1. Ɔdiya nɛ Ubáyíbu jɛ uwɔ eyī a?

 Ó WƐ ɔdā nōo jɛ alɔ eyī nɛɛnɛhi ku ɛhi ku Ɛlā ku nu nōo wɛ Ubáyíbu nɛ Ujehofa je lɛ alɔ a! Ipu Ubáyíbu, alɔ gē má aukɔ́ ku ijeeyi nōo gē ta alɔ abɔ ō jé ɔdā nɛ alɔ cika ō ya eko duuma nɛ alɔ yɔ i má unwalu icɛ. Ó klla gē je ɛnɛɛnɛ eyiyoce ku ɛcɔbu lɛ alɔ. Ofiyɛ duu a, Ujehofa o bu ipu Ubáyíbu lɛ ɛnɛɛnɛ auce ō ya ku nu mafu lɛ alɔ. Ɔdaŋ ku alɔ gbɛla lɛyikwu ɛnɛɛnɛ auce ō ya nɛ ó lɛ a, ó gē lɛ abɔ kwu alɔ ɔtu nɛɛnɛhi, klla gē ya ku alɔ kwu piya ɔya ku nu nōo kwu ɔ ajaajɛ.—Aíjē 25:14.

2. Ɔwɛ ɛyɛɛyɛyi nyá nɛ Ujehofa bi le mafu ɛdɔ ɔcɛ nɛ ó wɛ a lɛ alɛɛcɛ ɛ ma?

² Ujehofa dɔka ku ācɛ kéē lɛ ɛdɔ ɔcɛ nɛ ó wɛ a jé. Eko ikee a, Ujehofa mafu ɛdɔ ɔcɛ nɛ ó wɛ a lɛ ācɛ ɔlɛ nu o bu ɔna, ɛbɛ ō má, ó klla tu aalelekwu otɛhɔ ku nu ɛhɔ kéē da ācɛ olɛhɔ ku nu. (Áluk. 12:6; Ācot. 10:3, 4) Ó gáā tɔɔtɛ lɛ alɔ ō klɔcɛ aɔna, aɛbɛ ō má, amāŋ olɛhɔ nōo ŋma ɛgiyi aalelekwu otɛhɔ a ɔdaŋ ka é ta aɛlā a taajɛ ŋ. Ɔɔma ya ɛɛ nɛ Ujehofa ya ku acɛnyilɔ ofu ɛpa kéē lɛ ɔdā nɛ ó dɔka ku alɔ jé a “tá tū ɔkpá” a. (Ujɛr. 30:2) Ohigbu ka “ɔwɛ nɛ̄ Ɔwɔicō . . . gē yá ɛlā kú nū ā le kpaakpa” a, alɔ lɔfu jé kpɔcii ka ɔwɛ nɛ ó gē bi le kɛla lɛ alɔ a wɛ ɔwɛ ɛnɛɛnɛ nōo klla lɔfu ta alɔ abɔ.—Aíjē 18:30.

3. Ɔdi nɛ Ujehofa ya o ya ɛɛ ku Ubáyíbu kóō yɔ jaa gáā kwu icɛ a? (Ayisáya 40:8)

