1. I txani txi kumahako u bonga Bhiblia?

 HA M’BONGA ngutu Jehovha ngu ku a nga hi ninga Bhiblia! Ngu kuthumisa Bhiblia, Jehovha wa hi ninga sialakanyiso asi si hi vhunako kuwonisana ni sikarato nyamsi. A tshumela e hi ninga themba yo tsakisa ya wumangwana. Txa lisima ngutu, Jehovha a thumisa Bhiblia kasi ku hi gela ngu wuthu wakwe. Mbimo yi hi alakanyisisako ngu tifanelo takwe to tshura, timbilu tathu ta hi kuzeta kutshuketa kwakwe ngu kukulisa wungana wathu nayo.—Mas. 25:14.

2. Ngu tihi tinzila to hambana ati Jehovha a nga ti kombekisa ngu tona ka vathu?

² Jehovha a lava ti to vathu ve m’ziva. Kale, a ti kombekisile ngu kuthumisa miloro, miwoniso, ni tingelozi. (Mit. 12:6; Mith. 10:3, 4) Hi ndi na ti zivisa kutxani ti ti nga wonwa ka miloro, miwoniso, mwendo madungula ya ma nga ningelwa ngu tingelozi i di ku ti sa bhalwa ka wukhalo? Jehovha a kongomisile vavamna ti to “ve bhala ka dibhuku” a ti a nga ti lava ku hi ti ziva. (Jer. 30:2) Aku “nzila ya Txizimu i ku yo hetiseka,” hi nga tsaniseka ti to nzila yi ayi thumisako to e womba-womba ngu yona ni nathu yinene ni ku ya hi vhuna.—Mas. 18:30.

3. Jehovha a mahisile kutxani ti to Bhiblia yi xayiseka kala nyamsi? (Isaya 40:8)

³ Lera Isaya 40:8. Dipswi da Txizimu di ningela mkongomiso wo thembeka ka vathu votshe kudingana malembe o tala. Ti kotekisa kutxani toneto? Phela kale, mapswi a Txizimu ma ti bhalwa ka simaha si si nga ti sina, ngu toneto nyamsi di nga nga di ho didhokumentu da orijinali da mapswi awa. Kambe, Jehovha a mahile ti to kumahwa makopiya a Mibhalo yiya yo Sawuleka. Hambiku vakopista vonevo va nga ti sa hetiseka,  vona va mahile mthumo wuwa ngu mthuthalo. Mayelano ni Mibhalo ya Txihebheru, txigondi tximwani txi bhate tiya: “Ka yotshe mibhalo ya kale, Dipswi da Txizimu ngu dona dokha di nga mahwa ngu nzila ya yinene.” Hambiku ngu kutsimbila ka mbimo, asi va nga bhala ka sona si nga sina ni vakopista va kona va nga mbi hetiseka, hi nga tsaniseka to mapswi awa hi ma lerako ka Bhiblia, ma pimisilwe ngu Jehovha i ku ene Nyamne wa yona.

4. Hi na bhula ngu txani ka gondo yiya?

⁴ Jehovha ngene Txisima txa “sotshe siningo sa kuhetiseka.” (Jak. 1:17) Bhiblia yimweyo ya tiningo si Jehovha a nga hi ninga. Phela ningo yi hi gela to kari ngu nyamne wa yona, nzila yi a hi zivako ngu yona kumweko ni silaveko sathu. Ta fana ni Mningi wa Bhiblia. Hi txi xolisisa ningo yiya, hi gonda to tala mayelano ni Jehovha. Ha gonda ngu ti ene a hi zivisako tona ni silaveko sathu. Ka msungo mhaka wuwa hi na gonda nzila yi Bhiblia yi kombisako ngu yona tifanelo tiraru ta Jehovha i ku wutxhari, wululami ni lirando lakwe. Konku ahi khati ngu kuwona nzila yi Bhiblia yi kombisako ngu yona wutxhari wa Txizimu.

