1. Чьма тӧ бона Кʹьтеба Пироз рʹази йи?

 ӘМ БОНА Кʹьтеба Пироз жь Йаһоԝа Хԝәде гәләк рʹази нә! Бь сайа Хәбәра хԝә, Йаһоԝа ширәтед баш дьдә мә. Бь аликʹарийа ван ширәта, әм дькарьн проблемед хԝә сафи кьн. Ӧса жи, Хԝәде һевикә гәләк хԝәш дайә мә. Йа һәри фәрз жи әв ә кӧ Йаһоԝа бь сайа Кʹьтеба Пироз, гәләк һʹӧнӧред хԝә мәрʹа әшкәрә кьрьнә. Гава әм дәрһәԛа һʹӧнӧред ԝи дьфькьрьн, әԝ йәк дьле мә дьгьрә у әм жь дьл дьхԝазьн бьбьн достед ԝийи незик (Зәбур 25:14).

2. Йаһоԝа чаԝа хәбәра хԝә дьгиһандә мәрьва?

² Йаһоԝа дьхԝазә ԝәки һәр кәс ԝи нас бькә. Дәмед бәреда, әԝи бь сайа хәԝн, хәйала у мәләка, хәбәра хԝә дьгиһандә мәрьва (Жьмар 12:6; Кʹаред Шандийа 10:3, 4). Ле һәрге әв хәԝн-хәйал, йан готьнед мәләка нәһатана ньвисандьне, гәло мәйе әԝ чаԝа бьхԝәнда? Ләма жи тьштед кӧ Йаһоԝа дьхԝәст, ԝәки әм бьзаньбьн, әԝи бь сайа пʹехәмбәра «пʹьртукәкеда» да ньвисандьне (Йерәмйа 30:2). Жь бәр кӧ «рʹийа Хԝәде кʹамьл ә», әм дькарьн баԝәр бьн, ԝәки әв метода хәбәрдана ԝи тʹәви мәрьва, йа һәри баш ә (Зәбур 18:30).

3. Гәло Йаһоԝа чаԝа Кʹьтеба Пироз һʹәта рʹожа иро хԝәй кьрийә? (Ишайа 40:8)

³ Бьхунә Ишайа 40:8. Хәбәра Хԝәде бь һʹәзара сала рʹебәрийа баш дайә щурʹә-щурʹә мәрьвед амьн. Гәло чь щурʹәйи? Әв пьрсәкә гәләк баш ә! Ньвисаред Пироз сәр кʹьтебед гӧломәтккьри йан жи пергаменте һатьбун ньвисандьне, у ԝәʹдә шунда әԝ кʹьтеб у пергамент хьраб дьбун. Ләма жи иро ньвисаред орижинал тʹӧнә нә. Ле Йаһоԝа ӧса кьр, ԝәки копийед Ньвисаред Пироз бенә чекьрьне. Мәрьвед кӧ копи дькьрьн, чьԛас жи мәрьвнә ԛьсурдар бун, диса жи ԝана шьхӧле хԝә гәләк фәсал дькьрьн. Зандарәки  дәрһәԛа Ньвисаред Ибрани ӧса гот: «Әм баԝәр ьн кӧ ԛә кʹьтебәкә дьн йа кәвьн бь щурʹәки һаԛас рʹаст нәһатийә копикьрьне». Бәле, Ньвисаред Пироз дәмед бәреда ль сәр материалед кӧ хьраб дьбун, һатьбун ньвисандьне. Әԝед кӧ копи дькьрьн, демәк бәргьр, мәрьвед ԛьсурдар бун. Ле диса жи, әм дькарьн баԝәр бьн, кӧ готьнед Кʹьтеба Пироз фькьред Ньвискʹаре ԝейә әʹсьли, демәк фькьред Йаһоԝа, әʹйан дькьн.

4. Ве готареда, әме дәрһәԛа чь хәбәр дьн?

