1. Ke ka baka la’ng o leboga Beibele?

 RE TLOGA re leboga gore Jehofa Modimo o re neile Beibele! Ka gare ga yona o re nea keletšo e bohlale yeo e ka re thušago go lebeletšana le mathata ao re kopanago le ona lehono ka katlego. E bile o re nea le kholofelo e kgahlišago ya bokamoso. Sa bohlokwa le go feta ke gore Jehofa o diriša Beibele go re utollela dilo tše dintši ka yena. Ge re naganišiša ka dika tša gagwe tše dibotse, re kgomega dipelo ke moka ra nyaka go ba bagwera ba gagwe ba kgauswi.—Ps. 25:14.

2. Jehofa o boditše batho molaetša wa gagwe ka ditsela dife tše di fapafapanego?

² Jehofa o nyaka gore batho ba mo tsebe. Nakong e fetilego o be a diriša ditoro, dipono le barongwa go fetiša melaetša ya gagwe. (Num. 12:6; Dit. 10:3, 4) Re be re ka se kgone go ithuta ka melaetša yeo ya gagwe ge nkabe e be e se ya ngwalwa fase. Ke ka baka leo Jehofa a ilego a diriša batho gore ba ‘ngwale ka pukung’ dilo tšeo a bego a nyaka gore re di tsebe. (Jer. 30:2) ka ge “tsela ya Modimo wa therešo e phethagetše,” re ka kgodišega gore mokgwa wo a bolelago le rena ka ona o tlo re thuša.—Ps. 18:30.

3. Jehofa o ile a kgonthišetša bjang gore Beibele e dula e le gona go fihla le lehono? (Jesaya 40:8)

³ Bala Jesaya 40:8. Lentšu la Modimo le be le dutše le nea banna le basadi bao ba botegago tlhahlo e botse ka mengwaga e dikete. Seo se ile sa kgonega bjang? Yeo ke potšišo e botse ka gobane Beibele e ngwadilwe kgale kudu godimo ga dilo tšeo di bego di senyega tšeo e lego gore ga re sa na tšona lehono. Eupša Jehofa o ile a kgonthišetša gore batho ba dira dikopi tša dingwalwa tše kgethwa. Le ge batho bao ba bego ba e kopolla ba sa phethagala, ba be ba le šedi kudu. Ka mohlala, seithuti se sengwe ge se bolela ka mangwalo a Seheberu, se itše: “Re kgodišegile gore ga go na  puku e nngwe ya kgale ntle le Beibele yeo e ilego ya kopollwa gabotse.” Le ge Beibele e ngwadilwe kgale godimo ga dilo tšeo di bego di senyega, ke moka ya kopollwa ke batho bao ba sa phethagalago, re ka kgodišega gore mantšu ao re a balago ka go yona lehono a fetiša dikgopolo tša Mongwadi wa yona e lego Jehofa.

4. Re tlo boledišana ka’ng sehlogong se?

⁴ Jehofa o re nea “mpho e nngwe le e nngwe e botse le neo e nngwe le e nngwe e phethagetšego.” (Jak. 1:17) Beibele ke e nngwe ya dimpho tše dibotse tšeo Jehofa a re neilego tšona. Ge motho a re nea mpho, mpho yeo e re bontšha gore motho yoo o re tseba gabotse e bile o tseba le dilo tšeo re di hlokago. Re ka bolela seo se swanago le ka yo a re neilego Beibele. Re ithuta dilo tše dintši ka Jehofa ge re hlahloba mpho ye. Re ithuta gore Jehofa o re tseba gabotse e bile o tseba le dilo tšeo re di hlokago. Sehlogong se re tlo boledišana ka dika tše tharo tša Jehofa tšeo re ithutago tšona ka Beibeleng, e lego bohlale, toka le lerato. Sa pele, a re boledišaneng ka seo Beibele e se bolelago ka bohlale bja Modimo.

5. Ke tsela efe yeo Beibele e bontšhago bohlale bja Modimo?

⁵ Jehofa o a tseba gore re hloka keletšo ya gagwe e bohlale. Gomme mpho ye a re neilego yona e lego Beibele e tletše ka bohlale bja gagwe. Ge batho ba diriša keletšo ya Beibele ba ba le mafelelo a makaone. Beibele e fetoša maphelo. Ge Moshe a be a ngwala dipuku tša mathomo tša Beibele, o boditše Baisiraele gore: “Ga se mantšu a go hloka mohola go lena, eupša ona a bolela bophelo go lena.” (Doit. 32:47) Ge eba batho ba ka theetša seo Mangwalo a se bolelago, ba ka ba le bophelo bjo bo kgahlišago. (Ps. 1:2, 3) Beibele e sa dutše e na le matla a go kaonefatša maphelo a batho le ge e ngwadilwe kgale. Ka mohlala, dihlogo tšeo di lego go jw.org/nso tšeo di rego, “Beibele e Fetoša Maphelo,” di na le mehlala ya batho ba fetago ba 50 bao ba ilego ba kgona go dira diphetogo maphelong a bona ka ge ba ile ba thoma go kwa keletšo ya Beibele.—1 Bathes. 2:13.