5. Ngu yihi nzila yi Bhiblia yi kombisako ngu yona wutxhari wa Txizimu?

⁵ Jehovha wa ti ziva ti to ha si lava sialakanyiso sakwe. Ni ku ningo yakwe i ku Bhiblia yi tate ngu wutxhari wakwe. Bhiblia ya txitxa wutomi wa vathu. Mbimo yi mabhuku o khata a Bhiblia ma nga bhalwa, Mosi a gete vathu va Txizimu i ku Vaisrayeli a txi: “Aawa hi nga mapswi o mbi vhuna kwanu; aniko ona mbutomi wanu.” (Dhewut. 32:47) Ava va nga engisa Mibhalo va ve ni wutomi wo tsakisa ni ku ti va tsimbilete kwati. (Mas. 1:2, 3) Hambiku Dipswi da Txizimu i ku kale di di bhatwe, mtamo wu di ku nawo wo txitxa wutomi wa vathu kha wa txitxa. Ngu txikombiso, ka jw.org, ka mxaxamelo wu wu ku “A Bíblia muda a vida das pessoas,” u na mana kona mu ka 50 wa sikombiso asi si txhamuselako mtamo awu Bhiblia yi ku nawo “ka va va kholwako” ka yona nyamsi.—1 Vat. 2:13.

6. Ngu kutxani hi nga wombako ti to di walo dibhuku adi di nga fananiswako ni Bhiblia?

⁶ Di walo dibhuku di di nga fananiswako ni Bhiblia. Ngu kutxani? Nguko Jehovha Txizimu i ku Nyamne wa yona a gulekile, mbwa kala kupinduka ni ku wutxhari wakwe kha wu fananiswi ni txilo. Mabhuku mamwani ma sala me gondwa hambi vanyamne va ona va di fite, kambe sialakanyiso sa ona sa pindelwa ngu kutsimbila ka mbimo. Kambe, wutxhari wu hi wu manako ka matshina  a Bhiblia kha ma pindelwi ni ku wona wa vhuna vathu va timbimo totshe. Mbimo yi hi gondako dibhuku diya do sawuleka ni kualakanyisisa ngu ti hi ti gondako, Jehovha wa thumisa moya wakwe wo sawuleka kasi ku hi vhuna hi wona nzila yi hi nga thumisako ngu yona sialakanyiso sa Bhiblia ka wutomi wathu. (Mas. 119:27; Mal. 3:16; Vaheb. 4:12) Ina, Jehovha i ku ene Nyamne wa Bhiblia a ti emisete ku hi vhuna. Toneto ta hi kuzeta ku lera Bhiblia mbimo yotshe!

7. Ka mbimo yi yi nga pinda, Bhiblia yi va vhunisile kutxani vathu va Txizimu ti to ve va ni wumwewo?

⁷ Nzila yimwani ya lisima ayi Bhiblia yi kombisako ngu yona wutxhari, wumwewo awu wu kuho hagari ka vathu va Txizimu. Mbimo yi Vaisrayeli va nga bela ka Ditiko da Txithembiso, va akile ka makhalo o hambana-hambana. Vamwani i ti vadoti va sihaka, vamwani i ti vafuyi va sihari, kasi vamwani i ti vadimi. Aku Vaisrayeli va nga ti akile ka makhalo o hambana ti ndi na hehuka ku ve divala kukhatalela Vaisrayeli kulowe, ava va nga ti akile ka didhawa dimwani. Kambe  Jehovha a mahile malulamiselo a ti to ve patana makhambi o tala kasiku ta engisa Dipswi dakwe di txi gondwa ni kutxhamuselwa. (Dhewut. 31:10-13; Neh. 8:2, 8, 18) Hi nga alakanya nzila yi Vaisrayeli vo thembeka va nga tipfa ngu yona mbimo yi va nga hoka Jerusalema ve wona timiliyoni ta vakhozeli kulowe vo ta ngu ka makhalo o hambana-hambana! Se Jehovha a simamile e vhuna vathu vakwe ti to ve va ni wumwewo. Ngu kutsimbila ka mbimo, kusimekilwe dibanza da Wukristu adi di nga ti wumbwa ngu vathu ava va nga ti womba-womba tidimi to tala to hambana, va midhawuko yo hambana, vamwani va ti gondile ngutu, vamwani va ti ganyile kasi vamwani i ti sisiwana. Aku va nga ti yi dhunda ngutu Mibhalo, vona va ti ni wumwewo ni ku va ti khozela Txizimu txa ditshuri. Ava va nga ti kholwa va ndi na di pfisisa kwati Dipswi da Txizimu ngu kuvhunwa ngu vakhozeli kulowe ni mitshangano yi va nga ti yi ñola kumweko.—Mith. 2:42; 8:30, 31.

