1. Dahaka dainai Baibul na o moalelaiamu?

 ITA na ta moalemu badina Iehova Dirava ese Baibul e henida! Una buka lalonai, Iehova ese sisiba namodia e heni bona e durudamu hari ta davarimu hekwakwanaidia baita haheaukalaidia totona. Danu, vaira nega ena helaro namona e henida. Mai anina bada ḡauna na, Iehova ese Baibul amo iena kara namodia e hahedinarai. Iena kara namodia baita lalodia dobumu neganai, be hagoadadamu Ia baita hetura henia namonamo.​—Sal. 25:14.

2. Ededia dala ai Iehova ese ena kara e hahedinarai?

² Iehova na e uramu taunimanima ese ia bae dibaia. Guna, ia ese nihi, matahanai, bona aneru amo taunimanima ediai ena kara e hahedinarai. (Num. 12:6; Apos. 10:3, 4) To bema unu nihi, matahanai, eiava aneru edia hereva na basiema toredia diho, basitama stadilaidia diba. Una dainai, Iehova ese tatau haida e ḡaukaralaidia “buka ta ai,” e uramu baita diba ḡaudia e tore. (Ier. 30:2) Dirava ena dala na “hereadae dainai,” ta dibamu Baibul amo ita e hereva henidamu na dala hereadaena bona baine duruda diba.​—Sal. 18:30.

3. Edena dala ai Iehova ese Baibul na e gimaia? (Isaia 40:8)

³ Isaia 40:8 ba duahia. Laḡani tausen momo lalodiai Dirava ena Hereva ese abidadama tatau bona hahine na sisiba namodia e henidia. Una be ede e vara toma? Idaunegai Toretore Helaḡadia na bae dika haraḡa diba ḡaudia ai e toredia,  una dainai hari unu toretore gunadia na lasihidia. To Iehova ese dala e kara unu hereva helaḡadia edia kope momo na e toredia hanai. Ena be toretore taudia na dia ḡoḡoevadae, to edia ḡaukara na e karaia namonamo. Heḡereḡere, diba bada tauna ta ese Heberu Toretoredia e herevalaia, e gwa: “Ta dibamu idaunegai bukana ta na unu se torea hanai maoromaoro toma.” Momokani, ena be Dirava ena Hereva na bae dika haraḡa diba ḡaudia ai e tore, bona toretore taudia na dia ḡoḡoevadae, to ta abia daemu hari Baibul ai ta duahimu herevadia na Itorena Tauna, Iehova, ena lalohadai.   

4. Ina atikol ai dahaka baita herevalaimu?

⁴ Iehova ese “harihari ḡaudia namodia iboudiai bona herahia ḡaudia ḡoevadaedia iboudiai” e henidamu. (Iak. 1:17) Baibul na Iehova ese e heni harihari ḡauna hereadaena ta. Bema ta ese harihari ḡauna ta e henidamu, una harihari ḡauna ese e hahedinaraiamu, ia na mai dibana ita bona eda dabu ḡaudia danu mai dibana. Baibul e heni Tauna danu unu bamona. Baibul baita stadilaiamu neganai, Iehova baita dibaia namonamomu. Baita lalopararamu ia na mai dibana namonamo ita bona eda dabu ḡaudia danu mai dibana. Ina atikol ai, Baibul ese Iehova ena kara toi e hahedinarai daladia baita herevalaimu, unu na aonega, hahemaoro maoromaoro, bona lalokau. Mani Baibul ese Dirava ena aonega e hahedinaraia dalana aita herevalaia guna.

5. Edena dala ai Baibul ese Dirava ena aonega e hahedinaraiamu?

⁵ Iehova na mai dibana ena aonega sisibadia baita abi na namo. Bona iena harihari ḡauna, Baibul, na aonega herevadia amo e honu. Baibul ena sisiba ese taunimanima e durudiamu bona edia mauri e haidaumu. Mose ese Baibul bukadia ginigunadia e tore neganai, Israel taudia e hamaorodia, eto: “Ina na dia ḡau pipikina emui ai. Ina na emui mauri.” (Deu. 32:47) Toretore Helaḡadia e badina taudia ese mauri namona e moalelaia. (Sal. 1:2, 3) Ena be Baibul na idaunegai e torea, to ia na mai siahuna taunimanima edia mauri baine hanamoa. Heḡereḡere, jw.org ai ina kaha “The Bible Changes Lives” ai, taunimanima 50 mai kahana sivaraidia baita davarimu. Unu ese e hahedinaraimu Baibul na abidadama taudia ‘lalodia ai e ḡaukaramu.’​—1 Tes. 2:13.

