1. Jehová Dios Bibliata carashcamandaca ¿imamandata agradicipangui?

 BIBLIATA Jehová Dios carashcamandaca ninandami agradicipanchi. Problemacunata charishpaca imata ruranata yachangapaca Bibliapimi ali consejocunata tari ushapanchi. Shinallata Bibliapica shamuj punllacunapi shuj juyailla causaigu tianatapashmi nin. Ashtahuanbachaca Bibliapica Jehová Diosllatami pai imashina cashcata ricuchin. Jehová Dios imashina cashcapi pensarishpami paiman ashtahuan quimiringapaj, paipa ali amigo cangapaj munapanchi (Sal. 25:14).

2. Jehová Diosca paimanda yachajuchunga ¿imatallata rurarca?

² Jehová Diosca tucui gentecuna paita rijsichunmi munan. Chaimandami punda tiempocunapica Jehová Diosca huaquin jaricunata muscuchishpa, cutin huaquinbica rijcharia cajllapita muscuipishna ricuchishpa, shinallata angelcunatapash utilizashpa pai imashina cashcataca ricuchirca (Núm. 12:6; Hech. 10:3, 4). Pero cai cosascunata Jehová Dios Bibliapi na escribichishca cajpica Jehovamandaca na yachajui ushanchimanllu carca. Chaimandami Jehová Diosca paimanda yachajuchunga huaquin jaricunataca Jehová ima nishcata “shuj libropi” escribichun mandarca (Jer. 30:2). Jehová Diospa ruraicunapica “ima pandapash na tianllu” (Sal. 18:30). Chaimandami cai cosascunata rurashpa paipa nishcacunata ñucanchiman aliguta villachishcataca seguro caita ushapanchi.

3. Cunan punllacaman Biblia tiashpa catichunga ¿imatata Jehová Diosca rurashca? (Isaías 40:8).

³ (Isaías 40:8​ta liipangui). Punda tiempomandapachami Diospa sirvijcunataca Bibliaca ninanda ayudajushca. Pero Bibliaca tucurinalla materialcunapi ashtaca huata huashaman escribishca cashpapash ¿imashinata cunangaman tiashpa catishca? Bibliapa original escribishcacunaca cunangamanga na tianllu.  Shinapash Jehová Diosca chai original escribishcacunapa copiacunata rurachunmi asegurarirca. Chai copiacunata rurajcunaca juchayucuna cashpapash amapacha pandaringapami ninanda esforzarirca. Por ejemplo, Escrituras Hebreasmanda parlashpaca shuj estudiashca jarica: “Punda tiempopi shuj librocunahuan ricujpica cunangamanga Bibliatallami tucuita cabalta copiashca” nircami. Shinaca tucurinalla materialcunapi ashtaca tiempo huashaman juchayu gentecuna escribishca cajpipash cunanbi Bibliata liishpaca Jehová Diospa yuyaicunata liijushcatami seguro caita ushapanchi.

4. Cai temapica ¿imatata yachajugripanchi?

⁴ Jehová Diosmi “jahua cielomandaca ashtahuan alipacha regalocunata caramun. Paipa carashcacunaca siempremi perfecto can” (Sant. 1:17). Bibliaca Jehová Diosmanda shuj alipacha regalomi can. Pipash ñucanchiman imagutapash carashpaca ñucanchita ali rijsishcata, ñucanchi ima minishtishcatapash ali yachashcatami ricuchin. Bibliahuanbash shinallatami can. Bibliata yachajushpami Jehová Diosta ashtahuan rijsishpa pai ñucanchita ali rijsishcata, ñucanchi ima minishtishcatapash ali yachajta cuenta japipanchi. Cai temapica Jehová Diospa sabiduriamanda, justiciamanda, juyaimandami yachajugripanchi. Jehová Diospa sabiduriamanda Bibliapi ima nijta ricushpa callaripashunchi.

5. Jehová Diospa ali yachaita Bibliapi tari ushashcataca ¿imashinata yachapanchi?

⁵ Jehová Diosca paipa ali consejota minishtijtaca alimi yachan. Chaimandami paica Bibliata ñucanchimanga carashca. Jehová Diospa ali yachaitaca Bibliapimi taripanchi. Bibliapa consejocunaca tucui gentecunatami ninanda ayudan. Chaimandami Bibliapa consejocunaca gentecunapa causaita cambiana ushaita charin. Bibliapa primer librocunata Moisés escribijushpaca israelitacunataca: “Cai mandashca shimicunaca, na yangachu. Ashtahuangarin cangunaman causaita cuj shimicunami” can nircami (Deut. 32:47). Pipash cai mandashcacunata cazushpaca cushilla y alimi causaita ushana carca (Sal. 1:2, 3). Biblia punda tiempopi escribishca cashpapash cunangamanmi gentecunapa causaita cambiana poderta charin. Por ejemplo, internetpi, jw.org paginapica “Bibliami gentecunapa causaita cambiashca” nishca partepimi 50 yali gentecuna imashna paicunapa causaita cambiashcata ricui ushapangui. Paicunaca Bibliapa consejocunata catishpami ashtahuan ali causai callarishca (1 Tes. 2:13).