6. Ke ka baka la’ng re ka re ga go na puku yeo e swanago le Beibele?

⁶ Ga go na puku e nngwe yeo e swanago le Lentšu la Modimo. Ka baka la’ng? Ka gobane Mongwadi wa puku yeo, e lego Jehofa Modimo, ke ramatlaohle, o dula a le gona ka mo go sa felego e bile ke yo bohlale go feta motho le ge e le ofe. Dipuku tše dingwe di tšwela pele di balwa le ge bangwadi ba tšona ba hlokofetše, eupša keletšo ya tšona e feleletša e se sa na mohola. Le gona, melao ya motheo ya Beibele e dula e šoma e bile e thušitše batho ka dinako tše dintši tše di fapanego. Ge re dutše re bala puku ye e kgethwa le go naganišiša ka seo re ithutago sona, Mongwadi wa yona o diriša matla a moya o mokgethwa go re thuša go bona gore re ka diriša bjang keletšo ya Beibele maphelong a rena. (Ps. 119:27; Mal. 3:16; Baheb. 4:12) Mongwadi wa Beibele o tloga a fela pelo ya go go thuša. Seo se dira gore re nyake go bala Beibele ka mehla.

7. Beibele e ile ya thuša batho ba Modimo bjang gore e be batee nakong e fetilego?

⁷ Tsela e nngwe yeo Beibele e bontšhago bohlale bja Modimo ke ka go dira gore batho ba gagwe e be batee. Ge Baisiraele ba fihla nageng ya kholofetšo ba ile ba dula mafelong a fapafapanego. Ba bangwe e ile ya ba barei ba dihlapi, ba bangwe ya ba badiši gomme ba bangwe ya ba balemi. Go be go ka ba bonolo gore Baisiraele bao ba  dulago lefelong letee ba se ke ba hlwa ba e ba le taba goba ba nagana ka Baisiraele bao ba dulago karolong e nngwe. Eupša Jehofa o ile a rulaganya gore Baisiraele ba dule ba kopana mafelong a itšego gore ba kwe ge Lentšu la gagwe le balwa le go hlaloswa. (Doit. 31:10-13; Neh. 8:2, 8, 18) Nagana gore Moisiraele yo a botegago o be a ikwa bjang ge a fihla Jerusalema ke moka a bona Baisiraele ba dimilione bao ba tlago go rapela ba etšwa mafelong a mangwe. Jehofa o be a diriša tsela ye go thuša batho ba gagwe gore ba dule e le batee. Ka morago ga gore phuthego ya Bokriste e hlongwe, go be go na le banna le basadi ba bantši bao ba bego ba bolela maleme a go se swane e bile ba etšwa mafelong a go se swane. Eupša ka ge ba be ba rata Mangwalo e be e le batee e bile ba rapela Modimo wa therešo. Bao e bego e sa tšwa go ba badumedi ba be ba ka kwešiša Lentšu la Modimo feela ge ba thušwa ke barapedi gotee le bona e bile ba kopanela le bona.—Dit. 2:42; 8:30, 31.

8. Lehono Beibele e thuša bjang batho ba Jehofa gore ba dule e le batee?

⁸ Modimo wa rena yo bohlale o tšwela pele a diriša Beibele go ruta batho ba gagwe le go dira gore e be batee. Beibele e na le ditherešo ka moka ka Jehofa tšeo re hlokago go di tseba. Re dula re e ba gona dibokeng le dikopanong tše dikgolo le tše dinyenyane gore re kgone go kwa ge Mangwalo a balwa le go hlaloswa. Beibele ke sedirišwa se bohlokwa kudu seo Jehofa a se dirišago go thuša batho ba gagwe gore ba mo “direle ka botee.”—Tsef. 3:9.