³ Jé Ayisáya 40:8. Ɛlā ku Ɔwɔico humayi bi acɛnyilɔ mla acɛnya nōo hayi kpaakpa a jé ɔwɛ lɔɔlɔhi ihayi alɛwa ɛ. Ɛgɛnyá nɛ ɔɔma tɔɔtɛ gla a? Da ma, é ta ɔkpá ku Ubáyíbu gboji gboji tu ipu aɔdā nōo lɔfu biya gla, aɔdā néē kē ta Ubáyíbu tu ɔ piii eko aflɛyi a i kē yɔ icɛ gɛ ŋ. Amáŋ Ujehofa ya ku ācɛ kéē lɛ ɔkpá nōo tiihɔ nyā ta taajɛ ŋma ipu aɛ̄nɛ̄ ō yɔ eko aflɛyi a. Naana nɛ  ācɛ nōo ta aɛlā nyā taajɛ a wɛ ācɛ nōó jila iyē ŋ ma, é leyi kwɛɛcɛ lɔɔlɔhi abɔ é yɔ i ta ɔ a. Ocabɔ mafu, lɛyikwu ɔkpiihɔ nōo yɔ ipu uce ku Uhibru a, ɔcɛ o jé Ubáyíbu nɛɛnɛhi éyi ta ɔkpá kahinii: “Alɔ jé kpɔcii ka ó lɛ ɔkpá duuma nōo yɔ eko ikee néē ta kpaakpa bɛɛka ɔkpiihɔ nōo yɔ ipu uce ku Uhibru a ŋ.” Ohigbu ɛnyā, naana néē ta Ubáyíbu gboji gboji tu ipu aɔdā nōo je biya, nɛ ācɛ nōo klla ta ɔ ŋma ipu aɛ̄nɛ̄ ō yɔ eko aflɛyi a wɛ ācɛ nōó jila iyē ŋ ma, alɔ lɔfu jé kpɔcii ka aɛlā nɛ alɔ gē jé ŋma ipu Ubáyíbu icɛ a, wɛ ɛlā nɛ Ujehofa nōo wɛ ɔcɛ nōo lɛ Ubáyíbu a bi ɔtu yiili a.

4. Ɔdi nɛ alɔ gáā kɛla lɛyikwu ɔ ipu ikpɛyi ɛlā nyā a?

⁴ Ɛgiyi Ujehofa nɛ ɛjɛɛji “ɛhi olɔhi dóódu mɛ́mla ɛhi dúúmā nōo ī jōōjīla ā, gē ŋmá” a. (Ujɛ́m. 1:17) Ubáyíbu wɛ ɛhi nōo lɔhi fiyɛ duu nɛ Ujehofa je lɛ alɔ a. Eko duuma nɛ ɔcɛ lɛ ɛhi je lɛ alɔ, ɛhi ɔɔma gē mafu ɛgɛ nɛ ɔcɛ ɔɔma jé alɔ lɔɔlɔhi mla ɔdā nōo wɛ ɛgbá ku alɔ a. Ɛgɔɔma nōó lɛ mla Ubáyíbu duu a. Eko duuma nɛ alɔ leyi yɛ ɛhi nyā lɔɔlɔhi, alɔ gē nwu ɔdā alɛwa lɛyikwu Ujehofa. Alɔ gē nwu ɛgɛ nɛ ó jé alɔ lɔɔlɔhi mla ɔdā nɛ alɔ cɛgbá a. Ipu ikpɛyi ɛlā nyā, alɔ géē kɛla lɛyikwu ɔdā nɛ alɔ nwu ŋma ipu Ubáyíbu lɛyikwu auce ō ya ku Ujehofa ɛta: ijeeyi ku nu, ɔwɛ okpaakpa nɛ ó gē ya odee, mla ihɔtu ku nu. Amáŋ aflɛyi a, alɔ kɛla lɛyikwu ɛgɛ nɛ Ubáyíbu mafu lɛ alɔ ka Ɔwɔico jeeyi a.

5. Ɔwɛ éyi nyá nɛ Ubáyíbu mafu ijeeyi ku Ɔwɔico a?

