1. ¿Tleka tiktlasojkamachilia Jehová pampa omitstlayokoli Biblia?

 ¡MELAK tiktlasojkamachiliaj Jehová pampa otechtlayokoli Biblia! Ompa Jehová techijlia tlenon uelis tikchiuaskej ijkuak tikixnamikiskej tlen ouijtika. Noijki techijlia ika kualtsin tinemiskej ika tlayekapan. Niman melak ueyi kijtosneki ika ipan Biblia Jehová techititia kenon yejua. Ijkuak titlanemiliaj itech tlen kualtsin kichiua Jehová, más tiktlasojtlaj. Noijki, tiknekij itech tonisiuiskej niman iuan touikaskej (Sal. 25:14).

2. ¿Kenon Jehová yotechmachti kenon yejua?

² Jehová kineki ika tlaltikpakchanejkej makixmatikan. Yeuejkaui, Jehová okichiuj ika sekimej tlakamej matlatemikikan, makinpiyakan tlatlachalistin niman hasta okintekitilti iluikaktekitkej niman ijkon techijlis kenon yejua (Núm. 12:6; Hech. 10:3, 4). San ika, tla xnoijkuiloskia tlen okitemijkej yejon tlakamej, tlatlachalistin tlen okipixkej noso tlen okijtojkej iluikaktekitkej, tejuamej xueliskia tomachtiskiaj itech yejuin. Ika yejon, Jehová okinnauati sekimej tlakamej makijkuilokan “ipan sen amamoxtli” tlen yejua kinekiya matikmatikan (Jer. 30:2). Uelis kuajli tikmatstoskej ika Jehová okichiuj kuajli manoijkuilo tlen kinekiya matikmatikan pampa “iojui sanoyej melajki” (Sal. 18:30).

3. ¿Tlenon okichiuj Jehová niman ijkon maka mapopoliui Biblia? (Isaías 40:8).

³ (Xpoua Isaías 40:8). Desde yeuejkaui, iTlajtol toTajtsin yokinuajpaleuijtia tlakamej niman siuamej akin omelajkanenkej. San ika ¿tleka xopopoliuj Biblia tla yeuejkaui onoijkuilo ipan amamej tlen nimantsin ijtlakauij? Ken tikmatij,  xok onokej amamej kampa okijkuilojkej Biblia, san ika, Jehová okichiuj manochijchiuakan copias itech Biblia. Akin okinchijchiujkej copias tlajtlakolejkej katkaj, san ika, kuajli okichiujkej intekiyo. Se ixtlamatki akin onomachti itech Tlajkuiloltin ika Hebreo okijto: “Uelis tikijtoskej ika itech nochi libros tlen yeuejkaui okimijkuilojkej, san Tlajkuiloltin ika Hebreo melak kuajli okijkuilojkej ijkuak okinchijchiujkej copias”. Maski Biblia okijkuilojkej tlakamej akin tlajtlakolejkej katkaj niman okijkuilojkej ipan tlen nimantsin ijtlakaui, kuajli matikmatstokan ika ompa tikamapouaj itlanemililuan Jehová.

4. ¿Tlenon tikitaskej ipan yejuin tlamachtijli?

⁴ “Nochi kuajli tetlayokolijli yejuan tikseliaj ualeua” itech Jehová, niman Biblia se kualtsin tetlayokolijli tlen toTajtsin yotechmakak (Sant. 1:17). Ijkuak yakaj itlaj techtlayokolia, tlen techmaka kiteititia tla yemelak techixmati niman tla kimatstok tlenon techpoloua. Niman ijkon panoua iuan Biblia. Ijkuak tikamapouaj, miyek tiuelij itech Jehová. Tikitaj ika yejua kuajli techixmati niman ika kimatstika tlenon techpoloua. Ipan yejuin tlamachtijli tikitaskej kenon ipan Biblia nesi itlamachilis, imelajkayo niman itlasojtlalis toTajtsin. Kachtopa matikitakan tlenon techijlia Biblia itech itlamachilis toTajtsin.

5. ¿Kenon techititia Biblia ika toTajtsin melak tlamachilise?

⁵ Jehová kimatstika ika noneki techpaleuis. Ika yejon, otechtlayokoli Biblia kampa uelis tiknextiskej itlamachilis toTajtsin. Tlen kijtoua Biblia melak tepaleui niman hasta kinpatla tlaltikpakchanejkej. Ijkuak Moisés okimijkuilo kachtopa libros tlen ika peua Biblia, ijkin okimijli israelitas: “In xejua itlaj yejuan nemejuamej uelis san nenkauilmatiskej. In tlanauatiltin mechmakas nemilistli” (Deut. 32:47). Akin kitlakamatiskiaj tlen kijtoua Biblia yolpakiskiaj niman kuajli onkisaskiaj (Sal. 1:2, 3). Maski Biblia melak youejkauj ika onoijkuilo, ok ueli kinpatla tlaltikpakchanejkej. Ipan jw.org uelis tikinnextiskej seki tlamachtiltin tlen intoka “Biblia okichiuj manopatlakan”. Ipan yejuin tlamachtiltin miyekej tlaltikpakchanejkej yokijtojkej kenon yokinpaleui Biblia manopatlakan niman aman ika inyojlo nemij (1 Tes. 2:13).

