1. Библи нин ке ес, уой туххӕй боз цӕмӕн ан?

 БИБЛИ нин ке ес, уой туххӕй Йеговӕй хъӕбӕр боз ан. Ци зундгин унаффитӕ си ес, уони фӕрци ’й фӕззонӕн, нӕ царди аллихузи зин уавӕрти нин куд архайгӕ ’й, уой. Уомӕй уӕлдай ма нин федӕнӕй дӕр дессаги нифс балӕвар кодта. Тӕккӕ ӕхсидзгӕдӕр ба е ӕй, ӕма Библий Йеговӕ ӕхе туххӕй берӕ цидӕртӕ раргом кодта. Хуцауи дессаги менеугутӕбӕл куд фулдӕр фӕссагъӕс кӕнӕн, уотӕ нӕ хъӕбӕрдӕр фӕффӕндуй, цӕмӕй имӕ бахӕстӕг уӕн ӕма ӕ хӕццӕ ӕцӕг ӕмбӕлттӕ исуӕн (Пс. 25:14).

2. Йеговӕ ӕхе туххӕй адӕнӕн куд базонун кӕнидӕ?

² Йегови фӕндуй, цӕмӕй ӕй адӕн базононцӕ. Рагидзаманти ӕхе базонун кӕнидӕ фунтӕ, цӕстӕбӕлуайӕнтӕ ӕма изӕдти фӕрци (Ним. 12:6; Гъуд. 10:3, 4). Фал ӕгас еци хабӕрттӕ финст ку не ’рцудайуонцӕ, уӕд си махӕн ци пайда адтайдӕ? Гъе уомӕ гӕсгӕ Йеговӕ ӕ адӕнӕн бафӕдзахста, цӕмӕй «киунуги» ниффинстайуонцӕ, ӕхе туххӕй ӕй радзорун ци фӕндадтӕй, уой (Йер. 30:2). Мах ӕй зонӕн, «Ӕцӕг Хуцауи над ӕй ӕнхӕст» (Пс. 18:30). Уомӕ гӕсгӕ ибӕл нӕ гурусхӕ кӕнӕн, Йеговӕ ӕхе туххӕй радзорунмӕ уӕхӕн мадзал ке равзурста, е тӕккӕ хуӕздӕр ке ӕй.

3. Йеговӕ куд батухстӕй, цӕмӕй Библи нӕ рӕстӕги уӕнгӕ ӕнӕййивдӕй байзадайдӕ? (Исай 40:8).

³ Бакӕсӕ Исаййи 40:8. Мингай ӕнзти дӕргъи Хуцаубӕл еузӕрдон нӕлгоймӕгтӕ ӕма силгоймӕгтӕ архайунцӕ, Хуцауи Дзурди ци зундгин унаффитӕ финст ес, уонӕмӕ гӕсгӕ. Цума уомӕн цӕй фӕрци ес гӕнӕн? Мах ӕй зонӕн, Библи раги финст ке ’рцудӕй, удта ’й цӕбӕл финстонцӕ, е ба бери фагӕ нӕ фӕууидӕ. Фиццаг къохфинститӕй нӕ рӕстӕги уӕнгӕ неци байзадӕй. Фал Йеговӕ уобӕл рагацау батухстӕй ӕма  Библий киунугутӕн дуйне къопитӕ искӕнун кодта. Кӕд еци киунугути къопитӕ ка кодта, етӕ ӕнӕнхӕст адтӕнцӕ, уӕддӕр хъӕбӕр лӕмбунӕг финстонцӕ. Еу ахургонд Дзиуиттаг Финстити туххӕй уотӕ загъта: «Нӕ бон ӕй федарӕй зӕгъун, рагон киунугутӕй нӕ рӕстӕги уӕнгӕ ка байзадӕй, уонӕй Библий хузӕн лӕмбунӕг ӕ къопитӕ еуемӕн дӕр конд ке не ’рцудӕнцӕ». Мадта кӕд хъӕбӕр берӕ рӕстӕг рацудӕй, удта Библи цӕбӕл финстонцӕ, етӕ тагъд лӕгъуз кодтонцӕ ӕма ин ӕ къопитӕ ка кодта, етӕ ба ӕнӕнхӕст адтӕнцӕ, уӕддӕр нӕ бон ци ӕй зӕгъун? Абони Библий ци кӕсӕн, етӕ ӕнцӕ, ка ’й ниффинсун кодта, уой гъудитӕ, гъома Йегови гъудитӕ.

