1. Saide ai bigi gii taki Yehofa gi wa Beibel?

 AI BIGI gi u te ye, taki Yehofa gi wa Beibel. Den leli di we fende aini a Wowtu fi en, e yeepi wi aini a ten ya fu sabi san u mu du te wi abi booko-ede. Boiti dati, a gi u wan moin howpu gi a ten di e kon. Ma san moo pelensipali, a taki a Beibel e yeepi u fu kon sabi den manii fu Yehofa. Te we teke ten pakisei den manii di Yehofa abi, wo moo lobi en. A sani ya o meke u wani toon bun mati anga en tu.​—Ps. 25:14.

2. San a wantu fasi fa Yehofa be e taki anga sama?

² Yehofa wani u sabi en. Neen meke te a be wani gi a foluku fi en wan bosikopu, a be e meke den deen efuso kisi fisyun. Son yuu a be e meke engel taki anga den tu (Num. 12:6; Toli 10:3, 4). Ma kow taki den deen, den fisyun, anga den bosikopu di den engel be e tyai á be sikiifi aini a Beibel, wa be o poi sutudeli den. Neen meke Yehofa meke wantu man sikiifi san a wani u sabi poti ‘aini wan buku’ (Yel. 30:2). Gadu nai meke fowtu, neen meke u sa biibi taki a fasi fa ai taki anga wi aini a ten ya o yeepi u tuutuu.​—Ps. 18:30.

3. San Yehofa du fu kibii a Beibel? (Yesaya 40:8)

³ Leisi Yesaya 40:8. A omen dunsu yali kaba sama e fende wini fu den sani di sikiifi aini Beibel. Te den wooko anga san Beibel e taki, ala yuu sani e waka bun gi den. Ma fa a du kon taki den be poi fende wini fu den leli fu Beibel? Fosi a meti buba tapu a Beibel be sikiifi. Ma aa be e tan langa fosi a poli. Neen meke den fosi bukulolo di Beibel be sikiifi a den tapu á de moo. Ma Yehofa solugu taki  sama meke kopi fu den bukulolo ya. Winsi fa den sama di be meke kopi fu a Beibel be abi sondu, toku den be sikiifi sani pilisisi enke fa den de. Wan ondoosukuman e taki fu den Hebrew buku fu Beibel taki: ‘Nawan taa buku sama sikiifi finifini so enke Beibel.’ Enke faw si, da a Beibel be sikiifi a sani tapu di be e poli gawgaw. Den sama di be e meke kopi fu a Beibel be abi sondu tu. Ma toku u sa biibi taki den sani di we leisi aini Beibel, a Yehofa pakisei, bika neen meke sama sikiifi en.

4. San wo luku aini a artikel ya?

⁴ ‘Ala bun sani anga ala sani di naabi fowtu’ komoto a Yehofa (Yak. 1:17). A Beibel a wan fu den moo gaan kado di Yehofa gi u. Te wan sama gii wan kado, a sani ya e soi taki a sama di gii a kado sabi i bun. A sabi san a den sani di yu abi fanowdu. Na aseefi sani ya u sa taki tu fu a sama di gi wi a Beibel. A omen sani fu Yehofa we leli te we ondoosuku a Beibel. We leli taki a sabi u. A sabi san a den sani di wi abi fanowdu tu. Aini a artikel ya, wo poti pakisei a dii manii fu Yehofa. Wo luku san u sa leli fu a koni fi en, a fasi fa ai koti kuutu, anga a lobi fi en. Kow luku fosi san Beibel e leli u fu a koni fu Yehofa.

5. San a wan fasi fa Beibel e soi a koni fu Yehofa?

⁵ Yehofa sabi taki wi abi den leli fi en fanowdu. Te we leisi Beibel, we si taki ná pikin koni Yehofa koni. Den leli fi en abi kaakiti, den poi kengi sama libi. Di Mosesi sikiifi den fosi buku fu Beibel, a taigi den Islayelisama taki: ‘Wa mu si den sani di mi e taigi u enke soso sani, bika den o meke u tan a libi’ (Deit. 32:47). Den sama di e meke moiti fu du sani enke fa Beibel taki e piisii. Den abi wan moo bun libi tu (Ps. 1:2, 3). A senten Beibel sikiifi, ma toku den leli di de aini poi kengi sama libi. Efii go a jw.org na a pisi di den e kai ‘Beibel e kengi sama libi’, i sa fende toli fu sowan 50 sama di Beibel yeepi fu kengi den libi. Den be poi kengi a fasi fa den be de fosi, fu di a Beibel e ‘wooko aini den sama di e biibi’.​—1 Tes. 2:13.

