1. ¿Imanirtan Diospa Palabrampita agradecikuntsik?

 BIBLIACHÖQA mëtsika consëjukunam kan y problëmakunapa pasashqa imata ruranapaqmi yanapamantsik. Tsëmi Diosnintsik Bibliata qaramanqantsikpitaqa, ¡alläpa agradecikuntsik! Bibliata leyirmi musyantsik, shamoq tiempuchö alli kawakunantsikpaq Diosnintsik änimanqantsikta. Peru tsëpitapis masqa, Bibliata leyirninmi musyantsik Jehovä Diosnintsik imanö kanqanta. Tsëta musyanqantsikmi Pëta mas kuyanapaq y amïgun kanapaq yanapamantsik (Sal. 25:14).

2. ¿Imatataq Jehovä ruratsimushqa pëpita musyanantsikta munar?

² Jehovä Diosnintsikqa reqinantsiktam munan. Tsëmi unë witsanqa suëñukunawan, revelacionkunawan y hasta angelkunawan imanö kanqanta nunakunata musyatsirqan (Nüm. 12:6; Hëch. 10:3, 4). Peru tsëkunata mana qellqatsishqa kaptinqa, manam Diosnintsik imanö kanqanta musyashwantsu karqan. Tsëmi pëqa imanö kanqanta musyanapaq “juk libruman” qellqatsirqan (Jer. 30:2). “Teyta Dios ruranqanqa llapampis allillam”, tsëmi següru këkantsik llapan qellqatsimunqankunaqa allilla kanqanta (Sal. 18:30).

3. Unë witsan willakunqankunallata kanan witsampis Biblia willakunampaq, ¿imatataq Jehovä rurarqan? (Isaïas 40:8).

³ (Leyi Isaïas 40:8). Bibliachö qellqarëkaq consëjukunata wiyakurmi, Jehoväpa sirweqninkunaqa mëtsika watakunapa alli kawakuyashqa. Peru fäcil-lla ushakaq materialkunaman unëna qellqayashqa këkaptinqa, ¿imanötan  tsë consëjukuna nunakunata yanapanman? Kanan witsanqa, musyantsikmi tsë unë qellqayanqankunaqa ni jukllëllapis manana kanqanta. Peru Jehovä Diosmi tsë qellqarëkaqkunata copiayänanta permitirqan. Copiaqkunaqa jutsasapam kayarqan, peru mana pantëpa copiëtam procurayarqan. Hebreu Idiömachö Qellqarëkaq Diospa Palabrampaq parlarmi, juk yachaq nuna kënö nirqan: “Tsë librutaqa unë willakunqantanöllam copiayashqa y unë wakin librukunaqa manam ni ichikllapis igualantsu”. Jutsasapa nunakuna qellqayashqa kayaptin y fäcil-lla ushakaq materialkunaman qellqayashqa kayaptimpis, kanan witsan Diospa Palabranta leyinqantsikqa puntata Jehovä qellqatsinqannöllam këkan.

4. ¿Imatataq këchö yachakushun?

⁴ “Llapan alli qarëkuna y imëka allikunaqa” Jehoväpitam shamun y Bibliapis Jehoväpa qarëninmi (Sant. 1:17). Imatapis qaramanqantsikwanmi musyantsik tsë nuna imanö kanqanta, cuentatam qokuntsik alli reqimanqantsikta y wananqantsikta musyanqanta. Tsënöllam Jehovä Diosnintsik qaramanqantsik Bibliapis mas alli kaq qarë, y tsëta leyirmi musyantsik Jehovä imanö kanqanta, alli reqimanqantsikta y wananqantsikkunata alli musyanqanta. Jehovä imanö kanqampita kë kimanta yachakurishun: yachaq kanqanta, justicia ruraq kanqanta y kuyakoq kanqanta. Yachaq kanqanta Biblia willakunqanta puntata yachakurishun.

5. ¿Imanirtan nintsik Bibliachö consëjukunaqa Teyta Dios yachaq kanqanta rikätsikunqanta?

