1. Yaˬhoˉvaˬ lehˬ Liꞈ hpu cawˬ tcuh laˇ ve aˬ htoꞈ ma te nawˬ yawˇ htaꞈ awˬ bon uiˍ jaˇ tehꞈ kʼoˆ piˇ gaˇ ve le?

 Yaˬhoˉvaˬ ngaˬ hui htaꞈ Liꞈ hpu peꞈ laˇ ve awˬ bon uiˍ jaˇ. Chi beuꞈ teˇ ce˗e ngaˬ hui shoꞈ shaꞈ ve htaꞈ yeunˇ hkanˍ gʼaˇ tuˬ, Yaˬhoˉvaˬ lehˬ ngaˬ hui cuˇ yiˍ cawˬ tuˬ Liꞈ hpu hkʼaw beˆ maˍ laˇ ve yoˬ. Chi hkʼoˆ kaꞈ, awˬ gʼuˇ suhˍ hpawˇ dawˇ law kuiˬ daꞈ jaˇ ve Yaˬhoˉvaˬ ngaˬ hui htaꞈ cawˬ tcuh laˇ sheˍ ve yoˬ. Yaꞈ hkʼaˇ, chi aꞈ kehˉ a yeˇ uiˍ jaˇ ve lehˬ Gʼuiˬ sha hkʼaˬ hkʼe ve Gʼuiˬ sha hpehꞈ ve leh yawˇ ve te hkʼaˇ dawˇ hkʼaˇ hkʼaˬ hkʼe cawˬ ve, Liꞈ hpu hkʼaw ngaˬ hui shiˍ tuˬ maˍ laˇ ve yoˬ. Ngaˬ hui lehˬ Gʼuiˬ sha ve te hkʼaˇ dawˇ hkʼaˇ daꞈ jaˇ ve teˇ hpaˍ htaꞈ caˉ daꞈ ve hkʼa dehꞈ dawˇ nyi htaˇ, ngaˬ hui dawˇ cawˇ jaˇ leh Yaˬhoˉvaˬ lehˬ ngaˬ hui ve awˬ chawˇ hkʼe hpehꞈ leh ngaˬ hui yawˇ geh meuˆ daꞈ tuˬ kaꞈ te laˇ ve yoˬ.—Chiˇ mvuh ve 25:14.

2. Yaˬhoˉvaˬ lehˬ chaw yaˇ yawˇ htaꞈ shiˍ daꞈ tuˬ awˬ hkʼaˇ hkʼaˬ hkʼe ve htaꞈ yehˇ ve le?

² Yaˬhoˉvaˬ lehˬ chaw yaˇ yawˇ htaꞈ shiˍ daꞈ tcuh gaˇ ve yoˬ. Liꞈ hpu ve awˬ co˗e htaˇ, Yaˬhoˉvaˬ lehˬ yawˇ a shu hpehꞈ ve tehꞈ chaw yaˇ shiˍ tuˬ, zuhꞈ maˆ leh mvuhˇ naw ma tcuh yaˇ htaꞈ yehˇ leh yawˇ hui htaꞈ kʼoˆ piˇ tcuh ve yoˬ. (Heh puiˉ hkʼaw 12:6; Tcuh yaˇ 10:3, 4) Yaꞈ hkʼaˇ, zuhꞈ maˆ leh mvuhˇ naw ma tcuh yaˇ ve tawˇ hkawˇ, maˇ bvuhꞈ keu taˍ ve kʼo, ngaˬ hui kaꞈ maˇ shiˍ gʼa. Chi htaꞈ pa taw, Yaˬhoˉvaˬ lehˬ chaw yaˇ htaꞈ “ngaˬ hkʼa kʼoˆ laˇ ve tawˇ hkʼa peu˗eˬ liꞈ kʼoˆ hkʼaw hkʼa dehꞈ bvuhꞈ keu taˍ˗oꞈ” tehꞈ kʼoˆ piˇ tcuh ve yoˬ. (Yeˍraˍmiˆ 30:2) Chi hkʼoˆ kaꞈ, ‘Gʼuiˬ sha te taˍ ve kanˉ teˇ hpaˍ daꞈ jaˇ’ ve pa taw, yawˇ ngaˬ hui htaꞈ maˍ laˇ ve awˬ ceuˬ leh yawˇ ve dawˇ hkʼaˇ daꞈ jaˇ leh ngaˬ hui awˬ pon awˬ bon cawˬ ve tehꞈ yonˍ gʼa ve yoˬ.—Chiˇ mvuh ve 18:30.