6. Dahaka dainai baita gwau dibamu Baibul na dia buka haida heḡereḡeredia?

⁶ Baibul na dia buka haida heḡereḡeredia. Dahaka dainai? Badina Baibul Itorena Tauna, Iehova, na siahu idoinai Diravana, e noho hanaihanaimu, bona ena aonega na asi ihaheḡereḡerena. Buka idaudia momo e tore taudia be vada e mase, bona unu buka ai e tore sisibadia na vada asi anidia taunimanima ediai. To, Baibul ai aonega sisibadia na e mia hanaihanaimu, bona nega idauidau ai taunimanima e durudiamu. Una buka helaḡana ta duahiamu bona ta dibaiamu ḡauna ta laloa dobumu neganai, Itorena Tauna ese ena lauma helaḡa amo e durudamu, Baibul ena sisiba ibadinadia dalana ta lalopararalaiamu. (Sal. 119:27; Mal. 3:16; Heb. 4:12) Oibe, Baibul Itorena Tauna na e ura dikadikamu oi baine durumu. Una ese e hagoadadamu Baibul baita duahia hanaihanai!

7. Guna Baibul ese Dirava ena taunimanima be ede e hatamonadia toma?

⁷ Baibul ese Dirava ena aonega e hahedinaraiamu dalana ma ta na, Dirava ena taunimanima e hatamonadiamu. Israel taudia na Gwauhamata Tanona ai e vareai neganai, idia na kaha idauidau ai e nohova. Haida na haoda taudia, haida na boromakau e nariva, bona  ma haida be biru taudia. Hanua ta ai e nohova Israel taudia ese hanua ma ta ai e nohova Israel taudia na reana basiema lalodia bada. To, Iehova na dala e kara Israel taudia na nega idauidau ai bae hebou, bena iena Hereva bae duahia bona bae herevalaia. (Deu. 31:10-13; Neh. 8:2, 8, 18) Mani a laloa, abidadama Israel tauna ta na Ierusalem ai e kauva bona gabu idauidau amo e maiva tadikakadia milion momo e itadiava neganai, e moaleva! Iehova ese ena taunimanima na una dala amo e durudia lalotamona ai bae noho. Gabeai, Kristen kongrigeisin e matama neganai, ia lalonai e nohova tataudia bona hahinedia na gado idauidau e herevalaiva. Idia haida be lada bada taudia, haida be taḡa taudia, bona ma haida be ogoḡami taudia. To idia ese Toretore Helaḡadia na e ura heniva dainai, lalotamona ai Dirava momokanina e tomadiho heniava. Abidadama taudia matamatadia ese Dirava ena Hereva na e lalopararalaiava, badina tadikaka ese e durudiava bona idia ida e hebouva.​—Apos. 2:42; 8:30, 31.

8. Hari ina negai Baibul ese Iehova ena taunimanima be ede e hatamonadia tomamu?

⁸ Eda aonega Diravana ese ena taunimanima na Baibul amo e hadibadiamu bona e hatamonadiamu. Baibul ese Iehova sivaraina momokanidia e herevalai bona baita dibadia na namo. Hanaihanai kongrigeisin heboudia bona hebou badadia ta laomu, unu amo Baibul bae duahia bona anina bae herevalaia neganai  baita kamonai. Una dala amo Iehova ese Baibul e ḡaukaralaiamu ia e tomadiho heniamu taudia e durudiamu, “mai lalodia tamona ida” ia bae hesiai henia totona.​—Sef. 3:9.

