1. Ha yini hi tlangela hi ku va ni Bibele?

 HI MU tlangela ngopfu Yehovha hikuva a hi nyike Bibele. Hi ku tizrisa zritu dzrake a hi pfuna ku lwisana ni swikazratu leswi hi kumanaka na swone namunhla. Nakone hi ku tizrisa Bibele Yehovha a hi nyika dumbo dzra wumundzruku lebyi nyonxisaka. Xa lisima ngopfu, Yehovha hi ku tizrisa Bibele a hi dondzrisa swiyenge swinyingi swa wumhunu byake. Ku yanakanyisisa hi matsrhamela ya ku xonga ya Yehovha swi khumba timbilu tezru nakone swi hi kutxa ku tama hi djula ku tsrhindzrekela kusuhi na yene.— Ps 25:14.

2. I yini leswi Yehovha a swi tizrisiki akuva hi mu tiva?

² Yehovha a djula leswaku vhanu hinkwavu va mu tiva. Malembe ntsrhaku, Yehovha a tizrisi milozro, swivoniso nambi ku li ku zrumela tintsrumi akuva ti pfuna vhanu leswaku va mu tiva. (Tin 12:6; Min 10:3, 4) A swi nga ta koteka ku dondzra milozro, swivoniso ni madzrungula lawo loko a swi nga yentxiwanga hi ku tsraliwa. Xileswo Yehovha a lelete vavanuna akuva va ‘tsrala a bukwini’ leswi a a djula leswaku hi swi tiva. (Yr 30:2, BX) Hinga tiyiseka leswaku tindlela leti Yehovha a tihlawuliki akuva a bulisana na hine hi tone ta tinene, hikusa “a tindlela ta Xikwembu Nkulukumba ti hetisekile”.—Ps 18:30.

3. I yini leswi Yehovha a swi yentxiki akuva Bibele dzri tama dzri va kone ni namunhla? (Ezaya 40:8)

³ Dondzra Ezaya 40:8. A wutlhazri bya Bibele byi kongomise vavanuna ni vavasati va ku dumbeka ku dzringana malembe manyingi. Swi kotekise kuyini leswo? Phela nkama lowu ku nga tsraliwa Bibele a ku tizrisiwa mintxhumu leyi a yi nga hlweli ku honeka. Xileswo matsralwa ya ku sungula ya Bibele a ma ha kumeki swoswi, kambe Yehovha a yentxi leswaku ku hambiwa makopiya. I ntiyiso leswaku lava va nga hamba makopiya lawa a va nga hetisekanga, kambe a va ma kopiyara hi wunyaminyami. Xidondzri xin’wana xi tsrali leswi mayelana ni matsralwa ya xiheberu: “hinga  hlaya na hi tiyiseka leswaku a ku na matsralwa ya xikhale lawa ma kopiyariwiki hi ku dumbeka ku fana ni Bibele.” I ntiyiso leswaku Bibele dzri tsraliwi khali ka mintxhumu leyi a yi nga hlweli ku honeka nakone vhanu lava va dzri kopiyariki a va nga hetisekanga, kambe hi nga tiyiseka hi leswi: mazritu lawa hi ma dondzraka Bibeleni namunhla ma hi byela hi ku kongoma mayanakanyela ya mutsrali wa dzrone, ku nga Yehovha.

4. Hi ta vona yini ka xidondzro lexi?

⁴ Yehovha i nhlovo ya ‘nyiko hinkwayu le ya ku hetiseka’. (Yk 1:17) Bibele i xin’we xa swihiwa swa ku hlawuleka leswi Yehovha a hi nyikiki swone. Xihanano lexi hi xi yamukeliki xi kombisa leswaku mhunu lweyi a hi hananiki a hi tiva ku ya tlhasela kwini. Hi nga hlaya leswi fanaka hi Bibele xihiwa lexi xi hi dondzrisaka swinyingi ha Yehovha, hikusa xikombisa leswaku a hi tiva ku ya tlhasela kwini ni ku tiva leswi hi swi vilelaka. Ka xidondzro lexi, hi ta vona leswi Bibele dzri hi dondzrisaka mayelana ni wumhunu byizrazru bya Yehovha: Wutlhazri, wululami ni lizrandzru. A hi sunguleni hi ku kambela leswi Bibele dzri swi hlayaka hi wutlhazri bya Xikwembu Nkulukumba.