8. Bhiblia yi tshanganisa vathu va Jehovha nyamsi ngu nzila yihi?

⁸ Txizimu txathu txa wutxhari txa simama txi gondisa ni kuvhuna vathu va txona ti to ve va ni wumwewo ngu kuthumisa Bhiblia. Bhiblia njisima txa sakudya sa moya asi hi tsakako ngutu ngu sona. Mbimo yotshe ha patana ka mitshangano yathu ya dibanza, ya txigava ni ya m’ganga hi txi engisela Mibhalo yi txi lerwa, yi txi txhamuselwa ni kubhulisana ngu  yona. Bhiblia i ferameti ya lisima ayi Jehovha a yi thumisako kasi kuvhuna vathu vakwe ti to “ve mthumela ngu moya wumwewo.”—Zef. 3:9.

9. Mbathu vo zumbisa kutxani ava va nga kotako kupfisisa didungula da Bhiblia? (Luka 10:21)

⁹ He wone wufakazi wumwani wu wu kombisako wutxhari wa Jehovha. Ku ni makhalo a mangi amu ka Bhiblia aya ma nga bhalwa ngu nzila ya ti to me pfisiswa basi ngu vathu va nga mbi gonda ngutu. (Lera Luka 10:21.) Ka makhalo otshe vathu va lera Bhiblia. Nga ha txigondi tximwani txi nga womba, to Bhiblia “hi nga dibhuku di di lerwako ngutu dwe, kambe di tshumela di lerwa ngu nzila yo tshima, kupinda otshe mabhuku.” Kambe mbathu va va wonelwako hahatshi ava va nga yi pfisisako kwati Bhiblia ni kuthumisa ati yi ti wombako.—2 Vak. 3:15, 16.

10. Ngu yihi nzila yimwani ayi Bhiblia yi kombisako ngu yona wutxhari wa Jehovha?

¹⁰ Ha wu wona wutxhari wa Jehovha ka Bhiblia ngu nzila yimwani. Jehovha kha thumisi Mibhalo kasi ku hi gondisa kota mtxawa dwe, kambe a tshumela e hi gondisa ni kuthavelela mmweyo ni mmweyo wathu. Hotshethu ha kupfa kukhatala ka Jehovha ngu mmweyo ni mmweyo wathu mbimo yi hi lerako Dipswi dakwe. (Isaya 30:21) Mbimo yi u wonisanako ni txikarato, makhambi mangahi u tulako Bhiblia u lera ndimana yo kari, se u yi wona nga yi to bhalelwa awe ngu kukongoma? Bhiblia yi bhatwe ngu nzila ya ti to timiliyoni ta vathu ti kota ku yi pfisisa. Se ti mahisa kutxani to u txi gonda mbhalo wo kari, wu kugwesa nga wu to bhalelwa awe ngu kukongoma? Toneto ti koteka nguko Jehovha i ku ene Nyamne wa Bhiblia, ngene a ku ni wutxhari kupinda votshe.—2 Tim. 3:16, 17.

