1. ¿Keyej tikontasojkamati maj Dios techmakani Biblia?

 ¡SEMI tiktasojkamatiliaj Jehová porin techmakak Biblia! Itech iTajtol, yejuatsin techyolmajxitia tein uelis tikchiuaskej keman tikpiaskej kuejmolmej, no techiluia ke uelis tikchiaskej tein kuali satepan. Uan no, technextilia se taman tein semi moneki porin kijtoua keniuj tamati yejuatsin. Keman itech titanemiliaj kualtsitsin taman tein kinextia Jehová, techpaleuia maj tiknekikan timotokiskej iuan uan maj kuali iuan timouikakan (Sal. 25:14).

2. ¿Toni kichiuani Jehová para maj okachi tikixmatikan?

² Jehová kineki maj tikixmatikan. Ne uejkauj kichiuak maj seki itekitikauan takochitakan, kiitakan seki taman uan hasta kintitanik ángeles para maj kitematiltikan tein yejua kinekia (Núm. 12:6; Hech. 10:3, 4). Sayoj ke komo amo moijkuiloskia nochi nejon, amo ueliskia timomachtiskej. Yejua ika, Jehová kichiuak maj seki takamej kijkuilokan “itech se amaix” nochi tein yejuatsin kinekia maj tikmatikan (Jer. 30:2). Uelis tikyekmatiskej ke Dios kichiuak maj kuali moijkuilouani nejin tein semi techpaleuia, porin “ojti tein iaxka akin yekmelauj Dios amo teyi kipoloua” (Sal. 18:30).

3. ¿Toni kichiuak Jehová para maj hasta axkan tikpiakan Biblia? (Isaías 40:8).

³ (Xikonixtajtolti Isaías 40:8). Miak xiujmejya, iTajtol Dios semi kinpaleuiani itekitikauan Jehová. ¿Keniuj ueli mochiuani nejin? Biblia moijkuiloj itech seki taman tein niman uejueliui uan axkan amo onkakok nion se amatajkuilol tein yekinika moijkuiloj, sayoj ke Jehová kichiuak maj miakpa kimaijkuilouanij iTajtol. Tajkuilouanij katkaj  tajtakolejkej, sayoj ke kitemojkej kuali kijkuiloskej. Keman se motelmachtijkej ika tajtojtoya Escrituras Hebreas, kijtoj: “Tikyekmatij ke nion se amatajkuilol tein no moijkuiloj ne uejkauj kipia nochi tanemililmej ijkon kemej Biblia”. Maski kijkuilojkej takamej tajtakolejkej ne uejkaujya uan tajkuilojkej itech seki taman tein niman uejueliui, tikmatij ke tein axkan tikixtajtoltiaj itech Biblia kipia itanemililuan Jehová, akin kichiuak maj moijkuilo.

4. ¿Toni tikitaskej itech nejin tamachtilis?

⁴ “Nochi tatiochiualismej tein kuali uan tein amo teyi kinpoloua” ualeua de Jehová, uan se taman tein okachi kualtsin tein techtayokolij yejua Biblia (Sant. 1:17). Tein techtayokolia aksa kinextia ox kuali techixmati uan ox kimati tein techpoloua. No ijkon panoua ika Biblia, keman timomachtiaj okachi tikixmatij Jehová, tikmatij ke kuali techixmati uan kimati tein techpoloua. Itech nejin tamachtilis tikitaskej eyi kualtsitsin taman de Jehová tein kinextia Biblia: semi tamatkej, kichiua nochi tein kuali yetok uan tetasojta. Yekinika maj ika titajtokan keniuj Biblia kinextia ke Dios semi tamatkej.

5. ¿Toni seki taman tein Biblia kinextia ke Dios tamatkej?

⁵ Jehová kimati ke moneki maj techyolmajxiti. Yejua ika, techmakak Biblia kampa kinextia ke semi tamatkej. Tein tayolmajxitia Biblia kinpaleuiani miakej uan kichiua maj mopatakan. Keman Moisés kijkuiloj yekinika amatajkuilolmej tein kipia Biblia, kiniluij israelitas: “Nejin tajtolmej amo nenkaj, ta kichiuas xinemikan” (Deut. 32:47). Akin kitakamatiskiaj tein kijtouaya iTajtol Dios, yolpakiskiaj uan kuali kinkisaskia tein kichiuaskiaj (Sal. 1:2, 3). Maski Biblia ne uejkaujya moijkuiloj, kisentoka kinpaleuia miakej maj mopatakan. Ijkon kinextiaj tamachtilismej “ITajtol Dios kipatak ininnemilis”, tein moajsi itech jw.org, ompa tikonajsis kampa techtapouiaj ininnemilis panoua 50 akin kipatakej miak taman tein kichiuayaj porin kichiujkej tein Biblia tayolmajxitia (1 Tes. 2:13).

