1. Pine nemen matre easa olene koi Iehova la hna hamë së la Tusi Hmitrötr?

 EASA olene koi Iehova la hna hamë së la Tusi Hmitrötr! Ej a qatrenge la itre eamo ka xatua së troa cile kowe la itre jol. Eje fe a hamë mejiune së kowe la mel elany. Nge ame la ka nyipiewekë catr, ke ej a amamane koi së la itre thiina i Akötresie, la Atrekë Ewekëne la Tusi Hmitrötr. Ame la easa lapa mekune la itre thiina i Nyidrë, ke kola jele la itre aliene hni së, me easenyi së koi Nyidrë.—Sal. 25:14.

2. Tune kaa la aqane mama Iehova kowe la itre atr?

² Aja i Iehova tro la itre atr a atre Nyidrë. Ame ekö, hnei Nyidrëti hna mama kowe la itre atr jëne la itre pu me itre hna meköle goeën, maine jëne la itre angela. (Num. 12:6; Itre hu. 10:3, 4) Ngo hapeu, tro sa trotrohnine tune kaa la itre hna puj, me itre hna meköle goeën, me itre maca cili, e tha hna cinyanyine kö? Celë hi matre hnei Iehova hna upe la itre atr troa ‘cinyanyine ngöne la ketre itus’ la itre mekuna i Nyidrë. (Iere. 30:2) Pine laka ‘meköti la aqane ujë i Akötresie,’ matre xecie koi së laka, troa hetre thangane koi së me koi itre xan la Tusi Hmitrötr.—Sal. 18:30.

3. Nemene la ka amamane ka hape, Iehova la Atrekë Ewekëne la Tusi Hmitrötr? (Isaia 40:8)

³ E jë la Isaia 40:8. Qaane hë ekö, hnene la Trengewekë i Akötresie hna xatuane la itre atr ka lapaun. Hna cinyanyine ej ekö ngöne la itre pepa ka canga hnyeqetr, matre ame  enehila, paatre asë hë lo itre hna pane cinyanyin. Ngo hnei Iehova hna kuca matre tro palahi la itre atr a fejane lapan la itre hna cinyihan ka hmitrötr. Ngacama tha ka pexeje kö la itre atr ka fejane la Tusi Hmitrötr, ngo hnei angatr palahi hna isine troa fejane hnyawan. Önine la ketre ka qejepengöne la Tusi Hmitrötr göne la Itre Hna Cinyihane Qene Heberu, ka hape: “Qaane ekö, pëkö ketre itus hna fejane hnyawan tune la itusi celë.” Ngacama ka hekö hë la Tusi Hmitrötr, nge hna fejan hnene la itre atr ka tha pexeje kö ngöne la itre pepa ka canga hnyeqetr, ngo xecie koi së laka, itre mekuna i Iehova la hne së hna e e kuhu hnin.

4. Nemene la hne së hna troa ce wang ngöne la tane mekune celë?

⁴ Qaathei Iehova “la nöjei loi me nöjei ahnahna ka pexej.” (Iako. 1:17) Nge ame la ketre ahnahna ka tru qaathei Iehova ke, ene la Tusi Hmitrötr. Ame la ahnahna ke, ej a amamane la pengöne la atr ka hamën. Jëne la ahnahna, angeic a amamane ka hape, atre hi angeic la hna ajan hnene la atr ka troa kapa lai ahnahna. Ceitune hi lai memine la Tusi Hmitrötr, ej a amamane la pengöne la Atre hamëne koi së. Jëne la Tusi Hmitrötr, Akötresie a amamane laka, atre së hnyawa hi hnei Nyidrë, nge öhne hi Nyidrë la itre aja së. Ame ngöne la tane mekune celë, tro sa ce wange la köni thiina i Iehova ka mama e hnine la Tusi Hmitrötr, ene la inamacan, me meköt me ihnim. Tro sa pane ce wang la inamacane i Nyidrë.

