1. Ongwaye tji u nondangi kOmbeibela?

 EṰE tjiri tu nondangi ku Jehova Mukuru kokutupa Ombeibela. Okupitira mOmbeibela, eye u tu pa omaronga omawa nge tu vatera okutjinda omauzeu wetu ndino. Eye wina u tu pa omaundjiro omawa woruyaveze. Otjiṋa otjinanḓengu tjinene, Jehova wa ungurisa Ombeibela okuturaera ohunga novikaṋena vye ovingi. Otja tji matu ripurire kovikaṋena vye oviwa, omitima vyetu vi ṱunwa tjinene nu iho tji tjita kutja tu tumbuke popezu na Mukuru wetu mokukara noupanga ouwa ku na ye.—Eps. 25:14.

2. Jehova we ritjiukisa momiano viṋe pekepeke kovandu?

² Jehova u vanga kutja ovandu ve mu tjiwe. Morukapitaveze, eye we ritjiukisa omuini okupitira moturoto, ovirimunikise, nu nandarire wa ungurisa ovaengeli okutjiukisa ombuze ye kovandu. (Num. 12:6; Oviung. 10:3, 4) Eṱe katja tu tjiwa kutja oturoto twi, ovirimunikise mbi, nombuze okuza kovaengeli tjinangara kavi tjangerwe mOmbeibela. Ku nao, Jehova wa ungurisa ovarumendu ‘okutjanga membo’ imbi eye mbi ma vanga kutja tu tjiwe. (Jer. 30:2) Mena rokutja “ozondjito ze za pwa, tjiri,” eṱe tu nongamburiro kutja omuano we wokuhungira ku na eṱe omusemba nu mau tu vatere.—Eps. 18:30.

3. Omomuano uṋe Jehova ma tjita kutja Ombeibela i kare ko nga kundino? (Jesaja 40:8)

³ Lesa Jesaja 40:8. Embo ra Mukuru ra yenena okuyandja omuhunga kovarumendu novakazendu ovaṱakame oure wozombura ozengi. Hapo iho tja yenenisiwa vi? Otja tji matu tjiwa, Omatjangwa ya tjangerwe oruveze orukuru koviṋa mbyaavi yenene okukurupa, ku nao oviṋa ku vya tjangerwe ko rutenga kavi tji ko ndino. Posi ya Jehova wa tjita kutja pe kare oviherengururwa vyOmbeibela. Nandarire kutja ovandu mba herengurura Ombeibela kavari ohomonena, owo aave ungura nongengezero tjinene.  Otjotjihorera, omuhongwa umwe wa hungira ohunga nOmatjangwa wOtjiheberi na tja: “Eṱe tu nongamburiro kutja kapena embo rarwe ekuru nda yenena okuherengururwa momuano omukahu nao.” Ku nao nandarire kutja oro Embo nda tjangerwe oruveze orukuru koviṋa mbyaavi yenene okukurupa, nokutja ovandu mbe ri herengurura kavari ohomonena, eṱe matu yenene okukara nongamburiro kutja omambo nga tjangwa mOmbeibela ndino ye yandja oumune wOmuitjange ngu ri Jehova.

4. Matu kahungirira ku ye morupa ndwi?

⁴ Jehova ongu tu pa “otjiyandjewa atjihe otjiwa, notjipewa atjihe otjipwe.” (Jak. 1:17) Ombeibela i tjimwe tjotjiyandjewa otjiwa Jehova tje tu pa. Indu omundu tje tu pe otjiyandjewa, iho tji tu raisira kutja eye me tu tjiwa nawa nu ma tjiwa oviṋa mbi matu hepa. Imbo ouatjiri ohunga nOmuyandje wOmbeibela. Indu tji matu konḓonona otjiyandjewa ho, eṱe tu rihonga ovingi ohunga na Jehova. Eṱe tu rihonga omuano eye me tu tjiwa nawa nokutjiwa oviṋa mbi matu hepa. Morupa ndwi matu kahungirira komuano Ombeibela mu i raisa ovikaṋena vya Jehova vitatu mbi: ounongo we, ousemba we, norusuvero rwe. Rutenga ngatu katare komiano Ombeibela mu i raisa ounongo wa Mukuru.

