1. Warom pist tuu petanklich weeche ti Piipel?

 MEYER sin aarich petanklich tsu Yeehoowa weeche ti Piipel. In te Piipel, kept uns Kot kluuche aanreete woo khene uns helfe mit te propleeme hayt tsu taach um keen. Tee kept uns aach een wunerlich hofnung fer te futuer. Un noch wichticher: Yeehoowa penutst ti Piipel fer uns tëm sayn kwaliteete tsayche. Wën mer aan tëm sayn xeene kwaliteete triwer noo tenke, is unser hërts tiif aan kekrif. Meyer sin aach uf kemuut een ticht fraayntxaft mit tëm ëntwikele. (Psal. 25:14)

2. Was fer unerxiitliche aate hot Yeehoowa penutst fer sayn pexeet fer ti mënxe kepe?

² Yeehoowa wil hon tas ti layt tëm khëne lërne. Friier, hot Yeehoowa wisyoone un treem fer etliche fon sayn tiiner kep. Tee hot aach engele penutst fer sayn pexeet fer ti layt nëme. (Nuu. 12:6; Aph. 10:3, 4) Awer es weyer unmeechlich tiise treem, wisyoone un pexeet fon engele xtutiire wën se net uf kexrip weyere. Tes weeche hot Yeehoowa mëner penutst fer “uf een puuch” xraype was eyer wolt hon tas mer wise solte. (Yee. 30:2) Meyer khene uns sicher sin tas tiise aat fer mit uns fertseele nutslich un kuut is, wayl “te weech fom woere Kot is perfekt”. (Psal. 18:30)

3. Wii hot Yeehoowa sich sicher kelos tas ti Piipel pis hayt hale teet? (Isaiias 40:8)

³ Lees Isaiias 40:8. b Torich xon tausente yoore, tuut Kot sayn Wort kluuche oryentiirunge fer troye mëner un fraae kepe. Wii is tas meechlich? Tas is een kuut frooch, wayl ti Piipel een lang tsayt tsurik kexrip kep is uf materyaale woo net lang tsayt kehal hon. Tes weeche, hayt, hon mer khee  eene fon te orixinaale hantxrifte. Awer Yeehoowa hot sich sicher kelos tas ti layt kopye fon te hayliche tekste mache teete. Opwool ti layt woo ti kopye kemacht hon imperfekt waare, hon se fiil uf kephast in sayn aarwayt. Tsum payxpiil, een kelërnt persoon hot iwer ti Hepreeyxe Xrifte kexrip: “Meyer sin uns sicher: es kept khee aner friirixe puuch woo soo kenau ap kexrip kep is.” Soo, khene mer klaape tas was mer hayt leese sin ti ketanke fon sayn Autoer: Yeehoowa.

4. Iwer was tuun mer in tiise artikel xpreche?

⁴ Yeehoowa kept uns “yeete kuute un perfekte kexenk”. (Tya. 1:17) Ti Piipel is eene fon te peste kexenke woo Yeehoowa uns kep hot. Een kexenk tsaycht fiil iwer ti persoon woo tas kept; es tsaycht wii fiil se uns un unser neetichkheete khënt. Tas selwiche pasiirt mit te Piipel. Wën mer tiise kexenk noo kuke, lërne mer fiil iwer Yeehoowa. Meyer lërne tas eyer uns un unser neetichkheete kuut khënt. In tiise artikel, siin mer was ti Piipel uns in lërnt iwer 3 fon Yeehoowa sayn kwaliteete: sayn kluucheet, sayn kerechtichkheet un sayn liip. Fer se aan fange, wole mer xpreche iwer wii ti Piipel pewayst tas Kot kluuch is.

5. Was is een aat wii ti Piipel Kot sayn kluucheet tsaycht?

⁵ Yeehoowa wees tas mer sayn kluuche aanreete prayche. Un sayn kexenk fer uns, ti Piipel, is fol kluucheet. Ti aanreete fon Kot sayn Wort pringe kuute resultaate fer ti layt. Ti Piipel tuut wërklich leepe ënere. Wii Mooses ti eyerste piicher fon te Piipel kexrip hot, hot eyer fer Kot sayn folek, ti israeliiter, kesaat: “Tii sin khee leyere wërter fer aych, awer tii petayte leepe fer aych.” (Teut. 32:47) Tii woo ti Xrifte aan keheert hon, khonte een froo leepe hon. (Psal. 1:2, 3) Opwool Kot sayn Wort een lang tsayt heyer kexrip kep is, hot se noch ti kraft fer ti layt sayn leepe ferpesere. Tsum payxpiil: in te sesyoon “Ti Piipel tuut leepe ënere”, im site jw.org, finst tuu mee wii 10 payxpiile fon layt hayt tsu taach woo sayn leepe ferpesert hon, wayl se ti aanreete fon te Piipel noo kang sin. (1 The. 2:13)

