1. Bõe yĩng tɩ d sũur noom d sẽn paam tɩ Wẽnnaam kõ-d a Gomdã?

 D SŨUR nooma wʋsgo, d sẽn paam tɩ d Wẽnnaam a Zeova kõ-d a Gomdã sẽn yaa Biiblã. A tũnugda ne Biiblã n kõt tõnd sagls sẽn tõe n sõng-d tɩ d mao ne rũndã-rũndã zu-loeesã. A leb n kɩtame tɩ d saagdẽ tɩ beoog na n yɩɩ neere. Sẽn yɩɩd fãa, a Zeova tũnugda ne Biiblã, n vẽnegd tõnd a sẽn sɩd yaa Wẽnnaam ningã. D sã n bʋgs a zʋg-sõma wã zugu, d na n data ne d sũur fãa n pẽneg-a, n paam n lebg a zoa meng-menga.—Yɩɩn. 25:14.

2. Ne manesem bʋs la a Zeova tũnug ne n sõng nebã tɩ b bãng a sẽn yaa Wẽnnaam ningã?

² A Zeova ratame tɩ nebã fãa bãng-a. Pĩnd wẽndẽ wã, a tũnuga ne zãmsdo, vẽnegre, la malɛgse, n sõng nebã tɩ b bãng a sẽn yaa Wẽnnaam ningã. (Sõd. 12:6; Tʋʋ. 10:3, 4) Tags-y n ges-y b sã n da pa gʋlsẽ zãmsdã, vẽnegrã, la malɛgsã sẽn taas koees ninsã. D ra na n bãnga rẽ sɩda? Rẽ n so t’a Zeova kɩt tɩ rap “gʋls” bũmb nins a sẽn dat tɩ d bãngã “sebr pʋgẽ.” (Zer. 30:2) ‘Wẽnnaam soayã sẽn zems zãngã’ yĩnga, d tõe n basa d yam t’a sẽn tũnugd ne bũmb nins n taasd tõnd a koeesã sõmblem ka to, la nafda tõndo.—Yɩɩn. 18:31.

3. Bõe la a Zeova maan n sõng tɩ Biiblã ket n be hal ne rũndã? (Ezayi 40:8)

³ Karm-y Ezayi 40:8. Yʋʋm tusa la woto, pagb la rap sẽn yaa wẽn-sakdb sẽn paamd sagls sẽn yaa sõma ne Wẽnnaam Gomdã maasem. Wãn to? Sɩngrẽ wã, b gʋlsa Wẽnnaam Gomdã seb-pindem zutu. La kaoosg zugẽ, fãa wa n sãamame tɩ baa a ye pa le ket rũndã-rũndã ye. La ne a Zeova sõngre, neb n da get seb-kãens n lebsd n gʋlsd n  yɩlemdẽ. Baa nin-kãensã sẽn yaa neb sẽn pa zems zãngã, b ra maanda gũusg wʋsgo. Biibl-mit a ye goma Biiblã babg ning b sẽn da gʋls ne Ebre wã yell n yeel yaa: “D tõe n yeelame tɩ pĩnd wẽndẽ sɛbã b sẽn lebs n gʋls tɩ ket n be rũndã-rũndã wã sʋka, Biiblã bal goamã n kell n zems kɛpɩ ne a sẽn da yaa to-to pĩnd wẽndẽ wã.” Dẽnd baa ne Biiblã sẽn kaoosã, tɩ b sẽn gʋls a goamã teed nins zugã ra yaa teed sẽn sãamdã, tɩ neb nins sẽn ges n lebs n gʋls Biiblã me ra pa zems zãngã, d tõe n kɩsa sɩd tɩ goam nins d sẽn karemd Biiblã pʋgẽ rũndã-rũndã wã yaa a Zeova sẽn yaa soab ning sẽn kɩt tɩ b gʋls-a wã tagsa.

4. Bõe yell la d na n gom sõs-kãngã pʋgẽ?

⁴ “Kũun sẽn yaa sõma buud fãa, la kũun sẽn zems zãng buud fãa” yita a Zeova nengẽ. (Zak 1:17) Biiblã me yaa kũun sẽn ka to a Zeova sẽn kõ-do. Ned sã n kõ-d kũuni, wilgdame t’a soabã mii tõndo, la a mi sẽn yaa sõma ne-dã. Yaa woto me ne a Zeova, soab ning sẽn kõ-d Biiblã. D sã n bao n bãng a kũunã sõma, d bãngda bũmb wʋsg a Zeova zugu. Wala makre, d bãngdame t’a Zeova mii tõnd sõma, la a mi sẽn yaa sõma ne-dã. Sõs-kãngã pʋgẽ, d na n yãa a Zeova zʋg-sõma a tãab Biiblã sẽn sõngd tõnd tɩ d bãnge. Yaa a yamã, a tɩrlmã, la a nonglmã. Bɩ d reng n ges Biiblã sẽn sõngd tõnd to-to tɩ d bãng tɩ Wẽnnaam yamã ka to ye.

