1. Boasa mandok mauliate hita ala diparade Debata Bibel?

 PASTI mandok mauliate do hita tu Debata Jahowa alani Bibel. Diparade Jahowa do di Bibel akka nasehat na denggan asa boi hita marhasil mangadopi masalahta saonari. Dilehon Ibana do muse harapan na luar biasa di ari na naeng ro. Jala na lebih penting dipakke Jahowa do Bibel lao paboahon akka sifatna. Tikki tapikkirhon sifat ni Jahowa pasti hona do i tu rohatta. Gabe tergerak ma hita lam jonok tu Debata jala marale-ale tu Ibana.​—Ps. 25:14.

2. Songon dia do Jahowa paboahon dirina tu jolma?

² Lomo do roha ni Jahowa asa ditanda akka halak Ibana. Najolo, dipaboa Jahowa do taringot dirina marhite nipi, parnidaan, dohot akka suru-suruan. (4 Mus. 12:6; Ul. 10:3, 4) Alai dang boi taparsiajari nipi, parnidaan, dohot akka hata na dipasahat suru-suruan i molo dang disuratton i. On ma alasanna disuru Jahowa piga-piga bawa lao manurat “di sada bukku” aha na porlu taboto taringot Ibana. (Jer. 30:2) Ala “denggan do sude ulaon ni Debata na sittong i”, pos do rohatta on ma cara komunikasi na denggan lao mangurupi hita.​—Ps. 18:30.

3. Aha do na dibahen Jahowa asa toktong adong Bibel sahat tu saonari? (Jesaya 40:8)

³ Jaha Jesaya 40:8. Hata ni Debata marisi petunjuk na denggan tu akka bawa dohot borua na setia saleleng marribu taon. Boasa boi toktong adong Bibel sahat tu saonari? Memang Bibel najolo disuratton di gulungan manang perkamen na boi hancur. Alani i dang adong be gulungan aslina saonari. Alai dipastihon Jahowa do adong halak na manalin Hatana i. Nang pe dang sempurna nasida, manat do nasida manalin i. Sahalak pakar mandok, “Pos do rohatta dang adong bukku kuno na asing na akurat disalin songon Akka Bukku Heber.” Jadi nang pe najolo Bibel disurat  di bahan na mura sega jala panalinna pe dang sempurna, boi do pos rohatta molo na tajaha di Bibel saonari marisi pikkiran ni Pangarangna, i ma Jahowa.

4. Aha do na lao tabahas di artikel on?

⁴ Sian Jahowa do “silehon-lehon na denggan jala na sun denggan”. (Jak. 1:17) Sada silehon-lehon na massai denggan tu hita i ma Bibel. Tikki adong sasahalak na mangalehon hadiah, sian hadiahna i gabe taboto ma na takkas ditanda ibana hita dohot aha na tahaporluhon. Sarupa songon i do Bibel. Tikki taparsiajari i gabe taboto ma taringot Jahowa. Taboto ma na takkas do ditanda Jahowa hita jala diboto Ibana aha na tahaporluhon. Di artikel on tabahas ma songon dia Bibel paboahon tolu sifat ni Jahowa, i ma bisukna, keadilanna, dohot holongna. Parjolo taparsiajari ma jo songon dia Bibel paboahon bisuk ni Debata.

5. Songon dia do Bibel patuduhon bisuk ni Debata?

⁵ Diboto Jahowa do na tahaporluhon bisukna. Alani i marhite Bibel dipaboa Jahowa do akka nasehat na mambahen hita marbisuk jala mambahen lam denggan ngolutta. Tikki ditogu-togu tondi parbadia ni Debata si Musa manuratton lima bukku na parjolo di Bibel, didok si Musa do tu halak Israel, “Dang holan hata sabbing akka hata i. Ai molo dioloi hamu hata i, boi do i mambahen hamu mangolu.” (5 Mus. 32:47) Akka halak na mangoloi Surat na Badia boi do marhasil jala marlas ni roha di ngolu ni nasida. (Ps. 1:2, 3) Nang pe naung leleng Bibel disurat, alai boi do i mambahen lam denggan ngolu ni jolma. Misalna di jw.org adong do artikel berseri “Bibel Mambahen Denggan Ngolukku”. Godang do disi pengalaman ni akka halak na mambahen perubahan na balga jala lam denggan ngolu ni nasida saonari ala dioloi nasida nasehat ni Bibel.​—1 Tes. 2:13.