⁵ Jehovä Diosnintsikqa musyanmi alli kawakunantsikpaq imata wananqantsikta. Tsëmi Palabran Bibliaman alli consëjukunata qellqatsimurqan. Tsë consëjukunata cäsukoqkunaqa allim kawakuyan. Bibliata qellqaq Moisesmi Diospa sirweqnin israelïtakunata kënö nirqan: “Ninqäkunata cäsukurqa, [...] atska watapa[m] kawayanki. Tsëmi ninqäkunata mana kaqpaq churayänëkitsu” (Deut. 32:47). Bibliachö qellqarëkaq consëjukunata cäsukoq kaqkunaqa kushishqam kawakuyänan karqan y llapan rurayanqampis allim yarqunan karqan (Sal. 1:2, 3). Unëna qellqayashqa kayaptimpis, Bibliachö këkaq consëjukunaqa nunakunata yanapanmi alli kawakuyänampaq. Tsëtam rikantsik, “Bibliam yanapashqa jukläyana kawakuyänampaq” neq willakuykunachö, tsëtaqa tarinki jw.org päginachömi y tsëchöqa 50 willakuykunapitapis masmi kan (1 Tes. 2:13).

6. ¿Imanirtan Bibliawanqa ni ima librupis igualantsu?

⁶ Bibliataqa qellqatsimushqa Llapanta Puëdeq, imëpis mana wanoq y alläpa yachaq Jehovä Diosmi. Tsëmi Bibliawanqa ni ima librupis igualantsu. Nunakunaqa qellqayanqan librukunataqa qellqaqninkuna wanuriyaptimpis, leyikäyanllam. Tsënö kaptimpis, consëjunkunaqa mananam yanapakunnatsu. Peru Bibliachö qellqarëkaq consëjukunaqa nunakunata imëpis yanapëkanllam. Bibliata leyir tsëchö consëjukunaman alli pensashqaqa, Jehovä Diosmi santu espïritunwan yanapamantsik tsë consëjukunata cäsukunapaq (Sal. 119:27; Mal. 3:16; Heb. 4:12). Jehoväqa yanapamënintsikta munarmi Bibliata qellqatsimushqa. ¿Manaku tsëta musyanqantsikqa yanapamantsik cada junaq Bibliata leyinapaq?

7. ¿Imanötan Diospa unë sirweqninkunataqa Biblia yanaparqan juknölla kayänampaq?

⁷ Peru tsëpitapis masqa, Jehovä Dios yachaq kanqantaqa rikantsik sirweqninkuna  juknölla kayanqanwanmi. Israelïtakunallaman pensarishun. Pëkunaqa Dios Änikunqan Patsaman chärirqa, cada kastam tocanqan sitiukunaman ëwakuyarqan: wakinkunaqa kayarqan pescador, wakinkunam animalkunata wätaq y wakinkunanam murupakoq. Tsënö rakikashqa këkarqa, fäcil-llachi juk markakunachö täkoq israelïta mayinkunata qonqëkuyanman karqan. Peru Jehoväqa manam tsëta munarqantsu, tsëmi mandakurqan seguïdu juntakar Palabranta wiyakuyänampaq (Deut. 31:10-13; Neh. 8:2, 8, 18). Këllaman pensarishun: israelïtakunaqa alläpachi kushikuyaq mëtsë markakunapita shamushqa israelïtakunawan Jehoväta adorayänampaq juntakarnin. Tsënömi Jehoväqa juntu kayänampaq yanaparqan. Tsënöllam karqan cristiänukuna kawayanqan tiempuchöpis, pëkunaqa kayarqan waktsa, rïcu y jukläya jukläya idiömakunata parlaqmi. Tsënö karpis, Jehoväta kuyarmi juknölla adorayaq. Y tsëllaraq cristiänu tikraqkunaqa, Biblia ninqankunata entiendiyaq wakin cristiänukunawan juntakar y pëkuna entienditsiyaptinmi (Hëch. 2:42; 8:30, 31).

8. ¿Imanötan Jehoväqa Palabran Bibliawan sirweqninkunata yanapashqa juknölla kayänampaq?

⁸ Kanan witsampis, Jehovä Diosqa Palabran Bibliatam utilizan sirweqninkunata yachatsinampaq y juknölla kayänampaq. Llapan yachakunqantsikqa Bibliallapitam. Tsëmi reunionkunaman y asamblëakunaman  ëwarnin Bibliapita yachakuntsik. Tsëwanmi cläru rikantsik Jehovä Diosqa, sirweqninkuna juknölla adorayänampaq Palabran Bibliawan yanapanqanta (Sof. 3:9).

9. ¿Pikunallatan Biblia ninqanta entiendita puëdiyan? (Lücas 10:21).