⁴ Йаһоԝа йә Канийа «һәр дайина ԛәнщ у һәр пʹешкʹеша кʹамьл» (Аԛуб 1:17). Кʹьтеба Пироз йәк жь пʹешкʹешед һәри баш ә, кӧ Йаһоԝа дайә мә. Гава кәсәк пʹешкʹешәке дьдә мә, пʹешкʹеша ԝи әшкәрә дькә, һәла әԝ мә у һʹале мә баш занә, йан на. Әм дькарьн әԝе йәке бәрамбәри Ньвискʹаре әʹсьлийә Кʹьтеба Пироз бькьн. Чьԛас зедә әм Кʹьтеба Пироз дьхуньн, һаԛас баш әм Йаһоԝа нас дькьн. Әм жь Кʹьтеба Пироз педьһʹәсьн кӧ Йаһоԝа мә баш нас дькә у занә чь мәрʹа лазьм ә. Ве готареда, әме бьвиньн кӧ Кʹьтеба Пироз ль сәр билани, һәԛи у һʹьзкьрьна Йаһоԝа чь дьбежә. Ԝәрьн әм пешийе дина хԝә бьдьне, кӧ Кʹьтеба Пироз дәрһәԛа биланийа Йаһоԝа чь дьбежә.

5. Кʹьтеба Пироз чаԝа биланийа Хԝәде нишан дькә?

⁵ Йаһоԝа занә кӧ әм һʹәԝще ширәтед ԝийә билан ьн. Кʹьтеба Пироз бь биланийа Хԝәдева тʹьжә йә. Ширәтед Кʹьтеба Пироз дькарьн сәр мәрьва баш һʹӧкӧм кьн. Кʹьтеба Пироз жийина мәрьва бәрбь башийева дьгӧһезә. Гава Муса пʹехәмбәр кʹьтебед пешьн йед Кʹьтеба Пироз ньвисин, әԝи щьмәʹта Хԝәдерʹа ӧса гот: «Әв нә хәбәра бадиһәԝа йә бона ԝә, ле әԝ әʹмьре ԝә йә» (Ԛануна Дӧщари 32:47). Кәсед кӧ гӧһ дьдьн Ньвисаред Пироз, дьбьн хԝәйе жийинәкә хԝәш у бәхтәԝар (Зәбур 1:2, 3). Хәбәра Хԝәде чьԛас кәвьн буйә жи, ԛәԝата ԝе һәйә кӧ жийина мәрьва дьһа баш кә. Мәсәлә, сәр jw.org, рʹезед готара бь наве «Кʹьтеба Пироз Жийина Мәрьва Дьгӧһезә» һәнә. Ԝедәре гәләк сәрһатийед хушк-бьред мә һәнә. Кʹьтеба Пироз али ԝан кьрийә, кӧ әԝана жийина хԝәда гӧһастьнед мәзьн бькьн, ԝәки бәхтәԝар бьн (1 Тʹесалоники 2:13).

6. Чьрʹа әм дькарьн бежьн кӧ ԛә кʹьтебәкә дьн бәрамбәри Кʹьтеба Пироз набә?

⁶ Ԛә кʹьтебәкә дьн бәрамбәри Хәбәра Хԝәде набә. Әм чьрʹа ӧса дьбежьн? Чьмки Ньвискʹаре ԝе, Йаһоԝа Хԝәде йә. Ԛәԝата ԝи тʹера һәр тьшти дькә. Әԝ Хԝәдейе Һьмзор у һʹәта-һʹәтайе йә, у биланийа ԝи сәр йа һәр кәсирʹа йә. Паши мьрьна гәләк ньвискʹара, кʹьтебед ԝан һе тенә хԝәндьне. Ле ширәтед кӧ ԝана кʹьтебед хԝәда ньвисибун, иро кери мәрьва найен. Алийе дьнва жи, ԝәʹдә нишан кьрийә, кӧ ширәтед Кʹьтеба Пироз бь биланийе тʹьжә нә у һʹәму дәма кери мәрьва һатьнә, һʹәта рʹожа иро жи. Гава әм Кʹьтеба Пироз дьхуньн у сәр готьнед ԝе кʹур дьфькьрьн, рʹӧһʹе пироз али мә дькә, кӧ әм фәʹм бькьн, һәла әм чаԝа дькарьн ширәтед Хԝәде жийина хԝәда бьдьнә хәбате (Зәбур 119:27; Малахи 3:16; Ибрани 4:12). Бь рʹасти жи, Йаһоԝа Хԝәде гәләк дьхԝазә али мә бькә. Гәло һежа нинә, ԝәки әм һәр рʹож Кʹьтеба Пироз бьхуньн?