9. Ke seka sefe seo se nyakegago gore re kgone go kwešiša molaetša wa Beibele? (Luka 10:21)

 ⁹ A re boneng bohlatse bjo bongwe bjo bo bontšhago bohlale bja Jehofa. O dirile gore Mangwalo a mantši a ngwalwe ka tsela yeo e lego gore e tla kwešišwa ke batho ba ikokobeditšego feela. (Bala Luka 10:21.) Batho ba bantši ba bala Beibele. Seithuti se sengwe se boletše gore Beibele ke puku yeo batho ba e balago ka šedi go feta puku le ge e le efe, eupša ke batho ba ikokobeditšego feela bao ba e kwešišago le go diriša seo e se bolelago.—2 Bakor. 3:15, 16.

10. Ke tsela efe e nngwe yeo Beibele e bontšhago bohlale bja Jehofa?

¹⁰ Re bona tsela e nngwe ka Beibeleng yeo e bontšhago gore Jehofa o bohlale. Jehofa ga diriše Mangwalo go re ruta re le sehlopha feela, eupša o a diriša go ruta le go homotša yo mongwe le yo mongwe wa rena. Ge re bala Beibele re ka kgona go bona gore Jehofa o na le taba le yo mongwe le yo mongwe wa rena. (Jes. 30:21) Ke gakae ge o na le bothata ke moka o bala Mangwalo wa hwetša o bala temana yeo e kego e ngwaletšwe wena go tloga le mathomong? Le gona Beibele e ngwaletšwe gore batho ba dimilione ba e kwešiše. Beibele e swere dilo tšeo di lego nakong gomme e kgona go go thuša ka nako yeo o tlogago o e hloka. Se se kgonega ka gobane Mongwadi wa Beibele ke yo bohlale go fetiša batho ka moka.—2 Tim. 3:16, 17.

11. Ge Beibele e be e ngwalwa, Modimo o bontšhitše bjang gore ga a bebe sefahlego?

¹¹ Seka se sengwe sa Jehofa ke toka. (Doit. 32:4) Motho yo a nago le toka gantši ga a bebe sefahlego, le gona Jehofa le yena ga a bebe sefahlego. (Dit. 10:34, 35; Baroma 2:11) Re bona seo ka maleme ao a dirišitšwego ge go ngwalwa Beibele. Dipuku tša mathomo tše 39 tša Beibele di be di ngwadilwe ka Seheberu, e lego leleme leo le bego le kwešišwa ke bahlanka ba Modimo ka nako yeo. Eupša lekgolong la pele la mengwaga go be go dirišwa leleme le Segerika kudu. Ka gona dipuku tša mafelelo tše 27 tša Beibele di ngwadilwe ka leleme leo. Jehofa ga se a ka a re Lentšu la gagwe le ngwalwe ka leleme le tee feela. Lehono batho ba e ka bago ba dibilione tše seswai mo lefaseng ba bolela maleme a mantši. Ke eng seo se ka thušago batho ba bantši ka tsela ye gore ba ithute ka Jehofa?

12. Boporofeta bjo bo lego go Daniele 12:4 bo phethagala bjang mo mehleng ya bofelo?

¹² Jehofa o ile a diriša moporofeta Daniele go tshepiša gore mehleng ya bofelo “tsebo ya therešo” yeo e hwetšwago ka Beibeleng “e tla ata” le gore batho ba bantši ba tla e kwešiša. (Bala Daniele 12:4.) Tsela e nngwe yeo e dirilego gore batho ba bantši ba e kwešiše ke gore Beibele le dikgatišo tšeo di theilwego go yona di a fetolelwa, tša gatišwa le go newa batho ba bantši. Beibele ke puku yeo e fetoletšwego le go phatlalatšwa go feta dipuku tše dingwe lefaseng ka moka. Ka dinako tše dingwe Beibele yeo e fetoletšwego ke batho ba dikgwebo e tura kudu. Eupša go ba go fihla ga bjale batho ba Jehofa ba fetoletše Beibele e feletšego goba karolwana ya yona ka maleme a fetago a 200, e bile motho yo mongwe le yo mongwe a ka e hwetša mahala. Ka baka la se batho ba ditšhaba ka moka ba ithuta ka ‘ditaba tše dibotse’ pele bofelo bo etla. (Mat. 24:14) Modimo wa rena yo a nago le toka o nyaka gore batho ba bantši ba hwetše sebaka sa go mo tseba ka go ithuta ka yena ba diriša Lentšu la gagwe. O dira se ka gobane a re rata kudu.