6. Warom khene mer saan tas khee aner puuch soo wii ti Piipel is?

⁶ Khee aner puuch is soo wii ti Piipel. Warom khene mer tas saan? Wayl te Autoer fon te Piipel, Yeehoowa, is ale mechtiche, eewich un nimant is kluucher wii tee. Fiile piicher tuun lënger hale wii tas leepe fon sayn autoore; awer mit te tsayt wëre sayn aanreete net mee nutslich. Im keeche teel, ti kluuche funtamente in te Piipel sin eewich. Tii helfe ti layt, ekaal ti tsayt woo se leepe. Wën mer tiise hayliche puuch leese un too triwer noo tenke, tuut sayn Autoer te hayliche kayst penutse fer uns helfe se mërke wii mer ti kluuche aanreete fon te Piipel in unser leepe aan wëne khene. (Psal. 119:27; Mal. 3:16; Hep. 4:12) Yawool, te Autoer fon te Piipel wil tich wërklich helfe. Tas muut uns uf ti Piipel imer leese!

7. Wii hot ti Piipel Kot sayn folek keholef eenich plaype in te friirixe tsayte?

⁷ Es kept was aneres woo tsaycht tas ti Piipel Kot sayn kluucheet hot: tii helft Kot sayn folek eenich sin. Wii ti israeliiter im Ferxprochne Lant rin kang sin, hon se in unerxiitliche pletse kewoont. Etliche sin fixmëner kep; anere, pauer; un noch anere hon fiitsaych ketsoo. Es weyer laycht fer een israeliit noo lose se tenke wii ti israeliiter fon anere pletse traan waare. Awer Yeehoowa hot kesaat tas ti israeliiter solte sich in unerxiitliche tsayte samele fer ti leesung un ausleyung fon tëm sayn Wort  heere. (Teut. 31:10-13; Nee. 8:2, 8, 18) Xtel tich mool foer wii een troy israeliit sich kexpiirt hot wii eyer in Yeruusalem rin kang is un milyoone fon anere aanpeeter kesiin hot, woo fon yeete ek fom lant khom sin. Soo hot Yeehoowa sayn folek keholef eenich plaype. Xpeeter, hat ti kristlich kemaynt mëner un fraae woo fiile unerxiitliche xprooche fertseelt hon. Etliche fon tëne waare wichtiche layt; anere, keweenliche layt. Etliche waare raych; anere, aarm. Awer wayl se al ti Xrifte keliipt hon, waare se eenich in sayn aanpeetung tsum woere Kot. Tii woo kriste kep sin, khonte Kot sayn Wort ferxteen ploos mit te hilef fon anere kriste un wën se sich mit tëne fersamelt hon. (Aph. 2:42; 8:30, 31)

8. Wii tuut ti Piipel Kot sayn folek helfe eenich plaype hayt tsu taach?

⁸ Unser kluuche Kot tuut wayter ti Piipel penutse fer sayn folek in lërne un eenich hale. Ti kanse woerheete iwer Yeehoowa, woo mer soo fiil liipe, khome fon te Piipel heyer. Meyer tuun uns reeklich fersamele in te kemaynt un in te konkrëse. Tat, heere mer ti Piipel kelees un aus keleet wëre. Tes weeche is ti Piipel een wichtich ferament woo Yeehoowa penutst fer sayn folek helfe tëm “in eenichkheet tiine”. (Sof. 3:9)

9. Was fer kwaliteet mise mer hon fer ti Piipel sayn pexeet ferxteen? (Lukas 10:21)

⁹ Kuk mool een aner pewaysung fon Yeehoowa sayn kluucheet. Tee hot kemacht tas teele fon te Xrifte kexrip weyere in een aat  woo ploos ti teemuutiche layt se ferxteen khente. (Lees Lukas 10:21.) c Een kelërnt persoon hot kesaat: “Khee aner puuch is soo fiil kelees wii ti Piipel. Un khee aner puuch is mit soo fiil acht kelees wii ti Piipel.” Layt uf te kans welt leese ti Piipel. Awer ploos ti teemuutiche layt khene sayn wërter wërklich ferxteen un aan wëne was se saat. (2 Kor. 3:15, 16)