6. Boasa boi tadok dang adong bukku na songon Bibel?

⁶ Dang adong bukku na asing songon Bibel. Boasa tadok songon i? Alana Pangarang ni Bibel Debata Jahowa, Debata na marhuaso, na mangolu salelengna, jala na umbisuk sian manang ise pe. Godang do bukku na boi dope tajaha nang pe nungnga mate pangarangna. Alai jotjottan akka nasehat na adong di bukku i dang marguna be saonari. Sebalikna molo nasehat ni Bibel marguna do i saleleng ni lelengna. Jala tarbukti do i boi mambahen lam denggan ngolu ni halak di sude jaman. Tikki tajaha Bibel jala tarimangi isina, dilean Pangarangna i ma tondi parbadiana lao mangurupi hita mangulahon akka nasehat ni Bibel di ngolutta. (Ps. 119:27; Mal. 3:16; Heb. 4:12) Jadi lomo do roha ni Pangarang ni Bibel mangurupi hita. Alani i berupaya ma hita asa taratur manjaha Bibel.

7. Songon dia do Bibel mambahen naposo ni Jahowa marsada najolo?

⁷ Adong dope na patuduhon molo Bibel marisi bisuk ni Debata. Boi do Bibel mangurupi naposo ni Debata asa marsada. Dung masuk halak Israel tu Tano na Dijanjihon tinggal do nasida di luat na luas. Alani i piga-piga sian nasida gabe sijala dekke, parmahan, jala adong na gabe pangula. Boi do halak Israel na tinggal di sada daerah gabe dang mamikkirhon halak Israel na tinggal di daerah na asing di luat i. Alai dibahen Jahowa do sada pengaturan asa rap marpungu halak Israel di piga-piga kesempatan lao  manangihon Hata ni Debata dijahahon jala dipatorang. (5 Mus. 31:10-13; Neh. 8:2, 8, 18) Bayakkon ma songon dia perasaan ni halak Israel na setia dung sahat nasida di Jerusalem jala mangida dongan sahaporseaonna marroan sian ganup inganan di luat i! Marhite cara on diurupi Jahowa ma nasida asa toktong marsada. Di pudian ni ari, akka bawa dohot borua na ro sian marragam latar belakang do na margabung tu huria Kristen. Marasing-asing do bahasa, status sosial, dohot keadaan ekonomi ni nasida. Alai ala holong roha ni nasida tu Hata ni Debata, gabe boi ma nasida marsada manomba Debata na sittong. Akka halak na baru porsea pe boi do mangattusi Hata ni Debata molo olo nasida diurupi dongan sahaporseaonna jala molo ro nasida tu parpunguan.​—Ul. 2:42; 8:30, 31.

8. Songon dia do Bibel mambahen naposo ni Jahowa marsada saonari?

⁸ Torus do dipakke Debata na marbisuk Bibel lao mangajari dohot mambahen naposona marsada. Sian Bibel do sude hasittongan na taparsiajari taringot Jahowa. Alani i taratur ma hita ro tu akka parpunguan di huria dohot di kebaktian lao mambege Hata ni Debata dijaha, dipatorang, jala dibahas. Takkas ma, massai penting do Bibel i. Dipakke Jahowa do i mangurupi naposona asa “marsada lao manomba Ibana”.​—Sep. 3:9.