4. Аци статьяй цӕмӕ ӕркӕсдзиан?

⁴ «Хуарзӕй цидӕриддӕр ес», етӕ Йеговӕ Хуцауӕй ӕнцӕ (Иак. 1:17). Ци дессаги лӕвӕрттӕ нин искодта, уонӕй еу ӕй Библи. Еске нин ести ку балӕвар кӕнуй, уӕд ӕ лӕварӕй бӕрӕг фӕууй, цӕйбӕрцӕбӕл хуарз зонуй мах дӕр ӕма ци гъӕуагӕ ан, уой дӕр. Уотӕ зӕгъӕн ес Хуцауи Дзурди туххӕй дӕр. Еци лӕвар куд хуӕздӕр зонгӕ цӕуӕн, уотӕ Йегови туххӕй дӕр берӕ цидӕртӕ базондзиан. Зӕгъӕн, цӕйбӕрцӕбӕл хуарз зонуй мах, удта ци гъӕуагӕ ан, уой. Аци статьяй ӕркӕсдзиан, Библи нин куд ӕргом кӕнуй Йегови ӕртӕ менеуӕги: зунд, рӕстдзийнадӕ ӕма уарзондзийнадӕ. Фиццагидӕр бал гъӕйдӕ радзорӕн, Библийӕй Хуцауи зунди туххӕй ци ес базонӕн, уобӕл.

5. Библи Хуцауи зунд куд ӕргом кӕнуй?

⁵ Йеговӕ нин Библи балӕвар кодта, уомӕн ӕма ’й зонуй, ӕ зундгин унаффитӕ нӕ хъӕбӕр ке гъӕунцӕ. Еци унаффитӕй ка фӕппайда кӕнуй, уони цард хуӕздӕрӕрдӕмӕ раййевуй. Библий фиццаг киунугутӕ финст ку ’рцудӕнцӕ, уӕд Моисей израилӕгтӕн загъта: «Етӕ сумахӕн уотид дзурдтӕ нӕ ’нцӕ – уонӕй кӕнгӕ ’й уӕ цард» (Дук. з. 32:47). Финстадӕмӕ гӕсгӕ ка цардӕй, етӕ адтӕнцӕ ӕнтӕстгун ӕма амондгун (Пс. 1:2, 3). Ӕма кӕд Библи хъӕбӕр раги финст ӕрцудӕй, уӕддӕр ма ин еци хъаурӕ ес, цӕмӕй адӕни цард хуӕздӕрӕрдӕмӕ ӕййева. Сайти jw.org, рубрики «Библия меняет жизнь» иссерӕн ес еу 50 хуӕрӕ ӕма ӕнсувӕрей царди хабӕрттӕ. Библий унаффитӕй пайда кӕнун ке райдӕдтонцӕ, уой фӕрци сӕ цард хуӕздӕрӕрдӕмӕ раййивта (1 Фес. 2:13).

6. Уотӕ цӕмӕн ес зӕгъӕн, ӕма Библий хузӕн киунугӕ дуккаг нӕййес?

⁶ Библий хӕццӕ еу киунугӕ рабарӕн дӕр нӕййес. Уотӕ зӕгъӕн цӕмӕн ес? Уомӕн ӕма ’й Йеговӕ Хуцау ниффинсун кодта. Е ӕй ӕносон Хуцау, устур хъаурӕ ӕма зунд кӕмӕ ес, е. Киунугутӕй беретӕ, ка сӕ ниффинсуй, уонӕй фулдӕр фӕццӕрунцӕ. Фал сӕ унаффитӕ ба, рӕстӕг ку рацӕуй, уӕд пайда нӕбал фӕуунцӕ. Библий унаффитӕ ба цийфӕнди рӕстӕг дӕр пайда ӕнцӕ. Ку ’й фӕккӕсӕн ӕма ибӕл ку фӕссагъӕс кӕнӕн, уӕд ӕй балӕдӕрӕн, Йеговӕ нин ӕ сугъдӕг хъаури фӕрци ке ӕнхус кӕнуй, цӕмӕй Библий ци унаффитӕ ес, уонӕй нӕ бон уа нӕ царди пайда кӕнун (Пс. 119:27; Мал. 3:16; Дзиуит. 4:12). Ӕцӕгӕйдӕр, Библи ка ниффинсун кодта, е ӕй уодӕгас ӕма нин банхус кӕнунмӕ алкӕддӕр цӕттӕ фӕууй. Гъе уомӕ гӕсгӕ ӕхсидзгӕ ’й, цӕмӕй Библи алли бон дӕр кӕсӕн.

