1. Pingo itye ki pwoc pi Baibul?

 WATYE ki pwoc madit adada bot Lubangawa Jehovah pi Baibul! I Baibul, en ominiwa tam me ryeko ma twero konyowa me ngeyo gin ma myero watim ka watye ki peko. En bene omiyo botwa gen mamwonya pi anyim. Ma dong pire tek loyo, Jehovah otiyo ki Baibul me nyutiwa kite mapatpat. Ka wawoto ki lwodo kite mamwonya magi, man gudo cwinywa dok weko wabedo ki miti me nyiko cok ki Lubangawa ki me doko lureme.—Jab. 25:14.

2. Yo mapatpat ango ma Jehovah otiyo kwede me nyutte bot dano?

² Jehovah mito ni dano gunge en. I kare mukato angec, en omiyo jone mogo guleko lek dok guneno ginanyuta, dok ocwalo lumalaika bot jo mukene. (Wel 12:6; Tic 10:3, 4) Onongo pe wabibedo ki kare me kwano lok i kom lek, ginanyuta nyo kwena pa lumalaika magi ka onongo pe kicoyo piny. Meno aye tyen lok mumiyo Jehovah otiyo ki co me ‘coyo i buk’ jami ducu ma en onongo mito ni wange. (Jer. 30:2) Kit macalo “gin ducu ma en [Lubanga] tiyo tye atir,” watwero bedo ki gen ni yo man ma en otiyo kwede me lok kwedwa aye ber loyo dok bikonyowa.—Jab. 18:30.

3. Gin ango ma Jehovah otimo me neno ni kwena ma i Baibul kigwoko maber? (Icaya 40:8)

³ Kwan Icaya 40:8. Lok pa Lubanga dong omiyo tira me ryeko bot co ki mon ma lugen pi mwaki alip mapol. Meno otwere nining? Man obedo lapeny maber adada pien Baibul kikwongo coyone i kom bukke adola ma kiyubo ki pyen nyo togo, ma oballe woko i nge kare mo. Pi meno, pe watye ki bukke adola magi ma kikwongo coyogi-ni. Ento Jehovah oweko dano gubedo ka kobo coc maleng man. Kadi bed lukob coc magi onongo gitye ki roc, ento onongo  gikobo coc ki diro adada. Me labolle, lacoc mo ocoyo kit man i kom Ginacoya me leb Ibru: “Watye ki gen matek ni pe tye buk macon mukene ma kikobo cocce kakare ma loyo Baibul.” Dong kadi bed Baibul kicoyo i kare macon i kom jami ma balle, dok jo ma gukobo cocce onongo gitye ki roc, ento pud watwero bedo ki gen ni lok ma wakwano i Baibulwa i kare-ni nyuto tam pa Ngat ma oweko kicoyo, ma en aye Jehovah.

4. Ngo ma wabinyamo i pwony man?

⁴ Jehovah aye Wang It me “gin mo ducu maber, ki mot ducu mabeco twatwal.” (Yak. 1:17) Baibul tye i kin mic mabeco loyo ma Jehovah omiyo botwa. Ka ngat mo ominiwa mic, meno nyutiwa ni lami mic-ci ngeyowa kacel ki jami ma wamito. Tye marom aroma bene ki Ngat ma ominiwa Baibul. Ka wangiyo mic man maber, wapwonyo jami mapol i kom Jehovah. Wapwonyo ni en ngeyowa maber dok ngeyo bene gin ma wamito. I pwony man, wabinyamo gin ma watwero pwonyo ki i Baibul i kom kit pa Jehovah adek: ryeko, ngolo kop atir, ki mar. Mukwongo, kong wanyamu kit ma Baibul nyuto kwede ryeko pa Lubanga.

5. Tit kong yo acel ma Baibul nyuto kwede ryeko pa Lubanga.

⁵ Jehovah ngeyo ni wamito tirane me ryeko. Dok micce, ma obedo Baibul, opong ki ryeko ma mege. Tira ma nonge i Baibul kelo adwogi maber bot dano. Baibul loko kwo pa dano. I kare ma Moses ocoyo bukke mukwongo me Baibul, en owaco bot jo pa Lubanga, ma gin aye Luicrael, ni: “Lok magi pe lok ma tere pe; gin aye kwowu kikome.” (Nwo. 32:47) Luicrael ma gulubo lok me Ginacoya onongo gitwero bedo ki kwo maber dok me yomcwiny. (Jab. 1:2, 3) Kadi bed Lok pa Lubanga kicoyo i kare macon, ento pud tye ki teko me loko kwo pa dano. Me labolle, i jw.org, i pwony ma lubbe aluba ma wiye tye ni “Baibul Loko Kwo pa Dano,” ibinongo labol pa dano mapol ma guloko kwogi dok man nyuto ni Baibul ‘tye ka tic i iwa wan jo muye Yecu’ i kare-ni.—1 Tec. 2:13.