5. Kola mama tune kaa la inamacane i Akötresie e hnine la Tusi Hmitrötr?

⁵ Atre hi Iehova laka, ka nyipiewekë koi së la itre eamo i Nyidrë. Nge ame e hnine la Tusi Hmitrötr, tru catr hnei itre eamo i Nyidrë. Kola mama la inamacane i Nyidrë ngöne la itre eamo cili. Celë hi matre, itre atr a kepe thangane qa ngöne la itre eamo i Iehova, nge kola saze la mele i angatr. Ame ngöne la itre pane itus ne la Tusi Hmitrötr, öni Mose kowe la angetre Isaraela: “Tha itre trengewekë ka pë aliene kö lai. Ke jëne itre ej tro epuni lai a mel.” (Deu. 32:47, MN) Ame la itre ka trongëne la itre eamo i Iehova, ke tro angatr a madrine me mele ka loi. (Sal. 1:2, 3) Ngacama kola tro la itre macatre, ngo Tusi Hmitrötr palahi enehila a saze la mele ne la itre atr. Ame ngöne jw.org, ngöne la götrane hna hape, “La Bible transforme des vies,” kola mama la itre hna melën ka anyipicine laka, Tusi Hmitrötr “a huliwa” thene la itre atr ka lapaune enehila.—1 Thes. 2:13.

6. Pine nemene matre pëkö ketre itus ka tune la Tusi Hmitrötr?

⁶ Pëkö ketre itus ka tune la Tusi Hmitrötr. Pine nemen? Pine laka ka trene men, ka epine palua, nge ka pë ifegone la inamacane i Iehova, lo Atrekë Ewekëne la itusi cili. Ame pena la itre xaa itus, meci hë lo itre ka cinyanyin ekö, nge tha ihmeku hë la itre eamo hna amë e kuhu hnin memine la hneijine së. Ngo ame kö la itre trepene meköt qa hnine la Tusi Hmitrötr ke, ka hetre thangane palahi koi easë enehila. Ame la easa e me lapa mekune la Tusi Hmitrötr, ke Iehova a hamë së la uati hmitrötr matre xatua së troa trongëne la itre eamo. (Sal. 119:27; Mal. 3:16; Heb. 4:12) Eje hi, aja i Iehova, Atrekë Ewekëne la Tusi Hmitrötr troa xatua së. Celë hi matre ka nyipiewekë tro palahi sa e la Tusi Hmitrötr!

7. Tune kaa la aqane acasine la itre hlue i Akötresieti ekö hnene la Tusi Hmitrötr?

 ⁷ Ame la ketre aqane amamane Tusi Hmitrötre la inamacane i Akötresie, ke ene la aqane acasine ej la itre hlue i Nyidrë. Ame la angetre Isaraela a traqa ngöne la Nöje Hna Thingehnaean, hnei angatr hna lapan asë la nöj. Matre ame la itre xan thei angatr, ke hnei angatr hna inin troa nyi i, maine axö öni maine eëny. Ngo ame la ejolen la troa lapa ianani, ke tha tro hmaca kö angatr a sikusikun la itre xaa trejin me angatr. Eloine pe, hnei Iehova hna acile la itre icasikeu matre troa acasi angatr, nge tro angatr a ce dreng me inine la Trengewekë i Nyidrë. (Deu. 31:10-13; Neh. 8:2, 8, 18) Pane mekune jë la madrin ne la angetre Isaraela asë la angatr hmaca a itronyi e Ierusalema. Jëne la itre icasikeu cili, Iehova a acatrene la cas ne la nöje i Nyidrë. Nge e thupen, kola acile la itre ekalesia. Ame ngöne la ekalesia, hetre trahmanyi me föe, ka trenamo maine pë ewekë, nge ka isa qene lapane kö. Ngo Tusi Hmitrötr a acasi angatr ngöne la nyipi hmi. Nge tro hi la itre atr a trotrohnine la Tusi Hmitrötr, e tro angatr a sipo ixatua kowe la itre xaa trejin me sine la itre icasikeu.—Itre hu. 2:42; 8:30, 31.

8. Tune kaa la aqane acasine la itre hlue i Akötresieti enehila hnene la Tusi Hmitrötr?

⁸ Iehova palahi enehila a inin me acasine la nöje i Nyidrë jëne la Tusi Hmitrötr.  Ame la itre ini hne së hna kapa, ke hna nyitrepene hnene la Tusi Hmitrötr. Ame ngöne la itre icasikeu, me asabele ne sirkoskripsio me asabele katru, easa ce traqa matre dreng la kola e me qejepengöne la Tusi Hmitrötr. Haawe, jëne la Tusi Hmitrötr, Iehova a xatua së troa “nyi hlue i nyidë hnene la hni ka cas.”—Zef. 3:9.

