1. Omo lia vika mue ku santsela ku vuana vua Mbimbiliya?

 TUE ku santsela mua kama kuli Yehova Njambi, mu ku tu hana Mbimbiliya. Muomu ku hitila mu Lizi lieni, Yehova ue tu ku hana vimamuna via seho, vize vie ku tu kuasa ku pinda na visoti vietu via tangua na tangua. Cikuavo naua, ye ku tu hana lulavelelo lua cili lua muono ua ku lutue. Kaha ca seho ya kama, Yehova ue ku pangesa Mbimbiliya mu ku tu kuasa ku tantekeya vifua vieni via cili. Mua vusunga, ku hilula ha vifua vieni via cili ce ku tuya ku mutima na ku tu vuisa cizango ca ku likuata vusamba vua kama neni.—Visa. 25:14.

2. Mu njila ika Yehova ua lisolola ku vantu?

² Yehova ua tonda linga vantu va mu tantekeye. Muomu tunde ku laza, ua lisoluele ku hitila mu vilota, vimona kaha na tungelo. (Num. 12:6; Vili. 10:3, 4) Vunoni vati evi vilota, vimona kaha na mizimbu i va handekele tungelo, va hasele ku i tulika linga vantu va lilongeseyo? Evi via lipuisilemo muomu Yehova ua pangesele vamala linga va “soneke limo livulu,” na ku hakamo viose via tondele linga tu vi tantekeye. (Yele. 30:2, Shukulu Kalunga) Kaha mu ku linga “njila yeni ya tantuluka,” tuli na vusunga ngecize eyi njila ye ku pangesa linga a handeke netu ya pua ya cili kaha ye ku tu kuasa.—Visa. 18:30.

3. Vika Yehova ua lingile linga Mbimbiliya i hete ku matangua etu? (Isaya 40:8)

³ Tandenu Isaya 40:8. Mu makulukazi a miaka, Mbimbiliya ye ku hana vimamuna via seho ku vamala na vampuevo va lutsilielo. Vati honi evi via lipuisamo? Lelo lino ka tuesi na mazengununo a katete muomu ku laza, mapapelo ha va sonekele Visoneka via ku Lela a kele na ku vola vuasi. Vunoni Yehova ua lingile cose linga Visoneka via ku Lela va vi kopiale na ku vi niunga  vuino. Vutuhu vaze vamala ka va tantulukile, vunoni va vi kopialele na vunongotima. Ca ku muenako, umo mukua ku tondesesa via Visoneka via ciHevelu ua handekele ngueni: “Tu hasa ku kala na vusunga vuose ngecize, ka kuesi muzimbu u va kopiala na vusunga vuose ngeci mua Visoneka via ku Lela.” Ngeci mukemuo, vutuhu mu na hiti ntsimbu ya kama, mapapelo a va pangesele eku vola vuasi, kaha naua na visevuka via vakua ku kopiala, vunoni tu hasa ku kala na vusunga ngecize mezi a tue ku tanda mu Mbimbiliya akeo vene mpundu a tondele Yehova linga a kalemo tunde ha katete.

4. Vika tu hilula mu cilongesa cino?

⁴ Yehova ikeye “Ndundzi ua vuana vuose vua ku viuka na vuana vuose vua ku tantuluka.” (Tia. 1:17) Kaha Mbimbiliya ya pua vumo vuana vua ku lifuila vua tu hana Yehova. Nga va na tu hana vumo vuana, vuana vuaco vue ku muesa ngecize ou muntu na tu hanavuo a tu tantekeya mua cili kaha a tantekeya via tu kambela. Na vuno vene, mu tue ku hilula ha vuana vua Mbimbiliya, tue ku lilongesa via vingi ku tuala hali Yehova kaha na ku mona ngecize a tu tantekeya vuino, kaha a tantekeya via tu kambela. Mu cilongesa cino, tu hilula ha vifua vitatu via muesa vuntu vua Yehova: Mangana, vuoloke, na cilemo. Ha katete, tu lilongesenu mu vinjila vika Mbimbiliya ya muesa mangana a Njambi.

5. Mu njila ika Mbimbiliya ya muesa mangana a Njambi?

⁵ Yehova a tantekeya ngecize tua tondeka vimamuna vieni mu muono uetu. Kaha vuana vua Mbimbiliya vua tu hana, mua kala vimamuna via seho ni nguetu mangana eni. Ngeci mukemuo, ya kala na ngolo ya ku alulula miono ya vantu. Mosesa mua sonekele mavulu a ku livanga, ua lekele vantu va Njambi ngueni: “Muomu cikeco kati cuma ca ngoco kuli enu, muomu cikeco muono uenu.” (Ndeu. 32:47) Vutuhu mu na hiti ntsimbu ya kama, ndzili i ya kala nayo Mbimbiliya mu ku alulula miono ya vantu ka ya tepulukile. (Visa. 1:2, 3) Ca ku muenako, nga tu tala mu jw.org, mu mutamba “Mbimbiliya ye ku alulula miono ya vantu,” tu ka uanamo mizimbu ya yingi ya muesa vati Mbimbiliya ili na ku panga muli “vakua ku tsiliela” lelo lino.—1 Tes. 2:13.

