1. Chyum Laika a matu nang hpa majaw chyeju dum ai kun?

 CHYUM Laika a matu Yehowa Karai Kasang hpe anhte grai chyeju dum ai. Dai ni aten anhte hkrum nga ai manghkang ni hpe atsawm hparan lu na hpaji rawng ai lam matsun ni hpe Chyum Laika hku nna Shi madi shadaw ya ai. Htawm hpang myit mada lam hpe mung shi jaw da ai. Ahkyak htum gaw, shi a atsam ningja law law hpe madun na matu Chyum Laika hpe Yehowa akyu jashawn ai. Shi a atsam ningja ni hpe myit sawn sumru ai shaloi, shi hte grau hku hkau mayu ai myit nga wa ai.​—Shk 25:14.

2. Yehowa gaw Shi a lam hpe gara hku nna tsun dan wa ai kun?

² Yehowa gaw masha ni hpe shi a lam chye shangun mayu ai. Moi aten hta, yup mang ni, shingran ni hte lamu kasa ni hku nna shi a lam hpe tsun dan ai. (Bhk 12:6; Kas 10:3, 4) Dai zawn Shi tsun dan wa ai lam ni hpe n ka da yang, anhte gara hku mung hkaja lu na n re. Dai majaw, Yehowa anhte hpe chye shangun mayu ai lam ni hpe “laika hta ka da” na matu, la ni hpe matsun wa ai. (Yer 30:2) “Tengman ai Karai Kasang a lam gaw hkum tsup ai” majaw, dai zawn Chyum Laika hte mahtut mahkai ai gaw, kaja htum rai nna akyu nga ai.​—Shk 18:30, NWT.

3. Dai ni aten du hkra grin nga ai Chyum Laika hpe Yehowa gara hku mu mada ai kun? (Esaia 40:8)

³ Esaia 40:8 hpe hti u. Chyum Laika gaw sadi dung ai num, la ni hpe kaja ai lam matsun jaw wa ai shaning hkying hku na sai. Gara hku nna mai byin na kun? Chyum Laika hpe grai na sai aten kaw nna hten mat chye ai arai ni hta ka wa ai majaw, dai ni aten hta madung Chyum Laika langai mi mung n nga sai. Raitim, bai ka la ai Chyum Laika ni hpe chyoi pra ai Chyum Laika hku nna Yehowa mu ai. Bai ka la ai ni gaw n hkum tsup ai masha ni raitim, grai sadi nna ka wa ai. Ga shadawn, Hebre Chyum Laika hte seng nna Chyum hpaji du langai ndai hku ka wa ai: “Moi na gara laika buk hpe mung ndai daram tup hkrak jaw hkra bai n ka da lu ai.”  Dai majaw, Chyum Laika hpe grai na sai aten kaw nna hten mat chye ai arai ni hta ka wa ai raitim, bai ka la ai ni gaw n hkum tsup ai ni raitim, dai ni anhte hti lu ai Chyum Laika hta lawm ai ga ni gaw, Chyum Laika Madu Yehowa a myit mang ai lam ni re ai hpe anhte kam mai ai.

4. Ndai sumhpa hta hpa lam bawngban mat na kun?

⁴ Yehowa gaw “kaja ai kumhpaw nlang hte hte, hkum hkum re ai kumhpa yawng” a Npawt re. (Yak 1:17) Chyum Laika gaw Yehowa anhte hpe jaw ai kaja htum kumhpa langai re. Marai langai kumhpa jaw ai shaloi, shi gaw anhte a lam hte anhte a ra kadawn ai lam ni hpe kade daram chye ai hpe madun dan ai. Chyum Laika Jaw Ai Wa mung dai hte maren sha re. Dai kumhpa hte seng nna atsawm myit yu ai shaloi, Yehowa a lam law law chye lu ai. Anhte a lam, anhte ra kadawn ai lam ni hpe Shi kade daram chye ai hpe chye lu ai. Yehowa a atsam ningja 3 re ai nyan hpaji, tara rap ra ai lam, tsawra myit hte seng nna Chyum Laika hta hpa sharin ya ai hpe ndai sumhpa hta bawngban lu na re. Shawng nnan, Chyum Laika gaw Karai a nyan hpaji hpe gara hku madun dan ai lam bawngban yu ga.