6. ¿Keyej tikijtouaj ke amo moajsi nion se amaix kemej Biblia?

⁶ Amo moajsi nion se amaix kemej Biblia. ¿Keyej? Porin Jehová akin kichiuak maj moijkuilo Biblia, kipia nochi chikaualis, nochipa nemi uan amo akin okachi tamatkej ke yejuatsin. Miak amaixmej kisentokaj kinixtajtoltiaj maski akin kinijkuilojkej momikilijkejya, uan kemansa tein tayolmajxitiaj amo tapaleuiaok. Sayoj ke, tein tayolmajxitia Biblia nochipa tapaleuiani desde ne uejkauj uan hasta axkan. Keman tikixtajtoltiaj uan itech titanemiliaj tein kijtoua, Jehová akin kichiuak maj moijkuilo, kikui ichikaualis para techpaleuis maj tikchiuakan tein timomachtiaj (Sal. 119:27; Mal. 3:16; Heb. 4:12). Akin kichiuak maj moijkuilo Biblia semi kineki mitsonpaleuis. ¿Melauj ke nejin mitsonyolchikaua xikonneki nochipa tikonixtajtoltis?

7. ¿Keniuj Biblia kinpaleuij itekitikauan Dios ne uejkauj maj amo xexeliujtonij?

⁷ Okse taman kemej Biblia kinextia ke Dios semi tamatkej, yejua porin kinpaleuia itekitikauan maj amo xexeliujtokan. Keman israelitas ajsikej itech tal tein Dios motenkaujka kinmakas, seseko mokaltalitoj. Sekin peujkej kinkitskiaj pescados, oksekin kiniskaltiayaj tapialmej uan oksekin tatokayaj. Yejua ika akin nemiaj itech se xolal ueliskia niman kinelkauaskej akin  nemiaj itech okse xolal. Sayoj ke Jehová kichiuak maj miakpa mosentilianij para kikakiskej iTajtol uan maj momachtianij (Deut. 31:10-13; Neh. 8:2, 8, 18). Xikonnemili keniuj momachiliaya se israelita keman ajsia Jerusalén, uan xa moitaya iniuan millones israelitas akin ualeuayaj okseki xolalmej para kiueyichiuaskej Jehová. Ijkon Jehová kinpaleuij maj amo xexeliujtonij. Satepan, itech yekinika siglo tokniuan katkaj takamej uan siuamej akin tajtouayaj tataman tajtolmej, sekin tominpiayaj uan oksekin amo, maski ijkon, kemej nochin kitasojtayaj Tajkuilolamatsin, kisentekitiliayaj Jehová. Uan akin peuayaj momachtiayaj uelia kiajsikamatiaj iTajtol Dios porin okseki tokniuan kinmelauiliayaj uan porin monechikouayaj (Hech. 2:42; 8:30, 31).

8. ¿Keniuj Biblia kinpaleuia itekitikauan Jehová maj amo xexeliujtokan axkan?

⁸ Itech nejin tonalmej Jehová kisentoka kikui Biblia para kinmachtis itekitikauan uan para maj amo xexeliujtokan. Nochi tamachtilis tein tikseliaj mokixtia itech Biblia. Tiitekitikauan Dios miakpa tiyouij nechikolmej uan uejueyi nechikolmej kampa tikixtajtoltiaj Biblia uan okachi timomachtiaj tein ompa kijtoua. Tikmatij ke Jehová kikui Biblia para kinpaleuis itekitikauan maj ‘kisentekitilikan’ (Sof. 3:9).

9. ¿Toni moneki tiknextiskej para tikajsikamatiskej tein kijtoua Biblia? (Lucas 10:21).

 ⁹ Maj tikitakan okse taman tein kinextia ke Jehová tamatkej. Yejuatsin kichiuak maj seki tamachtilismej tein kipia iTajtol moijkuilouanij kemej uelis kiajsikamatiskej sayoj akin amo ueyichiuanimej (xikonixtajtolti Lucas 10:21). Biblia se amaix tein kiixtajtoltiaj nochin. Se motelmachtijkej kijtoj ke “sayoj Biblia okachi kiixtajtoltianij uan mochikauanij kiajsikamatiskej ke okse amaix”. Sayoj ke, sayoj akin yolyemankej ueli kiajsikamatij uan kichiuaj tein ompa kijtoua (2 Cor. 3:15, 16).