6. ¿Imamandata Bibliaca shuj librocunatapash yali ashtahuan alimi can nipanchi?

⁶ Bibliaca shuj librocunamandaca ashtahuan alimi can. ¿Imamandata shina nipanchi? Porque Bibliata escribichij Jehová Diosca tucui poderta, ashtaca sabiduriata charij y para siempre causaj Diosmi can. Huaquin librocunataca chai librota escribijcuna huañushca cajpipashmi gentecunaca liishpa catishca. Pero chai libropi consejocuna punda tiempopi ayudashca cashpapash, cunanbica ñana ayudanllu. Cutin Bibliapa consejocunaca pundamandapacha cunangamanmi ayudajushca. Bibliata liijpi, liishcapi pensarijpica Jehová Diosllatami paipa espíritu santohuan Bibliapa yachachishcacunata pactachichun ayudanga (Sal. 119:27; Mal. 3:16; Heb. 4:12). Jehová Diosca ñucanchita ayudangapami munan. Chaita yachanaca ¿nachu Jehovapa ayudata chasquingapaca Bibliata ashtahuan liina costumbreta charichun animan?

7. Punda tiempopica ¿imashinata Bibliaca Taita Diospa sirvijcuna unido cachun ayudarca?

⁷ Taita Diospa pueblo unido cachun ayudashcamandami Bibliaca Taita Diospa sabiduriata charishcata ashtahuan yachai ushashcanchi. Israelitacuna Jehová Dios carasha nishca alpaguman causangapaj rishpaca shuj shuj pushtucunapimi causai callarirca. Huaquingunaca  pescadorcuna, agricultorcuna, animalcunata cuidashpa causajcunami carca. Shinaca shuj pushtupi causaj israelitacunaca caishuj pushtuman causangapaj rishca israelitacunamanda ñana preocuparishpami paicunata cungaita ushanman carca. Pero ama shina pasachunga Jehová Diosca israelitacuna siempre tandanajushpa paipa Shimita uyachun, yachajuchunmi arreglocunata rurarca (Deut. 31:10-13; Neh. 8:2, 8, 18). Shinaca Jehová Diosta sirvij israelitacunaca Jerusalenman chayashpa Jehová Diosta adorangapaj shuj shuj pushtucunamanda shamushca israelitacunahuan tuparishpaca ninandami cushijurianga. Chai arreglocunata rurashpami Jehová Diosca israelitacuna unido cachun ayudarca. Jipamanga cristianocunapa congregaciongunapica shuj shuj shimicunata parlaj jaricuna, huarmicunapashmi tiarca. Huaquingunaca charij, shujcunaca pobrellagucunami carca. Shuj shuj costumbrecunatapashmi charirca. Pero tucuicuna Bibliata tucui shunguhuan valorashcamandami Jehová Diostaca unido sirvirca. Chai tiempopi huauquipanicuna mushujcunaman Bibliata aliguta intindichijpi, paicunahuan tiempota yalijpimi mushuj huauquipanicunaca Bibliata aliguta intindi usharca (Hech. 2:42; 8:30, 31).

8. Cunanbi paita sirvijcuna unido cachunga ¿imashinata Jehová Diosca Bibliata utilizajun?

⁸ Cunanbipashmi Jehová Diosca Bibliahuan paipa sirvijcunataca yachachishpa unido cachun ayudan. Ñucanchipa tucuilla publicaciongunaca Bibliapa yuyaicunamandami can. Jehovata sirvijcunaca siempremi reuniongunaman, asambleacunaman ripanchi. Chaipimi Bibliata  liishpa, Bibliamanda aliguta intindishpa ashtahuan yachajupanchi. Jehová Diosca “tucuicuna shujllashna” paita sirvichunmi munan. Chai shimicuna pactarichunga Bibliatami utilizan (Sof. 3:9).