5. Xana Bibele dzri tlhamuxela wutlhazri bya Xikwembu Nkulukumba hi ndlela yini?

⁵ Yehovha awa swi tiva leswaku hi swivilela ngopfu swilayu swa wutlhazri nakone xihiwa lexi a hi nyikiki xone ku nga Bibele xi tale hi swilayu leswo. A Bibele dzri ni ntamu wa ku ntxintxa wutomi bya vhanu. Nkama lowu ku nga tsraliwa Buku dzra ku sungula dzra Bibele, Moxe a byele va-Israyele a ku: ‘A hi mhaka ya ku ka ndlela ku n’wine, kambe i wutomi byenu.’ (Dt 32:47) Lweyi a yingisetaka leswi Bibele dzri swi hlayaka a nga va ni wutomi bya ku nyonxisa ngopfu. (Ps 1:2, 3) Nambileswi Bibele dzri tsraliwiki khale, dzra ha ni ntamu wa ku yampswisa wutomi bya vhanu. Hi xikombiso, ka pajina dzrezru dzra jw.org, ka nxaxamelo wa tinhlokomhaka “Bibele Dzri Txintxa Wutomi Bya Vhanu”, u nga kuma ku tlula 50 wa mimfambu ya vhanu lava hambiki ku txintxa lokukulu hikuva va sungule ku hanya hi minsinya ya milawu ya Bibele.—1Te 2:13.

6. Ha yini hi nga hlayaka leswaku a ku na Buku ledzri fanaka ni Bibele?

⁶ A ku na Buku ledzri dzringanisiwaka ni Bibele. Ha yini? Hikusa a mutsrali wa dzrone i Yehovha nakone i wa ntamu hinkwawu, lweyi a nga helikiki nakone a ni wutlhazri ku tlula hinkwavu. Mabuku manyingi ma ve ni ndhuma ngopfu ni lisima ku tlula vatsrali va wone. Nakone swilayu swa mabuku wolawo swi kahlula swi xaxa. Kambe minkongomiso ya wutlhazri ya Bibele minkama hinkwayu ya tizra. Ku khaluta malembe manyingi na swilayu swa wutlhazri swa Bibele swi pfuna vhanu. Loko hi dondzra Buku ledzri dzra ku Xwenga hi tlhela hi yanakanyisisa hi leswi hi swi dondzraka, Yehovha a tizrisa ntamu wake ku nga moya wa ku xwenga akuva a hi pfuna ku vona ndlela leyi hi nga swi tizrisaka ha yone swilayu swa Bibele a wuton’wini byezru. (Ps 119:27; Mlk 3:16; Hb 4:12) Nakunene a mutsrali wa Bibele,Yehovha, a swi djula ngopfu ku hi pfuna. Xileswo a hi kutxa ku va hi dondzra Bibele nkama ni nkama.

7. Xana Bibele dzri tlhanganise vhanu va Xikwembu Nkulukumba a nkameni lowu khalutiki hi ndlela yini?

⁷ Kutani ntxhumu wun’wana lowu kombisaka ndlela leyi Bibele dzri nga ni wutlhazri bya Xikwembu Nkulukumba ha yone. Dzrone dzri pfuna vhanu va Xikwembu Nkulukumba ku tama va va ni wumun’we. A nkama lowu va-Israyele va nga nghena a tikweni dzra xidumbiso, va fambe ka mimbangu ya ku hambanahambana. Van’we va ve vaphasi va tihlampfi, va fuyi, ni va dzrimi. Va-Israyele lava a va tsrhama ka muganga wa ku kazri a swi nga vileli kuva va vilela hi va israyele lava a va tsrhama ka muganga wumbeni wa tiko.  Kambe Yehovha a hlaye leswaku a va fanela ku tlhangana ka xiyentxakalu xa ku kazri, akuva va yingela ku dondzriwa ni ku tlhamuxeliwa ka nawu. (Dt 31:10-13; Neh 8:2, 8, 18) Yanakanya hi ndlela leyi va israyele va nga ha va ka va titwi ha yone loko va tlhase a Yerusalema ka swin’we swa swiyentxakalu kumbe ku vona mawakawaka ya vagandzreli van’wana va Yehovha na va ta hi ka mimbangu ya ku hambanahambana ya tiko! Hi ku yentxa leswo, Yehovha a pfuni vhanu vake akuva va tama va va ni wumun’we. Hi ku famba ka nkama, loko ku vumbiwe bandla dzra wukriste, vanyingi a va vulavula tindzrimi ta ku hambana, vhanu van’wana a va ni swikhundla swa lisima, van’wana a va ganyile na kasi van’wana a va li swisiwana. Kambe hinkwavu a va zrandzra matsralwa nakone leswo a swi va tlhanganisa a ku gandzreleni ka Xikwembu Nkulukumba wa ntiyiso. Lava ndzrulukiki va va vakriste va kote ku twisisa Zritu dzra Xikwembu Nkulukumba loko va ti tlhanganisa ni vamakwavu nakone va kume mpfunu wavu akuva va twisisa matsralwa.—Min 2:42; 8:30, 31.