10. ¿Toni okse taman kinextia Biblia ke Jehová semi tamatkej?

¹⁰ Maj tikitakan okse taman tein Biblia kinextia ke Jehová tamatkej. Yejuatsin kikui Biblia amo sayoj para techsenmachtis timiakej, ta no para techmachtis uan techyolseuis tisejsemej. Keman tikixtajtoltiaj iTajtol, tikitaj ke Jehová nochipa kiitstok tein techpoloua tisejsemej (Is. 30:21). Keman tikpanouanij se kuejmol, xa tikixtajtoltianij se texto tein ijkuak semi techpaleuij. Uan komo Biblia moijkuiloj para maj millones kiajsikamatikan tein ompa kijtoua, ¿keyej tamachtilis tein kipia ueli techpaleuia tisejsemej hasta axkan? Porin akin kichiuak maj moijkuilo Biblia, sayoj yejuatsin okachi tamatkej (2 Tim. 3:16, 17).

11. ¿Keniuj kinextij Jehová ke amo techichikotasojta keman kichiuak maj moijkuilo Biblia?

¹¹ Okse taman tein kualtsin tein kinextia Jehová yejua ke kichiua nochi tein kuali yetok (Deut. 32:4). Keman aksa kichiua nochi tein kuali yetok amo techichikotasojta, uan Jehová amo techichikotasojta (Hech. 10:34, 35; Rom. 2:11). Keman Jehová kichiuak maj Biblia moijkuilouani itech tajtolmej tein ijkuak miakej tajtouayaj, kinextij amo techichikotasojtaya. Yekinika 39 amatajkuilolmej, okachi miakej moijkuilojkej itech tajtol hebreo, uan miakej itekitikauan Dios kuali kiajsikamatiaj nejin tajtol. Sayoj ke keman nemiaj yekinika itatojtokakauan Cristo, miakej tajtouayaj griego. Yejua ika okseki 27 amatajkuilolmej tein ika tami Biblia moijkuilojkej itech nejin tajtol. Jehová amo kichiuak maj iTajtoltsin moijkuilo itech sayoj se tajtol. Itech nejin tonalmej, kemej 8 mil millones akin tinemij nikan taltikpak titajtouaj tataman tajtolmej. ¿Keniuj tel miakej uelij kiixmatij Jehová?

12. ¿Keniuj mochiujtok tein kijtoua Daniel 12:4 itech tonalmej keman tatamitiya?

¹² Jehová kijtoj itechkopa tanauatijkej Daniel ke itech tonalmej keman ejkoskia tamilis ‘momiakiliskia tein yekmelauj taixmatilis’, tein kijtosneki ke miakej kiajsikamatiskiaj tein kijtoua Biblia (xikonixtajtolti Daniel 12:4). Se taman tein kinpaleuiani miakej maj kiajsikamatikan, yejua porin Biblia uan okseki amaixmej motajtolkepanij, moamakixtianij uan momoyauanij. Tein melauj, Biblia yejua amaix tein okachi kitajtolkepanij uan kimoyauanij. Miakej Biblias tein kinnamakaj tel patiyojkej, sayoj ke ixolal Jehová kitajtolkepani Biblia ajsitok oso sayoj seki amatajkuilolmej itech panoua 240 tataman tajtolmej, nochin uelis kipiaskej se uan amo moneki kiixtauaskej. ¿Keniuj tapaleuiani nejin? Tel miak millones akin nemij itech tataman xolalmej momachtijtokej “kuali tanauatilmej tein ika  tajtoua iTaixyekanalis Dios” achto ke tatamis (Mat. 24:14). Jehová kichiua nochi tein kuali yetok, uan kineki maj okachi miakej kiixmatikan keman kiixtajtoltiaj iTajtol. ¿Keyej? Porin semi techtasojta.

13. ¿Keyej tikijtouaj ke Biblia kinextia ke Dios tetasojta? (Juan 21:25).