6. Omo lia vika Mbimbiliya ya hiana mavulu akuavo?

⁶ Ka kuesi livulu lieka lia hiana Mbimbiliya. Omo lia vika? Muomu Ivene livulu liaco, Yehova Njambi ua pua Mukua Ngolo yose, ua kalako ku miaka yose, kaha na umo uahi ua mu hiana ku mana. Mavulu eka eku kalako ntunda ya kama ku hiana vaze va a sonekele, vunoni seho yao ye ku hua. Vunoni seho ya vitume vi tue ku uana mu Mbimbiliya ka ye ku hua, kaha ya kuasa vantu mu vintsimbu via ku liseza-seza viose. Mu tue ku tanda eli livulu lia ku lela na ku hilula vi tue ku tandamo, iveneyo ue ku tu hana sipilitu santu mu ku tu kuasa ku pangesa vimamuna viayo mu muono. (Visa. 119:27; Mal. 3:16; VaHe. 4:12) Mua vusunga, Ivene Mbimbiliya kasi a ci li na muono, kaha ali na cizango ca kama ca ku tu kuasa. Vuno ku tantekeya viose evi, ce ku mi vuisa cizango ca ku tanda Mbimbiliya matangua ose ni?

7. Vati Mbimbiliya ya kuasele vangamba va Njambi ku laza ku likuata kumo?

⁷ Njila ikuavo ya muesa ngecize Mbimbiliya ya tunda kuli Njambi, ya pua cifua ci ye ku kuaselamo vangamba va Njambi ku likuata kumo. VaIsaleli omo va suanene Cifuti ca Cikulaheso, va kele ku vihela via ku liseza-seza, kaha vihela viaco via kele ku laako vimo na vikuavo. Cikuavo naua, vamo vantu va puile vakua ku tela vantsi, vakua ku pita vimuna, na vandimi. Omo lievi ca puile ca casi vaIsaleli va kele ku cihela cimo, ku likela ku lisosomua na vakuavo  vaIsaleli va kele ku cihela ceka. Vunoni Yehova ua viukisile imo njila ya lingisile vaIsaleli va pue na ku likungulula, na ku halakana ku ku tanda na ku ku lombolola ca Lizi lia Njambi. (Ndeu. 31:10-13; Neh. 8:2, 8, 18) Aci singaniekenu vati ua livuile kaIsaleli, omo ua hetele mu Yelusalema na ku mona makulukazi na makulukazi a vakuavo va ku mitamba yose ya cifuti navo va neza mu ku lemesa! Mua vusunga, eci ca kuasele vangamba va Yehova ku tualelelaho ku likuata kumo. Mu nima ya ntsimbu mu ca putukile cikungulukilo ca Vakua Kilistu ku sekulu ya ku livanga, mua kele vamala na vampuevo va handekele malimi a ku liseza-seza, va ku vifuti via ku liseza-seza, kaha vamo va puile vampite vakuavo co vihutu. Vunoni omo lia ku lema Visoneka via ku Lela, va hasele ku likuata kumo mu ku lemesa Njambi ua vusunga. Kaha Vakua Kilistu va vaha va hasele lika ku ivuisisa Lizi lia Njambi na vukuasi vua vakuavo, mu ku likunguluila hamo.—Vili. 2:42; 8:30, 31.

8. Vati Mbimbiliya ye ku kuasa vangamba va Yehova ku likuata kumo lelo lino?

⁸ Njambi yetu ua mangana ali na ku tualelelaho ku longesa na ku pandakana vantu veni ku hitila mu Mbimbiliya. Ikeyo ndundzi ya via-ku-lia via mu lutsilielo vi tue ku likuua. Ku-sua kumo tue ku ya ku viuano via mu simano, via limbo kaha na via muhato linga tu kevue ku tanda na ku lombolola ca Lizi lia Njambi. Mua vusunga, Lizi lia Njambi lia kala na seho ya kama, mu ku puisamo vutumbe vua Yehova  vua ku lingisa vangamba veni ku mu “pangela na mutima umo lika.”—Zef. 3:9.