6. Pingo watwero waco ni Baibul pe tye calo buk mo mukene?

⁶ Pe tye buk mo mukene ma kiromo porone ki Lok pa Lubanga. Pingo wawaco kit meno? Pien Ngat ma oweko kicoyo buk meno, ma en aye Lubanga Jehovah, obedo won twer ducu, bedo nakanaka, dok ryek ma lapore pe. Bukke mukene mapol pud kimedde ki kwanogi kadi bed ngat ma ocoyo dong oto woko. Ento tam ma nonge i bukke magi konygi doko pe i nge kare mo. Ki tungcel, cik ma igi lac ma i Baibul tiyo kare ducu; gukonyo yalwak ma gukwo i kare mapatpat ducu. Ka wawoto ki kwano buk maleng meno dok walwodo jami ma wakwano, Laco buk meno tiyo ki cwiny mere maleng me konyowa neno kit ma watwero lubo kwede tira me Baibul i kwowa. (Jab. 119:27; Mal. 3:16; Ibru 4:12) Ada, Ngat ma ocoyo Baibul tye makwo dok en tye ki miti me konyi. Meno pud dong myero otug cwinywa me kwano Baibul nino ducu ya!

7. I yo ma nining ma Baibul oribo kwede jo pa Lubanga i kare mukato angec?

⁷ Tye dok gin mukene ma nyuto ni Baibul tye ki ryeko pa Lubanga. Baibul konyo jo pa Lubanga me bedo ma gunote. I kare ma Luicrael gudonyo i Lobo ma Kiciko Pire, gin gubedo i kabedo mapatpat  ma i lobo meno. Jo mogo i kingi gudoko lumak rec, mukene gubedo ka gwoko dyangi, romi kacel ki dyegi, dok mukene gubedo ka pwuru bel, nyig yadi ki pot dek mapatpat. Onongo twero bedo yot adada pi Luicrael ma gibedo i kabedo acel me rwenyo miti i kom luwotgi ma gibedo i but lobogi mukene. Ento Jehovah oketo yub pi Luicrael ducu me gure kacel i kare mapatpat me winyo ka kikwano Lokke dok kitito tere. (Nwo. 31:10-13; Nek. 8:2, 8, 18) Go kong kit ma Laicrael mo ma lagen onongo winyo kwede ka oo i Jerucalem ci oneno luworo luwote milion mapol ma gia ki i but lobo meno ducu! I yo ma kit meno, Jehovah okonyogi me bedo ma gunote. Lacen, i kacokke pa Lukricitayo onongo tye iye co ki mon ma giloko leb mapatpat, gia ki i kwo mapatpat dok jo mogo i kingi onongo lulonyo kun mukene lucan. Ento pien gin ducu onongo gimaro Ginacoya, onongo gitye ma gunote i worogi pi Lubanga me ada. Jo ma gudoko Lukricitayo onongo gitwero niang Lok pa Lubanga keken ki kony pa luwotgi dok ki cokke kacel kwedgi.—Tic 2:42; 8:30, 31.

8. I yo ma nining ma Baibul ribo kwede jo pa Lubanga i kare-ni?

⁸ Lubangawa maryek adada-ni tye ka medde ki pwonyo kacel ki ribo jone kun  tiyo ki Baibul. Baibul tye ki lok ada ducu madok i kom Jehovah ma mitte ni wange. Kare ducu wagure kacel i cokkewa, gure me adwol, ki gure madito me winyo ka kikwano Ginacoya, kitito tere dok kinyamo matut. Pi meno, Baibul obedo gin tic ma pire tek adada ma Jehovah tiyo kwede me konyo jone wek “guti bote ki cwiny acel.”—Jep. 3:9.