11. Txizimu txi ti kombisile kutxani to kha txi nga ni txisawu-sawu mbimo yi ku nga ti bhalwa Bhiblia?

¹¹ Fanelo yimwani ya Jehovha wululami. (Dhewut. 32:4) Wululami wu tsimbitisana ni kwa mbi na txisawu-sawu, se Jehovha kha nga ni txisawu-sawu. (Mith. 10:34, 35; Var. 2:11) Kwa mbi na txisawu-sawu ka Jehovha ku kombisilwe ka tidimi ti ti nga thumiswa kasi kubhalwa Bhiblia. Mabhuku o khata a 39 amu ka Bhiblia ma bhatwe ngu Txihebheru i ku lidimi li li nga ti pfisiswa kwati ngu vathu va Txizimu ka mbimo yile. Hambiketo ngu dilembe dizana do khata E.C., lidimi la Txigriki ngu lona li nga ti thumiswa ngutu, ngu toneto 27 wa mabhuku o gwita ma bhatwe ngu lidimi lonelo. Jehovha kha maha ti to Dipswi dakwe di ziwa ngu vathu va lidimi limwelo dwe. Nyamsi kona mu ka 8 wa tibhiliyoni ta vathu ha mafuni va womba-womba tidimi tatingi. Se ti mahisa kutxani to vathu vo tala ve gonda ngu Jehovha?

12. Dhaniyeli 12:4 yi hetiseka ngu nzila yihi ka masiku awa o gwita?

¹² Ngu kuthumisa mprofeti Dhaniyeli, Jehovha a thembisile ti to ka mbimo ya magwito, “wutxhari” awu wu manekako ka Bhiblia “wu ndi na anda.” Vathu vo tala va ndi na wu pfisisa. (Lera Dhaniyeli 12:4.) Nzila yimwani ayi wutxhari wonewo wu ndi no anda ngu yona ngu hunduluxelwa, ni kuhumiswa ka Bhiblia kumweko ni mabhuku aya ma nga seketelwa mu ka Bhiblia. Bhiblia dibhuku di di nga hunduluxelwa ngutu kupinda otshe mabhuku ha mafuni. Bhiblia ayi yi hunduluxelwako ngu vanyamabhindu mbimo yimwani ya dhula ngutu. Kambe vathu va Jehovha va hunduluxela Bhiblia yotshe mwendo ngu txienge, ngu kona mu ka 240 wa tidimi, ve tshumela ve yi ningela mahala. Kota wuyelo, vathu va matiko otshe va gonda ngu “mahungu a manene a Mfumo” ma si se hoka magwito. (Mat. 24:14) Txizimu  txathu txa wululami txi lava ti to vathu votshe ve mana mkhanjo wo txi ziva ngu kulera Bhiblia. Nguko txona txa hi dhunda ngutu hotshethu.

13. Ngu kutxani hi nga wombako ti to Bhiblia yi wonekisa lirando la Jehovha? (Johani 21:25)

¹³ Bhiblia ya hi vhuna kupfisisa ti to lirando ngu yona fanelo ya hombe ya Jehovha. (1 Joh. 4:8) Ngu txikombiso wona ati Jehovha a nga lava ku ti bhalwa mu ka Bhiblia ni ti a nga ti veka didhawa. Ene a mahile ti to kubhalwa ati ti nga ti laveka dwe, kasi ku hi va ni wuxaka wa wunene nayo, hi va ni wutomi wo tsakisa konku ni kumana wutomi wo mbi guma. Hambiketo, aku Jehovha a hi dhundako, kha hi tatela to ñola to hiza hi tanda ku ti pfisisa.—Lera Johani 21:25.

14. Ngu yihi nzila yimwani ayi lirando la Txizimu li kombiswako ngu yona mu ka Bhiblia?

¹⁴ Jehovha a tshumela e hi kombisa lirando ngu kuwomba-womba ni nathu ngu nzila yo hi ninga lisima. Ka Bhiblia, ene kha bhaletela lista ya milayo yo mbi guma, kasi kukontrolara totshe ti hi ti mahako ka wutomi wathu. Hahanze keto, ene a thumisa sikombiso sa vathu va mu ka Bhiblia, wuprofeti wo tsakisa ni sialakanyiso so kongoma ti to si hi vhuna ku hi maha sisungo sa sinene. Ngu tinzila tiya, Bhiblia ya hi kuzeta kuranda Jehovha ni ku mu engisa ti txi huma mbiluni.