10. Wii noch tuut ti Piipel Yeehoowa sayn kluucheet tsayche?

¹⁰ Meyer lërne iwer Yeehoowa sayn kluucheet, woo in te Piipel xteet, in noch een aner aat. Yeehoowa penutst ti Piipel net ploos fer uns wii een krup in lërne, awer aach fer yeete eene fon uns in lërne un treeste. Wën mer ti Piipel leese, khene mer mërke tas Yeehoowa sich mit yeete eene fon uns khimert. (Isa. 30:21) Wii ofts host tuu xon ti Piipel uf kemacht, wëns tuu een propleem hast, un een wersikel kefun host woo siits aus fer tich kexrip waar? Awer ti Piipel tuut milyoone layt aan krayfe. Wii khan ti Piipel soo fiil informatsyoone hon woo hayt phase un woo sin kraat was tuu praychst? Tas is meechlich ploos wayl te Autoer fon te Piipel ti kluuchst persoon fom Uniwërsum is. (2 Tim. 3:16, 17)

11. Wii hot Yeehoowa ketsaycht tas eyer khee sayt hoolt in te tsayt woo ti Piipel kexrip waar?

¹¹ Ti kerechtichkheet is een aner kwaliteet woo Yeehoowa hot. (Teut. 32:4) Een persoon woo kerecht is, tuut ofts khee sayt hoole un Yeehoowa is kraat soo. (Aph. 10:34, 35; Rom. 2:11) Meyer khene mërke tas Yeehoowa khee sayt hoolt, wayl ti Piipel kexrip kep is in te xprooche woo ti layt in tëne tsayt fertseelt hon. Ti eyerste 39 piicher fon te Piipel sin hauptseechlich in hepreeyx kexrip kep — ti xprooch woo Kot sayn folek laycht ferxteen khont. Awer in te tsayt fon te eyerste kriste, hon ti meyerste layt kreekix kexproch. Tes weeche waare ti letste 27 piicher fon te Piipel hauptseechlich in tiise xprooch kexrip kep. Yawool, Yeehoowa hot net kexikt tas sayn Wort in ploos een xprooch kexrip weyer. Awer hayt, kepts neekst 8 pilyoone layt uf te kans eyert un tii penutse fiile xprooche. Wii khene se al iwer Yeehoowa lërne?

12. Wii tuut Tanyël 12:4 sich erfiile in tiise letste taache?

¹² Torich te profeet Tanyël, hot Yeehoowa ferxproch tas, in te tsayt fom ën, teet “ti woere khëntnis”, woo in te Piipel xteet, “raychlich pekhant kepe” — es wil saan, fiile teete se ferxteen. (Lees Tanyël 12:4.) d Een tings woo fiile helft ti Piipel peser ferxteen, is tas ti Piipel un piiplixe puplikatsyoone sin iwersetst, puplitsiirt un aus keteelt fer fiile layt. Khee aner puuch is soo iwersetst un aus keteelt in te welt wii ti Piipel. Ti iwersetsunge fon te Piipel, woo fon te kexefte kemacht sin, sin als mool kans tayer. Pis hayt, hot Kot sayn folek ti kans Piipel orer teele fon tëne in mee wii 240 xprooche iwersetst; un yeete persoon khan een kopye kratis kriin. Tes weeche sin layt fon al ti natsyoone fon te eyert iwer ti “kuute notisye fom Raych” am lërne eep tas ën khomt. (Mat. 24:14) Unser kerechte Kot wil fer soo fiil layt wiis meechlich is ti xans  kepe fer tëm khëne lërne torich ti Piipel. Tee macht tas wayl eyer uns fiil liipt.

