1. Apay nga agyamanka gapu iti Biblia?

 ANIAN a yamantayo ken Jehova a Dios gapu iti Biblia! Kadagiti panid dayta a libro, ipapaayannatayo ni Jehova iti nainsiriban a balakad a makatulong tapno sibaballigi a masolbartayo dagiti problematayo ita. Ik-ikkannatayo met iti nagsayaat a namnama para iti masanguanan. Napatpateg pay, us-usaren ni Jehova ti Biblia tapno isurona ti adu nga aspeto ti personalidadna. Bayat nga ut-utobentayo dagiti nagpipintas a kualidadna, matukay unay ti pusotayo ken matignaytayo a suminged iti Diostayo ken kayattayo ti agbalin a nasinged a gayyemna.​—Sal. 25:14.

2. Iti ania a nadumaduma a pamay-an nga impakaammo ni Jehova kadagiti tattao ti kinasiasinona?

² Kayat ni Jehova nga isu ket maam-ammo dagiti tattao. Idi un-unana, nagusar kadagiti pamay-an a kas kadagiti tagtagainep, sirmata, ken kadagiti anghel pay ketdi tapno maipakaammona ti kinasiasinona. (Num. 12:6; Ara. 10:3, 4) Ngem kasano koma a maammuantayo ti kaipapanan dagita a tagtagainep, sirmata, wenno mensahe manipud kadagiti anghel no saanda a naisurat? Dayta ti makagapu a dagiti kayat ni Jehova a maammuantayo ket ‘impaisuratna iti libro.’ (Jer. 30:2) “Ti dalan ti pudno a Dios ket perpekto,” isu a makapagtalektayo a dayta a pamay-an ti pannakikomunikarna kadatayo ti kasayaatan ken makagunggona.​—Sal. 18:30.

3. Kasano a sinigurado ni Jehova nga agtalinaed ti Biblia agingga ita? (Isaias 40:8)

³ Basaen ti Isaias 40:8. Rinibun a tawen a mangipapaay ti Sao ti Dios iti nagsayaat a panangiwanwan kadagiti matalek a lallaki ken babbai. Kasano koma a posible dayta ket nabayagen  a narunot dagiti material a damo a nakaisuratan ti Biblia isu nga awanen dagita? Sinigurado ngamin ni Jehova a ti sagrado a saona ket mamin-adu a makopia. Uray imperpekto dagiti parakopia, nakaan-annadda. Kas pagarigan, no maipapan iti Hebreo a Kasuratan, insurat ti maysa nga eskolar: “Mabalintayo nga ibaga nga awanen ti sabali pay a nagkauna a manuskrito a siuumiso a nayallatiw ti mensahena.” Isu nga uray no nabayagen a naisurat ti Biblia kadagiti nalaka a marunot a material ken imperpekto dagiti parakopia, makapagtalektayo a dagiti sasao a mabasbasatayo iti Bibliatayo ita ipakaammoda ti pampanunot ti Autorna a ni Jehova.

4. Ania ti pagsasaritaantayo iti daytoy nga artikulo?

⁴ Ni Jehova ti Gubuayan ti “tunggal nasayaat ken perpekto a sagut.” (Sant. 1:17) Ti Biblia ti maysa kadagiti kasayaatan a sagut ni Jehova kadatayo. No adda sagut a naawattayo, ipakita dayta a talaga nga am-ammonatayo ti nangted ken ammona dagiti kasapulantayo. Kasta met laeng ti Nangted iti Biblia. No sukimatentayo daytoy a sagut, adu ti maammuantayo maipapan ken Jehova. Maammuantayo a talaga nga am-ammonatayo ken ammona dagiti kasapulantayo. Iti daytoy nga artikulo, pagsasaritaantayo no kasano nga ipakita ti Biblia ti tallo a kualidad ni Jehova: ti sirib, hustisia, ken ayatna. Usigentayo nga umuna no kasano nga ipakita ti Biblia ti sirib ti Dios.

5. Ania ti maysa a pamay-an nga ipakita ti Biblia ti sirib ti Dios?

⁵ Ammo ni Jehova a kasapulantayo ti nainsiriban a balakadna. Ti Biblia a sagutna ket napno iti siribna. Nagsayaat ti epekto kadagiti tattao ti balakad ti Biblia. Ti Biblia balbaliwanna ti biag. Idi naisurat dagiti umuna a libro ti Biblia, imbaga ni Moises kadagiti Israelita nga ili ti Dios: “Nakapatpateg kadakayo daytoy a sao ken kaipapananna ti biagyo.” (Deut. 32:47) Naballigi ken naragsak ti biag dagidiay nagtulnog iti Kasuratan. (Sal. 1:2, 3) Nabayagen a naisurat ti Sao ti Dios ngem saan a naksayan ti bilegna a mangpasayaat iti biag dagiti tattao. Kas pagarigan, iti jw.org, iti serye a “Ti Biblia Balbaliwanna ti Biag,” makitam ti nasurok a 50 nga agpaypayso a kapadasan a mangipakita a ti Biblia ket nabileg ‘a tumultulong kadagiti manamati’ ita.​—1 Tes. 2:13.

