1. Inyuki di nlama ti Yéhôva mayéga inyu Bibel?

 DI NTI Yéhôva mayéga inyu Bañga yé le Bibel. I nti bés maéba ma ma nla hôla bés i ngéda di mboma mandutu. I nti yak bés botñem. Yéhôva a ñunda yak bés bilem gwé mu Bañga yé. I ngéda di nyoñ ngéda i ôt pék mu bilem gwé, bi nlôôha lémél bés, bi ntinde ki bés i yila mawanda mé.​—Tjémbi 25:14.

2. Lelaa Yéhôva a bi unda bôt ba binam bilem gwé?

² Yéhôva a gwé ngôñ le bôt ba yi nye. I ngéda kôba, inyu boñ le ba yi nye, a bé a boñ le bôt ba emel bieem, ba tehe biyiinda, ngim mangéda a bé a gwélél biañgel. (Ñañga bôt 12:6; Minson mi baôma 10:3, 4) Ndi, di bé bé le di pam i yi bieem bi, to biyiinda, to nwin biañgel bi bé legel ibale ba tila bé. Inyu hala nyen Yéhôva a bi boñ le bôt ba ‘tila bibañga bi ikété kaat.’ (Yérémia 30:2) Kiki “maboñok ma bañga Nyambe ma yé peles,” di nyi le Bañga yé i yéne toi bés nseñ.​—Tjémbi 18:30.

3. Kii Yéhôva a bi boñ le Bibel i pam letee ni i ngéda yés? (Yésaya 40:8)

³ Añ Yésaya 40:8. Hala a yé dikôô di nwii le Bibel i nti bôt ba binam maéba malam. Kii i bi boñ le Bibel i pam letee ni munu ngéda yés? Di nyi le mapep ba bé  gwélél i ngéda kôba inyu tila Bibel ma bé nom bé, jon to jada li yii ha bé munu ngéda yés. Ndi Yéhôva a bi boñ le bôt ba tiimba tila kii yosôna i bé mu mapep ma. I bôt ba bi tiimba tila Bibel ba bé bikwéha bi bôt, ndi ba bé jôha bé ni bôlô yap. Nyimam wada a kal le: “Di nkon bé woñi i kal le, ikété bikaat gwobisôna bi bi tilba i ngéda kôba, to yada i bi tilba bé loñge kiki Bitilna bi Lôk Héber.” Jon, tolakii Bibel i yé nlômbi kaat, i bi tilba i mapep ma ma nom bé, ni le bikwéha bi bôt gwon bi bi tiimba tila yo, pééna yo ki yo i ta bé le i yé Bañga i Djob.

4. Kii d’a tehe munu yigil ini?

⁴ Yéhôva nyen a nti “hiki likébla lilam ni hiki likébla li yé peles.” (Yakôbô 1:17) Ikété makébla malam a nti bés, jada li yé le Bibel. I ngéda mut a nti bés likébla, hala a ñéba le a nyi bés, ni le a nyi i mam ma nkon bés ngôñ. Hala nyen yak Yéhôva a yé. I ngéda di ñañ Bañga yé le Bibel, di ntehe le a nyi bés loñge loñge, a yik i mam ma nkon bés ngôñ. Munu yigil ini, d’a tehe kii Bibel i niiga bés inyu bilem bi Yéhôva biaa bini le: pék, telepsép, ni gwéha. Di béñge ndugi lelaa pék i Yéhôva i nene mu Bañga yé.

5. Lelaa pék i Yéhôva i nene mu Bañga yé?

⁵ Yéhôva a nyi le maéba mé ma yéne bés nseñ. Jon a bi ti bés ngandak maéba mu Bañga yé. Maéba ma, ma nhôla ngandak bôt. Bibel i nhéñha niñ bôt. I ngéda Môsi a bé tila bibañga bi bisu bi Bibel, a bi kal Lôk Israel le: “Bi ta bé bibañga bi yañga, ndi bi nla boñ le ni kôhna niñ.” (Ndiimba Mbén 32:47) I bôt ba bi nôgôl bibañga bi, ba bééna niñ ilam. (Tjémbi 1:2, 3) Tolakii Bibel i ma nom ngandak, i ngi gwé ngui i héñha bôt. Kiki hihéga, ibale u nke i jw.org, munu minkwel mini le: “Bibel i nhéñha niñ i bôt,” w’a tehe iloo 50 ma ndémbél i lôk kéé i i bi héñha héñha yosôna i ngéda i bi bôdôl nigil Bibel.​—1 Tésalônika 2:13.