3. Liꞈ hpu chi beuꞈ teˇ co˗e hkʼa gaˬ cawˬ tuˬ, Yaˬhoˉvaˬ aˬ htoꞈ ma te ve le? (Iˉsaˍyaˆ 40:8)

³ Iˉsaˍyaˆ liꞈ 40:8 gʼaw sheˍ. Liꞈ hpu hkʼaw daꞈ jaˇ ve beˆ maˍ laˇ hkawˇ lehˬ, Gʼuiˬ sha ve kanˉ ka tiꞈ yeˬ ve hkʼaw te ve chaw htaꞈ beˆ maˍ piˇ ve laiˉ hinˉ hkʼawꞈ gaˬ˗oˬ ve yoˬ. Liꞈ hpu lehˬ chi maw maw hkʼaˬ hkʼe te cawˬ gʼa ve le? Awˬ tehˬ kʼo, Liꞈ hpu lehˬ luˬ puiˉ ve awˬ ceuˬ hkʼoˆ  bvuhꞈ taˍ ve yoˬ. Chi htaꞈ pa taw, awˉ lawˉ teˇ kʼoˆ bvuhꞈ taˍ ve chi beuꞈ teˇ co˗e maˇ cawˬ˗o. Yaꞈ hkʼaˇ, Yaˬhoˉvaˬ lehˬ teˇ caˉ peuˬ teˇ caˉ bvuhꞈ taˍ ve Liꞈ hpu cawˬ tcuh ve yoˬ. Bvuhꞈ taˍ ve chaw maˇ biˇ ve chaw hpehꞈ ve htawˇ, yawˇ hui hkʼa dehꞈ chaˬ nyi ve yoˬ. Liꞈ hpu hpawˇ cuˇ yiˍ cawˬ paˍ teˇ gʼaˇ Heˍbrehˇ ve Liꞈ hpu htaꞈ kʼoˆ ve, “oˇ htaˇ teˇ co˗e liꞈ bvuhꞈ taˍ ve hkʼaˬ ve teˇ kʼoˆ htawˇ maˇ kʼoˆ, Liꞈ hpu hkʼe taw cawˇ ve teˇ kʼoˆ˗ehˬ kaꞈ maˇ cawˬ tehꞈ ngaˬ kʼoˆ gʼa ve yoˬ.” Chi htaꞈ pa taw, Liꞈ hpu bvuhꞈ taˍ ve maw jaˇ˗oˬ ve htawˇ luˬ puiˉ ve awˬ hkʼoˆ bvuhꞈ taˍ ve pa taw, bvuhꞈ ve chaw kaꞈ maˇ biˇ ve chaw hpehꞈ ve yoˬ. Leh chi beuꞈ teˇ co˗e ve Liꞈ hpu hkʼaw ve awˬ lawn awˬ tanˇ lehˬ Liꞈ hpu htaꞈ dawˇ pawnˍ piˇ leh bvuhꞈ tcuh shehˍ hpaˇ Yaˬhoˉvaˬ ve dawˇ hkʼaˇ hpehꞈ ve tehꞈ ngaˬ hui yonˍ gʼa ve yoˬ.

4. Awˬ lawn chi ve hkʼaw ngaˬ hui aˬ htoꞈ ma htaꞈ henˇ tuˬ le?

⁴ Liꞈ hpu hkʼaw kʼoˆ ve, “daꞈ ve awˬ bon hkʼa peu˗eˬ leh, biˇ ve laꞈ shawnˍ hkʼa peu˗eˬ” Yaˬhoˉvaˬ geh laˬ ve yoˬ. (Yaˍkoˆ 1:17) Liꞈ hpu lehˬ Yaˬhoˉvaˬ ngaˬ hui htaꞈ peꞈ laˇ ve daꞈ jaˇ ve laꞈ shawnˍ hpehꞈ ve yoˬ. Ngaˬ hui laꞈ shawnˍ gʼa htaˇ laꞈ shawnˍ peꞈ laˇ ve chaw hkʼaˬ hkʼe hpehꞈ ve htaꞈ ngaˬ hui shiˍ tuˬ te laˇ ve yoˬ. Ngaˬ hui htaꞈ hkʼa dehꞈ shiˍ leh ngaˬ hui aˬ htoꞈ ma loˍ ve htaꞈ kaꞈ shiˍ ve yoˬ. Liꞈ hpu peꞈ laˇ shehˍ hpaˇ Gʼuiˬ sha kaꞈ hkʼa shuˍ yoˬ. Liꞈ hpu lehˬ Yaˬhoˉvaˬ geh gʼa ve laꞈ shawnˍ hpehꞈ leh ngaˬ hui gʼaw htaˇ, yawˇ htaꞈ caˉ daꞈ ve laiˉ ceuˬ ngaˬ hui gʼa henˇ ve yoˬ. Yaˬhoˉvaˬ ngaˬ hui htaꞈ hkʼa dehꞈ shiˍ leh ngaˬ hui aˬ htoꞈ ma loˍ ve kaꞈ shiˍ ve yoˬ. Yaˬhoˉvaˬ ve cuˇ yiˍ, hteˇ ve cawˇ ve, leh haꞈ pehnˇ ve htaꞈ caˉ daꞈ ve, Liꞈ hpu hkʼaw ngaˬ hui shiˍ tuˬ awˬ lawn chi ve hkʼaw teˇ geh henˇ tuˬ yoˬ. Awˉ lawˉ htaˇ Liꞈ hpu hkʼaw Yaˬhoˉvaˬ ve cuˇ yiˍ hkʼaˬ hkʼe hpeuꞈ maw laˇ ve ngaˬ hui shiˍ tuˬ teˇ geh henˇ tuˬ yoˬ.