6. Apay a maibagatayo nga awan ti libro a kas iti Biblia?

⁶ Awan ti sabali a libro a kas iti Sao ti Dios. Apay? Gapu ta ni Jehova a Dios, ti Autor dayta a libro, ket mannakabalin-amin, agnanayon, ken awan makaartap iti siribna. Adu a libro ti basbasaen latta dagiti tattao uray natayen dagiti autorda, ngem masansan a saanen nga epektibo dagiti balakadda iti panaglabas ti tiempo. Nupay kasta, dagiti nainsiriban a prinsipio ti Biblia ket manayon. Napaneknekanen a makagunggona dagita kadagiti tattao iti aniaman a panawen. Bayat a basbasaentayo dayta a sagrado a libro ken ut-utobentayo dagiti masursurotayo, us-usaren ti Autorna a ni Jehova ti nabileg a nasantuan nga espirituna. Dayta ti tumulong tapno maawatantayo no kasanotayo nga iyaplikar dagiti prinsipio ti Biblia iti biagtayo. (Sal. 119:27; Mal. 3:16; Heb. 4:12) Wen, ti sibibiag nga Autor ti Biblia ket magagaran a tumulong kenka. Nagsayaat dayta nga inspirasion tapno regular a basaentayo ti Biblia!

7. Kasano a pinagkaykaysa ti Biblia ti ili ti Dios idi un-unana?

⁷ Ti maysa pay a nagsayaat a pamay-an nga ipakita ti Biblia ti sirib ti Dios ket ti pannakabalinna a mamagkaykaysa iti ili ti Dios. Idi simrek dagiti Israelita iti Naikari a Daga, nagnaedda iti nadumaduma a lugar. Dadduma kadakuada  ti nagbalin a mangngalap, papastor, ken mannalon. Dagiti Israelita nga aggigian iti maysa a lugar mabalin a nalaka laeng a mapukaw ti interesda iti pagimbagan dagiti padada nga Israelita nga agnanaed iti dadduma a paset ti pagilian. Ngem inyurnos ni Jehova nga agtataripnong dagiti Israelita iti nagduduma nga okasion tapno mangngegda ti pannakaibasa ken pannakailawlawag ti naisurat a Saona. (Deut. 31:10-13; Neh. 8:2, 8, 18) Panunotem ti narikna la ketdi ti maysa a matalek nga Israelita apaman a makasangpet idiay Jerusalem ken makitana ti nalabit minilion a kapammatianna manipud iti tunggal paset ti pagilian! Iti kasta a pamay-an, tinulongan ni Jehova ti ilina nga agtalinaed nga agkaykaysa. Idi agangay, nabuangay ti kongregasion Kristiano a buklen dagiti lallaki ken babbai nga agsasao iti adu a lengguahe a naggapu iti nadumaduma a kasasaad iti kagimongan. Ngem gapu iti ayatda iti Kasuratan, nagkaykaysada a nagdaydayaw iti pudno a Dios. Ti Sao ti Dios ket naawatan laeng dagiti nagbalin a manamati iti tulong dagiti kapammatianda ken iti panagtataripnongda.​—Ara. 2:42; 8:30, 31.

8. Kasano a pagkaykaysaen ti Biblia ti ili ita ni Jehova?

⁸ Babaen ti Biblia, agtultuloy nga isursuro ken pagkaykaysaen ti masirib a Diostayo ti ilina. Ti Biblia ti pagtataudan ti naespirituan a taraon a magusgustuantayo unay. Regular nga agtataripnongtayo kadagiti gimong ti kongregasiontayo, asamblea, ken kombension tapno denggentayo ti pannakaibasa, pannakailawlawag, ken pannakausig ti Kasuratan. Napateg ngarud ti paset ti Biblia tapno  matungpal ti panggep ni Jehova a dagiti agdaydayaw kenkuana “agserbida [kenkuana] iti abagan-abaga.”​—Sof. 3:9.