⁹ Jehoväqa Palabran Bibliatam wakin wakinta qellqatsirqan humildi nunakunalla entiendiyänampaq. Tsëchömi rikantsik Jehovä Dios alläpa yachaq kanqanta (leyi Lücas 10:21). Bibliataqa entëru Patsachö nunakunam leyiyan. Juk yachaq nunam kënö nirqan: “Bibliataqa manam leyiyashqallatsu, sinöqa entiendita munarmi alli estudiayashqa”. Peru humildi nunakunallam entiendita puëdiyan y Biblia ninqannö kawakuytaqa puëdiyan (2 Cor. 3:15, 16).

10. ¿Imanö mastan Jehovä Diosnintsik yachaq kanqanta musyantsik?

¹⁰ Jehovä Diosqa Palabran Bibliata qellqatsimushqa manam sirweqninkunata grüpuypa yanapananllapaqtsu, sinöqa cada ünuta yachatsinampaq y shoqanampaqmi. Bibliata leyirmi, cuentata qokuntsik cada ünupaq yarparämanqantsikta (Is. 30:21). Ima problëmapapis pasanqantsik höra Bibliata leyirqa, mëraq tarirquntsik tsë problëmachö yanapamaqnintsik textukunata. Peru mëtsika millon nunakunapaq Diosnintsik Bibliata qellqëkätsiptinqa, ¿imanötan pasëkanqantsik problëmachö cada ünuta yanapamashwan? Tsënöqa yanapamantsik alläpa yachaq Diosnintsik qellqatsimushqa kaptinmi (2 Tim. 3:16, 17).

11. Bibliata qellqatsirqa, ¿imanötan Jehoväqa rikätsikurqan llapan nunatapis igualpa rikanqanta?

¹¹ Jehoväqa justicia ruraq Diosmi (Deut. 32:4). Justiciata ruraq Dios karmi, llapan nunakunatapis igualpa rikan (Hëch. 10:34, 35; Rom. 2:11). Tsënö kanqantaqa musyantsik ima idiömakunachö Bibliata qellqatsinqanwanmi, llapan nunatapis igualpa rikarmi, mas idiömakunachö Bibliata qellqatsirqan. Unë witsanqa, Diospa sirweqninkunaqa hebreu idiömatam mas parlayaq, tsëmi 39 librukunata cäsi llapanta hebreu idiömachö qellqatsirqan. Y tiempuwanqa, Diospa sirweqninkunaqa griëgu idiömatanam parlayarqan, tsëmi 27 librukunataqa griëgu idiömachöna qellqatsirqan. Peru kanan witsanqa, entëru Patsachömi cäsi 8 mil millon nunakuna kantsik y tukuyläya idiömatam parlantsik. ¿Imatataq Jehovä rurëkan pëta reqiyänampaq?

12. ¿Imanötan Daniel 12:4 ninqan kë ushanan tiempukunachö cumplikashqa?

¹² Willakoqnin Danielwanmi Jehoväqa änikurqan, “rasumpa kaq yachatsikuytaqa” mëtsikaq nunakuna ushanan tiempuchö musyayänampaq o entiendiyänampaq kaqta (leyi Daniel 12:4). Y tsëpaqqa, Diosnintsikmi permitishqa Bibliata y Bibliapita parlaq publicacionkunata traduciyänanta, imprimiyänanta y pïmë nunakunatapis dejapuyänanta. Y kanan witsanqa, ima librupitapis masqa Bibliatam traducikäyan y nunakunata qarëkäyan. Wakin Bibliakunaqa rantiyänampaq alläpa chaniyoqmi. Peru Jehoväpa sirweqninkunaqa llapanta kar o wakinllata karpis, 240 idiömapitapis maschönam Bibliata traduciyashqa y pïmë nunakunatam grätislla dejapuykäyan. Tsëmi mëtsikaq nunakuna ushakë manaraq chämuptin, “Teyta Diospa Gobiernumpita alli noticiakunata” yachakuykäyan (Mat. 24:14). Jehoväqa justicia ruraq Dios karmi, Palabranta leyir mëtsikaq nunakuna pëta reqiyänanta munan. Tsëtaqa ruran llapan nunakunata kuyarmi.

13. ¿Imanötan Bibliaqa musyatsimantsik Diosnintsik kuyakoq kanqanta? (Juan 21:25).