6. ¿Tleka tikijtouaj ika xonka okse libro tlen melak matepaleui ijkon ken Biblia?

⁶ Xonka okse libro tlen melak matepaleui ijkon ken Biblia. ¿Tleka? Pampa akin okijkuilo, Jehová, melak kojtik, melak tlamachilise niman xkeman miki. Onka seki libros tlen tlaltikpakchanejkej ok kinamapouaj maski akin okijkuilojkej yomijkej. San ika, tlen kijtoua yejon libros kemantika xok tepaleuiya. Xuelis tikijtoskej ika Biblia noijki ijkon ken okseki libros pampa tlen ompa kijtoua nochipa tepaleuiya niman desde yeuejkaui kinuajpaleuijtiuj tlaltikpakchanejkej. Ijkuak tikamapouaj Biblia niman itech titlanemiliaj, Jehová techpaleuiya ika iespíritu santo niman ijkon matikchiuakan tlen ompa kijtoua (Sal. 119:27; Mal. 3:16; Heb. 4:12). San xkonnemili, akin okijkuilo Biblia yemelak kineki mitspaleuis. ¿Xmelak ika yejon kichiua xneki mojmostla tikamapouas moBiblia?

7. ¿Kenon yeuejkaui Biblia okipaleui ikalpan toTajtsin?

⁷ Onka itlaj okse tlen techititia ika Biblia kipiya itlamachilis toTajtsin. Biblia kinpaleuiya itekipanojkauan toTajtsin san sekan manemikan. Ijkuak israelitas okinotlatkitijkej tlajli tlen Jehová yokimijlika kinmakas, miyekan onochantitoj. Sekimej israelitas opeujkej tokaj, oksekimej opeujkej michajsij niman oksekimej okinpixkej inyolkauan. Israelitas sejsemoyajtoyaj, ika yejon, kanaj xok más noitayaj  niman ueliskia xok najmanaskej inpampa oksekimej israelitas akin oksekan chantiyaj. San ika, Jehová miyekpa kinsentlaliaya niman ijkon kikakiskej niman nomachtiskej iTlajtol (Deut. 31:10-13; Neh. 8:2, 8, 18). San xkonnemili kenon nomachiliaya se israelita ijkuak ajsiya Jerusalén niman kitaya kenon miyekej ichanikniuan akin miyekan ualeuayaj yonosentlalijkaj para san sekan kiueyichiuaskej toTajtsin. Jehová ijkin kinsentlaliaya israelitas pampa kinekiya san sekan manemikan. Sakin, ipan kachtopa siglo, ipan tlanechikoltin nemiyaj tlakamej niman siuamej akin melak tlatlamantikej katkaj, sekimej xchanikniujtin katkaj, tlajtouayaj tlatlamantik tlajtoltin, sekimej kipiayaj tomin niman sekimej xmás kipiayaj tomin. San ika, san sekan kiueyichiuayaj Jehová pampa kitlasojtlayaj iTlajtol toTajtsin. Niman akin kemach peuayaj yayaj tlanechikojli, ueliyaj kasikamatiyaj Biblia pampa tokniuan kinmachtiayaj niman imiuan nosentlaliayaj (Hech. 2:42; 8:30, 31).

8. ¿Kenon Jehová kitekitiltia Biblia niman ijkon san sekan manemi ikalpan?

⁸ Ipan yejuin tonajli, Jehová ok kitekitiltia Biblia para kinmachtis nochimej akin nemij ipan ikalpan niman para san sekan manemikan. Nochi tlen tekitketl yolmelauak niman tlamachilise techmaka para matomachtikan, kikixtia itech Biblia. Tinochimej tiauej tlanechikoltin niman uejueyimej tlanechikoltin para tikamapouaskej niman tomachtiskej Biblia,  niman ijkon más tiueliskej itech iTlajtol toTajtsin. Kuajli nesi ika Jehová kitekitiltia Biblia niman ijkon itekipanojkauan san sekan makitekichiuilikan ken yejua kineki (Sof. 3:9).

9. ¿San akinomej uelij kasikamatij Biblia? (Lucas 10:21).