5. Karai a nyan hpaji hpe Chyum Laika madun dan ai lam langai gaw hpa rai kun?

⁵ Yehowa gaw, Shi a hpaji rawng ai lam matsun anhte ra ai hpe chye ai. Shi a kumhpa re ai Chyum Laika hta Shi a nyan hpaji ni hte hpring nga ai. Chyum Laika hpaji jaw ga gaw masha ni a ntsa kaja ai akyu shabyin ya ai. Chyum Laika gaw prat hpe galai shai ya ai. Chyum Laika a shawng nnan na laika buk hpe Mawshe ka ai shaloi, Karai a amyu masha ni re ai Israela ni hpe shi ndai hku tsun ai: “Ndai sharin shaga ai ga ni gaw kaman nmai nhkai re ai ga ni sha n rai; dai gaw nanhte a asak hkrung lam rai nga ai.” (Trj 32:47) Chyum Laika hte maren hkan sa ai ni gaw, awng dang nna ngwi pyaw ai prat lu la mai ai. (Shk 1:2, 3) Chyum Laika hpe ka da ai aten grai na sai raitim, masha ni a prat rawt jat hkra galaw ya lu ai atsam naw nga ai. Ga shadawn, jw.org hta na “Chyum Laika Gaw Prat Hpe Galai Shai Ya” ngu ai matut manoi sumhpa kaw, dai ni aten hta, Chyum Laika hpaji jaw ga hpe hkan sa ai majaw, grai kaba ai galai shai lam ni galaw lu wa nna, shanhte a prat rawt jat wa ai masha law law a mahkrum madup hpe mu lu na re.​—1 Ht 2:13.

6. Chyum Laika gaw kaga laika buk hte n bung ai ngu hpa majaw lu tsun ai kun?

⁶ Chyum Laika zawn re ai kaga laika buk n nga ai. Hpa majaw kun? Chyum Laika a Madu Yehowa Karai Kasang gaw, chyahtum chyalai n-gun rawng ai, htani htana grin ai, shingdaw n lu ai nyan hpaji nga ai majaw re. Kaga laika buk law law gaw, laika buk ka ai wa hta na aten grau na na grin ai. Raitim, aten na wa ai hte maren, laika buk hta lawm ai hpaji jaw ga ni gaw akyu n rawng mat ai. Dai hte n bung ai sha, Chyum Laika hta lawm ai npawt tara ni gaw htani htana grin ai. Aten ladaw shagu na masha ni hpe akyu shabyin ya ai lam sakse madun wa sai. Chyum Laika hpe hti nna myit sawn sumru ai shaloi, laika a Madu gaw chyoi pra ai wenyi hpe akyu jashawn nna, anhte a prat hta Chyum Laika hpaji jaw ga hpe gara hku hkan sa mai ai lam, chye hkra karum ya ai. (Shk 119:27; Mal 3:16; Heb 4:12) Chyum Laika a Madu gaw, asak hkrung ai wa rai nna, nang hpe karum ya na matu myit rawt nga ai. Dai gaw Chyum Laika hpe ayan hti na matu anhte hpe shadut ya ging ai.

