1. Pamodi ki bu ta da txeu valor pa Bíblia?

 NU TA agradese Jeová txeu pamodi el da-nu Bíblia. Na Bíblia, el ta da-nu konsedju ku sabedoria ki ta djuda-nu sabe kuzê ki nu ta faze óras ki nu tene prublémas. Tanbê el ta da-nu un speransa sábi pa futuru. Má más inportanti inda, Jeová ta uza Bíblia pa inxina-nu txeu kuza sobri se manera di ser. Óras ki nu ta pensa na kes kualidadi bunitu di Jeová, kel-li ta mexe ku nos korason i el ta pô-nu ta krê bira más se amigu. — Sal. 25:14.

2. Ki maneras diferenti ki Jeová uza pa djuda algen konxe-l?

² Jeová krê pa algen konxe-l. Na pasadu, el da alguns algen sonhus, vizons i el manda anjus pa leba se mensaji pa otus algen. (Núm. 12:6; Atos 10:3, 4) Má nu ka ta konsigi studaba kes sonhu, vizons ô mensaji di anjus si es ka staba skrebedu. É pamodi kel-li ki Jeová poi ómis ta skrebe na ‘un livru’ tudu kes kuza ki el krê pa nu sabeba. (Jer. 30:2) Dja ki ‘kaminhu di Deus verdaderu é perfeitu’, nu pode ten sertéza ma kel-li é un bon manera di el pâpia ku nos i kel-li ta djuda-nu. — Sal. 18:30.

3. Kuzê ki Jeová faze pa Bíblia pode txigaba na nos? (Isaías 40:8)

³ Lé Isaías 40:8. Dja ten un monti anu ki Palavra di Deus sta ta da bons konsedju pa ómis i mudjeris ki é fiel. Modi ki Deus konsigi faze kel-li? Kel-li é un bon pergunta, pamodi dja ten txeu ténpu ki Bíblia skrebedu na rolus i pergaminhu ki ku ténpu ta stragaba. Pur isu, gósi ka izisti ninhun rolu ô pergaminhu orijinal. Má  Jeová garanti ma algen ta fazeba kópias di kel testu sagradu. Nbóra kes ómi ki fazeba kes kópia éra inperfeitu, es toma txeu kuidadu. Pur izénplu, un studiozu skrebe kel-li sobri Skrituras Ebraiku: “Nu ten sertéza ma ka ten ninhun otu livru antigu ki kopiadu di manera izatu sima Bíblia.” Nbóra dja ten txeu ténpu ki Bíblia skrebedu na material ki ta straga i kes algen ki kopia-l éra inperfeitu, nu pode ten sertéza ma kes kuza ki nu ta lé na Bíblia gósi é ideias di se Autor ki é Jeová.

4. Kuzê ki nu sta ben odja na kel studu li?

⁴ Jeová é Fonti di ‘tudu bon prezenti i tudu prezenti perfeitu’. (Tia. 1:17) Bíblia é un di kes midjór prezenti ki Jeová da-nu. Un prezenti ki un algen ta da-nu, ta mostra ma el konxe-nu dretu i el sabe kuzê ki nu meste. Mésmu kuza ta kontise ku kel Algen ki da-nu Bíblia. Óras ki nu ta lé Bíblia, nu ta prende txeu kuza sobri Jeová. Nu ta prende ma el konxe-nu i ma el sabe dretu kuzê ki nu meste. Na kel studu li, nu ta ben odja kuzê ki Bíblia ta inxina-nu sobri três kualidadi di Jeová: se sabedoria, justisa i amor. Nu ben odja kel primeru manera ki Bíblia ta mostra sabedoria di Deus.