7. Дәмед бәреда, Кʹьтеба Пироз чаԝа али хьзмәткʹаред Хԝәде дькьр, кӧ йәктийеда бьн?

⁷ Диса мәʹникә дьн жи һәйә, кӧ чьрʹа әм дьбежьн, ԝәки Кʹьтеба Пирозда биланийа Хԝәде һәйә. Кʹьтеба Пироз али хьзмәткʹаред Хԝәде дькә, ԝәки әԝана йәктийеда бьн. Гава Исраели дәрбази Әʹрде Создайи бун, әԝана щурʹә-щурʹә һәремада щиԝар  бун. Һьнәк бунә мәʹсигьр, һьнәка һʹәйԝан хԝәй дькьрьн у һьнәка жи шьхӧлед щоткʹарийе дькьрьн. Исраелийед кӧ дури һәв дьжитьн, дькарьбун һеса һәвдӧ бир кьрана у һаш жь һәвдӧ тʹӧнә буна. Ле Йаһоԝа дьхԝәст, ԝәки Исраели ԝәʹде щәжьна тʹәвайи тʹоп бьн, сәва кӧ Хәбәра ԝи ԝанрʹа бе хԝәндьне у шьровәкьрьне (Ԛануна Дӧщари 31:10-13; Нәһәмийа 8:2, 8, 18). Бьдә бәр чʹәʹве хԝә, кӧ дьле Исраелики чьԛас ша дьбу, гава кӧ әԝ дьһатә Оршәлиме у дьдит кӧ бь милйона хьзмәткʹаред Хԝәде, жь тʹәмамийа ԝәлет һатьнә у ль һәв щьвийан ә! Бь ви щурʹәйи, Йаһоԝа али хьзмәткʹаред хԝә дькьр, кӧ әԝана тʹьфаԛ у йәктийеда бьминьн. Паше, гава щьвата Мәсиһити һатә сазкьрьне, нав ԝанда гәләк мәрьвед жь мьләтед дьн һәбун. Һьнәк жь ԝан кʹәсиб, һьнәк дәԝләти у һьнәк жи мәрьвед нав-дәнг бун. Ле жь бәр кӧ ԝана Ньвисаред Пироз һʹьз дькьр, ԝана йәктийеда Хԝәдейе рʹаст дьһʹәбанд. Кәсед кӧ тʹәзә һатьбун нава рʹастийе, дькарьбун бь аликʹарийа хушк-бьред дьн у бь аликʹарийа щьвина, Хәбәра Хԝәде дьһа баш фәʹм кьрана (Кʹаред Шандийа 2:42; 8:30, 31).

8. Иро, Кʹьтеба Пироз чаԝа али хьзмәткʹаред Хԝәде дькә ԝәки әԝана йәктийеда бьн?

⁸ Хԝәде иро жи хьзмәткʹаред хԝә бь сайа Кʹьтеба Пироз һин дькә у нав ԝанда йәктийе пешда тинә. Кʹьтеба Пироз канийа һʹәму рʹастийед дәрһәԛа Йаһоԝа йә. Әм ван рʹастийа һʹьз дькьн. Әм тʹьме дьчьн щьват у щьватед мәзьн, чьмки ԝедәре  Кʹьтеба Пироз те хԝәндьне, шьровәкьрьне у шеԝьркьрьне. Бәле, Йаһоԝа бь сайа Кʹьтеба Пироз али хьзмәткʹаред хԝә дькә, кӧ әԝана ‹мьл бь мьл жерʹа хьзмәте бькьн› (Сефанйа 3:9, ИМ).