9. Cifua cika ca tondeka linga muntu evuisise Mbimbiliya? (Luka 10:21)

⁹ Tu hilulenu vumo vukaleho vua muesa mana a Yehova. Ua lingisile mitamba ya ingi ya mu Mbimbiliya va i soneke mu cifua ca ku linga, vakua ku likehesa vakevo lika va hasa ku ivuisisa. (Tandenu Luka 10:21.) Mu mavu ose vantu ve ku tanda Mbimbiliya. Umo mulongisi ua Mbimbiliya ua handekele ngueni: “Ka kua kele livulu lieka li ve ku tanda mua kama kaha na civando cose, ku hiana Mbimbiliya.” Vutuhu ngoco vakua ku likehesa vakevo lika va hasa ku ivuisisa Mbimbiliya na ku i ononoka.—2 Kol. 3:15, 16.

10. Mu njila ika ikuavo Mbimbiliya ya muesa mana a Yehova?

¹⁰ Tue ku hasa ku nongonona mana a Yehova mu njila ikuavo naua mu Mbimbiliya. Vutuhu Yehova ue ku pangesa Mbimbiliya mu ku tu longesa mu ku pua civunga, vunoni ue ku i pangesa naua mu ku tu longesa muntu ku muntu kaha na ku tu lembezieka. Kaha tu vose tu hasa ku limuena seho ya tu haka Yehova mu tue ku tanda Lizi lieni, Mbimbiliya. (Isaya 30:21) Vintsimbu via vingi, nga tuli mu visoti kaha tu tanda Mbimbiliya, tue ku uanamo vimo vinimbu vi tue ku mona ngue yetu vene va vi sonekelele. Vunoni ngue mu tu tantekeya, Mbimbiliya va i sonekela vantu vose. Kaha vati honi mizimbu ya kalamo ye ku tu kuasa muntu ku muntu? Evi vie ku lipuisamo lika muomu Mbimbiliya ya tunda kuli Sakatanga ua mana.—2 Tim. 3:16, 17.

11. Vati Njambi ua muesele ngecize ka kele na kahangu mua tumine ku soneka Mbimbiliya?

¹¹ Vuoloke vua likuata cikuma na ku hona kahangu. Kaha Yehova kati mukua kahangu. (Ndeu. 32:4) Ovu vusunga vuaco tu vu muena mu malimi a va pangesele mu ku soneka Mbimbiliya. (Vili. 10:34, 35; Loma 2:11) Mavulu 39 a katete, cingi cao va a sonekele mu ciHevelu muomu likelio lilimi li vevuisisile mua kama vangamba va Njambi ku ntsimbu ize. Vunoni ku sekulu ya ku livanga, ciHevelu kati cikeco naua ci va kele na ku pangesa mua kama vantu. Ngeci mukemuo, mavulu 27 a ku manusuila a mu Mbimbiliya va a sonekele honi mu ciNgelengu, muomu cikeco ci vevuisisile mua kama vantu. Yehova ka kutiliyile Lizi lieni ku lilimi limo lika. Lelo lino ha mavu ha kala vantu va heta ku 8 bilhões kaha ve ku handeka malimi a ku liseza-seza. Vati vantu va ku lana ngeci va hasa ku lilongesa via Yehova?

12. Mu njila ika Ndaniele 12:4, ili na ku lipuisamo kuno ku matangua a ku kotokela?

¹² Ku hitila muli kapolofeto Ndaniele, Yehova ua kulahesele ngecize ku matangua a ku kotokela “mana a vusunga” vua mu Mbimbiliya, “a ka likulisa.” Kaha vavengi va ka tantekeya mana aco. (Tandenu Ndaniele 12:4.) Imo njila i eku likulisilamo mana a vusunga, ya pua mu ku langulula mikanda, ku tuhula, na ku tepela viMbimbiliya na mikanda ya lombolola Mbimbiliya ku vantu. Ngeci mukemuo, Lizi lia Njambi lia pua livulu li ve ku langulula na ku tepela mua kama mu mavu ose. Vutuhu vimo vimpreza vie ku tuhula viMbimbiliya, ve ku vi landesa na ndando ya kama. Vunoni Vakaleho va Yehova va na langulula Lizi lia Njambi mu vutuntu ni mu mitamba mu malimi a ku tuvakana 240, kaha muntu uose a hasa ku i tambula vuana. Eci ce ku lingisa vantu vakua vifuti viose, ku tava ‘muzimbu ua cili ua Vuangana’ ntsimbu ku-kotoka kanda ci hete. (Mat. 24:14) Kaha Njambi yetu ua vuoloke a tonda vantu vose va kale na vukovelelo vua ku mu tantekeya na ku tanda Lizi lieni. Mua vusunga, ue ku linga evi muomu ua tu lema tu vose.

13. Omo lia vika tu hasa ku handekela nguetu Mbimbiliya ya muesa cilemo ca Njambi? (Yoano 21:25)

¹³ Mbimbiliya ya tu muesa ngecize, cilemo cikeco cifua ca kama ca Njambi. (1 Yoa. 4:8) Tu hilulenu ha viuma via haka mu Mbimbiliya na vize ka hakelemo. Ca ku muenako, ua tu muesa vi tua pande ku linga, mangana tu likuate vusamba vua kama neni, tu kale na ndzolela, kaha tu ka tambule muono ka ue ku-hua ku lutue. Vunoni omo lia cilemo ceni kuli etu, Yehova ka lundikilemo mizimbu ize ka i tondeka mu ku tu kuasa ku mu pangela.—Tandenu Yoano 21:25.