⁵ Ujehofa jé ku alɔ cɛgbá aukɔ́ ku ijeeyi ku nu. Ubáyíbu nōo kē wɛ ɛhi nɛ ó je lɛ alɔ a le mu mla aukɔ́ ku ijeeyi nyā. Ukɔ́ nɛ Ubáyíbu gē tu a gē lɛ abɔ kwu ācɛ iyē ɔwɛ olɔhi. Ubáyíbu gē piya oyeeyi ku ācɛ abɔ. Eko nɛ Umosisi ta aɔkpá aflɛyi ku Ubáyíbu a, ó da ācɛ ku Isrɛlu nōo wɛ ācɛ o gba Ɔwɔico ɛ̄gbā a kahinii: “Íne nyā í wɛ ɛlā áncā ŋ́, é wɛ oyēeyī kú aá á.” (Obla. 32:47) Ācɛ doodu nōo gē lɛyitaajɛ lɛ Ubáyíbu a lɔfu lɛ eeye ipu oyeeyi ku uwa. (Aíjē 1:2, 3) Naana néē ta ɛlā ku Ɔwɔico gboji gboji ɛ ma, ó lɔfu ō piya oyeeyi ku ācɛ abɔ gā olɔhi kpɔ. Ocabɔ mafu, ipu jw.org, ipu aya éyi nōo ka u “The Bible Changes Lives” a, a géē má aocabɔ nōo fiyɛ ofu ɛpa ce igwo [50] nōo ya ɔkwɔɔkwɛyi ku ācɛ nōo ya opiyabɔ nɛhi ipu oyeeyi ku uwa, klla gbɔɔ ō lā oyeeyi olɔhi icɛ, ohigbu ka é gbɔɔ ō lɛyitaajɛ lɛ ukɔ́ nɛ Ubáyíbu gē tu a.—1 Utes. 2:13.

6. Ɔdiya nɛ alɔ lɔfu ka ka ó lɛ ɔkpá duuma nōo lɛbɛɛka Ubáyíbu ŋ ma?

⁶ Ó lɛ ɔkpá duuma nōo lɛbɛɛka Ɛlā ku Ɔwɔico ŋ. Ɔdiya nɛ alɔ ka lɛ a? Ohigbu ka Ujehofa Ɔwɔico nōo lɛ ɔkpá ɔɔma a, wɛ ɔcɛ nōo lɔfu fiyɛ duu, ó yɔ piyoo, klla jeeyi fiyɛ ɛjɛɛji ācɛ doodu. Ó lɛ aɔkpá ōhī nōo gē lé ɛcɛ fiyɛ ācɛ nōo ta uwa a, igbalɛwa aukɔ́ nōo yɔ ipu aɔkpá a i gē tiile igbihaajɛ gɛ ŋ. Amáŋ aukɔ́ ijeeyi nōo yɔ ipu Ubáyíbu a gē yuklɔ eko doodu, é ta ācɛ nōo lā ɛpleeko ɛyɛɛyɛyi a abɔ ɛ. Eko duuma nɛ alɔ gē jé ɔkpá nōo tiihɔ nyā klla gbɛla lipu lipu tu ɔdā nɛ alɔ nwu a, ɔcɛ nōo lɛ ɔkpá a gē bi alelekwu ihɔ ku nu nōo lɔfu nɛhi a le ta alɔ abɔ, o ya ɛɛ ku alɔ má ɛga nɛ alɔ lɔfu bi aukɔ́ nɛ alɔ jé ŋma ipu Ubáyíbu ɔɔma le yuklɔ ipu oyeeyi ku alɔ a. (Aíjē 119:27; Umál. 3:16; Uhíb. 4:12) Ɔkwɛyi, ɔcɛ nōo lɛ Ubáyíbu nōo yeeyi a le tutu ō ta uwɔ abɔ. Ɛnyā cika ō ya ku alɔ yɔ i dɔka ō jé Ubáyíbu eko doodu!

7. Ɛgɛnyá nɛ Ubáyíbu piya ācɛ ɔlɛ Ɔwɔico tɔha eko ikee a?