7. Рагидзаманти Библи Хуцауи адӕнӕн куд ӕнхус кодта, цӕмӕй сӕ астӕу еудзийнадӕ адтайдӕ?

⁷ Библийӕй ма Хуцауи зунд куд зиннуй? Зӕгъӕн, Хуцауи Дзурдӕн уӕхӕн хъаурӕ ес, цӕмӕй адӕни еу кӕна. Израилӕгтӕ Зӕрдӕвӕрд зӕнхӕмӕ ку бацудӕнцӕ, уӕд ибӕл еу кӕронӕй иннӕ кӕронмӕ рапурхӕ ’нцӕ. Еуетӕ си кӕсалгахӕсгутӕ адтӕнцӕ, иннетӕ зӕнхикуст кодтонцӕ, кадӕр ба си фонс дардта. Алли рауӕнти ке цардӕнцӕ, уомӕ  гӕсгӕ тӕссаг адтӕй, кӕрӕдзебӕл ке исустур зӕрдӕ уодзӕнцӕ, уомӕй. Фал Йеговӕ рагацау батухстӕй, цӕмӕй е ’гас адӕн дӕр кӕцидӕр бӕнтти еумӕ ӕмбурд кӕнонцӕ, ӕма Хуцауи Дзурд куд кӕсунцӕ ӕма ’й куд лӕдӕрун кӕнунцӕ, уомӕ еумӕ игъосонцӕ (Дук. з. 31:10–13; Неем. 8:2, 8, 18). Еци рӕстӕг Йерусалиммӕ бӕсти алли къумтӕй милиуангай адӕн ӕрӕмбурд уидӕ. Расагъӕс кӕнӕ, уойбӕрцӕ адӕн фӕууингӕй адӕймаг куд фӕццийнӕ кӕнидӕ. Уотемӕй син Йеговӕ ӕнхус кодта, цӕмӕй сӕ астӕу еудзийнадӕ адтайдӕ. Фӕстӕдӕр киристон ӕмбурд ку фӕззиндтӕй, уӕд уоми дӕр аллихузи ӕвзӕгтӕбӕл дзорӕг адӕн фӕууидӕ. Еуетӕн адӕни астӕу кадгин ном адтӕй, иннетӕ адтӕнцӕ хумӕтӕг адӕн, кадӕр гъӕздуг адтӕй, кадӕр ба – мӕгур. Фал Финстадӕ ке уарзтонцӕ, уой фӕрци сӕ бон адтӕй Хуцауӕн еудзийнади лӕггадӕ кӕнун. Ӕрӕги ка ӕрбайеу ӕй, уони бон ба адтӕй Хуцауи Дзурд хуӕздӕр лӕдӕрун иннети ӕнхуси фӕрци ӕма ӕмбурдти фӕрци (Гъуд. 2:42; 8:30, 31).

8. Абони Библи Хуцауи адӕнӕн куд ӕнхус кӕнуй, цӕмӕй сӕ астӕу еудзийнадӕ уа?

⁸ Нӕ уӕларвон Фидӕ абони дӕр ӕ лӕггадгӕнгути Библий фӕрци ахур кӕнуй ӕма сӕ астӕу ци еудзийнадӕ ес, уой федар кӕнуй. Библи нин ӕргом кӕнуй рӕстдзийнадӕ, удта си финст ес, Йегови туххӕй нӕ зонун цидӕриддӕр гъӕуй, е. Ӕмбурдтӕ ӕма конгресстӕмӕ ку ’рбацӕуӕн, уӕд фегъосӕн Библи куд фӕккӕсунцӕ ӕма ’й куд фӕллӕдӕрун кӕнунцӕ, уомӕ. Мадта зӕгъӕн ес, ӕма  Библий фӕрци нӕ бон ӕй Йеговӕн «усхъӕй-усхъӕмӕ» лӕггадӕ кӕнун (Соф. 3:9).

9. Цӕмӕй Библи лӕдӕрай, уой туххӕй цӕхуӕн менеуӕг гъӕуй? (Лукай 10:21).