8. Xana Bibele dzri yentxe leswaku vhanu va Yehovha va tama va va ni wumun’we namunhla hi ndlela yini?

⁸ Yehovha a tizrisa Bibele akuva a dondzrisa vhanu vake ku tama va va ni wumun’we. A Bibele dzri ni mintiyiso hinkwayu mayelana na Yehovha leyi hi fanelaka ku yi tiva. Minkama hinkwayu hi tlhangana a mimbangwini ya wugandzreli, a tinhlengeletanwini ni ma kongresu, lani hi dondzrisiwaka mintxhumu leyi seketeliwiki Bibeleni. Xileswo hi nga hlaya leswaku Bibele i xitizro xa lisima lexi Yehovha a xi tizrisaka akuva a pfuna vhanu vake leswaku va ‘mu tizrela hi mbilu yin’we’.—Tsf 3:9.

9. He byini wumhunu lebyi nga hi pfunaka ku twisisa dzrungula dzra Bibele? (Luka 10:21)

 ⁹ Vona xikombiso xin’wana xa wutlhazri bya Yehovha. Swiyenge swinyingi swa Bibele swi tsraliwe hi ndlela ya ku swi ngo twisisiwa ntsena hi lava va titsrongahataka. (Dondzra Luka 10:21.) Vhanu a misaveni hinkwayu va nga dzri dondzra Bibele. Kambe xidondzri xin’wana xi te: “A Bibele a hi buku ledzri dondzriwaka ntsena, kambe i buku ledzri dondzriwaka hi wunyaminyami.” Kambe dzri ngo twisisiwa ntsena hi vhanu lava titsrongahataka ni ku tlhela va hanya hi leswi dzri swi hlayaka.—2Ko 3:15, 16.

10. He yini ndlela yin’wana leyi hi twisisaka a wutlhazri bya Yehovha ha yone a Bibeleni?

¹⁰ A Bibele dzri hi dondzrisa mayelanu ni wutlhazri bya Yehovha hi ndlela yimbeni. I ntiyiso leswaku Yehovha a tizrisa Bibele akuva a hi dondzrisa swanga ntlawa, kambe a nyika swileleto ni ntxhavelelo ka mun’wana ni mun’wana wezru. A nkama lowu u dondzraka Bibele, xana wa yi twisisa ndlela leyi Yehovha a zron’wekaka ha yone ha wene? Nakunene! (Eza. 30:21) I makhambi mangani lani u kumaniki ni xikazratu xa kukazri u va u ya dondzra Bibele u gama u ku: “A ndzrimana leyi nakunene yi tsraleliwe mine.” Kambe a Bibele dzri tsraleliwe ku khumba timbilu ta mawakawaka ya vhanu. Kutani, swi kotekisa kuyini akuva Bibele dzri va ni a dzrungula ledzri dumbekaka ni ledzri yelanaka ni xiyimu xaku? Leswo swi koteka hikusa a mutsrali wa Bibele a ni wutlhazri lebyi tlakukiki a wuyakwini hinkwabyu.—2Tm 3:16, 17.