6. Saide u sa taki a Beibel á de enke den taa buku?

⁶ Nawan taa buku á de enke a Beibel. Saide u sa taki a sani ya? Bika Yehofa, a Sama di abi a Beibel abi makiti. Boiti dati, ná pikin koni a koni. Son buku di sama e leisi aini a ten ya, den sama di be sikiifi den á de a libi moo. Te a ten kengi, den nai poi wooko anga den sani di sikiifi aini den buku ya moo. Ma aa de so anga a Beibel. Na ala yuu u sa wooko anga den leli di de aini. Winsi a ten kengi seefi, toku a omen wini sama e fende te den e wooko anga den leli fu Beibel. Efu we leisi Beibel, da u teke ten pakisei san u leisi, Yehofa o gi wi a santa yeye fi en fu yeepi u fu wooko anga den sani di u leli (Ps. 119:27; Male. 3:16; Heb. 4:12). Yehofa e angii fu yeepi u. Neen meke u mu e leisi Beibel ala dei.

7. Fa a Beibel be e yeepi a foluku fu Gadu fu libi na a wan aini a ten di pasa?

⁷ Wan taa fasi fa Beibel e soi taki Yehofa koni, a taki a be e yeepi a foluku fu Gadu a fosi fu libi na a wan. Di den Islayelisama be go aini a Paamisi Kondee, a omen pisi fu a kondee den be e tan. Son wan fu den be toon fisiman, taawan be e paandi guluntu, sii anga alisi. Efu  wan Islayelisama be e tan a wan taa pisi fu a Paamisi Kondee, a makiliki a be sa feegete den taa Islayelisama di e tan a wan taa se. Ma Yehofa be seeka sani fu den Islayelisama be sai miti anga denseefi. Wan fu den okasi ya a te den be e kon makandaa fu leisi a Wowtu fu Gadu (Deit. 31:10-13; Neh. 8:2, 8, 18). Pakisei fa wan Islayelisama be sai fii te a be go a Yelusalem. A be e si taa Islayelisama di e dini Yehofa tu, winsi fa den be e tan a wan taa pisi fu a kondee. A so Yehofa be e yeepi den fu libi na a wan. Bakaten di a Kelesten kemeente be sete, a omen Kelesten be de aini di be e taki taa tongo. Son wan fu den a sama di be abi balinen. Son wan be gudu, taawan a be pootiman. Ma fu di den be lobi a Wowtu fu Gadu, meke den be poi dini Yehofa na a wan. Ala den taa sama di be e toon Kelesten, a den taa baala anga sisa be e yeepi den fu fusutan a Wowtu fu Gadu. Boiti dati, te den be kon makandaa a sani ya be e yeepi den fu dini Yehofa enke fa a wani.​—Toli 2:42; 8:30, 31.

8. Fa a Beibel e yeepi a foluku fu Gadu aini a ten ya fu libi na a wan?

⁸ Yehofa e leli a foluku fi en aini a ten ya ete. Den sani di ai leli wi aini Beibel e yeepi u fu libi na a wan. Ala den sani di Yehofa wani u sabi, sikiifi aini a Beibel. Ala wiki a foluku fu Gadu e komakandaa.  Boiti dati, we abi kelen komakandaa anga konkelesi. Te u de a den komakandaa ya, we yee fa den baala e taki fu a Wowtu fu Gadu. Den e yeepi u fu fusutan en tu. A Beibel a wan fu den moo pelensipali sani di Yehofa e koboloiki fu yeepi a foluku fi en fu ‘dini en makandaa’.​—Sak. 3:9.