6. Inyuki di yé le di kal le kaat yo ki yo i ta bé kiki Bibel?

⁶ Kaat to yada i ta bé kiki Bibel. Inyuki di nkal hala? Inyule Yéhôva nu a bi ti bés likébla lini le Bibel a yé Nyambe nu ngui yosôna, Nyambe nu boga, a gwé ki pék iloo bôt bobasôna. Ngim bôt i i bi tila bikaat, i bi wo, bikaat gwap bi yégle. Ndi i mbus ngéda, i bikaat bi, bi ta ha bé nseñ. Ki le maéba ma yé i Bibel ma nom i boga ni boga; ma nhôla bôt bobasôna, to imbe ngéda. I ngéda di ñañ Bibel di ôdôk pék mu, Yéhôva a nti bés mbuu wé mpubi u u nhôla bés i boñ i mam di ñañ mu Bibel. (Tjémbi 119:27; Malaki 3:16; Lôk Héber 4:12) Yéhôva a yé bebee i hôla bés. Hala a nlama tinde bés i añ Bibel hiki ngéda.

7. Lelaa Bibel i bi hôla bagwélél ba Yéhôva ba behee i niñ ikété adna?

⁷ Bibel i ñunda ki pék i Yéhôva inyule i mboñ le bagwélél bé ba niñ ikété adna. I ngéda Lôk Israel i bi jôp i hisi Yéhôva a bi bôn bo, ba bé yééne bé homa wada. Bahogi ba bé balop tjobi, bape batééda mintômba, bape ba salak nwom. Lôk Israel ihogi i bé  le i hôya lôk kéé yap i i bé bahoma bape. Ndi Yéhôva a bi boñ le ba kodba ngandak ngélé inyu emble kiki Bañga i Djob i ñéña, bôt ba toñlak yo. (Ndiimba Mbén 31:10-13; Néhémia 8:2, 8, 18) Di noode le hégda kii man Lôk Israel a bé le a nôgda i ngéda a bé a bol i Yérusalem, a tehe didun di lôk kéé yé i lôlak bahoma bahoma! Hala a bi boñ le bagwélél ba Yéhôva ba niñ ikété adna. I mbus ngéda, i ngeñ likoda li bikristen li bi gwéé i hiai hi bisu, bôlôm ba bé mu ni bôda, ba podok ngandak mahop. Bahogi ba bé diyeyeba, bape mingwañ mi bôt, bape bôt ba ba bi ke i suklu, ni ba ba bi ke bé i suklu. Ndi kiki ba bé gwés Bañga i Djob, ba bé bégés Yéhôva ikété adna. I ngéda bôt ba bé ba yila bikristen, inyu boñ le ba pam i nok Bibel, ini lôk kéé ipe yon i bé niiga bo, ba kenek yak i makoda.​—Minson mi baôma 2:42; 8:30, 31.

8. Munu ngéda yés, lelaa Bibel i nhôla bagwélél ba Yéhôva i niñ ikété adna?

⁸ Yéhôva, Nyambe nu pék a ngwélél Bibel inyu hôla bagwélél bé i niñ ikété adna. Mu nyen di nkuhul biniigana gwobisôna. Di mbéna ke i makoda més di gwé hiki sonde, makoda ma makiiña, ni makoda ma ndôn. Inyu emble kiki lôk kéé i ñañ Bibel i toñlak  yo. Hala nyen Bibel i nhôla bagwélél ba Yéhôva i ‘bégés nye ikété adna.’​—Sôfônia 3:9.