9. Kit mene ma pire tek adada ma mitte ni wabed kwede wek waniang kwena me Baibul maber? (Luka 10:21)

⁹ Nen kong gin mukene ma nyuto ryeko pa Jehovah. En oweko kicoyo but Ginacoya mukene i yo ma jo mamwol keken aye gitwero niang iye. (Kwan Luka 10:21.) Dano ma i but lobo-ni ducu gikwano Baibul. Lacoc mo acel owaco ni jo mapol gikwano Baibul ma loyo buk mo keken, dok gikwano ki diro adada loyo buk mo keken. Ento jo ma gimwol keken aye giniang dok giketo i tic gin ma Baibul pwonyo.—2 Kor. 3:15, 16.

10. I yo mukene ango ma Baibul nyuto kwede ryeko pa Jehovah?

¹⁰ Waneno ryeko pa Jehovah ma nonge i Baibul i yo mukene bene. Jehovah tiyo ki Ginacoya me pwonyo jone ducu macalo gurup, ento bene tiyo kwede me pwonyo ki kweyo cwinywa ki acel acel. Ka watye ka kwano Lok pa Jehovah, watwero neno ni Jehovah tye ki miti i kom wan ducu ki acel acel. (Ic. 30:21) Ka itye ka kato ki i peko mo, tyen adi ma iyabo Ginacoya ci ikwano tyeng mo ma nen calo kicoyo piri? Ento, Baibul gudo cwiny dano milion mapol. Dong twere nining ni Baibul tye ki lok ma in imito kikome? Meno twere keken pien Ngat ma oweko kicoyo Baibul aye obedo Ngat maryek loyo i polo ki lobo.—2 Tem. 3:16, 17.

11. Lubanga onyuto nining ni en pe poko kin dano i kare ma kitye ka coyo Baibul?

¹¹ Ngolo kop atir obedo kit pa Jehovah mukene. (Nwo. 32:4) Ngat ma ngolo kop atir pol kare bene pe poko kin dano, dok Jehovah pe poko kin dano. (Tic 10:34, 35; Rom. 2:11) Watwero neno ni en pe poko kin dano ki i kit ma kicoyo kwede Baibul i leb ma jo mapol onongo giloko i kare macon. Bukke 39 mukwongo me Baibul kicoyogi polle i leb Ibru, ma pol pa jo pa Lubanga onongo giniang i kare meno. Ento, i cencwari me acel, pol pa dano onongo dong giloko leb Grik, pi meno, bukke 27 me agikki me Baibul kicoyogi i leb man. Jehovah pe oketo gingi ni omyero kico Lokke i leb acel keken. I kare-ni, cokcok dano bilion aboro ma gikwo i lobo-ni giloko leb mapol. I yo ma nining ma jo mapol kit meno gitwero pwonyo kwede lok i kom Jehovah?

12. Tit kong yo acel ma Daniel 12:4 tye ka cobbe kwede i kare man me agikki-ni.

¹² Jehovah ocikke kun tiyo ki lanebi Daniel me tito ni i kare me agikki, “ngec [me ada ma nonge i Baibul] bene bimedde.” Jo mapol onongo gibiniang lok me Baibul. (Kwan Daniel 12:4.) Yo acel ma ngec meno omedde kwede aye ki i tic me gonyo leb, goyo, kacel ki poko Baibul ki bukke ma jenge i kom Baibul. Baibul aye obedo buk ma pud dong kigonyo dok kipoko ma loyo buk mo keken i wi lobo-ni. Baibul ma kampuni mukene gigoyo welgi tek adada. Jo pa Jehovah dong gutyeko gonyo Baibul olu nyo bute mukene, i leb makato 240, dok ngat mo keken twero nongo kopi me Baibulwa labongo cul mo. Macalo adwogine, dano me rok ducu  gitye ka jolo “kwena maber me ker pa Lubanga” ma peya agikki me lobo man obino. (Mat. 24:14) Lubangawa ma ngolo kop atir-ri mito miyo bot dano mapol kit ma twere kwede kare me ngeye ki i kwano Lokke. En timo meno pien marowa matek adada.