5. Di ki manera ki Bíblia ta mostra sabedoria di Deus?

⁵ Jeová sabe ma nu meste se konsedjus ki ten sabedoria. Se prezenti ki el da-nu ki é Bíblia, ten txeu sabedoria. Konsedjus di Bíblia ten puder di muda vida di algen. Kantu Muizés skrebe kes primeru livru di Bíblia, el fla kes israelita: ‘Pa nhos, kes-li é ka palavras ki ka ten valor, má es ta siginifika vida pa nhos.’ (Deut. 32:47) Kes algen ki ta obi ku kuzê ki Bíblia ta fla, pode ten un vida filís. (Sal. 1:2, 3) I sikrê dja ten txeu ténpu ki Bíblia skrebedu, inda el ten puder di midjora vida di algen. Pur izénplu, na jw.org, na kel grupu di artigus “Bíblia ta muda vida di algen”, bu ta atxa más di 50 izénplu di algen ki konsigi faze mudansas i midjora ses vida pamodi es kumesa ta obi ku konsedjus di Bíblia. — 1 Tes. 2:13.

6. Pamodi ki nu pode fla ma ka ten ninhun otu livru ki é sima Bíblia?

⁶ Ka ten ninhun otu livru ki é sima Palavra di Deus. Pamodi? Pamodi Autor di kel livru li, Jeová Deus, é Tudu-Poderozu, el é pa tudu ténpu i el ten sabedoria más di ki kalker otu algen. Txeu livru ta kontinua ta ledu dipôs ki ses autor móre. Má konsedjus di kes livru li ku ténpu ta perde valor. Konsedjus di Bíblia é diferenti pamodi es é pa tudu ténpu. Dja es prova ma es ta djuda algen pamodi nunka es ka ta perde valor. Óras ki nu lé Bíblia i nu midita na kuzê ki nu prende, Jeová ta uza puder di spritu santu pa djuda-nu odja modi ki nu pode aplika kes konsedju di Bíblia na nos vida. (Sal. 119:27; Mal. 3:16; Heb. 4:12) Autor di Bíblia tene gana di djuda-u. Kel-li ta pô-nu ku gana di lé Bíblia sénpri!

7. Modi ki Bíblia djuda povu di Deus na pasadu kontinua unidu?

⁷ Ten otu manera ki Bíblia ta mostra sabedoria di Deus. Bíblia ta djuda povu di Deus sta unidu. Kantu kes israelita entra na kel téra ki Deus prometeba es,  es bai pa lugaris diferenti. Alguns bira piskador, otus ta kriaba animal i otus bira agrikultor. Éra fásil pa kes israelita ki ta moraba na otus lugar skese di kunpanheru. Má Jeová fla-s ma es tinha ki djuntaba alguns bês pa es obiba leitura i splikason di Lei. (Deut. 31:10-13; Nee. 8:2, 8, 18) Imajina modi ki kes israelita fiel xinti kantu es txiga na Jiruzalen i talvês es odja milhons di ses kunpanheru di adorason di tudu párti di país! Di kel manera li Jeová djuda se povu kontinua unidu. Dipôs, kantu kongregason formadu, el tinha ómis i mudjeris ki ta papiaba línguas diferenti. Alguns di es éra algen inportanti i otus éra sinplis. I alguns di es éra riku i otus éra póbri. Má pamodi ses amor pa Skrituras, es staba unidu ta adora kel Deus verdaderu. I kes ki bira kriston sô ta konsigi ntendeba Palavra di Deus, óras ki es ta staba djuntu ku otus irmon i es ta tinha ses ajuda pa ntendeba Skrituras. — Atos 2:42; 8:30, 31.

8. Modi ki Bíblia ta djuda povu di Deus kontinua unidu oji?

⁸ Nos Deus di sabedoria ta kontinua ta inxina i ta mante se povu unidu através di Bíblia. Na Bíblia, nu ta atxa tudu kes verdadi sobri Jeová ki nu meste sabe. Sénpri nu ta sta djuntu na runion, na asenbleia i kongrésu pa nu inxinadu  ku bazi na Bíblia. É pur isu ki Bíblia é un feraménta inportanti ki Jeová ta uza pa djuda se povu adora-l ‘onbru ku onbru.’ — Sof. 3:9.