5. Liꞈ hpu hkʼaw Yaˬhoˉvaˬ ve cuˇ yiˍ htaꞈ shiˍ tuˬ hkʼaˬ hkʼe hpeuꞈ maw laˇ ve le?

⁵ Yaˬhoˉvaˬ ve cuˇ yiˍ ngaˬ hui htaꞈ gʼa peˆ maˍ laˇ cawˇ ve tehꞈ yawˇ shiˍ ve yoˬ. Liꞈ hpu lehˬ Gʼuiˬ sha geh gʼa ve laꞈ shawnˍ hpehꞈ leh Liꞈ hpu hkʼaw Gʼuiˬ sha ve cuˇ yiˍ cawˬ maˇ jaˇ ve htaꞈ gʼa mawˬ ve yoˬ. Liꞈ hpu hkʼaw beˆ maˍ laˇ taˍ ve lehˬ chaw yaˇ awˬ pon awˬ bon cawˬ jaˇ. Liꞈ hpu lehˬ yawˇ hui ve a shaꞈ teꞈ hkʼaˇ htaꞈ pa piˇ gʼa ve yoˬ. Moˉseˍ htaꞈ dawˇ pawnˍ piˇ leh Liꞈ hpu awˉ lawˉ teˇ puꞈ bvuhꞈ tcuh htaˇ, yawˇ Iˉsaˍreˍlaˆ chaw htaꞈ kʼoˆ piˇ ve, “tawˇ oˇ ve teˇ hpaˍ lehˬ hkʼe leˇ hpehꞈ ve maˇ heˆ. Nawˬ hui ve a shaꞈ teꞈ kuiˬ hpehꞈ ve yoˬ.” (Bon maˍ ve 32:47) Liꞈ hpu hkʼaw beˆ maˍ laˇ taˍ ve htaꞈ na yuˬ ve chaw lehˬ a shaꞈ teꞈ kuiˬ hkʼaw ha lehˬ leh aˬ htoꞈ ma te ve htawˇ hkʼa dehꞈ te gʼa ve yoˬ. (Chiˇ mvuh ve 1:2, 3) Liꞈ hpu lehˬ bvuhꞈ taˍ ve laiˉ hinˉ hkʼawꞈ gaˬ˗oˬ ve htawˇ, chaw yaˇ ve a shaꞈ teꞈ kuiˬ hkʼaw daꞈ la tuˬ pa piˇ gʼa ve yoˬ. Tawˇ pa haˉ te kʼo, vehˆsaiˉ jw.org hkʼaw “Liꞈ hpu lehˬ a shaꞈ htaꞈ pa laˇ gʼa ve,” hpehꞈ laˬ jaw ve awˬ lawn 50 lawn hpaˆ cawˬ ve yoˬ. Awˬ lawn chi teˇ hpaˍ lehˬ, Liꞈ hpu kanˇ paˆ cawˬ leh chi beuꞈ teˇ co˗e ve ‘chaw Hkriꞈ yaˇ teˇ hpaˍ awˬ hkʼaw lo kanˉ te chehˇ ve’ tehꞈ hpeuꞈ maw laˇ ve yoˬ.—1 Hteˇsaˍlawˇniˆ 2:13.

6. Miˬ guiˬ hkʼoˆ lo Liꞈ hpu htaꞈ shuˍ ve liꞈ kʼoˆ maˇ cawˬ tehꞈ aˬ htoꞈ ma te ngaˬ hui kʼoˆ gʼa ve le?

⁶ Miˬ guiˬ hkʼoˆ lo Liꞈ hpu htaꞈ shuˍ ve awˬ nu ve liꞈ kʼoˆ maˇ cawˬ. Aˬ htoꞈ ma te ngaˬ hui chi hkʼe kʼoˆ gʼa ve le? Awˬ lawn kʼo, Liꞈ hpu lehˬ kanˇ paˆ uiˍ jaˇ ve Yaˬhoˉvaˬ geh laˬ ve yoˬ. Yawˇ lehˬ co co taiˍ taiˍ a shaꞈ teꞈ chehˇ leh cuˇ yiˍ cawˬ jaˇ ve Gʼuiˬ sha hpehꞈ ve yoˬ. Miˬ guiˬ hkʼoˆ lo awˬ nu ve liꞈ kʼoˆ laiˉ kʼoˆ bvuhꞈ paˍ lehˬ suh˗oˬ ve leh, liꞈ chi ve hkʼaw gʼaw ve chaw cawˬ sheˍ ve htawˇ, liꞈ chi ve chi teˇ hkui maˇ kʼawꞈ yehˇ gʼa˗o. Yaꞈ hkʼaˇ, Liꞈ hpu hkʼaw ve awˬ liˇ awˬ hkʼaˇ lehˬ teˇ co˗e peuˬ teˇ co˗e yehˇ gʼa sheˍ ve yoˬ. Hkʼaˬ ve teˇ co˗e htawˇ maˇ kʼoˆ, Liꞈ hpu hkʼaw bvuhꞈ taˍ ve hkʼaˬ htaˆ kaꞈ chaw yaˇ awˬ pon awˬ bon cawˬ ve yoˬ. Ngaˬ hui Liꞈ hpu gʼaw leh hkʼa dehꞈ dawˇ nyi htaˇ, Gʼuiˬ sha ve tawˇ hkawˇ ngaˬ hui a shaꞈ teꞈ kuiˬ hkʼaw hkʼaˬ hkʼe te yuˬ yehˇ gʼa tuˬ, Yaˬhoˉvaˬ daꞈ kehˬ ve awˬ ha hpu htaꞈ cuˇ leh ngaˬ hui mawˬ tuˬ ga laˇ ve yoˬ. (Chiˇ mvuh ve 119:27; Maˍlaˍhkiˆ 3:16; Heˍbrehˇ 4:12) Liꞈ hpu htaꞈ dawˇ pawnˍ piˇ shehˍ hpaˇ Yaˬhoˉvaˬ co co taiˍ taiˍ teꞈ chehˇ leh nawˬ htaꞈ ga laˇ gaˇ jaˇ ve yoˬ. Hkʼe te leh, ngaˬ hui teˇ nyi le le Liꞈ hpu gʼaw gaˇ tuˬ te laˇ ve yoˬ.