5. Bõe la Biiblã tõe n maane, tɩ wilgdẽ tɩ Wẽnnaam yamã ka to?

⁵ A Zeova miime t’a saglsã yaa tɩlɛ ne-do. Biiblã sẽn yaa a kũunã pida ne sagls sẽn wilgd t’a yamã ka to ye. Biiblã saglsã nafda neba. A toeemda neb vɩɩm. A Moyiiz sẽn wa n gʋls Biiblã pipi sɛb a nu wã n sa wã, a goma rẽ yell ne Israyɛll nebã sẽn da yaa Wẽnnaam nin-buiidã, n yeel yaa: “Yaa bõn-kãseng ne yãmba. B yaa yãmb vɩɩm.” (Tõo. 32:47) Neb nins sẽn sak Wẽnnaam Gomdã paama vɩɩm sẽn tar barka, la sũ-noogo. (Yɩɩn. 1:2, 3) Baa sẽn yaa hal pĩnd wẽndẽ la b gʋls Wẽnnaam Gomdã, a ket n tõe n toeema ned vɩɩm. Wala makre, y sã n kẽ jw.org pʋgẽ, n ges sõss nins gom-zug sẽn yaa “Biiblã toeemda neba,” y na n yãa neb wʋsg vɩɩm kibay sẽn wilgd tɩ Biiblã tara pãnga, n ‘tʋmd tẽedbã pʋsẽ rũndã-rũndã.’—1 Tes. 2:13.

6. Bõe yĩng tɩ d tõe n yeel tɩ sebr ka be n yaa wa Biiblã?

⁶ Sebr ka be n yaa wa Wẽnnaam Gomdã ye. Bõe yĩng tɩ d yet woto? Bala yaa Wẽnnaam a Zeova sẽn yaa pãng sẽn ka to soabã, soab ning sẽn be wakat fãa wã, t’a yamã me ka koakã n kɩt tɩ b gʋls-a. Sɛb wʋsg n be rũndã-rũndã, tɩ neb nins sẽn kɩt tɩ b gʋls-bã maan kaalem, tɩ saglsã sẽn be b pʋsẽ wã me pa le tar yõod ye. La Biiblã saglsã paada wakat fãa, la naf neb buud toor-toor hal pĩnd n tãag masã. D sã n karemd Biiblã la d bʋgsd a zugu, Wẽnnaam sẽn yaa soab ning sẽn kɩt tɩ b gʋls-a wã tũnugda ne a vʋʋsem sõngã n sõngd tõnd tɩ d tũud a saglsã d vɩɩmã pʋgẽ. (Yɩɩn. 119:27; Mal. 3:16; Ebre. 4:12) Sɩda, Wẽnnaam sẽn yaa Biiblã soabã tʋll n sõng-d lame. Woto yaa bʋʋm sẽn kɩt tɩ d segd n karemd Biiblã wakat fãa.