⁷ Ó lɛ ɔdā ɔhá nōo klla mafu ka Ubáyíbu le mu mla aukɔ́ ijeeyi ku Ɔwɔico. Ɛnyā kē wɛ ɛgɛ nōo ta ācɛ ɔlɛ Ɔwɔico abɔ kéē piyatɔha a. Eko nɛ ācɛ Isrɛlu le yɛ gā Ajɛ Nɛ Ɔwɔico Cokonu Lɛ Uwa a, é gáā lā aya ɛyɛɛyɛyi ipu ajɛ a. Ōhī ku uwa kwu piya ācɛ o kwu ɛbeenyi, ācɛ ɔhá wɛ ācɛ o bi aɛ́bɛ́ jɛ, ó klla lɛ ōhī ku uwa nōo wɛ ācɛ o hɛhɔ. Ācɛ Isrɛlu nōo lā aya ɔhá a, lɔfu lɛ  abɔ ci ō gbɛla lɛyikwu ɛgɛ nɛ ācɛ Isrɛlu ɔmpa uwa nōo lā ɛga ɔhá ku éwo a yɔ i ya lɛ a. Amáŋ, Ujehofa lɛ ōmiya ya ku ācɛ Isrɛlu kē yɔ i jila tɔha eko ɛyɛɛyɛyi, o ya ɛɛ kéē po Ɛlā ku nu néē ta taajɛ mla ō po ɛgɛ néē gē jɛ ɔ teyi peee a. (Obla. 31:10-13; Uneh. 8:2, 8, 18) Leyi yɛ ɛgɛ nɛ ɔtu lɔfu ya ɔcɛ Isrɛlu nōo hayi kpaakpa a lɛ, eko néē gā Ujerusalɛm gáā lɛ umiliyɔn alɛwa ku ācɛ o gba Ujehofa ɛ̄gbā bɛɛka anu a má nōo wa ŋma aya ɛyɛɛyɛyi ku éwo a! O bu ɔwɛ ɛgɛnyā, Ujehofa ta uwa abɔ kéē piyatɔha. Igbihaajɛ, ujɔ ku Ācɛ O Yɛce Ukraist gáā kwaajɛ nōo lɛ ō ya mla acɛnyilɔ mla acɛnya nōo gē ka uce ɛyɛɛyɛyi. Ōhī ku uwa wɛ ācɛ nōo loofu, ācɛ ɔhá i kē wa ācɛ o loofu ŋ. Ōhī ku uwa wɛ ācɛ o gba agbenu, ó kē lɛ ōhī ku uwa nōo wɛ ācɛ ogbɛha. Amáŋ ohigbu ka ɛjɛɛji uwa yihɔtu Ɛlā ku Ɔwɔico a, é piyatɔha ipu ɛ̄gbā ō gba Ɔwɔico ɔkwɛyi a. Ācɛ nōo je piya Ācɛ O Yɛce Ukraist igbihaajɛ a, lɔfu jɛyi Ɛlā ku Ɔwɔico foofunu mla otabɔ ku ɔmpa uwa nōo wɛ Ācɛ O Yɛce Ukraist, mla ō jila tɔha mla uwa.—Ācot. 2:42; 8:30, 31.

8. Ɛgɛnyá nɛ Ubáyíbu gē piya ācɛ ɔlɛ Ujehofa tɔha icɛ a?

⁸ Ɔwɔico ku alɔ nōo jeeyi nɛhi a gɔbu yɔ i nwu ācɛ ɔlɛ nu ɛlā, mla ō ya kéē piyatɔha oŋma lɛ otabɔ ku Ubáyíbu. Ubáyíbu lɛ ɛjɛɛji aɛlā ɔkwɛyi lɛyikwu Ujehofa nɛ alɔ cɛgbá ō jé a. Alɔ gē jila tɔha ojigogo ipu aōjila ku ujɔ ku alɔ, aojileyi, mla aojileyi nɛhi o ya ɛɛ ku alɔ po ɛlā nōo yɔ ipu Ubáyíbu, ɛgɛ néē gē je ɔ teyi peee, mla ɛgɛ néē gē bi ɔ le ya ɛlā ō ka tɛɛcɛ a.  Ohigbu ɛnyā, Ubáyíbu wɛ ɔdā ocɛgbá nɛhi nɛ Ujehofa gē bi le ta ācɛ ɔlɛ nu abɔ kéē gba ɔ ɛ̄gbā “ŋmá ɔtū ékpónú” a.—Usɛf. 3:9.