9. Edena kara ese baine duruda Baibul baita lalopararalaia? (Luka 10:21)

⁹ Mani Iehova ena aonega e hahedinaraiamu dalana ma ta aita laloa. Ia ese Baibul kahana momo e toredia dalana na manau taudia ese bae lalopararalaia diba. (Luka 10:21 ba duahia.) Gabu iboudiai lalodiai taunimanima ese Baibul na e duahiamu. Diba bada tauna ta na e gwa, Baibul na “momo ese dia e duahiamu mo, to danu, e duahia namonamomu bukana.” To manau taudia sibodia mo ese Baibul na e lalopararalaia namonamomu bona e badinaiamu.​—2 Kor. 3:15, 16.

10. Baibul ese Iehova ena aonega e hahedinaraiamu dalana ma ta be dahaka?

¹⁰ Baibul ai Iehova ena aonega na dala ma ta ai baita dibaiamu. Iehova ese Baibul amo dia grup ai mo e hadibadamu, to ta ta danu e hadibadamu bona e hagoadadamu. Iena Hereva ta duahiamu neganai, ta mamiamu ia ese ita ta ta na e laloda badamu. (Isa. 30:21) Hekwakwanai ta o davariamu neganai, oi be nega hida Baibul o duahiamu bona o mamiamu o duahia sirina na oi daimu ai e torea? Baibul na taunimanima milion momo ese bae lalopararalaia diba. Dahaka dainai Baibul ai e tore herevadia ese oi na e durumumu? Badina aonega Tauna hereadaena ese Baibul e torea.​—2 Tim. 3:16, 17.

11. Baibul e torea neganai edena dala ai Dirava ese e hahedinaraia taunimanima toadia na se lalo?

¹¹ Iehova ena kara badana ta na hahemaoro maoromaoro. (Deu. 32:4) E hahemaoro maoromaoromu tauna ese taunimanima toadia na se lalomu, bona Iehova na unu bamona. (Apos. 10:34, 35; Roma 2:11) Baibul na una nega ai momo ese e herevalaiva gadodia ai e torea, una ese e hahedinaraia Dirava ese taunimanima toadia na se lalo. Baibul bukadia ginigunadia 39 kahana badana na Heberu gado ai e tore, una na Dirava ena taunimanima ese e lalopararalaiava gadona. To, Kristen ginigunadia edia negai, momo na Grik gado ai e herevava dainai, Baibul bukadia ginigabedia 27 na una gado ai e tore. Iehova na dia gado tamona mo e abia hidi ena Hereva bae torea totona. Hari ina negai, taunimanima 8 bilion heḡereḡerena na gado idauidau ai e herevamu. Taunimanima momo ese Iehova be ede bae dibaia toma?

12. Edena dala ai Daniel 12:4 ena hereva na ini dina gabedia ai e ḡuḡurumu?

¹² Peroveta tauna Daniel amo Iehova na e gwauhamata, “dokona negana” ai taunimanima momo na Baibul ai edia “lalo-parara bae habadaia.” (Daniel 12:4 ba duahia.) Baibul bona Baibul e herevalaimu bukadia e hahanaimu, e halasimu, bona e hariharilaimu dainai, taunimanima na una dala amo edia laloparara e habadaiamu. Tanobada heḡeḡemadai Baibul na gado momo ai e hahanaiamu bona e hariharilaiamu. Bisnes oreadia haida ese Baibul e halasimu neganai, nega haida davadia na babada. Iehova ena taunimanima ese Baibul ibounai o kahana na gado 240 mai kahana e hahanaidia, bona taunimanima na kope ta bae abia diba asi davana. Una dainai, dokona do se kau ai, taunimanima iboudiai ese “Basileia sivaraina namona” na e kamonaiamu. (Mat. 24:14) Hahemaoro maoromaoro Diravana na e uramu taunimanima momo na iena Hereva bae duahia bona ia bae dibaia namonamo. Una ese e hahedinaraiamu ita iboudai na e lalokau henida badamu.

13. Dahaka dainai baita gwau dibamu Baibul ese Iehova ena lalokau e hahedinaraiamu? (Ioane 21:25)

¹³ Baibul ese Itorena Tauna ena kara badana, lalokau, e hahedinaraiamu. (1 Ioa. 4:8) Mani Iehova ese Baibul ai e tore ḡaudia bona se tore ḡaudia aita lalodia. Ia ese Baibul ai ita iduruda herevadia e tore, unu amo ia baita hetura henia, mauri namona baita moalelaia, bona mauri hanaihanai baita abia. To, ita na e lalokau henidamu dainai, basie duruda diba herevadia na se tore.​—Ioane 21:25 ba duahia.

