1. ¿Kunatsa jumajj Bibliat yuspärta?

 ¡JIWASAR Biblia churatapat walpun Jehová Diosar yuspärtanjja! Jehová Diosajj Biblia toqew yatiñan ewjjtʼanak churistu, ukanakaw jan waltʼäwinakan uñjasktan ukhajj kunsa lursna uk yatiñatak yanaptʼistu. Jutïritakis mä suma suytʼäwi churarakistu. Jukʼampis Jehová Diosajj Biblia toqew jupajj kunjam chuymanisa uk qhanañchistu. Jupajj kunjam chuymanisa uk lupʼiñajja, chuymarupuniw purtʼistu. Ukhamatwa jupar jukʼamp jakʼachastanjja, amigoparakïtanjja (Sal. 25:14).

2. ¿Kunjamanakatsa Jehová Diosajj jupjjat yatiyistu?

² Jehová Diosajja, jaqenakajj jupar uñtʼapjjaspa ukwa muni. Nayra tiemponjja, samkanaka, visionanaka, angelanak toqew jupjjat jaqenakar yatiyäna (Núm. 12:6; Hech. 10:3, 4). Ukampis janitï taqe ukanakajj qellqaskaspäna ukhajja, janiw ukanakat yatjjatañ puedkasänti. Ukatwa Jehová Diosajj mä qhawqha chachanakar “mä libror” qellqayäna, ukhamat kuntï jupajj yatiñas munki uk yatiñasataki (Jer. 30:2). Niyakejjay ‘cheqpach Diosan thakipajj perfectöchejja’, kuntï Diosajj Bibliar qellqaykäna ukar confiysnawa, wali valoranirakiwa (Sal. 18:30).

3. ¿Kunsa Jehová Diosajj Biblian jichhürunakkam utjaskakiñapatak luri? (Isaías 40:8).

³ (Isaías 40:8 liytʼäta). Diosan Arupajja, walja waranqa maranakaw Diosan servirinakaparojj yanaptʼawayi. ¿Kunjamatsa jichhürunakkam utjaskaki? Biblian qellqasitapat walja maranakaw pasawayjje, tukusir materialanakar qellqatarakïnwa, janirakiw Biblian mä original qellqatapas utj-jjeti. Ukampis Jehová Diosaw sagrado qellqatanakat copianak lurasiñapatakejj  yanaptʼawayi. Bibliat copianak luririnakajj pantjasirïpkchïnsa, wali amuyumpiw copianak lurapjjerïna. Hebreo Arut Qellqatanakat parlkasinjja, Biblia toqet yatjjatat mä jaqejj akham siwa: “Nayra qellqatanakatjja, Hebreo Arut Qellqatanakakiw jan kun yaptʼasa, jan kun apaqas cheqapar copiasiwayi” sasa. Pantjasir chachanakaw walja maranak nayrajj uka copianak lurapjjäna, tukusir materialanakaruw qellqapjjarakïna. Ukampis Bibliat liytʼktan ukhajja, Biblia qellqayiri Jehová Diosan amuyunakapwa liytʼasktanjja.

4. ¿Kunanakatsa aka yatichäwin yatjjataskañäni?

⁴ “Taqe suma regalonakasa perfectöki taqe uka regalonakasa [Jehová Diosatwa] juti”, Diosajj churkistu taqe uka regalonakatjja, Bibliaw jukʼamp suma regalojja (Sant. 1:17). Mä regalojja, regalo churirejj jiwasar wali sum uñtʼatapa, kunanaktï necesitktan ukanak sum yatitapwa uñachtʼayistu. Bibliampejj ukhamarakiwa. Bibliat yatjjatktan ukhajja, Jehová Diosat waljanakwa yateqtanjja. Jupajj jiwasar wali sum uñtʼatapa, kunanaktï necesitktan ukanak yatitapwa amuytanjja. Jehová Diosajj kunjam chuymanisa ukanak wali sumwa Bibliajj qhanañchistu. Aka yatichäwinjja, yatiñanïtapata, cheqapar uñjirïtapata, munasirïtapatwa yatjjataskañäni. Nayraqatjja, Diosan yatiñapat Bibliajj kamsisa uk yatjjatapjjañäni.