9. Drei hmekuje hi la itre ka troa trotrohnine la Tusi Hmitrötr? (Luka 10:21)

⁹ Hetre ketre aqane mama la inamacane i Iehova. Hnei Iehova hna upe la itre atr troa cinyanyine la Trengewekë i Nyidrë matre tro hmekuje hi la itre atr ka ipië a trotrohnin. (E jë la Luka 10:21.) Alanyim la itre ka e la Tusi Hmitrötr. Önine la ketre ka qejepengöne la Tusi Hmitrötr ka hape, ketre itusi lai “hna e hnei nöjei atr, nge hna thele fe troa trotrohnin.” Ngo itre atr ka ipië hmekuje hi la ka trotrohnine hnyawa me trongëne la itre ini.—2 Kor. 3:15, 16.

10. Nemene la ketre aqane amamane Tusi Hmitrötr la inamacane i Iehova?

¹⁰ Hane hi la ketre aqane mama la inamacane i Iehova e hnine la Tusi Hmitrötr. Jëne la Tusi Hmitrötr, Iehova a inine la ka alanyim, ngo Nyidrëti fe a ini së isa ala cas. Ame la easa e la Tusi Hmitrötr, drenge hi së la ihnimi Iehova. (Is. 30:21) Hna hane kö traqa koi epun la ewekë celë? Epuni a ithele e hnine la Tusi Hmitrötr, nge öhne ju hi epun la xötr ka ihmeku hnyawa memine la hnei epun hna melën. Eje hi, hna cinyanyine la Tusi Hmitrötr kowe la itre milio lao atr. Ngo hnauëne kö laka, ej a qatrenge la itre eamo ka nyipiewekë palahi enehila, nge ka ihmeku memine la itre aja së isa ala cas? Ke Iehova la Atrekë Ewekën nge ka pë ifegon la inamacane i Nyidrë.—2 Tim. 3:16, 17.

11. Nemene la ka amamane ngöne la aqane cinyanyine la Tusi Hmitrötr ka hape, tha ka ië hna hnime kö Iehova?

¹¹ Ame la ketre thiina ka tru i Iehova ke, ene la meköt. (Deu. 32:4) Ame la atr ka meköt ke, tha ka ië hna hnime kö. Matre tha ka ië hna hnime kö Iehova. (Itre hu. 10:34, 35; Rom. 2:11) Celë hi ka mama ngöne la aqane cinyanyine la Tusi Hmitrötr. Eje hi, ame la 39 lao pane itus ne la Tusi Hmitrötr, ke hna cinyanyine ngöne la qene Heberu, kolo qene lapa ne la itre hlue i Akötresie ekö. Ngo ame hë lo ijin ne la itre pane keresiano, nyimutre la itre atr ka qene Geres. Celë hi matre hna cinyanyine pë hë la 27 lao itus tixenuë ne la Tusi Hmitrötr ngöne la qene lapa cili. Tha ajane kö Iehova troa mama la Trengewekë i Nyidrë ngöne hi la ca qene lapa. Ame la 8 miliar lao atr ngöne la fen enehila, ke ka ithanatane la nyimu qene lapa. Tro la itre atre cili a atre Iehova tune kaa?

12. Kola eatre tune kaa la hna perofetan hnei Daniela 12:4 ngöne la itre drai ne la pun?

¹² Öni Iehova jëne Daniela perofeta ka hape, ame ngöne la itre drai ne la pun, tro la itre atr a trotrohnine la nyipi “inamacan” hna qatreng e hnine la Tusi Hmitrötr. (E jë la Daniela 12:4.) Hna eatr la hna perofetane celë, jëne la hna ujën me fejan Tusi Hmitrötr memine la itre xaa itusi së. Ame enehila, Tusi Hmitrötre hi la itus hna ujëne me fejan atrune hune la itre xaa itus. Ka tru thupene catr la itre Tusi Hmitrötr hna salemën ngöne la itre magazë. Ngo hnene la organizasio i Iehova hna ujën apexejen maine sine la Tusi Hmitrötr koi 240 lao qene lapa, me thawa kowe la nöjei atr. Celë hi matre kola kapa “la maca ka loi ne la Baselaia” hnene  la itre atr qa ngöne la nöjei nöj qëmeken troa traqa la pun. (Mat. 24:14) Aja i Iehova, Akötresie ka meköt, tro la nöjei atr a atre Nyidrë jëne la Tusi Hmitrötr. Nge tru catr la ihnimi Nyidrë koi së isa ala cas.