9. Imbe lem ilam i mbéda bés inyu boñ le di nok Bibel? (Lukas 10:21)

⁹ Di béñge jam lipe li li ñéba le Yéhôva a gwé pék. A bi boñ le ngandak bipes bi Bibel bi tilba i nya i yé le ndigi bôt ba suhulnyuu bon ba nla nok gwo. (Añ Lukas 10:21.) Bôt ba ñañ Bibel mbok yosôna. Nyimam wada a bi kal le: “Bôt ba ñañ Bibel ngandak, ba nyoñ ki ngéda i nigil yo iloo bini bikaat bipe gwobisôna.” Ndi ndigi bôt ba suhulnyuu bon ba nok toi Bibel, ba boñok ki mam Bibel i niiga.​—2 Korintô 3:15, 16.

10. Ikété Bibel, kii ipe i ñéba le Yéhôva a gwé pék?

¹⁰ Jam lipe mu Bibel li ñéba bés le Yéhôva a gwé pék. Yéhôva a ngwélél Bañga yé inyu niiga ntôñ wé wonsôna, ndi yak hiki wada wés. Hiki mut nu a ñañ Bibel, a nôgda le Yéhôva a ngwés nye. (Yésaya 30:21) Baa u mah yimbe bé le i ngéda u gwé ndutu, u nléba pes kaat i i nhôla we mu ndutu yoñ? Di nyi le Bibel i bi tilba inyu ngandak bôt, ndi inyuki i gwé maéba ma ma nhôla we i ngéda u gwé ndutu? Inyule i nwet a bi ti bés likébla lini le Bibel a gwé pék iloo bôt bobasôna.​—2 Timôtéô 3:16, 17.

11. I ngéda Yéhôva a bi boñ le ba tila Bibel, lelaa a bi unda le a mbagal bé bôt?

¹¹ Lem i Yéhôva ipe i yé telepsép. (Ndiimba Mbén 32:4) Mut a téé sép a mbéna ba mut a ntodol bé bôt. Hala nyen Yéhôva a yé. (Minson mi baôma 10:34, 35; Rôma 2:11) I jam li ñéba hala li yé le a bi boñ le ba tila Bibel ni mahop ngandak bôt i bé nok. Ikété 39 bi bikaat bi Bibel bi bisu, ngandak i bi tilba ni hop Lôk Héber. I hop u, bagwélél ba Yéhôva ba bé nok wo ha ngéda i. Ndi ibôdôl ha i hiai hi bisu, hop Grikia won bôt ba bé pot ngandak. Jon, bini bikaat bi Bibel bipe 27, bi bi tilba ni hop u. Yéhôva a bi kal bé le ba tila ndigi Bañga yé ni hop wada. Munu ngéda yés, bôt ba yé i nkoñ ’isi bebee le milliard juem, ba mpot ngandak mahop. Lelaa i bôt ba bobasôna ba yé le ba yi Yéhôva?

12. Lelaa mbañ i i yé kaat Daniel 12:4 i yé yon munu dilo di nsôk?

¹² Yéhôva a bi gwélél mpôdôl Daniel inyu legel le i dilo di nsôk, “bañga yi” i i yé ikété Bibel “i ga bôl.” Ngandak bôt y’a nok Bibel. (Añ Daniel 12:4.) Jam jada li li mboñ le bañga yi i bôl hala, li yé le bôt ba nkobol Bibel ni bikaat bi ntoñol yo, ba pémhak gwo, ba kabak. I nkoñ ’isi wonsôna, kaat ipe yo ki yo i nkoblana bé kiki Bibel. Ngim mangéda, i homa ba nuñul Bibel, i nhee diye ngandak. Ndi ntôñ u Yéhôva u ma kobol Bibel yosôna tole ngim bipes bi Bibel ikété iloo 240 dilémb. Di nti bôt Bibel ibabé le ba saa to dola. Hala a mboñ le bôt ba biloñ gwobisôna ba nok “ñañ nlam u Ane” ilole lisuk li nkola. (Matéô 24:14) Yéhôva, Nyambe nu telepsép, a nsômbôl le ngandak bôt i añ Bibel inyu yi nye. A mboñ hala inyule a ngwés bésbobasôna ngandak.

