1. Yini lekwenta ubonge ngeliBhayibheli?

 SIBONGA kakhulu ngekutsi Jehova Nkulunkulu usinike liBhayibheli! Ngalo, usinika seluleko lesihlakaniphile lesingasisita kutsi sikhone kubeketelela tinkinga lesibhekana nato lamuhla. Uphindze asinike litsemba lelihle ngelikusasa. Kantsi lokubaluleke kakhulu kutsi usebentise liBhayibheli kuze avete buntfu bakhe lobehlukahlukene. Nasicabangisisa ngebuntfu bakhe lobuhle, sitsintseka tinhlitiyo futsi loko kusenta sifune kuba bangani bakhe labakhulu.—Hla. 25:14.

2. Ngutiphi tindlela Jehova latisebentisa kuze endlulisele imilayeto yakhe kubantfu?

² Jehova ufuna bantfu bamati. Kadzeni wenta kutsi labanye bantfu bakhe babe namaphupho, babone imibono futsi watfumela tingilosi kutsi tibanike imilayeto levela kuye. (Num. 12:6; Imis. 10:3, 4) Besingeke sikhone kufundza ngalamaphupho, ngalemibono nangalemilayeto layitfumela ngetingilosi kube loko akuzange kubhalwe phansi. Kungako Jehova enta kutsi kube nemadvodza ‘labhala encwadzini’ loko lafuna kutsi sikwati. (Jer. 30:2) Ngenca yekutsi “indlela yaNkulunkulu weliciniso iphelele,” singaciniseka kutsi lendlela layisebentisako kuze akhulume natsi ikahle kakhulu futsi ilusito.—Hla. 18:30.

3. Yini Jehova layenta kuze aciniseke kutsi liBhayibheli liyalondvolotwa? (Isaya 40:8)

³ Fundza Isaya 40:8. Sekuphele tinkhulungwane teminyaka liVi laNkulunkulu linika emadvodza nebafati labetsembekile seluleko lesihlakaniphile. Kwenteke njani loku? Loyo ngumbuto lomuhle ngobe ekucaleni liBhayibheli belibhalwe emiculwini leyabese iyaguga, ngako lamuhla site lemiculu lebelibhalwe kuyo ekucaleni. Kodvwa Jehova waciniseka kutsi kuba nebantfu labatsite labakopa lemibhalo lengcwele. Nanobe labantfu  lebebakopa imibhalo lengcwele bebanesono, kodvwa bawenta ngekucophelela lokukhulu lomsebenti. Lesinye sati sabhala naku mayelana nemiBhalo yesiHebheru: “Siyaciniseka kutsi kute lenye incwadzi yakadzeni leyakotjwa kahle kwendlula lena.” Nanobe liBhayibheli labhalwa kadzeni, labhalelwa etintfweni letonakalako, futsi labhalwa bantfu labanesono, kepha siyaciniseka kutsi emavi lesiwafundza kulo lamuhla endlulisela imicondvo yeMbhali walo, lokunguJehova.

4. Sitawucoca ngani kulesihloko?

⁴ Jehova unguMtfombo wato “tonkhe tipho letinhle naletiphelele.” (Jak. 1:17) LiBhayibheli lingulesinye setipho letinhle kakhulu Jehova lasiphe sona. Sipho sisitjela lokutsite ngaloyo losiphe sona, sisitjela kutsi usati kahle nekutsi uyatati tidzingo tetfu. Loku kuyafana nangaLoyo losiphe liBhayibheli. Nasihlolisisa lesipho, sifundza lokunyenti ngaJehova. Sifundza kutsi usati kahle nekutsi uyatati tidzingo tetfu. Kulesihloko, sitawucoca ngekutsi liBhayibheli libuveta njani nabu buntfu baJehova lobutsatfu: lokukuhlakanipha, kulunga nelutsandvo. Asesicale sicoce ngetindlela liBhayibheli leliveta ngato kuhlakanipha kwaNkulunkulu.

5. Nguyiphi lenye indlela liBhayibheli leliveta ngayo kuhlakanipha kwaNkulunkulu?

⁵ Jehova uyati kutsi sidzinga seluleko sakhe lesihlakaniphile, futsi sipho lasinike sona lokuliBhayibheli, sigcwele kuhlakanipha kwakhe. Seluleko seliBhayibheli siyabasita bantfu. Liyakugucula kuphila kwabo. Ngesikhatsi Mosi abhala tincwadzi tekucala teliBhayibheli watjela bantfu baNkulunkulu, lokungema-Israyeli watsi: “Lelivi alisilo lite kini, kodvwa lisho kuphila.” (Dut. 32:47) Labo labalalela imiBhalo bangajabula ekuphileni futsi baphumelele. (Hla. 1:2, 3) Nanobe liVi laNkulunkulu labhalwa kadzeni, kodvwa solo linawo emandla ekugucula kuphila kwebantfu. Sibonelo nje, luchungechunge lwetihloko letiku jw.org/zu lolutsi, “IBhayibheli Lishintsha Ukuphila,” linetindzaba tebantfu labangetulu kwa-50 labenta lushintjo lolukhulu ekuphileni kwabo ngenca yekutsi bacala kulalela seluleko seliBhayibheli.—1 Thes. 2:13.