9. Чь щурʹә мәрьв дькарьн жь готьнед Кʹьтеба Пироз фәʹм бькьн? (Луԛа 10:21)

⁹ Биланийа Йаһоԝа тьштәки дьнда жи те кʹьфше. Гәләк пʹаред Кʹьтеба Пироз ӧса һатьнә ньвисандьне, кӧ тʹәне мәрьвед мьлук дькарьн ле фәʹм бькьн (Бьхунә Луԛа 10:21). Һʹәму дәра мәрьв Кʹьтеба Пироз дьхуньн. Зандарәк дәрһәԛа Кʹьтеба Пироз ӧса дьбежә: «Дьнйайеда кʹьтеба кӧ һәри зедә у һур бь һур һатийә хԝәндьне, Кʹьтеба Пироз ә». Ле тʹәне мәрьвед мьлук Кʹьтеба Пироз фәʹм дькьн у ль гора готьнед ԝе дьжин (2 Корьнтʹи 3:15, 16).

10. Диса чь щурʹәйи Кʹьтеба Пироз биланийа Йаһоԝа мәрʹа әшкәрә дькә?

¹⁰ Кʹьтеба Пирозда биланийа Йаһоԝа бь щурʹәки дьн жи те кʹьфше. Йаһоԝа бь сайа Кʹьтеба Пироз, щьмәʹта хԝә нә тʹәне ча кʹом һин дькә, ле мә һәр кәси башԛә жи һин дькә у бәр дьле мәда те. Гава әм Кʹьтеба Пироз дьхуньн, әм дькарьн тʹәхмин кьн, кӧ Йаһоԝа ча хут бона мә хәм дькә (Ишайа 30:21). Гава тәнгаси тенә сәре тә, гәло һьнә рʹезед кӧ тӧ дьхуни ӧса тәрʹа найенә кʹьфше, кӧ те бежи әԝ һәма бона тә һатьнә ньвисаре? Бәле, Кʹьтеба Пироз бона һʹәму мәрьва һатийә ньвисаре. Гәло чьма ширәтед кӧ шәхси бона тә лазьм ьн, теда һәнә? Мәʹни әв ә кӧ Ньвискʹаре Кʹьтеба Пироз һәри билан ә (2 Тимотʹейо 3:16, 17).

11. Гава Кʹьтеба Пироз дьһатә ньвисаре, Йаһоԝа чаԝа нишан кьр, ԝәки әԝ фьрԛийе накә нава мәрьва?

¹¹ Һәԛи жи һʹӧнӧрәки Хԝәде йә (Ԛануна Дӧщари 32:4). Кәсе һәԛ фьрԛийе накә нава мәрьва. Йаһоԝа жи фьрԛийе накә нава мәрьва (Кʹаред Шандийа 10:34, 35; Рʹомайи 2:11). Мәсәлә, Йаһоԝа ӧса кьр, ԝәки Кʹьтеба Пироз сәр ԝан зьмана бе ньвисандьне, кӧ бона мәрьвед һьнге фәʹмдари бә. Һәр 39 кʹьтебед пешьнә Кʹьтеба Пироз, һәри зедә бь зьмане Ибрани һатьнә ньвисандьне. Ԝи чахи хьзмәткʹаред Хԝәде әԝ зьман һеса фәʹм дькьрьн. Ле ԛьрʹна йәкеда, гәләк мәрьва бь зьмане Йунани хәбәр дьдан. Ләма жи һәр 27 кʹьтебед хьлазийейә Кʹьтеба Пироз, һәри зедә бь зьмане Йунани һатьнә ньвисаре. Йаһоԝа нәдьхԝәст кӧ Хәбәра ԝи тʹәне сәр зьманәки бе ньвисаре. Иро незики 8 милйард мәрьвед дьнйайе сәр гәләк зьмана хәбәр дьдьн. Гәло һаԛас мәрьв чаԝа дькарьн Йаһоԝа нас бькьн?

12. Готьнед жь Данийел 12:4 чаԝа ван рʹожед ахьрийеда һатьнә сери?