7. Lai wa sai aten hta Karai a masha ni hpe Chyum Laika gaw gara hku kahkyin gumdin shangun wa ai kun?

⁷ Karai a nyan hpaji hpe Chyum Laika madun dan ai kaga lam langai gaw, Karai a amyu masha ni hpe kahkyin gumdin shangun ai hku nna re. Israela masha ni Ga Sadi Tawn Da Ai Mungdan de shang ai shaloi, grai dam ai shara hta nga shanu wa ma ai. Nkau gaw nga hkwi sha ai, nkau gaw dusat rem ai, nkau gaw hkauna galaw ai. Mungdan a maga mi hta nga ai Israela ni gaw,  kaga maga mi hta nga ai Israela ni hpe lanu lahku na matu malap chye ai. Raitim, Yehowa gaw shi a Mungga hpe hti nna sanglang dan ai hpe Israela ni na lu na matu, shanhte hpe aten ladaw amyu myu hta rau hpawng chyawm lu hkra lajang ya wa ai. (Trj 31:10-13; Neh 8:2, 8, 18) Sadi dung ai Israela langai gaw, Yerusalem de du nna, mungdan a shara shagu na wan hku law ai Israela ni hpe mu ai shaloi, gara hku hkamsha na hpe myit yu u. Dai hku nna, shi a masha ni matut kahkyin gumdin nga na matu Yehowa karum ya ai. Hpang de, Hkristan nawku hpung hpe hpawng de ai shaloi, amyu ga n bung ai ni, mying gumhkawng ai ni, grit nem ai ni, matsan ai hte lu su ai num, la ni mung shang lawm wa ai. Raitim, shanhte Chyum Laika hpe tsawra ai majaw, tengman ai Karai hpe nawku dawjau ai hta kahkyin gumdin nga ai. Kamsham wa ai ni gaw, hpunau nauna ni a karum shingtau lam, shanhte hte rau zuphpawng ai lam ni hku nna sha Karai a Mungga hpe chye na lu ai.​—Kas 2:42; 8:30, 31.

8. Dai ni aten na Yehowa a masha ni hpe Chyum Laika gaw gara hku kahkyin gumdin shangun ai kun?

⁸ Anhte a hpaji rawng ai Karai gaw, Chyum Laika hku nna shi a masha ni hpe matut sharin achyin ya nna kahkyin gumdin shangun ai. Chyum Laika hta, Yehowa hte seng nna anhte chye ra ai tengman lam yawng lawm ai. Chyum Laika hpe hti nna sanglang dan ai, bawngban ai hpe na lu na matu, nawku zuphpawng ni, ninghtawn zuphpawng ni hte ginwang zuphpawng ni hpe anhte ayan lung ai. Dai majaw, Chyum Laika gaw, Karai a masha ni “myit langai sha hte  shi hpe daw jau lu hkra” Yehowa akyu jashawn ai grai ahkyak ai hkingrai langai re.​—Zep 3:9.

9. Chyum Laika shiga hpe chye na na matu ahkyak ai atsam ningja gaw hpa rai kun? (Luka 10:21)

⁹ Yehowa a nyan hpaji hpe madun dan ai kaga lam langai hpe yu yu ga. Shi gaw, Chyum Laika a daw law law hpe, shagrit shanem ai ni sha chye na lu hkra ka da ai. (Luka 10:21 hpe hti u.) Shara shagu na masha ni gaw Chyum Laika hti ai. Chyum Laika hpe “laika buk yawng hta na grau hti ai sha n-ga, grau sadi nna mung hti ai” ngu chyum hpaji du langai tsun ai. Raitim, shagrit shamen ai ni sha, Chyum Laika hta tsun da ai lam hpe gaja wa chye na nna hkan sa ai.​—2 Ko 3:15, 16.

10. Yehowa a nyan hpaji hpe Chyum Laika madun dan ai kaga lam langai gaw hpa rai kun?

¹⁰ Chyum Laika hta, Yehowa a nyan hpaji hpe kaga lam hku nna mung naw madun dan ai. Yehowa gaw, hpung nawng hku nna sharin ya na matu Chyum Laika hpe akyu jashawn ai sha n-ga, langai hpra hpe lam matsun ya nna shalan shabran ya na matu mung akyu jashawn ai. Yehowa a Mungga hpe hti ai shaloi anhte langai hpra hpe shi myit lawm ai lam chye lu ai. (Esa 30:21) Manghkang langai hkrum ai shaloi, Chyum Laika hta, na a matu ka da ai zawn re ai chyum daw hpe kade lang hpaw hti ga ai kun? Chyum Laika hpe wan hku law ai masha ni chye na hkra ka da ai. Nang tup hkrak ra kadawn taw ai lam ni dai hta gara hku lawm taw ai kun? Chyum Laika a Madu gaw, ninggawn tawa hta hpaji rawng dik htum Wa re ai majaw re.​—2 Tm 3:16, 17.