¹³ Biblia techmatiltia toni tein okachi kualtsin kinextia Jehová: ke tetasojta (1 Juan 4:8). Maj tiknemilikan toni kichiuak maj moijkuilo itech Biblia uan toni amo. Yejuatsin techiluij toni uelis tikchiuaskej para kuali iuan timouikaskej, tiyolpakiskej uan tinemiskej nochipaya. Sayoj ke kemej Jehová techteltasojta, amo techmaka tamachtilis tein amo moneki (xikonixtajtolti Juan 21:25).

14. ¿Keniuj Biblia no kinextia ke Dios techtasojta?

¹⁴ Jehová techpoujkaita keman technojnotsa, ijkon no kinextia ke techtasojta. Amo techmaka itech Biblia miak tanauatilmej kampa kinextia toni moneki tikchiuaskej itech sejse taman, ta kichiuak maj moijkuilo tein yekmelauj panok, seki taman tein kualtsin tein achto moijtojka ke mochiuaskia uan tayolmajxitilis tein techpaleuiskia maj kuali titaixpejpenakan. Ijkon Biblia techyolchikaua maj tiktasojtakan Dios uan maj tiktakamatikan.

15. 1) ¿Keniuj kinextia Biblia ke Jehová semi toka motekipachoua? 2) ¿Akonimej ininka tanemilijtokej siuapil, tokniuj telpoch uan tokniuj xiuej akin nesij itech taixkopin? (Gén. 39:1, 10-12; 2 Rey. 5:1-3; Luc. 2:25-38).

¹⁵ Biblia kinextia ke Jehová semi toka motekipachoua. Tikmatij nejin porin  itech iTajtol ijkuiliujtok keniuj momachiliayaj sekin. Uelis tikmatiskej keniuj momachiliayaj akin ininka motajtoua itech Biblia porin ‘katkaj kemej tejuan’ (Sant. 5:17). Uan no, keman tikitaj keniuj mouikak iniuan akin katkaj kemej tejuan, okachi tikmatij ke “Jehová semi tetasojta uan teiknelia” (Sant. 5:11).

16. ¿Toni techmachtia de Jehová keman tikitaj ke itekitikauan ne uejkauj mopolouayaj? (Isaías 55:7).

¹⁶ Itech Biblia no tikajsij okse taman tein kinextia ke Jehová techtasojta. Biblia techyekiluia ke Dios amo keman techkauas maski timopoloskej. Israelitas miakpa tajtakolchiuayaj, sayoj ke keman yekmelauj moyolpatayaj Jehová kintapojpoluiaya (xikonixtajtolti Isaías 55:7). Tokniuan itech yekinika siglo no kimatiaj ke Jehová semi kintasojtaya. Kinnextilij nejin, keman kichiuak maj tatitanil Pablo kinyolchikauani tokniuan maj kitapojpoluianij uan maj kiyolseuianij se takat akin achto auilnemia, sayoj ke satepan moyolpataka (1 Cor. 5:1-5; 2 Cor. 2:6, 7). Tikmojkaitaj maj Jehová amo kinixtopeuani itekitikauan maski mopolouayaj, ta kemej semi kintasojtaya, kinpaleuiaya, kinmelauaya uan kiniluiaya maj iuan mokepakan. Uan motenkaua ke no ijkon kichiuas iuan akin axkan tajtakolchiua sayoj ke moyolpata (Sant. 4:8-10).

17. ¿Keyej Biblia se kualtsin netetayokolil?

¹⁷ Jehová techmakani se kualtsin netetayokolil. ¿Keyej tikijtouaj ke iTajtol tel kualtsin? Porin tikitakejya ke Biblia kinextia ke Dios semi tamatkej, kichiua nochi tein kuali yetok uan ke semi techtasojta. Uan no, Biblia kinextia ke Jehová kineki maj tikixmatikan uan maj kuali iuan timouikakan.

18. ¿Keniuj uelis tiknextiskej ke tiktasojkamatij maj Dios techtayokoliani Biblia?

¹⁸ Maj amo tikelkauakan ke iTajtol Dios yejua semej “tatiochiualismej tein kuali” tein Jehová techmakani (Sant. 1:17). Yejua ika maj tiknextilikan Jehová ke semi tiktasojkamatij nejin netetayokolil. Ijkon tikchiuaj keman satepan ke timotataujtiaj, tikixtajtoltiaj iTajtol uan itech titanemiliaj. Keman timochikauaj ijkon tikchiuaskej, Dios akin kichiuak maj moijkuilo Biblia, techtatiochiuis uan uelis tikixmatiskej (Prov. 2:5).