudulu?
3 Tumvutulanga matondo bo tunyindula matedi luzingu ayi lufua lu Yesu. Bo Yesu kaba va ntoto, wulonga matedi lusakumunu tuala tambula mu nzila Kintinu ki Nzambi. Tumvutulanga matondo mu khudulu kibila yi tuvananga luaku muingi kuba kikundi kifikama na Yave ayi Yesu. Baboso badi kiminu mu Yesu, badi kivuvu ki kuzinga mvu ka mvu ayi kubue mona batu banzolanga bafua. (Yoa. 5:28, 29; Loma 6:23) Befu tusa vanga ko ni kiuma muingi kutambula lusakumunu alolo ayi tuisi ko bu kufutila Nzambi ayi Yesu mu mambu ba tuvangila. (Loma 5:8, 20, 21) Vayi befu tulenda batonda mu ntima woso. Buidi?
Buidi kuyindula mu kifuani ki Malia Madalena ki kukindisila kuvutulanga matondo? (Tala matangu 4-5)
4. Buidi Malia Madalena kavutudila matondo mu mambu Yesu kamvangila? (Tala foto.)
4 Tala kifuani ki nkietu musi Yuda baba tedilanga Malia Madalena. Nandi waba tovuka beni, mu kibila ki sambuandi di ziphevi zimbi ziaba kuntatisanga. Vayi ḿba nandi wuyindula ti vasi ko ni mutu kalenda kunsadisa. Yindula phila kavutudila matondo bo Yesu kamvukisa kuidi ziphevi zimbi aziozio! Ayi nandi wumonisa ti waba vutulanga matondo mu kuba nlandikini wu Yesu, mu kusadila thangu’andi, mangolo ayi biuma biandi muingi kubuela mioko kisalu ki kusamuna. (Luka 8:1-3) Ayi kheti nandi waba vutula matondo mu mambu Yesu kamvangila, vayi kabasa yindula ko mu lusakumunu lunneni luaba kumvingila kuntuala. Yesu wuvana luzingu luandi kuidi batu boso, “muingi woso wu kunlekila kiminu” kazinga mvu ka mvu. (Yoa. 3:16) Kheti bobo Malia wuvutula matondo kuidi Yesu mu kuba wukuikama mu nandi. Ayi bo Yesu kaba tovuka va dikunzi, Malia wuba va khonzo muingi kuvana mbombolo ayi khindusulu kuidi Yesu ayi batu bankaka. (Yoa. 19:25) Bo Yesu kafua, Malia ayi bakietu buadi, banata mafuta mathalu muingi bamvinda bo ba kunzika. (Malako 16:1, 2) Yave wusakumuna Malia mu kuba wukuikama mu Yesu. Nandi wubaka luaku lu kuba wutheti mu kuyoluka na Yesu—bo kavulubuka, ava bapostolo kubaka luaku alolo.—Yoa. 20:11-18.
5. Buidi tulenda monisina ti tumvutulanga matondo mu mamoso Yave ayi Yesu ba tuvangila?
5 Befu tulenda monisa ti tumvutulanga matondo mu mamoso Yave ayi Yesu ba tuvangila mu kusadila thangu’itu, mangolo mitu ayi biuma bitu muingi kubuela mioku kisalu ki Kintinu. Dedi, tulenda kukivana muingi kutunga ayi kuludika bibuangu tumbuongiminanga Yave.
LUZOLO TUIDI MU YAVE AYI MU YESU LU TUVANGANGA KUZOLA BANKAKA
6. Kibila mbi tulenda tubila ti khudulu widi nkhailu wu kadika mutu mu befu?
6 Bo tunyindula phila Yave ayi Yesu ba tuzodila, ma tuvanganga mvandi kuba zola. (1 Yoa. 4:10, 19) Ayi tunluta kuba zodila, kibila Yesu wufuila mu kadika mutu mu befu. Mvuala Polo wuzaba mawu, mu mambu kasonikina basi Ngalatia bo katuba: “Muana Nzambi . . . wunzola ayi wufuila mu kibila kiami.” (Ngala. 2:20) Mu kibila ki khudulu, Yave kalenda kufikama muingi wuba nkundi’andi. (Yoa. 6:44) Bukiedika ti mawu masinyikuna ko ntim’aku mu kuzaba ti Yave wumona mamboti mu ngiewu ayi wufuta thalu yinangama muingi wuba nkundi’andi? Bukiedika ti mawu masinkindisa ko luzolo luaku mu Yave ayi Yesu? Diawu tulenda kuyikuvusa, mbi luzolo alolo lu tukindisa kuvanga?’