9. Halak na songon dia do na boi mangattusi isi ni Bibel? (Lukas 10:21)

 ⁹ Parrohahon ma bukti na asing taringot bisuk ni Jahowa. Godang do bagian ni Bibel na maol diattusi. Alai holan halak na marserep ni roha do na boi mangattusi i. (Jaha Lukas 10:21.) Godang do halak di portibi on na manjaha Bibel. Songon na didok sahalak pakar, Bibel do “bukku na unjotjot dijaha halak sian akka bukku na asing, jala manat do nasida manjaha i”. Alai holan halak na serep roha do na boi mangattusi isina jala mangulahon i.​—2 Kor. 3:15, 16.

10. Aha dope na patuduhon molo Bibel i marisi bisuk ni Jahowa?

¹⁰ Aha dope na patuduhon molo Bibel i marisi bisuk ni Jahowa? Dang holan secara kelompok dipakke Jahowa Bibel mangajari hita, alai diajari jala dipatogu do hita secara pribadi. Tikki tajaha Bibel, boi do taida na parduli do Jahowa tu hita secara pribadi. (Jes. 30:21) Tikki masa hasusaan tu hamu, pasti hea do dijaha hamu ayat ni Bibel na cocok tu situasimuna, jala hira na disurat do i tu hamu secara pribadi. Memang Bibel bukku na disurat tu marjuta halak. Alai boasa informasi na adong disi boi pas tu kebutuhanmuna? Pasti ala marbisuk do Pangarang ni Bibel i.​—2 Tim. 3:16, 17.

11. Sian bahasa na dipakke tikki manuratton Bibel, aha do na boi taparsiajari taringot Jahowa?

¹¹ Sifat ni Jahowa na asing i ma adil. (5 Mus. 32:4) Halak na adil dang olo membeda-bedahon halak. Songon i ma Jahowa, dang olo Ibana membeda-bedahon halak. (Ul. 10:34, 35; Rom 2:11) Tarida do i sian bahasa na dipakke tikki manuratton Bibel. Di bahasa Heber do godangan disuratton 39 bukku na parjolo di Bibel, ala i do bahasa na mura diattusi naposo ni Debata di tikki i. Molo di abad na parjolo bahasa Junani do na godang dipakke halak tikki i. Jadi 27 bukku na parpudi di Bibel disurat di bahasa Junani. Dang dibatasi Jahowa Hatana disurat holan tu sada bahasa. Saonari godang do bahasa na dipakke ualu miliar halak di portibi on. Songon dia do godangan halak boi marsiajar taringot Jahowa?

12. Songon dia do Daniel 12:4 digenapi di ari parpudi?

¹² Marhite Panurirang Daniel marjanji do Jahowa molo di ari parpudi ‘massai godang ma parbinotoan na sittong’ dapot ni halak sian Bibel. (Jaha Daniel 12:4.) Ala diterjemahon, dicetak, jala dibagihon Bibel dohot publikasi na berdasarhon Bibel, boi ma godang halak mandapot parbinotoan na sittong. Bibel ma bukku na paling godang diterjemahon jala dibagihon di liat portibi on. Adong do Bibel na diterjemahon jala dicetak perusahaan, biasana arga do i digadis. Alai Bibel lengkap dohot sebagian naung diterjemahon naposo ni Debata nungnga adong di lobi sian 240 bahasa, jala gratis do i. Hasilna gabe sude ma halak boi mamboto “barita na uli taringot tu Harajaon” sebelum ro ujungna. (Mat. 24:14) Lomo do roha ni Debatanta na adil asa sude halak mananda Ibana marhite manjaha Bibel. On ma buktina na massai holong do roha ni Debata tu hita sude.

13. Aha do na boi taboto taringot holong ni Debata sian Bibel? (Joh. 21:25)

¹³ Dipaboa Bibel do tu hita sifat ni Jahowa na umbalga i ma holong. (1 Joh. 4:8) Parrohahon ma aha na dibahen  Jahowa di Bibel jala aha na so dibahen Ibana di Bibel. Na dibahen Jahowa di Bibel, i ma aha na tahaporluhon asa boi hita marale-ale dohot Ibana, asa boi hita marlas ni roha di ngolutta saonari, jala asa boi dapotta hangoluan salelengna. Dang dibahen Ibana godang informasi na so tahaporluhon lao manomba Ibana. On patuduhon massai holong do roha ni Jahowa tu hita.​—Jaha Johannes 21:25.