⁹ Matikitakan itlaj okse tlen techititia ika Jehová melak tlamachilise. Yejua okichiuj ika seki tlaxeloltin itech Biblia san makasikamatikan akin yolyemankej (xpoua Lucas 10:21). Miyekej tlaltikpakchanejkej ipan nochi tlaltikpaktli kiamapouaj Biblia. Se ixtlamatki okijto ika san Biblia melak miyekej yokiamapoujkej niman san yejuin libro tlen más yonomachtijkej. San ika, san akin yolyemankej uelij kasikamatij Biblia niman uelij kichiuaj tlen ompa kijtoua (2 Cor. 3:15, 16).

10. ¿Tlenon okse techititia Biblia ika Jehová melak tlamachilise?

¹⁰ Matikitakan itlaj okse tlen techititia ika Biblia kipiya itlamachilis toTajtsin. Jehová xsan kikui Biblia para kimachtis ikalpan, noijki kikui para toseselti techmachtis niman techyolseuis. Ijkuak tikamapouaj iTlajtol, kuajli tikitaj ika Jehová yemelak kitstika tlen topan nochiujtika (Is. 30:21). Ijkuak otikpixkaj se tlauejli niman otikpoujkej toBiblia, ¿otikitakej ika tlen ompa otikpoujkej melak otechpaleui niman otikmachilijkej ika san tejuamej otechijkuilouilijkej yejon tlaxeloltin? Kanaj melak miyekpa ijkon yotikmachilijkaj. Tla Biblia melak youejkauj ika onoijkuilo, ¿tleka hasta aman nochimej kinpaleuijtika maski xsan noijki tlen kixnamikij tlaltikpakchanejkej? Pampa Biblia okijkuilo yakaj akin melak tlamachilise, Jehová (2 Tim. 3:16, 17).

11. ¿Kenon okiteititi toTajtsin ika xtechikoita ijkuak onoijkuilo Biblia?

¹¹ Jehová melajki, ika yejon, uelis tikijtoskej ika xtechikoita (Deut. 32:4; Hech. 10:34, 35; Rom. 2:11). Tlajtoltin tlen yejua okitlapejpeni para manoijkuilo Biblia kiteititia ika Jehová xtechikoita. Casi nochi 39 libros tlen ika peua Biblia okimijkuilojkej ika hebreo pampa yejon tlajtojli tlen ikalpan toTajtsin kasikamatiya. Sakin, ipan kachtopa siglo, más miyekej tlajtouayaj griego. Ika yejon, on 27 libros tlen ika ontlami Biblia okimijkuilojkej ika yejon tlajtojli. Jehová xokitlapejpeni san se tlajtojli para makijkuilokan iTlajtol. Ipan yejuin tlaltikpaktli nemij kanaj 8,000 millones tlaltikpakchanejkej niman xsan noijki tlajtojli tlajtouaj. ¿Kenon ueli tikixmatij Jehová tla xsan noijki tlajtojli titlajtouaj?

12. ¿Kenon yonochiuj Daniel 12:4 ipan yejuin itlamiyan tonaltin?

¹² Jehová okijli teotlajtoketl Daniel ika ipan itlamiyan tonaltin “on tlaixmatkilistli más miyekiyas”, yejon kijtosneki ika miyekej tlaltikpakchanejkej kasikamatiskiaj tlen kijtoua Biblia (xpoua Daniel 12:4). Tlaltikpakchanejkej youel yokasikamatkej iTlajtol toTajtsin pampa Biblia yokitlajtolkuepkej ika miyek tlajtoltin, melak miyek copias yokinchijchiujkej niman melak miyekej yokinxexelouilijkej. Noijki yonochijchiujkej miyek amatlajkuiloltin itech Biblia. Biblia yejon libro tlen más yonotlajtolkuep niman yonoxelo. Miyek Biblias tlen nonemakaj melak patiojkej. San ika, ikalpan Jehová yokitlajtolkuep nochi Biblia, noso san tlajko, ipantsin 240 tlajtoltin. Nochimej uelis kipiyaskej se Biblia niman xtlaj kitlaxtlauaskej. ¿Kenon yotepaleui yejon? Melak miyekej tlaltikpakchanejkej itech nochi tlaltikpaktli kiselijtokej “kuajli tlajtoltin itech Tekiuajyotl” achto ika tlapopoliuis (Mat. 24:14, TNM). Jehová melajki niman kineki ika melak miyekej tlaltikpakchanejkej makipouakan iTlajtol niman makixmatikan. Ijkon kichiua pampa melak techtlasojtla.

13. ¿Tleka tikijtouaj ika Biblia kiteititia itlasojtlalis toTajtsin? (Juan 21:25).