¹² Бь сайа Данийел пʹехәмбәр, Йаһоԝа соз дабу ԝәки рʹожед ахьрийеда, занәбуна рʹаст ԝе зедә бә. Демәк, һатьбу готьне кӧ гәләк мәрьв ԝе Кʹьтеба Пироз дьһа баш фәʹм бькьн (Бьхунә Данийел 12:4). Йаһоԝа бь сайа ԝәлгәрʹандьн, нәшьркьрьн, бәлакьрьна Кʹьтеба Пироз у әʹдәбйәтед сәр һʹиме Кʹьтеба Пироз, али гәләк мәрьва кьрийә, ԝәки әԝана Хәбәра ԝи дьһа баш фәʹм бькьн. Дьнйайеда, Кʹьтеба Пироз кʹьтеба һәри бәлабуйи у ԝәлгәрʹанди йә. Ԝәлгәрʹандьнед Кʹьтеба Пироз, йед кӧ һьнә компанийа нәшьр кьрьнә, щарна гәләк бьһа нә. Һʹәта ньһа, хьзмәткʹаред Йаһоԝа Хәбәра ԝи бь тʹәмами йан ниви, сәр 240 зьмани зедәтьр ԝәлгәрʹандьнә. У һәр кәс дькарә Кʹьтеба Пироз бепʹәрә дәст хә. Бь ви щурʹәйи, пешийа кӧ хьлази бе, мәрьвед жь һʹәму мьләта дькарьн «Мьзгинийа Пʹадшатийе» нас бькьн (Мәтта 24:14). Хԝәдайе һәԛийе, Йаһоԝа, дьхԝазә мәщале бьдә һәр кәси, ԝәки әԝана Хәбәра ԝи бьхуньн у ԝи нас бькьн. Ләма әм дькарьн бежьн кӧ Йаһоԝа мә һʹәмуйа гәләк һʹьз дькә.

13. Чьма әм дькарьн бежьн кӧ Кʹьтеба Пироз һʹьзкьрьна Йаһоԝа нишан дькә? (Йуһʹәнна 21:25)

¹³ Кʹьтеба Пироз дьбежә, кӧ һʹӧнӧре Йаһоԝайи һәри мәзьн һʹьзкьрьн ә (1 Йуһʹәнна 4:8). Дина хԝә бьде, кӧ Йаһоԝа Кʹьтеба Пирозда чь дайә ньвисаре у чь на. Әԝи Кʹьтеба Пирозда дайә ньвисаре, кӧ әм чаԝа дькарьн бьбьнә достед ԝи. Ӧса жи, әԝ дьбежә кӧ әм чаԝа ида ньһа дькарьн бь жийинәкә бәхтәԝар бьжин у жийина һʹәта-һʹәтайе ԛазанщ кьн. Йаһоԝа мә һʹьз дькә, ләма жи әԝи готьнед кӧ мәрʹа нә лазьм ьн, нәдайә ньвисаре (Бьхунә Йуһʹәнна 21:25).

14. Кʹьтеба Пироз диса бь чь щурʹәйи нишан дькә кӧ Хԝәде мә һʹьз дькә?

¹⁴ Йаһоԝа мә һʹьз дькә, ләма жи әԝи Кʹьтеба Пирозда рʹезәкә дьреж йа ԛануна нәдайә мә, кӧ әм жийина хԝәда чь бькьн у чь нәкьн. Дәԝса ве йәке, әԝ дьхԝазә кӧ әм хԝәха бьфькьрьн у жь сәрһати, готьнед пʹехәмбәра у ширәтед Кʹьтеба Пироз һин бьн у сафикьрьнед баш бькьн. Ӧса Хәбәра Хԝәде дьле мә ԛәԝи дькә, кӧ әм Хԝәде һʹьз бькьн у жь дьл гӧһ бьдьн ԝи.