6. Sisho ngani kutsi kute lenye incwadzi lefana neliBhayibheli?

⁶ Kute lenye incwadzi lefana neliVi laNkulunkulu. Sisho ngani? Ngobe uMbhali walencwadzi, lokunguJehova Nkulunkulu, ungusomandla, uhlale akhona futsi kute lohlakaniphe kwendlula yena. Tincwadzi letinyenti tiyachubeka tifundvwa nangemuva kwekutsi babhali bato sebafile, kodvwa seluleko saletincwadzi sivama kungasasebenti ngekuhamba kwesikhatsi. Ngalokwehlukile, timiso letihlakaniphile letiseBhayibhelini tihlale tisebenta; tisite bantfu lebebaphila ngetikhatsi letehlukahlukene. Nasifundza lencwadzi lengcwele futsi sicabangisisa ngaloko lesikufundzako, uMbhali wayo usebentisa umoya wakhe longcwele kuze asisite sibone kutsi singasisebentisa njani seluleko sayo ekuphileni kwetfu. (Hla. 119:27; Mal. 3:16; Heb. 4:12) UMbhali weliBhayibheli ukufuna mbamba kukusita. Loko kufanele kusente sifune kufundza liBhayibheli njalo!

7. LiBhayibheli labasita njani bantfu baNkulunkulu esikhatsini lesendlulile kutsi babe nebunye?

⁷ Lokunye lokukhombisa kutsi liBhayibheli linekuhlakanipha kwaNkulunkulu kutsi lisita bantfu baNkulunkulu babe nebunye. Ngesikhatsi ema-Israyeli angena eVeni Lesetsembiso, ahlala etindzaweni letehlukahlukene. Lamanye aba badwebi, lamanye afuya tinkhomo kantsi lamanye bekabalimi. Bekungaba melula kutsi ema-Israyeli lahlala kulenye indzawo angabi nendzaba nalamanye  ema-Israyeli lahlala kulenye indzawo kulelive. Kodvwa Jehova wahlela kutsi ema-Israyeli ahlangane ndzawonye ngetikhatsi letitsite kuze eve nakufundvwa liVi lakhe futsi lichazwa. (Dut. 31:10-13; Neh. 8:2, 8, 18) Cabanga nje kutsi umIsrayeli lowetsembekile bekativa njani nakefika eJerusalema futsi abone tigidzi talabanye lebebakhonta Nkulunkulu letivela kulolonkhe lelive! Ngako Jehova wasita bantfu bakhe kutsi bahlale banebunye. Ngesikhatsi kusungulwa libandla lebuKhristu, bekunemadvodza nebafati lebebakhuluma tilwimi letinyenti. Labanye bekubantfu labahlonishwako kantsi labanye bebaphansi futsi labanye bebanjingile kantsi labanye bebeswele. Kodvwa ngenca yekutsi bebatsandza imiBhalo, bebakhonta Nkulunkulu weliciniso ngebunye. Labo lababa ngemaKhristu bebangakhona kucondza liVi laNkulunkulu ngekutsi basitwe ngulamanye emaKhristu nangekutsi bahlangane ndzawonye.—Imis. 2:42; 8:30, 31.

8. LiBhayibheli libasita njani bantfu baJehova kutsi babe nebunye lamuhla?

⁸ Nkulunkulu wetfu lohlakaniphile uyachubeka afundzisa bantfu bakhe futsi abasita kutsi babe nebunye asebentisa liBhayibheli. LiBhayibheli licuketse onkhe emaciniso lamayelana naJehova lokufanele siwati. Sihlangana njalo emihlanganweni yelibandla, emihlanganweni yesigodzi neyesifundza kuze sive nakufundvwa liBhayibheli, lichazwa futsi kucocwa ngalo. Jehova usebentisa kakhulu liBhayibheli  kuze asite bantfu bakhe “bamkhonte bahlangene lihlombe ngelihlombe.”—Zef. 3:9.

