1. Nama kebuah nuan beterima kasihka Bup Kudus?

 KITAI amat beterima kasih ngagai Jehovah laban Iya meri kitai Bup Kudus! Dalam Bup Kudus, Iya meri kitai jaku ajar ti manah ke nulung kitai nemu utai ti patut digaga kitai lebuh napi penanggul kemayaharitu. Iya mega meri kitai harapan ti manah. Tang keberat agi, Jehovah udah ngena Bup Kudus madahka mayuh utai pasal personaliti Iya. Seraya kitai belematika sifat Iya ti manah, ati kitai amat ditegu lalu kitai diperansang datai semak ngagai Petara sereta deka nyadi pangan rapat Iya.—Mas. 25:14.

2. Nama chara ke dikena Jehovah madahka pasal Diri Empu ngagai mensia?

² Jehovah deka orang nemu pasal Iya. Maya jeman kelia, Iya meri sekeda orang mimpi tauka genera, sereta nganjung melikat ngenataika pesan Iya ngagai orang bukai. (P-pau. 12:6; SKR. 10:3, 4) Kitai enda ulih belajar pasal mimpi, genera, tauka pesan ari melikat nya enti sema utai tu enda ditulis. Nya kebuah Jehovah ngasuh mensia ‘nuliska dalam siti bup’ utai ti dikedekaka Iya temu kitai. (Jer. 30:2) Ketegal “jalai Petara ti bendar endang sempurna,” kitai ulih andal chara ke dikena Jehovah tu endang chara ti pemadu manah sereta deka nulung kitai.—Mas. 18:30, NWT.

3. Baka ni Jehovah nentuka Bup Kudus agi bisi nyentukka diatu? (Isaiah 40:8)

³ Bacha Isaiah 40:8. Jaku Petara udah meri jaku ajar ti manah pengelama beribu taun ngagai semua orang ti tetap ati. Baka ni tu ulih nyadi? Tu tanya ti manah laban Bup Kudus terubah iya ditulis dulu kelia ngena gulung surat enggau kulit jelu. Semua utai tu ulih rusak. Nyadi, nadai dokumen ti asal  ke agi bisi kemayaharitu. Tang Jehovah nentuka orang ngupi Jaku Iya ti kudus. Taja pan orang ke ngupi nya enda sempurna, tang sida amat bejimat. Ambika chunto, bekaul enggau Bup Kudus Begian Sempekat Lama, siku pakar nulis: “Kami amat yakin, enti dibandingka enggau Bup Kudus Begian Sempekat Lama, nadai bup kelia ti bukai ke udah dikupi enggau betul.” Nya alai, taja pan Bup Kudus ditulis dulu kelia ba utai ti ulih rusak, lalu orang ke ngupi nya enda sempurna tang kitai ulih andal, utai ke dibacha dalam Bup Kudus kitai kemayaharitu ngenataika runding Jehovah, iya nya Pengarang Bup Kudus.

4. Nama deka dikerandauka kitai dalam artikel tu?

⁴ Jehovah meri kitai “tiap iti pemeri ti manah sereta sempurna.” (Jas. 1:17) Bup Kudus nya siti ari pemeri ti pemadu manah ke diberi Jehovah ngagai kitai. Lebuh sesiku orang meri kitai pemeri, pemeri nya nunjukka naka ni iya ngelala kitai sereta nemu utai ti diguna kitai. Nya mega sama enggau Bup Kudus. Kitai belajar mayuh utai pasal Jehovah lebuh kitai beratika pemeri tu. Kitai belajar Jehovah amat ngelala kitai sereta amat nemu utai ti diguna kitai. Dalam artikel tu, kitai deka berandauka tiga utai ti dipelajarka kitai ari Bup Kudus pasal Jehovah: penemu-dalam Iya, pengerindu Iya, sereta ulah Iya ti enda bepilih mata. Keterubah, aram kitai beratika chara Bup Kudus nunjukka Petara nya bepenemu-dalam.

5. Nama siti chara Bup Kudus nunjukka Petara nya bepenemu-dalam?

⁵ Jehovah nemu kitai begunaka jaku ajar Iya. Lalu pemeri ke diberi Iya, iya nya Bup Kudus penuh enggau penemu-dalam ke datai ari Iya. Jaku lalau ari Bup Kudus mai kesan ti positif ngagai orang. Bup Kudus ulih ngubah pengidup. Lebuh Moses nulis sekeda bup ti keterubah dalam Bup Kudus, iya madah ngagai nembiak Petara, iya nya orang Israel: “Jaku tu ukai jaku ngapa, tang pengidup kita.” (U-dat. 32:47) Sida ke ngasika utai ti ditulis dalam Bup Kudus tau bulih pengidup ti lantang. (Mas. 1:2, 3) Taja pan Bup Kudus ditulis dulu kelia, tang Jaku Petara agi bisi kuasa ngubah pengidup orang. Ambika chunto, dalam siri artikel “Bup Kudus Ngubah Pengidup” di jw.org, nuan ulih tetemuka mayuh chunto orang ke udah mujur ngaga ubah ti besai sereta ngasuh pengidup sida kemayaharitu nyadi manah agi ketegal nitihka jaku lalau ari Bup Kudus.—1 Tes. 2:13.