9. Ania a kualidad ti kasapulan tapno maawatantayo ti mensahe ti Biblia? (Lucas 10:21)

⁹ Kitaentayo ti sabali pay nga ebidensia ti sirib ni Jehova. Adu a paset ti Kasuratan ti impaisuratna iti pamay-an a dagiti laeng napakumbaba ti makatarus. (Basaen ti Lucas 10:21.) Ti Biblia ket basbasaen dagiti tattao sadinoman ti ayanda. Imbaga ti maysa nga eskolar “a kaaduan a tattao ti mangbasbasa [iti Biblia], ken basbasaenda a naimbag dayta no ikompara iti aniaman a libro.” Ngem dagiti laeng napakumbaba ti talaga a makaawat ken mangyap-aplikar iti ibagbagana.​—2 Cor. 3:15, 16.

10. Ania pay ti pamay-an nga ipakita ti Biblia ti sirib ni Jehova?

¹⁰ Adda pay pamay-an a maammuantayo ti sirib ni Jehova iti Biblia. Us-usaren ni Jehova ti Kasuratan tapno suruannatayo, saan la a kas maysa a grupo, no di ket tapno suruan ken liwliwaenna ti tunggal maysa kadatayo. Mariknatayo amin nga interesado ni Jehova kadatayo bayat a basbasaentayo ti Saona. (Isa. 30:21) No adda problema, kasano kasansan nga agpabalakadka iti Kasuratan ket adda mabasam a bersikulo a kasla nairanta a naisurat para kenka? Nupay kasta, ti Biblia ket para iti minilion a tattao. Kasano koma a naglaon dayta iti di agkupas nga impormasion a nairanta para kadagiti eksakto a kasapulam? Posible laeng dayta ta ti Biblia ket obra ti Autor nga awan kapada ti siribna.​—2 Tim. 3:16, 17.

11. Kasano nga impakita ti Dios a saan a mangidumduma idi maisursurat ti Biblia?

¹¹ Hustisia ti maysa pay a kualidad ni Jehova. (Deut. 32:4) Ti hustisia ket konektado unay iti saan a panangidumduma, ket saan a mangidumduma ni Jehova. (Ara. 10:34, 35; Roma 2:11) Makita a saan a mangidumduma ti Dios kadagiti lengguahe a nakaisuratan ti Biblia. Kaaduanna a Hebreo ti nakaisuratan ti umuna a 39 a libro ti Biblia a nalaka a maawatan ti ili ti Dios iti daydi a tiempo. Ngem idi umuna a siglo C.E., Griego a lengguahen ti kaaduan a maus-usar, isu a dayta ti nausar idi naisurat ti maudi a 27 a libro ti Biblia. Saan a linimitaran ni Jehova iti maysa la a lengguahe ti pannakaisurat ti Saona. Iti kaaldawantayo, adu a lengguahe ti us-usaren ti dandani walo a bilion a tattao ditoy daga. Kasano a maammuan ti nagadu a tattao ti maipapan ken Jehova?

12. Ania ti maysa a pamay-an a matungtungpalen ti Daniel 12:4 kadagitoy maudi nga al-aldaw?

¹² Babaen ken propeta Daniel, inkari ni Jehova nga iti tiempo ti panungpalan, “ti pudno a pannakaammo” a masarakan iti Biblia ket “umadunto.” Adunto ti makatarus iti dayta. (Basaen ti Daniel 12:4.) Maysa a pamay-an nga umadu dayta a pannakaammo ket babaen ti panangipatarus, panangipablaak, ken panangiwaras iti Biblia ken kadagiti publikasion a naibatay iti Biblia. Ti Biblia ti kaaduan a maipatpatarus ken maiwarwaras a libro iti lubong. No dadduma, nakanginngina dagiti patarus ti Biblia nga impablaak dagiti komersial a kompania. Ngem naipatarusen ti ili ni Jehova ti intero wenno dadduma a paset ti Sao ti Dios iti nasurok a 240 a lengguahe, ken libre a magun-odan dayta ti asinoman. Kas resultana, maammuan dagiti tattao iti amin a nasion “ti naimbag a damag maipapan iti Pagarian” sakbay nga umay ti panungpalan. (Mat. 24:14) Kayat ti Dios ti hustisia nga adu a tattao agingga a posible ti maikkan iti tsansa a mangam-ammo kenkuana babaen  ti panangbasa iti Saona. Apay? Gapu ta ay-ayatennatayo amin iti kasta unay.

13. Apay a maibagatayo a ti Biblia ipakitana ti ayat ni Jehova? (Juan 21:25)

¹³ Tulongannatayo ti Biblia a mangtarus a ti kangrunaan a kualidad ti Autorna ket ayat. (1 Juan 4:8) Usigentayo dagiti impaisurat ni Jehova iti Biblia ken dagiti dina impaisurat. Dagiti laeng kasapulantayo ti impaayna tapno agbalintayo a gagayyemna, maaddaantayo iti naragsak a biag ita, ken tapno magun-odtayo ti biag nga agnanayon. Ay-ayatennatayo ni Jehova, isu a saannatayo a ginabsuonan iti ad-adu a detalye ngem iti kayatayo.​—Basaen ti Juan 21:25.