7. Wãn to la Biiblã sõng Wẽnnaam nin-buiidã pĩndã, tɩ zems-n-taar da be b sʋka?

⁷ Bũmb a to me n yaa kaset tɩ Biiblã wilgdame tɩ Wẽnnaam yamã ka to ye. Yaa a sẽn sõngd Wẽnnaam nin-buiidã tɩ zems-n-taar be b sʋkã. Israyɛll nebã sẽn wa n kẽ Kãabg tẽngẽ wã, ned fãa tɩ zĩnda zĩig toore. Kẽer da yaa zĩm-yõgdba, tɩ sãnda  gʋʋnd rũmsi, t’a taab ra yaa ka-koaadba. Neb nins sẽn da be zĩ-yɛngã ra tõe n nooma ne taaba, tɩ b toog ka le be ne sẽn be-b zĩ-zãrsẽ wã ye. La a Zeova gesame tɩ Israyɛll nebã fãa ra tõe n tigim taab wakat kẽere, n kelg Wẽnnaam Gomdã karengo, la a võorã bilgri. (Tõo. 31:10-13; Nee. 8:2, 8, 18) Mams-y y yamẽ Israyɛll ned sũur sẽn da noom to-to, a sã n da ta Zerizalɛm n yã a tẽed-n-taas milyõ-rãmb sẽn yi zĩis toor-toor n wa n na n tigim taabã. A Zeova sẽn maan woto wã, sõngame tɩ zems-n-taar zĩnd a nin-buiidã sʋka. Kaoosg zugẽ, b sẽn wa n lugl kiris-neb tigingã, pagb la rap sẽn yit zĩis toor-toore, n gomd buud-goam toor-toore, tɩ b tarmã me pa yembr n da yaa tigingã neba. La b sẽn da nong Gʋls-sõamyã, kɩtame tɩ b ra naagd taab n tũud Wẽnnaam sɩd-sɩdã, tɩ zems-n-taar be b sʋka. Neb kẽer wʋma Wẽnnaam Gomdã võore, n wa lebg tẽedba. La tũu ne b tẽed-n-taasã sõngre, la b sẽn da tigimd ne-bã me.—Tʋʋ. 2:42; 8:30, 31.

8. Wãn to la Biiblã sõngd Wẽnnaam nin-buiidã rũndã-rũndã tɩ b zemsd taaba?

⁸ Ne Biiblã maasem, d Wẽnnaamã sẽn yaa yam-kãseng soabã ket n zãmsda a nin-buiidã, la a sõngd-b tɩ b zemsd taaba. Bũmb nins fãa d sẽn segd n bãng a Zeova zugã bee Biiblã pʋgẽ. D tigissã la d tigis-kãsemsã sasa, b karemda Wẽnnaam Gomdã la b bilgd a võorã tɩ d kelgdẽ, la d sõsd a zugu. Biiblã sõngdame tɩ  Wẽnnaam daabã sẽn yaa a nin-buiidã naag taab n ‘waoogd-a ne yam a yembrã’ paamd pidsgu.—Sof. 3:9.

9. Sẽn na yɩl n wʋm Biiblã goamã võore, yaa tɩlɛ tɩ d bɩɩs zʋg-sõng bʋgo? (Luk 10:21)

⁹ D ges bũmb a to sẽn wilgd t’a Zeova yamã ka to ye. A kɩtame tɩ b gʋls Biiblã babs kẽere, tɩ yaa sik-m-mens rãmbã bal n tõe n wʋm a võore. (Karm-y Luk 10:21.) Ned sẽn be zĩig ning fãa tõe n paama Biiblã n karme. Seb-mit a ye yeelame tɩ “dũniyã gill zugu, Biiblã la sebr ning nebã wʋsg sẽn karemd n tɩ yɩɩdã. La pa rẽ bal ye. Leb n yaa sebr ning nebã sẽn maagd b yĩng n zãmsd n tɩ yɩɩdã.” La yaa sik-m-mens rãmbã bal n sɩd wʋmd a goamã võore, la b tũud a sẽn yetã.—2 Kor. 3:15, 16.

10. Bõe me n be Biiblã pʋgẽ n wilgdẽ t’a Zeova yamã ka to?

¹⁰ Bũmb a to me n be Biiblã pʋgẽ n wilgdẽ t’a Zeova yamã ka to ye. Yaa sɩd t’a Zeova zãmsda a nin-buiidã fãa sẽn naag taabã ne a Gomdã maasem. La a tũnugda ne a Gomdã me n zãmsd d ned kam fãa yembr-yembre, la a belsd tõndo. D sã n karemd Biiblã, d yãtame tɩ d ned kam fãa yell paka a Zeova. (Eza. 30:21) Y zu-loɛɛg sasa, y pa mi n karem vɛrse, tɩ yaa wa b gʋls-a-la yãmb yĩng sɩda? B yaool n gʋlsa Biiblã neb milyõ-rãmb yĩnga. Dẽnd maana wãn tɩ y sẽn karem bũmb ningã kell n zems ne yãmb sẽn da ratã bal kɛpɩ? Bala, soab ning sẽn kɩt tɩ b gʋls Biiblã yamã ka to ye.—2 Tɩm. 3:16, 17.