9. Ngubuphi buntfu lobudzingekako kuze sicondze umlayeto weliBhayibheli? (Lukha 10:21)

⁹ Cabanga nganabu lobunye bufakazi lobuveta kuhlakanipha kwaJehova. Wenta kutsi tincenye letinyenti temiBhalo tibhalwe ngendlela yekutsi ticondvwe kuphela ngulabo labatfobekile. (Fundza Lukha 10:21.) Bantfu etindzaweni letehlukahlukene bayalifundza liBhayibheli. Lesinye sati satsi liBhayibheli “aligcini nje ngekuba yincwadzi lefundvwa kakhulu kunato tonkhe, kodvwa liphindze libe yincwadzi lefundvwa ngekucophelela.” Kodvwa licondvwa kuphela ngulabo labatfobekile nalabakwentako loko lelikushoko.—2 Khor. 3:15, 16.

10. Nguyiphi lenye indlela liBhayibheli leliveta ngayo kuhlakanipha kwaJehova?

¹⁰ Siphindze sikubone nangalenye indlela kuhlakanipha kwaJehova eBhayibhelini. Akagcini nje ngekusebentisa imiBhalo kuze asifundzise silicembu kodvwa uphindze ayisebentise kuze afundzise futsi advudvute ngamunye wetfu. Nasifundza liBhayibheli, sonkhe siyabona kutsi Jehova unendzaba natsi. (Isa. 30:21) Nawubhekene nenkinga, kukangakhi uvula liBhayibheli futsi ufundze livesi lokubonakala ngatsi libhalelwe wena? Nobe kunjalo, liBhayibheli labhalelwa kutsi licondvwe tigidzi tebantfu. Kwenteka njani kutsi loko lokubhalwe kulo kungaphelelwa sikhatsi futsi kube nguloko lokudzingako? Loku kungenca yekutsi uMbhali walo nguye kuphela lohlakaniphe kakhulu.—2 Thim. 3:16, 17.

11. Nkulunkulu wakhombisa njani kutsi akakhetsi ngesikhatsi kubhalwa liBhayibheli?

¹¹ Kulunga kungulobunye buntfu baJehova. (Dut. 32:4) Kulunga kuhlobene nekungakhetsi, futsi Jehova akakhetsi. (Imis. 10:34, 35; Rom. 2:11) Loko kubonakala etilwimini letasetjentiswa nakubhalwa liBhayibheli. Linyenti letincwadzi tekucala kuletingu-39 teliBhayibheli tabhalwa ngesiHebheru lebekululwimi lebelicondvwa bantfu baNkulunkulu ngaleso sikhatsi. Nobe kunjalo, ngesikhatsi semaKhristu ekucala, bantfu labanyenti bebakhuluma siGriki. Ngako tincwadzi letingu-27 teliBhayibheli tabhalwa ngalololwimi. Jehova akazange ancume kutsi liVi lakhe libhalwe ngelulwimi lunye. Lamuhla kunebantfu labangaba tigidzigidzi letingu-8 emhlabeni labakhuluma tilwimi letinyenti. Kwenteka njani kutsi bantfu labanyenti kangaka bafundze ngaJehova?

12. Nguyiphi lenye indlela logcwaliseke ngayo Danyela 12:4 kulamalanga ekugcina?

¹² Asebentisa umphrofethi Danyela, Jehova wetsembisa kutsi ngesikhatsi sekuphela, “lwati lweliciniso” lolutfolakala eBhayibhelini “lutawuba lunyenti.” Bantfu labanyenti bebatalicondza. (Fundza Danyela 12:4.) Kuhumusha, kushicilela kanye nekusakata emaBhayibheli kanye netincwadzi letisekelwe kulo kungulenye indlela lolwati lolube lunyenti ngayo. LiBhayibheli liyincwadzi lehunyushwe kakhulu nalesakatwe kakhulu kutendlula tonkhe emhlabeni. Lamanye emahumusho eliBhayibheli lakhicitwa tinkampane adule kakhulu. Kuze kube ngunyalo, bantfu baJehova bahumushe liVi laNkulunkulu liphelele nobe liyincenye ngetilwimi letingetulu kwa-240, futsi nobe ngubani angalitfola mahhala. Ngenca yaloko, bantfu labavela kuto tonkhe tive bafundza ‘tindzaba letimnandzi teMbuso’ ngaphambi kwekutsi kuphela kufike. (Mat. 24:14) Nkulunkulu wetfu lolungile ufuna kunika bantfu labanyenti kakhulu litfuba lekumati ngekutsi bafundze liVi lakhe. Loko kungenca yekutsi sonkhe usitsandza kakhulu.