9. Sowtu manii u mu abi efu u wani fusutan a Beibel? (Lukasi 10:21)

⁹ Luku wan taa toli di e soi taki Yehofa koni tuutuu. Na ala se fu goontapu sama e leisi Beibel, ma a nà ala sama e fusutan san sikiifi aini. Bika a sama di abi sakafasi wawan Yehofa sikiifi a Beibel gi. Neen meke a den wawan poi fusutan en. (Leisi Lukasi 10:21.) Wan koniman taki sama e leisi Beibel moo iniiwan taa buku. Te den e leisi Beibel den e moo poti pakisei neen moo enke te den e leisi wan taa buku. Ma a den sama di abi sakafasi wawan e meke moiti fu fusutan san Beibel e taki. A den wawan e meke moiti fu wooko anga san den leli tu.​—2 Kor. 3:15, 16.

10. San a wan taa fasi fa Beibel e soi wa koni fu Yehofa?

¹⁰ Wan taa fasi de tu fa Beibel e soi wa koni fu Yehofa. A nai leli wi enke a foluku fi en namo, ma ai poti pakisei a ibiiwan fu u. Boiti dati, ai gi ibiiwan fu u taanga-sikin. Te we leisi a Wowtu fu Gadu, we si taki Yehofa e poti pakisei aw tuutuu (Yes. 30:21). Kow taki yu abi wan polobelema, di i leisi wan pisi fu Beibel, i be e fii enke a yu a pisi ya sikiifi gi. A tuu, a omen sama poi fusutan Beibel, bika a fasi fa a sikiifi makiliki fu fusutan. Fa a du kon taki den leli fu Beibel a pilisisi san yu abi fanowdu? Bika a sama di abi a Beibel, na a moo koni sama fu hemel anga goontapu.​—2 Tim. 3:16, 17.

11. Fa Gadu soi taki a nai paati bee di a be meke sama sikiifi Beibel?

¹¹ Beibel e soi u taki wan fu den taa manii fu Yehofa na a kuutu di ai kuutu sani a wan letifasi (Deit. 32:4). Wan sama di e kuutu sani a wan letifasi nai paati bee. Yehofa seefi nai paati bee (Toli 10:34, 35; Rom. 2:11). We si a sani ya te u luku a fasi fa a Beibel be sikiifi. A be sikiifi aini omen tongo di den sama fu a ten de be e fusutan. Den fosi 39 buku fu Beibel be sikiifi aini Hebrewtongo, wan tongo di a foluku fu Gadu be e fusutan bun. Na a ten fu den fosi Kelesten, a Giikitongo gaanse sama be e taki. Neen meke den lasiti 27 buku fu Beibel be sikiifi aini Giikitongo. Yehofa á be wani a Wowtu fi en sikiifi aini wan tongo namo, bika den miliyunmiliyun sama di de a goontapu nownow a omen sowtu tongo den e taki. Ma fa den somen sama ya o kon sabi Yehofa?

12. Fa a polofeititoli di sikiifi a Daniyeli 12:4 e kon tuu aini a ten ya?

¹² Yehofa be taigi polofeiti Daniyeli taki na a ten fu a kaba, ‘a omen sama’ be o kon sabi ‘den tuu toli’ di de aini Beibel. Den be o fusutan den tu. (Leisi Daniyeli 12:4.) Yehofa seeka sani fu meke buku, felon, anga taa sani di e yeepi sama fu fusutan den leli fu Beibel. Nawan taa buku sama poti aini taa tongo enke a Beibel. Boiti dati, neen na a buku di moo paati a hii goontapu. Son yuu den Beibel di den e seli a wenkii ná pikin dii den dii. Ma a foluku fu Yehofa poti a hii Beibel efuso son pisi fi en aini moo enke 200 tongo. Iniiwan sama sa fende wan Beibel sondee fu a pai. A bakapisi fu a sani ya a taki ala  sama ‘o yee a bun nyunsu fu a Kownukondee’ fosi a kaba doo (Mat. 24:14). Yehofa, a Gadu fu u di nai paati bee, wani gi ala sama a okasi fu leli sabi en te den e leisi Beibel, bika ná pikin lobi a lobi u.

13. Fa Beibel e soi taki Yehofa lobi u? (Yohanisi 21:25)

¹³ Beibel e soi u taki a moo pelensipali manii fu Yehofa a lobi (1 Yoh. 4:8). Pakisei den sani di Yehofa meke sama sikiifi aini Beibel. A ná den sani di wi abi fanowdu fu toon en mati namo a meke sama sikiifi. A meke den sikiifi tu san u mu du fu piisii anga san u mu du fu fende teego libi aini a ten di e kon. Yehofa á meke sama sikiifi sani aini Beibel di u naabi fanowdu. A fu di a lobi u meke a du a sani ya.​—Leisi Yohanisi 21:25.