5. Omomuano uṋe umwe Ombeibela mu i raisa ounongo wa Mukuru?

⁵ Jehova u tjiwa kutja tu hepa omaronga we omawa. Nu motjiyandjewa tje tu pa, Ombeibela, mwe ura ounongo we. Omaronga nge ri mOmbeibela ye vatera ovandu momuano omuwa. Ombeibela i rundurura omiinyo vyovandu. Indu omambo omatenga wOmbeibela tji ya tjangwa, Moses wa raera ovakarere va Mukuru Ovaisrael na tja: “Omambo nga tjinga aye he ri owomungandjo ku eṋe, nungwari owo omuinyo weṋu.” (Deut. 32:47) Imba mbaave ṱakamisa Omatjangwa aave yenene okuyorokera ouṋingandu mehupo. (Eps. 1:2, 3) Embo ra Mukuru ngamba ri nomasa wokurundurura omiinyo vyovandu nandarire kutja ra tjangwa ozombura ozengi nḓa kapita. Otjotjihorera, korungovi ndwi jw.org kehi yorupa ndwi “Ombeibela i rundurura omiinyo vyovandu,” ove mo kamuna ovihorera vyovandu vokombanda yo-50 mbi raisa kutja Ombeibela i nomasa ‘okuungura mu imba mbe kambura’ mo ndino.—1 Tes. 2:13.

6. Ongwaye tji matu yenene okutja Ombeibela ya panguka komambo warwe?

⁶ Kapena embo rarwe ndi ri tjimuna Embo ra Mukuru. Ongwaye tji matu tja nao? Mena rokutja Omutjange wOmbeibela Jehova Mukuru omunamasaaehe, eye u karerera, nu ounongo we kau vazewa. Omambo warwe omengi ye kayenda komurungu okulesewa nandarire kombunda ya indu omutjange womambo ngo tja ṱu, posi ya omaronga nge ri momambo ngo potuingi kaye ungurisiwa kombunda yanao. Nungwari, omirari mbi ri mOmbeibela ovyo vi ungura aruhe, nu vya yenena okuvatera ovandu moruveze orukuru nga ku nai. Otja tji matu lese Ombeibela nokuripurira ku imbi mbi twe rihongo, Jehova u ungurisa ombepo ye ondjapuke okutuvatera okumuna omuano mu matu yenene okuṱakamisa omaronga wOmbeibela mehupo retu. (Eps. 119:27; Mal. 3:16; Hebr. 4:12) Otjingaperi kutja, Omutjange wOmbeibela u nonḓero yokukuvatera. Tjiri otjiṋa ho matji sokukuhinga okulesa Ombeibela aruhe.

7. Omomuano uṋe Ombeibela mu ya wanisa ovakarere va Mukuru morukapitaveze?

⁷ Omuano warwe wapeke Ombeibela mu i raisa ounongo wa Mukuru, omokuwanisa ovakarere va Mukuru. Indu Ovaisrael tji va hita mEhi Ekwizikwa, owo va katura motuveze pekepeke. Tjiva va rira ovapate vomahundju, nu varwe vari ovaṱuta nu aave kunu. Ovaisrael mba turire morukondwa rumwe rwehi kaave ripurire  kOvaisrael ovakwao mba turire motukondwa twarwe twehi. Posi ya Jehova wa tjita kutja Ovaisrael ve kare notuveze tjiva okuworongana pamwe okuyekuzuva Embo ra Mukuru amari lesewa nokukahururwa. (Deut. 31:10-13; Neh. 8:2, 8, 18) Ripura uriri omuano Omuisrael omuṱakame maa fula indu tja vaza moJerusalem na munu ovakambure ovakwao ovengi okuza kotukondwa twarwe twehi. Momuano mbwi, Jehova wa vatera ovakarere ve okukara nombwaneno. Kombunda, indu ombongo yOukriste tji ya uta, pa ri ovarumendu novakazendu Ovakriste mbaave hungire omaraka omengi pekepeke. Nu tjiva vari ovandu ovananḓengu motjiwaṋa, nu varwe vari ovandu overisusuparise. Tjiva vari ovatumbe nu varwe vari ovasyona. Posi ya mena rokutja owo avehe va suverere Omatjangwa, owo aave rikotamene ku Mukuru watjiri mombwaneno. Imba mba rira ovakambure aave yenene okuzuva nawa Embo ra Mukuru nombatero yovakambure ovakwao nokuworongana pamwe.—Oviung. 2:42; 8:30, 31.

8. Omomuano uṋe Ombeibela mu i wanisa ovakarere va Jehova ndino?

⁸ Mukuru wetu onongo u kayenda komurungu okuhonga nokuwanisa ovakarere ve okupitira mOmbeibela. MOmbeibela mu nouatjiri auhe ohunga na Jehova, eṱe mbu matu hepa okutjiwa. Eṱe aruhe tu worongana pamwe pozombongarero zombongo, pomaworonganeno worukondwa na inga wotukondwa, okukazuva Omatjangwa amaye lesewa, amaye kahururwa nokuhungirirwa ko. Ku nao Ombeibela  otjiungurisiwa otjinanḓengu tjinene Jehova tje ungurisa okuvatera ovakarere ve ‘okukara nonḓuviro ku ye.’—Sef. 3:9.