9. Bibliapa yachachishcacunata intindingapaca ¿imashna gentecunata cana capanchi? (Lucas 10:21).

⁹ Jehová Diosca Bibliapa huaquin partecunataca humilde gentecunalla intindichunmi escribichirca (Lucas 10:21​ta liipangui). Chaita rurashpapashmi Jehová Diosca paipa sabiduriata ricuchirca. Bibliataca mundo enteropi gentecunami liin. Shuj ali estudiashca jarica: “Gentecunaca Bibliatami ashtahuanbachaca liishca. Shinallata shuj librocunahuan ricujpica, Bibliatami aligutapacha yachajushpa liishca” nircami. Pero humilde gentecunallami Bibliapa yachachishcacunataca intindishpa paicunapa causaipi pactachin (2 Cor. 3:15, 16).

10. Jehová Diospa sabiduriataca ¿imashnata Bibliapi ricuita ushapanchi?

¹⁰ Jehovapa sabiduriata Bibliapi imashna ricuchijta ashtahuan ricupashunchi. Jehová Diosca Bibliataca cada unota yachachingapaj, cushichingapami utilizan. Bibliata liishpaca Jehová Dios cada unomanda preocuparishcatami ricuita ushapanchi (Is. 30:21). Llaquicunata charishpaca ¿nachu ñucanchi minishtijushca yuyaicunatapacha Bibliapi liipashcanchi? Jehová Diosca Bibliataca ashtaca ashtaca gentecuna intindichunmi escribichirca. Shina cajpipash Bibliaca cunangamanmi cada unota ayudan. ¿Imamandata shina ayudai ushan? Bibliata escribichij Jehová Diosca alipacha sabiduriata charishcamandami shina ayudaita ushan (2 Tim. 3:16, 17).

11. Bibliata escribichishca tiempopica ¿imashinata Jehová Diosca tucuicunatallata igual tratashcata ricuchirca?

¹¹ Jehová Diosca shuj justo Diosmi can (Deut. 32:4). Jehová Diosca justo Dios caimandami pitapash na agllashpa igual tratan (Hech. 10:34, 35; Rom. 2:11). Bibliata escribichishpaca chai tiempopi gentecuna parlashca idiomatallatami Jehová Diosca utilizarca. Shinami Jehová Diosca tucuicunata igual tratashcata ricuchirca. Jehová Diosca Bibliapa primero 39 librocunataca casi tucuillatami hebreo shimipi escribichirca. Chai tiempopica Jehová Diosta sirvijcunaca chai shimitami intindin carca. Shinapash primero cristianocuna causashca tiempopica ashtaca gentecunami griego shimita parlan carca. Chaimandami Bibliapa último 27 librocunataca Jehová Diosca griego shimipi escribichirca. Jehová Diosca Bibliata na shuj idiomapilla escribichishpami tucuicunata igual tratashcata ricuchirca. Cunanbica casi 8 mil millón gentecunami cai mundopica causapanchi. Shinapash shuj shuj idiomacunata parlashpapash ¿imashinata tucuicunallata Jehová Diosta rijsita ushapanchi?

12. Daniel 12:4​pa profeciaca ¿imashinata cai tucurimui punllacunapica pactarimujushca?

¹² Jehová Diosca Danielpa profeciapica tucurimui punllacunapica ‘cabal yachachishcacunaca ashtahuan ashtahuanmi intindiringa’ nircami. Shina nishpaca ashtaca gentecuna Bibliapa yachachishcacunata intindinatami ricuchijurca (Daniel 12:4​ta liipangui, TNM). b Bibliata, Bibliapa publicaciongunata traducina y ashtaca gentecunaman cai publicaciongunata saquinami cai profecía pactarichunga ayudashca. Ashtahuanbachaca Bibliatami shuj librocunamanda yali ashtahuan traducishca can. Y ashtahuan gentecunaman saquishca libromi can. Bibliapa ashtaca traducciongunaca randingapaca valishcapachami can. Shinapash testigo de Jehovacunaca Biblia enterota o Bibliapa huaquin partecunataca 240 yali idiomacunamanmi  traducishca. Chai Bibliataca tucui gentecunami gratis charita ushan. Shinami Jehová Diospa punlla nara chayamujpillata tucui llactacunamanda ashtaca ashtaca gentecunaca ‘Taita Diospa Gobiernomanda ali villaicunata’ yachajuita ushashca (Mat. 24:14). Jehová Diosca justo Diosmi can. Chaimandami ashtaca gentecuna paipa Shimita liishpa paita rijsichun munan. Jehová Diosca gentecunata juyaimandami chai munaitaca charin.