¹³ Biblia noijki kiteititia itlaj tlen melak ueyi kijtosneki: itlasojtlalis toTajtsin (1 Juan 4:8). Matitlanemilikan itech yejuin. ToTajtsin okitak tlenon kitlalis ipan Biblia niman tlenon xkitlalis. Yejua kuajli otechijli tlenon noneki tikchiuaskej tla tiknekij iuan touikaskej, tla tiknekij tiyolpakiskej niman tla tiknekij nochipa tinemiskej. Pampa Jehová melak techtlasojtla, xokitlali ipan Biblia tlen xtechpaleuis para tiktekichiuiliskej (xpoua Juan 21:25).

14. ¿Kenon Biblia noijki kiteititia itlasojtlalis toTajtsin?

¹⁴ Jehová noijki techititia ika techtlasojtla pampa xotechinmakak miyek tlanauatiltin ipan Biblia. Ipan Biblia yejua okichiuj makijkuilokan teotlajtoltin, tlen inpan opanok sekimej tlaltikpakchanejkej niman tlen techpaleuis ipan tonemilis niman ijkon kuajli matiktlapejpenikan tlenon tikchiuaskej. Tlen okitlali ipan Biblia techpaleuiya matiktlasojtlakan niman matiktlakamatikan Jehová ika nochi toyojlo.

15. a) ¿Kenon kiteititia Biblia ika Jehová melak kineki techpaleuis? b) ¿Intech akinomej tlanemilijtokej ichpokatsin, tokniuj telpochtli niman tokniuj akin iueyi akin uajnesij ipan tlaixkopinaltin? (Gén. 39:1, 10-12; 2 Rey. 5:1-3; Luc. 2:25-38).

¹⁵ Biblia kiteititia ika Jehová melak kineki techpaleuis. Ijkon tikijtouaj pampa ipan iTlajtol kinteneua miyekej itekipanojkauan akin uelis tikimasikamatiskej pampa san noijki okixnamijkej tlen aman tejuamej tikixnamikij (Sant. 5:17). Niman tlen más ueyi kijtosneki, ijkuak tikitaj kenon Jehová okinpaleui itekipanojkauan, más kuajli tikasikamatij ika yejua “tenotski niman teikneliani” (Sant. 5:11).

16. ¿Tlenon tiuelij itech Jehová ijkuak tikamapouaj ipan Biblia intech akin okichiujkej tlen xkuajli? (Isaías 55:7).

 ¹⁶ Biblia noijki techijlia kenon Jehová noijki techititia ika techtlasojtla. Ompa techijlia ika toTajtsin xkeman techkauas ijkuak tikchiuaskej se tlajtlakojli. Israelitas miyekpa tlajtlakouayaj ixpan Jehová, san ika, nochipa ijkuak yejuamej yemelak noyolkuepayaj, Jehová kintlapopoluiaya (xpoua Isaías 55:7). Tokniuan ipan kachtopa siglo noijki kimatstoyaj ika Jehová melak kintlasojtlaya. Jehová okichiuj ika apóstol Pablo makimijli tokniuan akin nemiyaj ipan kachtopa siglo makitlapopoluikan niman makiyolseuikan se tlakatl akin yonoyolkuepka pampa okichiujka itlaj tlen melak xkuajli (1 Cor. 5:1-5; 2 Cor. 2:6, 7). Melak techmojkatlachialtia ika Jehová xkintlalkauiaya itekipanojkauan ijkuak kichiuayaj tlen xkuajli, yej ika tlasojtlalistli kinpaleuiaya, kinyektlaliaya niman kimijliaya itech mauajnokuepakan. Niman kijtoua ika aman noijki ijkon kichiuas tla yakaj kichiua se tlajtlakojli niman noyolkuepa (Sant. 4:8-10).

17. ¿Tleka Biblia se kualtsin tetlayokolijli?

¹⁷ Jehová yotechmakak se kualtsin tetlayokolijli: Biblia. ¿Tleka tikijtouaj ika se kualtsin tetlayokolijli? Pampa ken yotikitakej, Biblia techititia imelajkayo toTajtsin, itlamachilis niman itlasojtlalis. Noijki, Biblia kiteititia ika Jehová kineki matikixmatikan niman iuan matouikakan.

18. ¿Kenon uelis tikteititiskej ika tiktlasojkamachiliaj Jehová pampa otechtlayokoli Biblia?

¹⁸ Maka matikilkauakan ika iTlajtol toTajtsin se “kuajli tetlayokolijli” tlen Jehová yotechmakak (Sant. 1:17). Kuakon, nochipa matikititikan Jehová ika melak tiktlasojkamachiliaj pampa otechtlayokoli Biblia. Niman uelis tikititiskej ika tiktlasojkamachiliaj tla tikchiuaj teoyotl achto tikamapouaskej niman tla itech titlanemiliaj. Uelis kuajli tikmatstoskej ika akin okichijchiuj Biblia, Jehová, techteochiuas tla tokojtiliaj tomachtiskej iTlajtol niman techpaleuis más kuajli matikixmatikan (Prov. 2:5).