6. Nama kebuah kitai ulih madah Bup Kudus ukai baka bup bukai?

⁶ Nadai bup bukai ke sama baka Jaku Petara. Nama kebuah? Laban Pengarang Bup Kudus nya Petara Jehovah ti Pemadu Bekuasa, ke endang bisi ari dulu kelia, sereta bisi penemu-dalam ti besai agi ari semua orang. Mayuh bup bukai agi dibacha taja pan pengarang sida udah nadai, tang jaku ajar ke bisi dalam bup ke baka nya kesuah iya enda ulih dikena agi. Taja pia, prinsip dalam Bup Kudus seruran ulih dikena, sereta udah nulung semua orang enda ngira ba jeman kelia tauka diatu. Lebuh kitai macha sereta belematika utai ti dipelajarka kitai ari Bup Kudus, Pengarang iya deka ngena kuasa kudus Iya kena nulung kitai meda chara kitai ulih nitihka jaku lalau ari Bup Kudus dalam pengidup kitai. (Mas. 119:27; Mal. 3:16; Heb. 4:12) Amat, Pengarang Bup Kudus ti meruan bisi, keran deka nulung nuan. Nya patut ngasuh kitai deka seruran macha Bup Kudus!

7. Baka ni Bup Kudus nyerakupka orang ba jeman kelia?

⁷ Bisi siti agi utai ke nunjukka Bup Kudus ngundan penemu-dalam ari Petara iya nya, Bup Kudus nulung nembiak Petara beserakup.  Lebuh orang Israel tama ngagai Menua ti Udah Disemaya, sida diau ba endur ti bebida. Sekeda nyadi orang ke berikan, ke bukai nupi jelu, lalu bisi mega nanam utai. Orang Israel ba siti endur engka senang enda ingatka orang Israel ke diau ba endur bukai dalam menua nya. Tang Jehovah ngatur beberapa utai ngambika orang Israel deka begelumu ngambika ulih ninga lebuh Jaku Iya ke ditulis nya dibacha sereta diterangka. (U-dat. 31:10-13; Neh. 8:2, 8, 18) Gambarka asai ati siku orang Israel seraya iya datai ngagai Jerusalem lalu meda bejuta iku orang ke sama nyembah Jehovah, datai ari endur bukai di menua nya! Enggau chara tu, Jehovah nulung nembiak Iya mengkang berserakup. Lalu udah nya, lebuh raban gempuru Kristian ditumbuhka, mayuh orang dalam raban gempuru nya bejaku ngena mayuh jaku ti enda sama. Kelimpah ari nya, mayuh ari sida ngembuan latar belakang sosial sereta ekonomi ti enda sama. Tang ketegal semua sida rinduka Bup Kudus, sida ulih beserakup nyembah Petara ti bendar. Sida ke arapka Jehovah semina ulih meretika Jaku Petara lebuh bisi tulung ari bala penyembah ke bukai sereta lebuh begempuru begulai nyembah Jehovah.—SKR. 2:42; 8:30, 31.

8. Baka ni Bup Kudus nyerakupka nembiak Jehovah kemayaharitu?

⁸ Petara kitai ti bepenemu-dalam terus ngajar sereta nyerakupka nembiak Iya nengah Bup Kudus. Bup Kudus ngundan semua pemendar  pasal Jehovah ke patut ditemu kitai. Kitai seruran begempuru begulai ba Palan Gempuru, gempuru besai, sereta konvensyen. Ba dia, kitai ningaka Bup Kudus dibacha, diterangka, sereta dikerandauka. Nya alai, Bup Kudus nya utai ti penting ke dikena Jehovah nulung nembiak Iya “nyembah Iya begulai.”—Sep. 3:9, NWT.