⁹ Йегови зунд ӕцӕгӕйдӕр ӕнӕкӕрон ке ӕй, е ма еу гъуддагӕй дӕр бӕрӕг ӕй. Библий кӕцидӕр хӕйттӕ куд финст ӕнцӕ, уомӕ гӕсгӕ сӕ балӕдӕрун ӕ бон ӕй ӕрмӕстдӕр сӕрниллӕг адӕймагӕн. (Бакӕсӕ Лукай 10:21.) Куд ӕй зонӕн, уотемӕй Библи ӕгас зӕнхи цъарӕбӕл дӕр кӕсунцӕ. Еу ахургонд уотӕ загъта: «Библи цӕйбӕрцӕ адӕн кӕсунцӕ ӕма ’й куд лӕмбунӕг кӕсунцӕ, уотӕ еу киунугӕ дӕр нӕ». Фал си ӕцӕгӕйдӕр ци финст ес, уой ба ӕрмӕстдӕр сӕрниллӕг адӕн лӕдӕрунцӕ ӕма си сӕ царди пайда кӕнунцӕ (2 Кор. 3:15, 16).

10. Библи кӕсгӕй ма Йегови стур зунд куд фӕууинӕн?

¹⁰ Библи кӕсгӕй ма Йегови стур зунд куд фӕууинӕн? Библий фӕрци Йеговӕ айдагъ е ’гас адӕни дӕр нӕ ахур кӕнуй, фал ма ӕ алли лӕггадгӕнӕгбӕл дӕр хецӕнӕй батухсуй ӕма ин ӕ нифс бафедар кӕнуй (Ис. 30:21). Ескӕд уотӕ адтӕй, ӕма цидӕр зиндзийнадӕбӕл исӕмбалдтӕ ӕма Библий иссирдтай, раст дӕу уавӕрмӕ ка хауй, уӕхӕн стих? Ӕвӕдзи уотӕ еу ӕма дууӕ хатти н’ адтӕй. Ӕма кӕд Библи хъӕбӕр берӕ адӕнӕн финст ӕрцудӕй, уӕд уомӕн гӕнӕн куд ес, цӕмӕй си дӕу ка гъудӕй, еци стих иссерай? Уомӕн гӕнӕн ес, ка ’й ниффинсун кодта, уой зунд ӕнӕкӕрон ке ӕй, уой фӕрци (2 Тим. 3:16, 17).

11. Хуцауи рӕстдзийнадӕ куд зиннуй, Библи куд финст ӕрцудӕй, уомӕй?

¹¹ Нур ба ӕркӕсӕн Йегови ӕндӕр менеуӕгмӕ – рӕстдзийнадӕмӕ (Дук. з. 32:4). Рӕстӕй ка фӕййархайуй, уӕхӕн адӕймаг еуети иннетӕй уӕлдӕр нӕ февӕруй. Уотӕ зӕгъӕн ес Йеговӕй дӕр (Гъуд. 10:34, 35; Ром. 2:11). Е рабӕрӕг ӕй, Библи цӕхуӕн ӕвзӕгтӕбӕл финст ӕрцудӕй, уомӕй. Фиццаг 39 киунугемӕн сӕ фулдӕр финст ӕрцудӕнцӕ дзиуиттагау. Уӕди рӕстӕги Хуцауи лӕггадгӕнгутӕн сӕ фулдӕр еци ӕвзаг хуарз зудтонцӕ. Фал нӕ эри фиццаг ӕносмӕ ба адӕнӕн сӕ фулдӕр грекъагау дзорун райдӕдтонцӕ. Уомӕ гӕсгӕ Библий иннӕ 27 киунуги финст ӕрцудӕнцӕ сӕйрагидӕр грекъаг ӕвзагбӕл. Йеговӕ уотӕ нӕ загъта, цӕмӕй ӕ Дзурд ӕрмӕстдӕр еунӕг ӕвзагбӕл уа. Абони зӕнхӕбӕл аст миллиард адӕймагемӕй фулдӕр цӕруй ӕма берӕ аллихузи ӕвзӕгтӕбӕл дзорунцӕ. Цума ӕгас еци адӕни бон куд ӕй Йегови туххӕй базонун?

12. Данели 12:4 финст пахампарадӕ абони куд ӕнхӕст кӕнуй?