13. Kola mama tune kaa la ihnimi Iehova e hnine la Tusi Hmitrötr? (Ioane 21:25)

¹³ Tusi Hmitrötre fe a amamane la thiina ka sisitria i Akötresie, ene la ihnim. (1 Ioane 4:8) Ame e hnine la Tusi Hmitrötr, hnei Iehova hna amë hi la itre ithuemacanyi ka troa xatua së troa imelekeu me Nyidrë, me mele madrin, me kapa la mele ka pë pun. Ngo pine laka, tru la ihnimi Nyidrë, hnei Nyidrë hna tuluthe hi la itre ithuemacanyi hna hamë së, ke tha ijiji së kö troa kapa asë itre ej.—E jë la Ioane 21:25.

14. Nemen la ketre aqane mama la ihnimi Iehova e hnine la Tusi Hmitrötr?

¹⁴ Ame la ketre aqane mama la ihnimi Iehova e hnine la Tusi Hmitrötr, ke ngöne la aqane ujë i Nyidrë koi easë. Tha Nyidrëti kö a musinëne la mele së. Aja i Nyidrëti pe tro sa atreine xomi ini qa ngöne la itre hna melën e hnine la Tusi Hmitrötr, me itre hna perofetan me itre eamo. Celë hi lai ka upi së troa hnimi Iehova me drengethenge Nyidrë hnene la hni së ka pexej.

15. (a) Nemen la ka amaman ka hape, ka tru koi Iehova la itre ka e Tusi Hmitrötr? (b) Ame ngöne la iatr, nemene la hna lapa mekun hnene la nekönatre jajiny me trejin trahmany me trejine föe ka qatre hë? (Gen. 39:1, 10-12; 2 Ite jo. 5:1-3; Luka 2:25-38)

¹⁵ Tusi Hmitrötr a amaman ka hape, ka tru koi Iehova la itre atr. Eje a qaja la itre  hna melën ka amamane la aliene la hni ne la itre atr me itre aja i angatr. Trotrohni angatre hi së ke itre atre “ka tu së hi, nge casi hi la itre aliene hni së” me angatr. (Iako. 5:17) Ketre, ame la easa öhne la aqane ujë i Iehova kowe la itre atr ka tu së, ke easë hi lai a trotrohnine laka, “ka nyipi menyike la ihnimi i Iehova nge ka iutipi.”—Iako. 5:11.

16. Nemen la hna ini së göne la aqane ujë i Iehova kowe la itre atr ka kuca la ngazo? (Isaia 55:7)

¹⁶ Tusi Hmitrötr a amaman la ketre aqane hnimi së hnei Iehova. Eje a qaja ka hape, tha tro kö Iehova a nuetriji së, e hne së hna kuca la ketre ewekë ka ngazo. Hna anyimua akötrë Iehova hnene la angetre Isaraela, ngo ame la angatr a nyipi ietra, ke hnei Nyidrëti hna nue la itre ngazo i angatr. (E jë la Isaia 55:7.) Hnene fe la itre pane Keresiano hna öhne la ihnimi Iehova. Jëne la uati hmitrötr, hnei Paulo aposetolo hna qaja kowe la itre trejin troa “nue hnyawane” la ngazo me akeukawane la nekötrahmany ka ietrane la ngazo i angeic. (2 Kor. 2:6, 7; 1 Kor. 5:1-5) Ketre ewekë lai nyine haine laka, tha Iehova kö a nuetrij la itre hlue i Nyidrë la angatr a tria! Nyidrëti pe a xatua angatr, me haji angatr me aijijë angatre hmaca troa nyisinee i Nyidrë. Celë fe hi la aqane ujë i Nyidrëti kowe la itre ka ietra enehila.—Iako. 4:8-10.

17. Pine nemene matre ketre ahnahna ka tru la Tusi Hmitrötr?

¹⁷ Hnei Iehova hna hamë së la ketre ahnahna ka tru, ene la Tusi Hmitrötr. Pine nemen matre ka ketrepengöne kö la Trengewekë i Nyidrë? Ke tune la hne së hna ce wang, ej a amamane la inamacan, la meköt me ihnimi Nyidrë. Ej a amamane laka aja i Iehova tro sa atre Nyidrë me nyisinee i Nyidrë.

18. Tro sa amamane tune kaa la ole së kowe la “ahnahna” i Akötresie, ene la Tusi Hmitrötr?

¹⁸ Tha ajane kö së troa wangacone la “ahnahna” cili, ene la Tusi Hmitrötr. (Iako. 1:17) Celë hi matre loi e tro palahi sa olene koi Iehova la hna hamë së la ahnahna cili. Tune kaa? La easa e me lapa mekun ej. Xecie koi së laka tro la Atrekë Ewekëne la Tusi Hmitrötr a amanathithine la itre trengecatre së troa “ate Akötesie.”—Ite edomë 2:5.