9. Nama sifat ke patut dikembuan kitai ngambika ulih meretika pesan ari Bup Kudus? (Luke 10:21)

⁹ Peratika siti agi bukti ke nunjukka penemu-dalam Jehovah. Iya ngasuh mayuh begian ari Bup Kudus ditulis enggau chara ke semina ulih dimeretika bala pemacha ti baruh ati. (Bacha Luke 10:21.) Orang ba semua endur macha Bup Kudus. Siku pakar madahka, mayuh agi orang macha Bup Kudus ari bup bukai, lalu sida mega lebih agi bejimat lebuh macha Bup Kudus enti dibandingka enggau bup bukai. Tang semina orang ke baruh ati aja ulih amat mereti sereta nitihka utai ti dipadah Bup Kudus.—2 Kor. 3:15, 16.

10. Nama siti agi chara Bup Kudus nunjukka penemu-dalam Jehovah?

¹⁰ Kitai belajar pasal penemu-dalam Jehovah dalam Bup Kudus nengah siti agi chara. Jehovah ukai semina ngena Bup Kudus ngajar semua nembiak Iya, tang Iya mega ngena Bup Kudus ngajar sereta ngelantangka ati tiap iku kitai. Lebuh kitai macha Jaku Petara, kitai ulih meda pengibuh Iya ke tiap iku kitai. (Isa. 30:21) Lebuh nuan napi penanggul, kati nuan kala muka Bup Kudus lalu tebachaka siti ayat lalu ngumbai ayat nya baka ke ditulis ke nuan? Tang Bup Kudus ditulis ngambika bejuta iku orang ulih meretika nya. Nyadi baka ni penerang ke bisi dalam Bup Kudus ulih sesuai enggau situasi nuan? Tu semina ulih nyadi laban Pengarang Bup Kudus nya Petara kitai ti pemadu bepenemu-dalam ba alam semesta.—2 Tim. 3:16, 17.

11. Baka ni Petara nunjukka Diri enda bepilih mata lebuh Bup Kudus benung ditulis?

¹¹ Siti agi sifat Jehovah iya nya, Iya adil. (U-dat. 32:4) Sifat tu bisi kaul ti rapat enggau ulah ke enda bepilih mata, lalu Jehovah endang enda bepilih mata. (SKR. 10:34, 35; Rom. 2:11) Sifat Jehovah tu diayanka ba bansa jaku ke dikena nulis Bup Kudus. Mayuh begian ari 39 iti bup ti keterubah dalam Bup Kudus ditulis dalam jaku Hebrew. Jaku nya senang dimeretika nembiak Petara maya nya. Taja pia, ba jeman orang Kristian abad keterubah, mayuh orang ngena jaku Gerika. Nya alai, mayuh begian ari 27 iti bup ti penudi dalam Bup Kudus ditulis ngena jaku Gerika. Jehovah enda ngaga pemutus ngambika Jaku Iya semina ulih ditulis dalam siti bansa jaku aja. Penyampau orang ba dunya kemayaharitu nyauka lapan biliun, lalu semua sida bejaku ngena mayuh bansa jaku. Nyadi baka ni orang ulih belajar pasal Jehovah?

12. Nama siti chara Daniel 12:4 dikeamatka ba Hari ti Penudi?

¹² Nengah nabi Daniel, Jehovah besemaya ba Hari ti Penudi “penemu ti bendar” ke bisi dalam Bup Kudus deka “majak mayuh.” Mayuh orang deka meretika pesan dalam Bup Kudus. (Bacha Daniel 12:4, ari nota kaki.) b Kebendar iya, Bup Kudus enggau litaricha ti bepelasarka Bup Kudus udah disalin, dichelak, sereta disadung ngagai mayuh orang. Tu meh siti chara ke udah nulung mayuh orang meretika pesan dalam Bup Kudus. Bup Kudus udah nyadi bup ti pemadu mayuh disalin sereta disadung di serata dunya. Kekadang Salin Bup  Kudus ke disediaka kompeni tauka orang ke bedagang amat mar. Nembiak Jehovah udah nyalin Jaku Petara, sebegian tauka semua, dalam lebih ari 240 bengkah bansa jaku. Utai tu dipejalaika ngambika sapa-sapa ke deka macha Bup Kudus tau bulih siti salin lalu enda ibuh bebayar. Ketegal nya, mayuh orang ari bemacham bansa benung belajar pasal “Berita Manah pasal Perintah Petara” sebedau pengujung dunya datai. (Mat. 24:14) Petara kitai ti enda bepilih mata deka meri mayuh orang peluang ngelala Iya lebuh sida macha Jaku Iya. Tu ketegal Iya amat rinduka semua kitai.