¹² Пахампар Данели фӕрци Йеговӕ зӕрдӕ байвардта, фӕстаг бӕнтти рӕстӕг «раст зонундзийнӕдтӕ [ке] исберӕ уодзӕнцӕ», гъома Библий ци финст ес, уой беретӕ ке балӕдӕрдзӕнцӕ. (Бакӕсӕ Данели 12:4.) Раст зонундзийнӕдтӕ берӕ кӕнунцӕ, Библи ӕма Библибӕл арӕзт публикацитӕ ке тӕлмац кӕнунцӕ, ке мухур кӕнунцӕ ӕма сӕ ке парахат кӕнунцӕ, уой фӕрци. Библи цал ӕвзагемӕ ратӕлмац кодтонцӕ ӕма е куд парахат ӕй, уотӕ еу киунугӕ дӕр нӕй. Фал еуӕй-еу къампанитӕн сӕ тӕлмацтӕ хъӕбӕр хъазар фӕуунцӕ. Уонӕй уӕлдай, Йегови лӕггадгӕнгутӕ Библи ӕнӕгъӕнӕй кенӕ ӕ кӕцидӕр хӕйттӕ ратӕлмац кодтонцӕ 240 ӕвзагемӕй фулдӕрмӕ, ӕма ’й ке фӕнди бон дӕр ӕй лӕварӕй райсун. Уой фӕрци еугур адӕнихӕттитӕн дӕр сӕ бон ӕй, «Хуцауи Паддзахади туххӕй хуарз хабар фегъосун», цалинмӕ кӕрон нӕма ӕрцудӕй, уӕдмӕ (Матф. 24:14). Нӕ рӕстаг Хуцауи фӕндуй, цӕмӕй никки фулдӕр адӕн Библи кӕсонцӕ ӕма уотемӕй ӕ хӕццӕ зонгӕ кӕнонцӕ. Еци фадуат алкӕмӕндӕр дӕттуй, уомӕн ӕма нӕ ӕгасейдӕр берӕ уарзуй.

13. Цӕмӕн ес зӕгъӕн, ӕма Библи Йегови уарзондзийнадӕ ӕргом кӕнуй? (Иоанни 21:25).

¹³ Библи ӕргом кӕнуй, ка ’й ниффинсун кодта, уомӕн ӕ сӕйрагдӕр менеуӕг – уарзондзийнадӕ (1 Иоан. 4:8). Расагъӕс кӕнӕ, Йеговӕ Библий ци ниффинсун кодта, ци ба – нӕ. Зонун нӕ цидӕриддӕр гъӕуй, уой нин радзурдта. Зӕгъӕн, цӕмӕй нӕ бон уа е ’мбӕлттӕ исун, абони амондгун цард кӕнун ӕма федӕни ӕносон цардӕй исхайгин ун. Йеговӕ нӕ берӕ уарзуй, ӕма нин уомӕ гӕсгӕ зонгӕ ци ӕй, уомӕй фулдӕр нӕ равардта. (Бакӕсӕ Иоанни 21:25.)

14. Хуцау нӕ ке уарзуй, е ма Библийӕй никкидӕр куд зиннуй?

¹⁴ Йеговӕ нин нӕ гъуди ке нимайуй, уомӕй дӕр бӕрӕг ӕй, берӕ нӕ ке уарзуй. Е Библий нӕ ниффинсун кодта, нӕ алли къахдзӕф дӕр цӕхуӕн гъӕуама уа, уой. Уой фӕндуй, цӕмӕй нӕхуӕдтӕ сагъӕс кӕнунбӕл ахур кӕнӕн. Уомӕ гӕсгӕ ӕ Дзурди ниффинсун кодта берети царди хабӕрттӕ, пахампарӕдтӕ ӕма аллихузи унаффитӕ. Уотемӕй нӕ Библи разӕнгард кӕнуй Хуцауи уарзун ӕма имӕ ӕгас зӕрдӕй игъосун.

15. а) Библи ка кӕсуй, уонӕбӕл Йеговӕ ке тухсуй, е цӕмӕй бӕрӕг ӕй? б) Ӕркӕсӕ хузӕмӕ. Минкъий кизгӕ, ӕригон ӕнсувӕр ӕма каргун хуӕрӕ Библийӕй цӕхуӕн хабӕрттӕбӕл сагъӕс кӕнунцӕ? (Райд. 39:1, 10–12; 2 Пад. 5:1–3; Лук. 2:25–38).