¹³ Jehovä Dios kuyakoq kanqantam Bibliachöqa nimantsik (1 Juan 4:8). Këllaman pensarishun: Diosnintsikqa Bibliata qellqatsimur yanapamänantsikpaq kaqllatam qellqatsimurqan. Palabranchömi nimantsik amïgun kanantsikpaq imata ruranapaq kaqta, y kushishqa y imëyaqpis kawakunapaq imata ruranapaq kaqta. Jehovä Diosnintsikqa kuyamarnintsikmi yanapamänantsikpaq kaqkunallata qellqatsimushqa (leyi Juan 21:25).

14. ¿Imanö mastan Diosnintsik kuyamanqantsikta musyantsik?

¹⁴ Jehovä Diosnintsikqa kuyamarnintsikmi respëtuwan tratamantsik, manam pasëpa controlamantsiktsu, ni manam imata ruranapaq o mana ruranapaq Palabranman mëtsikatatsu listata qellqatsimushqa. Tsëpa rantinqa, imatapis alli decidinapaqmi unë nunakuna pasayanqankunawan, pasakunampaq kaqkunata willamanqantsikkunawan y alli consëjukunawan yanapamantsik. Tsëkunata Bibliachö leyirmi, Diosnintsikta mas kuyantsik y llapan shonquntsikwan cäsukuntsik.

15. (1) ¿Imanötan musyantsik Jehovä alläpa kuyamanqantsikta? (2) Fötuchö rikanqantsik wamra, jövin y paniqa, ¿pikunamantan pensëkäyan? (Gen. 39:1, 10-12; 2 Rëy. 5:1-3; Lüc. 2:25-38).

¹⁵ Diosnintsikqa cada ünutam kuyamantsik. Tsëtaqa musyantsik nunakuna imanö sientikuyanqanta Palabranman qellqatsishqa kaptinmi. Tsë qellqaq nunakunaqa “noqantsiknö sentimientuyoq” nunakunam kayarqan (Sant. 5:17). Y tsëpitapis masqa,  nunakunata imanö tratanqanta leyirninmi musyantsik, Teyta Jehoväqa “alläpa kuyakoq y llakipäkoq kanqanta” (Sant. 5:11).

16. ¿Jutsata ruraq nunakunapaq Bibliachö leyirnin Jehovä imanö kanqantataq yachakuntsik? (Isaïas 55:7).

¹⁶ Bibliata leyirmi musyantsik jutsa ruraqkunatapis Teyta Jehovä kuyanqanta y mana dejarinqanta. Israelïtakunaqa kutin kutinmi imëka mana allikunata rurayaq, peru Jehoväqa rasumpa arrepentikuyaptinqa imëpis perdonaqmi (leyi Isaïas 55:7). Tsënöllam punta cristiänukunapis musyayarqan Jehovä kuyanqanta. Këllaman pensarishun: Jehovä yanapaptinmi, cristiänu mayinkunata apostol Pablu nirqan jutsata rurarir arrepentikoq wawqita perdonayänampaq y shoqayänampaq (1 Cor. 5:1-5; 2 Cor. 2:6, 7). Jutsa ruraq sirweqninkunataqa, Jehoväqa manam dejarintsu. Tsëpa rantinqa, kuyarmi yanapan, corregin y pëman kutiyänampaqmi yanapan. Kanan witsan jutsata ruraqkunatapis arrepentikuyaptinqa, perdonanampaqmi änikun (Sant. 4:8-10).

17. ¿Imanirtan Bibliaqa Jehovä Diosnintsikpita shumaq qarënin?

¹⁷ Bibliaqa Diosnintsikpita shumaq qarëninmi. Yachakurinqantsiknöpis, Bibliata leyirmi musyantsik Diosnintsikqa alli ruraq kanqanta, yachaq kanqanta y alläpa kuyamanqantsikta. Tsënöllam nimantsik Jehovä Diosnintsik reqinata y amïgun kanata munanqanta.

18. ¿Imanötan Bibliata Jehovä qaramanqantsikpita agradecikushwan?

¹⁸ Teytantsik Jehoväqa Bibliatam qaramarquntsik, tsë qarëwanqa manam imapis igualantsu y alläpam valoranantsik (Sant. 1:17). Tsënö këkaptinqa, qaramanqantsikpita Jehoväta agradecikushun. ¿Imanötan agradecikushwan? Manaraq leyirnin Diosnintsikman mañakur, leyir y leyinqantsikman yarpachakurninmi. Tsëta rurashqaqa, Bibliata qellqatsimoq Jehoväqa bendicimäshunmi y pëpitam yachakushun (Prov. 2:5).