13. Pingo watwero waco ni Baibul nyuto mar pa Jehovah? (Jon 21:25)

¹³ Baibul konyowa me niang ni kit pa Jehovah ma pire tek loyo ducu obedo mar. (1 Jon 4:8) Tam kong i kom jami ma Jehovah oweko kicoyo i Baibul ki jami ma pe kicoyo. En oweko kicoyo gin ma wamito kikome wek wabed ki wat macok kwede, wabed ma cwinywa yom i kare-ni, dok wabed ki kare me nongo kwo ma pe tum. Ento pien Jehovah marowa, en pe ominiwa ngec madwong mukato kare woko.—Kwan Jon 21:25.

14. I yo mukene ango ma gin ma kicoyo i Baibul nyuto ni Lubanga marowa?

¹⁴ Jehovah bene onyutiwa mar kun loko kwedwa i yo ma miniwa woro. I Baibul, en pe ocomo cik mapol ata, kun tittiwa gin ma omyero watim ki ma myero pe watim i cawa ducu. Me ka meno, en tiyo ki jami mutimme i kwo pa dano, lok pa lunebi, kacel ki tira me konyowa wek wamok tam mabeco. I yo meno, Lok pa Lubanga tugo cwinywa me marre ki me bedo luwiny bote ki i cwinywa.

15. (a) I yo ma nining ma Jehovah onyuto miti i kom jo ma gikwano Lokke? (b) I cal ma kiketo-ni, latin anyaka-ni, omego-ni, ki laminwa muteggi-ni gitye ka lwodo lok i kom jo mene ma kicoyo lok i komgi i Baibul? (Acak. 39:1, 10-12; 2 Luker 5:1-3; Luka 2:25-38)

¹⁵ Baibul nyuto ni Jehovah paro piwa  matek. I yo ma nining? Baibul opong ki lok ma nyuto kit ma dano winyo kwede kikome. Waromo niang kit ma jo ma kiloko i komgi i Baibul onongo giwinyo kwede pien gubedo dano ma ‘kitgi cal kwedwa.’ (Yak. 5:17) Ma dong pire tek loyo, ka waneno kit ma en onongo tero kwede dano ma kitgi cal ki megwa, watwero niang maber adada ni ‘Jehovah won kica dok timo ber bot dano.’—Yak. 5:11.

16. Gin ango ma wapwonyo i kom Jehovah ka wakwano ki i Baibul lok i kom jo ma gutimo bal? (Icaya 55:7)

¹⁶ Baibul tittiwa mar pa Jehovah i yo mukene bene. Ginacoya cuko cwinywa ni Lubangawa pe bikwerowa woko ka watimo bal. Luicrael gubedo ka timo bal i kom Jehovah teretere; ento, i kare ma gungut ki cwinygi ducu, Lubanga otimigi kica. (Kwan Icaya 55:7.) Lukricitayo me cencwari me acel bene onongo gingeyo ni Lubanga marogi matek adada. Cwiny maleng oweko lakwena Paulo ocuko cwiny luye luwote me ‘timo kica ki dok kweyo cwiny’ laco mo ma onongo otimo bal madit ento dong otyeko ngut woko. (2 Kor. 2:6, 7; 1 Kor. 5:1-5) Pud dong tye me yomcwiny ya ni Jehovah pe okwero jo ma wore pien ni gutimo bal! Me ka meno, en okonyogi i yo me mar, otirogi, dok ojologi me bedo lureme odoco. En ocikke me timo gin acel-li pi lubalo ducu ma gingut i kom balgi i kare-ni.—Yak. 4:8-10.

17. Pingo Baibul obedo mot ma pire tek?

¹⁷ Jehovah omiyo botwa mot mamwonya adada. Pingo Lokke obedo gin ma pire tek? Kit ma wapwonyo kwede, Baibul nyuto ni Lubanga ryek, ngolo kop atir, dok marowa matek. Buk man nyuto ka maleng ni Jehovah mito ni wange en. En mito ni wadok lureme.

18. I yo ma nining ma watwero nyuto ni watye ki pwoc pi “mot” pa Jehovah me Baibul?

¹⁸ Pe wamito ni wiwa owil woko ni Lok pa Lubanga obedo ‘mot maber.’ (Yak. 1:17) Dong wamedde wunu ki nyuto pwocwa pire. Watwero timo meno ki kwano Lokke kacel ki lwodone. Ka watimo meno, watwero bedo ki gen ni Ngat ma oweko kicoyo Baibul bigoyo laane i kom tutewa dok wabibedo “ki ngec i kom Lubanga.”—Car. 2:5.