¹⁵ Библийӕй ма зиннуй, Йеговӕ нӕбӕл хъӕбӕр ке тухсуй. Е цӕмӕй бӕрӕг ӕй? Ӕ Дзурди финст ӕнцӕ адӕни царди хабӕрттӕ ӕма се ’нкъарӕнтӕ. Уони балӕдӕрун нин ӕнцон фӕууй, уомӕн ӕма етӕ дӕр «мах хузӕн» адӕн адтӕнцӕ (Иак. 5:17). Уомӕй уӕлдай ма еци хабӕрттӕ кӕсгӕй фӕууинӕн, Йеговӕ мах хузӕн адӕнмӕ цӕхуӕн зӕрдӕ  дардта, уой, ӕма ’й уой фӕрци балӕдӕрӕн, «Йеговӕ фӕлмӕн уарзтӕй ке уарзуй ӕма фӕлмӕнзӕрдӕ ке ӕй» (Иак. 5:11).

16. Библий ку фӕккӕсӕн, рӕдуд ка искодта, уӕхӕн адӕни хабӕрттӕ, уӕд Йегови туххӕй ци базонӕн? (Исай 55:7).

¹⁶ Библи ма нин Йегови уарзондзийнадӕ куд ӕргом кӕнуй? Финстадӕ нин зӕрдӕ ӕвӕруй, Хуцау ни ӕхе ке нӕ рахатдзӕй, ести рӕдуд ку искӕнӕн, уӕд. Зӕгъӕн, израилӕгтӕ Йегови нихмӕ еу ӕма дууӕ хатти тӕрегъӕд не ’скодтонцӕ, фал зӕрдӕй ку ӕрфӕсмон кӕниуонцӕ, уӕд син ниххатир кӕнидӕ. (Бакӕсӕ Исаййи 55:7.) Фиццаг ӕноси киристӕнттӕ дӕр ӕй зудтонцӕ, Йеговӕ сӕ берӕ ке уарзуй. Апостол Павел дӕр хуӕртӕ ӕма ӕнсувӕрти баразӕнгард кодта, цӕмӕй уӕззау тӕрегъӕд ка искодта, фал ибӕл ка ӕрфӕсмон кодта, уомӕн зӕрдӕй ниххатир кӕнонцӕ ӕма ’й бафедар кӕнонцӕ (2 Кор. 2:6, 7; 1 Кор. 5:1–5). Йеговӕ ӕ лӕггадгӕнгутӕй сӕ рӕдудтити туххӕй ӕхе ке нӕ рахатидӕ, еци хабӕрттӕ кӕсун нин уодӕнцойни хуасӕ куд нӕ ’нцӕ. Е сӕмӕ е ’нхуси къох бадаридӕ, фӕлмӕнӕй сӕ бараст кӕнидӕ ӕма сӕ баразӕнгард кӕнидӕ, цӕмӕй нӕуӕгӕй е ’мбӕлттӕ исуонцӕ. Йеговӕ нин зӕрдӕ ӕвӕруй, абони дӕр уотӕ ке архайдзӕй (Иак. 4:8–10).

17. Библи дессаги лӕвар исхонӕн цӕмӕн ес?

¹⁷ Йеговӕ нин ци лӕвар искодта, уой нецӕй хӕццӕ ес рабарӕн. Цӕмӕн ес уотӕ зӕгъӕн? Аци статьяй куд фӕууидтан, уотемӕй Библи ӕргом кӕнуй Хуцауи зунд, рӕстдзийнадӕ ӕма ӕ уарзондзийнадӕ. Еци киунугӕй зиннуй, Йегови ке фӕндуй, цӕмӕй ӕ хӕццӕ базонгӕ уӕн ӕма е ’мбӕлттӕ исуӕн.

18. Хуцауи «ӕнӕфау лӕвари» туххӕй боз ке ан, уой нӕ бон куд ӕй бавдесун?

¹⁸ Мах нӕ фӕндуй иронх кӕнун, Библи ке ӕй нӕ уӕларвон Фиди «ӕнӕфау лӕвар» (Иак. 1:17). Еци лӕвари туххӕй боз ке ан, уой нӕ бон куд ӕй бавдесун? Е бӕрӕг уодзӕй, ку ’й кӕсӕн ӕма ибӕл ку сагъӕс кӕнӕн, уӕд. Гъе уӕд, Библи ка ниффинсун кодта, е нин нӕ хъиамӕттӕн райарфӕ кӕндзӕй ӕма иссердзиан «Хуцауи туххӕй зонундзийнӕдтӕ» (Ӕмб. 2:5).