7. Oˇ htaˇ teˇ co˗e Yaˬhoˉvaˬ ve chaw teˇ moˍ tiˉ hpehꞈ tuˬ Liꞈ hpu hkʼaw hkʼaˬ hkʼe ga piˇ ve le?

 ⁷ Gʼuiˬ sha ve cuˇ yiˍ htaꞈ mawˬ tuˬ Liꞈ hpu hkʼaw ga laˇ ve teˇ hkʼaˇ lehˬ, Liꞈ hpu hkʼaw chaw yaˇ teˇ moˍ tiˉ hpehꞈ tuˬ ga piˇ ve yoˬ. Iˉsaˍreˍlaˆ chaw Gʼuiˬ sha ka tiꞈ te taˍ ve mvuhˇ miˬ hkʼaw loꞈ˗e htaˇ, yawˇ hui teˇ gʼaˇ teˇ kaˬ lo chehˇ kʼai ve yoˬ. Teˇ hpaˍ kʼo ngaˇ ca ve, teˇ hpaˍ kʼo to nuˇ to shaˆ hu leh teˇ hpaˍ kʼo ti mi leh heh te caˇ ve yoˬ. Iˉsaˍreˍlaˆ chaw teˇ gʼaˇ teˇ kaˬ chehˇ kʼai ve pa taw a yeˇ maˇ yuˬ daꞈ ve yoˬ. Chi htaꞈ pa taw, Gʼuiˬ sha ve awˬ liˇ tawˇ hkawˇ gʼaw maˍ piˇ ve htaꞈ ca na la tuˬ, Iˉsaˍreˍlaˆ chaw teˇ geh hpawnˬ daꞈ la tuˬ Yaˬhoˉvaˬ gu teh taˍ piˇ ve yoˬ. (Bon maˍ ve 31:10-13; Neˍhaˍmiˆ 8:2, 8, 18) Ka tiꞈ yeˬ ve Iˉsaˍreˍlaˆ chaw Yeˍruˆsaˍlehnˍ venˇ lo laˬ htaˇ, laiˉ kaˬ lo laˬ ve yonˍ hkʼaˇ hkʼa shuˍ˗ehˬ ve laiˉ lanˬ gʼaˇ htaꞈ yawˇ hui mawˬ daꞈ ve hkʼaˬ hkʼe dawˇ ve htaꞈ dawˇ nyi sheˍ. Chi ve lehˬ yawˇ hui teˇ moˍ tiˉ hpehꞈ tuˬ Yaˬhoˉvaˬ ga piˇ ve yoˬ. Awˉ lawˉ peuˇ ve Hkriꞈ yaˇ awˬ co˗e gaˬ leh Hkriꞈ yaˇ awˬ moˍ hkʼaw hawˉ hkʼaˆ leh yaˇ miˇ tawˇ hkawˇ maˇ shuˍ daꞈ ve, paw sha ve haˍ gʼawˇ ve kaꞈ maˇ shuˍ daꞈ ve htawˇ, yawˇ hui Liꞈ hpu htaꞈ haꞈ ve pa taw, teˇ moˍ tiˉ te leh Gʼuiˬ sha htaꞈ oˉ kʼoˍ pui ve yoˬ. Hkriꞈ yaˇ hpehꞈ la ve chaw Liꞈ hpu hkʼaw na gʼa tuˬ ga piˇ ve lehˬ, Gʼuiˬ sha htaꞈ oˉ kʼoˍ pui ve awˬ chawˇ yawˇ hui htaꞈ ga piˇ leh teˇ geh hpawnˬ daꞈ ve chaw kaꞈ yawˇ hui htaꞈ ga piˇ gʼa ve yoˬ.—Tcuh yaˇ 2:42; 8:30, 31.

8. Chi beuꞈ teˇ co˗e Yaˬhoˉvaˬ ve chaw teˇ moˍ tiˉ hpehꞈ tuˬ Liꞈ hpu hkʼaw hkʼaˬ hkʼe ga laˇ ve le?

⁸ Cuˇ yiˍ cawˬ jaˇ ve Gʼuiˬ sha lehˬ chi beuꞈ teˇ co˗e ngaˬ hui htaꞈ maˍ laˇ leh yawˇ ve chaw teˇ moˍ tiˉ hpehꞈ tuˬ, Liꞈ hpu htaꞈ yehˇ ve yoˬ. Gʼuiˬ sha htaꞈ caˉ daꞈ ve awˬ tehˬ ve teˇ ceuˬ le le Liꞈ hpu hkʼaw cawˬ leh ngaˬ hui teˇ gʼaˇ le le gʼa shiˍ cawˇ ve yoˬ. Liꞈ hpu  gʼaw leh Liꞈ hpu hkʼaw kʼoˆ maˍ laˇ taˍ ve htaꞈ na tuˬ, ngaˬ hui Hkriꞈ yaˇ awˬ moˍ hkʼaw hpawnˬ daꞈ ve leh hpawnˬ daꞈ lonˉ hkʼaw hkʼaˬ htaˆ kaꞈ kʼai ve yoˬ. Chi htaꞈ pa taw, Yaˬhoˉvaˬ yawˇ ve chaw htaꞈ ga piˇ leh “teˇ geh oˉ kʼoˍ kʼawꞈ pui gʼa tuˬ” Liꞈ hpu lehˬ a yeˇ uiˍ jaˇ ve laꞈ caˉ hpehꞈ ve yoˬ.—Zeˍhpaˍniˆ 3:9.