13. Lelaa gwéha i Yéhôva i nene mu Bañga yé? (Yôhanes 21:25)

¹³ Bibel i néba bés lem i bisu bisu i Yéhôva: gwéha. (1 Yôhanes 4:8) Kiki hihéga, a bi yeelene bés ngim mam mu Bañga yé, ndi mape a bi yeelene bé bés mo. I mam ma mbéda toi bés inyu ba mawanda mé, i bana niñ ilam, ni i niñ i boga ni boga mon a bi yeelene bés. Ndi kiki Yéhôva a ngwés bés, a bi yeelene bé bés mam ma tane bé bés nseñ.​—Añ Yôhanes 21:25.

14. Ikété Bibel, kii ipe i ñéba le Yéhôva a ngwés bés?

¹⁴ Yéhôva a ñunda ki bés gwéha i ngéda a nkwélés bés mu Bañga yé i nya i ñunda le a nyan bé bés. Bañga yé i gwé bé ndigi mambén ni bikila. Inyu tihba miñem nwés, a ñañle bés miñañ, a podok mbañ, a tinak ki bés maéba. Hala a mboñ le di gwés Yéhôva, di nôgôl ki nye ni ñem wés wonsôna.

15. (a) Lelaa Bibel i ñunda le Yéhôva a ntôñ bés? (b) Mu titii, mañge muda, mañge munlôm, ni mañ muda, ba yé hoñol bambe bôt ikété Bibel? (Bibôdle 39:1, 10-12; 2 Bikiñe 5:1-3; Lukas 2:25-38)

¹⁵ Bibel i ñéba le Yéhôva a ntôñ bés ngandak. Kii i ñunda hala? Bañga yé i ñunda bés kii i bôt ba bé niñ ha ngéda i ba bé nôgda. Di ntibil nok i bôt ba inyule ba bééna “mahoñol kiki bés.” (Yakôbô 5:17) Jam lipe li yé le i ngéda di ntehe lelaa Yéhôva a bé yoñ i bôt ba, di nkônde nok le “a yôni ni ñem gwéha lôñni konangoo.”​—Yakôbô 5:11.

16. I ngéda di ñañ miñañ mi bagwélél ba Yéhôva ba ba bi boñ dihôha, bimbe biniigana di ñôt mu? (Yésaya 55:7)

¹⁶ Jam lipe ikété Bibel li ñéba le Yéhôva a ngwés bés. Bañga i Yéhôva i ñunda bés le to di nhôs, a nkôm bé bés mbus. Lôk Israel i bi ndogbene Yéhôva ngandak ngélé; ndi i ngéda ba bé ba tam bibéba gwap, Yéhôva a bé a nwéhél bo. (Añ Yésaya 55:7.) Yak bikristen bi hiai hi bisu bi bé yi le Yéhôva a ngwés bo ngandak. Ñôma Paul a bi kal lôk kéé le i mankéé a bi boñ béba ikeñi a tam, ba ‘nwéhél nye, ba ti ki nye hogbe.’ (2 Korintô 2:6, 7; 1 Korintô 5:1-5) Di yé maséé i tehe le Yéhôva a bi kôm bé bagwélél bé mbus, tolakii ba bi hôs. A bi hôla bo, a kogse bo, a neebe le ba témb ba yila mawanda mé. Yak i len ini, a nkal le a yé bebee i nwéhél ba bobasôna ba ntam bibéba gwap.​—Yakôbô 4:8-10.

17. Inyuki di nkal le Bibel i yé likébla lilam?

¹⁷ Yéhôva a bi ti bés likébla lilam le Bibel. Inyuki di nkal hala? I yigil ini i ñéba bés le Bibel i nyeelene bés bilem bi Yéhôva bini le pék, telepsép, ni gwéha. Bañga yé i ñunda le a gwé ngôñ le di yi nye, a nsômbôl le di ba mawanda mé.

18. Lelaa di nla ti Yéhôva mayéga inyu likébla lilam lini le Bibel?

¹⁸ Di hôya bañ le Bibel i yé “likébla lilam” Yéhôva a bi ti bés. (Yakôbô 1:17) Di ti nye mayéga inyu likébla li. Lelaa? Di añ Bañga yé, di ôt ki pék mu. Ibale di mboñ hala, Yéhôva a ga sayap bés, di ga kôhna ki “yi i Nyambe.”​—Bingéñgén 2:5.