14. Mu njila ika naua Mbimbiliya ya muesa cilemo ca Njambi?

¹⁴ Yehova ua tu muesa naua cilemo, mu ku tu hana mizimbu mu njila ya tu muesa kavumbi. Mu Mbimbiliya ka lundikilemo masiko a koma kose ka kuata ku muono uetu. Vunoni ue tu kuasa ku lisinganiekela viuma etu vavene, ku hitila mu mizimbu ya ku yoya, mu vupolofeto, kaha na mu vimamuna via seho via kala mu Mbimbiliya. Mu vinjila evi, Lizi lia Njambi lie ku tu vuisa cizango ca ku mu lema kaha na ku mu ononoka na mutima uose.

15. (a) Vati Yehova ua muesa seho kuli vose vaze ve ku tanda Lizi lieni? (b) Kuliya na cikupulo, tumbulenu vantu va mu Mbimbiliya va ali na ku singanieka (1) kanike? (2) mukuendze? (3) ndumbuetu ua mukuluntu? (Njen. 39:1, 10-12; 2 Vam. 5:1-3; Luka 2:25-38)

¹⁵ Mbimbiliya ya muesa ngecize, Yehova ua tu haka seho ya kama. Mu njila ika? Lizi lieni lia sula na mizimbu ya muesa cifua ci ve ku livuilamo vantu. Tue ku hasa ku lihaka mu cihela ca vantu va va tumbula mu Mbimbiliya, muomu va kele na “vifua ngue vietu” (Tia. 5:17) Kaha ca seho ya kama, mu tue ku mona viuma via lingile ku vantu ngeci muetu, tue ku ivuisisa ngecize, “ikeye na sulu na nkeke ikeye mukua cikeketima.”—Tia. 5:11.

16. Vika tue ku lilongesa hali Yehova mu tue ku tanda via visevuka via vantu va va tumbula mu Mbimbiliya? (Isaya 55:7)

 ¹⁶ Mbimbiliya ye ku tu muesa cilemo ca Yehova mu njila yeka naua. Ya tu hana vusunga ngecize, Njambi yetu ka ka tu seza ambe nga tu sevuka. Ca ku muenako, vaIsaleli va kele na ku sevuka ku-sua kumo, vunoni mu va kele na ku liveya, Njambi ua kele na ku vecela. (Tandenu Isaya 55:7.) Vakua Kilistu va ku sekulu ya ku livanga navo va limuenenene cilemo ca Njambi. Ca ku muenako, omo umo yala ua lingile mulonga ua kama vunoni ua liveyele, kapostolo Paulu va mu huiminine ku mamuna vakuavo Vakua Kilistu, “ku mu ecela mulonga na ku mu lembezieka.” (2 Kol. 2:6, 7; 1 Kol. 5:1-5;) Ce ku tu komouesa ku mona ngecize, Yehova ka vianene ku lemesa ca vangamba veni omo lia visevuka viavo! Vunoni ua va tondele na cilemo cose, ku va sungamesa, na ku va lania naua va pue vavusamba veni. Kaha lelo lino, ua kulahesa naua ku lingamo na vose ve ku liveya na ku aluluka ku vipi viavo.—Tia. 4:8-10.

17. Omo lia vika Mbimbiliya ya pua vuana vua ku lifuila?

¹⁷ Yehova ua tu hana vumo vuana vua ku lifuila. Omo lia vika honi ovu vuana ni nguetu Lizi lieni, vua pua vua ku lifuila? Muomu ngue mu tu na lilongesa, Mbimbiliya ya muesa mana, vuoloke kaha na cilemo ca Njambi. Kaha ya tu hana naua vusunga ngecize, Yehova ua tonda linga tu mu tantekeye na ku likuata vusamba vua kama neni.

18. Vati tu hasa ku muesa nguetu tua santsela ku Mbimbiliya “vuana . . . vua ku viuka” vua tu hana Yehova?

¹⁸ Ka tua pandele ku sembulula ovu “vuana . . . vua ku viuka” vua Lizi lia Njambi. (Tia. 1:17) Ntsimbu yose, tu puenu na ku muesa ku santsela cetu ku vuana vuaco. Tu hasa ku lingamo mu ku vu tanda na ku vu hilula ntsimbu yose. Kaha omo tu lingamo, kalenu na vusunga ngecize Iveneyo a ka vezikisa kapandi ketu kaha tu ka “uana mana a ku tantekeya Njambi.”—Visi. 2:5.