14. Edena dala ma ta ai Baibul ese Dirava ena lalokau e hahedinaraiamu?

¹⁴ Iehova ese ena lalokau e hahedinaraiamu dalana ma ta na, mai ena hemataurai ida ita e hereva henidamu. Ia ese Baibul lalonai taravatu maraḡi-maraḡidia momo herea na se ato, eda mauri baine biagua totona. To, sivarai korikoridia, peroveta herevadia, bona sisiba namodia amo ita e durudamu abi hidi maorodia baita kara. Unu amo, Dirava ena Hereva ese e hagoadadamu mai kudouda ibounai ida ia baita lalokau henia bona baita badinaia.

15. (a) Edena dala ai Iehova ese Baibul e duahiamu taudia na e lalodia badamu? (b) Laulau ai, kekeni maraḡina, eregabe tadikakana, bona taihu burukana be daidia sivaraidia e lalodia dobumu? (Gen. 39:1, 10-12; 2 Han. 5:1-3; Luka 2:25-38)

¹⁵ Baibul ese e hahedinaraiamu Iehova ese ita na e laloda badamu. Edena dala ai? Baibul lalonai sivarai momo ese taunimanima edia hemami e hahedinaraidia. Baibul ese e herevalaidia taudia edia hemami na ta lalopararalaiamu, badina idia na taunimanima mo, “ita bamoda.” (Iak. 5:17) Mai anina bada ḡauna na, Iehova ese idia e kara henidia dalana baita  stadilaiamu neganai, baita lalopararamu ia na hebogahisi bona lalokau Diravana.​—Iak. 5:11.

16. Kerere e kara taudia sivaraidia Baibul ai ta duahimu neganai, Iehova enai dahaka ta dibamu? (Isaia 55:7)

¹⁶ Baibul ese dala ma ta ai, Iehova ena lalokau e hahedinaraiamu. E hadibadamu ena be baita kereremu to Dirava ese ita na basine rakatanidamu. Israel taudia na Iehova vairanai e kara dika loulouva, to e helalo-kerehai momokani neganai, Dirava ese edia dika na e gwautao. (Isaia 55:7 ba duahia.) Kristen ginigunadia danu e diba Dirava ese idia na e lalokau henidia badava. Aposetolo Paulo na lauma helaḡa ena heduru amo tadikakana e hagoadadia, kara dika badana ta e karaia to e helalo-kerehai tauna ena ‘dika bae gwau tao bona tauna bae haloa.’ (2 Kor. 2:6, 7; 1 Kor. 5:1-5) Iehova ese ia e tomadiho heniava taudia e kerereva neganai se rakatanidiava, to mai ena lalokau ida e durudiava, e sisiba henidiava, bona e boiridia louva ia turana ai baela. Ia na e gwauhamata hari ina negai edia dika amo e helalo-kerehaimu taudia iboudiai danu unu baine kara henidia toma.​—Iak. 4:8-10.

17. Dahaka dainai Baibul na harihari ḡauna hereadaena?

¹⁷ Iehova ese ita na harihari ḡauna hereadaena ta e henida. Dahaka dainai iena Hereva na hereadae? Ina stadi ai tame diba, Baibul ese Dirava ena aonega, hahemaoro maoromaoro, bona lalokau e hahedinaraidia. Danu, e hahedinaraiamu Iehova na e uramu ia baita dibaia bona turana ai baitala.

18. Edena dala ai baita hahedinaraia Iehova ena ‘harihari ḡauna,’ Baibul na ta laloa badamu?

¹⁸ Namona na baita laloatao, Dirava ena Hereva na ‘harihari ḡauna namona’ ta. (Iak. 1:17) Una dainai, hanaihanai baita hahedinaraia una harihari ḡauna na ta laloa badamu. Una baita karaia totona, namona na Baibul baita duahia bona baita laloa dobu. Unu amo baita dibamu Baibul Itorena Tauna badana ese eda hekwarahi na be hanamoamu bona ‘Dirava idibana baita davariamu.’​—Her. 2:5.