13. Bibliapi Jehová Diospa juyai imashna cajta ricuchishcataca ¿imamandata nipanchi? (Juan 21:25).

¹³ Bibliaca Jehová Diospa cualidadcunamanda juyai ashtahuan importante cashcata intindichunmi ayudan (1 Juan 4:8). Por ejemplo, Jehová Dios Bibliapi imata escribichishcapi, imata na escribichishcapipash pensaripashun. Jehová Diosca paipa amigocuna cangapaj, cushilla causaita charingapaj y para siempre causangapaj imatapacha rurana cashcatami Bibliapica ricuchin. Jehová Dios ñucanchita ninanda juyaimandami paita sirvingapaj imata minishtishcatalla ñucanchimanga ricuchishca (Juan 21:25​ta liipangui).

14. Jehová Diospa juyai imashna cashcataca ¿imashnata Bibliapica ricuchin?

¹⁴ Jehová Diosca ñucanchita respetohuan tratashpapashmi ñucanchita juyashcataca ricuchin. Chaimandami Jehová Diosca imata rurai ushashcata, imata na rurai ushashcataca Bibliapica na tucuita ricuchin. Chaipa randica gentecunapa ejemplocunahuan, profeciacunahuan y ali consejocunahuanmi ñucanchillata ali decisiongunata japita ushachun ayudan. Shinami Bibliapi yachachishcacunaca Jehová Diosta juyachun, paita tucui shunguhuan cazuchun ñucanchitaca ayudan.

15. a) Bibliapi Jehová Dios ñucanchimanda ninanda preocuparishcataca ¿imashinata ricuchin? b) Fotocunapica ¿Bibliamanda ima ejemplocunapita pensarinajun? (Gén. 39:1, 10-12; 2 Rey. 5:1-3; Luc. 2:25-38).

 ¹⁵ Bibliapica Jehová Dios ñucanchimanda ninanda preocuparishcatami ricuchin. ¿Imamandata shina nipanchi? Porque Bibliapica ashtaca gentecuna imashina sintirishcatami ricuchin. Bibliapi parlashca gentecuna imashina sintirishcatami intindita ushapanchi. Porque paicunaca “ñucanchishnallatami carca” (Sant. 5:17). Y chai gentecunata imashina tratashcapi pensarishpaca ‘Jehová Dios ninanda juyaj, llaquij Taita Dios cashcataca alimi yachapanchi’ (Sant. 5:11).

16. Pipash juchapi urmashcata Bibliapi liishpaca ¿imatata Jehová Diosmandaca yachajupanchi? (Isaías 55:7).

¹⁶ Ñucanchicuna pandarijpica Jehová Diosca ñucanchitaca na jichungachu. Bibliapi chaita yachachishpapashmi Jehová Dios ñucanchita juyashcataca ricuchin. Israelitacunaca Jehovapa ñaupapica cutin cutinmi juchacunapi urmarca. Pero ciertopacha arripintirijpica Jehová Diosca paicunataca siempremi perdonarca. (Isaías 55:7​ta liipangui). Apostolcunapa punllacunapi cristianocunapashmi Jehová Dios paicunata ninanda juyashcata yacharca. Por ejemplo, shuj jarica shuj jatun juchapimi urmashcarca. Pero chai jari ciertopacha arripintirishcamandami, Jehová Diosca huauquipanicuna paita perdonachun, paita cushichichun Pablotaca utilizarca (2 Cor. 2:6, 7; 1 Cor. 5:1-5). Jehová Diosca paita sirvijcuna pandarijpipash paicunata jichunapa randica, paicunataca juyaihuan ayudarca, corregirca y paipaman tigrachunbashmi invitarca. Cunanbipash Jehová Diosca pipash juchata rurashca jipa ciertopacha arripintirijpica chaitallatami rurasha nishcamandami ninanda cushijupanchi (Sant. 4:8-10).

17. ¿Imamandata Bibliaca shuj valishcapacha regalo can?

¹⁷ Jehová Diosca shuj valishca regalotami ñucanchimanga carashca. Pero Biblia valishcapacha cashcataca ¿imamandata nipanchi? Imashnami ricupashcanchi Bibliaca Jehová Diospa justiciamanda, sabiduriamanda y juyaimanda yachachin. Shinallata Bibliaca Jehová Dios paita rijsichun y paipa amigocuna cachun munashcatami ricuchin.

18. Jehová Dios Bibliata carashcamanda agradicishcataca ¿imashinata ricuchita ushapanchi?

¹⁸ Biblia Jehová Diosmanda shuj ‘alipacha regalo’ cashcataca na cunganachu capanchi (Sant. 1:17). Shinaca Jehová Dios cai regalota ñucanchiman carashcamanda siempre agradicishcata ricuchipashunchi. Chaipaca Jehová Diosta mañashca jipami Bibliata liina y liishcapi pensarina capanchi. Chaita rurajpica Jehová Diosca ñucanchita bendiciangami. Shinallata ‘Taita Diospaj ali yachaitapashmi taripashun’ (Prov. 2:5).