5. ¿Kunjamsa Bibliajj Diosan yatiñanïtap uñachtʼayi?

⁵ Jehová Diosajja, qhawqsa yatiñan ewjjtʼanakap necesittan uk yatiwa. Ukatwa yatiñapamp phoqtʼat mä Biblia churistu. Biblian ewjjtʼanakapajj wali sumwa jaqenakar yanaptʼi. Cheqansa, Bibliajj jaqenakan jakäwinakapwa cambiaspa. Moisesajj Biblian nayrïr libronakap qellqkäna ukhajja, akham sasaw israelitanakar säna: “Uka arunakajj janiw jumanakatakejj inamay arunakäkiti, jan ukasti uka arunakar istʼapjjatamatwa jakapjjäta” sasa (Deut. 32:47). Uka arunakar istʼirinakajja, kusisitäpjjañapänwa, taqe kunas sumaruw jupanakatakejj sarañaparakïna (Sal. 1:2, 3). Bibliajj walja maranak nayras qellqaskchïnjja, jaqenakan jakäwinakap cambiañatakejj chʼamanïskakiwa. Internetan jw.org cheqanjja, “Bibliaw jupanakar yanaptʼawayi” sat yatichäwinakaw utji, ukanjja walja jilat kullakanakan sarnaqäwinakapatwa parli, jupanakajj Biblian ewjjtʼanakapar istʼapjjatapatwa cambiawayapjje, wali sumaw jakasjjapjjaraki (1 Tes. 2:13).

6. ¿Kunatsa Bibliar uñtat yaqha librojj janiw utjkaspati sasin sistanjja?

⁶ Bibliar uñtat yaqha librojj janiw utjkiti. ¿Kunatsa ukham sistanjja? Biblia qellqayir Jehová Diosajj taqe chʼamaniwa, wiñay Diosarakiwa, yatiñapas jan kikpanirakiwa. Jichha tiempon utjir walja libronakan qellqerinakapajj jiwatäjjapjjewa, uka libronakan ewjjtʼanakapas janirakiw yanaptʼasjjeti. Ukampis Biblian yatiñani ewjjtʼanakapajj wali valoranïskakiwa, kunayman tiempon jakasir jaqenakaruw yanaptʼawayaraki. Diosan Arupat liytʼktan, ewjjtʼanakapat lupʼiraktan ukhajja, qellqayki uka wali chʼamani espíritu santopaw liytʼatarjam sarnaqañatak yanaptʼistu (Sal. 119:27; Mal. 3:16; Heb. 4:12). Cheqas Biblia qellqayirejj taqe chuymaw yanaptʼañ muntamjja. ¿Janit uk yatiñajj Biblia sapür liyiñ munañatak yanaptʼktamjja?

7. ¿Kunjamsa Bibliajj nayra tiempon Diosan markapar mayachtʼäna?

⁷ Bibliajja Diosan markaparojj mayachtʼat jakasipjjañapatakiw yanaptʼi, ukaw Bibliajj Diosan yatiñanïtap uñachtʼayarakistu. Israelitanakajj Suma Oraqer mantapkäna ukhajja, walja cheqanakanwa jakañ qalltapjjäna. Jupanakat yaqhepajj chawlla katurëjjapjjänwa, yaqhepajj uywa awatirinakäjjapjjänwa, yaqhepasti  yapuchirëjjapjjarakïnwa. Ukatwa mä cheqan jakir israelitanakajj yaqha cheqan jakir israelitanakat facilak armasjjapjjaspäna. Ukampis Jehová Diosaw sapa kuti tantachasipjjañapatak mayïna, ukhamat Arunakap istʼapjjañapataki ukhamarak jukʼamp yatjjatapjjañapataki (Deut. 31:10-13; Neh. 8:2, 8, 18). Diosat jan jitheqtir mä israelitajj Jerusalenar purisasa, walja cheqanakat Jehová Diosar adorañatak jutir millón millón israelitanakamp jikisisasa, ¿kunjamsa jikjjataspachäna uk amuyasmati? Jehová Diosajj ukham lurasaw jupanakan mayachtʼatäpjjañapatak yanaptʼäna. Nayrïr patak maranakansti, cristiano congregación taypin kunayman cheqat jutiri, pisin jakasiri, qollqeni, kunayman yaqha arunak parliri chachanak warminakaw utjäna. Ukampis niyakejjay jupanakajj Diosan Arupar munasipjjchïnjja, mayachtʼataw Jehová Diosar servipjjäna. Cristiano congregacionar mantirinakajj Diosan Arup amuyapjjänwa, kuna laykutejj mayni cristianonakampiw tantachasipjjäna, jilat kullakanakaw jupanakarojj Bibliat qhanañchapjjarakïrïna (Hech. 2:42; 8:30, 31).