15. a) Jehovha a kombisisa kutxani to wa khatala ngu va va lerako Dipswi dakwe? b) Ka mfota, txihoranana, mwanathu wa dijaha ni mwanathu wu wo kula ngu tanga, va alakanyisisa ngu sikombiso sihi sa mu ka Bhiblia? (Gen. 39:1, 10-12; 2 Vafu. 5:1-3; Luka 2:25-38)

¹⁵ Bhiblia yi kombisa ngu nzila yihi ti to Jehovha wa khatala ngutu ngu ngathu? Dipswi  dakwe di tate ngu matimu a ma kombisako matipfelo a vathu. Hi nga pfisisa matipfelo oneyo nguko vona i ti vathu “vo xaniseka [va matipfelo] kufana ni nathu.” (Jak. 5:17) Txa lisima ngutu, ngako hi txi wona nzila yi a nga thumisana ngu yona ni vathu vo fana ni nathu, ti na hi vhuna kupfisisa kwati ti to “Mkoma ana ni wumbilu ni divalelo.”—Jak. 5:11.

16. Hi gonda txani ngu Jehovha mbimo yi hi lerako mu ka Bhiblia mayelano ni va va nga maha tiphazamo? (Isaya 55:7)

¹⁶ Bhiblia ya hi kombisa lirando la Jehovha ngu tinzila timwani. Mibhalo ya hi tsanisekisa ti to Txizimu txi na mbi hi leka ngako hi txi maha tiphazamo. Vaisrayeli va onhete Jehovha makhambi o tala, kambe, mbimo yi va nga tisola ti txi huma mbiluni, Txizimu txi va divalete. (Lera Isaya 55:7.) Makristu o khata ma ti ti ziva to Jehovha wa ma randa ngutu. Paulo ngu kukongomiswa ngu moya wo sawuleka, a kuzetile vanawe ti to ve ‘divalela ni kutsanisa’ awule a nga ti mahile txionho txa hombe kambe e gwita e tisola. (2 Vak. 2:6, 7; 1 Vak. 5:1-5) Ti ha kubasani ti to Jehovha kha va tsukula vakhozeli vakwe hambi ku va nga ti mahile tiphazamo! Ngu lirando a nawulutile diwoko dakwe, e va laya ni ku va ramba ti to ve tshumelela mawokoni kwakwe. Ene a thembisa kumaha ti ti fanako nyamsi ka votshe vaonhi va va tisolako.—Jak. 4:8-10.

17. Ngu kutxani Bhiblia i di txihiwa txa lisima ngutu?

¹⁷ Jehovha a hi ningile prezenti yo tshura. Ngu kutxani Dipswi da Txizimu i di da lisima ngutu? Nga ha se hi nga ti wona ngu kona, Bhiblia yi kombisa wutxhari wa Txizimu, wululami ni lirando lakwe. Dibhuku diya di junyatisa ti to Jehovha a lava ti to hi mziva. Ene a lava ti to hi va vangana vakwe.

18. Hi nga kombisisa kutxani ti to ha m’bonga Jehovha ngu “txihiwa txa lisima” i ku Bhiblia?

¹⁸ Hi nga tshuke hi divala ti to Dipswi da Txizimu “txihiwa txa lisima.” (Jak. 1:17) Se, he simameni hi kombisa kubonga ningo yiya. Hi nga maha toneto ngu kumaha mkombelo wo huma mbiluni, hi lera mapswi a dona o sawuleka ni kualakanyisisa ngu ona. Mbimo yi hi mahako toneto, hi nga tsaniseka ti to Nyamne wa yona a na katekisa mizamo yathu ni kumaha ti to “hi mana wuzivi wa Txizimu.”—Mav. 2:5.