9. Otjikaṋena tjiṋe tji matu hepa kutja tu zuve ombuze yOmbeibela? (Lukas 10:21)

⁹ Ngatu tare komuano warwe mu matu yenene okumuna ounongo wa Jehova. Eye wa tjita kutja otupa otuingi twOmatjangwa tu tjangwe momuano mbu mau yenene okuzuvakwa kovandu overisusuparise uriri. (Lesa Lukas 10:21.) Ovandu mouye auhe ve lesa Ombeibela. Omuhongwa umwe wa tja ovandu ovengi ve lesa Ombeibela “okukapita omambo warwe, nu ve i lesa nongengezero tjinene.” Posi ya owo mba overisusuparise uriri mbe zuva nawa nokuṱakamisa imbi mbi ri mOmbeibela.—2 Kor. 3:15, 16.

10. Omomuano uṋe warwe Ombeibela mu i raisa ounongo wa Jehova?

¹⁰ Eṱe tu rihonga ohunga nounongo wa Jehova mOmbeibela momuano warwe wina. Jehova u honga ovakarere ve avehe pamwe, posi ya wina u honga nokuhuhumiṋa auhe kourike wetu. Indu tji matu lese Embo ra Mukuru tu yenena okumuna kutja Jehova u rikendera ku auhe wetu. (Jes. 30:21) Indu tji u ri mouzeu, hapo ove wa rora okulesa Etjangwa nde ku ṱuna tjinene? Nungwari Ombeibela ya tjangerwa kutja ovandu ovengi ve i zuve. Omomuano uṋe Ombeibela mu i nondjivisiro ndji mo hepa, nandarire kutja oro Embo ekuru? Ihi omena rokutja Omutjange wOmbeibela Omundu onongo tjinene mevaverwa arihe.—2 Tim. 3:16, 17.

11. Omomuano uṋe Mukuru ma raisa kutja ke nondoorora indu Ombeibela tja i tjangwa?

¹¹ Ousemba otjikaṋena tjarwe tja Jehova. (Deut. 32:4) Omundu ngu raisa ousemba potuingi wina kakara nondoorora, nu Jehova ke nombangu. (Oviung. 10:34, 35; Rom. 2:11) Eṱe matu yenene okumuna kutja eye ke nombangu, indu tji matu tara komuano Ombeibela mu ya tjangerwe meraka ndaari hungirwa i yovandu ovengi oruveze ndwo. Omambo omatenga 39 wOmbeibela tjinene ya tjangerwe mOtjiheberi, ndaari eraka ndaari zuvakwa oupupu i yovakarere va Mukuru oruveze ndwo. Posi ya, meserewondo etenga O.Z., ovandu ovengi aave hungire Otjigrike, ku nao omambo 27 omasenina wOmbeibela ya tjangerwe meraka ndo. Jehova katyere kutja Embo re mari sokutjangwa meraka rimwe uriri. Ndino ku novandu ape omangete hambondatu kombanda yehi mbe hungira omaraka omengi. Omomuano uṋe ovandu ovengi mu mave rihongo ohunga na Jehova?

12. Omomuano uṋe Daniel 12:4 mu ri yenenisiwa momayuva omasenina nga?

¹² Okupitira momuprofete Daniel, Jehova wa kwizika kutja moruveze rwomaandero “ondjiviro youatjiri” ndji ri mOmbeibela “mai takavara.” Ovandu ovengi mave zuu ouatjiri wOmbeibela. (Lesa Daniel 12:4. b) Otjiṋa tjimwe tji tja vatera ovandu ovengi okuzuva Ombeibela, omena rokutja Ombeibela nomambo nga zikamena kOmbeibela ya torokwa, nokupirindwa, nokuhandjaurwa kovandu ovengi. Ombeibela eembo nda torokwa nokuhandjaurwa tjinene pomambo warwe mouye. Ozonganda nḓe pitisa Ombeibela povikando tjiva ze i randisa kondiru. Ovakarere va Jehova va toroka Embo ra Mukuru arihe poo motupa, momaraka wokombanda yo-240, nu omundu auhe ma yenene okumuna Ombeibela otjari. Mena ranao, ovandu woviwaṋa avihe ve rihonga “Ombuze Ombwa yOuhona” ngunda omaandero aye hi ye ya. (Mat. 24:14) Mukuru wetu omunausemba u vanga kutja ovandu ovengi ve kare noruveze okumutjiwa mokulesa Embo re. Iho omena rokutja eye we tu suvera atuhe tjinene.

13. Ongwaye tji matu yenene okutja Ombeibela i raisa kutja Jehova we tu suvera? (Johanes 21:25)

¹³ Ombeibela i tu vatera okutjiwa kutja otjikaṋena tja Jehova otjinenenene orusuvero. (1 Joh. 4:8) Tara ku imbi Jehova mbya yandjera kutja vi tjangwe mOmbeibela na imbi mbya isa kutja avi ha tjangwa mOmbeibela. Eye we tu pa imbi mbi matu hepa kutja tu kare noupanga ku na ye, ehupo eṋingandu nai, nokukamuna omuinyo waaruhe. Mena rokutja Jehova we tu suvera, eye we tu pa ondjivisiro ndji matu hepa uriri, nungwari ketu pere oviṋa mbi he ri ohepero.—Lesa Johanes 21:25.