8. ¿Kunjamsa Jehová Diosajj jichhürunakan Biblia toqejj markapar mayachthapi?

⁸ Jichhürunakanjja Jehová Diosajj Biblia toqew markaparojj yatichaskaki, mayachtʼatäpjjañapatakis yanaptʼaskaraki. Kunanaktï Jehová Diosat yatiñasäki taqe uka cheqa yatichäwinakajj Bibliankiwa. Cristianonakajja, tantachäwinakarus asambleanakarus jan faltasisaw sartanjja, ukhamat Bibliat liytʼaski, qhanañchaski, yatjjataski ukanak istʼañataki. Ukhamajj  servirinakapan ‘mayachtʼat servipjjañapatakejj’ Biblia toqew Jehová Diosajj yanaptʼi (Sof. 3:9).

9. ¿Kuntï Bibliajj siski uk entiendiñatakejj kunjam chuymanïñas wakisi? (Lucas 10:21).

⁹ Kunjamsa Bibliajj Diosan yatiñap uñachtʼayarakistu uk jichhajj uñjañäni. Biblian walja partenakapjja, humilde chuyman jaqenakan entiendipjjañapatakikiw qellqayäna (Lucas 10:21 liytʼäta). Cheqas oraqpachankir taqe jaqenakaw Biblia liyipjje. Biblia toqet yatjjatat mä chachajj akham sänwa: “Bibliajj janiw mayni libronakat sipans jukʼamp liyit librokïkiti, jan ukasti yaqha libronakat sipans jukʼamp yatjjatat librorakiwa” sasa. Ukampis humilde chuyman jaqenakakiw kuntï Bibliajj siski uk entiendipjjaspa, ukarjamas sarnaqapjjarakispa (2 Cor. 3:15, 16).

10. ¿Kunjamatsa Jehová Diosan yatiñapajj Biblian uñjasiraki?

¹⁰ Kunjamsa Jehová Diosan yatiñapajj Biblian uñachtʼayasiraki uk jichhajj uñjañäni. Jehová Diosajj janiw mä gruporjam uñjasakejj Biblia toqejj yatichkistuti, jan ukasti sapa mayniruw yatichistu, chuymacharakistu. Diosan Arup liyisajj sapa mayni jiwasanakat llakisitapwa amuytanjja (Is. 30:21). Mä jan walin uñjasktan ukhajj ¿jiwasatakjam mä texto liytʼirïtanti? Jïsa, walja kutiw liytʼpachätanjja. Niyakejjay Bibliajj millón millón jaqenakatak qellqatächejja, ¿kunjamarak yatichäwinakapajj jichha tiempon jakir jaqenakarojj sapa maynir yanaptʼaspasti? Kuna laykutejj Biblia qellqayki ukat sipans jukʼamp yatiñanejj janiw yaqhajj utjkiti (2 Tim. 3:16, 17).

11. ¿Bibliajj qellqaskäna ukhajj kunjamsa Jehová Diosajj jan yaqhachasirïtap uñachtʼayäna?