9. Ngaˬ hui Liꞈ hpu hkʼaw hkʼa dehꞈ na gʼa tuˬ hkʼaˬ hkʼe ve chaw gʼa hpehꞈ cawˇ ve le? (Luˉkaꞈ 10:21)

⁹ Yaˬhoˉvaˬ cuˇ yiˍ cawˬ jaˇ ve tehꞈ hpeuꞈ maw laˇ tuˬ, ngaˬ hui shaˉ hkiˆ teˇ ceuˬ htaꞈ teˇ geh nyi sheˍ. Liꞈ hpu hkʼaw bvuhꞈ taˍ ve laiˉ ceuˬ nyi ma nuˇ nehˬ ve chaw ceh tiˉ na gʼa ve yoˬ. (Luˉkaꞈ 10:21 gʼaw sheˍ.) Miˬ guiˬ chi hkʼoˆ lo a shu kaꞈ Liꞈ hpu ca leh gʼaw gʼa ve yoˬ. Liꞈ hpu hpawˇ cuˇ yiˍ cawˬ paˍ teˇ gʼaˇ kʼoˆ ve, “Liꞈ hpu lehˬ chaw yaˇ gʼaw maˇ jaˇ ve liꞈ hpehꞈ ve awˬ hkʼoˆ kaꞈ, hkʼa dehꞈ hpfuhˇ nyi leh henˇ tuˬ ve liꞈ kaꞈ hpehꞈ sheˍ ve yoˬ.” Yaꞈ hkʼaˇ, nyi ma nuˇ nehˬ ve chaw ceh tiˉ Liꞈ hpu htaꞈ na gʼa leh a shaꞈ teꞈ kuiˬ hkʼaw yuˬ yehˇ ve yoˬ.—2 Kawˇrenˍhtuˆ 3:15, 16.

10. Liꞈ hpu hkʼaw Yaˬhoˉvaˬ ve cuˇ yiˍ htaꞈ shiˍ tuˬ awˬ nu ve teˇ hkʼaˇ hkʼaˬ hkʼe ga laˇ ve le?

¹⁰ Liꞈ hpu hkʼaw Yaˬhoˉvaˬ ve cuˇ yiˍ htaꞈ shiˍ tuˬ awˬ nu ve teˇ hkʼaˇ kaꞈ ga laˇ sheˍ ve yoˬ. Yaˬhoˉvaˬ lehˬ Liꞈ hpu htaꞈ cuˇ leh yawˇ ve chaw hkʼa peu˗eˬ htaꞈ maˍ laˇ ve ceh tiˉ maˇ heˆ. Yaꞈ hkʼaˇ, ngaˬ hui teˇ gʼaˇ leh teˇ gʼaˇ htaꞈ maˍ laˇ leh awˬ gʼaˇ kaꞈ peꞈ laˇ sheˍ ve yoˬ. Ngaˬ hui Liꞈ hpu gʼaw htaˇ Gʼuiˬ sha teˇ gʼaˇ leh teˇ gʼaˇ htaꞈ a yeˇ yuˬ ve tehꞈ gʼa shiˍ ve yoˬ. (Iˉsaˍyaˆ 30:21) Nawˬ shoꞈ shaꞈ ve gʼa hpuˇ htaˇ, nawˬ gʼaw chehˇ ve Liꞈ hpu awˬ tawn nawˬ htaꞈ hawˍ daꞈ ve tehꞈ dawˇ˗aw laˇ? Yaˬhoˉvaˬ lehˬ Liꞈ hpu laiˉ lanˬ gʼaˇ awˬ pon bvuhꞈ piˇ tcuh taˍ ve htawˇ, chi ve hkʼaw beˆ maˍ laˇ taˍ ve teˇ ceuˬ ceuˬ nawˬ htaꞈ hawˍ daꞈ jaˇ ve aˬ htoꞈ ma pa taw le? Chi hkʼe hpehꞈ gʼa ve lehˬ, mvuhˇ naw ma miˬ naˆ ma htaꞈ hpanˍ shehˍ hpaˇ Gʼuiˬ sha lehˬ cuˇ yiˍ cawˬ jaˇ ve pa taw yoˬ.—2 Tiˆmoˉseˍ 3:16, 17.

11. Liꞈ hpu bvuhꞈ htaˇ Gʼuiˬ sha chaw mehˆ hpfuhˇ htaꞈ maˇ nyi ve tehꞈ hkʼaˬ hkʼe hpehꞈ maw laˇ ve le?

¹¹ Hteˇ ve cawˇ ve lehˬ, Yaˬhoˉvaˬ ve te hkʼaˇ dawˇ hkʼaˇ teˇ ceuˬ hpehꞈ ve yoˬ. (Bon maˍ ve 32:4) Liꞈ hpu hkʼaw maˇ˗awˍ ve kʼo hteˇ ve cawˇ ve chaw lehˬ chaw mehˆ hpfuhˇ htaꞈ maˇ nyi leh Yaˬhoˉvaˬ kaꞈ chi hkʼe hpehꞈ ve yoˬ. (Tcuh yaˇ 10:34, 35; Roˉmaꞈ 2:11) Yaˬhoˉvaˬ chaw mehˆ hpfuhˇ htaꞈ maˇ nyi ve tehꞈ ngaˬ hui shiˍ la tuˬ te laˇ ve lehˬ, Liꞈ hpu laiˉ chaw ceuˬ tawˇ hkawˇ yehˇ leh bvuhꞈ tcuh ve htaꞈ ngaˬ hui mawˬ gʼa ve yoˬ. Liꞈ hpu awˉ lawˉ 39 daw lehˬ Heˍbrehˇ hkawˇ bvuhꞈ leh Yaˬhoˉvaˬ ve chaw hkʼa dehꞈ na gʼa ve yoˬ. Hkriꞈ yaˇ ve awˬ co˗e gaˬ leh maˇ˗awˍ ve chaw Heˍlaˍsaˆ ve tawˇ hkawˇ yaw ve yoˬ. Chi htaꞈ pa taw, Liꞈ hpu hkʼaw 27 daw Heˍlaˍsaˆ hkawˇ bvuhꞈ taˍ ve yoˬ. Yaˬhoˉvaˬ lehˬ Liꞈ hpu teˇ chaw ceuˬ ve tawˇ hkawˇ ceh tiˉ bvuhꞈ tcuh taˍ ve maˇ heˆ. Chi beuꞈ teˇ co˗e Yaˬhoˉvaˬ htaꞈ oˉ kʼoˍ pui ve chaw 8 lanˬ gʼaˇ hpaˆ cawˬ leh laiˉ chaw ceuˬ tawˇ hkawˇ yaw ve yoˬ. Chaw chi ma ma ve Yaˬhoˉvaˬ ve awˬ lawn hkʼaˬ hkʼe te shiˍ gʼa ve le?