15. (а) Кʹьтеба Пироз чаԝа нишан дькә кӧ Йаһоԝа бона мә хәм дькә? (б) Сәр шькьл, кәчʹька бьчʹук, бьре щаһьл у хушка әʹмьрда мәзьн, дәрһәԛа кʹижан хьзмәткʹаред Хԝәде, кʹур дьфькьрьн? (Дәстпебун 39:1, 10-12; 2 Пʹадшати 5:1-3; Луԛа 2:25-38)

¹⁵ Кʹьтеба Пироз дьбежә кӧ Йаһоԝа бона мә хәм дькә. Гәло чаԝа? Хәбәра ԝида, гәләк сәрһатийед кәсед, кӧ һәстед ԝан мина һәстед мә нә, һатьнә ньвисаре. Әм дькарьн һʹале ԝан рʹьнд фәʹм бькьн, чьмки әԝана жи хут мәрьвнә «мина мә» бун (Аԛуб 5:17). Йаһоԝа бона мәрьвед мина  мә хәм дькьр, у али ԝан дькьр. Жь ве йәке әм дькарьн зәлал фәʹм бькьн, кӧ Йаһоԝа чьԛас дьлшәԝат у «рʹәʹм ә» (Аԛуб 5:11).

16. Гава әм Кʹьтеба Пирозда сәрһатийед кәсед кӧ шаши кьрьнә дьхуньн, әм дәрһәԛа Йаһоԝа чь һин дьбьн? (Ишайа 55:7)

¹⁶ Кʹьтеба Пироз бь щурʹәки дьн жи нишан дькә, кӧ Йаһоԝа мә һʹьз дькә. Ньвисаред Пироз дьбежьн кӧ гава әм шашийа дькьн, Йаһоԝа тʹәрка мә надә. Исраелийа диса у диса бәр Йаһоԝа гӧнә дькьрьн. Ле гава ԝана жь дьл тʹобә дькьр, Хԝәде дьбахшандә ԝан (Бьхунә Ишайа 55:7). Хьзмәткʹаред Хԝәде йед ԛьрʹна йәкеда жи заньбун, ԝәки Хԝәде ԝана гәләки һʹьз дькә. Жь бина бәр Хԝәде, Паԝлосе шанди хушк-бьрарʹа готьбу, ԝәки әԝана мерәки кӧ гӧне гьран кьрьбу, бьбахшиньн у ль бәр дьле ԝида бен, чьмки әԝи тʹобә кьрьбу (2 Корьнтʹи 2:6, 7; 1 Корьнтʹи 5:1-5). Бәле, чьԛас баш ә кӧ Йаһоԝа пьшта хԝә надә хьзмәткʹаред хԝә, йед кӧ шаши кьрьнә! Дәԝса ве йәке, әԝ жь дьл али ԝан дькә, ԝана рʹаст дькә у дьхԝазә кӧ әԝана диса бьбьнә достед ԝи. Әԝи соз дайә кӧ ԝе иро жи һьндава гӧнәкʹарада рʹәʹма хԝә бьдә кʹьфше, йед кӧ тʹобә дькьн (Аԛуб 4:8-10).

17. Кʹьтеба Пироз чьма пʹешкʹешәкә гәләк ԛимәт ә?

¹⁷ Йаһоԝа пʹешкʹешәкә гәләк ԛимәт дайә мә. Гәло Хәбәра ԝи чьрʹа һаԛас ԛимәт ә? Ча әм пеһʹәсийан, Кʹьтеба Пироз билани, һәԛи у һʹьзкьрьна Хԝәде мәрʹа әшкәрә дькә. Әв кʹьтеб нишан дькә, кӧ Йаһоԝа дьхԝазә әм ԝи дьһа баш нас бькьн у бьбьнә достед ԝи.

18. Әм чаԝа дькарьн шекьрдарийа хԝә бона Хәбәра Хԝәде нишан кьн?

¹⁸ Гәрәке әм бир нәкьн, кӧ Кʹьтеба Пироз пʹешкʹеша жь Йаһоԝа Хԝәде йә (Аԛуб 1:17). Ләма жи әм дьхԝазьн һәртʹьм шекьрдарийа хԝә бона Хәбәра ԝи нишан бькьн. Гәло чаԝа? Әм дькарьн һәр рʹож хәбәред ԝийә пироз бьхуньн у ль сәр ԝан кʹур бьфькьрьн. Һәрге әм ӧса бькьн, әм дькарьн баԝәр бьн, кӧ Ньвискʹаре әʹсьли йе Кʹьтеба Пироз, ԝе хирәта мә кʹәрәм кә у али мә бькә кӧ әм занәбуна Хԝәде бьвиньн (Мәтʹәлок 2:5).