9. Ki kualidadi nu meste ten pa nu ntende Bíblia? (Lucas 10:21)

⁹ Repara un otu próva di sabedoria di Jeová. Txeu párti di Skrituras skrebedu di un manera ki sô algen umildi ki ta konsigi ntendeba. (Lé Lucas 10:21.) Algen di kalker párti di mundu pode lé Bíblia. Un studiozu fla: “Bíblia é ka sô kel livru ki más ta ledu, má tanbê é kel livru ki ta ledu ku más kuidadu.” Má é sô kes algen ki é umildi ki ta pode ntende i faze kel ki Bíblia ta fla. — 2 Cor. 3:15, 16.

10. Kal ki é otu manera ki Bíblia ta mostra sabedoria di Jeová?

¹⁰ Nu ta prende sobri sabedoria di Jeová na Bíblia di un otu manera. Jeová ta uza Bíblia pa inxina se povu djuntu i tanbê pa inxina i konsola kada un di nos. Óras ki nu ta lé Palavra di Jeová, nu ta konsigi odja ma el ten interesi na kada un di nos. (Isa. 30:21) Óras ki bu pasa pa un prubléma, kantu bês bu panha Bíblia i bu lé un versíklu ki ta parse ma skrebedu pa bo? Má Bíblia ta toka korason di milhons di algen. Modi ki el pode ten informasons ki ta sirbi pa nos ténpu i ki é izatamenti kel ki bu sta meste? Kel-li ta kontise pamodi Autor di Bíblia é kel algen ki ten más sabedoria. — 2 Tim. 3:16, 17.

11. Modi ki Deus mostra ma el ta trata tudu algen igual timenti Bíblia staba ta skrebedu?

¹¹ Justisa é un otu kualidadi di Jeová. (Deut. 32:4) Justisa sta ligadu ku otu kualidadi ki é trata tudu algen igual. I Jeová ta trata tudu algen igual. (Atos 10:34, 35; Rom. 2:11) Nu pode odja ma el ta trata tudu algen igual pamodi Bíblia skrebedu na monti língua. Kes primeru 39 livru di Bíblia skrebedu prinsipalmenti na ebraiku, ki éra un língua ki povu di Deus ta ntendeba faxi na kel ténpu. Má na ténpu di apóstlus, língua gregu dja staba ta uzadu txeu. Nton, kes últimu 27 livru di Bíblia skrebedu prinsipalmenti na kel língua li. Jeová ka uza sô un língua pa skrebe Bíblia. Oji kuazi 8 bilhon di algen na mundu interu ta pâpia un monti língua. Nton modi ki txeu algen pode prende sobri Jeová?

12. Kal ki é un manera ki Daniel 12:4 sta ta kunpri na ténpu di fin?

¹² Através di proféta Daniel, Jeová promete ma na ténpu di fin ‘konhisimentu di verdadi’ ki sta na Bíblia ‘ta ben bira txeu dimás.’ Txeu algen ta ben ntendeba el. (Lé Daniel 12:4.) Un di kes kuza ki sta djuda txeu algen ntende Bíblia é pamodi Bíblia i kes publikason ku bazi na Bíblia sta ta traduzidu, ta publikadu i ta distribuidu pa txeu algen. Bíblia é kel livru ki más traduzidu i distribuidu na mundu interu. Kes traduson di Bíblia ki kes inpréza ta faze alvês é karu dimás. Ti gósi, povu di Jeová dja traduzi Palavra di Deus, interu ô sô un párti, na más di 240 língua i kalker algen pode ten un Bíblia di grasa. Pur isu, algen di tudu nason sta ta prende “kes notísia sábi di Reinu” antis di fin ben. (Mat. 24:14) Nos Deus di justisa krê da txeu algen oportunidadi di lé se Palavra, asi pa es pode konxe-l. El ta faze kel-li pamodi el ta ama-nu txeu.

13. Pamodi ki nu pode fla ma Bíblia ta mostra amor di Jeová? (João 21:25)

¹³ Bíblia ta djuda-nu ntende ma kel kualidadi prinsipal di Jeová é amor. (1 João 4:8) Pensa na kuzê ki Jeová poi na Bíblia i kuzê ki el ka poi. El da-nu kuzê ki nu meste pa nu ten amizadi ku el, pa nu ten un vida filís gósi i pa nu ten vida pa tudu ténpu. Má, pamodi Jeová ta ama-nu, el ka da-nu informason txeu dimás ki nu ka meste pa nu sirbi-l. — Lé João 21:25.