13. Warom khene mer saan tas ti Piipel Yeehoowa sayn liip tsaycht? (Yoohan 21:25)

¹³ Ti Piipel helft uns ferxteen tas Kot sayn kreest kwaliteet ti liip is. (1 Yo. 4:8) Tenk mool aan was Yeehoowa in te Piipel kelos hot un was eyer aus te Piipel kelos hot. Tee hot uns kep kraat was mer prayche fer een ticht fraayntxaft mit tëm hon, fer een froo leepe hayt hon un fer eewiche leepe im futuer kriin. Awer wayl Yeehoowa uns liipt, hot eyer uns net iwerlaat mit kleenichkheete woo mer net wise prayche fer tëm tiine. (Lees Yoohan 21:25.) e

14. Wii noch is Kot sayn liip taytlich weeche was in te Piipel xteet?

¹⁴ Yeehoowa tuut aach mit uns fertseele in een aat woo uns respekt tsaycht un tas pewayst aach tas eyer uns liipt. In te Piipel, kept eyer uns net een lang list fon reekle fer se kontroliire ales was mer im leepe mache. Xtats tas, tuut eyer woere kexichte, wunerliche profetsiie un nutsliche aanreete penutse fer uns helfe kuute ëntxlise mache. Soo tuut Kot sayn Wort uns uf muute tëm liipe un aan heere fom hërts aus.

15. (a) Wii tuut ti Piipel pewayse tas Kot sich mit uns khimert? (b) Im pilt, aan was fer piiplixe layt sin tas yung meetche, te yunge pruuter un ti elter xwester am triwer noo tenke? (Xee. 39:1, 10-12; 2 Khe. 5:1-3; Luk. 2:25-38)

¹⁵ Ti Piipel tsaycht tas Yeehoowa sich mit uns wërklich khimere tuut. Wii soo? Sayn Wort is fol kexichte fon layt woo mer ferxteen khene, wayl se ‘xpiirunge  hate kraat soo wii unseres’. (Tya. 5:17) Un tas haupste: wën mer siin wii Yeehoowa um kang is mit layt soo wii meyer, tuun mer taytlich ferxteen tas “Yeehoowa fiil hërtslich liip un parmhërtslichkheet hot”. (Tya. 5:11)

16. Was lërne mer iwer Yeehoowa wën mer in te Piipel leese iwer layt woo feeler kemacht hon? (Isaiias 55:7)

¹⁶ Ti Piipel tsaycht Yeehoowa sayn liip tsu uns in noch een aner aat. Kot sayn Wort lost uns sicher tas eyer uns net im xtich lose tuut wën mer feeler mache. Ti israeliiter hon noo un noo keeche Yeehoowa kesint. Noch soo, wën se sich hërtslich peroyt hon, hot Kot se fertsayt. (Lees Isaiias 55:7.) f Ti eyerste kriste wuste aach tas Yeehoowa se fiil keliipt hot. Kot hot te aphostel Phaul kelënkt se xraype tas ti priiter solte “fertsaye un treeste” eene man woo een xweyer sint pratikiirt hat, awer sich peroyt hot. (2 Kor. 2:6, 7; 1 Kor. 5:1-5) Wii xeen tas Yeehoowa sayn aanpeeter net ap kextos hot ploos wayl se feeler kemacht hon. Xtats tas, hot eyer se liiplich keholef, korikiirt un in kelaat fer sayn fraaynte noch mool sin. Kot ferxprecht tas selwiche mache fer al tii woo hayt een feele mache, awer sich wërklich peroye. (Tya. 4:8-10)

17. Warom is ti Piipel een wunerlich kexenk?

¹⁷ Yeehoowa hot uns eene xeene kexenk kep. Warom is tëm sayn Wort soo wunerlich? Wii mer kelërnt hon, tuut ti Piipel Kot sayn kluucheet, kerechtichkheet un liip tsayche. Tiise puuch pewayst tas Yeehoowa wil hon tas mer tëm khëne lërne un tas mer tëm sayn fraaynte wëre.

18. Wii khene mer tsayche tas mer petanklich sin fer Kot sayn kuute kexenk, ti Piipel?

¹⁸ Meyer wole uns nii ferkese tas Kot sayn Wort een kuute kexenk is. (Tya. 1:17) Soo wole mer wayter petanklichkheet weeche ti Piipel tsayche. Meyer khene tas mache wën mer sayn hayliche wërter leese un too triwer noo tenke. Wën mer uns too traan aan xtrenge, khene mer uns sicher sin tas sayn Autoer tuut uns seechne un mer tuun “Kot sayn khëntnis fine”. (Xpr. 2:5)