Luzolo tuidi mu Yave ayi Klisto lu tukindisa kusamuna zitsangu zi Kintinu kuidi batu boso (Tala lutangu 7)
7. Dedi bummonisina foto, buidi befu boso tulenda monisina luzolo kuidi Yave ayi Yesu? (2 Kolinto 5:14, 15; 6:1, 2)
7 Luzolo luitu mu Yave ayi mu Yesu, lu tuvanganga kumonisa luzolo kuidi bankaka. (Tanga 2 Kolinto 5:14, 15; 6:1, 2.) Phila yimueka tulenda monisina luzolo, yidi mu kuba kifuza mu kisalu ki kusamuna. Befu tunkolukanga na batu boso tundengananga mu khambu vasa mu kibila ki nkanda nhitu, mvila, mbakulu voti mambu mutu kazebi kuvanga. Mu phila ayoyo, befu tunsalanga mu kithuadi muingi kudukisa lukanu lu Yave luntuba ti “batu boso bavuka ayi babaka nzayilu yikiedika.”—1 Timo. 2:4.
8. Buidi befu tulenda monisina luzolo kuidi zikhomba zitu?
8 Mvandi tummonisanga luzolo luitu mu Yave ayi Klisto, bo tummonisa luzolo kuidi zikhomba zitu. (1 Yoa. 4:21) Befu tuba vuanga nkinza ayi tuba sadisanga bo bamviokila mu ziphasi. Befu tu kuba bombanga bo bamfuilu mutu banzolanga, bo badi mu kubela ayi tu kuba kindisanga bo badi mu kiunda. (2 Koli. 1:3-7; 1 Tesa. 5:11, 14) Befu tuntatamananga ku banata mu minsambu, kibila tuzebi ti “nsambu wu mutu wusonga, widi mangolo.”—Yako. 5:16.
9. Phila mbi yinkaka tulenda monisina luzolo kuidi zikhomba zitu?
9 Mvandi tummonisanga luzolo luitu kuidi zikhomba zitu, bo tuntatamana kuvanga mangolo muingi kutuadisa ndembama. Tumvanganga mangolo ma kulandakananga kifuani ki Yave ki kulemvukila. Buabu, boti Yave wubika muingi Muan’andi kafuila mu kibila ki masumu mitu, bukiedika ti befu mvitu tulendi lemvukila ko zikhomba zitu, ba tuvangilanga zinzimbala? Befu tuisintomba ko kuba dedi mvika wuba mavanga mambi bantubila mu kinongo Yesu kata. Kheti mfumu’andi wunlemvukila pholo yinneni kaba, vayi nandi kasa lemvukila ko mvika yandi waba kundeva zimbongo ziluelu. (Matai 18:23-35) Boti widi diambu muingi kudedikisa na khomba mu kimvuka, wulenda tuama ntuala muingi kutuadisa ndembama ava Mbambukulu Moyo? (Matai 5:23, 24) Kuvanga mawu, malenda monisa luzolo lungolu widi mu Yave ayi Yesu.
10-11. Buidi bakulutu ba kimvuka balenda monisina ti banzolanga Yave ayi Yesu? (1 Petelo 5:1, 2)
10 Buidi bakulutu ba kimvuka bammonisinanga luzolo mu Yave ayi Yesu? Phila yimueka yinkinza yidi, mu kukieba zitsatu zi mamemi ma Yesu. (Tanga 1 Petelo 5:1, 2.) Mawu Yesu kamonisa kuidi mvuala Petelo. Ava kumanga Yesu mu zikhumbu zitatu, Petelo waba tomba kumonisa luzolo kaba mu Yesu. Bo Yesu kavulubuka, nandi wuyuvula Petelo: “Simoni muana Yoane, ngie wu kunzolanga?” Tulenda ba lufiatu ti boti Petelo wuba luaku, khanu wuvanga mamoso kanunga muingi kumonisa luzolo kaba mu Mfumu’andi. Yesu wukamba Petelo: “Dikilanga bana bama ba mamemi.” (Yoa. 21:15-17) Ayi mu luzingu luandi loso, mu luzolo, Petelo wukeba mamemi ma Mfumu’andi muingi kumonisa luzolo kaba mu Yesu.