11. Chyum Laika ka ai shaloi, Yehowa gaw myi man n lata ai hpe gara hku madun dan ai kun?

¹¹ Tara rap ra ai gaw, Yehowa a kaga atsam ningja langai re. (Trj 32:4) Tara rap ra ai gaw, myi man n lata ai hte matut mahkai nga ai. Yehowa gaw myi man n lata ai. (Kas 10:34, 35; Rom 2:11) Chyum Laika hpe amyu ga law law hte ka da ai gaw, Shi myi man n lata ai hpe chye lu ai. Shawng nnan na laika buk kaji 39 hpe, dai aten na Karai a masha ni chye na loi ai Hebre ga hte law malawng ka da ai. Raitim, A.D. tsa ban 1 hta, Grik ga hpe law malawng lang wa ai majaw, hpang na Chyum Laika a laika buk kaji 27 hpe madung hku nna dai amyu ga hte ka wa ai. Yehowa gaw, Chyum Laika hpe amyu ga langai hte sha ka na matu n masat da ai. Dai ni mungkan hta nga ai masha wan hkying 8 daram gaw, amyu ga law law shaga ai. Masha law law gaw, Yehowa a lam gara hku chye wa lu na kun?

12. Ndai hpang jahtum nhtoi ni hta Daniela 12:4 hpring tsup nga ai lam langai gaw hpa rai kun?

¹² Hpang jahtum nhtoi hta, Chyum Laika a “nyan hpaji jat wa na” ngu myihtoi Daniela hku nna Yehowa ga sadi jaw ai. Masha law law dai hpe chye na na re. (Daniela 12:4 hpe hti u.) Dai zawn nyan hpaji jat wa ai lam langai gaw, Chyum Laika hte Chyum Laika hpe madung tawn ai laili laika ni hpe ga gale ai, dip shabra ai hku nna re. Chyum Laika gaw, mungkan hta ga gale lu dik htum hte dip shabra lu dik htum laika buk re. Hpaga bungli hku nna dip shapraw ai Chyum Laika ni gaw, kalang lang grai hpu ai. Yehowa a amyu masha ni gaw, Chyum Laika hpe buk ting (sh) daw hte daw hku nna amyu ga 240 jan hte ga gale da nna, masha yawng gaw manu jahpu n jaw ra ai sha lu mai ai. Akyu hku nna, jahtum garai n du shi yang, masha amyu baw yawng gaw, “mungdan a kabu gara shi ga” hpe chye lu ai. (Mat 24:14) Anhte a tara rap ra ai Karai gaw, masha law lu ai daram law law hpe Chyum Laika hti ai hku nna shi a lam chye shangun mayu ai.  Dai gaw shi anhte hpe grai tsawra ai majaw re.

13. Chyum Laika gaw Yehowa a tsawra myit hpe madun dan ai ngu hpa majaw lu tsun ai kun? (Yawhan 21:25)

¹³ Chyum Laika gaw Yehowa a kaba htum atsam ningja re ai tsawra myit hpe madun dan ai. (1 Yh 4:8) Chyum Laika hta Yehowa shalawm da ai hte n shalawm da ai lam ni hpe myit yu ga. Htani htana asak lu na matu, ya aten hta ngwi pyaw lam lu na matu, shi hte hku hkau lam lu na matu anhte ra ahkyak ai lam ni hpe sha shalawm da ya ai. Raitim, anhte hpe Yehowa tsawra ai majaw, n ahkyak ai lam ni hpe ahkri ahkrai shalawm nna lit shali ai baw n galaw ai.​—Yawhan 21:25 hpe hti u.

14. Chyum Laika hta lawm ai lam ni gaw Karai a tsawra myit hpe gara hku nna naw madun dan ai kun?

¹⁴ Yehowa gaw, anhte hpe shagrau ai lam hku kanawn mazum nna, tsawra myit madun ai. Chyum Laika hta n dang hti hkra law ai tara ni hpe n jaw da ai, anhte a prat hpe ahkri ahkrai lam matsun taw ai baw n galaw ai. De a malai, gaja wa byin wa ai prat labau ni, myit kahpra hpa myihtoi ga ni, tatut re ai hpaji jaw ga ni hku nna anhte a myit sawn sumru lu ai atsam rawt jat wa hkra karum ya ai. Dai lam ni hku nna, Shi hpe myit masin kaw na tsawra let madat mara na matu Chyum Laika gaw shadut ya ai.