12. Daˍyeˍlaˆ liꞈ 12:4 hkʼaw awˬ leh meuˇ ve awˬ yanˇ htaˇ, teˇ ceuˬ ceuˬ awˬ tehˬ hkʼaˬ hkʼe hpehꞈ la ve le?

¹² Yaˬhoˉvaˬ lehˬ tcuh kaˍ paˍ Daˍyeˍlaˆ htaꞈ yawˇ ka tiꞈ te taˍ ve bvuhꞈ tcuh ve yoˬ. Awˬ leh meuˇ ve awˬ yanˇ htaˇ Liꞈ hpu hkʼaw “awˬ tehˬ ve cuˇ yiˍ maˇ maˇ” cawˬ leh laiˉ gʼaˇ chi ve htaꞈ na gʼa tuˬ yoˬ. (Daˍyeˍlaˆ 12:4 gʼaw sheˍ.) Liꞈ hpu hkʼaw ve cuˇ yiˍ maˇ maˇ cawˬ tuˬ te laˇ ve awˬ hkʼaˇ lehˬ, Liꞈ hpu leh Liꞈ hpu htaꞈ caˉ daꞈ ve liꞈ kʼoˆ liꞈ yuˬ tawˆ ve, liꞈ yanˍ tawˆ ve, leh maˇ maˇ piˇ ve yoˬ. Liꞈ hpu lehˬ awˬ nu ve liꞈ aꞈ kehˉ yuˬ tawˆ maˇ jaˇ leh chaw yaˇ htaꞈ piˇ maˇ jaˇ ve yoˬ. Yaꞈ hkʼaˇ, Liꞈ hpu yuˬ tawˆ taˍ ve teˇ kʼoˆ kʼoˆ kʼo, awˬ hpfuhˇ hkʼaˆ jaˇ. Chi hkʼoˆ kaꞈ, Yaˬhoˉvaˬ ve kanˉ te ve chaw Liꞈ hpu teˇ kʼoˆ hkʼa peu˗eˬ yuˬ tawˆ leh, teˇ hpaˍ hpaˍ kʼo Liꞈ hpu 240 chaw ceuˬ tawˇ hkawˇ hpaˆ yanˍ tawˆ˗oˬ ve yoˬ. Leh a shu teˇ gʼaˇ Liꞈ hpu heuˆ gaˇ ve kʼo awˬ hpfuhˇ maˇ peuˬ leh ca yuˬ la hpehꞈ ve yoˬ. Chi htaꞈ pa taw, chaw teˇ ceuˬ le le awˬ leh meuˇ ve awˬ yanˇ maˇ gaˬ la sheˍ htaˇ, “Gʼuiˬ sha ve mvuhˇ miˬ htaꞈ caˉ daꞈ ve ha lehˬ ve bon hkawˇ” gʼa shiˍ cawˇ ve yoˬ. (Maꞈhtehˍ 24:14) Hteˇ ve cawˇ ve Gʼuiˬ sha lehˬ chaw yaˇ maˇ maˇ yawˇ htaꞈ shiˍ tcuh gaˇ ve yoˬ. Yawˇ htaꞈ shiˍ gʼa ve awˬ hkʼaˇ lehˬ Liꞈ hpu gʼa gʼaw ve yoˬ.  Chi hkʼe te ve lehˬ chaw yaˇ teˇ gʼaˇ le le htaꞈ yawˇ haꞈ jaˇ ve pa taw yoˬ. Liꞈ hpu hkʼaw Yaˬhoˉvaˬ haꞈ pehnˇ ve htaꞈ gʼa mawˬ ve yoˬ.