13. Sisho ngani kutsi liBhayibheli liveta kutsi Jehova unelutsandvo? (Johane 21:25)

¹³ LiBhayibheli lisisita sibone kutsi buntfu baJehova lobuhamba embili lutsandvo. (1 Joh. 4:8) Cabanga ngaloko Jehova lakufaka eBhayibhelini naloko langazange akufake. Wasinika loko lesikudzingako kuze sibe nebuhlobo lobuhle naye, sibe nemphilo lejabulisako nyalo futsi sitfole kuphila lokuphakadze. Nanobe kunjalo, ngenca yekutsi Jehova uyasitsandza, akazange asinike lwati lolunyenti kakhulu lolutawuba ngetulu kwetfu.—Fundza Johane 21:25.

14. Nguyiphi lenye indlela liBhayibheli leliveta ngayo kutsi Nkulunkulu uyasitsandza?

¹⁴ Jehova uphindze wakhombisa kutsi uyasitsandza ngekutsi akhulume natsi ngendlela leveta kutsi uyasihlonipha. EBhayibhelini, akasiniki luhla loludze lwemitsetfo lwako konkhe lokufanele sikwente nalokungakafaneli sikwente. Kunaloko usebentisa tindzaba letenteke mbamba, tiphrofetho kanye neseluleko lesilusito kuze asisite sente tincumo letikahle. Ngaleyondlela, liVi laNkulunkulu lenta kutsi simtsandze futsi simlalele ngalokusuka enhlitiyweni.

15. (a) LiBhayibheli likhombisa njani kutsi Jehova uyasikhatsalela? (b) Kulesitfombe, lentfombatanyana, lomzalwane losemusha nalodzadze losakhulile bacabanga ngabobani lokukhulunywa ngabo eBhayibhelini? (Gen. 39:1, 10-12; 2 Khos. 5:1-3; Luk. 2:25-38)

¹⁵ LiBhayibheli liveta kutsi Jehova usikhatsalela kakhulu. Kanjani? Linetindzaba letinyenti letiveta indlela bantfu labativa ngayo. Siyayicondza indlela lebebativa ngayo ngobe bebabantfu ‘labanemiva lefana neyetfu.’ (Jak. 5:17) Lokubaluleke kakhulu kutsi nasibona indlela Jehova labaphatsa ngayo, sibese sibona  ngalokucacile kutsi “Jehova unelutsandvo lolukhulu futsi unemusa.”—Jak. 5:11.

16. Yini lesiyifundza ngaJehova nasifundza ngalabo labenta emaphutsa lokukhulunywa ngabo eBhayibhelini? (Isaya 55:7)

¹⁶ LiBhayibheli liphindze livete nangalenye indlela kutsi Jehova uyasitsandza. ImiBhalo iyasicinisekisa kutsi Nkulunkulu wetfu angeke aze asilahle nakwenteka senta emaphutsa. Ema-Israyeli bekona kuJehova tikhatsi letiphindzaphindziwe, kodvwa bekatsi nakaphendvuka mbamba Nkulunkulu awacolele. (Fundza Isaya 55:7.) EmaKhristu ekucala nawo bewati kutsi Nkulunkulu uwatsandza kakhulu. Umphostoli Pawula aphefumulelwe, wakhutsata emaKhristu kutsi ‘atsetselele futsi advudvute’ umuntfu lobekente sono lesikhulu kepha lobesekaphendvukile. (2 Khor. 2:6, 7; 1 Khor. 5:1-5) Kusijabulia kakhulu kutsi Jehova bekangabalahli bantfu bakhe ngenca yekutsi bente emaphutsa! Kunaloko, bekabasita ngelutsandvo, abalungise futsi bekabemukela kutsi baphindze babe bangani bakhe. Wetsembisa kwenta lokufanako nalamuhla kuto tonkhe toni letiphendvukako.—Jak. 4:8-10.

17. Yini leyenta liBhayibheli libe sipho lesihle?

¹⁷ Jehova usiphe sipho lesihle. Yini leyenta liVi lakhe libe sipho lesihle? Njengobe sesifundzile, liveta kuhlakanipha kwakhe, kulunga kanye nelutsandvo lwakhe. LiBhayibheli likhombisa kutsi Jehova ufuna simati. Ufuna sibe bangani bakhe.

18. Singakhombisa njani kutsi siyabonga kuJehova ‘ngesipho lesihle’ lesiliBhayibheli?

¹⁸ Asifuni kusitsatsela phansi ‘lesipho lesihle’ lesiliVi laNkulunkulu. (Jak. 1:17) Ngako shengatsi singachubeka sikhombisa kutsi siyabonga ngalo. Loko singakwenta ngekutsi silifundze futsi sicabangisise ngalesikufundza kulo. Nasenta njalo, singaciniseka kutsi uMbhali walo utasibusisa ngemetamo lesiyentako futsi ‘sitawuba nelwati ngaNkulunkulu.’—Taga 2:5.