9. Uce ō ya nyá nɛ alɔ cika ō lɛ o ya ɛɛ ku alɔ jɛyi ɛlā nōo yɔ ipu Ubáyíbu a? (Ulúku 10:21)

⁹ Leyi yɛ ɔdā ɔhá nōo mafu ijeeyi ku Ujehofa a. Ó ya kéē lɛ aya alɛwa ku Ubáyíbu ta ɔwɛ nɛ ācɛ nōo tu iyi uwa waajɛ nōo gē jé ɔ a foofunu lɔfu jɛyi nu gla a. (Jé Ulúku 10:21.) Ācɛ nōo yɔ ɛga doodu a gē jé Ubáyíbu. Ɔcɛ o jé Ubáyíbu nɛɛnɛhi éyi kahinii: “Ācɛ alɛwa gē jé Ubáyíbu fiyɛ aɔkpá duuma ɔhá, é klla gē leyi kwɛɛcɛ lɔɔlɔhi abɔ é gē jé ɔ a fiyɛ aɔkpá ɔhá.” Amáŋ ācɛ nōo tu iyi waajɛ a gē jɛyi nu ɔkwɔɔkwɛyi mla ō bi ɛlā nɛ ó ka a le yuklɔ a.—2 Ukɔ́r. 3:15, 16.

10. Ɔwɛ ɔhá nyá nɛ Ubáyíbu mafu ijeeyi ku Ujehofa a?

¹⁰ Ó klla lɛ ɔwɛ ɔhá nɛ alɔ nwu ɛlā lɛyikwu ijeeyi ku Ujehofa ŋma ipu Ubáyíbu. Ujehofa i gē bi Ubáyíbu le nwu ɛjɛɛji alɔ ɛlā foofunu ŋ, amáŋ ó klla gē bi ɔ le nwu eyeeye ku alɔ ɛlā mla ō ta alɔ ɔtu kwu ɔtu. Eko duuma nɛ alɔ gē jé Ɛlā ku Ujehofa, alɔ lɔfu má ka Ujehofa lɛ ɛlá wu eyeeye ku alɔ. (Ayis. 30:21) Eko duuma nɛ a yɔ i má unwalu, igbo ɛmula nɛ a gē nyɔ gáā jé Ubáyíbu cɛɛ ku a má ka aɛlā néē ta a lɛbɛɛka é ta ɔ ohigbu uwɔ a? Naana a, é ta Ubáyíbu o ya ɛɛ ku umiliyɔn alɛwa ku ācɛ kéē lɛ itene ŋma anu. Ɛgɛnyá nōó lɛ aɛlā nōo yɔ i ya babanya nōo tɛɛma kwu ɔdā nɛ a cɛgbá yiili a? Ɛnyā tɔɔtɛ ohigbu ka ɔcɛ nōo lɛ Ubáyíbu a wɛ ɔcɛ nōo jeeyi fiyɛ duu ipu ɔkpanco mɛmla ɛcɛ a.—2 Utím. 3:16, 17.

11. Ɛgɛnyá nɛ Ɔwɔico mafu ka ó wɛ ɔcɛ nɛ ó gē meyigo ŋ eko néē yɔ i ta Ubáyíbu a?

¹¹ Ō ya ɛlā ɔwɛ okpaakpa wɛ uce ō ya ɔhá ku Ujehofa. (Obla. 32:4) Igbalɛwa ɔcɛ nōo gē ya ɛlā ɔwɛ okpaakpa i gē meyigo ŋ, Ujehofa kē wɛ ɔcɛ nɛ ó gē meyigo ŋ. (Ācot. 10:34, 35; Uróm 2:11) Alɔ lɔfu má uce ō ya ku Ujehofa ka ó wɛ ɔcɛ nɛ ó gē meyigo ŋ ma, ŋma ɔwɛ nɛ ó ya kéē ta Ubáyíbu ipu uce nɛ ācɛ géē jɛyi nu eko ɔɔma a. É ta ɛyinɛhi ku aɔkpá ofu ce igwo ahaanɛ [39] aflɛyi ku Ubáyíbu ipu uce ku Uhibru, ɛnyā kē wɛ uce nōo tɔɔtɛ lɛ ācɛ ɔlɛ Ɔwɔico kéē jɛyi nu eko ɔɔma a. Amáŋ eko ku Ācɛ O Yɛce Ukraist aflɛyi a, ɛyinɛhi ku ācɛ a gē ka uce ku Ugrisii. Ohigbu ɛnyā, é ta aɔkpá ofu ce ahaapa amoomɛ ku Ubáyíbu ipu uce ɔɔma. Ujehofa i ya ōmiya kéē ta aɛlā ku nu taajɛ ipu uce ekponu foofunu ŋ. Icɛ, aluka ku ācɛ nōo le ba lɛ ubiliyɔn ahata nōo yɔ ipu ɛcɛ nyā a gē ka uce alɛwa. Ɛgɛnyá nɛ ācɛ alɛwa gáā wa i nwu ɛlā lɛyikwu Ujehofa a?