11. Xana Yehovha a kombise ku kala xihlawuhlawu loko a tsrala Bibele hi ndlela yini?

¹¹ A wumhunu byin’wana bya Yehovha i wululami. (Dt 32:4) A wululami byi yelana ni tsrhamela dzrin’wana ku nga ku kala xihlawuhlawu, Yehovha a nga na xihlawuhlawu. (Min 10:34, 35; Ro 2:11) Hi kota ku vona leswaku Yehovha a nga na xihlawuhlawu ka ndlela leyi Bibele dzri tsraliwiki ha yone. Dzri tsraliwe hi tindzrimi leti vhanu vanyingi a va ti vulavula. Hi xikombiso, 39 wa mabuku ya ku sungula ma tsraliwe hi xiheberu, hikusa a ku li lidzrimi ledzri vhanu va Xikwembu Nkulukumba a va dzri khanela hi nkama wolowo. A nkameni wa vakriste va ku sungula, lidzrimi ledzri a dzri vulavuliwa ngopfu a ku li xigriki, xileswo 27 wa mabuku ya Bibele ma tsraliwe hi lidzrimi dzroledzro. Yehovha a nga tizrisanga lidzrimi dzrin’we akuva ku tsraliwa Bibele. Namunhla ku ni vhanu va kolomu ka 8 bilhões lava va vulavulaka tindzrimi ta ku hambanahambana. Xana vhanu lava a va ta swi kotisa kuyini ku dondzra hi Yehovha?

12. Xana a wuprofeta bya Daniel 12:4 byi hetiseka hi ndlela yini a masikwini yezru?

¹² Ka wuprofeta bya Daniel, hi dondzra leswaku Yehovha a dumbise leswaku a masikwini ya wugamu “a wutivi bya ntiyiso” lebyi hi byi kumaka a Bibeleni a byi ta “yengeteleka”, leswi liki, vanyingi a va ta byi twisisa. (Dondzra Daniel 12:4.) Ndlela yin’wana leyi kombisaka ku hetiseka ka wuprofeta lebyi namunhla i ku humexiwa ka Bibele ni mabuku lawa ma seketeliwiki a Bibeleni. Namunhla a Bibele i buku ledzri ndzruluteliwaka ni ku hangalasiwa a misaveni hinkwayo ku tlula mabuku man’wana. Kambe a ma Bibele lawa ma ndzruluteliwaka ni ku xavisiwa hi tikomponi hakanyingi ma dula. Hi hala tlhelo, a vhanu va Xikwembu Nkulukumba va ndzrulutele Bibele hinkwadzru kumbe hi swiyenge hi tindzrimi leti tlulaka 24 nakone mun’wana ni mun’wana a nga tikumela dzrake hi mahala. Hikola ka leswo, vhanu va matiko hinkwawu va yamukela madzrungula lamanene ya mfumu na wugamu byi nge si tlhasa. (Mt 24:14) Xikwembu Nkulukumba wezru, Yehovha, a djula ku nyika mun’wana ni mun’wana wezru mukhandlu wa ku mu tiva hikuva va dondzra zritu dzrake. A yentxa leswo hikusa a hi zrandzra ngopfu.

13. Ha yini hi nga hlayaka leswaku Bibele i xikombiso xa leswaku Xikwembu Nkulukumba awa hi zrandzra? (Yh 21:25)

¹³ A Bibele dzri hi pfuna ku twisisa leswaku tsrhamela ledzrikulu dzra Yehovha i lizrandzru. (1 Yohan 4:8) Leswo hi swi vona hileswi Yehovha a hlawuliki ku va swi tsraliwa a Bibeleni. Bibele dzri tamele hinkwaswu leswi vilelekaka akuva hi va ni wuxaka bya le kusuhi na Yehovha, leswi hi pfunaka ku nyonxa swoswi ni ku kuma wutomi lebyi nga helikiki a nkameni lowu taka. Hikola ka lizrandzru dzrake,Yehovha a nga hi bindzriselanga hikuva a hi nyika swinawanawana leswi nga vilelekiki akuva hi mu tizrela. — Dondzra Yohan 21:25.

14. He swini swikombiso swa le Bibeleni leswi kombisaka leswaku Yehovha awa hi zrandzra?

¹⁴ Ndlela leyi Bibele dzri tsraliwiki ha yone yi kombisa ndlela yin’wana leyi Yehovha a hi zrandzraka ha yone. Hi ndlela yini? Bibele a dzri hi nyiki nxaxamelo wa swinawanawana ka ntxhumu wun’wana ni wun’wana lowu hi wu yentxaka a wuton’wini byezru. Matsrhan’wini ya leswo, Yehovha a hi pfuna ku yanakanyisisa hi mimfambu ya le Bibeleni, wuprofeta bya ku hlamalisa kun’we ni swilayu leswi pfunaka. Hi ndlela leyo, a kombisa leswaku a hi nyika lisima. Xileswo, Yehovha a djula leswaku hi mu zrandzra hi tlhela hi mu yingiseta na swi sukela mbilwini.