13. Liꞈ hpu hkʼaw Yaˬhoˉvaˬ haꞈ pehnˇ ve hkʼaˬ hkʼe hpeuꞈ maw laˇ ve le? (Yoˇhanˬ 21:25)

¹³ Liꞈ hpu htaꞈ dawˇ pawnˍ piˇ shehˍ hpaˇ ve te hkʼaˇ dawˇ hkʼaˇ a yeˇ uiˍ jaˇ ve ngaˬ hui shiˍ tuˬ te laˇ ve lehˬ, haꞈ pehnˇ ve teˇ ceuˬ hpehꞈ ve yoˬ. (1 Yoˇhanˬ 4:8) Yaˬhoˉvaˬ Liꞈ hpu hkʼaw bvuhꞈ tcuh ve awˬ ceuˬ leh maˇ bvuhꞈ tcuh ve awˬ ceuˬ htaꞈ kaꞈ dawˇ nyi sheˍ. Yaˬhoˉvaˬ Liꞈ hpu hkʼaw bvuhꞈ tcuh ve awˬ ceuˬ lehˬ, ngaˬ hui yawˇ geh meuˆ daꞈ tuˬ, chi teˇ hkui ngaˬ hui ha lehˬ ve cawˬ tuˬ, leh ngaˬ hui co co taiˍ taiˍ ve a shaꞈ gʼa tuˬ kaꞈ ga laˇ gʼa ve yoˬ. Yaˬhoˉvaˬ ngaˬ hui htaꞈ haꞈ jaˇ ve awˬ hkʼoˆ kaꞈ, yawˇ te ve teˇ ceuˬ le le htaꞈ Liꞈ hpu hkʼaw maˇ bvuhꞈ keu tcuh taˬ.—Yoˇhanˬ 21:25 gʼaw sheˍ.

14. Liꞈ hpu hkʼaw Gʼuiˬ sha ngaˬ hui htaꞈ haꞈ ve tehꞈ hkʼaˬ hkʼe hpeuꞈ maw laˇ sheˍ ve le?

¹⁴ Chi hkʼoˆ kaꞈ, Yaˬhoˉvaˬ ngaˬ hui htaꞈ haꞈ ve tehꞈ hpeuꞈ maw laˇ ve lehˬ, yawˇ ngaˬ hui awˬ pon dawˇ nyi leh Liꞈ hpu hkʼaw bvuhꞈ tcuh taˍ ve yoˬ. Gʼuiˬ sha lehˬ ngaˬ hui gʼaꞈ te tuˬ awˬ liˇ chi ma ma maˇ teh laˇ leh ngaˬ hui a shaꞈ teꞈ kuiˬ hkʼaw teˇ hpawˇ le le te tuˬ maˇ nyiˉ laˇ ve yoˬ. Chi hkʼoˆ kaꞈ, ngaˬ hui cawˇ ve htaꞈ gʼaꞈ te gʼa tuˬ, hpehꞈ laˬ jaw ve awˬ lawn, tcuh kaˍ paˍ ve awˬ lawn, leh Liꞈ hpu hkʼaw daꞈ ve beˆ maˍ laˇ hkawˇ htaꞈ yuˬ yehˇ tcuh laˇ ve yoˬ. Chi ve htaꞈ pa taw, ngaˬ hui yawˇ htaꞈ haꞈ leh yawˇ ve hkawˇ nyi ma awˬ tawˬ hkʼa gaˬ na yuˬ gaˇ tuˬ te laˇ ve yoˬ.

15. (a) Liꞈ hpu hkʼaw Yaˬhoˉvaˬ ngaˬ hui htaꞈ a yeˇ yuˬ leh dawˇ haˍ jaˇ ve tehꞈ hkʼaˬ hkʼe hpeuꞈ maw laˇ ve le? (b) Awˬ han hkʼaw yaˇ miˇ ehˉ, awˬ viˉ awˬ nyi hawˉ hkʼaˆ leh chaw mawˇ Liꞈ hpu hkʼaw ve chaw a shu htaꞈ dawˇ nyi chehˇ ve le? (Awˬ hkuiˉ puiˍ 39:1, 10-12; 2 Jawˇmawˇ 5:1-3; Luˉkaꞈ 2:25-38)

¹⁵ Liꞈ hpu hkʼaw Yaˬhoˉvaˬ ngaˬ hui htaꞈ a yeˇ yuˬ leh dawˇ haˍ jaˇ ve tehꞈ hpeuꞈ maw laˇ ve lehˬ, Liꞈ  hpu hkʼaw ve chaw ve te hkʼaˇ dawˇ hkʼaˇ htaꞈ shiˍ tuˬ maˍ laˇ ve yoˬ. Oˇ htaˇ teˇ co˗e Liꞈ hpu hkʼaw ve chaw “ngaˬ hui hkʼa shuˍ shuˍ chaw yaˇ hpehꞈ ve” pa taw, yawˇ hui ve te hkʼaˇ dawˇ hkʼaˇ htaꞈ ngaˬ hui shiˍ gʼa ve yoˬ. (Yaˍkoˆ 5:17) A yeˇ uiˍ jaˇ ve lehˬ Yaˬhoˉvaˬ yawˇ hui htaꞈ te piˇ ve awˬ hkʼaˇ ngaˬ hui gʼa mawˬ htaˇ, “[Yaˬhoˉvaˬ] hkʼaˬ ma haꞈ leh ha kʼaˉ puiˉ ve htaꞈ” ngaˬ hui hkʼa tawˍ lehˆ gʼa mawˬ ve yoˬ.—Yaˍkoˆ 5:11.

16. Liꞈ hpu hkʼaw ve chaw teˇ hpaˍ te yaꞈ ve awˬ lawn ngaˬ hui gʼa gʼaw htaˇ, Yaˬhoˉvaˬ htaꞈ caˉ daꞈ ve ngaˬ hui htaꞈ hkʼaˬ hkʼe maˍ laˇ ve le? (Iˉsaˍyaˆ 55:7)