¹¹ Jehová Diosajj cheqapar uñjir Diosarakiwa (Deut. 32:4). Khititejj cheqapar uñjirïki ukajja, janiw khitirus yaqhachkiti, Jehová Diosajj janiw khitirus yaqhachkarakiti (Hech. 10:34, 35; Rom. 2:11). Kawkïr arunakarus Bibliajj qellqasini uk ajllisaw jan yaqhachasirïtap uñachtʼayäna. Biblian 39 nayrïr libronakapajj hebreo arutwa niya taqpachajj qellqasïna, uka tiemponjja Diosan markapajj uka arwa parlapjjäna. Ukampis nayrïr cristianonakan tiempopanjja, jilaparte jaqenakajj griego aru parlapjjäna. Ukatwa Biblian 27 qhep qhepa libronakapajj griego arut jilapartejj qellqasïna. Jehová Diosajj jan mä aruruk Biblia qellqayasajj jan yaqhachasirïtapwa uñachtʼayäna. Jichhürunakan niya 8.000 millonanakaw jaqenakajj aka oraqen utji, kunayman arunakwa parlaraktanjja. Ukampis ¿kunas taqenirojj Jehová Diosar uñtʼañasatakejj yanaptʼistu?  

12. ¿Kunjamsa Daniel 12:4 textojj aka qhepa urunakan phoqasiwayi?

¹² Tukuy urunakan ‘kunatï cheqäki uk uñtʼañajj waljäniwa’, mä arunjja walja jaqenakaw kuntï Bibliajj siski uk amuyapjjani sasaw Jehová Diosajj Daniel profeta toqejj arsüna (Daniel 12:4 liytʼäta). Ukatakejj Bibliasa, Bibliat apstʼat qellqatanakas walja arunakaruw traducisiwayi, imprimisiwayi, lakirasiwayaraki. Cheqas Bibliakiw oraqpachan mayni libronakat sipans jukʼamp traducisiwayi, lakirasiwayaraki. Uka Biblianakat jilapartejj wali jilaruw aljasi. Ukampis Jehová Diosan markapajja, phoqatpachasa jan ukajj mä partekis 240 jila arunakaruw Biblia traduciwayapjje, taqeniw mä Biblia gratisak katoqapjjarakispa. Ukhamatwa janïr akapachan tukusiñapkamajj taqe markanakankir millón millón jaqenakajj ‘Reinon suma yatiyäwinakap’ katoqasipjje (Mat. 24:14). Jehová Diosajj cheqapar uñjir Diosawa, jukʼamp jaqenakajj Biblia liytʼasin jupar uñtʼapjjaspa ukwa munaraki. Kuna laykutejj taqeniruw wal munasistu.

13. ¿Kunatsa Bibliajj Diosan munasiñap uñachtʼayi sasin sistanjja? (Juan 21:25).

¹³ Jehová Diosajj wali munasirïtap amuytʼañasatakiw Bibliajj yanaptʼarakistu (1 Juan 4:8). Kunanaksa Bibliar qellqayi, kunanaksa jan qellqaykaraki uk amuytʼañäni. Jupan amigopäñasatakisa, kusisit jakasiñasatakisa, wiñayatak jakasiñasatakis kunanak yatiñasas wakisi ukwa Bibliajj qhanañchistu. Ukampis niyakejjay Jehová Diosajj wal munaschistojja, janiw kunanaktï jan yatiñasajj wakiski ukampejj phoqantkistuti (Juan 21:25 liytʼäta).

14. ¿Kunjamsa Bibliajj Diosan munasiñap uñachtʼayaraki?

¹⁴ ¿Kunjamsa Jehová Diosajj munasiñap uñachtʼayarakistu? Biblia toqe jiwasamp parlki ukhajj khuyapayasiñampiw uñjistu. Janiw jiwasar taqe kunan controlañatakejj jan tukuskir leyinak Bibliar qellqaykiti. Jan ukasti suma amtanakar puriñasatakejj nayra tiempon jakir jaqenakan sarnaqäwinakapampi, musparkañ profecianakampi, yanaptʼkir ewjjtʼanakampiw yanaptʼistu. Ukhamatwa Bibliajj Diosar munasiñasatakisa jupar taqe chuyma istʼañasatakis chʼamañchistu.