11. Biiblã wɛɛngẽ, bõe la Wẽnnaam maan tɩ wilgdẽ t’a pa tũusd neba?

¹¹ Tɩrlmã yaa a Zeova zʋg-sõng a to. (Tõo. 32:4) Ned sẽn yaa tɩrlem soab pa bakd neb ye. A Zeova pa tũusd neb ye. (Tʋʋ. 10:34, 35; Rom. 2:11) B sẽn gʋls Biiblã buud-goam wʋsg pʋgẽ wã wilgda rẽ. Biiblã pipi sɛb 39 wã fãa la bal ra gʋlsa ne Ebre buud-gomdã. Ra yaa buud-gom-kãng la Wẽnnaam nin-buiidã ra gomd wakat kãnga. La pipi kiris-nebã wakatẽ, ra yaa Gɛrk buud-gomdã la neb wʋsg ra gomd n tɩ yɩɩda. Dẽnd yaa buud-gom-kãng pʋgẽ la b gʋls Biiblã sɛb 27 wã fãa la bal sẽn da ketã. A Zeova pa kɩt tɩ yaa buud-gomd a ye pʋgẽ bal la b gʋls a Gomdã ye. Rũndã-rũndã, dũniyã gill zugu, nebã sõorã kolga milyaar a 8, n gomd buud-goam toor-toore. Dẽnd nin-kãensã fãa ra na n maana wãn n bãng a Zeova?

12. Wãn to la Dãniyɛll 12:4 paamd pidsg yaoolem wakatã?

¹² A Zeova tũnuga ne no-rɛɛs a Daniyɛll n yeel tɩ dũniyã saab wakate, neb wʋsg na n karma Wẽnnaam Gomdã n “paam bãngr n paase,” rat n yeel tɩ bãngr hakɩɩkã. Neb wʋsg na n wʋma Biiblã goamã võore. (Karm-y Dãniyɛll 12:4.) Bũmb a ye sẽn kɩt tɩ bãngr hakɩɩkã lebgd wʋsgã, yaa b sẽn lebgd Biiblã ne sɛb sẽn tik Biiblã zugu, n ẽnpirimd-ba, la b pʋɩt nebã dũniyã gill zugã. Biiblã n yaa sebr ning b sẽn lebge, la b pʋɩ dũniyã gill zug n tɩ yɩɩdã. Naoor wʋsgo, sigls nins sẽn yiisd Biibl-dãmbã nong n koosd-b-la toogo. A Zeova nin-buiidã yiisa Biiblã tõr wall a babs kẽere, sẽn yɩɩd buud-goam 240 pʋgẽ, tɩ ned fãa tõe n paam-a zaalem. Rẽ kɩtame tɩ buud toɛy-toɛyã fãa neb paamd n kelgd ‘Rĩungã koe-noogã,’ nand tɩ saabã ta. (Mat. 24:14) D Wẽnnaamã sẽn yaa tɩrlem soabã ratame n sõng ned buud fãa, t’a tũnug ne a Gomdã karengo, n bãng-a. Yaa a sẽn nong tõnd fãa wʋsgã yĩnga.

13. Bõe yĩng tɩ d tõe n yeel tɩ Biiblã wilgdame t’a Zeova nonga tõndo? (Zã 21:25)

¹³ Biiblã sõng-d lame tɩ d bãng tɩ Wẽnnaam zʋg-sõng ning sẽn yaa kãseng n tɩ yɩɩdã yaa a nonglmã. (1 Zã 4:8) Tags-y n ges-y bũmb nins a Zeova sẽn kɩt tɩ b gʋls Biiblã pʋgẽ wã, la bũmb nins a sẽn pa kɩt tɩ b gʋlsã. A kõ-d-la bũmb nins sẽn yaa tɩlɛ ne-dã, sẽn na yɩl tɩ d tõog n paam zood sõma ne-a, n paam sũ-noog d vɩɩmã pʋgẽ, la d wa paam vɩɩm sẽn ka sɛtã. A Zeova sẽn nong-dã yĩnga, a pa kɩt tɩ b paas bũmb sẽn pa tɩlɛ ne-do, bũmb sẽn yɩɩd d nug ye.—Karm-y Zã 21:25.

14. Bõe n be Biiblã pʋgẽ me n wilgd vẽeneg tɩ Wẽnnaam nong-d lame?

¹⁴ A Zeova sẽn gomd ne tõnd ne waoogr Biiblã pʋgẽ wã wilgdame t’a nong-d lame. Biiblã pʋgẽ, a Zeova pa kõ noy ka tɛka, sẽn wilgd d sẽn segd n maan takɩ d vɩɩmã nens fãa pʋgẽ ye. A kɩtame tɩ b gʋls neb vɩɩm kibaya, bãngr-goama, la sagls sẽn tõe n sõng-d tɩ d bãng n maan sẽn yaa sõma d vɩɩmã pʋgẽ. Woto, Wẽnnaam Gomdã kɩtame tɩ d tõe n nong Wẽnnaam ne d sũur fãa, la d sakd a noyã.