¹⁶ Liꞈ hpu hkʼaw Yaˬhoˉvaˬ ngaˬ hui htaꞈ haꞈ ve awˬ hkʼaˇ teˇ hkʼaˇ cawˬ sheˍ ve tehꞈ ngaˬ hui shiˍ tuˬ te laˇ ve yoˬ. Ngaˬ hui te yaꞈ ve htawˇ Yaˬhoˉvaˬ ngaˬ hui htaꞈ maˇ chiˇ baˬ laˇ taˬ tehꞈ ka tiꞈ te taˍ laˇ ve yoˬ. Iˉsaˍreˍlaˆ chaw Yaˬhoˉvaˬ htaꞈ laiˉ pawˆ te yaꞈ ve htawˇ, yawˇ hui venˇ baˆ dawˇ hpfuhˆ htaˇ, Yaˬhoˉvaˬ kaꞈ venˇ baˆ hpehˇ piˇ ve yoˬ. (Iˉsaˍyaˆ 55:7 gʼaw sheˍ.) Awˉ lawˉ peuˇ ve Hkriꞈ yaˇ kaꞈ hkʼa shuˍ shuˍ, Yaˬhoˉvaˬ yawˇ hui htaꞈ haꞈ jaˇ ve tehꞈ shiˍ ve yoˬ. Hawˉ hkʼaˆ teˇ gʼaˇ uiˍ jaˇ ve venˇ baˆ htaꞈ te yaꞈ jaw leh venˇ baˆ dawˇ hpfuhˆ˗oˬ htaˇ “yawˇ ve venˇ baˆ htaꞈ hpehˇ piˇ cawˇ leh, yawˇ htaꞈ kʼawꞈ dawˇ sha la piˇ cawˇ ve” tehꞈ tcuh yaˇ Pawˇluꞈ htaꞈ dawˇ pawnˍ piˇ leh Hkriꞈ yaˇ htaꞈ awˬ gʼaˇ piˇ tuˬ bvuhꞈ tcuh ve yoˬ. (2 Kawˇrenˍhtuˆ 2:6, 7; 1 Kawˇrenˍhtuˆ 5:1-5) Yaˬhoˉvaˬ ve kanˉ te ve chaw te yaꞈ ve htaꞈ pa taw, Yaˬhoˉvaˬ maˇ chiˇ baˬ piˇ ve ngaˬ hui ha lehˬ jaˇ. Yaꞈ hkʼaˇ, Yaˬhoˉvaˬ yawˇ hui htaꞈ haꞈ ve, yawˇ hui venˇ baˆ dawˇ hpfuhˆ tuˬ ga piˇ ve, leh yawˇ hui Yaˬhoˉvaˬ geh kʼawꞈ meuˆ daꞈ tuˬ ga piˇ ve yoˬ. Chi beuꞈ teˇ co˗e kaꞈ Yaˬhoˉvaˬ ve kanˉ te ve chaw te yaꞈ leh venˇ baˆ dawˇ hpfuhˆ ve teˇ gʼaˇ le le htaꞈ chi hkʼa shuˍ te piˇ tuˬ yoˬ tehꞈ yawˇ ka tiꞈ te taˍ laˇ ve yoˬ.—Yaˍkoˆ 4:8-10.

17. Aˬ htoꞈ ma te Liꞈ hpu lehˬ awˬ hpfuhˇ hkʼaˆ jaˇ ve laꞈ shawnˍ hpehꞈ ve le?

¹⁷ Yaˬhoˉvaˬ lehˬ ngaˬ hui htaꞈ awˬ hpfuhˇ hkʼaˆ jaˇ ve laꞈ shawnˍ peꞈ laˇ ve lehˬ, Liꞈ hpu hpehꞈ ve yoˬ. Aˬ htoꞈ ma te Liꞈ hpu lehˬ chi hkʼe taw taw awˬ hpfuhˇ hkʼaˆ jaˇ ve le? Awˬ lawn chi ve hkʼaw ngaˬ hui gʼa henˇ˗oˬ ve hkʼe, ngaˬ hui Gʼuiˬ sha ve cuˇ yiˍ cawˬ tuˬ, hteˇ ve cawˇ ve cawˬ tuˬ, leh haꞈ pehnˇ ve cawˬ tuˬ, Liꞈ hpu hkʼaw ngaˬ hui htaꞈ ga laˇ ve yoˬ. Ngaˬ hui Yaˬhoˉvaˬ htaꞈ shiˍ daꞈ tuˬ leh yawˇ geh awˬ chawˇ hpehꞈ tuˬ kaꞈ ga laˇ ve yoˬ.

18. Liꞈ hpu lehˬ Yaˬhoˉvaˬ geh gʼa ve “daꞈ ve” awˬ ceuˬ hpehꞈ ve tehꞈ ngaˬ hui awˬ hpfuhˇ shiˍ ve tehꞈ hkʼaˬ hkʼe te hpeuꞈ maw piˇ gʼa ve le?

¹⁸ Liꞈ hpu lehˬ Yaˬhoˉvaˬ geh gʼa ve “daꞈ ve” awˬ ceuˬ hpehꞈ ve pa taw, ngaˬ hui a yeˇ yuˬ gaˇ ve yoˬ. (Yaˍkoˆ 1:17) Chi htaꞈ pa taw, ngaˬ hui leuˉ leh Liꞈ hpu htaꞈ awˬ hpfuhˇ shiˍ tuˬ, Liꞈ hpu hkʼaˬ htaˆ kaꞈ gʼaw leh hkʼa dehꞈ dawˇ nyi ve yoˬ. Ngaˬ hui chi hkʼe te htaˇ, Liꞈ hpu htaꞈ dawˇ pawnˍ piˇ shehˍ hpaˇ Gʼuiˬ sha ngaˬ hui htaꞈ awˬ bon naꞈ laˇ leh “Gʼuiˬ sha awˬ lawn shiˍ maˇ la tuˬ yoˬ” tehꞈ ngaˬ hui yonˍ gʼa ve yoˬ.—Tawˇ naˉ ve 2:5.