13. Nama kebuah kitai ulih madah Bup Kudus nunjukka Petara rinduka kitai? (John 21:25)

¹³ Bup Kudus nulung kitai nemu sifat Jehovah ti pemadu tampak iya nya, pengerindu. (1 Jhn. 4:8) Peratika utai ti ditepu Jehovah dalam Bup Kudus sereta utai ti enda ditepu Iya dalam dia. Iya meri kitai utai ti diguna ngambika ulih ngembuan kaul ti rapat enggau Iya, idup enggau lantang diatu, sereta bulih pengidup ti meruan belama iya. Taja pia, ketegal Jehovah rinduka kitai, Iya enda meri kitai kelalu mayuh penerang ke enda diguna kitai kena nyembah Iya.—Bacha John 21:25.

14. Nama chara bukai Bup Kudus nunjukka Petara rinduka kitai?

¹⁴ Jehovah mega nunjukka pengerindu ngagai kitai ari chara Iya bejaku ngagai kitai. Iya ngayanka basa ngagai kitai. Dalam Bup Kudus, Jehovah enda meri kitai siti lis pesan ke madahka tiap iti utai ti tau tauka enda tau dikereja kitai dalam pengidup. Tang, Iya ngena cherita pengidup ti amat nyadi, genera ti ngalitka ati, sereta jaku lalau ti praktikal, kena nulung  kitai ngaga pemutus ti manah. Enggau chara tu, Jaku Petara meransang kitai rindu sereta ngasika Jehovah ari ati kitai empu.

15. (a) Baka ni Bup Kudus nunjukka Jehovah ibuhka kitai? (b) Dalam gambar nya, ni siti watak ari Bup Kudus ke benung diperundingka siku indu ke biak, menyadi lelaki ti biak, sereta menyadi indu ke tuai nya? (P-kal. 39:1, 10-12; 2 Raj. 5:1-3; Luk. 2:25-38)

¹⁵ Bup Kudus madahka Jehovah amat ibuhka kitai. Baka ni? Jaku Iya dalam Bup Kudus penuh enggau watak ti ulih dimeretika kitai laban sida mega orang ke “bisi asai ati baka kitai.” (Jas. 5:17) Lalu keberat agi, lebuh kitai beratika chara Jehovah ngintu orang ti sama baka kitai, kitai ulih mereti agi Jehovah nya Petara ke “bisi pengasih sereta penyayau ti besai.” —Jas. 5:11.

16. Nama ulih dipelajarka kitai pasal Jehovah lebuh kitai macha pasal sekeda orang dalam Bup Kudus ke ngereja penyalah? (Isaiah 55:7)

¹⁶ Bup Kudus nunjukka Jehovah rinduka kitai nengah siti agi chara. Jaku Petara ngasuh kitai yakin Petara enda ninggalka kitai lebuh kitai ngereja penyalah. Orang Israel suah bedosa ngagai Jehovah, tang lebuh sida amat udah nesal ati, Petara ngampunka sida. (Bacha Isaiah 55:7.) Orang Kristian ba abad keterubah mega nemu Petara amat rinduka sida. Ba baruh iring kuasa kudus Petara, rasul Paul meransang bala menyadi ngambika ‘ngampun enggau pengabis ati sereta ngelantangka ati’ siku lelaki ke ngereja dosa ti besai tang udah nesal ati. (2 Kor. 2:6, 7; 1 Kor. 5:1-5) Manah amat! Jehovah enda terus muai bala penyembah Iya taja pan sida ngereja penyalah. Tang Iya enggau bepengerindu nulung sida, ngemetulka sida, sereta mai sida pulai baru nyadi pangan Iya. Kemayaharitu, Iya mega besemaya deka ngereja utai ti sama ngagai semua orang ti bedosa ke udah nesal ati.—Jas. 4:8-10.

17. Nama kebuah Bup Kudus nya pemeri ti amat manah?

¹⁷ Jehovah udah meri kitai siti pemeri ti amat manah. Nama kebuah Jaku Iya siti pemeri ti amat manah? Baka ke udah dipelajarka kitai, Bup Kudus nunjukka Petara kitai nya bepenemu-dalam, enda bepilih mata, sereta bepengerindu. Bup tu nunjukka Jehovah dekaka kitai ngelala Iya. Jehovah deka kitai nyadi pangan Iya.

18. Baka ni kitai ulih nunjukka diri beterima kasihka “pemeri ti manah” tu, iya nya Bup Kudus?

¹⁸ Kitai deka seruran ingat Jaku Petara nya siti “pemeri ti manah.” (Jas. 1:17) Aram meh kitai terus nunjukka diri beterima kasihka nya. Kitai ulih ngereja tu enggau besampi sereta macha jaku ti kudus tu, lalu udah nya belematika nya. Lebuh kitai ngereja nya, kitai ulih yakin, Pengarang Bup Kudus iya nya Jehovah, deka merekatka usaha kitai lalu kitai deka ‘belajarka pasal Petara.’—J-lam. 2:5.