14. Aha dope na dipaboa Bibel na patuduhon na holong roha ni Debata tu hita?

¹⁴ Tarida do holong ni Jahowa sian carana markomunikasi tu hita. Sangap do hita dibahen. Di Bibel, dang dibahen akka daftar aturan na ganjang lao mangatur aha na boi dohot na so boi taulahon di ngolutta. Alai marhite akka pengalaman, surirang, dohot nasehat na adong di Bibel, diurupi Jahowa do hita asa boi mambahen keputusan na denggan. Hasilna boi ma tergerak rohatta lao makkaholongi dohot mangoloi Ibana sian nasa rohatta.

15. (a) Songon dia do Bibel patuduhon na parduli Jahowa tu akka halak na manjaha Hatana? (b) Sian gambar, ise do naposo ni Jahowa na disurat di Bibel na dirimangi sahalak dakdanak, sahalak donganta bawa na poso, dohot sahalak donganta borua na matua? (1 Mus. 39:1, 10-12; 2 Raj. 5:1-3; Luk. 2:25-38)

¹⁵ Dipaboa do di Bibel na parduli Jahowa tu hita. Boasa boi tadok songon i? Di Bibel, adong do disurat taringot akka naposo ni Jahowa. Boi do taattusi songon dia perasaan ni nasida ala “dos do pakkilalaatta” tu pakkilalaan ni nasida. (Jak. 5:17) Alai na paling penting marsiajar do hita songon dia Jahowa berurusan tu nasida. Gabe lam takkas ma taattusi Debata  na ‘parholong jala parasi roha’ do Jahowa i.​—Jak. 5:11.

16. Aha do na taparsiajari sian Jahowa tikki tajaha di Bibel taringot halak na mangulahon dosa? (Jesaya 55:7)

¹⁶ Aha do muse buktina Bibel patuduhon holong ni Debata? Marhite Bibel, dipapos Jahowa do rohatta dang tinggalhononna hita nang pe hea taulahon hasalaan. Misalna marulak-ulak do halak Israel najolo mardosa tu Jahowa, alai ala bertobat nasida disalpuhon Jahowa do dosa ni nasida. (Jaha Jesaya 55:7.) Songon i do na dihilala halak Kristen di abad na parjolo. Pos do roha ni nasida massai balga do holong ni Jahowa tu nasida. Marhite panogu-noguon ni tondi parbadia, dijujui Apostel Paulus do nasida asa ‘manalpuhon hasalaan jala patoguhon roha’ ni sahalak bawa naung bertobat. (2 Kor. 2:6, 7; 1 Kor. 5:1-5) Dang olo Jahowa manolak naposona na mangulahon hasalaan. Gariada berupaya do Jahowa mangurupi jala pasingotton nasida asa boi marale-ale muse nasida tu Ibana. Marjanji do Jahowa mangulahon na sarupa tu sude halak naung bertobat saonari.​—Jak. 4:8-10.

17. Boasa Bibel i hadiah na massai luar biasa sian Debata?

¹⁷ Massai denggan do hadiah na dilehon Jahowa tu hita. Boasa Bibel i hadiah na massai luar biasa sian Debata? Songon na taparsiajari, Bibel patuduhon bisuk, keadilan, dohot holong ni Debata na massai balga tu hita. Asing ni i dipaboa do di Bibel lomo do roha ni Jahowa asa tatanda Ibana jala gabe ale-alena.

18. Songon dia do hita patuduhon na taargai Bibel silehon-lehon sian Jahowa?

¹⁸ Unang ma lupa hita molo Bibel i “silehon-lehon na denggan” sian Debata. (Jak. 1:17) Torus ma tapatudu pangargaionta. Carana martangiang ma hita tikki manjaha i jala tarimangi ma i. Molo taulahon i, pos ma rohatta pasti pasu-pasuon ni Pangarangna i do hita jala dapotta “parbinotoan taringot Debata”.​—Poda 2:5.