11 Bakulutu ba kimvuka, buidi lulenda monisina mu thangu Mbambukulu Moyo ti mambu Yesu kakamba Petelo madi nkinza kuidi benu? Ngie wulenda monisa luzolo widi mu Yave ayi Yesu, mu kutatamana kukieba ayi kuvanga mangolo muingi kusadisa bo bavonga mu kiphevi muingi kubue sadila Yave. (Yehe. 34:11, 12) Mvandi wulenda monisa ti wumvuanga nkinza minlonguki mi Kibibila ayi batu bankaka banlandakana Mbambukulu Moyo mu kuba vana ndizulu mboti ayi kuba kivuvu ti bawu mvawu, bala ba minlandikini mi Yesu.
LUZOLO MU KLISTO LU TUVANGA KUBA KIBAKALA
12. Kibila mbi kuyindula mambu Yesu katuba va builu ava kafua, ma tuvanina kibakala? (Yoane 16:32, 33)
12 Va builu ava Yesu kafua, nandi wukamba minlandikini miandi: “Luela yamusu va nza, vayi luba kibakala bila minu yima nunga nza.” (Tanga Yoane 16:32, 33.) Mbi bisadisaYesu kununga zimbeni ziandi mu kibakala ayi kutatamana wukuikama nati ku lufua? Nandi wufiatila Yave. Mu kuzaba ti minlandikini miandi bala viokila mu zio ziawu zithotolo, nandi wudinda Yave muingi kaba kieba. (Yoa. 17:11) Kibila mbi mambu amomo ma tukindisila? Kibila Yave lutidi mangolo kena zimbeni zitu. (1 Yoa. 4:4) Yave wummonanga mamoso ayi befu kumfiatila, nandi wala tusadisa tununga boma ayi kumonisa kibakala.
13. Buidi Yosefi musi Alimateya kamonisina kibakala?
13 Tala kifuani ki Yosefi musi Alimateya. Nandi baba kunkinzikanga beni kuidi basi Yuda. Mvandi wuba mfundisi ayi waba sadilanga ku nzo yi lufundusu yilutidi. Bo Yesu kaba va ntoto, nandi kasa monisa ko kibakala muingi kuba nlandikini’andi. Yoane wutuba ti “nandi wuba nlandikini wu Yesu mu kinsueki, mu kibila ki boma bu basi Yuda.” (Yoa. 19:38) Kheti Yosefi waba vuanga nkinza tsangu yi Kintinu, vayi waba suamanga batu baba kiminu mu Yesu. Diawu tuisi ko divuda ti nandi wuba boma bu kubika kimfumu kiandi. Boso kua bubela, Kibibila ki tukamba ti bo Yesu kafua, nandi “wumonisa kibakala bo kayenda kuidi Pilatu ayi wudinda mvumbi yi Yesu.” (Malako 15:42, 43) Mu thangu ayoyi, lusalusu Yosefi kaba vana kuidi Yesu, lummonisa ti kabasa bue suama ko, ti wuba nlandiki’andi.
14. Mbi wulenda vanga muingi wununga boma bu batu?
14 Bukiedika ti wumana ba boma bu batu dedi bo Yosefi kabela? Dedi ku kikola voti mu kisalu, bukiedika ti wummonanga zitsoni kutuba ti widi Mbangi yi Yave? Ngie widi mu kue kananga to kuba nsamuni voti kubotama mu kukuazuka mu mambu batu bankaka balenda yindula mu ngiewu? Ka wubika mambu amomo ma kutula nkaku, mu mambu zebi ti mawu fueti vanga. Sambila kuidi Yave ayi ndinda muingi ka kuvana kibakala muingi wuvanga luzolo luandi. Bo wummona phila Yave kantambudila minsambu miaku, buawu wala luta bela mangolo ayi kibakala.—Yesa. 41:10, 13.