15. 1) ¿Kunjamsa Jehová Diosajj jiwasat wal llakisitap Bibliajj uñachtʼayistu? 2) Fotonakarjamajja, ¿khitinakatsa jiskʼa imill wawasa, wayna jilatasa, jilïr kullakas lupʼisipki? (Gén. 39:1, 10-12; 2 Rey. 5:1-3; Luc. 2:25-38).

¹⁵ Jehová Diosajj jiwasat wal llakisitapwa Bibliajj uñachtʼayistu. ¿Kunjamatsa uk yattanjja? Jaqenakajj kunjamas jikjjatasipjjäna uka toqet walja kutiw Bibliajj parli. Biblian parlki uka chachanakas warminakas kunjamas jikjjatasipjjäna uk amuysnawa, jupanakajj ‘jiwasjam jaqekïpjjarakïnwa’ (Sant. 5:17). Ukampis akaw jukʼamp importantejja, Jehová  Diosajj kunjamsa jiwasjam jaqenakar uñjäna uk yatjjatasajja, ‘Jehová Diosajj wali munasir chuymanïtapsa, wali khuyaptʼayasirïtapsa’ jukʼamp sumwa amuysna (Sant. 5:11).

16. Biblian parlki uka chachanakarus warminakarus Jehová Diosajj pantjasitanakap perdonänwa, ¿kunsa ukajj Jehová Diosat yatichistu? (Isaías 55:7).

¹⁶ Kunjamsa Jehová Diosajj munasiñap uñachtʼayarakistu uk Biblianwa jikjjattanjja. Pantjasktan ukhajj janiw Jehová Diosajj apanukkistaniti sasaw Bibliajj qhanañchistu. Israelitanakajj kutin kutiniw Jehová Dios contra juch lurapjjäna, ukampis taqe chuyma arrepentisipkäna ukhajja, jupajj perdonänwa (Isaías 55:7 liytʼäta). Nayrïr patak maranakan jakir cristianonakajj qhawqsa Jehová Diosajj jupanakar munasïna uk yatipjjänwa. Apóstol Pablojj Diosan amuytʼayataw jilat kullakanakarojj qʼañu jucha lurañar purtʼaskäna arrepentiskarakïna uka chachar perdonapjjañapatakisa chuymachtʼapjjañapatakis chʼamañchäna (1 Cor. 5:1-5; 2 Cor. 2:6, 7). Ak yatiñajj walpun chʼamañchtʼistu, Jehová Diosajj janiw servirinakaparojj pantjasipjjatap laykojj apanukkänti. Jan ukasti wali munasiñampiw jupanakar yanaptʼäna, cheqañchäna, jupan ukar kuttʼanipjjañapatakis invittʼäna. Jichhürunakanjja, khitinakatï juchar purtʼasipki arrepentisipkaraki ukanakarojj ukham yanaptʼañwa arsuraki (Sant. 4:8-10).

17. ¿Kunatsa Bibliajj Diosan mä suma regalopajja?

¹⁷ Jehová Diosajj mä suma regalo churistu. ¿Kunatsa Bibliajj mä suma regalojja? Kunjamtï uñjawayktanjja, Bibliaw Jehová Diosajj cheqapar uñjirïtapa, yatiñanïtapa, jiwasar wal munasitap yatichistu. Jehová Diosajj jupar uñtʼsna jupan amigopäsna uk munatapwa Bibliajj uñachtʼayarakistu.

18. ¿Kunjamsa Biblia churatapat Diosar yuspäratas uñachtʼaysna?

¹⁸ Diosan Aruparojj wali valoranitwa uñjañasa. Ukajj Jehová Diosan mä ‘suma regalopawa’ (Sant. 1:17). Uka regalo jiwasar churatapat Jehová Diosar yuspärapjjapuniñäni. ¿Kunjamsa yuspäratas uñachtʼaysna? Janïr Biblia liykasin oración lurasa, kuntï liyktan uka toqet lupʼisaw uñachtʼaysna. Biblia qellqayiri Jehová Diosajj chʼamachasitasarojj bendisipunistaniwa, ‘Diosarus uñtʼarakiñäniwa’ (Prov. 2:5).