12. Ɔdi wɛ ɔwɛ éyi nɛ ɔkpá ku Ayisáya 11:9 yɔ i ya jila ɛpleeko amoomɛ nyā a?

¹² O bu ipu Ayisaya nōo wɛ ɔcomɛɛbɛ a, Ujehofa cokonu ka ɛpleeko amoomɛ a, ɛlā “íjééyī” ɔkwɛyi nōo yɔ ipu Ubáyíbu a géē wɛ “omuōomu kú ɛcɛ.” Ācɛ alɛwa géē jɛyi nu. (Jé Ayisáya 11:9.) Ɔdā éyi nōo ta ācɛ alɛwa abɔ kéē jɛyi ɛlā nōo yɔ ipu Ubáyíbu a wɛ oŋma lɛ Ubáyíbu mla aɔkpá ku alɔ néē cɔwɔ, néē ya wɛɛcɛ, klla ya kóō le yɛ fu ācɛ alɛwa a. Ubáyíbu wɛ ɔkpá néē cɔwɔ fiyɛ duu ipu oduudu ɛcɛ a, ó klla wɛ ɔkpá nōo yɛ fu ācɛ fiyɛ duu ipu ɛcɛ nyā a. Ubáyíbu néē cɔwɔ néē gē ya wɛɛcɛ ipu aukɔmpeni néē géē cɛgbá ō gba ije lɛ uwa a gē gbɔɔla nɛhi ekoohi. Amáŋ ācɛ ɔlɛ Ujehofa cɔwɔ aya amāŋ oduudu Ɛlā ku Ɔwɔico ipu uce nōo fiyɛ ofu ce igwɛɛpa [240], ɔcɛ duuma kē lɔfu lɛ éyi ku nu iyɛhi. Ohigbu ɛnyā, ācɛ ŋma ipu ɛjɛɛji éwo yɔ i nwu ɛlā lɛyikwu “ɔ̄kōolɔhi kú ajɔ̄ɔ̄cɛ́ ā” gbɔbu ɛɛ ku ɛcɛ a kóō wa oŋmɛyi. (Umát. 24:14) Ɔwɔico ku alɔ nōo gē ya ɛlā ɔwɛ okpaakpa a dɔka ō jɛga lɛ ācɛ alɛwa nōo tɔɔtɛ gla a kéē gáā lɛ ɔ jé ŋma lɛ ō jé Ɛlā ku nu. Ó ya ɛnyā ohigbu ka ó yihɔtu ɛjɛɛji alɔ nɛɛnɛhi.

13. Ɔdiya nɛ alɔ lɔfu ka ka Ubáyíbu mafu ihɔtu ku Ujehofa lɛ alɔ a? (Ujɔ́ni 21:25)