15. (a) Yehowa gaw anhte hpe lanu lahku ai lam Chyum Laika gaw gara hku sakse madun ai kun? (b) Sumla hta lawm ai numsha, ramma hpunau hte asak kaba ai nauna gaw Chyum Laika hta lawm ai kadai ni a lam hpe myit sawn sumru nga ai kun? (Nin 39:1, 10-12; 2 Hk 5:1-3; Luk 2:25-38)

¹⁵ Yehowa gaw anhte hpe grai lanu lahku ai lam Chyum Laika gaw madun dan ai. Gara hku nna kun? Shi a Mungga hta masha ni a hkamsha lam hpe madun dan ai labau ni lawm ai. Chyum Laika hta lawm ai ni gaw, “anhte hte maren myit mang rawng nga ai shinggyim masha hkrai” re ai majaw, shanhte a hkamsha lam hpe anhte chye na lu ai. (Yak 5:17) Ahkyak htum gaw, anhte zawn re ai shinggyim masha ni hpe Shi kanawn mazum ai lam hpe yu nna, Yehowa gaw “tsaw ra matsan dum nna n gaw n wai myit hte  hpring tsup ai” ngu ai hpe asan sha chye na lu ai.​—Yak 5:11, JCLB.

16. Chyum Laika kaw na mara galaw ai ni a lam hpe hti ai shaloi, Yehowa a lam hpa chye lu ai kun? (Esaia 55:7)

¹⁶ Yehowa anhte hpe tsawra ai kaga lam langai hpe Chyum Laika hta madun da ai. Anhte mara galaw hkrup ai shaloi Karai Kasang gaw anhte hpe n kau da ai lam, Chyum Laika gaw kam shangun ai. Israela ni gaw Yehowa hpe chyahkring hkring mara galaw ai. Raitim, jet ai myit malai lu ai shaloi Karai Kasang mara raw ya ai. (Esaia 55:7 hpe hti u.) Tsa ban langai na Hkristan ni mung, Karai a tsawra myit hpe hkamsha wa ai. Chyoi pra ai wenyi shatsam hkrum ai kasa Pawlu gaw, mara kaba galaw hkrup ai wa myit malai lu yang, “mara dat nna bai shangwi shapyaw” ya na matu, kamsham shada hpe n-gun jaw wa ai. (2 Ko 2:6, 7; 1 Ko 5:1-5) Mara galaw ai hte sha, shi hpe nawku dawjau ai ni hpe n nyet kau ai gaw mauhpa re. De a malai, shanhte hpe tsawra myit hte karum ya ai, shading sharai ya ai, shi hpang de bai kayin wa na matu saw shaga da ai. Dai ni aten myit malai lu ai mara galaw ai ni hpe mung dai hte maren galaw na ngu ga sadi jaw da ai.​—Yak 4:8-10.

17. Chyum Laika gaw hpa majaw grai mauhpa kumhpa re ai kun?

¹⁷ Yehowa gaw anhte hpe grai kaja ai kumhpa jaw da ai. Shi a Mungga gaw hpa majaw grai mauhpa rai kun? Hkaja wa sai hte maren, Chyum Laika gaw Karai a nyan hpaji, tara rap ra ai lam hte tsawra myit hpe madun dan ai. Yehowa gaw anhte hpe shi a lam chye shangun mayu ai lam Chyum Laika gaw sakse madun ai. Anhte hpe shi a jinghku byin shangun mayu ai.

18. Yehowa a “kaja ai kumhpaw” re ai Chyum Laika hpe chyeju dum ai lam gara hku madun lu ai kun?

¹⁸ Karai a Mungga gaw “kaja ai kumhpaw” re ai hpe anhte n malap kau mayu ai. (Yak 1:17) Dai majaw, de a matu chyeju dum ai lam matut madun ga. Chyum Laika hti nna myit sawn sumru ai hku nna, chyeju dum ai lam madun lu ai. Dai zawn galaw yang, anhte a shakut shaja ai lam hpe Chyum Laika a Madu shaman chyeju jaw na, “Karai Kasang hpe chye chyang ai nyan mu lu” na ngu ai hpe kam mai ai.​—Gsh 2:5.