14. Omomuano uṋe warwe Ombeibela mu i raisa kutja Mukuru we tu suvera?

¹⁴ Jehova wina u tu raisira kutja we tu suvera mokuhungira ku na eṱe momuano wondengero. MOmbeibela, eye ketu pe ongongorasaneno yozoveta ozengi tjinene okuturaera kutja ovikwaye mbi twa sokutjita, na imbi mbi tu ha sere okutjita. Nungwari, eye wa ungurisa omahungi wovandu nga tjitwa tjiri, omaprofetero, nomirari mbi tu vatera okutjita ozondando ozombwa. Momiano mbyo, Embo ra Mukuru ri tu hinga kutja tu mu suvere nokukara nonḓuviro ku ye okuza komitima vyetu.

15. (a) Omomuano uṋe Ombeibela mu i raisa kutja Jehova u rikendera ku eṱe? (b) Motjiperendero, okanatje okakazona, omurumendu omukambure omutanda, nomukazendu omukurundu omukambure mave ripurire ko oukoto kovandu veṋe mOmbeibela? (Gen. 39:1, 10-12; 2 Ozomb. 5:1-3; Luk. 2:25-38)

¹⁵ Ombeibela i raisa kutja Jehova u rikendera ku eṱe tjinene. Omomuano uṋe? MOmbeibela mu nomahungi wovandu mba raisa oumune wawo. Eṱe matu yenene okuzuva ongaro ovandu mbo mu vari mena rokutja owo vari ovandu “otja eṱe.” (Jak. 5:17) Nu tjinenenene, tji matu  tara komuano eye ma tjinda ovandu mbo, tu yenena okuzuva nawa kutja Jehova “we ura notjari nounyaṋutima.”—Jak. 5:11.

16. Indu tji matu lese ohunga novandu mba tjita ozondataiziro mOmbeibela, ku tu honga tjike ohunga na Jehova? (Jesaja 55:7)

¹⁶ Ombeibela i raisa omuano warwe Jehova me tu suvera. Omatjangwa ye tu pa ongamburiro kutja Mukuru wetu ke nokutunakaura indu twa tjiti ozondataiziro. Ovaisrael va tjita ouvi ku Jehova povikando ovingi, nungwari owo tji ve ritanaura tjiri, Mukuru we ve isira. (Lesa Jesaja 55:7.) Ovakriste veserewondo etenga wina aave tjiwa kutja Mukuru we ve suvera tjinene. Omuapostele Paulus wa tunduuza ovakambure ovakwao kutja ngave ‘isire nokupandiparisa’ omurumendu ngwa tjita ouvi ounene, posi ya ngwe ritanaura. (2 Kor. 2:6, 7; 1 Kor. 5:1-5) Tjiri otjiṋa otjinanambango okutjiwa kutja Jehova kanakaura ovakarere ve mena rokutja owo va tataiza. Nungwari, eye norusuvero u ve vatera mokuvevyura, nokuveṋanga kutja ve rire omapanga we rukwao. Eye wa kwizika kutja ma tjiti nao ku imba avehe mbe ritanaura ndino.—Jak. 4:8-10.

17. Ongwaye Ombeibela tji i ri otjiyandjewa tjapeke?

¹⁷ Jehova we tu pa otjiyandjewa otjiwa. Ongwaye Embo ra Mukuru tji ri ri otjiṋa tjapeke? Otja tji twe rihongo, Ombeibela i tu raera ohunga nounongo wa Mukuru, kutja omunausemba nu we tu suvera tjinene. Embo ndi ri raisa kutja Jehova u vanga kutja tu mu tjiwe. Nu eye u vanga kutja eṱe tu rire omapanga we.

18. Omomuano uṋe mu matu yenene okuraisa ondangi ku Jehova ‘kotjiyandjewa otjiwa’ tjOmbeibela?

¹⁸ Eṱe katu nokuvanga okuhinokuraisa ondangi ‘kotjiyandjewa otjiwa’ tjEmbo ra Mukuru. (Jak. 1:17) Ku nao ngatu kayende komurungu okuraisa ondangi. Eṱe matu yenene okutjita nao mokurilesa nokuripurira ko oukoto. Indu tji twa tjiti nao, matu yenene okukara nongamburiro kutja Omutjange omunenenene ma sere ondaya kozongondjero zetu nu matu kara “nondjiviro yaNdjambi.”—Omiano 2:5.