13. Ke ka baka la’ng re ka re Beibele e bontšha gore Modimo ke lerato? (Johane 21:25)

¹³ Beibele e re thuša go kwešiša seka se segolo sa Modimo e lego lerato. (1 Joh. 4:8) Nagana ka dilo tšeo Jehofa a di ngwadilego ka Beibeleng le tšeo a sego a di ngwala. O re neile dilo tšeo re di hlokago gore re kgone go ba le segwera se sebotse le yena, re phele bophelo bjo bo kgahlišago gona bjale, e bile re tle re hwetše bophelo bjo bo sa felego. Eupša ka ge Jehofa a re rata ga se a re nea ditaba tše dintši tšeo re sa di hlokego.—Bala Johane 21:25.

14. Ke tsela efe e nngwe yeo e bontšhago gore Modimo o a re rata?

¹⁴ Jehofa o re bontšha gore o a re rata ka go boledišana le rena ka tsela yeo e re neago seriti. Ka Beibeleng ga a re nee melao e mentšintši, goba go laola selo se sengwe le se sengwe seo re se dirago bophelong. Go e na le moo, o diriša dikanegelo tša bophelo, boporofeta bjo bo kgahlišago le keletšo e šomago yeo e re thušago gore re dire diphetho tše dibotse. Lentšu la Modimo le dira gore re mo rate go tšwa pelong le go mo theetša.

15. (a) Jehofa o bontšha bjang gore o na le taba le batho bao ba balago Lentšu la gagwe? (b) Go ya ka seswantšho se, mosetsana yo monyenyane,ngwanabo rena wa mofsa le kgaetšedi yo a godilego, ba naganišiša ka batho bafe ba ka Beibeleng? (Gen. 39:1, 10-12; 2 Dikg. 5:1-3; Luka 2:25-38)

¹⁵ Beibele e bontšha gore Modimo o tloga a e na le taba le rena. Bjang? Lentšu la gagwe le bolela ka dilo tšeo batho ba lebeletšanago le tšona. Re kgona go kwešiša tsela yeo batho ba ka Beibeleng ba bego ba  ikwa ka yona ka gobane e be e le batho bao ba bego ba e na “le maikwelo a swanago le a rena.” (Jak. 5:17) Sa bohlokwa le go feta, ge re bona kamoo a bego a dirišana le batho ba go swana le rena ka gona, re kgona go kwešiša gore “Jehofa o na le lerato le legolo e bile ke yo a gaugelago.”—Jak. 5:11.

16. Re ithuta’ng ka Jehofa ge re bala ka batho bao ba dirilego diphošo ka Beibeleng? (Jesaya 55:7)

¹⁶ Beibele e bontšha tsela e nngwe yeo Jehofa a re ratago ka yona. Mangwalo a re kgonthišetša gore Modimo wa rena a ka se re lahle ge re dira diphošo. Baisiraele ba ile ba direla Jehofa dibe gantši le gantši; eupša ge ba be ba itshola go tšwa pelong Modimo o be a ba lebalela. (Bala Jesaya 55:7.) Bakriste ba mathomo le bona ba be ba tseba gore Modimo o ba rata kudu. Moapostola Paulo o ile a budulelwa go botša Bakristegotee le yena gore ba ‘lebalele le go homotša’ monna yo a bego a dirile sebe se segolo eupša a itshola. (2 Bakor. 2:6, 7; 1 Bakor. 5:1-5) Go tloga go kgahliša go bona gore Jehofa ga se a ka a lahla bahlanka ba gagwe bao ba bego ba mo direla diphošo. Eupša o be a ba thuša ka lerato, a ba phošolla, e bile a ba mema gore e be bagwera ba gagwe gape. O tshepiša go dira se se swanago go badiradibe bao ba itsholago lehono.—Jak. 4:8-10.

17. Ke ka baka la’ng Beibele e le mpho e kgahlišago?

¹⁷ Jehofa o re neile mpho e botse. Ke ka baka la’ng Lentšu la gagwe le kgahliša? Re ithutile gore Beibele e bontšha gore Modimo o na le bohlale, o na le toka e bile o re rata kudu. Puku ye e bontšha gore Jehofa o nyaka gore re mo tsebe. E bile o nyaka gore re be bagwera ba gagwe.

18. Re ka bontšha bjang gore re leboga mpho ya Jehofa e botse e lego Beibele?

¹⁸ Ga se ra swanela go lebala gore Lentšu la Modimo ke ‘mpho e botse’. (Jak. 1:17) Ka gona, eka re ka tšwela pele re bontšha gore re a e leboga. Re ka dira seo ka go bala mantšu a a makgethwa le go naganišiša ka ona. Ge re dira bjalo re ka kgodišega gore Mongwadi yo mogolo o tlo šegofatša maiteko a rena le gona re tlo ba le “tsebo ka ga Modimo.”—Die. 2:5.