MAYANGI MA TUSADISA TUTATAMANA KUSADILA YAVE
15. Bo Yesu kamonikina minlandikini miandi, mbi mayangi ma basadisa kuvanga? (Luka 24:52, 53)
15 Bo Yesu kafua, minlandikini miandi baba beni mu kiunda. Wukiyindula mu mambu amomo. Bawu basa ba ko to mu kiunda mu kibila ki lufua lu nkundi’awu, vayi baba kuyimuena buka ti basiedi ko kivuvu. (Luka 24:17-21) Vayi bo Yesu kavulubuka, nandi wubotula thangu muingi kuba sadisa kuvisa tsundu yi zimbikudulu zi Kibibila zitedi nandi. Mvandi wuba vana kisalu ki nkinza ki kuvanga. (Luka 24:26, 27, 45-48) Vayi bo vavioka 40 di bilumbu bo Yesu kavutuka ku diyilu, kiunda ki bapostolo kiyiza ba mu mayangi. Mu mayangi, bazaba ti Mfuwu’awu wuba wumoyo ayi wuba wukubama muingi kudukisa kisalu kaba vana. Mayangi ma basadisa kuzitisa Yave mu khambu vonga.—Tanga Luka 24:52, 53; Mava. 5:42.
16. Buidi tulenda landikinina kifuani ki minlandikini mi Yesu?
16 Buidi tulenda landikinina kifuani ki minlandikini mi Yesu? Befu tulenda baka mayangi ma kubuongimina Yave, kubika kuandi to mu thangu Mbambukulu Moyo vayi mu zithangu zioso. Mawu mansundula ti, tufueti tula Kintinu ki Nzambi va theti mu luzingu luitu. Dedi bawombo bavanga thuadusulu yimboti yi kisalu kiawu, muingi kubuela kifuza mu kisalu ki kusamuna, kulandakananga zikhutukunu ayi kuvanganga mbuongimini va dikanda. Mvandi bawombo babika kunata luzingu lu kikhafi muingi baluta kukivana mu bisalu bimvangamanga mu kimvuka ayi bankaka bayenda kue sadila kuidi beni tsatu yi minsamuni. Befu kutatamana kusadila Yave, nandi wu tukanikisa ti wala tusakumuna befu kutula Kintinu kiandi va theti mu luzingu luitu.—Zinga. 10:22; Matai 6:32, 33.
Mu Mbambukulu Moyo botula thangu muingi wuyindula mambu Yave ayi Yesu ba kuvangila (Tala lutangu 17)
17. Mbi ngie widi wukubama muingi kuvanga mu Mbambukulu Moyo? (Tala foto.)
17 Tuidi beni phuila muingi kulandakana Mbambukulu Moyo yala vangama mu Kimuadi kilumbu ki 4 ngonda Yinna. Vayi ka wubika kutemina kilumbu ki Mbambukulu Moyo muingi kuyindula matedi luzingu ayi lufua lu Yesu ayi matedi luzolo nandi ayi Yave ba tumonisina. Ayi botula thangu muingi kuyindula mu mambu amomo, ava Mbambukulu Moyo. Diawu botula tangu muingi wutanga ayi wuyindula mambu madi mu Apêndice B12 mu Tradução do Novo Mundo madi ntu diambu “A Última Semana de Jesus na Terra.” Ayi bo wumvanga mawu, mona matangu ma Kibibila ma tukindisa kuvutula matondo, kuba luzolo, kibakala ayi mayangi. Bosi monisa ziphila wulenda monisina ti wumvutulanga matondo mu ntima woso. Ba lufiatu ti Yesu wumvuanga beni nkinza mambu moso wumvanganga muingi kuntebukila moyo mu Mambukulu Moyo.—Nzai. 2:19.
NKUNGA 17 ‘Yitidi’
a Mu thangu Mbambukulu Moyo, ba tukindisanga tuyindula luzingu, lufua lu Yesu ayi luzolo nandi ayi Tat’andi ba tumonisina. Kuvanga mawu ma tuvanga ku bavutudila matondo. Mu dilongi adidi, tuentubila ziphila tulenda vutudila matondo mu khudulu ayi kumonisa luzolo Yave ayi Yesu ba tumonisina. Mvandi tunkuiza mona buidi tulenda monisina luzolo kuidi zikhomba, kuba kindisa ayi kuba mu mayangi mu kisalu ki kusamuna.