¹³ Ubáyíbu ta alɔ abɔ ō jé ka ɛnɛɛnɛ uce ō ya ku Ujehofa nōo fiyɛ duu a wɛ ihɔtu. (1 Ujɔ́n. 4:8) Leyi yɛ ɔdā nɛ Ujehofa ya kéē ta taajɛ ipu Ubáyíbu mla ɔdā nɛ ó ya kéē hii ta ŋ ma. Ó ya ɔ tɔɔtɛ ku alɔ lɛ aɔdā nɛ alɔ cɛgbá yiili o ya ɛɛ ku alɔ lɛ ɛnɛɛnɛ ɛma mla ɔ, ku alɔ lā oyeeyi nōo lɛ eeye babanya, mla ō lɛ oyeeyi opiyoo. Amáŋ, ohigbu ka Ujehofa yihɔtu alɔ a, ó ya kéē ta aɛlā alɛwa ipu Ubáyíbu nɛ alɔ i cɛgbá o ya ɛɛ ku alɔ gba ɔ ɛ̄gbā a ŋ.—Jé Ujɔ́ni 21:25.

14. Ɔwɛ ɔhá nyá nɛ aɛlā nōo yɔ ipu Ubáyíbu a mafu ka Ɔwɔico yihɔtu alɔ a?

¹⁴ Ujehofa klla mafu ka ó yihɔtu alɔ ŋma lɛ ō kɛla lɛ alɔ ɔwɛ nɛ ó mafu ka ó lɛ ojilima ce alɔ. Ipu Ubáyíbu, ó je aíne ɛyɛɛyɛyi nōó tōō gbaluka ŋ lɛ alɔ nōo géē yɔ i da alɔ ɔdā nɛ alɔ cika ō ya piii, mla ɔdā nɛ alɔ i cika ō ya abɔ alɔ gē lā oyeeyi ku alɔ ɛ̄cī doodu a ŋ. Ikɔkɔ ɔɔma, ó bi aɔ̄kā ku ɔdā nōo ya ipu oyeeyi ku ācɛ ɔkwɔɔkwɛyi, aakacɛ nōo gē he alɔ ɔtu ō jé, mla aukɔ́ nōo cɛgbá le ta alɔ abɔ o ya ɛɛ ku alɔ ya ōmiya olɔhi. O bu ɔwɛ nyā, Ɛlā ku Ɔwɔico gē lɛ abɔ kwu alɔ ɔtu ō yihɔtu ku Ujehofa mla ō lɛyitaajɛ lɛ ɔ ŋma ipu ɔtu ku alɔ.

15. (a) Ɛgɛnyá nɛ Ubáyíbu mafu ka Ujehofa lɛ ɛlá wu alɔ a? (b) Ipu ifoto a, ɔ̄kā ku anyɛ ipu Ubáyíbu nɛ ɔyipɛ nɔnya, ɔyinɛ alɔ nɔnyilɔ, mla ɔyinɛ alɔ nɔnya nōo le hilokplici a yɔ i gbɛla lɛyikwu ɔ a? (Ohút. 39:1, 10-12; 2 Aɔ́cɛ́ 5:1-3; Ulúk. 2:25-38)

¹⁵ Ubáyíbu mafu ka Ujehofa lɛ ɛlá wu alɔ nɛɛnɛhi. Ɛgɛnyá a? Ɛlā ku nu le mu mla aɔ̄kā nōo mafu ɛgɛ nɛ ɔtu ya alɛɛcɛ ōhī lɛ a. Alɔ lɔfu jé ɛgɛ nɛ ɔtu ya ācɛ ōhī nōo yɔ ipu Ubáyíbu a ohigbu ka é wɛ ācɛ “ɔlamu bɛ̄ɛka alɔ ā.” (Ujɛ́m. 5:17) Ɛ̄nɛ̄ ō kē cɛgbá fiyɛ duu a, wɛ  oŋma lɛ ō leyi yɛ ɛgɛ nɛ ó ya ɛlā mla alɛɛcɛ bɛɛka alɔ a, ó le tɔɔtɛ lɛ alɔ ō jé peee ka “Óndú ā gbonɛnɛ, klla kē ī méyinyinyi ɔ̄cɛ.”—Ujɛ́m. 5:11.