15. a) Wãn to la Biiblã wilgd t’a Zeova nong-d lame? b) Wa fotã sẽn wilgdã, ãnd dãmb kibay zug la bi-puglã, saam-biigã, la saam-bi-poak ning yʋʋm sẽn vẽsgã bʋgsda? (Sɩng. 39:1, 10-12; 2 Rĩm. 5:1-3; Luk 2:25-38)

¹⁵ Biiblã wilgdame t’a Zeova nong-d-la wʋsgo. Wãn to? A Gomdã pida ne kibay sẽn wilgd ninsaalbã sẽn get yɛlã to-to wã. D tõe n wʋma neb nins yell b sẽn gomd Biiblã pʋgẽ wã yɛlã la b manesmã võore. Bala b ra ‘yaa ninsaalb wa tõndo.’ (Zak  5:17) Sẽn yɩɩd fãa, d sã n ges a Zeova manesem sẽn yɩ to-to ne nin-kãensã sẽn da yaa wa tõndã, d bãngdame t’a ‘tara nonglem wʋsgo, la t’a yaa nimbãan-zoɛta.’—Zak 5:11.

16. D sã n karem Biiblã pʋgẽ kibay sẽn wilgd neb sẽn konge, sõngda tõnd tɩ d bãng bõe a Zeova zugu? (Ezayi 55:7)

¹⁶ Bũmb a to me la Biiblã yeta, tɩ wilgdẽ t’a Zeova nong-d lame. Gʋls-sõamyã wilgdame tɩ d sã n wa beege, d Wẽnnaamã pa raagd tõnd n bas ye. Israyɛll nebã beega a Zeova naoor ka tɛka. La b sã n da tek yam n kos sugr fãa, a Zeova kõt-b-la sugri. (Karm-y Ezayi 55:7.) Pipi kiris-nebã me ra miime t’a Zeova nong-b-la wʋsgo. B wakatẽ wã, rao a ye n da maan yel-wẽn-kãsenga, n wa tek yam n kos sugri. Wẽnnaam vẽnega tẽn-tʋmd a Poll t’a yeel a tẽed-n-taasã tɩ b kõ raoã “sugr ne yamleoogo, la b bels-a.” (2 Kor. 2:6, 7; 1 Kor. 5:1-5) A Zeova sẽn pa raag a nin-buiidã n bas b sẽn kong yĩngã, kengda raood wʋsgo. A pʋd n sõng-b lame, n kibl-ba, la a kos-b tɩ b lebg n wa a nengẽ. A yeelame t’a na n maana woto me ne yel-wẽn-maandb nins fãa sẽn tekd yam n kot sugr rũndã-rũndã wã.—Zak 4:8-10.

17. Bõe yĩng tɩ Biiblã yaa kũun sẽn yaa kãsenga?

¹⁷ A Zeova kõo tõnd kũun sẽn yaa sõma wʋsgo. Bõe yĩng t’a Gomdã ka to? Wa d sẽn yã wã, Biiblã wilgdame tɩ Wẽnnaam yamã ka to, t’a yaa tɩrlem soaba, la t’a nong-d lame. A wilgdame me t’a Zeova ratame tɩ d bãng-a, la a rat me tɩ d lebg a zoa.

18. Bõe la d tõe n maan n wilg tɩ d sũur nooma ne Biiblã sẽn yaa a Zeova kũun sẽn yaa sõma wã?

¹⁸ D pa segd n yĩm tɩ Wẽnnaam Gomdã yaa “kũun sẽn yaa sõma” wʋsg ye. (Zak 1:17) Bɩ d ket n wilgd wakat fãa tɩ d sũur nooma ne d sẽn tar Biiblã. D wilgda rẽ, d sã n karemd-a, la d bʋgsd a zugu. D sã n maand woto, d tõe n basa d yam tɩ soab ning sẽn kɩt tɩ b gʋls Biiblã na n ninga d modgrã barka, la tɩ d na n paam n ‘bãnga Wẽnnaam’ sõma.—Yel. 2:5.