14. San a wan taa fasi fa Beibel e soi taki Yehofa lobi u?

¹⁴ Wan taa fasi fa Beibel e soi taki Yehofa lobi u, na a begi di u poi begi en. Yehofa poti weiti aini Beibel di e soi u san u mu du. Ma aa meke weiti fu ala pikinpikin sani di we du. Ma den ondoofenitoli, den polofeititoli, anga den taa leli aini Beibel, e yeepi u fu teke bun bosoloiti. Den sani ya e yeepi u fu moo lobi Yehofa anga fu du sani enke fa a wani.

15. (a) Fa Beibel e soi taki Yehofa e booko en ede anga u? (b) Enke fa a fowtow e soi, da sowtu toli aini Beibel a pikin meisyo, a baala, anga a gaandi sisa e sidon pakisei? (Gen. 39:1, 10-12; 2 Kow. 5:1-3; Luk. 2:25-38)

¹⁵ Beibel e soi u taki ná pikin booko Yehofa e booko en ede anga u. Saide u sa  taki a sani ya? Bika Beibel lai anga toli di e soi fa sama be e fii. U poi fusutan fa den sama aini Beibel be e fii, bika den a sama ‘di be abi denseefi fii di wi abi’ (Yak. 5:17). Ma san moo pelensipali, a taki te we luku a fasi fa Yehofa be e libi anga den sama fu fositen, da we si taki ‘Yehofa lobi sama tuutuu. A abi tyali-ati tu.’​—Yak. 5:11.

16. San Beibel e leli u fu Yehofa te we luku toli fu sama di be meke fowtu? (Yesaya 55:7)

¹⁶ Beibel e soi u wan taa fasi fa Yehofa e soi taki a lobi u. Ai soi u taki Yehofa nai gwe fika u te u meke wan fowtu. Na ala yuu den Islayelisama be e taangayesi Yehofa. Ma te den be soi taki a sani di den du be e hati den tuutuu, Yehofa be e gi den paadon. (Leisi Yesaya 55:7.) Den fosi Kelesten be sabi taki Yehofa lobi den tuutuu. A santa yeye be meke apostel Pawlesi gi den baala anga sisa taanga-sikin fu gi wan man di be du wan gaan sondu ‘paadon anga fu toosutu’ en, bika a man ya soi taki a sondu di a be du e hati en tuutuu (2 Kor. 2:6, 7; 1 Kor. 5:1-5). A sani ya e soi taki Yehofa nai gwe fika den sama di e dini en te den meke wan fowtu. Ai soi den taki a lobi den. Ai soi den tu fa den mu du sani taa fasi. Boiti dati, ai kai den fu den anga en toon mati baka. Na a sani ya Yehofa e paamisi ala den sama aini a ten ya di e soi taki a sondu di den be du e hati den tuutuu.​—Yak. 4:8-10.

17. Saide a Beibel a wan kado di Yehofa gi u?

¹⁷ Yehofa gi u wan moin kado. Saide a Wowtu fi en pelensipali gi u? Enke faw si aini a artikel ya, da a Beibel e soi u taki Yehofa koni, ai kuutu sani a wan letifasi. Boiti dati, ai soi u taki ná pikin lobi Yehofa lobi u. Beibel e soi u taki Yehofa wani u kon sabi en. A wani wi anga en toon mati tu.

18. Faw sa soi taki we teke a Beibel, a kado di Yehofa gi u fu bigi?

¹⁸ Noiti wa mu feegete taki Beibel a ‘wan kado’ di Yehofa gi u (Yak. 1:17). Neen meke u mu tan soi taki ai bigi gi u taki Yehofa gi u a kado ya. We du a sani ya te we leisi Beibel anga te we teke ten pakisei san u leisi. Efu we du den sani ya, u sa biibi taki Yehofa o belesi a moiti di we meke. Boiti dati, ‘wo kon sabi Gadu.’​—Odo 2:5.