14. Di ki otu manera ki Bíblia ta mostra amor di Deus?

¹⁴ Jeová tanbê mostra-nu amor kantu el pâpia ku nos di un manera ki ta mostra ma el ta da-nu valor. Na Bíblia, el ka da-nu un monti régra ta fla-nu izatamenti kuzê ki nu pode faze i kuzê ki nu ka pode faze na kada situason di nos vida. Envês di kel-li, el ta uza stórias di vida ki kontise própi, profesias ki ta mexe ku algen i bons konsedju pa djuda-nu toma bons disizon. Di kel manera li, Palavra di Deus ta pô-nu ku gana di ama-L i di obi ku El di korason.

15. (a) Modi ki Bíblia ta mostra ma Jeová ta preokupa ku kes algen ki ta lé se Palavra? (b) Na stória di kenha ki kel minininha, kel irmon i kel irman sta ta midita na el? (Gén. 39:1, 10-12; 2 Reis 5:1-3; Luc. 2:25-38)

¹⁵ Bíblia ta mostra ma Jeová ta preokupa ku nos txeu. Modi? Palavra di Deus ten txeu stória ki ta mostra kuzê ki algen ta xinti. Nu pode ntende sentimentus di kes algen ki Bíblia ta pâpia di el, pamodi es éra algen ‘ku sentimentus  sima di nos’. (Tia. 5:17) I más inportanti inda, óras ki nu odja modi ki Jeová trata ku algen sima nos, nu ta ntende más midjór ma ‘Jeová ten grandi konpaxon i el é mizerikordiozu.’ — Tia. 5:11.

16. Kuzê ki nu ta prende sobri Jeová óras ki nu ta lé na Bíblia sobri kes algen ki faze un pekadu? (Isaías 55:7)

¹⁶ Bíblia ta mostra amor di Jeová pa nos di un otu manera. Skrituras ta garanti-nu ma nos Deus ka ta bandona-nu óras ki nu ta faze kuzas mariadu. Israelitas peka txeu bês kóntra Jeová. Má kantu es rapende di korason, Jeová purdua-s. (Lé Isaías 55:7.) Kes kriston di ténpu di apóstlus tanbê sabia ma Deus ta amaba es txeu. Ku ajuda di spritu santu, apóstlu Paulu fla se irmons pa ‘púrdua i konsola’ un ómi ki fazeba un pekadu gravi má ki dja rapendeba. (2 Cor. 2:6, 7; 1 Cor. 5:1-5) Nu ta fika kontenti di sabe ma Jeová ka nega kes algen ki ta adoraba el sô pamodi es peka! Envês di kel-li, el djuda-s ku amor, el koriji-s i el konvida-s pa es volta pa se brasu. El ta promete faze mésmu kuza pa tudu kes algen ki peka i ki rapende gósi. — Tia. 4:8-10.

17. Pamodi ki Bíblia é un prezenti ki ten txeu valor?

¹⁷ Jeová da-nu un prezenti bunitu. Pamodi ki Palavra di Deus ten txeu valor? Sima dja nu odja, Bíblia ta mostra sabedoria, justisa i amor di Deus. Kel livru li ta prova ma Jeová krê pa nu konxe-l. El krê pa nu bira se amigu.

18. Modi ki nu pode mostra nos gratidon pa kel ‘bon prezenti’ di Jeová ki é Bíblia?

¹⁸ Nu ka krê skese ma Palavra di Deus é un ‘bon prezenti’. (Tia. 1:17) Pur isu, nu kontinua ta mostra nos gratidon pa el. Nu pode faze kel-li, óras ki nu ta faze orason i nu ta lé kes palavra sagradu ki sta na el i nu ta midita na el. Óras ki nu ta faze si, nu pode ten sertéza ma kel grandi Autor di Bíblia ta abênsua sforsu ki nu ta faze i ma nu ‘ta atxa konhisimentu di Deus.’ — Pro. 2:5.