16. Ɔdi nɛ alɔ gē nwu lɛyikwu Ujehofa eko duuma nɛ alɔ lɛ ɔ̄kā ku ācɛ nōo biya íne a jé a? (Ayisáya 55:7)

¹⁶ Ubáyíbu klla mafu ɔwɛ ɔhá nɛ Ujehofa yihɔtu ku alɔ a. Ubáyíbu ta alɔ ɔtu kwu ɔtu ka Ɔwɔico i gáā cigbihi kwu alɔ eko nɛ alɔ lɛ inyileyi ya ŋ. Ācɛ ku Isrɛlu biya íne ku Ujehofa igbalɛwa, amáŋ eko néē le piyabɔ ɔkwɔɔkwɛyi a, Ɔwɔico kwu je ya uwa ɛhi. (Jé Ayisáya 55:7.) Ācɛ O Yɛce Ukraist ku eko aflɛyi a jé ka Ɔwɔico yihɔtu uwa nɛɛnɛhi duu. Mla otabɔ ku alelekwu ihɔ ku Ɔwɔico, ɔcocɛhɔ Upɔlu ta ayinɛ a ɔtu kwu ɔtu kéē kwu ɔdā nɛ adā éyi nōo biya íne bɔbi bɔbi nōo klla lɛ opiyabɔ ya a u “yá ɔ̄ ɛhi,” kē klla “tá ɔ̄ ɔtū kwu ɔtū.” (2 Ukɔ́r. 2:6, 7; 1 Ukɔ́r. 5:1-5) Ó wɛ ɔdā ō jɛ alɔ eyī nɛhi ka Ujehofa i gē cigbihi kwu ācɛ nōo gē gba ɔ ɛ̄gbā a, ohigbu ka é lɛ inyileyi ya ŋ! Ikɔkɔ ɔɔma, ó gē ta uwa abɔ o bu ipu ihɔtu, gē na uwa tu ɔwɛ, klla hi uwa igwú kéē kwu piya ɔya ku nu kpɔ. Ó cokonu ekponu ɔɔma icɛ ka anuɔ géē ya ɔɔma lɛ ɛjɛɛji ācɛ ō biya íne nōo le piyabɔ a.—Ujɛ́m. 4:8-10.

17. Ɔdiya nɛ Ubáyíbu wɛ ɛhi nōo jɛ alɔ eyī nɛhi a?

¹⁷ Ujehofa je ɛnɛɛnɛ ɛhi lɛ alɔ. Ɔdiya nɛ Ɛlā ku nu wɛ ɔdā nōo jɛ alɔ eyī nɛhi a? Ɛgɛ nɛ alɔ má ɛ ma, Ubáyíbu mafu ka Ɔwɔico jeeyi nɛhi, ka ó gē ya ɛlā ɔwɛ okpaakpa, ka ó klla yihɔtu alɔ nɛhi. Ɔkpá nyā mafu ka Ujehofa dɔka ku alɔ wa i lɛ ɔ jé. Ó dɔka ku alɔ kwu piya ɔya ku nu.

18. Ɛgɛnyá nɛ alɔ lɔfu mafu ka “ɛhi olɔhi” ku Ubáyíbu nɛ Ujehofa je lɛ alɔ a jɛ alɔ eyī nɛhi a?

¹⁸ Alɔ i gáā dɔka ō je mlanyi ka Ɛlā ku Ɔwɔico wɛ “ɛhi olɔhi” ŋma ɛgiyi nu ŋ. (Ujɛ́m. 1:17) Ohigbu ɔɔma, alɔ gɔbu yɔ i mafu ka ɛhi ɔɔma wɛ ɔdā nōo jɛ alɔ eyī nɛhi. Alɔ lɔfu ya lɛ a ŋma lɛ ō jé aɛlā ku nu nōo tiihɔ a mla ō gbɛla tu uwa lipu lipu. Ɔdaŋ ku alɔ ya lɛ a, alɔ lɔfu jé kpɔcii ka ɔcɛ nōo lɛ ɛlā nōo yɔ ipu ɔkpá ɔɔma a géē hɔha ce oceyitikwu ku alɔ, mla ō ya ku alɔ jé odee “lɛyíkwu Ɔwɔicō” fiyɛ.—Aíit. 2:5.