14. Ania pay ti pammaneknek nga ipakita ti linaon ti Biblia ti ayat ti Dios?

¹⁴ Impakita pay ni Jehova ti ayatna babaen ti pannakikomunikarna kadatayo iti pamay-an a maipaayannatayo iti dignidad. Iti Biblia, dinatay inikkan iti nagatiddog a listaan dagiti linteg a mangibagbaga kadagiti eksakto nga aramiden ken ditay aramiden. Imbes ketdi, kayatna nga usarentayo ti abilidadtayo nga agpanunot babaen kadagiti agpaypayso nga estoria, makapagagar a padto, ken praktikal a balakad. Kadagita a pamay-an, tigtignayennatayo ti Sao ti Dios a naimpusuan nga agayat ken agtulnog kenkuana.

15. (a) Kasano nga impakita ni Jehova nga interesado kadagiti agbasbasa iti Saona? (b) Iti ladawan, asino a karakter ti Biblia ti pampanunoten ti balasitang, ti agtutubo a brother, ken ti baket a sister? (Gen. 39:1, 10-12; 2 Ar. 5:1-3; Luc. 2:25-38)

¹⁵ Isursuro ti Biblia a ni Jehova ket interesado unay kadatayo. Kasano? Naglaon ti Saona kadagiti salaysay a mangipakita iti emosion ti tattao. Maawatantayo dagiti karakter ti Biblia  ta tattaoda nga ‘addaan iti rikna a kas kadatayo.’ (Sant. 5:17) Napatpateg pay, no maammuantayo ti panangtratona kadagiti tattao a kas kadatayo, lallalo a maawatantayo a “ni Jehova ket nadungngo unay ken naasi.”​—Sant. 5:11.

16. Ania ti masursurotayo maipapan ken Jehova no mabasatayo iti Biblia dagiti nakaaramid kadagiti kamali? (Isaias 55:7)

¹⁶ Ipakita ti Biblia ti ayat ni Jehova kadatayo iti sabali pay a pamay-an. Ipaspasigurado ti Kasuratan a saannatayo a baybay-an ti Diostayo no agkamalitayo. Maulit-ulit a nagbasol dagiti Israelita ken Jehova. Ngem kada naimpusuan nga agbabawida, pakawanen ida ti Dios. (Basaen ti Isaias 55:7.) Ammo met dagiti Kristiano idi umuna a siglo nga ay-ayaten ida ti Dios. Impaisurat ti Dios ken apostol Pablo a paregtaenna dagiti kapammatianna a ‘pakawanen ken liwliwaenda’ ti lalaki a nakaaramid iti nadagsen a basol ngem nagbabawi. (2 Cor. 2:6, 7; 1 Cor. 5:1-5) Nakaskasdaaw ta saan a tinallikudan ni Jehova dagiti agdaydayaw kenkuana gapu laeng ta nakabasolda! Imbes ketdi, siaayat a tinulongan, inlinteg, ken inawisna ida nga agsubli kenkuana. Ikarkarina a kasta met laeng ti aramidenna ita iti amin nga agbabbabawi a nakabasol.​—Sant. 4:8-10.

17. Apay a ti Biblia ket naisangsangayan a sagut?

¹⁷ Inikkannatayo ni Jehova iti nagpintas a sagut. Apay a naisangsangayan unay ti Saona? Kas naammuantayon, ipakita ti Biblia ti sirib, hustisia, ken ayat ti Dios. Paneknekan daytoy a libro a kayat ni Jehova a maam-ammotayo isuna ken agbalintayo a gagayyemna.

18. Kasanotayo a maipakita nga agyamyamantayo gapu iti Biblia a ‘nasayaat a sagut’ ni Jehova?

¹⁸ Kayattayo a tantandaanan a ti Sao ti Dios ket ‘nasayaat a sagut.’ (Sant. 1:17) Itultuloytayo ngarud nga ipakita ti panagyaman gapu iti Biblia. Maaramidtayo dayta babaen ti sikakararag a panagbasa iti sagrado a sasaona, ken panangutob kadagita. Iti kasta, masiguradotayo a ti naindaklan nga Autorna bendisionanna dagiti panagreggettayo ken ‘masarakantayto ti pannakaammo maipapan iti Dios.’​—Prov. 2:5.