15. a) Bibele dzri swi kombisa hi ndlela yini leswaku Yehovha awa zron’weka ha hine? b) Ka xifaniso, i xikombiso xa mani xa le Bibeleni lexi xin’hwanyatana, makwezru lweyi a ha liki mumpswha, ni makwezru lweyi a duhwaliki va yanakanyisisaka ha xone? (Gn 39:1, 10-12; 2Th 5:1-3; Lk 2:25-38)

¹⁵ Bibele dzri kombisa leswaku Yehovha a wa zron’weka ha hine. Ha yini hi hlaya leswo? A Bibele, ku nga zritu dzrake, dzri tale hi mimfambu ya vhanu leyi kombisaka ndlela leyi na hine hi titwaka  ha yone. A Bibeleni hi kuma vhanu lava khalutiki hi ka swiyimu swa ku fana ni swezru, hikusa na vone a va li vhanu lava a va ‘Tiyingela ku fana na hine’. (Yk 5:17) Xa lisima ngopfu, loko hi vona ndlela leyi Yehovha a va khomeki ha yone vhanu lava kumaniki ni swiyimu swa ku fana ni swezru, swi ta ya swi hi nabyalela ku twisisa leswaku Yehovha a ‘tele timpswalu ni lilondzro’.—Yk 5:11.

16. Hi dondzra yini hi Yehovha loko hi dondzra hi swikombiso swi nga Bibeleni swa vhanu lava yentxiki swidoho? (Ezaya 55:7)

¹⁶ Bibele dzri tlhela dzri kombisa ndlela yin’wana leyi Yehovha a hi zrandzraka ha yone. Bibele dzri hi tiyisekisa leswaku Xikwembu Nkulukumba a nge hi tsrhiki loko hi txhuka hi phazama. Makhambi manyingi va israyele va dohele Yehovha; Nambitasu, loko va ti solile swi pfela mbilwini, Yehovha a va dzrivalelile. (Dondzra Ezaya 55:7.) Vakriste va le dzaneni dzra ku sungula na vone a va swi tiva ha hombe leswaku Yehovha a a va zrandzra ngopfu. Yehovha a huhutele mupostola Pawulo akuva a kutxa vamakwavu bandleni leswaku va ‘n’wi yentxela wuzrombe ni ku n’wi miyeta’ wanuna lweyi a a yentxe xidoho lexikulu, kambe kutani a a tisolile. (2Ko 2:6, 7; 1Ko 5:1-5) Swa hlamalisa ku tiva leswaku Yehovha a nga ma tsrhikanga malandzra yake ntsena hi leswi ma phazamiki. Amatsrhan’wini ya leswo, hi ndlela ya lizrandzru, a va pfunile a tlhela a va laya ni ku va pfumelela akuva va tlhela va va vanghanu vake. Namunhla Yehovha a dumbisa ku yentxa leswi fanaka ka lava va yentxaka swidoho leswikulu kambe va gama va tisola.—Yk 4:8-10.

17. Ha yini Bibele ku li nyiko ya ku hlawuleka?

¹⁷ Yehovha a hi nyike nyiko ya ku hlawuleka. Ha yini Bibele a li nyiko ya ku hlawuleka? Hikusa, hi lani hi swi voniki ha kone, Bibele dzri kombisa leswaku Yehovha a ni wutlhazri, wululami, ni lizrandzru. Buku ledzri i wumboni lebyi heleliki bya leswaku Yehovha a djula hi mu tiva. Yehovha a djula leswaku hi va vanghanu vake.

18. Hi swi kombisa hi ndlela yini leswaku hi yi nyika lisima nyiko leya ku hetiseka leyi Yehovha a hi nyikiki yone?

¹⁸ A hi swi djuli ku ka hi nga yi nyiki lisima a ‘nyiko le ya ku hetiseka’, ku nga Zritu dzra Xikwembu Nkulukumba. (Yk 1:17) Xileswo, i swa lisima ku tama hi yi nyika lisima nyiko leyi. Hi nga yentxa leswo hikuva hi dondzra mazritu lawa ya ku xwenga lawa ma kumekaka ka buku ledzri hi tlhela hi yanakanyisisa ha wone. Hi ndlela leyo, hi nga tiyiseka leswaku Yehovha mutsrali wa Bibele, a ta tovokisa ku tikazrata kwezru nakone hi ta kota ku ‘tiva Xikwembu Nkulukumba’. —Pr 2:5.